1-2. Hi ku ya hi buku dzra Amapsalma 34:8, hi nga swi vonisa kuyini leswaku Yehovha hi lwenene?

YANAKANYA hi loko mhunu o ku nyika swakuda leswi u nga samikiki u da. U nga dondzra xa kukazri loko u swi lavisa, u twa ku nun’hwela ka swone, u dondzra ndlela leyi va swekisiki xiswone, ni ku vutisa van’wana leswi va swi vonisaka xiswone. Kambe u to tiva leswaku swa nandzrika kumbe im-him loko u swi dzringa.

² Hi nga kota ku vona leswaku Yehovha i munene loko hi dondzra Bibele ni mabuku yezru ni loko hi twa vambeni na va hi byela hi matovoko lawa va ma yamukeliki ka Yehovha . Kambe hi to kota ku tiva hi ku helela leswaku Yehovha hi lwenene loko hine ha wuswezru hi dzringa wunene byakwe. (Dondzra Amapsalma 34:8.) Vona ndlela leyi leswo swi nga yentxekaka ha yone. A hi nge u djula ku nghenela ntizro wa nkama hinkwawu. Kambe akuva u tlhaselela kungu ledzro u fanela ku nabyalisa wutomi byaku. Swi nga yentxeka u same u dondzra hi ta xidumbiso xa Yesu, xa leswaku loko hi zrangisa Mfumu, Yehovha a ta hi nyika hinkwaswu leswi hi swi vilelaka. Kambe swi nga yentxeka u nge si na ku vona ku hetiseka ka mazritu lawa. (Mt 6:33) Nambi tanu, u dumba hi ku helela xidumbiso xa Yesu nakone u pumba mintxhumu leyi u yi xavaka ni nkama lowu u wu hetaka ntizrweni, nakone u beka miyanakanyu yaku ka ku zrezra. Loko u yentxa leswo, u swi vona ha wuswaku leswaku Yehovha ha kunene awa zron’weka hi swivileleko swaku. U ‘nampswa’ u va u swi vona ha wuswaku leswaku Yehovha hi lwenene.

3. Hi ku ya hi buku dzra Amapsalma 16:1, 2, i mani a yamukelaka mintxhumu leyinene ka Yehovha?

³ Yehovha ‘i wa hombe ku hinkwavu’, ku patsra ni ka lava nga mu tivikiki. (Ps 145:9; Mt 5:45) Kambe lava tizrelaka Yehovha hi mbilu hinkwayu va yamukela matovoko manyingi lama hlawulekiki. (Dondzra Amapsalma 16:1, 2.) Xiya mintxhumu yi nga li yingani leyinene leyi Yehovha a hi yentxelaka yone.

4. He yini mintxhumu leyinene leyi Yehovha a nyikaka lava sungulaka ku va vanghanu vake?

 ⁴ Nkama lowu hi tizrisaka leswi Yehovha a hi dondzrisaka swone, hi kota ku vona leswaku wutomi byezru bya yampswa. Hi xikombiso, loko hi sungule ku dondzra Bibele ni ku zrandzra Yehovha, a hi pfune kuva hi hlula mimpimiso ni swihena leswi a swi ta hi tsravukanisa na yene. (Kl 1:21) Nakone nkama lowu hi nga tinyiketela ka Yehovha hi tlhela hi babatisiwa, a hi nyike mintxhumu leyinene leyi yengeselekiki, ku nga lipfalu ledzrinene ni wuxaka bya le kusuhi na yene.​—1Pe 3:21.

5. Xana ntizro wa ku zrezra wu hi pfunisa kuyini ku vona leswaku Yehovha i munene?

⁵ Loko hi hlengela a ntizrweni wa ku zrezra hi kota ku vona hi ndlela leyi yengeselekiki leswaku Yehovha i munene. Xana u ni tingana? Ntalu wezru hi na tone. Swi nga yentxeka na u nge si va Mboni a wu pimisa leswi: “Ni nge txhuki ni gongondzra ka xipfalu xa mhunu lweyi ni kalaka ni nga mu tivi, ngopfungopfu akuva ni khanela hi Bibele.” Kambe namunhla u yentxa leswo nkama ni nkama, nakone hi ku pfuniwa ha Yehovha u ye u swi zrandzra ku zrezra! Handle ka leswo, loko u li ku zrezreni u vona mpfunu wa Yehovha hi tindlela ta ku siyanasiyana. Hi xikombiso, loko u kuma mhunu lwa ku kanetaka, Yehovha a ku pfuna kuva u tama u zrula. Loko u kuma mhunu lwa swi nyonxelaka, Yehovha a ku pfuna kuva u dzrimuka ndzrimana leyi nga pfunaka mhunu lweyo. Nambi loko vhanu va nsimu yaku va nga dzri nyonxeli dzrungula dzrezru, Yehovha a ku nyika ntamu akuva u tama u zrezra.​—Yr 20:7-9.

6. He byini wumboni byimbeni lebyi hi kombaka leswaku Yehovha i munene?

⁶ Ndlela yimbeni leyi Yehovha a hi kombaka ha yone leswaku i munene, i ku va a hi wupfisa a ntizrweni wa ku zrezra. (Yh 6:45) Hi xikombiso, ka ntlhanganu wa xikazri ka vhiki, ku ni swikombiso swa ku bula hi Bibele leswi lulamiseliwiki ha hombe, leswi nga hi pfunaka. Hi kutxiwa kuva hi swi tizrisa loko hi zrezrela vambeni. Swi nga yentxeka a ku sunguleni swi hi kazratela ku tizrisa xikombiso leximpshwa xa ku bula hi Bibele. Kambe loko u tizrisa xikombiso lexo leximpshwa, u nga ha gungula leswaku xi ni mihandzru leyinene a nsin’wini yaku. Handle ka leswo, mintlhanganu yezru ni tinhlengeletanu swi hi kutxa ku dzringisa tindlela timbeni ta ku zrezra ha tone, ta ku kumbe xana a hi ngi ngi ti tizrisa. Kambe swi nga ha tlhela swi djula ku va hi tsrhika wutomi bya ku yampswa lebyi a hi li na byone. Kambe loko hi yentxa leswo, hi nyika Yehovha mukhandlu wa kuva a hi tovokisa. Swoswi, a hi voni matovoko lawa hi nga ma kumaka loko hi dzringisa tindlela letimpshwa ta ku yengesela ntizro wezru ka Yehovha, swi nge na mhaka leswaku hi le ka swiyimu swini. Ntsrhaku, hi ta vona leswi hi nga swi yentxaka akuva hi tlhaselela makungu yezru.

7. Xana he wani matovoko lawa hi ma kumaka loko hi tikazratela ku yentxa leswi yengeselekiki a ntizrweni wezru wa ku zrezra?

⁷ Wuxaka byezru na Yehovha byi ya byi tiya. Vona xikombiso xa nkulu wa bandla lwa vitaniwaka Samuel, * yene ni nsati wake va tizrela a Colômbia. Vone vabidzri a va li maphayona a bandleni dzravu kambe a va djula ku yentxa leswi yengeselekiki a ntizrweni wa ku zrezra. Kambe va txintxe va ya ka bandla ledzri a dzri ni xivileleko lexikulu. Ku yentxa ku txintxa koloko swi djule kuva va tikazrata. Samuel a li: “Hi landzre xilayu lexi nga ka Matewu 6:33 nakone hi yime ku xava leswi a hi nga swi vileli. Kambe xa ku kazrata a ve ku tsrhika yindlu yezru. A yi yakisiwe xileswi a hi swi djulisa xiswone, nakone a hi hetile ku yi hakelela.” Vatekani lavo va gungule leswaku a xiyavelweni xavu leximpshwa a va ta swi kota ku hanya hi mali yitsrongo swinene ku tlula leyi a va li na yone. Samuel a li:  “Hi vone ndlela leyi Yehovha a kongomisaka ha yone gwansu dzrin’wana ni dzrin’wana ledzri hi dzri tekaka ni ndlela leyi a hlamulaka ha yone swikhongoto swezru. Ha swi vona leswaku awa hi nyonxela nakone hi vone lizrandzru dzrake hi ndlela ya ku hlamalisa.” Xana u nga yengesela ntizro waku wa ku zrezra hi ndlela ya kukazri? Loko swi li tanu, dumba leswaku leswo swi ta tiyisa wunghanu byaku na Yehovha nakone yene a ta hlayisa swivileleko swaku.​—Ps 18:25.

8. Xana u dondzre yini ka xikombiso xa Ivan na Viktoria?

⁸ Hi yengesela ku nyonxa kwezru. Vatekani vambeni, Ivan na Viktoria va tizra swanga maphayona a Quirguistão. Va tiyimisele ku nabyalisa wutomi akuva va kota ku hetisisa xiyavelo xin’wana ni xin’wana, ku patsra ni xa ntizro wa ku yaka. Ivan a li: “Ka xiyavelo xin’wana ni xin’wana a hi tinyiketela hi lani hi nga kotaka ha kone. Loko siku dzri hela a hi kazrale ngopfu, kambe a hi zrulile hi tlhela hi nyonxa hikusa a hi swi tiva leswaku a hi tizrisa ntamu wezru a ntizrweni wa Yehovha. Handle ka leswo, hi sungule xinghanu ni vhanu vanyingi nakone ku ni mintxhumu yinyingi ya ku nyonxisa leyi hi yi dzrimukaka. Hinkwaswu leswo swi hi nyike ku nyonxa lokukulu.”​—Mr 10:29, 30.

9. Xana vambeni va swi kotise kuyini ku yengesela ntizro wavu wa ku zrezra nambi loko va li ka swiyimu swa ku kazrata, nakone dzri ve dzrini bindzru dzra kone?

⁹ Hi nga tama hi nyonxa a ntizrweni wa Yehovha nambi loko hi kumana ni swikazratu. Hi xikombiso, Mirreh, nkulu wa mhunu lwa feliwiki hi nuna, nakone a tsrhamaka Mpeladambu wa África, a a tizra swanga dotora. Loko a yime ku tizra, a teke wuphayona. Mirreh a ni mavabyi lama vitaniwaka artrite, lama mu yentxaka a twa ku vavisa swinene loko a famba. O kota ku tizra wora dzrin’we ka nsimu ya muti ni muti, kambe ka nsimu ya mani na mani a tizranyana nkama wa ku leha. A ni timpinda ni swidondzro swa Bibele leswi swin’wana swa swone a fambisaka hi telefone. I yini leswi kutxaka Mirreh akuva a yentxa leswi yengeselekiki a ntizrweni wa Yehovha? A li: “Mbilu yanga yi tale hi lizrandzru ha Yehovha na Yesu Kriste. Nakone minkama hinkwayu ni kombela Yehovha hi xikhongoto akuva a ni pfuna ku yentxa hinkwaswu ni nga swi kotaka a ntizrweni wake.”​—Mt 22:36, 37.

10. Hi ku ya hi buku dzra 1 Petros 5:10, i yini leswi Yehovha a tiyimiseliki ku nyika lava djulaka ku yentxa leswi yengeselekiki a ntizrweni wakwe?

¹⁰ Ku wupfisiwa loku hi ku kumaka ka Yehovha. Kenny, phayona dzra kukazri ledzri tizraka a Maurícia, dzri swi xiyile leswo. Loko a dondzre ntiyiso, a tsrhike ku dondzra a univhersidadi, a babatisiwa, kutani a nhingenela ntizro wa nkama hinkwawu. A li: “Ni tikazratela kuva ni va ni moya wa ku fana ni wa muprofeta Ezaya, loko a ku: ‘Hi mine lwe; zruma mine!’” (Eza 6:8) Kenny a tizre ngopfu ka ku yaka a tlhela a pfunisa ka ku ndzrulutela mabuku lama seketeliwiki a Bibeleni hi lidzrimi dzrake. A li: “Ni kume ku wupfisiwa loku a ni ku vilela akuva ni hetisisa swiyavelo swanga. Kambe Kenny a nga dondzranga ku yentxa ntizro hi ndlela leyinene ntsena. A tlhela a ku: “Ni dondzre ku vona leswi a ni swi yentxa ha hombe ni matsrhamela lawa ni fanelaka ku ma txutxela akuva ni tizrela Yehovha ku yampswa.” (Dondzra 1 Petros 5:10.) Xana na wene u tiyimiselile akuva u wupfisiwa ha Yehovha?

11. I yini leswi vamakwezru va kukazri va le Coréia do Sul va swi yentxiki akuva va yengesela ntizro wavu wa ku zrezra nakone dzri ve dzrini bindzru dzra kone? (Vona xifaniso lexi nga ka kapa.)

¹¹ Nambi vazrezri lava nga ni mfambu va djula ku wupfisiwa akuva va tizrisa mayentxela mampshwa ya ku zrezra ha wone. Hi nkama wa ntungu wa COVID-19, vakulu va bandla dzra kukazri a Coréia do Sul va tsrale va ku: “Vamakwezru va kukazri a va yanakanya leswaku hi kola ka swikazratu swa lihanyu a va nge ti swi kota ku ya a ntizrweni wa ku zrezra, kambe swoswi va zrezra hi ku tizrisa vídeoconferência. Vamakwezru vazrazru lava nga ni ku tlula 80 wa malembe va  dondzre ku tizrisa komputadori nakone namunhla va zrezra minkama hinkwayu.” (Ps 92:14, 15) Xana u navela ku yentxa leswi yengeselekiki a ntizrweni wa ku zrezra u tlhela u vona ndlela leyi Yehovha a nga munene ha yone? Kutani vona magwansu lama nga ku pfunaka akuva u tlhaselela kungu dzroledzro.

12. I yini leswi Yehovha a dumbisaka lava mu dumbaka?

¹² Dondzra ku dumba Yehovha. Loko hi mu dumba hi tlhela hi yentxa hinkwaswu leswi hi nga swi kotaka ntizrweni wake, Yehovha a dumbisa ku hi txhululela matovoko yake. (Mlk 3:10) Fabiola, makwezru wa xisati lwa tsrhamaka Colômbia, a vone Yehovha na a hetisisa xidumbiso xake. A a swi djula ngopfu ku tizra swanga phayona a ntsrhaku ka babatiso dzrake. Kambe akuva nuna wakwe kun’we ni vanakwe vazrazru va kuma swa ku tihanyisa a a fanela ku tizra. Kambe loko ku tlhase nkama wa kuva a yima ku tizra a khongote swi phela ka Yehovha a kombela mpfunu. Fabiola a li: “Hi ntolovelo swi teka nkama wunyingi akuva a mali ya reforma yi humexiwa. Kambe mine swe teka hweti yin’we. Leswo a ve hlolana ha kunene!” Ntsrhaku ka tihweti tibidzri, Fabiola a teke wuphayona. Namunhla wa siku a ni ku tlula 70 wa malembe nakone a tizra swanga phayona ku tlula 20 wa malembe. Ku sukela nkama lowo, a pfune 8 wa vhanu akuva va babatisiwa. Fabiola a li: “Nambi leswi minkama yin’wana a ni titwa na ni hele ntamu, Yehovha a ni pfunile siku ni siku akuva ni tama ni khomelela ka xiyimiso xanga.”

13-14. He swini swikombiso leswi nga ku pfunaka ku dumba Yehovha u tlhela u navela ku yentxa leswi yengeselekiki a ntizrweni wa ku zrezra?

¹³ Yetisela lava dumbiki Yehovha. A Bibele dzri  ni swikombiso swinyingi swa vhanu lava tikazrateliki ku dumbeka ntizrweni wa Yehohva. Ka swiyimu swinyingi, swi djule leswaku va yentxa xa kukazri na va nge si na yamukela matovoko ya Yehovha. Hi xikombiso, Abrahamu a a nga ku tivi lomu a a ya kone. Nambi tanu, Yehovha a tovokise Abrahamu ntsena ntsrhaku ka loko a suke kaya kwake. (Hb 11:8) Yakobe a tovokisiwe hi ndlela ya ku hlawuleka ntsena ntsrhaku ka loko a lwe ni ntsrumi. (Gn 32:24-30) Nakone loko a tiko dzra Israyele dzri djule ku nhingena a Tikweni dzra Xidumbiso, ve kota ku tsremakanya nambu wa Yordane ntsena ntsrhaku ka loko vaprista va pete minenge yavu ka mati.​—Yš 3:14-16.

¹⁴ Hi tlhela hi va ni swikombiso swa Timboni ta Yehovha ta le minkameni ya swoswi leti dumbiki Yehovha ti tlhela ti tikazratela ku yentxa leswi yengeselekiki a ntizrweni wake. Hi xikombiso, makwezru wa kukazri lwa vitaniwaka Payton ni nsati wakwe, Diana, a va zrandzra ku dondzra hi swikombiso swa vamakwezru lava yengeteliki ntizro wavu wa ku zrezra. A va zrandzra swikombiso swa ku fana ni leswi nga ka xiyenge lexi liki, “Eles Se Ofereceram”. * Payton a li: “Loko hi dondzra hi ta mimfambu yavu a swi fana ni loko hi lavisela mhunu na a da swakuda swa ku nandzrika. Loko hi ya hi mu lavisa, a hi ya hi ‘nampswa, hi vona leswaku Yehovha i munene’.” Hi ku famba ka nkama, Payton na Diana va zruzrile akuva va ya tizrela lani ku nga ni xivileleko lexikulu. Xana u sama u dondzra xiyenge lexi? Xana u sama u hlalela mavhidiyu lama nga ni nhlokomhaka leyi liki: Ku Chumayela eTindhawini Leti Nga eKule Swinene Le Australia, ni ledzri liki: Ku Chumayela eNdhawini Leyi Nga eKule swinene Le Irlanda, lama nga ka jw.org? Swiyenge leswo swi nga ku pfuna akuva u vona tindlela ta ku yengesela ntizro waku ka Yehovha.

15. Ha yini swi li swinene ku hlawula ha hombe vanghanu vezru?

¹⁵ Hlawula ha hombe vanghanu vaku. Hi ntolovelo hi djula ku dzringa swakuda swa kukazri loko hi ni lava swi zrandzraka. Hi ndlela leyi fanaka, loko hi ni vhanu lava tizrisaka wutomi byavu akuva va tizrela Yehovha, hi ta swi navela ku yentxa leswi yengeselekiki a ntizrweni wake. Hi leswi yentxekeliki vatekani va kukazri lava vitaniwaka Kent na Veronica. Kent a li: “A vanghanu ni maxaka yezru va hi kutxe ku dzringisa matizrela lamampshwa. Ku va ni xinghanu ni vhanu lava zrangisaka Mfumu ku sungula a wuton’wini byavu, swi hi yentxe hi navela ku dzringisa ku yentxa ntxhumu leximpshwa. Swoswi Kent na Veronica va tizra swanga maphayona ya ku hlawuleka a Sérvia.

16. Hi ku ya hi xifananiso xa Yesu lexi nga ka Luka 12:16-21, ha yini hi fanela ku tiyimisela ku titsrona swa kukazri?

¹⁶ Titsrone swa kukazri. A swi vileli kuva hi tsrhika hinkwaswu leswi hi nga na swone akuva hi nyonxisa Yehovha. (Ekl 5:19, 20) Kambe loko hi txhava ku titsrona swa kukazri akuva hi yengesela ntizro wezru ka Yehovha, hi nga ha wela ndzringweni wa ku fana ni lowu weliki wanuna wa xifananiso xa Yesu. Wanuna lwiyani a a swi djula swinene ku va ni wutomi bya ku yampswa lakakuva a tsrhike ntizro wa Xikwembu Nkulukumba. (Dondzra Luka 12:16-21.) Christian, makwezru wa kukazri lwa tsrhamaka França, a li: “A ni nga tizrisi nkama kumbe ntamu wanga akuva ni tizrela Yehovha kumbe akuva ni va ni ndangu wanga.” Yene ni nsati wake va teke xiboho xa ku tizra swanga maphayona. Kambe akuva va kota ku yentxa leswo, a va fanela ku tsrhika mintizro yavu. Akuva va kota ku tiwundla va sungule ku tizra ka ku basisa nakone va dondzre ku hanya hi switsrongo. Xana ku tikazrata koloko ku pfunile? Christian a li: “Swoswi hi swi zrandzra swinene ku zrezra, nakone hi nyonxa ngopfu loko hi vona swidondzro ni timpinda tezru na ti dondzra ha Yehovha.”

17. I yini lexi nga ha hi sivelaka ku dzringisa mazrezrela lamampshwa?

 ¹⁷ Tiyimisele ku dondzra mayentxela lamampshwa. (Min 17:16, 17; 20:20, 21) Shirley, phayona dzra kukazri ledzri tsrhamaka Estados Unidos, a a fanela ku titwananisa ni mazrezrela hi nkama wa ntungu wa COVID-19. A ku sunguleni a a txhava ku zrezra hi telephone. Kambe loko va ve ni vhiki dzra ku hlawuleka, Shirley a kume ku wupfisiwa. Ku sukela kolanu, a heta nkama wunyingi na a li ku zrezreni hi telefone. Shirley a li: “A ku sunguleni a swi txhavisa, kambe swoswi ni swi zrandzra ngopfu ku zrezra hi telefone. Hi kota ku tlhaselela vhanu vanyingi ku tlula ka nsimu ya muti ni muti!”

18. I yini swi nga hi pfunaka loko hi kumana ni swikazratu nkama lowu hi djulaka ku yentxa leswi yengeselekiki a ntizrweni wa Yehovha?

¹⁸ Hamba xiyimiso u va u xi landzra. Loko u kumana ni xikazratu xa kukazri, khongota ka Yehovha. Ntsrhaku, tizrisa miyanakanyu yaku akuva u tibekela kungu. (Pr 3:21) Sonia, phayona dzra kukazri dzra nkama hinkwawu ledzri pfunisaka ka nsimu ya lidzrimi dzra xiromani a Europa, a li: “Ni swi zrandzra ngopfu ku tsrala xiyimiso xanga ka papela. Ntsrhaku, ni dzri lema ka mbangu lowu vonekaka. Ka xitanti xanga ni beke dezenyu dzra xitaratu lexi nga ni tindlela tibidzri. Loko ni djula ku teka xiboho xa kukazri, ni lavisa dezenyu ledzriyani kutani ni pimisa leswi: “Xana xiboho lexi xi ta ni yisa ka ndlela yini ya kone?” Sonia a tama a va ni vonela dzrinene loko ku humelela xikazratu. A li: “Xiyimu xin’wana ni xin’wana leximpshwa xi nga fana ni khumbi ledzri pfalaka ndlela yanga kumbe buluhwa ledzri ni tekaka ni ya ka ndlela yimbeni​—swi ta ya hi ndlela leyi u yi vonaka ha yone mintxhumu.”

19. Xana hi fanela ku tiyimisela ku yentxa yini?

¹⁹ Yehovha a hi tovokisa hi tindlela tinyingi. Nakone hi nga kombisa leswaku ha tlangela tovoko dzrin’wana ni dzrin’wana ledzri a hi nyikaka dzrone. Hi ndlela yini? Hi ku va hi yentxa hinkwaswu leswi hi nga swi kotaka akuva hi dzrumisa vito dzrake. (Hb 13:15) Swi nga yentxeka u kuma tindlela letimpshwa ta kuva u yengesela ntizro waku ka Yehovha. Loko u yentxa leswo u ta yamukela matovoko lama yengeselekiki ka Yehovha. Xileswo, tiyimisele kuva siku ni siku u ‘nampswa kutani u vona leswaku Yehovha i munene’. Hi ndlela leyo, u ta fana na Yesu, lwa tiki: ‘A swakuda swanga hi leswaku ndzri yentxa ku zrandzra ka lweyi a ndzri zrumiki, ndzri hetisa ni ntizro wakwe.’​—Yh 4:34.