1-2. Mwakubverana na Masalmo 34:8, tisafunika kucitanji toera tikwanise kuona kuti Yahova ndi wadidi?

NYEREZERANI kuti mwapaswa cakudya cakuti cipo mwacidya kale. Panango imwe munacidziwa mungacidinga mwadidi, mungabva kununkhira kwaco, mungasaka kudziwa kuti cisaphikwa tani, peno kusaka maonero a anthu anango thangwi ya cakudya ceneci. Ngakhale tenepo, njira yadidi yakudziwa cakudya ceneci ndi kucilawira mwekene.

² Ife tinakwanisa kudziwa kuti Yahova ndi wadidi mukuleri Bhibhlya na kupfundza mabukhu athu. Kusiyapo pyenepi, ife tinakwanisambo kuona kuti Yahova ndi wadidi mukubvesera anango angalonga thangwi ya nkhombo zidaapasa Yahova. Mbwenye ife tinakwanisa kubvesesa kuti Yahova ndi wadidi ‘tingayesera’ tekhene udidi wace. (Lerini Masalmo 34:8.) Citsandzo cinatowera cinatiphedza toera kuona kuti tinacita tani pyenepi. Tendeni tinyerezere kuti tisafuna kutumikira Yahova m’basa ya ndzidzi onsene, mbwenye toera tikwanise kucita pyenepi tisafunika kululupisa umaso wathu. Panango ife taleri kazinji kene mafala a Yezu akuti tingaikha Umambo wa Mulungu pa mbuto yakutoma, Yahova anadzatipasa pinthu pyakufunika kuna ife. Mbwenye ife cipo taona Yahova mbacita pyenepi kuna ife. (Mat. 6:33) Ngakhale tenepo, ife tisakhulupira mafala a Yezu. Natenepa ife tisagula pinthu pyakucepa, pontho tisapungula ndzidzi wa basa yathu ya kudziko toera tikwanise kukhala na ndzidzi uzinji m’basa yakumwaza mphangwa. ‘Tingayesera’ Yahova munjira ineyi, tinakwanisa kuona kuti mwandimomwene iye asatitsalakana.

3. Mwakubverana na Masalmo 16:1, 2, mbani anatambira nkhombo za Yahova?

³ Yahova ndi ‘wadidi kuna onsene,’ ngakhale kuna anthu akuti nee asandziwa. (Masal. 145:9; Mat. 5:45) Mbwenye makamaka kuna ale akuti asafuna Yahova mbantumikira na ntima onsene, asapaswa nkhombo zizinji kakamwe. (Lerini Masalmo 16:1, 2.)  Tendeni tione pinthu pingasi pyadidi pisaticitira Yahova.

4. Kodi Yahova asapangiza tani udidi wace kuna ale anatoma kunfendedzera?

⁴ Ndzidzi onsene unaphatisira ife pinthu pinatipfundzisa Yahova, ife tisakwanisa kuona kuti pyenepi pisatiphedza kakamwe mu umaso wathu. Mwacitsandzo, pidapfundza ife thangwi ya iye, ife tatoma kunfuna, pontho iye atiphedza toera kusiya kucita pinthu pyakuipa. (Akol. 1:21) Mu ndzidzi udaperekeka ife kuna Yahova mbatibatizwa, ife takwanisa kuona kuthimizirika kwa udidi wa Yahova thangwi yakukhala na cikumbuntima cakucena na kukhala na uxamwali wakuwanga na iye.—1 Ped. 3:21.

5. Kodi tisakwanisa tani kuona udidi wa Yahova mu ndzidzi unamwaza ife mphangwa?

⁵ Ife tisapitiriza kuona udidi wa Yahova mu ndzidzi unamwaza ife mphangwa. Kodi imwe ndimwe munthu wamanyadzo? Atumiki azinji a Yahova alimbo na manyadzo. Panango mbamudzati kukhala m’bodzi wa Mboni za Yahova, imwe nee mukhadikhira kuti mbamudaenda pa nyumba ya munthu wakuti nee musandziwa toera kucedza naye mphangwa za m’Bhibhlya. Mbwenye lero, imwe musacita pyenepi kazinji kene. Pontho na ciphedzo ca Mboni za Yahova imwe musamwaza mphangwa mwakutsandzaya. Kusiyapo pyenepi, Yahova asakuphedzanimbo munjira zakusiyana-siyana. Mwacitsandzo, iye asakuphedzani toera kukhala wakukhurudzika munthu anamwazira imwe mphangwa angakutawirani mwaukali. Pontho Yahova asakuphedzani toera kukumbuka lemba yakuti inaphedza munthu anamwazira imwe mphangwa. Munjira inango, iye asakupasani mphambvu toera kupitiriza kumwaza mphangwa, maseze anthu akhonde kukubveserani.—Yer. 20:7-9.

6. Kodi njira zinatipfundzisa Yahova toera kumwaza mphangwa zisapangiza tani udidi wace?

⁶ Yahova asapangizambo udidi wace kuna ife mu kutipfundzisa toera tikhale na maluso akumwaza mphangwa. (Juwau 6:45) Mwacitsandzo, pa misonkhano ya pakati pa sumana, ife tisaona makhundu anapangiza kuti tinamwaza tani mphangwa mwadidi, pontho tisakulumizwa toera kuphatisira makhundu anewa m’basa yakumwaza mphangwa. Pakutoma, panango pinakhala pyakunentsa kuphatisira maonero anewa, mbwenye tingaaphatisira tinakwanisa kuona kuti iwo asaphedza kakamwe m’basa yakumwaza mphangwa. Kusiyapo pyenepi, pa misonkhano ya mpingo na misonkhano ya gawo, ife tisapfundziswa njira zipswa zakumwaza mphangwa zakuti panango tidzati kuziphatisira. Njira zenezi panango zinakhalambo zakunentsa kuna ife, mbwenye tingaziphatisira Yahova anatipasa nkhombo. Cincino tendeni tione nkhombo zingasi zinafuna kutipasa Yahova tingawangisira kuphatisira njira zipswa zinatipfundzisa iye, mwakukhonda tsalakana makhaliro athu. Buluka penepo, tinaona njira zinafuna kutiphedza toera kuthimizira utumiki wathu.

7. Ndi nkhombo zipi zinafuna kukhala na ife tingawangisira toera kuthimizira utumiki wathu?

⁷ Ife tisakhala na uxamwali wakuwanga kakamwe na Yahova. Onani citsandzo ca nkulu wa mpingo unango anacemerwa Samuel, * wakuti asatumikira ku Kolombiya pabodzi na nkazace. Banja ineyi ikhakomerwa na kutumikira ninga apainiya mu mpingo mwawo, mbwenye iwo akhafuna kuthimizira utumiki wawo mukuenda katumikira mu mpingo wakuti ukhafuna ciphedzo. Toera akwanise kucita pyenepi, iwo akhafunika kusiya kucita pinthu pinango pikhakomerwa na iwo. Samuel alonga: “Ife taphatisira lemba ya Mateu 6:33, pontho tasiya kugula pinthu pyakuti nee pikhali pyakufunika kuna ife. Mbwenye cinthu cakunentsa kakamwe kuna ife cikhali kusiya nyumba yathu, thangwi ikhadamangwa ninga mukhafunira ife, pontho  nee taimangisa na dinyero yakufiyari.” Pidafuluka iwo mbaenda ku mpingo ukhafuna ciphedzo, iwo nee akhaphatisira dinyero izinji ninga pikhacita iwo kale. Samuel athimiza: “Ife takwanisa kuona njira ikhatitsogolera Yahova na njira ikhatawira iye maphembero athu. Ife tikhaona kuti Yahova asakomerwa na ife, pontho asatifuna kakamwe.” Kodi imwe munakwanisambo kuthimizira utumiki wanu? Khala munakwanisa, khalani na cinyindiro cakuti munakhala na uxamwali wakuwanga na Yahova, pontho iye anakutsalakanani.—Masal. 18:25.

8. Mwapfundzanji na mafala adalonga Ivan na Viktoria?

⁸ Ife tisakomerwa na utumiki wathu. Onani mafala adalonga Ivan na Viktoria, banja yakuti isatumikira ninga apainiya ku Kirgistau. Iwo alulupisa umaso wawo toera akwanise kuperekeka m’mabasa akusiyana-siyana, kuphatanizambo mabasa akumanga nyumba mu gulu yathu. Ivan alonga: “Ife tikhaphata mwaphinga mabasa onsene akhapaswa ife. Maseze pakumala kwa ntsiku tikhali akuneta, ife tikhali akutsandzaya thangwi tikhadziwa kuti taphatisira mphambvu zathu toera kuphedzera mabasa a Yahova. Kusiyapo pyenepi, ife tikhalimbo akutsandzaya thangwi yakucita axamwali azinji apswa, pontho thangwi ya pinthu pizinji pyakutsandzayisa pikhacita ife.”—Marko 10:29, 30.

9. Ninji pinacita mulongo Mirreh mwakukhonda tsalakana utenda wace, pontho ndi nkhombo zipi zinakhala na iye?

⁹ Ife tisakhala akutsandzaya m’basa ya Yahova, maseze tisathimbana na pinentso. Mwacitsandzo, mulongo unango wa nzice anacemerwa Mirreh anakhala ku Madokero a Dzuwa a Afrika akhaphata basa ninga enfermero, mbwenye pidareformari iye atoma kutumikira ninga mpainiya. Mulongo Mirreh ali na utenda wakuti usancitisa kukhonda kufamba mwadidi, na thangwi ineyi asamala ndzidzi ubodzi basi pakumwaza mphangwa nyumba na nyumba. Mbwenye iye asakwanisa kumwaza mphangwa mu ndzidzi uzinji mukuphatisira karinya. Iye ali na maulendo akubwereza na mapfundziro a Bhibhlya mazinji, pontho anango asaacitisa mukuphatisira telefoni. Thangwi yanji Mirreh asafuna kucita pizinji m’basa ya Yahova? Iye alonga: “Ine ndisafuna kakamwe Yahova na Yezu Kristu. Pontho kazinji kene ndisacita phembero kuna Yahova toera andiphedze kucita pyonsene pinakwanisa ine m’basa yace.”—Mat. 22:36, 37.

10. Mwakubverana na 1 Pedhru 5:10, ndi nkhombo zipi zinakhala na ale anawangisira toera kucita pizinji m’basa ya Yahova?

¹⁰ Ife tisapfundziswa pinthu pizinji na Yahova. Kenny wakuti ndi mpainiya anatumikira ku Maurício, akwanisa kuona undimomwene unoyu. Pidapfundza iye undimomwene wa Bhibhlya, iye asiya kupfundza ku universidhadhe, abatizwa, buluka penepo atoma kutumikira Yahova m’basa ya ndzidzi onsene. Iye alonga: “Ine ndisawangisira kuphatisira mafala a mprofeta Izaiya adalonga iye kuti: ‘Ndiri pano! Nditumeni!’” (Iza. 6:8) Kenny aphedzera mabasa mazinji akumanga, pontho aphedzerambo basa yakuthumburuza mabukhu mu cilongero cace. Iye alonga: “Ine ndapfundziswa pinthu pizinji toera ndikwanise kucita mwadidi mabasa adapaswa ine.” Mbwenye kusiyapo pyenepi, iye apfundzambo pinthu pinango pizinji. Kenny athimiza: “Ine ndapfundza pinthu pinango pyakuti nee mbidakwanisa kupicita, pontho ndapfundza kukulisa makhaliro akuti andiphedza toera kukhala ntumiki wadidi wa Yahova.” (Lerini 1 Pedhru 5:10.) Panango imwe munakwanisambo kucita macinjo toera Yahova akwanise kukupfundzisani pinthu pizinji.

11. Ndi kuwangisira kupi kudacita alongo atatu a ku Koreya do Sul toera kuthimizira utumiki wawo, pontho ndi nkhombo zipi zidakhala na iwo? (Onanimbo foto iri patsamba yakutoma.)

¹¹ Ngakhale abale na alongo akuti ali na pyaka pizinji mu undimomwene asapfundziswambo pinthu pizinji angathimizira utumiki wawo. Mu ndzidzi wa utenda wa Koronaviru, akulu a mpingo anango a ku Koreya do Sul alemba:  “Abale na alongo akuti nee akhakwanisa kumwaza mphangwa thangwi ya utenda, cincino asakwanisa kumwaza mphangwa mukuphatisira vidhyukonferensiya. Alongo atatu a pyaka pyakupiringana 80 apfundza kuphatisira komputadhori toera kumwaza mphangwa, pontho cincino iwo asamwaza mphangwa kazinji kene mukuphatisira njira zenezi.” (Masal. 92:14, 15) Kodi imwe musafuna kuthimizira utumiki wanu mbamuyesera kuona udidi wa Yahova? Onani pinthu pingasi pyakuti munakwanisa kupicita toera kukwanirisa cifuno canu.

12. Kodi Yahova apikira toera kucitanji kuna ale anan’nyindira?

¹² Nyindirani Yahova. Iye apikira kuti anatipasa nkhombo zizinji tingan’nyindira mbatiwangisira toera kucita basa yace. (Mal. 3:10) Mulongo unango wa ku Kolombiya anacemerwa Fabiola aona Yahova mbakwanirisa pikiro ineyi kuna iye. Iye akhafuna kutumikira ninga mpainiya wa ndzidzi onsene pidamala iye kwene kubatizwa. Mbwenye iye akhafunika kuphata basa toera kutsalakana mamunace na anace atatu. Natenepa mu ndzidzi ukhafuna iye ku reformari acita phembero kuna Yahova toera am’phedze. Iye alonga: “Kazinji kene pasakwata ndzidzi uzinji toera anthu atome kutambira kobiri angareformariwi. Mbwenye ine ndatoma kutambira mwezi waciwiri pakumala ku reformariwi. Pyenepi pikhali pyakudzumatirisa kakamwe.” Pidapita miyezi miwiri mulongo Fabiola atoma kutumikira ninga mpainiya. Cincino iye ali na pyaka pyakupiringana 70, pontho asatumikira ninga mpainiya mu pyaka pyakupiringana 20. Mu pyaka pyenepi pyonsene, iye aphedza  anthu asere mpaka kubatizwa. Iye athimiza: “Maseze midzidzi inango ndisatsukwala, ntsiku zonsene Yahova asandiphedza toera ndipitirize kutumikira ninga mpainiya.”

13-14. Ndi pitsandzo pipi pyakuti pinakuphedzani toera kunyindira Yahova mbamuthimizira utumiki wanu?

¹³ Pfundzani kubulukira mu pitsandzo pya anthu adanyindira Yahova. M’bhibhlya muli na pitsandzo pizinji pya anthu akuti acita pinthu pizinji m’basa ya Yahova. Kazinji kene, atumiki anewa toera apaswe nkhombo iwo akhafunika kupangiza kuti asanyindira Yahova. Mwacitsandzo, Abhrahamu apaswa nkhombo na Yahova pidamala iye kufuluka mu dziko yace mbaenda ‘ku dziko yakuti nee akhaidziwa.’ (Aheb. 11:8) Kusiyapo pyenepi, Yakobe apaswa nkhombo pidamala iye kuthimbana na anju. (Gen. 32:24-30) Pontho mu ndzidzi ukhali Aizraeli cifupi toera kupita mu Dziko Yakupikirwa, iwo akwanisa kuwambuka Nkulo wa Yordani mu ndzidzi udaponda anyantsembe madzi a mu nkulo unoyu.—Yos. 3:14-16.

¹⁴ Imwe munakwanisambo kupfundza kubulukira mu pitsandzo pya abale na alongo azinji a ntsiku zino akuti akwanisa kuthimizira utumiki wawo thangwi ya kunyindira Yahova. Mwacitsandzo, m’bale Payton na nkazace Diana asakomerwa na kuleri pitsandzo pya abale na alongo adathimizira utumiki wawo m’basa ya Yahova. Pitsandzo pyenepi pisagumanika pa khundu yakuti “Iwo Aperekeka.” * Payton alonga: “Tingaleri pitsandzo pyenepi tisapibva ninga tikuona munthu wakuti ali kudya cakudya cakukoma kakamwe. Mu ndzidzi unaona ife pitsandzo pyenepi, ife tisafuna kakamwe ‘kuyesera toera tione kuti Yahova ndi wadidi.’” Natenepa, Payton na Diana afuluka mbaenda katumikira ku mbuto yakuti iri na amwazi mphangwa akucepa. Kodi imwe mwaleri pitsandzo pyenepi? Kodi imwe mwaona mavidhyu akuti Pregação em Territórios Isolados—Austrália na Pregação em Territórios Isolados—Irlanda anagumanika mu jw.org? Mavidhyu anewa anakuphedzani toera kugumana njira zakuthimizira utumiki wanu.

15. Kodi axamwali adidi anatiphedza tani?

¹⁵ Sankhulani axamwali adidi. Tingakhala na anthu anango ndi pyakukhonda nentsa kudya cakudya cinadya iwo, maseze kuti cipo tacidya kale. Munjira ibodzi ene, tingacita uxamwali na anthu akuti asaikha Yahova pa mbuto yakutoma mu umaso wawo, ndi pyakukhonda nentsa kuna ife kugumana njira toera kuthimizira utumiki wathu. Pyenepi pyacitika kuna Kent na nkazace Veronica. Kent alonga: “Axamwali athu na acibale athu atiphedza toera tiyesere njira zipswa kuti tithimizire utumiki wathu. Ife taona kuti kucita uxamwali na anthu akuti asaikha Umambo wa Mulungu pa mbuto yakutoma ndi pyadidi thangwi pyatipasa cinyindiro toera kuthimizira utumiki wathu.” Lero, Kent na Veronica asatumikira ninga apainiya akupambulika ku Sérvia.

16. Mwakubverana na nsangani udalonga Yezu pa Luka 12:16-21, thangwi yanji tisafunika kusiya pinthu pinango pinakomerwa na ife?

¹⁶ Siyani pinthu pinango pinakomerwa na imwe toera kutumikira Yahova. Ife nee tisafunika kusiya pinthu pyonsene pinatitsandzayisa toera kutumikira Yahova. (Koel. 5:19, 20) Mbwenye tingacalira kusiya pinthu pinango toera kucita pizinji m’basa ya Yahova, ife tinakhala ninga mamuna adalonga Yezu mu nsangani wace wakuti akhakomerwa kakamwe na pinthu pyace, m’mbuto mwakutumikira Mulungu. (Lerini Luka 12:16-21.) M’bale unango anacemerwa Christian anakhala ku Fransa alonga: “Ine nee ndikhatumikira Yahova na mphambvu zanga zonsene, pontho nee ndikhali na ndzidzi wakukwana toera kukhala pabodzi na banjanga.” Natenepa iye na nkazace atonga kutumikira ninga apainiya. Mbwenye toera kucita pyenepi, iwo akhafunika kusiya mabasa awo. Kodi  iwo ali akutsandzaya thangwi yakucita pyenepi? Christian athimiza: “Ife tisatsandzaya kakamwe na utumiki wathu, pontho tisatsandzaya kakamwe tingaona anyakupfundza athu pabodzi na anthu anacitira ife maulendo akubwereza mbapfundza thangwi ya Yahova.”

17. Thangwi yanji panango pinakhala pyakunentsa kuyesera njira zipswa zakumwaza mphangwa?

¹⁷ Yeserani kuphatisira njira zipswa zakumwaza mphangwa. (Mabasa 17:16, 17; 20:20, 21) Shirley, mpainiya wa ku Estados Unidos, akhafunika kucinja njira yace yakumwaza mphangwa mu ndzidzi wa Koronaviru. Pakutoma iye akhanyinyirika kuphatisira telefoni toera kumwaza mphangwa. Mbwenye mu ndzidzi udacedzera muyang’aniri wa cisa mpingo wawo, iye apfundza kuti anaphatisira tani telefoni toera kumwaza mphangwa. Buluka penepo, iye atoma kuphatisira njira ineyi yakumwaza mphangwa. Iye alonga: “Pakutoma ine ndikhagopa, mbwenye cincino ndisatsandzaya kakamwe kuphatisira njira ineyi yakumwaza mphangwa. Cincino tisamwazira mphangwa anthu azinji kakamwe kupiringana mu ndzidzi ukhamwaza ife mphangwa nyumba na nyumba.”

18. Ninji cinafuna kutiphedza toera kuthimbana na pinentso mu ndzidzi unayesera ife kuthimizira utumiki wathu?

¹⁸ Khazikisani cifuno, pontho yeserani kucikwanirisa. Mu ndzidzi unathimbana ife na pinentso, ife tisacita phembero kuna Yahova toera atiphedze, buluka penepo tisanyerezera mwadidi pinthu pisafunika ife kucita thangwi ya pinentso pyenepi. (Mis. 3:21) Sonia, wakuti asatumikira ninga mpainiya wa ndzidzi onsene mu nsoka wa cilongero ca ku Romeniya, ku Europa alonga: “Ine ndisalemba pifuno pyanga patsamba, buluka penepo ndisaikha tsamba ineyi pakweca. Pa meza yanga ine ndalemba njira ziwiri zakuti zisaenda m’makhundu akusiyana. Mu ndzidzi unacita ine cisankhulo, ine ndisayang’ana njira zenezi ziwiri mbandinyerezera kuti cisankhulo ceneci cinandiphedza toera kukwanirisa cifuno canga peno nkhabe.” Kusiyapo pyenepi, iye asakhala na maonero adidi thangwi ya pinentso pinathimbana na iye. Sonia athimiza: “Ine ndingathimbana na pinentso, ndisafunika kusankhula khala pinentso pyenepi pinakhala ninga fufu toera kundipingiza kukwanirisa cifuno canga peno ndi ninga ponti yakuti inandiphedza toera kukwanirisa cifuno canga.”

19. Tinapangiza tani kuti tisapereka takhuta thangwi ya pinthu pyadidi pinatipasa Yahova?

¹⁹ Yahova asatipasa nkhombo munjira zakusiyana-siyana. Ife tinapangiza kuti tisapereka takhuta thangwi ya nkhombo zenezi mukucita pyonsene pinakwanisa ife toera kunsimba. (Aheb. 13:15) Ife tinakwanisa kucita pinthu pizinji toera kutumikira Yahova. Tingacita pyenepi, Yahova anatipasa nkhombo zizinji kakamwe. Ntsiku zonsene, tendeni tisake njira toera tikwanise ‘kuyesera na kuona kuti Yahova ndi wadidi.’ Tingacita pyenepi, ife tinakhala ninga Yezu adalonga kuti: “Cakudya canga ndi kucita pinafuna ule adandituma, mbandimalisa basa yace.”—Juwau 4:34.