1-2. Ti gue oko na Psaume 34:8, nyen la a lingbi e sara ti bâ so Jéhovah ayeke nzoni?

IMAGINÉ so mbeni zo amû na mo mbeni kobe so ade mo te ni lâ oko ape. Mo peut ti hinga mbeni ye na ndö ni tongana mo bâ ni, mo mä fion ni, mo gi ti hinga ye so a tö na ni wala mo hunda ambeni zo na ndö ni. Me oko lege ti hinga wala mo ye ni ayeke ti tene mo wani mo tara ni.

² E peut ti hinga so Jéhovah ayeke nzoni tongana e diko Bible nga na ambeti ti e, nga tongana e mä azo so asara tënë ti anzoni ye so Jéhovah asara na ala. Me e yeke hinga so Jéhovah ayeke biani nzoni tongana e wani e “tara” na e bâ tongana nyen la lo sara nzoni na e. (Diko Psaume 34:8.) Zia e bâ mbeni tapande so afa na e tongana nyen ti sara ni. Bâ so e ye ti sara kua ti ngoi kue, me ti sara ni, e bezoin ti duti na aye mingi ape. Peut-être fani mingi e diko zendo ti Jésus so atene tongana e zia Royaume na kozo ndo, Jéhovah ayeke mû na e aye kue so e yeke biani na bezoin ni, me ade Jéhovah asara ni na e lâ oko ape (Mat. 6:33). Me ndali ti so e yeke na mabe na zendo ti Jésus so, e vo aye mingi ape, e kiri na l’heure ti kua ti e na gbe ni nga e fa tënë mingi. Tongana e sara tongaso, e yeke bâ so Jéhovah ayeke bâ biani lege ti abezoin ti e. E yeke bâ so Jéhovah ayeke nzoni.

3. Ti gue oko na Psaume 16:1, 2, azo wa la Jéhovah ayeke sara nzoni na ala?

³ Jéhovah ayeke sara “nzoni na azo kue,” même na azo so ahinga lo ape (Ps. 145:9; Mat. 5:45). Me Jéhovah ayeke sara  nzoni mingi na azo so aye lo nga ayeke sara na lo na âme ti ala kue. (Diko Psaume 16:1, 2.) Zia e bâ ambeni nzoni ye so Jéhovah asara na e.

4. Tongana nyen la Jéhovah ayeke sara nzoni na azo so akomanse ti ga nduru na lo?

⁴ Lakue tongana e sara ye alingbi na aye so Jéhovah afa na e, e yeke bâ nzoni ti peko ni. Na ngoi so e manda lani ye mingi na ndö ti lo nga e ye lo, lo aidé e ti ke apensé nga na asarango ye so akangbi e na lo (aCol. 1:21). Nga na ngoi so e mû lani terê ti e na Jéhovah nga e wara batême, e bâ so lo sara anzoni ye même mingi na e, na tapande lo mû na e nzoni conscience nga e ga akota kamarade ti lo.—1 Pi. 3:21.

5. Tongana nyen la e yeke bâ so Jéhovah asara nzoni na e na fango tënë?

⁵ E ngbâ ti bâ so Jéhovah ayeke sara nzoni na e na ngoi so e yeke fa tënë. Mo yeke kamene mingi? Awakua ti Jéhovah mingi ayeke tongaso. Peut-être kozo ti tene mo ga wakua ti Jéhovah, mo pensé lâ oko ape so mo yeke pika yanga-da ti mbeni zo so mo hinga lo ape ti fa na lo mbeni tënë so azo mingi aye ni ape. Me laso, mo yeke sara ni lakue. Na ndö ni, grâce na mungo maboko ti Jéhovah, mo manda ti ye fango tënë. Mo bâ so Jéhovah amû maboko na mo na yâ ti ambeni ye. Lo aidé mo ti duti kpô na ngoi so mbeni zo ake ti mä mo. Lo aidé nga mo ti dabe ti mo na versê so mo bezoin ni ti sara na lisoro na zo so mo yeke fa tënë na lo. Lo mû nga na mo ngangu ti ngbâ ti fa tënë na ngoi so azo aye ti mä mo ape.—Jér. 20:7-9.

6. Tongana nyen la aye so Jéhovah ayeke fa na e afa so lo yeke sara nzoni na e?

⁶ Jéhovah ayeke sara nga nzoni na e na lege so lo yeke fa na e ti fa tënë (Jean 6:45). Na ngoi ti abungbi ti e ti milieu ti yenga, e yeke mä anzoni kode ti sarango na alisoro nga a wa e ti sara kua na ni na fango tënë. Na tongo nda ni, mbeto apeut ti sara e kete ti tara ambeni fini kode, me tongana e sara kua na ni e yeke bâ so aga na anzoni ye mingi. Na ngoi ti abungbi nga na akota bungbi, a wa nga e ti tara ambeni kode ti fango tënë so ade e sara kua na ni lâ oko ape. So kue apeut ti sara e mbeto, me tongana e tara ni Jéhovah ayeke sara tufa dä. Zia e bâ ambeni nzoni ye so e yeke wara tongana e gi afini lege ti sara na Jéhovah na ngangu ti e kue atâa dutingo ti e ayeke tongana nyen. Na pekoni, e yeke bâ tongana nyen la e peut ti sara ni.

7. Atufa wa la e yeke wara na ngoi so e yeke gi ti fa tënë mingi?

⁷ E yeke ga même nduru mingi na Jéhovah. Bâ tapande ti Samuel, * mbeni ancien so lo na wali ti lo ayeke na Colombie. Couple ni ayeke apionnier na yâ ti congrégation ti ala, me ala ye ti fa tënë mingi na lege so ala ye ti gue ti mû maboko na yâ ti mbeni congrégation so a bezoin awafango tënë mingi dä. Ti sara ni, ala bezoin ti sara ambeni sacrifice. Samuel atene: “E sara ye alingbi na Matthieu 6:33, e vo encore ape aye so e yeke na bezoin ni ape. Me ye so ayeke lani ngangu na e ayeke ti quitté da ti e. A leke ni tâ gï tongana ti so e ye nga e futa ni kue awe.” Na ngoi so ala gue na fini congrégation ni, ala bâ so ala bezoin nginza mingi ape tongana ti kozo. Samuel atene: “E bâ tongana nyen la Jéhovah afa lege na e nga lo kiri tënë na asambela ti e. E bâ so e zia ngia na bê ti Jéhovah nga lo ye e na ambeni lege so e bâ ni lâ oko ape.” Eskê lege ayeke dä ti tene mo fa tënë mingi ahon ti  kozo? Tongana lege ayeke dä ti tene mo sara ni, mo peut ti hinga na bê ti mo kue so mo yeke ga nduru mingi na Jéhovah nga lo yeke bâ lege ti mo.—Ps. 18:25.

8. Nyen la mo manda na lege ti atënë ti Ivan na Viktoria?

⁸ E yeke wara ngia na yâ ti kua ti e. Bâ tënë so Ivan na wali ti lo Viktoria, so ayeke apionnier na Kirghizstan, atene. Ala yeke na aye mingi ape, tongaso ala peut ti sara akua kue so a mû na ala, na tapande kua ti construction. Ivan atene: “E sara kua kue so a mû na e na bê ti e kue. Atâa so e fatigué na hunzingo ti lango oko oko ti kua ni, e yeke na siriri nga na ngia ndali ti so e hinga so e mû ngangu ti e ti sara na kua ti Royaume. E yeke nga na ngia ndali ti so e wara gbâ ti afini kamarade nga anzoni ye mingi asi na e.”—Marc 10:29, 30.

9. Nyen la mbeni ita-wali so ayeke na akpale asara ti fa tënë mingi? Ye ti peko ni ayeke nyen?

⁹ E yeke wara ngia na yâ ti kua ti Jéhovah même tongana e yeke na akpale. Na tapande, Mirreh, mbeni mbakoro wali-mua na Afrique de l’Ouest, ayeke lani docteur. Na peko ti so lo gue na retraite awe, lo komanse kua ti pionnier. Mirreh ayeke na kobela ti arthrite so aga ngangu nga lo peut ti fa tënë da na da gï l’heure oko. Me lo peut ti fa tënë l’heure mingi na présentoir. Lo yeke na gbâ ti avizite nga na a-étude, lo yeke sara ambeni na téléphone. Ngbanga ti nyen la Mirreh aye ti sara kua ti Jéhovah mingi? Lo tene: “Mbi ye Jéhovah na Christ Jésus mingi. Mbi yeke sambela Jéhovah lakue ti aidé mbi ti sara ye kue so mbi peut ti sara na yâ ti kua ti lo.”—Mat. 22:36, 37.

10. Tongana ti so a fa na 1 Pierre 5:10, nyen la Jéhovah ayeke sara na azo so ayeke gi ti sara mbeni kua?

¹⁰ Jéhovah ayeke fa aye nde nde na e. Kenny, mbeni pionnier na île Maurice, abâ so tënë so ayeke tâ tënë. Na ngoi so lo manda tâ tënë, lo quitté dasendagi, lo wara batême nga lo komanse kua ti ngoi kue. Lo tene: “Mbi gi ti sara ye tongana prophète Ésaïe so atene: ‘Mbi la! Tokua mbi!’” (És. 6:8). Kenny asara lani akua ti construction mingi, lo mû nga lani maboko ti kiri na peko ti ambeti ti e na yanga ti kodro ti lo. Kenny atene: “A fa na mbi akode so mbi bezoin ni ti sara akua ti mbi.” Me lo manda gï akode ti kua ape. Lo tene: “Mbi manda nga ye na ndö ti aye so mbi peut ti sara ape nga na asarango ye so mbi bezoin ni ti sara na Jéhovah nzoni mingi.” (Diko 1 Pierre 5:10.) Peut-être mo kue mo peut ti sara achangement tongaso si Jéhovah afa aye nde nde na mo.

11. Aye wa la ambeni ita-wali na Corée du Sud asara ti fa tënë? Ye ti peko ni ayeke nyen? (Bâ foto ti couverture ni.)

¹¹ Même azo so aga Témoin aninga awe abezoin ti tene a fa ye na ala na ngoi so ala gi ti fa tënë na mbeni fini kode. Na ngoi so kobela ti COVID-19 amû ndo, a-ancien ti mbeni congrégation na Corée du Sud atene: “Ambeni ita so apensé lani so ala peut ti fa tënë ape ndali ti so terê ti ala ason ayeke sara ni fadeso na lege ti appel vidéo. Aita-wali ota so ngu ti ala ahon 80 amanda ti fa tënë na appel vidéo na ala komanse ti fa tënë alango mingi na yâ ti yenga.” (Ps. 92:14, 15). Eskê mo ye ti fa tënë mingi nga ti tara na ti bâ so Jéhovah ayeke même nzoni mingi? Bâ ambeni ye so mo peut ti sara so apeut ti aidé mo ti sara ni.

12. Nyen la Jéhovah amû zendo ni na azo so azia bê ti ala na lo?

¹² Manda ti zia bê ti mo na Jéhovah. Lo mû zendo ti mû na e gbâ ti anzoni ye tongana e sara confiance na lo nga e sara ye kue so e peut ti sara ti sara na lo (Mal. 3:10). Fabiola,  mbeni ita-wali na Colombie, abâ so Jéhovah asara ye alingbi na zendo so na mbage ti lo. Kete na peko ti batême ti lo, lo ye ti ga pionnier permanent. Me lo doit ti sara kua ti mû maboko na sewa ti lo. Tongaso, na ngoi so lo gue na retraite, lo sambela Jéhovah ngangu ti aidé lo. Lo tene: “Mingi ni ti wara nginza ti pension a yeke mû ka ngoi mingi, me ti mbi mbi komanse ti wara ni gï nze oko na peko ti so mbi leke mbeti ni. A yeke lani tongana mbeni miracle.” Nze use na pekoni, lo komanse kua ti pionnier. Laso, lo yeke na ngu 70 tongaso, na lo sara kua ti pionnier ahon ngu 20 awe. Na yâ ti angu ni so, lo mû maboko na azo miombe ti wara batême. Lo tene: “Atâa so na ambeni ngoi mbi bâ so mbi yeke na ngangu ape, Jéhovah a-aidé mbi lakue ti ngbâ ti sara kua ti pionnier.”

13-14. Atapande wa la apeut ti aidé e ti sara confiance na Jéhovah nga ti fa tënë mingi?

¹³ Manda ye na lege ti tapande ti azo so azia bê ti ala na Jéhovah. Bible asi singo na tapande ti azo so asara kua ti Jéhovah mingi. Na yâ ti atapande ni mingi, awakua ti Jéhovah awara aye ti nzoni na peko ti so ala sara mbeni ye ti fa so ala yeke na confiance na lo. Na tapande, a yeke gï na peko ti so Abraham aquitté ndo ti lo, “atâa so lo hinga ndo so lo yeke gue dä so pëpe”, la Jéhovah asara tufa na ndö ti lo (aHéb. 11:8). A yeke gï na peko ti so Jacob atiri na mbeni ange la lo wara mbeni tufa so ayeke nde (Gen. 32:24-30). Na ngoi so amolenge ti Israël ayeke nduru ti lï na Sese ti zendo, a yeke gï na peko ti so aprêtre azia gere ti ala na yâ ti Ngu ti Jourdain la ala wara lege ti fâ ngu ni.—Jos. 3:14-16.

 ¹⁴ Mo peut nga ti manda ye mingi na lege ti tapande ti aTémoin ti ngoi ti e so azia bê ti ala na Jéhovah nga ala gi ti fa tënë mingi. Na tapande, a nzere mingi na Ita Payton nga na wali ti lo Diana ti diko ye na ndö ti aita so asara kua ti Jéhovah mingi ahon ti kozo, na tapande ala so a sara tënë ti ala na yâ ti molongo ti a-article “Ala mû terê ti ala wani ti sara ye.” * Payton atene: “Na ngoi so e diko mbaï ti ala, a yeke mo bâ mo tene e yeke bâ mbeni zo so ayeke te mbeni nzerengo kobe. So e bâ lo aninga, e ye mingi ti ‘tara na ti bâ so Jéhovah ayeke nzoni.’” Na nda ni, Payton na Diana ague ti fa tënë na ndo so a bezoin awafango tënë mingi dä. Mo diko molongo ti a-article so awe? Mo bâ awe avidéo Prédication dans des régions isolées : Australie nga na Prédication dans des régions isolées : Irlande so ayeke na ndö ti jw.org? Aye so apeut ti aidé mo ti bâ ambeni ye so mo peut ti sara ti fa tënë mingi.

15. Tongana nyen la anzoni kamarade apeut ti aidé e?

¹⁵ Sara kamarade na azo so ayeke wa mo ti sara kua ti Jéhovah mingi. A yeke duti ngangu na e ape ti te mbeni kobe so ade e te ni lâ oko ape tongana e na azo so aye ni la e yeke te ni. Legeoko nga, tongana e mû ngoi ti duti na azo so azia Jéhovah kozo na yâ ti fini ti ala, peut-être e yeke ye mingi ti sara kua ti Nzapa mingi. Kent na wali ti lo Veronica abâ so tënë so ayeke tâ tënë. Kent atene: “Akamarade ti e nga na afami ti e awa e ti fa tënë na ambeni lege so ayeke nde. E ga ti bâ so ti duti na terê ti azo so agi Royaume kozo, a sara si e yeke na confiance so e peut ti tara mbeni fini ye.” Kent na Veronica ayeke fadeso apionnier spécial na Serbie.

16. Tongana ti so toli ti Jésus so ayeke na Luc 12:16-21 afa, ngbanga ti nyen la a yeke nzoni e yeda na bê ti e ti sara asacrifice?

¹⁶ Sara asacrifice ndali ti Jéhovah. E bezoin ti dö aye kue e zia si e zia ngia na bê ti Jéhovah ape (Zo-ti. 5:19, 20). Ye oko, tongana e soro pëpe ti sara aye mingi na yâ ti kua ti Jéhovah ndali ti so e ye pëpe ti zia lege ti ambeni ye so e ye ni mingi, e yeke sara même faute ti koli ti yâ ti toli ti Jésus so, so asara kua ngangu ti wara aye mingi me lo sara sanka ti Nzapa. (Diko Luc 12:16-21.) Christian, mbeni ita-koli na France, atene: “Mbi yeke mû lani pëpe ngoi nga na ngangu ti mbi kue ndali ti Jéhovah nga na sewa ti mbi.” Lo na wali ti lo amû desizion ti ga apionnier. Me ti sara ni, ala doit ti ke kua ti ala. Ti wara aye so ala bezoin ni, ala komanse ti sara kua ti sukulango yâ ti ada nga na abureau, nga ala manda ti duti na ngia na kete pata so ala yeke na ni. Eskê ala yeke na ngia so ala dö ambeni ye azia ti ga apionnier? Christian atene: “Fadeso, e ye kua ti fango tënë mingi nga a nzere na e ti bâ azo so e yeke manda Bible na ala nga na avizite ti e so ayeke manda ye na ndö ti Jéhovah.”

17. Nyen la amû maboko na mbeni ita-wali ti gi ti fa tënë na mbeni fini kode?

¹⁷ Duti nduru ti gi ti fa tënë na ambeni lege nde (Kus. 17:16, 17; 20:20, 21). Shirley, mbeni pionnier na États-Unis, adoit ti changé kode ti fango tënë ti lo na ngoi so COVID-19 amû ndo. Na tongo nda ni, mbeto asara lo ti fa tënë na téléphone. Na peko ti so surveillant ti circonscription afa na lo tongana nyen ti sara ni, lo komanse ti fa tënë lakue na téléphone. Lo tene: “Na tongo nda ni mbeto asara mbi, me fadeso mbi ye ni mingi. E yeke  wara azo mingi ahon ti so e yeke fa lani tënë da na da.”

18. Nyen la apeut ti aidé e tongana mbeni ye asara si a yeke ngangu na e ti fa tënë mingi?

¹⁸ Zia mbeni ye na gbele mo na gi ti si dä. Na ngoi so e wara akpale, e yeke sambela ti wara mungo maboko nga e yeke gbu li ti e nzoni ti bâ ambeni ye so e peut ti sara (aProv. 3:21). Sonia, so ayeke pionnier permanent na groupe ti yanga ti Romani na Europe, atene: “Mbi ye mingi ti sû aye so mbi ye ti sara na mbeti, na mbi zia ni na mbeni ndo so mbi peut ti bâ ni hio. Mbi sara dessin ti mbeni croisement mbi zia ni na ndö ti table ti mbi. Na ngoi so mbi ye ti mû mbeni desizion, mbi yeke bâ croisement ni nga mbi yeke gbu li na ndö ti ndo so desizion ti mbi ayeke gue na mbi dä.” Sonia ayeke gi lakue ti duti na nzoni bango ndo na ndö ti akpale ti lo. Lo tene: “Lakue tongana mbi wara mbeni kpale, a yeke na mbi ti mû desizion ti bâ ni tongana mbeni mur so akanga lege na mbi ti si na ye so mbi leke ti sara wala ti bâ ni tongana mbeni pont so a-aidé mbi ti sara ye so mbi leke ti sara.”

19. Tongana nyen la e peut ti fa so e kiri singila na Jéhovah ndali ti anzoni ye so lo mû na e?

¹⁹ Jéhovah asara tufa na ndö ti e na alege mingi. E peut ti fa so e kiri singila mingi ndali ni tongana e sara ye kue so e peut ti sara ti gonda lo (aHéb. 13:15). E peut ti wara lege ti sara gbâ ti aye nde nde na yâ ti kua ti Jéhovah. Na pekoni, lo yeke sara tufa même mingi na ndö ti e. Lâ oko oko, zia e gi alege ti ‘tara na ti bâ tongana nyen Jéhovah ayeke nzoni.’ Na pekoni, e yeke sara ye tongana Jésus, so atene: “Kobe ti mbi ayeke ti sara ye so bê ti lo so atokua mbi aye nga ti hunzi kusala ti lo.”—Jean 4:34.