1-2. Lá nkilika Yeembo 34:8, wopo wɔkɔnge w’okokaso ndjisola isɔmɛlɛ wɔlɔ wɔ Yehova?

KOKANELA djɛ onto ɔmɔtshi ambɔkɔpɛyɛ dambo mɔtshi djɛ ngotalɛka ntondo. Wɛ nkoka ndjewa wopo wolekɔ dambo djɛkɔ má nshishima, mpomba nsolo, mpona djɛ ndjewa wopo w’okatshɛwɔ, kana ndjopola anto ankina ntsha iwɔ nkɔpaka dambo djɛkɔ. Koko, yopo imɔ y’okokɛ ndjewa ntsha wɛ nkɔpaka dambo djɛkɔ nde, wɛ nghɔmɛlɛ ndɛta.

² Iso nkoka ndjewa akambo walendana la wɛlɔ wɛ Yehova má mbala Bible l’enkanda wɛso edjinge má ndjekameyɛ kɛnɛ k’anto ankina otepelawɔ lá nkambo dj’ɛtshɔkɔ wiyawa me Yehova. Koko tongoleka nsipisoyɛ ente Yehova alekɔ wɔlɔ, ngo ntsha isɔmɛlɛ ‘ndɛta’ wɛlɔ wɛnde. (Wala Yeembo 34:8.) Nyontshɔ tolende ndjɔmbɔmba kɛmɔtshi kɛnyɛ wopo w’okokaso nangha nkambo djɛsɔ. Tɔkɔsa djɛ tokombola nkamba yopo imɔtshi y’olemo yɛ winá enkfumɔ, koko djɛ nkotshɛ okoma wɔsɔ, angoyala djonyi ndjila mbiko yɛso enghanghunya. Mbala imɔtshi tombowalaka mbala la mbala daka djɛ Yeso djetepela ante ntsha tombohetshɛ Onkfumi l’edjena kɛ ntondo, Yehova angɔtɔpɛyɛ kenkfumɔ k’oyɛso nsɔsɔlɔ la djonyi, koko isɔmɛlɛ tɔtɛnaká ekotshamelo kɛ daka djɛsɔ ntondo. (Mat. 6:33) Koko mande tolekɔ la djawo lá daka djɛ Yeso djɛsɔ, tombokakitshɛ adepansɛ w’onanghaso, tombima m’olemo w’isakambaka edjinge tombila yimba yɛso inkfumɔ l’olemo w’ipoposanyɛ. Winá w’onaghaso nghɔsɔ, isɔmɛlɛ nyɛnaka ente nsɔsɔlɔ Yehova ntokotsheyɛka ehomba wɛso. ‘Tɔmbɔlɛta’ wɔlɔ wɔ Yehova isɔmɛlɛ.

3. Lá nkilika Yeembo 16:1, 2, anto wakɔna wawaka wapɔ má wɔlɔ wɔ Yehova?

³ Yehova alekɔ ‘wɔlɔ te onto onkfumɔ’ kaanga te onto wopowewe. (Yee. 145:9; Mat. 5:45) Koko pekapeka wanɛ wakambela Yehova la wowoka ngandji l’oloko ɔmɔ ndeke lowaaka ɛtshɔkɔ  efula me nde. (Wala Yeembo 16:1, 2.) Nyontshɔ tokolenda ɛtshɔkɔ ɛmɔtshi w’owaso má wɔlɔ wɔ Yehova.

4. Wopo wɔkɔnge Yehova ɛnyɛnde wɔlɔ wɔnde te wanɛ wawanga ndasukanyɛ tende?

⁴ Winá enkfumɔ w’okambaso la kɛnɛ k’ekaso me Yehova, iso nyɛnaka eposelo wɛ wɔlɔ lá mbiko yɛso. Winá wɔseke akambo walendana lande la w’isɔkɔpɛ, nde atokotshɛka djɛ ndongela tokanyi edjinge nanghedji djetokapolaki lande. (Kɔl. 1:21) Ko winá w’isayalambola tende la w’isalongola batisimo, nde atɔpɛyɛka nkete efula djɛ wɔlɔ, ndjɔmbɔmba nkfum’oloko kɛ wɔlɔ la djokanelo djɛ ma ma lande.​—1 Pɛ. 3:21.

5. Wopo wɔkɔnge wɔ ngɛnyi wɔlɔ wɔ Yehova l’olemo wɔko w’ipoposanyɛ?

⁵ Tongokindjɛke nyɛna wɔlɔ wɔ Yehova winá w’owangaso mpoposanyɛ. Olekɔ ɔnsɔnyi ɔnsɔnyi? Enkambi wɛ Yehova efula walekɔ nghɔsɔ. Mbala kɛmɔtshi lá ntondo kɛ nkoma onkambi wɔ Yehova, otakanelaki kaanga ndambo daambi ente ɔngɔkɔkɔla lá lokfuke l’onto ɔmɔtshi wɔ ngopewe ko ndooshimela losango lɔndopewe. Koko lɔɔko kɛnɛ, oyoonangha nkambo djɛsɔ mbala la mbala. Nkambo deka nde, má okotshɔ wɔ Yehova, ombeka djɛ nsasanga olemo w’ipoposanyɛ! Yehova akokotshɛka lonkina l’akambo ankina efula. Nde akokotshɛka djɛ wɛ ntshikala vu winá wɔ onto ɔmɔtshi ndakonanghela akambo la lonkenkesa. Nde akokotshɛka lonkina djɛ wɛ mvungɔ vɛrse djɛ wɔlɔ winá wɔ ngapomana l’onto ɔmɔtshi wɔkɔpisa nkekameyɛ. Edjinge akɔpɛyɛka wolo wɔ nkindjɛ mpoposanyɛ kaanga winá wɔ anto wel’etatshi kɛko kɛ looko yotakɔpa nkekameyɛ.​—Jɛr. 20:7-9.

6. Wopo wɔkɔnge okfumbelo wɔtɔpɛyɛ Yehova oyɛwɔ ilembetelo yɛ wɔlɔ wɔnde?

⁶ Yehova ntɛnyɛka wɔlɔ wɔnde lonkina má ntokfumba lá nkambo dj’olemo w’ipoposanyɛ. (Dj. 6:45) Lá losanghanyɛ lɔso lɔ l’anteyi kɛ lobengo, iso ndjekameyɛka ndjɔmbɔmba yɛ wamba wambɔlɔngɔswama wɔlɔ, edjinge iso nkeketshamaka djɛ nkamba la ndjɔmbɔmba yɛkɔ l’olemo w’ipoposanyɛ. Má bango, tokoka ndjala la ndambo k’okakasano wɔ nkamba la nkambo mɔtshi djɛ bango, koko winá w’onanghaso nkambo djɛsɔ, tokoka ndɛɛna ente nkambo djɛkɔ nsasangɛka anto wal’etatshi kɛso kɛ looko. Iso nkeketshamaka lonkina lá nsanghanyɛ yɛso y’otshumano la yɛ nkekete djɛ nkamba la topo t’olemo w’ipoposanyɛ tɔ sotakambaka la tɔkɔ ntondo. Lá nkambo djɛsɔ lonkina, tokoka ndjala la ndambo k’okakasano, koko ntsha iso nsɛsa djɛ nkamba la wayi wasɔ, Yehova angɔtɔtshɔkɔla. Nyontshɔ tokolenda ɛtshɔkɔ ɛmɔtshi w’okokaso mba ntsha iso nkamba la topo tɔ bango tɔ mpɛyɛ Yehova kɛnɛ keleka wɔlɔ leso ayale akambo wakɔnge walekɔ laso. Masɔ tongolenda topo t’okokaso mfudjɛ olemo wɔso.

7. Ɛtshɔkɔ wɛkɔnge w’okokaso mba ntsha iso nangha la wolo djɛ mfudjɛ olemo wɔso w’ipoposanyɛ?

⁷ Iso ndekaka ndjala entshupa la Yehova. Tolende ndjɔmbɔmba kɛ ikokolo imɔtshi yetawɔ Samuel, * kanga lokamba esanga nya wadjɛnde lá Colombie. Antshukanyi wasɔ wakambaki olemo wɔ yat’ekalo l’otshumano welá mbandja kɛwɔ, koko wakɔpaka mfudjɛ olemo wɔwɔ w’ipoposanyɛ má ntókótshɛ l’otshumano ɔmɔtshi w’oyɛwɔ la djonyi efula dj’okotshɔ. Djɛ nkotshɛ okoma wɔsɔ, iwɔ wayalaka ladjɛ ndaapekala akambo amɔtshi. Samuel ntepelaka ante: “Tokambaka la Mateo 6:33, ko totshikaka nsomba nkete djepalekɔ nsɔsɔlɔ djonyi. Koko djina djelekisa wolo ntapolande ntshika ɔnkɔndɛ wɔso wɔ mvulu. Mvulu kɛsɔ kepikamaka ngo wopo w’isakɔpɛ edjinge totakawoyɛ kaanga nkfuta m’eteyi.” Winá wiyasɛkɔ t’otshumano wɔ bango, iwɔ wayalaki ngo la djonyi  djɛ ndambo kɛ nkfuta daambi djɛ mbika, ntshikitana la l’edjena k’iyayalaka ntondo. Samuel atepela ante: “Tɛnaka wopo wɔ Yehova ndotatɔlɔndjɛka edjinge ndakandjimolaka ndɔmbɔ yɛso. Toyawokaka ente Yehova nsasangaka laso la ntɔkɔpaka efula ndeka yopo yɛ isaawokaka ntondo.” Wɛ olekɔ l’akoka wa mfudjɛ olemo wɔko lá yopo imɔtshi? Ntsha nghɔsɔ, okoka ndashikikɛ ente ongoleka ndjala entshupa la Yehova edjinge nde angokokotsheyɛ ehomba wɛko.​—Yee. 18:25.

8. Olakanyelo wɔkɔnge ngombowa má etepela wɛ Ivan nya Viktoria?

⁸ Iso mbaka osasa l’olemo wɔso. Tokolenda kɛnɛ kɛ Ivan nya Viktoria, wadji la wome wokamba etengo tat’ekalo lá Kyrgyzstan yatepela. Iwɔ watshikaka mbiko yɛwɔ enghanghunya djɛ ndapɛyɛ l’ɛkɔpa lá olemo onkfumɔ, ndjila edjinge olemo w’opikelo. Ivan ntepelaka ante: “Toyapɛyɛki tshɛ l’elemo enkfumɔ w’iyatɔpɛyɛka. Kaanga isalɛmbaka l’ekomo kɛ lofu, tayalaki la vu lá wɔɔngɔ edjinge l’osasa, mande tewaki ente sombohetshɛ wolo wɔso nde l’olemo w’Onkfumi. Toyalaka lonkina l’osasa efula mande towaka tolongo efula tɔ bango edjinge tewaka akambo lombombe wa sopakoke mvungɛ.”​—Mar. 10:29, 30.

9. Nkaana kɛmɔtshi kelekɔ l’ekakasano onanghakande nge djɛ mfudjɛ olemo wɔnde, ko eposelo wɛkɔnge w’owande?

⁹ Iso ndjalaka l’osasa l’olemo wɔ Yehova kaanga winá w’opomanaso l’ekakasano. Ndjɔmbɔmba, Mirreh, nkaana k’ekokolo kɛ dɔktɛrɛ kelekɔ wadj’odjo k’intansɛ l’Afrikɛ wal’owɛstɛ, awaka pasiɔ edjinge awangaka nkamba etengo yet’ekalo. Mirreh alekɔ l’olando wɔ wolo efula wɔpɛyɛ paa djɛ nkɛnda, nde nkoka nangha ngo winá ɔmɔ toko l’olemo w’ipoposanyɛ wɔ mvulu la mvulu. Koko alekɔ l’akoka wa nangha winá efula l’olemo w’ipoposanyɛ welá ntshandjawala. Nde alekɔ la mbembo yɛ bango edjinge l’ambeki wa Bible efula, angosawolake l’amɔtshi l’anteyi kɛwɔ má telefɔnɛ. Kɛkɔnge ketshinda Mirreh djɛ mpoposanyɛ efula? Nde ntepelaka ante: “Lemi ndjokaka Yehova nya Kristo Yeso ngandji efula. Lonkina, lemi ndɔmbaka Yehova mbala la mbala djɛ nde nkotshɛ lemi djɛ nangha kenkfumɔ k’okokami nangha l’olemo wɔnde.”​—Mat. 22:36, 37.

10. Etengo 1 Pɛtɛlɔ 5:10 ɛnyɛwɔ, wanɛ wakotshɛ ekoma wɛwɔ owawɔ nge me Yehova?

¹⁰ Iso mbaka okfumbelo onkina me Yehova. Kenny, kanga lolekɔ yat’ekalo lá Mauritius, ɛnaka nsɔsɔlɔ kɛ nkambo djɛsɔ. Winá wɔ ndekaka akambo wa nsɔsɔlɔ, nde imaka má inivɛrsite, alongolaka batisimo, ko atateyɛka nkamba olemo wɔ winá enkfumɔ. Nde ntepelaka ante: “Lemi nanghaka la wolo djɛ mbika lá yopo y’okana l’etepela w’ɔprɔfɛtɛ Izaya, lotepelisa ante: ‘Lemi nkɔnɛ, ontome!’” (Iza. 6:8) Kenny akambaka elemo efula w’opikelo, edjinge akotshɛka l’okadjimwelo w’enkanda wesakisola Bible l’otepela wɔwɔ wɔ lowotshɔ. Kenny ntepelaka ante: “Mbaka okfumbelo w’onkotshisa djɛ nkotshɛ edjito wɛmi.” Koko nde ekaka akambo efula apengo wopo wɔ nkamba olemo toko. Nde djakfɛka lonkina ante: “Ndjekaka lonkina akambo wa motayalaki l’akoka wanangha edjinge wekeka wɛ mayalaka la djonyi, djɛ ndjala onkambi wɔ Yehova wɔ nsɔsɔlɔ.” (Wala 1 Pɛtɛlɔ 5:10.) Lamo ngopashishima akambo walekɔ la wɛ djɛ ndenda ntsha okoka ndapɛyɛ djɛ mba okfumbelo onkina me Yehova?

11. Welo wɛkɔnge w’ilisa ankaana yɛso imɔtshi yelá Sidɛ kɛ Corée l’ikanyi yɛ ndapɛyɛ efula l’olemo w’ipoposanyɛ, edjinge eposelo wɛkɔnge weyalisa? (Lenda ntshango djɛ loposo.)

¹¹ Kaanga Ewakɛ welekɔ la balo mbaka wapɔ má okfumbelo winá w’owangawɔ nkamba olemo ɔmɔtshi wɔ bango. L’etsho w’opela wɔ COVID-19 wɔnɛ, tokokolo tel’otshumano wɔ Sidɛ kɛ Corée wafunaka ambɔ: “Wanɛ wakanelaki ambɔ wapakoke ndapɛyɛ l’olemo w’ipoposanyɛ m’ɔtɛ w’ekakasano welendana la demba,  wambotateyɛ nangha nkambo djɛsɔ má vidɛo kɔnferansɛ. Ankaana isato yelekɔ l’ɛnɔnyi akumi 80 l’ɛmɔtshi wekaka wopo wɔ nkamba la ntshulatshula djɛ bango, ko wambowanga mpoposanyɛ má ntshulatshula djɛsɔ entshupa la mfu inkfumɔ.” (Yee. 92:14, 15) Opakoke mfudjɛ olemo wɔko edjinge ndɛta wɔlɔ wɔ Yehova lá lɛdji loleki? Tokolenda wina amɔtshi w’okokɛ ntapola wangokokotshɛ djɛ nkotshɛ okoma wɔsɔ.

12. Kɛkɔnge kɛ Yehova olakande wanɛ wayawɛkɛ tende?

¹² Eka djɛ ndawɛkɛ te Yehova. Nde ntolakaka djɛ ntɔtshɔkɔla ntsha tomboyawɛkɛ tende la tɔmbɔpɛyɛ kɛnɛ keleka wɔlɔ leso. (Mal. 3:10) Nkaana kɛmɔtshi k’etawɔ Fabiola kanga l’intasɛ lá Colombie ɛnaka okotshamelo wɔ daka djɛ Yehova djɛsɔ. Nde akɔpaka nkamba etengo yat’ekalo yɛ lotshinda ndambo daambi m’ɔkɔngɔ wɔ batisimo djɛnde. Koko womɛnde nya wana wande asato wawikaki ngo má lofuto lɔnde. Djɛkondeke, winá wɔ ndoowaka mbamba kɛ ndɔmba pasiɔ, nde alɔmbaka Yehova efula djɛ ndookotshɛ. Nde ntepelaka ante: “Mbala efula ndjalaka ilá efula dj’iwɔ ndɔpɛyɛ onto pasiɔ, koko le lemi wawolaka mpɛyɛ ngo m’ɔkɔngɔ wɔ ngɔndɔ kɛmɔ kɛ lemi ndɔmba. Ayalaka etengo nsese!” M’ɔkɔngɔ wɔ ngɔndɔ ipe, nde alodjɛka demandɛ djɛ ndjala yat’ekalo. Win’ɔsɔ alekɔ l’ɛnɔnyi etengo 70 edjinge akamba etengo yat’ekalo l’ilá k’ɛnɔnyi 20. L’ilá kɛsɔ nde akotshɛka anto enanɛyi djɛ ndongola batisimo. Nde atepela ante: “Kaanga oyawokami winá ɛmɔtshi wɔdju, Yehova nkotshɛka lemi mfu inkfumɔ djɛ nkindjɛ nkamba etengo yat’ekalo.”

13-14. Ndjɔmbɔmba yɛkɔnge yekoka ntokotshɛ djɛ ndawɛkɛ le Yehova la nkotshɛ ekoma wɛso?

 ¹³ Waka wapɔ má ndjɔmbɔmba yɛ wanɛ wayawɛkisa te Yehova. Bible ndola la ndjɔmbɔmba y’anto wayapɛyisa tshɛ l’olemo wɔ Yehova. Ndjɔmbɔmba inkfumɔ yɛsɔ, nyɛnyɛka dj’enkambi wɛ Yehova wɛsɔ wayalaka ladjɛ ntapola djina djɛ ntondo, ntondo k’iwɔ ndowa ɛtshɔkɔ wetshikitanyi me Yehova. Ndjɔmbɔmba, ayalaka ngo m’ɔkɔngɔ w’Abrahama ntshika mvulu kɛnde, ‘kaanga ndotewaki edjena kɛ ndotatshɔka ndeke Yehova ndɔɔtshɔkɔlaka. (Heb. 11:8) Ayalaka ngo m’ɔkɔngɔ wɔ Djakɔbɔ nana nya ondjelo ndeke ndoowaka ɔtshɔkɔ wotshikitanyi. (Ewa. 32:24-30) Winá w’owila w’Isariyɛlɛ iyayale entshupa djɛ ndjingela lá Looko lɔ daka, ayalaka ngo m’ɔkɔngɔ w’ankfundji nduwa ekolo lá Jɔrdanɛ ndeke anto iyowaka mbamba kɛ ndjopa.​—Yos. 3:14-16.

¹⁴ Wɛ nkoka mba ɛtshɔkɔ má ndjɔmbɔmba y’Ewakɛ wɛ Yehova wɛl’etsho wɛso wɛnɛ, weyawɛkisa te Yehova la wakotshisa ekoma wɛwɔ. Ndjɔmbɔmba, wɔnanyɔ w’etawɔ Payton nya wadjɛnde, Diana, wakɔpaki mbala akambo walendena la wananyɔ l’ankaana wafudjisa olemo w’okambelawɔ Yehova, ndjɔmbɔmba ɛkɔndɔ w’ɔkɔndɔlawɔ l’ɔnɔnghɔ wɔ wamba welekɔ l’ɔtɛ wɔ djoyi ante: “Wayapɛyɛka l’ɛkɔpa djɛ ntokotshɛ.” * Payton ntepelaka ante: “Winá w’owalaso ndjɔmbɔmba yɛwɔ, iso ndawokaka etengo tolenda onto ɔmɔtshi wɔlɛ dambo djɛ wɔlɔ efula. L’ilá k’enkfumɔ kolendaso, ndeke sotaleke nkɔpa djɛ ‘ndɛta la nyɛna ente Yehova alekɔ wɔlɔ.’” L’ekomo, Payton nya Diana wasɛkɔka ntokotshɛ l’edjena k’iyayalaka la djonyi efula dj’okotshɔ. Wɛ ombówalá wamba wasɔ? Ko, ombolenda wavideo yelekɔ l’ɔtɛ wɔ djoyi ante Esambishelo ka l’ahole wa ntale wa l’Australie; Esambishelo ka l’ahole wa ntale wa la Irlande t’iyile lá jw.org? Wayi wasɔ nkoka nkokotshɛ djɛ wɛ mpona topo tokokɛ mfudjɛ olemo wɔko.

15. Wopo wɔkɔnge tolongo tɔ wɔlɔ okokawɔ ntokotshɛ?

¹⁵ Sɔna tolongo tɔ wɔlɔ. Tongoyalake entshupa djɛ ndɛ nkete djɛ sotalɛka ntondo ntsha tolekɔ esanga l’anto wakɔpaka nkete djɛkɔ. Wop’ɔkɔmɔ ndeke, ntsha iso ndjekesanela la wanɛ w’ila Yehova l’edjena kɛ ntondo kɛ mbiko yɛwɔ, tongoleka mpona topo tɔ mfudjɛ olemo w’okambelaso Ndjambe. Wadji la wome amɔtshi w’etawɔ Kent nya Veronica w’ɛnaka nsɔsɔlɔ kɛ nkambo djɛsɔ. Kent ntepelaka ante: “Tolongo tɔso l’ase nkfumbo yɛso watokembɛki djɛ nsɛsa topo t’olemo tɔ bango. Tosipisoyɛka ente nkɔpɛ tolongo la wanɛ w’ila Onkfumi l’edjena kɛ ntondo, ntokotshɛka djɛ ndjala l’eshikikelo djɛ nangha nkambo mɔtshi djɛ bango.” Kent nya Veronica wakamba win’ɔsɔ etengo tat’ekalo totshikitanyi lá Serbie.

16. Etengo ndjɔmbɔmba kɛ Yeso kelá Luka 12:16-21 ɛnyɛwɔ, lamo oyɛso ladjɛ ndjala entshupa djɛ ndapekala akambo amɔtshi?

¹⁶ Yapekala akambo amɔtshi lá nkambo djɛ Yehova. Apalekɔ nkete nkfumɔ dj’ɔkɔpaso ndeke oyɛso ladjɛ ntshika djɛ nsasangɛ Yehova. (Los. 5:19, 20) Koko, ntsha iso ndjengenga djɛ nangha akambo efula l’olemo wɔ Ndjambe ngo mande topakɔpɛ ndapekala wayi amɔtshi, tokoka nangha ovunga w’onanghisa mpame kɛmɔtshi kelá ndjɔmbɔmba kɛ Yeso kenanghisa la wolo djɛ ndjala la lowiko lɔ wɔlɔ, koko imɛka Ndjambe yimba. (Wala Luka 12:16-21.) Wɔnanyɔ ɔmɔtshi w’etawɔ Christian, kanga l’intasɛ lá France, ntepelaka ante: “Ntapɛyɛki Yehova la nkfumbo kɛmi kɛnɛ kelekaki wɔlɔ le lemi, winá la wolo wɔmi.” Nde nya wadjɛnde wɔsaka nkano djɛ ndjala tat’ekalo. Koko djɛ nkotshɛ okoma wɔsɔ, wayalaka ladjɛ ntshika elemo wɛwɔ. Djɛ mba wopo wɔ mbika, watateyɛka nkamba ilelemo imɔtshi yɛ daambi, edjinge wekaka djɛ nsasanga la ndambo kɛ mfalanga  daambi. Ayalaka djonyi iwɔ ndapekala nghɔsɔ? Christian ntepelaka ante: “Win’ɔsɔ tomboleka nsasanga olemo wɔso edjinge tomboyala l’osasa efula djɛ nyɛna anto waso l’ambeki waso wa Bible weka akambo wa Yehova.”

17. Lamo okokaso ndjala l’okakasano djɛ nkamba la topo tɔ bango tɔ mpoposanyɛ?

¹⁷ Awola nkamba la topo tɔ bango tɔ mpoposanyɛ. (Ele. 17:16, 17; 20:20, 21) Shirley, kanga lolekɔ yat’ekalo l’États-Unis, ayalaka ladjɛ ntshikitanyɛ yopo yɛnde yɛ mpoposanyɛ l’etsho w’opela wɔ COVID-19 wɔnɛ. Má bango, nkaana kɛso kɛsɔ akakandaki djɛ mpoposanyɛ má telefɔnɛ. Koko m’ɔkɔngɔ wɔnde mba okfumbelo lá mbembo k’onami w’edjingadjinga, nde awangaka nkamba la yopo yɛ mpoposanyɛ yɛsɔ mbala la mbala. Nde ntepelaka ante: “Má bango lokaki wɔma, koko win’ɔsɔ lambotateyɛ nsasanga la yopo yɛkɔ. Má yopo yɛ mpoposanyɛ yɛnɛ, topoposanyɛ le anto efula ndeka wopo wɔ sapoposanyɛka ntondo lá mvulu la mvulu!”

18. Kɛkɔnge kekoka ntokotshɛ djɛ ndongela ekakasano winá w’okombolaso mfudjɛ olemo wɔso w’ipoposanyɛ?

¹⁸ Nangha nonghanyi edjinge kilika. Winá w’opomanaso l’ekakasano, tɔlɔmbɛ djɛ mba okotshɔ, la tɔtɔnɔlɛ efula djɛ ndjewa kɛnɛ k’okokaso nangha. (Woo. 3:21) Sonia, kanga lokamba etengo yat’ekalo yɛ lotshinda esanga l’iloyi imɔtshi yel’otepela w’ase Roumanie, l’Erɔpɛ, ntepelaka ante: “Lemi nkɔpaka mfuna ekoma wɛmi lá nkishi ko ntshika l’edjena kɛnama papoo. Lá mɛsa kɛmi, ntshikaka ntshango dj’entalimbo epe wɛtɔla tá djena djetshikitanyi. Winá w’ɔkɔpami ndɔsa nkano, lemi ndendaka lá entalimbo epe welekɔ lá ntshango djɛkɔ, ko ntɔnɔlaka djɛ ndenda kana nkano djɛsɔ djengonkotshɛ djɛ nkotshɛ okoma wɔmi kana lako.” Sonia nanghaka la wolo djɛ nyɛna ekakasano wɛnde la ntsho djɛ wɔlɔ. Nde ntepelaka ante: “Okakasano onkfumɔ wɔ bango wolekɔ etengo epele kendjelá onkeka kana etengo pɔɔ kenkotshɛ djɛ nkotshɛ okoma wɔmi, nkambo djɛsɔ ndenanaka l’eyalelo kɛmi.”

19. Kɛkɔnge k’oyɛso ladjɛ ndashikikɛ djɛ nangha?

¹⁹ Yehova ntɔtshɔkɔlaka lá topo efula. Iso nkoka nyɛnyɛ ente tolekɔ la djedjɛ l’ɛtshɔkɔ wɛsɔ, má nangha kenkfumɔ k’okokaso nangha djɛ ndɔɔpɛyɛ lomo. (Heb. 13:15) Lonkina, iso nkoka nkamba la topo tɔ bango tɔ mfudjɛ olemo wɔso, má nangha nghɔsɔ Yehova angɔtɔtshɔkɔla lonkina lombombe. Nyontshɔ tohonake mfu inkfumɔ, topo t’okokaso ‘ndɛta ko tɔngɛna ente Yehova alekɔ wɔlɔ.’ Masɔ, tongoyala etengo Yeso kanga lotepelisa ante: Olelo wɔminde nangha ɛkɔpa kɛ kanga lontomisa edjinge nshiyɛ olemo wɔnde.’​—Dj. 4:34.