1-2. Muyile Misambo 34:9, tui kulongiela ku buwa bua Yehowa naminyi?

BANDA kupuandikisha’shi abakupa kidibua kioshodile kashaa. We kukimba kuuka ingi mianda pabitale kiakia kidibua, eshiko diakio, kuuka bingi bintu biabatekaa nakio na kuipusha bangi bantu biabekimona. Biabia mushindo umune wa kui kiuka kalolo, mpa kui kifula na kui kitompa obe nabene.

² Tui kulonga mianda kampanda pa bitale buwa bua Yehowa, patubadika Bible na mikanda yetu, na pa kupusha miisambo ya bangi bakuetu bapete miabi mu kufubila Yehowa. Biabia atupete mpushisho e buwa, a mushindo wi buwa bua Yehowa, nsaa ya ‘tutompo’ atue banabene bi buwa buaye. (Badika Misambo 34:9.) Tutaleyi kileshesho kia mushindo watudia kuibikita. Tupuandikishe’shi atukumina kutuela mu mudimo wa nsaa yoso, anka bwa kukumbasha kano kepatshila abitungu tuikale na nshalelo mupelepele. Pangi tatupuile kubadika mulayilo wa Yesu awamba’shi, su tubatulu bufumu pa mbalo ya kumpala, Yehowa aketupa kintu kioso kiatudi nakio lukalo, anka atue banabene tatuamuene uno mulayilo kaulombana. (Mat. 6:33) Biabia bu biatudi na lukumino ku mulayilo wa Yesu, atupeelesha kutusha kua makuta, atushintula programe etu a mudimo wa ku mbidi, bua kumona bia kukita mudimo wa bulungudi. Su tubakitshi bino atuimuena atue banabene’shi Yehowa apasukilaa nkalo yetu binyibinyi. Biabia ‘atutompo’ bi buwa bua Yehowa atue banabene.

3. Muyile Misambo 16:1, 2, mbantu kinyi abapete buwa bua Yehowa?

³ Yehowa e buwa kui “bantu boso,” sunga kui baba basha bamuuku. (Mis. 145:9; Mat. 5:45) Bikishekishe baba boso bamufule na abamufubila n’eshimba diabo dioso abapete miabi ikile bungi. (Badika Misambo 16:1, 2.) Bua binobino tuisambileyi ingi mianda i buwa yabadi betukitshine kui Yehowa.

4. Yehowa Aleshaa buwa buaye kui boso ababanga kuifubuila kuadi naminyi?

 ⁴ Nsaa yoso ya tutumikila mianda yoso ya be tulongiesha kui Yehowa, atumono biayitukuasha. Nsaa yatulongo pa bimutale atubanga kumufula, aye namu etukuasha bua kukambila binangu bi bubi na bikitshino biashi mukumine. (Kol. 1:21) Na nsaa ya tuilambula kui Yehowa na ku batshishibua, atuimuena buwa bua Yehowa nsaa yetupa kondo k’eshimba ke buwa, na dingi atuifubuila kuadi.​—1 Mp. 3:21.

5. Tui kuimuena bi buwa bua Yehowa mu mudimo wa bulungudi mushindo kinyi?

⁵ Atutungunuka na kumona bi buwa bua Yehowa, nsaa yatuipana mu mudimo wa bulungudi. We muntu sha kambaa kuakula su? Bafubi ba Yehewa be bungi be biabia. Pangi kumpala kua’shi ofikie Temue a Yehowa, tobodi onangushena’shi we kukookola ku kibelo kia muntu oshowuku bua ku mulungula mukandu wi buwa. Anka lelo uno okuete kui bikita nsaa yoso. Na dingi, ku bukuashi bua Yehowa we mulongie bia kusankila mudimo wa bulungudi! Yehowa mmupue nkukuatshishena mu mishindo i bungi. Akukuasha bua kushala muumine nsaa yofumankana na kubinguabingua. Yehowa mmukukuashe bua kufubisha bifundue kalolo nsaa yolungula mukandu wi buwa kui bantu abakutemesha. Akupa dingi bukome bua kutungunuka na kulungula mukandu wi buwa sunga opeta bantu mu teritoire basha bakutemesha.​—Yel. 20:7-9.

6. Mushindo awitulongiesha Yehowa aulesha bi buwa buaye naminyi?

⁶ Yehowa etulesha bi buwa buaye, pa kuitulongiesha bia kukita mu mudimo wa bulungudi. (Yo. 6:45) Mu bisangilo bietu bia munkatshi a lubingo, atutemeshaa muisambo na abetunyingisha bua kuiyifubisha mu mudimo wa bulungudi. Kia kumpala, tui balombene kutshina bua kubanga na mayele apia, anka nsaa yatuibikitshi atukuasha bantu be mu teritoire etu. Ku bisangilo na ku bikongeno bietu atunyingishibua dingi bua kufubisha mayele mu mudimo wa bulungudi atushabandile kufubisha dingi. Biabia su tualeka moo na tuekitshisha bua kufubisha ano mayele apia, Yehowa etuelela miabi, bua binobino tutaluleyi kiatudi balombene kupeta, su tuafubisha mayele apia bua kupa Yehowa kintu ki buwa kiatudi nakio muyile nshalelo atudi naye. Na dingi tutaluleyi mushindo watudi balombene kutamisha mudimo wetu wa bulungudi.

7. Miabi kinyi yatupete nsaa yatuitatshisha bua kutamisha mudimo wetu wa bulungudi?

⁷ Tui kuifubuila pepi na Yehowa. Tutaluleyi kileshesho kia mukuetu mulume abetamina bu Samuel *, bakuete kufuba na mukashi aye mu Colombie. Uno mulume na mukashi abadi na muloo wa kufuba bu ba mbala-mashinda mu kakongye ka kuabo, anka abadi na lukalo lua kutamisha mudimo wabo wa bulungudi, pa kuenda mu kukuasha mu kakongye kabadi na lukalo lukata lua balungudi. Bua kukumbasha kano kepatshila abadi besumine ingi mianda yabadi bakumine. Samuel amba’shi: “Tubadi batumikile mayi e mu Mateo 6:33, atue nkuimika kukita mianda ishi na muulo.” Anka muanda wa kumpala nkukatuka mu nshibo yetu. Ibabadi bebakie mu mushindo ubatudi atukumina, na tatubadi atufutu makuta kuanka nya. Nsaa ibabayile mu kakongye kapia tababadi na lukalo lua makuta mu nshalelo aabo bu bibabadi nao lukalo kumpala. Samuel alombasha dingi’shi: “Tui bamone Yehowa bi’etukunkusha mu mianda yetu yoso, na bialula ku nteko yetu.” Na “tui bapushe’shi Yehowa mmuitukumine na muitufule mu mushindo watushamuene dingi.”  We na ngobesha ya kutamisha mudimo oobe mu uno mushindo su? Su we nayo we mulombene kuifubuila pepi na Yehowa, na aye namu akupasukila.​—Mis. 18:25.

8. Bibakula Ivan na Viktoria bibakulongiesha kinyi?

⁸ Atupete muloo mu mudimo wetu. Tupushe abiakula mukuetu Ivan na Viktoria, mukashi na mulume abafubu bu ba mbala-mashinda mu Kyrgyzstan. Mbalame nshalelo aabo mupelepele bua kuipana mu mudimo oso wabebapa mpa na wa luibako lua mashibo a bufumu. Ivan amba’shi: “Atukitaa muetu moso bua kufuba mudimo oso wa betupa. Sunga mbiabia, ku nfudilo a efuku atukokaa, anka tui na butale na muloo muanda atuuku’shi tubatuusha bukome buetu, bua kukuatshishena mudimo wa Bufumu. Atupetaa dingi muloo ukata nsaa yatupete ba kuuku bapia, nyi mianda yatushi balombene kuilunkana.”​—Mak. 10:29, 30.

9. Mukuetu mukashi e na nkalakashi kinyi ya mu nshalelo pabitale kutamisha mudimo waye wa bulungudi, na mbipeta kinyi bitukie?

⁹ Atupetaa muloo mu mudimo wa Yehowa sunga tuapeta nkalakashi ilekenelekene. Bu kileshesho, Mirreh mukuetu mukashi kilele tadi mununu a mu Afrique a kupona nguba, bayimikile mudimo waye wa bu docteur, na abanga mudimo wa bu mbala-mashinda. Mirreh badi na mukumbo wi bukopo ngofu washibadi na mushindo wa ku tambuka, nyi buakinyi badi akitshi nka nsaa imune mu bulungudi bua ku nshibo na nshibo. Anka badi na ngobesha ya kukisha nsaa i bungi mu bulungudi bua pa mbalo i bantu be bungi. Na badi na bantu be bungi bakualukila na bangi ba kulonga nabo Bible. Bangi badi esamba nabo ku telefone. Buakinyi Mirreh badi akumina kufuba bi bungi mu mudimo wa Yehowa? Mirreh amba’shi: “Eshimba diande dibadi difule Yehowa na Yesu ngofu. Amba dingi’shi nadi natekie Yehowa misusa yoso bua’shi ankuashe bua kukita bi bungi mu mudimo Waye muyile ngobesha yande.”​—Mat. 22:36, 37.

10. Anka bu biabebilesha mu 1 Myeele 5:10, bano abakumina kulongieshibua na Yehowa abitungu bakite kinyi?

¹⁰ Atulongishiebua dingi na Yehowa. Kenny kuete kufuba bu mbala-mashinda, musangane’shi bino mbia binyibinyi. Nsaa ibabangile kulonga bia binyibinyi, bemikile tulasa tuaye ku kilongielo kikata, aye kubatshishibua, na aye nkuata mudimo wa nsaa yoso. Akula’shi, “Nekitshishe bua kuikala na nshalelo epushena na mayi a mutemuki Yeeshaya aamba’shi: ‘Nami uno ntume!’” (Yesh. 6:8) Kenny mufube mu bisaka bilekenelekene bia luibako lua mashibo a Bufumu, na mukuashe dingi mu kualula kua mikanda yetu mu ludimi luaye lua butandua. “Kenny amba’shi mbadongieshe bia kuikala na ngobesha nyandi nayo lukalo bua kulombasha mudimo wande.” Ne mulongie bi bungi kushi penda bia kukita wawa mudimo. Alombasha dingi’shi, “nalongiele pabitale lukalo na ngikashi yandi mulombene kuikala nayo bua kufubila Yehowa kalolo.” (Badika 1 Myeele 5:10.) Buakinyi we mulombene kutalula nshalelo obe na kumona su we mulombene kulongieshibua na Yehowa?

11. Bakuetu bakashi ba mu Corée du Sud mbekitshishe naminyi bua kuipana mu mudimo wa bulungudi, na mbipeta kinyi bitukie? (Tala kifuatulo ki ku kipusu.)

¹¹ Sunga ba Temue batabadi na bipua bi bungi bena lukalo lua kulonga mianda ipia bua kukita mudimo kalolo. Mu kino kipungo kia Corona Virus, bakulu ba mu kakongye ka mu Corée du Sud mbafunde’shi: “Bangi bashibadi na mushindo wa kulungula mukandu wi buwa muanda wa maladi, binobino mbapete mushindo wa kulungula ku bukuashi bua video conference. Bakuetu bakashi basatu batabadi na bipua bikile pa 80 mbalongie mishindo ipia ya kufubisha tuamo, na binobino mbabangie kulungula mukandu wi buwa.” (Mis. 92:14, 15) We mulombene kutamisha mudimo obe wa bulungudi  na kutompa bua kumona bi buwa bua Yehowa naminyi? Tutalule ingi mianda i biankukuasha bua kulombasha kepatshila kobe.

12. Yehowa mmule kinyi bua boso abakulupila muadi?

¹² Longa bia kukulupila kui Yehowa. Yehowa muitule’shi su tubakulupila muadi, etukitshina mianda i bungi i buwa, na su tubepana mu kumufubila. (Mal. 3:10) Mukuetu mukashi abetamina bu Fabiola mushale mu Colombie, mumone Yehowa bia kumbasha uno mulayilo mu nshalelo aye. Badi akumina kubanga mudimo wa bu mbala-mashinda mafuku apela kuyima kuaye kubatshishibua. Anka badi afubu ngofu bua kupasukila nkalo ya mulume aye na bana baye. Anka pabadi akumina kuimika mudimo batekiele Yehowa ngofu bua’shi amukuashe. Amba’shi: “Bantu be bungi abatengiela munda mua mafuku e bungi bua’shi bapete lualulo bua kuimika mudimo wabo, kadi ami mbangalule kunyima kua mueshi umune. Bino bibadi bu kilengieleshi!” kunyima kua mieshi ibidi babangile mudimo wa bu mbala-mashinda. Lelo uno tadi na bipua bikile pa 70, na mu mudimo wa bu mbala-mashinda e na bipua 20. Munda mua bino bipua bioso, mukuashe bantu bua kubatshitshibua. Amba’shi: “Angi mafuku nepusha mubofule kuishimba, anka Yehowa ankuashaa efuku dioso bua kutungunuka na mudimo wande wa bu mbala-mashinda.”

13-14. Mbileshesho kinyi bilombene kuitukuasha bua kukulupila mui Yehowa, na kukumbasha bipatshila bietu?

¹³ Longiela ku bileshesho bia boso babadi bakulupile kui Yehowa. Mu Bible mui bileshesho bi bungi bia bantu babadi bepane bua kufubila  Yehowa, bileshesho bi bungi bia bafubi ba Yehowa, abilesha’shi abadi abele etabula kumpala kuashi bapete miabi i pabuayo ayifiki kui Yehowa. Bu kileshesho, nka penda kunyima kua Abrahame kukatuka ku nshibo yaye “kushi kuwuka kubaadi ende,” Yehowa badi mu muelele miabi. (Eb. 11:8) Nka penda kunyima kua Yakobo kulua na muikeyilu nyi kubapetele miabi i pabuayo. (Kib. 32:24-30) muilo wa Isaleele ubatuelele mu Nsenga ya Mulayilo, nka penda kunyima kua ba tshite-muakuidi kuashina mu muela wa Yordane.​—Yos. 3:14-16.

¹⁴ We mulombene kulongiela dingi ku bileshesho bia ba Temue ba Yehowa ba ano etu mafuku abadi bakulupile mui Yehowa na kukumbasha bipatshila biabo. Bu kileshesho, mukuetu mulume a betamina bu Payton na mukashi aye Diana abasangelaa kubadika pabitale bakuetu balume na bakashi batamishe mudimo wabo bua Yehowa, bu biabadi beuleshe mu muisambo awamba’shi: “Mbelambule abo banabene.” * Payton amba’shi: “Nsaa yatubadika miisambo yabo atuipusha nka bu bantu ababandila muntu kuete adi kidibua ki buwa. Muenda mafuku tubadi atuende na kumona abitama lukalo lua ‘kutompa na kumona bi buwa bua Yehowa.’” Nyi buakinyi Payton na Diana abayile mu kufuba mbalo ibadi lukalo lukata lua balungudi. Obe namu we mubadikie ino miisambo su? Todi mutale namu ano ma video e mu jw.org aamba’shi; Prédication dans des régions isolées : Australie na Prédication dans des régions Irland? Ino miisambo na ma Video bi nkukuasha bodia kumona bia kutamisha mudimo obe wa bulungudi.

15. Ba kuuku be buwa mbalombene kuitukuasha naminyi?

¹⁵ Kusangula ba kuuku be buwa. Bi kuitubofuila bua kudia kidibua kiatushadile dingi nsaa yatudi na bangi bantu. Mu mushindo umune, su tui na ba kuuku abatulu kikiebe ki’ eshimba dia Yehowa pa mbalo ya kumpala mu nshalelo abo, n’atue namu abitubofuila bua kutamisha mudimo wetu bu’ Efile Mukulu. Mulume na mukashi babetaminaa bu Kent na Veronica, mbasangane’shi bino bia binyibinyi. Kent amba’shi: “Ba kuuku betu na be na kifuko netu abetunyigisha bua kutompa mudimo upia.” Tuibamone’shi ku bukuashi bua ba kuuku be buwa abatulu Bufumu pa mbalo ya kumpala, tui bapete mishindo ya kutompa bia kukita ingi mianda ipia. Lelo uno, Kent na Veronica bakuete abafubu bu ba mbala-mashinda ba mieshi yoso mu Serbie.

16. Nka bu biabebilesha mu lukindi lua Yesu luatusangana mu Luka 12:16-21, buakinyi abitungu tukumine kuisumina ingi miloo?

¹⁶ Esumine ingi miloo bua Yehowa. Ta tui na lukalo na kuleka bintu bioso abitusankisha mu nshalelo etu bua kusankisha Yehowa nya. (Mul. 5:19, 20) Biabia, tatupelanga kukita bi bungi mu mudimo wa Yehowa penda muanda’shi tuina bintu kampanda biatudi bafule biatusha tukumina kuleka. Tatukitanga kilubilo kimune ki bakitshine muntu a mu lukindi lua Yesu bakimbile bintu bi bungi bia ku mbidi, anka ayiluankana Efile Mukulu. (Badika Luka 12:16-21.) Mukuetu mulume abetaminaa bu Christian, mushalele mu France amba’shi, “Ami na kifuko kiande tatui bekitshishe namu bua kupa Yehowa nsaa yetu na bukome buetu nya.” Aye na mukashi aye abatshile kitshibilo kia kuikala bu ba mbala-mashinda. Anka bua kukumbasha kano kepatshila bibadi abitungu’shi bemikie mudimo wabo. Bua kulombasha nkalo yabo, ababagile kutumpa mu mashibo a bantu, na kusanka na kiabadi nakio. Abadi na muloo wa kuleka bingi bintu na kuikala bu ba mbala-mashinda su? Christian amba’shi, “Tui na muloo wi bungi mu mudimo  watudi nao binobino, na tui na muloo pakumona balongi ba Bible na pa kualukila bantu bua kuisamba nabo pabitale Yehowa.”

17. Buakinyi bi kuituelela bukopo bua kutompa mayele apia mu mudimo wetu wa bulungudi?

¹⁷ Tukumine kutompa ungi mushindo wa mudimo upia. (Bik. 17:16, 17; 20:20, 21) Shirley ungi mbala-mashinda a mu États-unis mushintuule mushindo waye wa kulungula mukandu wi buwa, mu kino kipungo kia Corana Virus. Kumpala, badi na mpaka kuishimba bua kulungula mukandu wi buwa mu terituare aye. Akupu bapetele bukuashi kui mukunkushi a kifunda nsaa ibafikile mu kukunka kakongye kabo, nyi aye kubanga kulungula mukandu wi buwa ku telefone nsaa yoso. Amba’shi: “Ku mbangilo badi apusha moo, anka binobino tadi na muloo wa kui bikita. Tuibapete bantu be bungi kukila babatudi atupete mu bulungudi bua kunshibo na nshibo!”

18. Nkinyi ki kuitukuasha nsaa yatudi na nkalakashi patuikitshisha bua kutamisha mudimo wetu?

¹⁸ Eatshile kepatshila na wekitshishe bua kuikalombasha. Nsaa yatufumankana na nkalakashi, abitungu tutekie ngofu na tuikitshishe bua kufubisha ngielelo etu abinangu kalolo, bua kukumbasha kepatshila ketu. (Nki. 3:21) Sonia mukuetu mukashi mbala-mashinda a mieshi yoso, kuete kufuba mu kasaka ka ludimi lua Romani mu Europe amba’shi: “Nafundaa tuipatshila tuande, na natulaa diadia epupua mbalo yandi mulombene kuidimona. Pa mesa ande ne mutule epupua diandi musole mashinda aende mpese ilekene. Nsaa yandi na kitshibilo kia kuata, natalaa mu esaki diande di na mashinda abidi, na kunagushena su kitshibilo kiandi mulombene kuata ki kukuasha bua kulombasha kepatshila kande, sunga kukutua kulombasha.” Sonia kuete ekitshisha bua kulama mueneno e buwa nsaa yadi na nkalakashi. Amba dingi ’shi: “Muanda oso upia autuku mu nshalelo ande wi kuikala bu kimano, sunga bu kitala akinkuasha bua kulombasha kepatshila kande anka kintu ki na muulo mueneno ande mu wawa muanda.”

19. Tui kulesha lutumbu naminyi bua bintu bioso bitukitshine Yehowa?

¹⁹ Yehowa etuelelaa miabi mu mishindo ibungi. Tui kulesha lutumbu bua miabi yoso yadi muituelele, patukitshi kioso kiatudi balombene kukita bua kumutumbisha. (Eb. 13:15) Bino abipushisha’shi nsaa yatutalula mayele apia bua kutamisha mudimo wetu wa bulungudi, na Yehowa namu etuelela miabi i bungi. Efuku dioso tutaluleyi mushindo wa ‘kumona bi buwa bua Yehowa.’ Na dingi, atukakula nka bu Yesu bambile’shi: “Kya kudia kyande nkukita akikyebe muntume na kukumbasha mufubo waye.”​—Yo. 4:34.