1-2. Andi u musu du fuu ko si taa Jehovah bunu, te u luku Psalöm 34:8?

 PAKISEI taa wan sëmbë tja wan soni ko da i fii njan, di ja njan wan daka. Wë i sa ko sabi soni u di njanjan dë, te i ta luku ën, te i sumëë ën, te i hakisi wotowan unfa de mbei ën, söseei te i hakisi wotowan ee de lobi ën. Ma di möön bunu fasi fa i sa ko sabi ee i lobi di njanjan, hën da te iseei tesi ën.

² Te u ta lesi di Bëibel ku dee buku fuu, söseei te u ta haika te wotowan ta konda unfa Jehovah bi mbei de feni gaan bunu, nöö u ta ko sabi taa Jehovah ta du bunu da sëmbë. Ma woo ko möön fusutan di soni aki, te useei „tesi” fuu ko si taa Jehovah bunu. (Lesi Psalöm 34:8.) Boo luku wan fasi fa u sa du di soni aki. Boo taa u kë du di hii-ten diniwooko, ma fuu sa dou di maaka dë, nöö u musu tooka so soni a u libi. Kandë u bi lo’ u lesi di soni di Jesosi bi paamusi u, taa ee u ta buta di Könuköndë a di fosu kamian a u libi, nöö Jehovah o da u hii dee soni dee u abi fanöudu. Ma kandë nöiti useei bi si unfa Jehovah du dee soni aki da u (Mat. 6:33). Ma u di u ta biibi di soni di Jesosi paamusi u, mbei wa ta puu möni u bai so soni möön, söseei wa ta wooko sö hia möön, nöö u ta du hii soni di u sa du a di peleikiwooko. Te u ta du dee soni aki, nöö u ta si taa Jehovah ta mbei u feni dee soni dee u abi fanöudu. A di lö fasi aki useei ta „tesi” fuu ko si taa Jehovah bunu.

3. Ambë ku ambë Jehovah ta du bunu da, te u luku Psalöm 16:1, 2?

 ³ Jehovah ta du bunu da hii sëmbë, te kisi dee sëmbë dee an sabi soni fëën (Ps. 145:9; Mat. 5:45). Ma a ta mbei dee sëmbë dee lobi ën, söseei dee ta dini ën ku hii de hati, feni sömëni gaan bunu. (Lesi Psalöm 16:1, 2.) Boo taki u wantu u dee bunu soni dee Jehovah du da u.

4. Un bunu Jehovah ta du da dee sëmbë dee ta bigi mbei möiti u ko dë mati fëën?

⁴ Hii juu te u ta du dee soni dee Jehovah ta lei u, nöö u ta si dee wini dee u ta feni. Di u bi ko sabi soni u Jehovah, söseei di u bi ko ta lobi ën, nöö a bi heepi u fu wa ta pakisei soni nasö ta du soni di an lobi (Kol. 1:21). Di u bi buta u libi nëën maun, hën u tei dopu, nöö a bi da u woto bunu soni jeti. A bi heepi u fuu ko abi wan limbo háti, söseei u ku ën bi sa ko dë gaan mati.​—1 Pet. 3:21.

5. Unfa u ta si fa Jehovah bunu, te u ta du di peleikiwooko?

⁵ U ta si unfa Jehovah bunu tu, te u ta du di peleikiwooko. I dë wan sëmbë di ta sen u? Wë sömëni u dee sëmbë u Jehovah dë sö. Kandë ufö i ko dë wan dinima u Jehovah, ja bi pakisei taa wan daka i bi o ta waka nango a sëmbë pisi u go konda soni u Bëibel da de. Ma nöunöu di soni aki i ta du hii juu. Boiti di dë, Jehovah heepi i fii ko lobi di peleikiwooko seei! Jehovah heepi i a sömëni woto fasi jeti. A bi heepi i fu ja ta fëëë te sëmbë bi ligei ku i a di peleikiwooko. A bi heepi i tu fii toona mëni Bëibel tëkisi, te wan sëmbë bi kë haika di bunu buka. Söseei a bi heepi i fii hoi dou te sëmbë an bi ta kë haika i te i bi go peleiki da de.​—Jel. 20:7-9.

6. Unfa di heepi di Jehovah ta heepi u fuu ko sa’ u du di peleikiwooko ta lei u unfa a abi bunuhati tjika?

⁶ Jehovah bi lei u tu unfa a abi bunuhati tjika, u di a heepi u fuu ko sa’ u du di peleikiwooko (Joh. 6:45). A di komakandi fuu di u ta hoi a mindiwiki, de ta lei u unfa u sa peleiki da wotowan. De ta da u taanga fuu ta wooko ku dee soni aki te u dë a di peleikiwooko. Bigibigi u sa ta fëëë fuu bigi ku wan njunjun soni, ma te u du ën kaa, nöö u ta ko si taa soni ta waka bunu seei. De ta da u taanga a dee komakandi ku dee könklësi fuu tu, fuu ta mbei möiti u du di peleikiwooko a peipei fasi. U sa fëëë pikisö fuu du di soni aki, ma te u mbei möiti fuu du ën, nöö Jehovah o mbei u feni gaan bunu. Boo luku wantu u dee gaan bunu dee u ta feni te u ta mbei möiti fuu du hii soni di u sa du da Jehovah, aluwasi unfa soni dë da u. Söseei boo luku andi da wantu fasi fa u sa du möön soni a di dini di u ta dini Jehovah.

7. Un gaan bunu u ta feni te u ta mbei möiti fuu du möön soni a di dini di u ta dini Jehovah?

⁷ U ku Jehovah ta ko dë möön gaan mati. Boo taki u wan baaa de kai Samuel, b di dë gaanwomi u kemeente. Di baaa aki ku hën mujëë ta du di diniwooko u de a di köndë Kolombia. Di baaa aki ku hën mujëë bi lobi ën seei fa de bi ta du di pioniliwooko a di kemeente ka de bi dë. Ma de bi kë go heepi a wan kemeente ka de bi abi heepi fanöudu möön gaanfa. U de bi sa dou di maaka dë, de bi musu disa so soni di de bi lobi. Baaa Samuel bi taki taa: „U bi du di soni di sikifi a Mateosi 6:33, nöö wa bi ta bai soni di an bi dë fanöudu möön. Ma di soni di bi möön taanga da u fuu du, hën da di u bi musu foloisi kumutu a di wosu ka u bi ta libi. U bi lobi di fasi fa di wosu dë bi mbei, nöö an bi dë fuu ta paka fëën möön.” Di di baaa aki ku di mujëë fëën go a wan woto kemeente, hën de bi ko si taa de an  bi abi sö hia möni fanöudu u de sa libi. Baaa Samuel bi taki tu taa: „U bi si unfa Jehovah bi ta tii u, söseei u bi si unfa a bi ta piki dee begi fuu. U bi ta fii taa Jehovah ta wai ku u. Wa bi fii di lobi fëën sö wan daka.” I bi o sa du möön soni a di dini di i ta dini Jehovah tu ö? Wë i sa dë seiki taa ee i du ën, nöö i ku Jehovah o ko dë möön gaan mati, söseei a o da i dee soni dee i abi fanöudu.​—Ps. 18:25.

8. Andi i ta lei a di soni di Baaa Ivan ku hën mujëë Viktoria bi taki?

⁸ U ta dë waiwai te u ta du di peleikiwooko. Baaa Ivan ku hën mujëë Viktoria, ta du di pioniliwooko a di köndë Kiligisitan. Boo buta pakisei a wantu soni di de bi taki. Di baaa aki ku hën mujëë bi tooka soni a de libi u de bi sa heepi a hiniwan kamian ka heepi bi dë fanöudu, aluwasi ee de bi musu go heepi mbei kamian ka u ta dini Gadu. Baaa Ivan bi taki taa: „U bi ta du hiniwan wooko di de bi da u ku hii u hati. Hii fa so juu u bi ta wei te u bi kaba wooko, tökuseei u bi ta fii bunu a u dendu, u di u bi sabi taa u bi wooko ku di kaakiti fuu u mbei di Könuköndë wooko go a fesi. U bi ta dë waiwai tu u di u bi ko abi sömëni woto mati, nöö u bi ta mëni fa u ku de bi ta du soni makandi.”​—Maik. 10:29, 30.

9. Andi wan sisa bi du faa sa du möön soni a di diniwooko fëën, hii fa soni bi taanga dëën, nöö un wini a bi feni?

⁹ U sa ta dë waiwai a di dini di u ta dini Jehovah, aluwasi fuka ta miti u. Wan sisa de kai Mirreh di manu fëën dëdë, ta libi a West-Afiikan. Di sisa aki bi dë wan data. Di a go ku pensu, hën a bigi du di pioniliwooko. Di sisa aki abi wan siki di ta mbei a ta fii pen, nöö a ta taanga dëën u waka. Wan juu longi nöö a sa nango ta peleiki a sëmbë pisi. Ma a sa ta möön peleiki longi, te a go peleiki a kamian ka hia sëmbë ta waka pasa. Di sisa aki abi sömëni sëmbë di a ta toona peleiki da, söseei a abi sömëni sëmbë di a ta lei soni u Bëibel. Wantu u dee sëmbë aki a ta lei soni ku tëlëfön. Faandi mbei Sisa Mirreh bi kë du möön soni da Jehovah? A bi taki taa: „Mi lobi Jehovah ku Jesosi Keesitu gaanfa seei. Nöö hiniwan juu mi ta begi Jehovah faa heepi mi u mi sa du soni dëën ka mi sa du dou.”​—Mat. 22:36, 37.

10. Andi dee sëmbë dee ta mbei möiti u de du möön soni da Jehovah ta feni, te u luku 1 Petuisi 5:10?

¹⁰ Jehovah ta lei u woto soni tu. Wan baaa de kai Kenny di ta du di pioniliwooko a di paati de kai Mauritius, bi si taa di soni aki dë sö tuu. Di a ko sabi soni u di tuutuu lei, hën a disa di hei siköö di a bi nango. A tei dopu, hën a bigi du di hii-ten diniwooko. Di baaa aki bi taki taa: „Mi ta mbei möiti u mi libi ku di soni di di tjabukama Jesaaja bi taki. A bi taki taa: ’Luku mi aki! Manda mi’” (Jes. 6:8). Baaa Kenny bi heepi mbei sömëni kamian ka u ta dini Gadu, söseei a bi heepi u puu buku ko nëën mamabëë töngö. Baaa Kenny bi taki tu taa: „Mi bi lei soni di bi heepi mi u mi sa du dee wooko di de bi da mi u mi du.” Ma na dee soni dë wanwan Baaa Kenny bi lei. Hënseei bi toona taki taa: „Mi bi ko lei tu taa soni dë di ma bi sa du, söseei mi bi lei u ko abi fasi di bi o heepi mi u mi dini Jehovah möön bunu.” (Lesi 1 Petuisi 5:10.) Wë kandë iseei sa tooka soni a i libi, sö taa Jehovah sa lei i woto soni tu.

11. Andi wanlö sisa u Zuid-Kolea bi du u de sa ta du di peleikiwooko, nöö unfa soni bi waka? (Luku di peentje u di kafiti.)

¹¹ Dee sëmbë dee dë Kotoigi sömëni jaa kaa seei Jehovah ta lei soni jeti, te de mbei möiti u de du di diniwooko u de woto fasi. A di pisiten u di kolona siki di ko a hii së u goonliba aki, dee gaanwomi u wan kemeente a Zuid-Kolea, bi taki taa: „Dee baaa ku dee sisa dee bi si kuma de an bi o sa ta du di peleikiwooko u di de dë ku suwaki, sa ta du ën nöunöu ku  tëlëfön. Dii sisa di pasa 80 jaa seei ko lei u wooko ku dee njunjun soni aki, nöö de ta peleiki a di fasi aki bëina hiniwan daka” (Ps. 92:14, 15). I bi o kë ta peleiki möön gaanfa, sö taa iseei sa si unfa Jehovah bunu tjika u? Boo luku wantu soni di o heepi i fii sa dou di maaka dë.

12. Andi Jehovah paamusi dee sëmbë dee ta futoou ën?

¹² I musu lei u ko ta futoou Jehovah. A paamusi u taa a o mbei u feni sömëni gaan bunu te u ta futoou ën, söseei te u ta du hii soni di u sa du dëën (Mal. 3:10). Wan sisa de kai Fabiola, di ta libi a Kolombia, bi si unfa Jehovah ta du di soni di a paamusi u aki. Di sisa aki bi kë du di kowoonu pioniliwooko kölö sö baka di a dopu. Ma a bi musu wooko u heepi sölugu dee sëmbë fëën wosudendu. Fëën mbei di a bi o go ku pensu, hën a begi Jehovah fajafaja faa heepi ën. A bi taki taa: „A ta tei longi ufö wan sëmbë bigi kisi möni te a go ku pensu. Ma wan liba baka di mi go ku pensu, hën mi bigi kisi möni kaa. Di soni aki bi dë wan foombo soni!” Baka tu liba, hën di sisa aki bigi du di pioniliwooko. Nöunöu a abi 70 jaa ku mii, nöö 20 jaa longi a ta du di pioniliwooko kaa. A hii dee jaa dë, a bi heepi 8 sëmbë u de dopu. Di sisa aki bi taki taa: „Hii fa mi ta fii suwaki so juu, tökuseei Jehovah ta heepi mi hiniwan daka u mi sa du di pioniliwooko go dou.”

13-14. Un woto sa heepi u fuu futoou Jehovah, söseei fuu du möön soni a di diniwooko?

¹³ Lei soni a dee sëmbë dee bi futoou Jehovah. Di Bëibel abi sömëni woto u sëmbë, di bi  wooko taanga da Jehovah. Sömëni u dee sëmbë aki bi musu lei taa de ta futoou Jehovah, ufö Jehovah mbei de feni gaan bunu. Te u luku di woto u Abahamu, nöö u ta si taa di a foloisi kumutu a di kamian ka a bi ta libi „söndö faa sabi naasë a nango”, nëën ufö Jehovah mbei a feni gaan bunu (Heb. 11:8). Di Jakopu feti ku di ëngëli, nëën ufö Jehovah mbei a feni gaan bunu (Ken. 32:24-30). Di dee Isaëli sëmbë bi o go a di Paamusi Köndë, nöö de bi musu aba di Joodan Lio. Di dee mindima buta futu a di wata, nëën ufö de ku dee Isaëli sëmbë bi sa aba di Lio.​—Jos. 3:14-16.

¹⁴ I sa lei soni a dinima u Jehovah u di ten aki tu di bi futoou Jehovah, söseei di bi mbei möiti u de du möön soni da dëën. Wan baaa de kai Payton ku hën mujëë Diana, lo’ u lesi woto u baaa ku sisa di bi mbei möiti u de du möön soni da Jehovah. Wantu u dee woto aki dë u feni a di pisi „Den ben de klariklari fu go”. c Payton bi taki taa: „Di u bi ta lesi dee woto aki, nöö u bi ta fii kuma u ta luku fa wan woto sëmbë ta njan wan suti njanjan. Möön u bi ta luku, möön useei bi ta kë ’tesi fuu si taa Jehovah bunu’.” Te u kaba fëën, Payton ku Diana bi foloisi go libi a wan kamian ka möön peleikima dë fanöudu. I lesi dee woto aki kaa u? I luku di fëlön Preiki na farawe presi​—Australia ku di fëlön Prediken in afgelegen gebied​—Ierland, di dë a jw.org kaa u? Dee soni aki sa heepi i fii suku fasi fii sa du möön soni a di diniwooko.

15. Un wini u sa feni te u dë mati ku sëmbë di ta buta di Könuköndë a di fosu kamian a de libi?

¹⁵ I musu abi bunu mati. Woo kë möön njan wan soni di wa bi njan jeti, te u dë makandi ku sëmbë di lobi ën. Wë sö nöö a dë tu taa ee u ta nama ku wotowan di ta buta di dini di de ta dini Jehovah a di fosu kamian a de libi, nöö useei o kë suku fasi fuu du möön soni da Jehovah. Wan baaa de kai Kent ku hën mujëë Veronica, bi si taa sö di soni aki dë tuu. Kent bi taki taa: „Dee mati ku dee famii fuu bi da u taanga fuu pooba u du di peleikiwooko a woto fasi. U bi ko si taa te u ta nama ku sëmbë di ta buta di Könuköndë a di fosu kamian a de libi, nöö wa ta fëëë möön u pooba u du wan njunjun soni.” Nöunöu Kent ku Veronica ta du di apaiti pioniliwooko a di köndë de kai Sëlifia.

16. Faandi mbei u musu dë kabakaba u disa so soni fuu dini Jehovah, te u luku di woto di Jesosi konda a Lukasi 12:16-21?

¹⁶ I musu disa so soni fii sa du möön soni da Jehovah. An dë fuu disa hii soni di u lobi fuu sa dini Jehovah (Peleik. 5:19, 20). Ma ee wa ta du möön soni da Jehovah, u di wa kë disa so soni di u lobi, nöö u sa mbei di seei föutu di di womi di Jesosi bi konda soni fëën bi mbei. Di womi aki bi ta wooko taanga faa sa abi wan bunu libi, ma an bi ta booko hën hedi ku soni u Gadu. (Lesi Lukasi 12:16-21.) Wan baaa de kai Christian, di ta libi a Gaan Faansiköndë, bi taki taa: „Ma bi ta da Jehovah hii di kaakiti di mi bi abi, söseei ma bi ta abi ten da dee sëmbë u mi wosudendu.” Di baaa aki ku hën mujëë bi buta taa de bi o du di pioniliwooko. Ma u de bi sa dou di maaka dë, nöö de bi musu disa di wooko di de bi ta du. Wë de bi hopo wan wooko u de, u seeka kamian da sëmbë. Söseei de bi ta mbei möiti u de dë tifeedi ku dee soni di de bi abi. Ma a bi hati de taa de bi disa soni u de sa du di pioniliwooko u? Wë Christian bi taki taa: „Nöunöu u ko möön lobi di diniwooko fuu, söseei u ta wai te dee sëmbë dee ta lei soni u Bëibel, ta ko lei sabi soni u Jehovah.”

17. Andi sa tapa u fu wa du di peleikiwooko a wan woto fasi?

¹⁷ Mbei möiti fii du di diniwooko fii a wan  woto fasi (Tjab. 17:16, 17; 20:20, 21). Wan sisa de kai Shirley, di ta du di pioniliwooko na Amëëkanköndë, bi musu tooka soni a di fasi fa a bi ta peleiki, di di kolona siki ko. Bigibigi a bi ta fëëë u peleiki ku tëlëfön. Ma di di keling-gaanwomi bi ko luku di kemeente ka a bi dë, hën a bi lei de unfa de bi sa du ën. Sensi di ten dë, a ta peleiki ku tëlëfön hii juu. A bi taki taa: „Bigibigi mi bi ta fëëë u peleiki ku tëlëfön, ma nöunöu mi ko lobi ën seei. U sa ta fan ku möön hia sëmbë, möön di u bi nango ta peleiki da sëmbë a de pisi!”

18. Andi sa heepi u ee wan soni ta tapa u fuu sa du möön soni da Jehovah?

¹⁸ Buta maaka di i kë dou, nöö mbei möiti fii sa dou de. Te fuka ta miti u, nöö u ta begi Jehovah hakisi ën faa heepi u fuu sa sabi andi u musu du (Nöng. 3:21). Wan sisa de kai Sonia, ta du di pioniliwooko a Europa, nöö a dë a wan kulupu ka de ta fan Lomanitöngö. Di sisa aki bi taki taa: „Mi ta sikifi dee soni dee mi kë du buta a pampia, nöö mi ta buta di pampia a wan kamian ka mi sa ta si ën hii juu. Wan soni dë maakamaaka a di tafa liba u mi, di ta lei tu pasi di nango a tookatooka kamian. Te mi musu du wan soni, nöö mi ta luku dee tu pasi aki, nöö mi ta pakisei luku ee naasë di soni di mi kë du dë o tja mi go.” Sonia ta mbei möiti fu an ta booko hën hedi tumisi ku dee fuka fëën. A bi taki taa: „Te wan soni ko tooka a mi libi, nöö mi ta luku unfa mi o si di soni dë. Mi sa si ën kuma wan peni di ta tapa mi u ma dou dee maaka u mi, nasö mi sa si ën kuma wan booki di o heepi mi u mi sa dou dee maaka mi.”

19. Andi u musu dë kabakaba u du?

¹⁹ Jehovah ta mbei u feni gaan bunu a sömëni fasi. U sa lei taa u ta tei dee soni aki u bigi, te u ta du hii soni di u sa du fuu sa tja gafa ko dëën (Heb. 13:15). U sa du tookatooka soni a di dini di u ta dini Jehovah, nöö dee soni dë sa mbei Jehovah mbei u feni woto gaan bunu. Be a dë taa hiniwan daka u ta suku fasi u „tesi”, fuu ko „si taa Jehovah bunu”. Te u ta du sö, nöö woo ko dë kuma Jesosi. A bi taki taa: „Di njanjan u mi, hën da te mi ta du dee soni di Sëmbë manda mi ko aki kë u mi du, be di wooko fëën kaba.”​—Joh. 4:34.