1-2. Soleki fa Psalm 34:8 e taki, dan san wi musu du fu si taki Yehovah bun?

KON meki wi taki dati wan sma e gi yu wan sani fu nyan di yu no tesi noiti ete. Yu kan kon sabi wan sani fu a nyanyan te yu luku en, te yu smeri en, te yu leisi na ini wan buku fa yu musu meki en, noso te yu aksi trawan efu den lobi en. Ma efu yu wani sabi efu yu o lobi a nyanyan trutru, dan yusrefi musu tesi en.

² Wi kan kon sabi taki Yehovah e du bun sani gi sma te wi e leisi Bijbel nanga den buku fu wi, èn te wi e yere fa trawan e taki fu den bun sani di Yehovah du gi den. Ma wi o frustan krin o bun Yehovah de te wisrefi e „tesi èn si” dati. (Leisi Psalm 34:8.) Luku wan eksempre fa wi kan du dati. Kon meki wi taki dati yu wani go na ini a furuten diniwroko, ma yu musu libi son sani na baka fu man du dati. Kande yu sabi a pramisi fu Yesus taki Yehovah o sorgu gi den sani di yu abi trutru fanowdu te yu e poti a Kownukondre na a fosi presi. Ma noiti yu ondrofeni taki Yehovah du a sani dati gi yu (Mat. 6:33). Awinsi fa a no fa, toku yu e poti bribi na ini a pramisi fu Yesus èn yu e bosroiti fu no gebroiki so furu moni moro, fu no wroko so furu moro, èn fu poti ala yu prakseri na a preikiwroko. Te yu du dati, dan yu o si taki Yehovah trutru e sorgu gi den sani di yu abi fanowdu. Na so yusrefi o „tesi èn si” taki Yehovah bun.

3. Gi suma Yehovah e du bun, soleki fa Psalm 31:19 e taki?

³ Yehovah e „du bun gi ala” sma, srefi gi den sma di no sabi en (Ps. 145:9; Mat. 5:45). Ma a e du furu bun sani gi den sma di lobi en èn di e du ala san den man fu dini en.  (Leisi Psalm 31:19.) Kon meki wi go luku wan tu fu den bun sani di Yehovah du gi wi.

4. Sortu bun Yehovah e du gi den sma di bigin kon krosibei na en?

⁴ Ibri leisi te wi e du den sani di wi leri fu Yehovah, wi e si fa dati e yepi wi. Fu eksempre, di wi kon leri sabi Yehovah èn wi bigin lobi en, dan a yepi wi fu no denki èn fu no du sani moro di a no feni bun (Kol. 1:21). Di wi gi wisrefi abra na Yehovah èn wi teki dopu, dan a gi wi moro bun sani srefi, soleki wan bun konsensi nanga wan bun matifasi nanga en.​—1 Petr. 3:21.

5. Fa wi e si taki Yehovah bun te wi de na ini a preikiwroko?

⁵ Wi e si den bun sani di Yehovah e du gi wi tu, te wi e go na ini a preikiwroko. Yu na wan sma di e syensyen? Furu anbegiman fu Yehovah de so. Fosi yu tron wan Yehovah Kotoigi, dan kande noiti yu ben denki taki yu ben o go na sma di yu no sabi fu tyari wan boskopu gi den di furu sma no wani arki. Ma now yu e du a sani disi ibri wiki. Èn san moro moi na taki Yehovah yepi yu fu lobi a preikiwroko. Yehovah yepi yu na tra fasi tu. A yepi yu fu tan rustig te yu ben miti wan sma di ben taki grofu nanga yu. A yepi yu tu fu feni a yoisti Bijbeltekst te yu ben miti wan sma di ben wani sabi moro. Èn a gi yu a krakti fu tan preiki, srefi te sma na ini a kontren no ben wani arki.​—Yer. 20:7-9.

6. Fa a leri di wi e kisi e sori taki Yehovah e du bun gi wi?

⁶ Wan tra fasi fa wi e si taki Yehovah bun, na taki a e leri wi fu du a preikiwroko (Yoh. 6:45). Na wi mindriwiki konmakandra wi e si moi eksempre fa wi kan hori wan takimakandra èn wi e kisi deki-ati fu gebroiki den na ini a preikiwroko. Kande wi e frede pikinso fu du den nyun sani disi di wi leri. Ma efu wi gebroiki den rai dati, dan wi o si taki den e wroko heri bun. Na den konmakandra nanga kongres wi e kisi deki-ati tu fu preiki na tra fasi di wi no ben pruberi ete. A no de fu taki dati wi o senwe pikinso te wi o du dati, ma Yehovah o blesi wi. Meki wi luku wan tu blesi di wi o kisi te wi e suku nyun fasi fu gi Yehovah ala san wi man awinsi na ini sortu situwâsi wi de. Baka dati wi o luku fa wi kan du moro gi Yehovah.

7. Sortu blesi wi e kisi te wi e meki muiti fu du moro na ini a preikiwroko?

⁷ Wi e kon moro krosibei na Yehovah. Luku na eksempre fu wan owruman di nen Samuel * èn di e dini makandra nanga en wefi na ini Kolombia. A trowpaar disi ben lobi a pionierwroko di den ben e du na ini a gemeente fu den. Ma fu di den ben wani du moro, meki den froisi go na wan gemeente di ben abi yepi fanowdu. Fu man du dati, den ben musu libi wan tu sani na baka di den ben lobi. Samuel e taki: „Wi du san skrifi na Mateyus 6:33. Dati meki wi no ben bai sani moro di wi no ben abi fanowdu. Ma a moro muilek sani di wi ben musu du, na fu froisi. Wi ben libi wi oso na baka di ben bow spesrutu soleki fa wi wani èn wi no ben abi paiman na en tapu.” Di a trowpaar disi froisi go na a tra gemeente, den no ben abi so furu moni fanowdu moro leki fosi. Samuel e taki: „Wi si fa Yehovah tiri wi èn  fa a piki den begi fu wi. Wi e firi taki Yehovah breiti nanga wi èn noiti ete wi ben firi a lobi fu en so.” Yu man du moro na ini a preikiwroko? Efu yu e du dati, dan yu kan de seiker taki yu o kon moro krosibei na Yehovah èn taki a o sorgu gi den sani di yu abi fanowdu.​—Ps. 18:25.

8. San yu e leri fu den sani di Ivan nanga Viktoria taki?

⁸ A diniwroko e gi wi prisiri. Luku san Ivan nanga Viktoria e taki. A trowpaar disi e dini leki pionier na ini Kirgistan. Den ben libi soso nanga den sani di den abi fanowdu trutru. Disi meki taki den ben man go na iniwan toewijzing, sosrefi na difrenti bow-wroko di ben musu du. Ivan e taki: „Wi wroko so tranga leki wi man na ibriwan fu den toewijzing fu wi. Aladi wi ben weri na a kaba fu a dei, toku wi ben firi bun èn tevrede fu di wi ben sabi taki wi gebroiki wi krakti gi a Kownukondre wroko. Wi ben breiti tu fu di wi miti furu sma di tron wi mati èn wi ben ondrofeni furu moi sani.”​—Mark. 10:29, 30.

9. Fa wan sisa di de na ini wan muilek situwâsi du moro gi Yehovah èn san ben de a bakapisi?

⁹ A diniwroko fu Yehovah e gi wi prisiri srefi te wi de na ini muilek situwâsi. Luku na eksempre fu Mirreh, wan owru sisa fu West Afrika di lasi en masra na ini dede. A sisa disi ben de wan datra èn di a go nanga pensyun a bigin pionier. Mirreh abi wan siki di e meki taki en bonyo e hati en srefisrefi èn a no man waka bun. Te a e preiki oso fu oso a man tan wán yuru nomo. Ma a man tan moro langa te a e preiki nanga a bukuwagi. A abi furu gobaka nanga Bijbelstudie èn sonwan fu den a e bel srefi. Fu san ede Mirreh ben wani du moro gi Yehovah? A e taki: „Mi lobi Yehovah nanga Yesus Krestes nanga mi heri ati. Dati meki mi gwenti aksi Yehovah fu yepi mi fu du so furu leki mi man na ini a diniwroko fu en.”​—Mat. 22:36, 37.

10. San Yehovah e gi den sma di e du moro gi en, soleki fa 1 Petrus 5:10 e sori?

¹⁰ Wi e kisi leri fu Yehovah fu du difrenti sani. Kenny, wan pionier di e dini na ini Mauritius ondrofeni a sani disi. Di a kon sabi a waarheid, a gowe libi na universiteit pe a ben kisi leri, a dopu, èn baka dati a go na ini a furuten diniwroko. A e taki: „Mi e pruberi fu de leki a profeiti Yesaya di ben taki: ’Dya mi de! Seni mi’” (Yes. 6:8). Kenny yepi na difrenti bow-wroko èn a yepi fu vertaal den buku fu wi na ini en mamatongo. Kenny e taki: „Mi kisi a leri di ben de fanowdu fu man du mi wroko bun na ini den difrenti toewijzing.” Ma a leri moro leki fa fu du a wroko. A e taki moro fara: „Mi leri tu san mi no man du so bun èn sortu fasi mi musu kisi ete fu tron wan moro bun futuboi fu Yehovah.” (Leisi 1 Petrus 5:10.) Kande yu srefi kan kenki wan tu sani na ini yu libi so taki Yehovah kan gi yu leri tu fu du difrenti sani.

11. San wan tu sisa na ini Zuid-Korea du fu man preiki èn san ben de a bakapisi? (Luku a fowtow na tapu a kafti.)

¹¹ Srefi sma di e dini Yehovah furu yari kaba e kisi leri fu en te den e pruberi fu preiki na difrenti fasi. Di a COVID-19 siki panya na heri grontapu, dan den owruman fu wan gemeente na ini Zuid-Korea ben skrifi: „Son preikiman ben denki taki den no ben o man go na ini a preikiwroko moro fu di den siki. Ma now den man go na ini preikiwroko fu di den e bel sma nanga video call. Dri sisa di  pasa 80 yari kaba, leri fa fu gebroiki wan computer fu du a sani disi èn now den e preiki pikinmoro ibri dei” (Ps. 92:14, 15). Yu ben o wani du moro na ini a preikiwroko fu man tesi èn si taki Yehovah bun? Luku wan tu sani di yu kan du.

12. San Yehovah e pramisi den sma di e frutrow tapu en?

¹² Leri fu frutrow tapu Yehovah. Yehovah pramisi fu gi wi bun furu blesi te wi e frutrow tapu en èn te wi e du ala san wi man gi en (Mal. 3:10). Fabiola, wan sisa na ini Kolombia, ondrofeni a sani disi. Syatu baka di a dopu, a ben wani dini leki gewoon pionier. Ma a ben musu wroko fu yepi sorgu en osofamiri. Di a ben man go nanga pensyun a begi Yehovah fayafaya fu yepi en. A e taki: „Nofo tron sma musu wakti langa fu man kisi den pensyun, ma mi kisi di fu mi wán mun baka di mi seni aksi fu go nanga pensyun. Dati ben de wan wondru!” Tu mun baka dati, Fabiola bigin pionier. Now a pasa 70 yari èn a e pionier moro leki 20 yari kaba. Na ini den yari dati a ben man yepi aiti sma fu dopu. A e taki: „Aladi mi e firi swaki son leisi, toku Yehovah e yepi mi ibri dei fu hori misrefi na a schema fu mi.”

13-14. Sortu eksempre kan yepi wi fu frutrow tapu Yehovah èn fu du moro gi en?

¹³ Leri fu den sma di ben frutrow tapu Yehovah. Bijbel lai eksempre fu sma di ben du furu gi Yehovah. Ma furu den futuboi fu Yehovah ben musu du wan sani  fosi den kisi wan spesrutu blesi fu en. Fu eksempre, „aladi [Abraham] no ben sabi pe a ben e go”, toku a ben musu gowe libi en oso fosi Yehovah ben man blesi en (Hebr. 11:8). Baka di Yakob feti nanga wan engel, dan fosi a kisi wan spesrutu blesi (Gen. 32:24-30). Di a pipel fu Israel ben de fu go na ini a Pramisi Kondre, den priester ben musu go tanapu fosi na ini Yordan-liba fu meki a watra tapu fu lon. Baka dati a pipel ben man waka go na abrasei.​—Yos. 3:14-16.

¹⁴ Yu kan leri wan sani tu fu Kotoigi na ini a ten disi di frutrow tapu Yehovah èn di du moro gi en. Fu eksempre, wan brada di nen Payton nanga en wefi Diana ben lobi leisi den artikel „Den ben de klariklari fu go” * nanga tra artikel di e fruteri fu brada nanga sisa di du moro na ini a diniwroko fu Yehovah. Payton e taki: „Te wi ben leisi den ondrofenitori disi, dan a ben de neleki wi ben sidon luku wan sma di ben e nyan wan switi nyanyan. O moro wi ben leisi, o moro wi srefi ben wani ’tesi èn si taki Yehovah bun’.” Te fu kaba, Payton nanga Diana froisi go na wan presi pe moro preikiman ben de fanowdu. Yu leisi den artikel disi tu? Èn yu luku den felem na jw.org di nen Preiki na farawe presi​—Australia noso Prediken in afgelegen gebied​—Ierland? Den sortu artikel nanga felem disi kan yepi yu fu si na sortu fasi yu kan du moro gi Yehovah.

15. Fa a de wan yepi gi wi te wi abi mati di e poti a Kownukondre na a fosi presi na ini den libi?

¹⁵ Suku mati di o gi yu deki-ati fu du moro gi Yehovah. A moro makelek fu tesi wan sani di wi no nyan noiti ete, te wi de nanga trawan di lobi a nyanyan dati. Na so a de tu taki te wi e suku mati di e poti Yehovah na a fosi presi na ini den libi, dan wi srefi o wani du moro gi Gado tu. Wan trowpaar di nen Kent nanga Veronica ondrofeni a sani disi. Kent e taki: „Den mati nanga famiriman fu wi e gi wi deki-ati fu pruberi difrenti sani na ini a diniwroko. Wi e frustan taki te wi abi mati di e suku a Kownukondre fosi, dan wi e kisi deki-ati fu pruberi wan nyun sani.” Now Kent nanga Veronica e dini leki spesrutu pionier na ini Serfia.

16. Soleki fa na agersitori fu Yesus na Lukas 12:16-21 e sori, dan fu san ede wi musu de klariklari fu libi son sani na baka?

¹⁶ Libi wan tu sani na baka fu man du moro gi Yehovah. Wi no abi fu libi ala sani na baka fu meki Yehovah feni wi bun (Preik. 5:19, 20). Ma efu wi e draidrai fu du moro gi Yehovah soso fu di wi no wani libi wan tu sani na baka di wi lobi, dan wi o meki a srefi fowtu leki a man na ini Yesus en agersitori. A man disi ben wroko tranga fu abi wan switi libi, ma a frigiti Gado. (Leisi Lukas 12:16-21.) Christian, wan brada di e libi na ini Fransikondre, e taki: „Mi no ben gi mi osofamiri nanga Yehovah ala san mi ben man gi.” Christian nanga en wefi bosroiti fu pionier. Ma fu man du dati den ben musu libi den wroko. Den bigin wan pikin bisnis pe den ben krin sma oso nanga kantoro so taki den ben man sorgu densrefi. Den leri fu de tevrede nanga san den abi now, awinsi a no furu. A e hati den taki den libi son sani na baka fu man pionier? Christian e taki: „Wi e prisiri moro na ini a preikiwroko èn wi breiti fu si fa den Bijbelstudenti nanga den gobaka fu wi e leri moro fu Yehovah.”

17. San kan meki en muilek gi wi fu du wan nyun sani na ini wi diniwroko?

 ¹⁷ De klariklari fu du nyun sani na ini a diniwroko (Tori 17:16, 17; 20:20, 21). Shirley, wan pionier na ini Amerkankondre ben musu leri fu preiki na tra fasi di a COVID-19 siki panya na heri grontapu. Na a bigin a ben frede fu preiki nanga yepi fu telefon. Ma di a kring-owruman kon na a gemeente fu en, dan Shirley leri fa fu preiki nanga yepi fu telefon èn now a e preiki doronomo na a fasi disi. A e taki: „Na a bigin mi ben e frede fu du en, ma now mi lobi en trutru. Wi e miti moro sma leki te wi ben preiki oso fu oso.”

18. San kan yepi wi efu wan sani e tapu wi fu du moro na ini a preikiwroko?

¹⁸ Poti wan marki èn suku fu doro en. Te problema e miti wi, dan wi e begi fu kisi yepi èn wi e prakseri bun san wi o du (Odo 3:21). Sonia di de wan gewoon pionier na ini Europa, de na ini wan grupu di e taki a tongo fu a Roma pipel. A e taki: „Te mi wani du wan sani, dan mi lobi fu skrifi dati tapu papira èn mi e poti a papira na wan presi pe mi kan si en makelek. Mi abi wan tekening tapu mi tafra pe yu e si tu pasi di e go na difrenti sei. Te mi musu teki wan bosroiti, dan mi e luku den tu pasi disi èn mi e aksi misrefi pe a bosroiti di mi o teki o tyari mi go.” Sonia e pruberi fu no bruya te problema e miti en. A e taki: „Na mi e bosroiti fa mi o si den kenki di e kon na ini a situwâsi fu mi. Mi kan si den kenki leki wan skotu di e tapu mi fu doro a marki di mi ben poti, noso mi kan si den leki wan broki di e yepi mi fu doro pe mi wani go.”

19. Fa wi kan sori taki wi de nanga tangi gi den sani di Yehovah gi wi?

¹⁹ Yehovah e blesi wi na ala sortu fasi. Wi kan sori taki wi de nanga tangi gi den sani di a gi wi te wi e du ala san wi man fu prèise en (Hebr. 13:15). Wi kan du furu difrenti sani na ini a diniwroko fu Yehovah. Dati kan meki taki Yehovah blesi wi moro. Meki wi luku ibri dei na sortu fasi wi kan „tesi èn si taki Yehovah bun”. Dan wi o de leki Yesus di ben taki: „Mi nyanyan na fu du a wani fu a sma di seni mi kon èn fu klari a wroko fu en.”​—Yoh. 4:34.