1-2. Tumuhụ Mazmur 34:8, apa koateng i kitẹ gunang makasingkạ kapiang i Yehuwa?

PẸ̌TINĚNA piạ u něgělị kaěng si kau kụ i kau bědang běga kerea temange. I kau botonge měngěndung sěmbaụ hal᷊ẹ̌ mạeng měmanda, měngimbu, mẹ̌kiwal᷊o kerea ene nikoạ, arau mẹ̌kiwal᷊o su taumata wal᷊inẹ apa i sire puluang su kaěng ene. Maning kerene, tadeạu makasingkạ apa i kau puluang su kaěng ene, i kau harusẹ̌ mẹ̌temang hala.

² I kitẹ botonge měngěndung soal u kapiang i Yehuwa mạeng mẹ̌basa Alkitapẹ̌, manga publikasi, dingangu dumaringihẹ̌ taumata wal᷊inẹ mẹ̌běke al᷊amatẹ̌ nikaěbạ i sire bọu i Yehuwa. Katewe, i kitẹ sarung makaěna limembong mal᷊ahẹ kerea kapiang i Yehuwa mạeng ’mẹ̌pěndang’ hala kerea kapia-Ne. (Basa Mazmur 34:8.) Pěmanda sěmbaụ contoh i kitẹ botonge měkoạ ene. I kitẹ ěndịu mapulu melayani si Yehuwa sepenuh waktu, katewe tadeạu makakoạ ene, i kitẹ perlu měbiahẹ̌ sederhana. I kitẹ ěndịu seng masau mẹ̌basa dianding i Yesus, mạeng měngal᷊imona Kararatuang, Yehuwa sarung měnadia kebutuhan i kitẹ. Katewe i kitẹ hala tawe pernah nakapěndang ene nariadi si kitẹ. (Mat. 6:33) Maning kerene, ual᷊ingu mangimang su dianding i Yesus, i kitẹ mahematẹ̌, měkoạ penyesuaian su hal᷊ẹ̌ i kitẹ, dingangu fokus su pelayanan. Su tempong měkoạ ene, i kitẹ sarung makasilo Yehuwa kahěngang-hěngang měngurusẹ̌ kebutuhan i kitẹ. I kitẹ hala ’makapěndang’ kapiang i Yehuwa.

3. Kere nilahẹ su Mazmur 16:1, 2, i sai nakatarimạ kapiang i Yehuwa?

³ Yehuwa ”mapia su kěbị”, sarang lai si sire apang běga i sai i Sie. (Mz. 145:9; Mat. 5:45) Katewe, i Sie někoạ lawọ hal᷊ẹ̌ mapia si sire apang makěndagẹ̌ si Sie lai měkoạ kapulu-Ne dingangu kaguwạu naung. (Basa Mazmur 16:1, 2.) Mahịe měngěndung piram baụ hal᷊ẹ̌ mapia seng nikoạ i Yehuwa si kitẹ.

4. Kerea i Yehuwa něnodẹ kapia-Ne si sire apang něnětạ nẹ̌těngkarani si Sie?

 ⁴ Sabang i kitẹ měkoạ apa seng niěndungang bọu i Yehuwa, i kitẹ nakasilo kerea ene nakatul᷊ung si kitẹ. Contone, su tempong měngěndung kụ něnětạ kiměndagẹ̌ si Sie, i Sie mẹ̌tul᷊ung si kitẹ měngědo mẹ̌tiněna dingangu měkoạ manga hal᷊ẹ̌ ikẹ̌kawěngsing’E. (Kol. 1:21) Kụ su tempong i kitẹ měgělị watangeng si Yehuwa dingangu nibaptisẹ̌, i Sie něgělị si kitẹ limembong lawọ hal᷊ẹ̌ mapia kere hati nurani buresi lai pẹ̌dal᷊ahapị mapia dingang’E.​—1 Ptr. 3:21.

5. Kerea i kitẹ makapěndang kapiang i Yehuwa su pelayanan?

⁵ I kitẹ turusẹ̌ makapěndang kapiang i Yehuwa su tempong měnginjilẹ̌. Apa i kau meang? Lawọ bọu ělang i Yehuwa lai meang. Těntal᷊ang i kau bědang tawe nakoạ ělang i Yehuwa, ěndịu tawe napikirẹ̌ si kau měnětụ tukadu wal᷊eng taumata i kau tawe kěnalẹ̌ kụ mẹ̌bisara soal u Alkitapẹ̌ dingange. Katewe orasẹ̌ ini, i kau marading měkoạ ene. Yehuwa seng nẹ̌tul᷊ung si kau su haghing cara. Su tempong mẹ̌sombang dingangu taumata kasarẹ̌, Yehuwa mẹ̌tul᷊ung si kau tatapẹ̌ matěnang. I Sie lai mẹ̌tul᷊ung si kau makatahěndung ayatẹ̌ nẹ̌tatahino gunang pahiạkeng su taumata mapulu dumaringihẹ̌. Kụ i Sie něgělị si kau katatoghasẹ̌ gunang měnginjilẹ̌ maning nẹ̌sombang dingangu taumata madiri dumaringihẹ̌.​—Yer. 20:7-9.

6. Kerea pelatihan nighělị i Yehuwa něnodẹ kapia-Ne?

⁶ Yehuwa lai něnodẹ kapia-Ne carane nělatih si kitẹ gunang měnginjilẹ̌. (Yoh. 6:45) Su pěngangibadang tengah pekan, i kitẹ nakaěbạ contoh carane mẹ̌bawěke kụ gẹ̌gausang gunang měpakẹ ene su tempong měnginjilẹ̌. Humotong, i kitẹ ěndịu sahene gugupẹ̌ měkoạ hal᷊ẹ̌ buhu, katewe su tempong měkoạ ene, i kitẹ nakasingkạ těgu ene nẹ̌tatahino dingangu situasi su tampạ i kitẹ. Su pěngangibadang dingangu pertemuan limembong gěguwạ, i kitẹ lai gẹ̌gausang měpakẹ manga cara buhu gunang měnginjilẹ̌, kụ ěndịu i kitẹ bědang tawe pernah něpakẹ ene. Ene lai ěndịu makakoạ i kitẹ gugupẹ̌, katewe su tempong měkoạ hal᷊ẹ̌ ene, Yehuwa sarung měngal᷊amatẹ̌ si kitẹ. Mahịe měngěndung manga al᷊amatẹ̌ kaěbakeng i kitẹ ual᷊ingu něpakẹ manga cara wuhu gunang měgělị kapaelange si Yehuwa, tawẹ soale kerea situasing i kitẹ. Bọu ene mahịe i kitẹ měngěndung kerea měkoạ limembong mal᷊awọ su pelayanan.

7. Apa al᷊amatẹ̌ kaěbakeng i kitẹ mạeng měkoạ limembong mal᷊awọ su pelayanan?

⁷ I kitẹ kakạranine dingangi Yehuwa. Pěmanda pengalaman sěngkatau penatua arenge Samuel *, melayani su Kolombia dingangu kawinge. I rẹ̌dua mal᷊uasẹ̌ merintis su sidang asal᷊i rẹ̌dua, katewe i sire mapulu měkoạ limembong mal᷊awọ su pelayanan carane mẹ̌tul᷊ung sidang mahal᷊i penyiar. Gunang makakoạ cita-cita ene, i rẹ̌dua harusẹ̌ měkoạ piram baụ pengorbanan. Samuel nẹ̌bera, ”I kami timol᷊e sasasa su Matius 6:33 kụ něngědo něměli barang bal᷊inẹ kebutuhan i kami. Katewe kasigěsạkenge ute měněntang wal᷊eng i kami. Ene nikoạ kere kapulung i kami kụ seng lunasẹ̌.” Su tempong něngal᷊ing sarang tampạ buhu, i sire membutuhkan limembong mahal᷊i doitẹ̌ sul᷊ungu su tampạ kal᷊imona. Samuel nẹ̌bera, ”I kami nakasilo kerea i Yehuwa něngahạ dingangu simimbahẹ̌ daroang i kami. I kami nẹ̌pěndang Yehuwa mal᷊uasẹ̌ si kami kụ nakapěndang kakěndag’E tawe pernah nikapěndangeng i kami kal᷊imona.” Apa i kau botonge měkoạ limembong  mal᷊awọ su pelayanan? Mạeng iya, i kau botonge mangimang i kau sarung limembong marani dingangi Yehuwa kụ i Sie sarung měngurusẹ̌ si kau.​—Mz. 18:25.

8. Apa kaěndungangu bọu pengalaman i Ivan dingangi Viktoria?

⁸ I kitẹ nakaěbạ karal᷊uasẹ̌ su pelayanan. Pěmanda pengalaman i Ivan dingangi Viktoria, sěngkawingang perintis su Kirgistan. I sire něndiagạ pěbawiahi sire tatapẹ̌ sederhana tadeạu botonge měkoạ tugasẹ̌ maning apa, nasuẹ̌ lai proyek pembangunan. Ivan nẹ̌bera, ”I kami něhal᷊ẹ̌ masěghadẹ̌ su haghing tugasi kami. Maning bawěllone seng nal᷊owe, i kami mal᷊uasẹ̌ ual᷊ingu masingkạ i kami seng něpakẹ katatoghasẹ̌ něhal᷊ẹ̌ masěghadẹ̌ gunang i Yehuwa. I kami lai mal᷊uasẹ̌ ual᷊ingu piạ lawọ hapị buhu dingangu lawọ pengalaman makal᷊uasẹ̌.”​—Mrk. 10:29, 30.

9. Situasi masigěsạ apa tẹ̌tatěngongu sěngkatau saudari mapulu měkoạ limembong mal᷊awọ su pelayanan, kụ apa hasile?

⁹ I kitẹ nakaěbạ karal᷊uasẹ̌ su pelayanan si Yehuwa maning situasing i kitẹ tawe gampang. Contone, i Mirreh, sěngkatau wawine wal᷊u seng maghurang su Afrika Selatan, kụ kangerẹ i sie sěngkatau dokterẹ̌. Su tempong napangsiong, i sie něnětạ merintis. Mirreh piạ sakị nakakoạ i sie masigěsạ dumal᷊eng kụ kětạeng botonge měnginjilẹ̌ bọu wal᷊e sarang bal᷊e sěngkaorasẹ̌. Katewe i sie botonge limembong marěngụ měnginjilẹ̌ su tampạ piạ lawọ taumata. I sie piạ lawọ kunjungan kembali dingangu měngangěndung Alkitapẹ̌, pirang katau bọu i sire tẹ̌tiwong limiu telepon. Apa nakakoạ i Mirreh někoạ limembong mal᷊awọ su pelayanan? I sie nẹ̌bera, ”Iạ sěbạe makěndagẹ̌ si Yehuwa dingangi Yesus Kristus. Kụ iạ masau mẹ̌doa tadeạu i Yehuwa mẹ̌tul᷊ung si siạ měkoạ sěngapang botonge su pelayanan.”​—Mat. 22:36, 37.

10. Kere nilahẹ su 1 Petrus 5:10, apa sarung tarimakeng i sire apang měkoạ limembong mal᷊awọ gunang i Yehuwa?

¹⁰ I kitẹ nakaěbạ pelatihan limembong mal᷊awọ bọu i Yehuwa. Kenny, sěngkatau perintis su Mauritius, nakapěndang kahěngang hal᷊ẹ̌ ene. Su tempong něngěndung katěngadẹ̌, i sie něngědo nẹ̌kuliah, nibaptisẹ̌, kụ něnětạ melayani sepenuh waktu. I sie nẹ̌bera, ”Iạ mapulu měbiahẹ̌ tuhụ bawera Nabi Yesaya ini: ’Iạ ke! Dolohe iạ!’” (Yes. 6:8) Kenny masau něhal᷊ẹ̌ nẹ̌tul᷊ung proyek pembangunan, kụ i sie lai nẹ̌tul᷊ung něněrjěmah publikasi dasare Alkitapẹ̌ sarang bawera towọe. Kenny nẹ̌bera, ”Iạ nilatih tadeạu piạ keterampilan gunang mapakasue hal᷊ẹ̌ku.” Katewe i sie bal᷊inẹ kětạeng něngěndung kerea carane měhal᷊ẹ̌. I sie nẹ̌bera, ”Iạ něngěndung manga hal᷊ẹ̌ tawe gampang takụ koateng dingangu mẹ̌tawakal᷊i piạ manga sipatẹ̌ mapia tadeạu makoạ ělang i Yehuwa limembong mapaelẹ̌.” (Basa 1 Petrus 5:10.) Ěndịu i kau lai botonge měkoạ penyesuaian tadeạu i Yehuwa botonge melatih si kau limembong mal᷊awọ.

11. Apa nikoạu manga saudari su Korea Selatan tadeạu makatol᷊e měnginjilẹ̌, kụ apa hasile? (Pěmanda gambarẹ̌ sampul.)

¹¹ Sarang lai Sahiding Yehuwa apang piạ lawọ pengalaman makaěbạ gunane bọu pelatihan měpakẹ cara wuhu gunang měnginjilẹ̌. Su kanandụu pandemi COVID-19, manga penatua su sěmbaụ sidang su Korea Selatan němohẹ, ”Pirang katau humotong něpikirẹ̌ tawe makatol᷊e měnginjilẹ̌ ual᷊ingu mahungsakị, orasẹ̌ ini seng botonge tumol᷊e bọu video-conference. Tělung katau saudari umure nal᷊iu bọu 80 su taunge něngěndung něpakẹ komputer kụ orasẹ̌ ini i sire nakatol᷊e měnginjilẹ̌ maraning ěllo-ěllo.” (Mz. 92:14, 15) Apa i kau mapulu měkoạ limembong mal᷊awọ su pelayanan kụ makapěndang kapiang i Yehuwa limembong  mal᷊awọ? Pěmanda piram baụ hal᷊ẹ̌ botonge koatengu gunang makakoạ cita-cita ene.

12. Yehuwa nẹ̌diandi apa si sire apang měngumbala si Sie?

¹² Měngěndung měngumbala si Yehuwa. I Sie nẹ̌diandi sarung měgělị lawọ al᷊amatẹ̌ mạeng i kitẹ mangimang dingangu měgělị kapaelange si Sie. (Mal. 3:10) Sěngkatau saudari su Kolombia arenge Fabiola nakasilo Yehuwa někoạ diandi-Ne ene. I sie mapulu makoạ perintis biasa su apang bọu nibaptisẹ̌. Katewe, i sie harusẹ̌ měhal᷊ẹ̌ gunang mẹ̌tul᷊ung kěluargane. Hakị u ene su tempong i sie botonge mapangsiong, i sie turusẹ̌ nẹ̌doa si Yehuwa gunang mẹ̌dorong tul᷊ung. I sie nẹ̌bera, ”Taumata biasane marěngụ měhědo makaěbạ pangsiong, katewe iạ nakaěbạ ene kětạeng su ral᷊ungu sěmbul᷊ang bọu tempong iạ něndaftarẹ̌. Ene makạlaherang!” Dua wul᷊ang tuhụe i sie něnětạ merintis. Orasẹ̌ ini, umure seng nal᷊iu bọu 70 su taunge kụ seng merintis nal᷊iu bọu 20 su taunge. Su kanandụu tempo ene, i sie seng nẹ̌tul᷊ung ual᷊ung katau sarang i sire nibaptisẹ̌. I sie nẹ̌bera, ”Maning pẹ̌sěngsul᷊ẹ iạ nakapěndang lome, Yehuwa nẹ̌tul᷊ung si siạ ěllo-ěllo gunang turusẹ̌ merintis.”

13-14. Apa contoh makatul᷊ung si kitẹ mangimang si Yehuwa dingangu měkoạ limembong mal᷊awọ su pelayanan?

¹³ Pěngěndung bọu i sire apang měngumbala si Yehuwa. Su ral᷊ungu Alkitapẹ̌ piạ lawọ contoh taumata něhal᷊ẹ̌ masěghadẹ̌ gunang pelayanan si Yehuwa. Lawọ ělang i Yehuwa nakatarimạ al᷊amatẹ̌ su apang  někoạ sěmbaụ hal᷊ẹ̌ něnodẹ i sire mangimang si Yehuwa. Contone, su apang Abraham něněntang wal᷊ene ”maning i sie běga makoạ saranga”, buhudeng i Yehuwa něngal᷊amatẹ̌ si sie. (Ibr. 11:8) Su apang i Yakub bọu něgulatẹ̌ dingangu malaekatẹ̌, buhudeng i sie nakaěbạ al᷊amatẹ̌. (Kej. 32:24-30) Su apang manga imang seng dimarisị su tal᷊oarang Sal᷊ụ u Yordan, buhudeng tau Israel botonge lumiu kụ makasuẹ̌ su Ěntanang Pẹ̌dariandi.​—Yos. 3:14-16.

¹⁴ I kau lai botonge makaěbạ gunane bọu manga Sahiding Yehuwa apang měngumbala si Sie dingangu měkoạ limembong mal᷊awọ su pelayanan. Contone, sěngkatau saudara arenge Payton dingangu kawinge, i Diana, mal᷊uasẹ̌ nẹ̌basa pengalaman manga anạu sěmbau apang měkẹ̌koạ mal᷊awọ su pelayanan si Yehuwa, kere su seri ”Mereka Merelakan Diri”. * Payton nẹ̌bera, ”Su tempong i kami nẹ̌basa pengalaman i sire, i kami kere nakasilo sěngkatau kụkaěng kaěng matemang. Kakạrěngụe i kami němanda, i kami limembong mapulu ’mẹ̌pěndang dingangu měmanda Yehuwa ene mapia.’” Samurine, i Payton dingangi Diana něngal᷊ing sarang tampạ mahal᷊i penyiar. Apa i kau seng bọu nẹ̌basa seri ene? Kụ apa i kau bọu nẹ̌biala video Menginjil di Daerah Terpencil—Australia dingangu Menginjil di Daerah Terpencil—Irlandia su jw.org? Manga bahan ene makatul᷊ung si kau makasingkạ manga cara botonge měkoạ limembong mal᷊awọ su pelayanan.

15. Kerea pẹ̌dal᷊ahapị nẹ̌tatahino makatul᷊ung si kitẹ?

¹⁵ Pile pẹ̌dal᷊ahapị nẹ̌tatahino. I kitẹ sarung limembong puluang kumaěng kaěng buhu, mạeng mědal᷊ahapị dingangu taumata puluang su kaěng ene. Kerene lai, mạeng i kitẹ mědal᷊ahapị dingangi sire apang měngal᷊imona kapulung i Yehuwa, i kitẹ lai limembong mapulu mědeạ cara měkoạ limembong mal᷊awọ gunang i Yehuwa. Ene nariadi si Kent dingangi Veronica. Kent nẹ̌bera, ”Hapị dingangu keluarga němahangsang si kami měpakẹ cara wuhu su pelayanan. I kami nasadarẹ̌ mạeng mědal᷊ahapị dingangi sire apang měngal᷊imona Kararatuang, i kami sarung limembong mapulu měpakẹ cara wuhu.” Orasẹ̌ ini, Kent dingangi Veronica nakoạ perintis istimewa su Serbia.

16. Kere nilahẹu sasihing i Yesus su Lukas 12:16-21, kawe nụe i kitẹ harusẹ̌ mapulu měkoạ pengorbanan?

¹⁶ Koạ pengorbanan gunang i Yehuwa. I kitẹ tawe perlu měněntang kěbị apa ikẹ̌kapuluang i kitẹ gunang makal᷊uasẹ̌ si Yehuwa. (Pkh. 5:19, 20) Katewe, mạeng i kitẹ měmile tawe měkoạ limembong mal᷊awọ gunang i Yehuwa ual᷊ingu madiri měněntang manga hal᷊ẹ̌ ikẹ̌kapuluang i kitẹ, i kitẹ sarung měkoạ pẹ̌sasal᷊a kere nikoạu esẹ su sasihing i Yesus. I sie piạ lawọ arěta, katewe tawe padul᷊i su Mawu. (Basa Lukas 12:16-21.) Sěngkatau saudara arenge Christian, mětẹ̌tanạ su Prancis, nẹ̌bera, ”Iạ tawe něgělị katatoghasẹ̌ dingangu tempo kapaelange si Yehuwa lai su keluargaku.” I sie dingangu kawinge někoạ putusang gunang merintis. Katewe tadeạu makakoạ cita-cita ene, i sire harusẹ̌ měněntang hal᷊ẹ̌ i sire. Gunang měnukụ kebutuhan, i rẹ̌dua něnětạ něhal᷊ẹ̌ měmurěsi kụ něngěndung tadeạu puas dingangu doitẹ̌ mahal᷊i. Apa i sire mal᷊uasẹ̌ su pengorbanan seng nikoạ i sire? Christian nẹ̌bera, ”I kami limembong mal᷊uasẹ̌ su pelayanan dingangu mal᷊uasẹ̌ nakasilo měngangěndung Alkitapẹ̌ lai i sire apang tẹ̌tiwong i kami něngěndung soal i Yehuwa.”

17. Kawe nụe tawe gampang si kitẹ měpakẹ cara wuhu su pelayanan?

¹⁷ Mapulu měpakẹ cara wuhu gunang  měnginjilẹ̌. (Kis. 17:16, 17; 20:20, 21) Shirley, sěngkatau perintis su Amerika Serikat harusẹ̌ měkoạ penyesuaian carane měnginjilẹ̌ su kanandụu pandemi COVID-19. Humotong, i sie ragu měnginjilẹ̌ měpakẹ telepon. Katewe su apang i sie nakaěbạ pelatihan su tempong pengawas wilayah nẹ̌tiwo, i sie nakoạ masau měnginjilẹ̌ měpakẹ telepon. I sie nẹ̌bera, ”Humotong ene makatakụ, katewe orasẹ̌ ini iạ sěbạe puluang. I kami limembong mal᷊awọ mẹ̌sombangu taumata sul᷊ungu měnginjilẹ̌ bọu wal᷊e sarang bal᷊e.”

18. Apa makatul᷊ung si kitẹ tumatěngo masalah su tempong mapulu měkoạ limembong mal᷊awọ su pelayanan?

¹⁸ Pěkoạ rencana kụ koạ ene. Su tempong piạ masalah, i kitẹ mẹ̌doa gunang mẹ̌dorong tul᷊ung dingangu mẹ̌tiněna apa harusẹ̌ koateng i kitẹ. (Amsal 3:21) Sonia, sěngkatau perintis biasa su kelompok werang Romani su Eropa, nẹ̌bera, ”Iạ puluang měmohẹ rencanaku su karětasẹ̌ kụ mẹ̌taho ene su tampạ gampang kasilong. Su wowong meda piạ gambarẹ̌ darua dal᷊eng mětẹ̌timona tampạ nẹ̌tatěntang. Su tempong měkoạ putusang, iạ měmanda darua dal᷊eng ene kụ mẹ̌tiněna apa putusang nikoạku makatul᷊ung si siạ makakoạ rencana ene arau tala.” Sonia nẹ̌tawakal᷊i tatapẹ̌ piạ tiněna positif soal u masalah tẹ̌tatěngonge. I sie nẹ̌bera, ”Iạ harusẹ̌ měkoạ putusang, apa iạ sarung měmanda pẹ̌bawal᷊ui kere darěndung makasahaghe arau kere dal᷊enteng makatul᷊ung si siạ.”

19. I kitẹ mapulu měkoạ apa?

¹⁹ Yehuwa měngal᷊amatẹ̌ si kitẹ dingangu lawọ cara. I kitẹ měnodẹ i kitẹ měngẹ̌ngarěga al᷊amatẹ̌ seng nighělị’E carane měkoạ sěngapang botonge gunang mẹ̌dalo si Sie. (Ibr. 13:15) Ene lai mangal᷊ene měpakẹ cara wuhu gunang měkoạ limembong mal᷊awọ su pelayanan, kụ i Yehuwa sarung limembong měngal᷊amatẹ̌. Sabang ěllo, mahịe i kitẹ mědeạ cara gunang ’mẹ̌pěndang dingangu měmanda Yehuwa ene mapia’. Bọu ene i kitẹ sarung makoạ kere i Yesus, i sie nẹ̌bera, ”Kaěngku ute kai měkoạ kapulung i Sie seng něndolohẹ̌ si siạ dingangu mapakasue hal᷊ẹ̌ nighělị’E.”​—Yoh. 4:34.