1, 2. Xó má eʼthí Salmo 34:8, ndiéjunʼ gíʼmaa mu̱ʼni̱ mu mbuʼyáá rí Jeobá májánʼ wéñuʼ a̱jkiu̱u̱n rá.

GUNDXAʼWAMÍJNA̱ rí mbáa naxnúlú ganitsu mu muʼphulú rí nditháan tséniʼnuuʼ. Mbáa ma̱ndoo mundxaʼwamíjnalú xú káʼnii miʼtsí, xú káʼnii ndataun o murajxi̱i̱ mbáa maʼthúlú xú káʼnii niguma o á mu nanigu̱u̱ʼ. Mu ma̱ndoo mbuʼyáá á mu ikháánʼ nanigulú ganitsu rúʼko̱, ndayóoʼ dí muʼphulú.

² Ikháá má kayuuʼ, ma̱ndoo mundxaʼwamíjnalú xú káʼnii májánʼ a̱jkiu̱u̱n Jeobá á mu nuraxnuu Biblia o iyu̱lú o índo̱ nuʼdxawíín rí nuthi a̱ngiu̱lú xú káʼnii Jeobá eʼni tsajkurámiinʼ. Mú i̱ndó ma̱ndoo makru̱ʼu̱lú xú káʼnii májánʼ a̱jkiu̱u̱n Jeobá á mu “nduʼyáá” ikháánʼlú mináánʼ (atraxnuu Salmo 34:8). * Muʼgíʼ mbóoʼ xkri̱da. Gundxaʼwamíjna̱ dí nandulú mu̱ʼni̱ kájxi̱ ñajuunʼ Jeobá, mu mu̱ʼni̱ rígi̱ ndayóoʼ rí xúguaʼdáálú wéñuʼ. Mbáa niraxnuu náa naʼthí ga̱jma̱a̱ numuu rí nikudaminaʼ Jesús, rí á mu nuʼgíʼ ginii mu̱ʼni̱ ñajuunʼ Dios, Jeobá má gáxnúlú xúgíʼ rí gáʼyulú. Mbáa ikháánʼlú nditháan túʼyáá rúʼko̱ (Mat. 6:33). Maski ajndu xúʼko̱ kuaʼdáálú fe náa rí nikudaminaʼ Jesús, ikha jngóo nánguá eʼtsilú wéñuuʼ ga̱jma̱a̱ nánguá ñajunʼ xúgíʼ mbiʼi ga̱jma̱a̱ nuʼgímíjna̱ rí muʼtáraʼa. Índo̱ nuʼnilú xúʼko̱ najkuánú nduʼyáá xú káʼnii Jeobá nañewu̱nlú ga̱jma̱a̱ xúʼko̱ najkuánú nduʼyáá dí ra̱ʼkhá tháán májánʼ a̱jkiu̱u̱n.

3. Xó má eʼthí náa Salmo 16:1, 2, tsíín embañún rí májánʼ a̱jkiu̱u̱n Jeobá rá.

³ Jeobá “májánʼ a̱jkiu̱u̱n náa xúgíinʼ”, asndu náa xa̱bu̱ bi̱ na̱nguá eniʼniiʼ (Sal. 145:9; Mat. 5:45). Mú naʼni tsajkurámiinʼ xa̱bu̱ bi̱ nandún kuyáá ga̱jma̱a̱ bi̱ nuni̱ ñajuunʼ ga̱jma̱a̱ xúgíʼ a̱jkiu̱ún  (atraxnuu Salmo 16:1, 2). * Guʼyáá tikhu rí májánʼ niʼni Jeobá ga̱jma̱á numulú.

4. Xú káʼnii esngájma rí májánʼ a̱jkiu̱u̱n Jeobá náa bi̱ nuguáʼdi̱i̱ najmañún ga̱jma̱a̱ numuu ikhaa xá.

⁴ Mámbá índo̱ ikháánʼlú nuʼgíʼ nu̱ʼni̱ rí najmañulú ga̱jma̱a̱ numuu Jeobá, nduʼyáá xú káʼnii eriʼkhu̱u̱ vida ndrígúlú. Índo̱ najkua rajmañúlú ga̱jma̱a̱ numuu ikhaa najkuanú nandulú kuʼyáá, ga̱jma̱a̱ nambáyulú muriʼkhu̱u̱ rí nundxaʼwamíjnalú ga̱jma̱a̱ rí nu̱ʼni̱lú dí tséniñulú mambajxú gajmiúlú nákhá ginii (Col. 1:21). Índo̱ nixnájximijna ga̱jma̱a̱ nijngúlú iyááʼ Jeobá nisngájma itháan dí nandoo kaʼyulú numuu dí niniñulú muguaʼdáá mbá ku̱ma̱ májánʼ ga̱jma̱a̱ dí mambajxúlú májánʼ gajmiúlú ikhaa (1 Ped. 3:21).

5. Ndiéjunʼ nitayáá náa naratáraʼa dí Jeobá májánʼ a̱jkiu̱u̱n rá.

⁵ Náa nuʼtáraʼa nandoo nduʼyáá xú káʼnii Jeobá májánʼ wéñuuʼ a̱jkiu̱u̱n. Mbáa ikháán nindxa̱a̱ʼ mbáa xa̱bu̱ bi̱ namíñuu, mú mbaʼin xa̱bi̱i̱ Jeobá ni̱ndxu̱ún xúʼko̱ kaʼnii. Mbáa nákhá xóó tsétatsinuuʼ dí gajkhun na̱nguá nitatsaʼwáminaʼ rí midxuʼ gárataráʼa náa mámbá guʼwá náa kúwá xa̱bu̱ bi̱ na̱nguá etatsiniúnʼ mu marathu̱u̱n ga̱jma̱a̱ numuu Biblia. Mú dí xúgi̱ natani̱ nángi eʼni, ma̱ngaa Jeobá nimbáyaaʼ mu manigua̱a̱ʼ náa naratáraʼa. Ma̱ngaa nitayáá xú káʼnii Jeobá nimbáyaaʼ náa i̱ʼwáʼ rígi̱. Mbá xkri̱da, nimbáyaaʼ mu xákiʼnán índo̱ xa̱bu̱ náa naratáraʼa nuña̱a̱nʼ dí ra̱májánʼ. Ma̱ngaa nimbáyaaʼ mu marmáʼáan a̱jkia̱nʼ textos dí maratha̱a̱n ga̱jma̱a̱ mbáa xa̱bu̱ bi̱ nanigu̱u̱ʼ maʼdxawuun. Ga̱jma̱a̱ nixnáaʼ tsiakii rí nda̱yáaʼ mu marataráʼa náa mixtiʼkhu xuajin náa kúwíin xa̱bu̱ bi̱ mixtiʼkhu rí enimbu̱ún (Jer. 20:7-9).

6. Xú káʼnii esngájma Jeobá rí májánʼ a̱jkiu̱u̱n índo̱ naxnúlú ikha xóo muʼtáraʼa rá.

⁶ Jeobá ma̱ngaa nasngájma dí májánʼ a̱jkiu̱u̱n índo̱ ikhaa naʼsngúlú xú káʼnii muʼtáraʼalú (Juan 6:45). Náa reunión dí narígá ta̱pha̱ xmáná nanújngoo demostración xú káʼnii muʼtámíjná gajmiúlú xa̱bu̱ ga̱jma̱a̱ najuiʼthúlú dí muʼgíʼ mu̱ʼni̱ rúʼko̱ náa nuʼtáraʼa. Índo̱ nuʼgíʼ nu̱ʼni̱ mbá rí nuxi̱ʼ, naʼni dí mamiñúlú. Mú, índo̱ nu̱ʼni̱ najkuanú nduʼyáá, rí ikha dí nundriʼgúlú ra̱ʼkhá tháán májánʼ gájnuu. Ma̱ngaa najuiʼthúlú náa reunión ga̱jma̱a̱ náa asamblea i̱ʼwáʼ enii xóo muʼtáraʼa. Mbáa rígi̱ gaʼni rí muʼnilú mbá dí tséguʼunlú eʼni nákha ginii. Mú, á mu nuʼnilú kúwáanʼ nuxnáá Jeobá mbá rí ma̱ndoo maʼnitsajkurámuuʼ. Dí xúgi̱ mbuʼyáá tikhuu dí májánʼ dí naxnúlú Jeobá índo̱ ikháánʼlú nduʼyáʼ i̱mba̱ nuxi̱ʼ xóo muʼtáraʼa tséʼñuu asndu xkáʼníí má kuwáánʼlú. Nda̱wa̱á mbuʼyáá ndiéjunʼ gándoo mu̱ʼni̱ mu muxkamaa meta rúʼko̱.

7. Xú káʼnii niguma tsajkurámaaʼ ndxájulú ga̱jma̱a̱ numuu rí nigíminaʼ maʼni itháan ñajuunʼ Jeobá rá.

⁷ Najkua kanuu itháan mijngii náa Jeobá. Guʼyáá mbá xkri̱da ndrígóo ndxájulú Samuel * bi̱ kayá edxu̱u̱, ikhaa xtáa rañajunʼ náa Colombia ga̱jma̱a̱ a̱ʼgiu̱u̱. Ikhiin ni̱ndxu̱ún precursores náa congregación dí kúwíin, mú nindúún muni̱ itháan ñajuunʼ Jeobá rí muñambáá náa i̱mba̱ congregación dí ra̱ʼkhá tháán ndayóoʼ miʼtáraʼa. Mu muni̱ rígi̱, ndiyóoʼ muniña̱a̱nʼ tikhu. Samuel naʼthí: “Nigíʼ ninimbaníí rí naʼthí náa Mateo 6:33 ga̱jma̱a̱ niniʼñáánʼ rutsixu rí tséyuxu má wéñuuʼ. Mú dí itháan niʼñuxu mingíjyúuʼ nindxu̱u̱ rí muniʼñááʼ náa kúwáanʼxu rí niguma xó má nanduxu ikháanʼ ga̱jma̱a̱ ikhí na̱nguá gíʼmáanʼxu”. Mú ikhiin ndiyáá rí náa imbo̱o̱ʼ nuxi̱ʼ congregación dí kúwíin na̱nguá má ndiñúnʼ mba̱a̱ wéñuuʼ mbújkha̱a̱. Samuel naʼthí xóó: “Ndiya̱a̱xu xú káʼnii Jeobá naxnúxu̱ ikha, ga̱jma̱a̱ nariʼña̱a̱ rí nutajkháanxu. Ndiya̱a̱xu rí nandoo kaʼyuxu̱ rí  xóo nditháan túya̱a̱xu”. Lá ma̱ndoo ikháán matani̱ itháan ñajuunʼ Jeobá ráʼ. Á mu dí xúʼko̱, ma̱ndoo mi̱dxu̱ʼnú ma̱ta̱ya̱a̱ dí xtaa mijngii náa Jeobá ga̱jma̱a̱ dí ikhaa má gáñewa̱a̱nʼ (Sal. 18:25).

8. Ndiéjunʼ ejmañaaʼ ikháán náa dí niʼthí Iván ga̱jma̱a̱ Viktoria rá.

⁸ Rí mu̱ʼni̱ ñajuunʼ Jeobá naʼni rí makuwáánʼ gagi. Gundxaʼwamíjna̱ ga̱jma̱a̱ numún xa̱bu̱ gajmii, Iván ga̱jma̱a̱ Viktoria, bi̱ kúwíin ruyambáá xóo precursor náa Kirguistán. Ikhiin niraʼwi̱i̱ rí xúguaʼdáá wéñuuʼ mu xúʼko̱ muxnajximijna̱ asndu náá guáʼya̱á má ñajunʼ, mbá dí ikhaa nindxu̱u̱ rí magún náa naguma guʼwá. Iván naʼthí: “Nu̱ni̱ asndu xó má eʼngo̱o̱ náa naguma guʼwá. Maski ajndu wakíʼ néʼnguxu̱, mú nakúwáanʼxu̱ gagi ga̱jma̱a̱ nadxuu a̱jkiu̱xu numuu rí ndi̱ya̱a̱ dí nijmuxu tsiakii ndrígúxu̱ mu mu̱ni̱ ñajuunʼ Reino. Ma̱ngaa niʼni makuwáanʼxu gagi numuu rí nimbájxu̱ gajmiúxu mbaʼin a̱ngiu̱lú ga̱jma̱a̱ experiencia rí niguáʼdááxu ra̱ʼkhá tháán nagui̱i̱” (Mar. 10:29, 30).

9. b) Ndiéjunʼ niʼni̱ mbáa ndxájulú mu mutaraʼa itháan maski ajndu mingíjyúuʼ xóo xtáa xá. a) Ga̱jma̱a̱ ndiéjuunʼ nirígá índo̱ ni̱ʼni̱ xúʼko̱ xá.

⁹ Dí muʼnilú ñajuunʼ Jeobá ma̱ndoo maʼni rí makuwáánʼlú gagi maski ajndu mbaʼa dí nuraʼníílú. Mbá xkri̱da, mbáa a̱ʼgú xuáʼa̱ bi̱ nikhi̱i̱ má bi̱ xtáa náa África Occidental bi̱ mbiʼyuu Mirreh, niñajunʼ xóo doctora. Índo̱ ikhaa nigájnáa ni̱jkha̱nú ninindxu̱u̱ precursora, ikhaa nigiʼdoo nandii dí nakujtsi̱i̱. Índo̱ ikhaa nagájnuu gáʼtaraʼa, káaʼ mbá hora eʼni dí maʼga náa mámbá guʼwá. Mú nandoo naʼtáraʼa itháán mba̱yu̱u̱ʼ náa nanújngúún mbaʼin xa̱bu̱. Ikhaa gíʼdoo mbaʼa wéñuʼ revisita ga̱jma̱a̱ naʼsngúún mbaʼin wéñuuʼ xa̱bu̱, tikhun xa̱bu̱ naʼsngúún ga̱jma̱a̱ teléfono. Ndiéjunʼ exnúu tsiakii mu maʼni itháán ñajuunʼ Jeobá xá. Ikhaa naʼthí: “A̱jkiu̱nʼ ra̱ʼkhá tháán nandoo kaʼyoo Jeobá ga̱jma̱a̱ Jesucristo. Xúgíʼ mbiʼi na̱ndo̱ʼo̱o̱ Jeobá rí mambáyuʼ mu ma̱ni̱ xúgíʼ dí naʼngo̱o̱ ga̱jma̱a̱ numuu ikhaa” (Mat. 22:36, 37).

10. Xó má naʼthí náa 1 Pedro 5:10, ndiéjunʼ eʼni Jeobá ga̱jma̱a̱ numún bi̱ nandún nuni̱ itháan ñajuunʼ rá.

¹⁰ Jeobá naʼniratháanʼlú má xúʼko̱. Kenny, mbáa precursor bi̱ xtáa rayambáá náa xuajin rí mbiʼyuu Mauricio, ndiʼyoo dí gajkhun nindxu̱u̱ rígi̱. Índo̱ ikhaa nininuuʼ rí gajkhun niniñuuʼ raʼnigajmaa náa universidad, nijngúun iyááʼ ga̱jma̱a̱ nigíʼdu̱u̱ niʼni mbá kájxi̱ ñajuunʼ Jeobá. Ikhaa naʼthí: “Ni̱ni̱ mbá tsiakii mu mani̱ndxu̱ʼ xóo profeta Isaías bi̱ niʼthí: ‹¡Gi̱i̱ xtáá ikhúún! ¡Ataxúʼmún ikhúún!›” (Is. 6:8). Mbaʼa proyecto náa niñejunʼ Kenny xóo náa naguma guʼwá, ga̱jma̱a̱ niyambáá náa najuiʼtájui̱i̱ i̱yi̱i̱ʼ náa ajngáa dí naʼthí ikhaa. Ikhaa naʼthí: “Niguma rathún itháan mu xúʼko̱ majmañuʼ ma̱ni̱ ñajunʼ rí nikhánuʼ”. Mú raʼkháa i̱ndó nijmañuu xóo mañajunʼ. Ikhaa naʼthí xóó: “Ni̱jkhánú ndi̱yo̱o̱ ndiéjunʼ dí xáʼngo̱ʼ gáni̱, ga̱jma̱a̱ ndiéjunʼ cualidad rí ndayóoʼ magúʼdoo xóó mu xúʼko̱ ma̱ni̱ itháan ñajuunʼ Jeobá” (atraxnuu 1 Pedro 5:10). * Ikháán mangáán ma̱ndoo matríyaʼ awan mu xúʼko̱ maʼniratháán itháan Jeobá mu ma̱ndoo matani̱ itháan ñajuunʼ ikhaa.

11. Ndiéjunʼ nini̱ tikhun a̱ngiu̱lú bi̱ kúwá náa Corea del Sur mu xúʼko̱ mutaraʼa itháan, ga̱jma̱a̱ ndiéjunʼ nirígá rá. (Atayáá xtiʼkhuu dí nakujmaa náa nagi̱ʼdu̱u̱.)

¹¹ Asndu bi̱ mba̱yu̱u̱ʼ má tsiguʼ kúwá náa xuajñuu Jeobá nambáñún ikha rí naxná xuajñuu, xóo mbá nuxi̱ʼ rí miʼtáraʼa. Índo̱ xtáa rarígá nandii rígi̱ dí mbiʼyuu COVID-19, a̱ngiu̱lú bi̱ kuya̱ edxu̱u̱ bi̱ kúwá náa Corea del Sur niniraʼmáʼ: “Tikhun a̱ngiu̱lú bi̱ nikumu̱ún rí xájmiin mutaraʼa ga̱jma̱a̱ numuu dí naʼñún nandii, mú xúgi̱ nuni̱ náa videollamada. Ajtsíin a̱ngiu̱lú gu̱ʼu̱ bi̱ guáʼdáá itháan rí 80 tsiguúnʼ nijmañún majmúún celular, dí xúgi̱ nutaraʼa xúgíʼ mbiʼi” (Sal.  92:14, 15). Lá nanigua̱a̱ʼ marataráʼa itháan ga̱jma̱a̱ ma̱ta̱ya̱a̱ xú káʼnii Jeobá májánʼ a̱jkiu̱u̱n ráʼ. Dí mbuʼyáá xúgi̱ mambáyaaʼ mataxkamaa meta.

12. Ndiéjunʼ eʼthí maxnún Jeobá bi̱ nakumu̱ún kuyáá ikhaa xá.

¹² Gakuma̱a̱ʼ xtayáá Jeobá. Á mu nakumulú kuʼyáá ikhaa ga̱jma̱a̱ nuxnáá rí itháan májánʼ, ikhaa naʼthí dí maʼni tsajkurámáánʼlú wéñuuʼ (Mal. 3:10). Mbáa ndxájulú a̱ʼgu̱ bi̱ xtáa náa Colombia bi̱ mbiʼyuu Fabiola ndiʼyoo gajkhun xú káʼnii Jeobá niʼnimbánuu rígi̱. Ikhaa nindoo mani̱ndxu̱u̱ precursora regular nda̱wa̱á rí nijngúun iyááʼ, mú ikhaa nambáñún bi̱ kúwíin náa goʼwóo mu ma̱ʼtsi̱ rí ndayóoʼ. Ikha jngóo índo̱ ikhaa nikudaaʼ i̱yu̱u̱ʼ rí magumaa jubilar, niʼtákáñuu wéñuuʼ Jeobá rí mambáyúu, ikhaa niʼthí: “Rí mundrígúu mbá chíʼgíiʼ mbújkha̱a̱ ga̱jma̱a̱ numuu dí nagumiin jubilar ndajyúuʼ mba̱yu̱u̱ʼ, mú ikhúún káaʼ ndiyóoʼ magúʼthúu̱n mbá gu̱nʼ índo̱ nigíʼdu̱u̱ nigruigúu rí kaʼyoʼ. Ninindxu̱u̱ xóo mbá milagro”. A̱jma̱ igu̱nʼ nda̱wa̱á nigíʼdu̱u̱ ninindxu̱u̱ precursora. Rí xúgi̱ ikhaa gíʼdoo 70 tsiguuʼ ga̱jma̱a̱ naʼni má 20 tsiguʼ rí nindxu̱u̱ precursora. Ikhaa nimbáñún mbá 8 xa̱bu̱ mu majngún iyááʼ. Ikhaa naʼthí: “Nguáná naku̱mu̱ʼ rí nakáguabúúnʼ, mú Jeobá nambáyúʼ mu ma̱ʼngo̱ʼ mani magooʼ hora rí kaʼyoʼ”.

13, 14. Ndiéjunʼ xkri̱da ma̱ndoo mambáyulú mu makumulú kuʼyáá itháan Jeobá, ga̱jma̱a̱ mu mbuʼyáʼ itháan xóo mu̱ʼni̱ ñajuunʼ xá.

¹³ Gajmañulú náa xkri̱da ndrígu̱ún bi̱ nikumu̱ún kuyáá Jeobá. Náa Biblia na̱ʼkha̱ mbaʼa xkri̱da ndrígu̱ún bi̱ nini̱ mbá tsiakii mu muni̱ ñajuunʼ Jeobá. Mbaʼa nuthu Jeobá niʼni  tsajkurámiinʼ nda̱wa̱á dí ikhiin nisngajma rí gajkhun nakumu̱ún kuyáá. Mbá xkri̱da, Dios niʼni tsajkurámaaʼ Abrahán nda̱wa̱á dí ikhaa niniñuuʼ náa xtáa “maski ajndu ikhaa tséʼyoo náa xtáa ra̱jkha̱” (Heb. 11:8). Jacob niʼni tsajkurámaaʼ nda̱wa̱á dí nixmínaʼ ga̱jma̱a̱ mbáa ángel (Gén. 32:24-30). Índo̱ israelitas nachu̱u̱n matu̱ʼu̱u̱n náa ku̱ba̱ʼ rí nijuiʼtá makánún, nindoo ninújngún náa mañu Jordán nda̱wa̱á rí ndxajkun nijngún náa iyaʼ (Jos. 3:14-16).

¹⁴ Ma̱ngaa ma̱ndoo majmañaaʼ xkri̱da ndrígu̱ún xa̱bi̱i̱ Jeobá bi̱ kúwíin rí mbiʼi xúgi̱ bi̱ niku̱mu̱ún kuyáá ikhaa, ga̱jma̱a̱ ndiyáʼ i̱ʼwáʼ enii mu muni̱ itháán ñajuunʼ. Mbá xkri̱da, mbáa ndxájulú bi̱ mbiʼyuu Payton ga̱jma̱a̱ a̱ʼgiu̱u̱ bi̱ mbiʼyuu Diana, nanigu̱u̱nʼ muraxnuu náa naʼthí ga̱jma̱a̱ numún a̱ngiu̱lú bi̱ nduyáʼ xóo muni̱ itháan Jeobá, xóo náa naʼthí “Nixnaximi̱jna̱ mú muyambáá”. * Ikhaa naʼthí: “Índo̱ nurajxnuuxu̱, nundxaʼwamíjnaxu̱ rí kúwáanʼxu ru̱ya̱a̱ mbáa xa̱bu̱ bi̱ na̱ʼkhu̱ mbá ganitsu rí ndaskhuʼ wéñuuʼ. Índo̱ itháan ndu̱ya̱a̱xu itháan nanduxu mu̱ni̱ ga̱jma̱a̱ mbu̱ya̱a̱xu xú káʼnii Jeobá nindxu̱u̱ májáanʼ”. Nguáthá tsiguʼ, xa̱bu̱ gajmii bigi̱ nigún gákúwíin náa ndayóoʼ itháan miʼtáraʼa. Lá nitayáá má ikháán artículo rígi̱ ráʼ. Ga̱jma̱a̱, lá nitayáá má video Najuiʼtáraʼa náa xuajin mitsínguánʼ: Australia ga̱jma̱a̱ Najuiʼtáraʼa náa xuajin mitsínguánʼ: Irlanda, dí rígá náa ináa jw.org ráʼ. Xúgíʼ rígi̱ ma̱ndoo mambáyaaʼ mu ma̱ta̱ya̱a̱ xú káʼnii matani̱ itháan ñajuunʼ Jeobá.

15. Xú káʼnii gámbáyulú á mu nambájxu gajmiúlú bi̱ nugíʼ ginii muni ñajuunʼ Jeobá rá.

¹⁵ Atraʼwíin bi̱ mambajxáaʼ gajmiánʼ bi̱ mumbayáaʼ. Xáʼñaaʼ mingíjyúuʼ miʼtsu mbá ganitsu rí tsétatsinuuʼ á mu naraxtaa ga̱jma̱a̱ʼ mbáa xa̱bu̱ bi̱ nanigu̱u̱ʼ mi̱khu̱ ganitsu rúʼko̱. Ikháá má kayuuʼ, á mu nakuwáánʼ mba̱yu̱u̱ʼ gajmiúlú bi̱ nugíʼ nuni̱ ginii ñajuunʼ Jeobá, xáʼñulú mingíjyúuʼ mu mbuʼyáʼ itháan xóo mu̱ʼni̱ ñajuunʼ Jeobá. Rúʼko̱ rí nigíʼnuu Kent ga̱jma̱a̱ Verónica. Ikhaa naʼthí: “Bi̱ nambájxu gajmiúxu ga̱jma̱a̱ bi̱ kúwíi̱n náa guʼwúxu, nuthuxu rí ma̱ndoo mbuʼyáʼ i̱ʼwáʼ enii xóo muni̱ itháan ñajuunʼ Jeobá. Ni̱jkuánú ndi̱ya̱a̱xu̱ dí manújguxu̱ mba̱yu̱u̱ʼ mbiʼi gajmiúxu ikhiin, bi̱ nduyáʼ ginii muni̱ ñajuunʼ Reino. Rúʼko̱ nimbáyúxu mu muʼgíʼ mu̱ni̱ tikhuuʼ rí nindxu̱u̱ nuxi̱ʼ”. Rí mbiʼi xúgi̱, nájmi̱i̱n ikhiin ni̱ndxu̱ún precursores especiales náa Serbia.

16. Xó má naʼthí náa Lucas 12:16-21, náá numuu dí gíʼmaa makuwáánʼ xawii mu̱ʼni̱ asndu ndiéjúúnʼ má rí ndayóoʼ rá.

¹⁶ Araxtaa xawii mu matani̱ ñajuunʼ Jeobá. Mu mu̱ʼni̱ rí nanigu̱u̱ʼ Jeobá na̱nguá má eyóoʼ muniʼñááʼ xúgíʼ rí nanigulú (Ecl. 5:19, 20). Á mu tsíyulú gúʼni̱ itháan náa ñajuunʼ Dios i̱ndó ga̱jma̱a̱ numuu dí tsíyulú gúniʼñánʼ dí nanigulú, magíʼnulú xóo nigíʼnuu xa̱bu̱ bi̱ niʼthí Jesús, bi̱ niñejunʼ gakhi̱i̱ wéñuʼ mu xúʼko̱ maxtáa májánʼ, mú nimbumuu kaʼyoo Dios (atraxnuu Lucas 12:16-21). * Mbáa ndxájulú bi̱ xtáa náa Francia bi̱ mbiʼyuu Christian naʼthí: “Na̱nguá ejmuʼ májánʼ mbiʼi ga̱jma̱a̱ tsiakii ndrígóʼ mu ma̱ni̱ itháan ñajuunʼ Jeobá ga̱jma̱a̱ mambáñún bi̱ kúwíi̱n náa goʼwóʼ”. Ikhaa ga̱jma̱a̱ a̱ʼgiu̱u̱ niraʼwi̱i̱ rí mani̱ndxu̱ún precursor, mu muni̱ rígi̱ ndiyóoʼ muniña̱a̱nʼ ñajunʼ rí guáʼdáá. Ikha jngóo niñejunʼ náa naguma kaʼwi̱i̱, ga̱jma̱a̱ makuwíin gagi ga̱jma̱a̱ rí guáʼdáá, lá nigiʼdoo numuu rí nini̱ xáʼ. Ikhaa naʼthí: “Nutaráʼaxu itháan ga̱jma̱a̱ nduñu̱u̱n itháan bi̱ nusngúún ga̱jma̱a̱ Biblia ma̱ngaa xa̱bu̱ bi̱ natangáanʼ  gúñu̱u̱nxu najmañún itháan ga̱jma̱a̱ numuu Jeobá”.

17. Náá numuu rí mbaʼin tsíñún gúriʼkui̱i̱ xóo mutaraʼa rá.

¹⁷ Araxtaa xawii mu matriʼkhu̱u̱ xóo naratáraʼa (Hech. 17:16, 17; 20:20, 21). Mbáa ndxájulú precursora bi̱ xtáa náa Estados Unidos bi̱ mbiʼyuu Shirley, ikhaa ndiyóoʼ mariʼkhu̱u̱ xóo maʼtáraʼa índo̱ xtáa rarígá nandii rí mbiʼyuu COVID-19. Nákha ginii ikhaa tsíyoo gáʼtaraʼa ga̱jma̱a̱ teléfono, mú índo̱ ni̱ʼkha̱ circuito, nisngáá xóo maʼni. Asndu nákhá má mbiʼi rúʼko̱ nigíʼdu̱u̱ niʼtáraʼaʼ ga̱jma̱a̱ teléfono, ikhaa naʼthí: “Nákhá wapháá, namínuʼ, mú dí xúgi̱ nanigu̱ʼ. Nitamíjná gajmiúxu itháan mbaʼin xa̱bu̱ ki xóo nákhá na̱jkuá mámbá guʼwá”.

18. Ndiéjuunʼ gándoo gámbáyulú mu maʼngo̱o̱ muraʼníí gamiéjunʼ dí narikulú mu muʼtáraʼa itháan rá.

¹⁸ Atagíʼ mbá meta ga̱jma̱a̱ atani̱ tsiakiminaʼ rí mataxkamaa. Índo̱ nuraʼníí gamiéjunʼ nuʼtákáñíin Jeobá ga̱jma̱a̱ nundxaʼwamíjna̱ tsu̱ma̱á xú káʼnii gúʼni̱ náa dí nuraʼníí (Prov. 3:21). Mbáa ndxájulú precursor regular bi̱ mbiʼyuu Sonia, bi̱ xtáa rayambáá náa mbá grupo rí nuthi ajngáa romaní náa Europa, ikhaa naʼthí: “Nanigu̱ʼ maniraʼmáʼ meta ndrígóʼ náa mbá i̱yi̱i̱ʼ ga̱jma̱a̱ magiʼma i̱yi̱i̱ʼ rúʼko̱ náa rí ma̱ndoo mba̱yo̱o̱. Náa meso’ kama mbá dibujo náa nakujmaa crucero. Índo̱ ndayóoʼ maraʼwíí mbá rí ma̱ni̱, nda̱yo̱o̱ dibujo rúʼko̱ ga̱jma̱a̱ nandxaʼwamínaʼ, náá mínaaʼ gáʼga kañún dí naraʼwíí mani”. Índo̱ Sonia nagiʼdoo xkujndu, ikhaa naʼniminaʼ rí xáxtáa ngíná, ikhaa naʼthí: “Mámbá dí naraʼnuu ma̱ndoo mani̱ndxu̱u̱ xóo mbá xtájtsí dí narikoʼ mu xáʼngo̱o̱ gáʼgánú náa meta ndrígóʼ o ma̱ndoo mani̱ndxu̱u̱ xóo mbá puente rí ma̱ndoo mambáyuʼ maxkamaa meta ndrígóʼ. Maʼngo̱o̱ maxkamaa meta ndrígóʼ á mu nani tsiakiminaʼ. Á mu na̱nguá, xáʼngo̱o̱ gáxkamaa”.

19. Xú káʼnii gándoo gusngajmá rí nuxnáa wéñuuʼ núma̱a̱ Jeobá ga̱jma̱a̱ numuu xúgíʼ rí naʼni ga̱jma̱a̱ numulú rá.

¹⁹ Mbaʼa xóo naʼni tsajkurámáánʼlú Jeobá. Ma̱ndoo musngajmá rí nuxnáalú núma̱aʼ índo̱ nuʼnilú xó má eʼngo̱o̱ mu mbuʼyamajkuíí (Heb. 13:15). Rígi̱ nandoo gáʼthúu̱n rí mbuʼyáʼ i̱ʼwáʼ enii xóo muʼtáraʼa itháan. Á mu nuʼnilú xúgíʼ rígi̱, Jeobá maʼni tsajkurámáánʼlú wéñuuʼ. Ikha jngóo guʼyáʼ i̱ʼwáʼ enii xóo ma̱ndoo mbuʼyáá dí Jeobá májáanʼ a̱jkiu̱u̱n. Xúʼko̱ ma̱ndoo manindxu̱lú xóo Jesús índo̱ niʼthí: “Ganitsu ndrígóʼ nindxu̱u̱ rí ma̱ni̱ dí nandoo bi̱ nikungu̱u̱nʼ ga̱jma̱a̱ rí ma̱ni̱ gájxúu ñajunʼ ndrígóo” (Juan 4:34).