1-2. Tuir Salmo 34:8, oinsá ita bele aprende kona-ba Jeová nia laran-diʼak?

IMAJINA ema ida oferese hahán neʼebé Ita seidauk koko. Ita bele buka-hatene kona-ba hahán neʼe hodi haree, horon, buka reseita, ka husu ema seluk se sira gosta hahán neʼe ka lae. Maibé, dalan ida deʼit atu hatene Ita gosta hahán neʼe ka lae mak koko rasik.

² Ita bele aprende kona-ba Jeová nia laran-diʼak liuhusi lee Bíblia no ita-nia publikasaun sira no mós rona ema seluk nia esperiénsia kona-ba oinsá sira simu bensaun husi Jeová. Maibé ita sei komprende liután kona-ba Jeová nia laran-diʼak bainhira ita “koko no haree katak Jeová mak diʼak”. (Lee Salmo 34:8.) Hanoin toʼok kona-ba ezemplu ida tuirmai. Karik ita hakarak serbí Jeová tempu-tomak, maibé atu kumpre planu neʼe, ita presiza halo simples ita-nia moris. Karik ita lee beibeik Jesus nia promesa katak se ita tau uluk Maromak nia Ukun, Jeová sei fó buat neʼebé ita presiza, maibé ita rasik seidauk haree Jeová halo ida-neʼe ba ita. (Mt 6:33) Maski nuneʼe, ita tau fiar ba Jesus nia promesa, hamenus ita-nia gastu, hamenus ita-nia serbisu, no tau fokus ba serbisu haklaken. Hodi halo nuneʼe, ita rasik haree oinsá Jeová tau matan ba ita-nia presiza. Ita rasik “koko no haree katak Jeová mak diʼak”.

3. Tuir Salmo 16:1, 2, sé-sé deʼit mak simu Jeová nia laran-diʼak?

³ Jeová hatudu laran-diʼak ba ema hotu, inklui ba sira neʼebé la hatene nia. (Sal 145:9; Mt 5:45) Maibé sira neʼebé hadomi Jeová no serbí nia ho laran tomak sei simu bensaun barak husi nia. (Lee Salmo 16:1, 2.) Mai ita koʼalia kona-ba buat diʼak balu neʼebé Jeová halo ona mai ita.

4. Oinsá Jeová hatudu laran-diʼak ba sira neʼebé komesa atu hakbesik ba nia?

 ⁴ Bainhira ita aplika buat neʼebé ita aprende husi Jeová, ita bele haree katak ida-neʼe lori benefísiu ba ita. Porezemplu, bainhira ita aprende liután kona-ba Jeová no komesa hadomi nia, nia ajuda ita halakon ita-nia hanoin neʼebé sala ka la halo tan buat neʼebé nia hakribi. (Kol 1:21) Bainhira ita dedika an ba Jeová no hetan batizmu, nia fó ba ita buat diʼak oioin hanesan konxiénsia neʼebé diʼak no mós relasaun diʼak ho nia.—1 Ped 3:21.

5. Oinsá Jeová ajuda ita iha serbisu haklaken?

⁵ Ita kontinua sente Jeová nia laran-diʼak bainhira ita haklaken. Ita mak moedór ka lae? Jeová nia atan barak mak moedór. Antes Ita sai Testemuña, karik Ita sei nunka imajina katak Ita sei bá ema nia uma no haklaken ba sira. Maibé agora, Ita halo ida-neʼe beibeik. No Jeová mós ajuda Ita atu gosta haklaken. Jeová ajuda Ita iha dalan seluk tan. Nia ajuda Ita atu kalma nafatin maski ema kontra Ita iha serbisu haklaken. Nia ajuda Ita atu hanoin-hetan eskritura sira neʼebé kona ema nia situasaun bainhira sira rona ba Ita. Jeová mós fó ita kbiit atu kontinua haklaken maski ema lakohi rona.—Jer 20:7-9.

6. Oinsá treinu neʼebé Jeová fó ita hatudu katak nia laran-diʼak?

⁶ Jeová mós hatudu laran-diʼak hodi fó treinu ba ita kona-ba haklaken. (João 6:45) Iha reuniaun loron baileet, ita aprende kona-ba ezemplu atu haklaken no oinsá ita bele uza ideia sira-neʼe. Karik foufoun ita sente taʼuk atu koko dalan foun atu haklaken, maibé kuandu ita koko ida-neʼe, Jeová sei haraik bensaun mai ita. Iha reuniaun no reuniaun boot sira, ita hetan anima atu koko dalan foun oioin atu haklaken. Karik ita sente taʼuk atu koko dalan foun sira-neʼe, maibé bainhira ita koko, Jeová sei haraik bensaun ba ita. Agora ita sei aprende kona-ba bensaun neʼebé Jeová sei fó ba ita bainhira ita tau fiar ba nia no koko dalan foun atu serbí nia tuir ita-nia situasaun. No tuirmai ita sei koʼalia kona-ba oinsá ita bele kumpre ita-nia planu sira.

7. Ita sei hetan bensaun saida se ita serbí Jeová liután?

⁷ Ita hakbesik liután ba Jeová. Hanoin toʼok ezemplu husi katuas kongregasaun ida naran Samuel * neʼebé serbí hamutuk ho ninia feen iha rai-Kolómbia. Sira serbí nuʼudar pioneiru, maibé sira hakarak aumenta liután sira-nia serbisu haklaken hodi muda ba kongregasaun seluk neʼebé presiza liután ajuda. Atu kumpre planu neʼe, sira presiza halo sakrifísiu balu. Irmaun Samuel hatete: “Ami halo tuir matadalan husi Mateus 6:33 no para atu sosa buat neʼebé ami la presiza. Maibé buat neʼebé susar liu mak atu muda sai husi ami-nia uma. Ami gosta tebes uma neʼe no ami mós la iha debe.” Bainhira sira muda ba kongregasaun foun, sira bele moris ho osan uitoan deʼit se kompara ho tempu uluk. Irmaun Samuel hatete: “Ami haree ona oinsá Jeová dirije ami no hatán ba ami-nia orasaun. Ami sente katak Jeová kontente ho ami no ami mós bele sente liután ninia domin.” Ita mós bele serbí Jeová liután ka lae? Se Ita halo nuneʼe,  Ita bele fiar katak Ita sei hakbesik liután ba Jeová no nia sei tau matan ba Ita-nia presiza.—Sal 18:25.

8. Ita bele aprende saida husi Ivan no Viktoria?

⁸ Ita sente kontente ho ita-nia serbisu ba Maromak. Haree toʼok esperiénsia husi Ivan no Viktoria neʼebé serbí nuʼudar pioneiru iha rai-Kirgizistaun. Sira halaʼo moris neʼebé simples atu nuneʼe sira bele hola parte iha knaar naran deʼit, inklui iha serbisu konstrusaun. Ivan hatete: “Ami serbisu makaʼas iha projetu ida-idak neʼebé ami halo. Maski ami sente kole tebes iha loron ida-idak nia rohan, maibé ami sente dame no kontente tanba ami hatene katak ami uza ami-nia forsa atu serbisu makaʼas ba Jeová. Ami mós sente kontente tanba ami iha kolega foun barak no mós esperiénsia furak oioin.”—Mc 10:29, 30.

9. Maski hasoru susar, maibé oinsá irmán ida serbí Jeová liután no neʼe lori rezultadu saida?

⁹ Ita mós bele hetan ksolok hodi serbí Jeová maski hasoru situasaun neʼebé susar. Porezemplu, irmán ferik ida naran Mirreh neʼebé faluk ona iha Áfrika Oeste, para husi ninia serbisu nuʼudar doutora no komesa foti pioneiru. Irmán Mirreh iha moras ida neʼebé halo nia susar atu laʼo, no nia bele uza oras ida deʼit atu haklaken husi uma ba uma. Maibé nia bele uza tempu barak atu haklaken ho karrosa. Nia iha vizita fali no estudante Bíblia barak, no nia kontaktu sira balu liuhusi telefone. Saida mak book irmán Mirreh atu serbí Jeová liután? Nia hatete: “Haʼu hadomi tebes Jeová no Jesus Kristu. No haʼu husu beibeik ba Jeová atu ajuda haʼu serbí nia tuir haʼu-nia kbiit.”—Mt 22:36, 37.

10. Tuir 1 Pedro 5:10, sira neʼebé hakaʼas an liután atu serbí Jeová simu bensaun saida?

¹⁰ Ita simu treinu liután husi Jeová. Irmaun Kenny neʼebé serbí nuʼudar pioneiru iha rai-Maurísia sente rasik ida-neʼe. Bainhira nia aprende lia-loos, nia para husi universidade, hetan batizmu, no serbí nuʼudar pioneiru. Nia hatete: “Haʼu koko atu banati-tuir profeta Isaias neʼebé dehan: ‘Haʼu mak neʼe! Haruka haʼu bá!’” (Isa 6:8) Irmaun Kenny ajuda ho projetu konstrusaun oioin, no mós ajuda tradús publikasaun sira ba ninia língua rasik. Nia hatete: “Haʼu simu treinu neʼebé hanorin haʼu skill oioin atu bele kumpre haʼu-nia knaar.” Nia mós aprende buat seluk tan. Nia hatete: “Haʼu aprende kona-ba buat neʼebé haʼu la iha kbiit atu halo, no mós aprende kona-ba hahalok sira neʼebé haʼu presiza haburas atu bele serbí Jeová ho diʼak liután.” (Lee 1 Pedro 5:10.) Karik Ita mós bele halo mudansa atu simu treinu liután husi Jeová.

11. Irmán sira iha rai-Koreia Súl halo saida atu haklaken, no neʼe lori rezultadu saida? (Haree dezeñu iha livru oin.)

¹¹ Irmaun-irmán sira neʼebé serbí ona ba tinan barak mós presiza hetan treinu bainhira koko atu haklaken iha dalan foun. Durante pandemia COVID-19, katuas kongregasaun iha rai-Koreia Súl hakerek: “Irmaun-irmán balu neʼebé uluk labele haklaken beibeik tanba sira-nia saúde, agora sira haklaken liuhusi vídeo konferénsia. Irmán naʼin-tolu neʼebé idade 80 liu aprende atu uza komputadór no agora sira haklaken loroloron hodi uza dalan neʼe.” (Sal 92:14, 15) Ita mós hakarak haklaken liután no koko rasik atu haree katak Jeová mak diʼak ka lae?  Tuirmai mak buat balu neʼebé Ita bele halo atu kumpre Ita-nia planu.

12. Jeová promete atu halo saida ba ema neʼebé sadere ba nia?

¹² Aprende atu sadere ba Jeová. Jeová promete atu haraik bensaun barak ba ita kuandu ita tau fiar ba nia no hakaʼas an atu serbí nia. (Mal 3:10) Irmán Fabiola husi rai-Kolómbia haree ona oinsá Jeová kumpre promesa neʼe. Lakleur depois nia hetan batizmu, nia hakarak serbí nuʼudar pioneiru regulár. Maibé nia presiza serbisu atu sustenta ninia família. Tan neʼe, bainhira nia idade toʼo atu para serbisu, nia halo orasaun ba Jeová atu husu ajuda. Nia hatete: “Baibain presiza tempu kleur atu simu osan pensaun, maibé liutiha fulan ida deʼit, haʼu simu haʼu-nia osan pensaun. Haʼu sente neʼe hanesan milagre.” Fulan rua liutiha, nia komesa serbí nuʼudar pioneiru. Agora nia tinan 70 liu no serbí ona nuʼudar pioneiru ba tinan 20 liu. Durante tempu neʼe, nia ajuda ona ema naʼin-ualu atu hetan batizmu. Nia hatete: “Dala ruma haʼu sente la iha forsa, maibé Jeová ajuda haʼu loroloron atu kontinua pioneiru.”

13-14. Ezemplu saida mak bele ajuda ita atu sadere ba Jeová no serbí nia liután?

¹³ Aprende husi ema neʼebé sadere ba Jeová. Bíblia fó sai ezemplu oioin kona-ba ema sira neʼebé hakaʼas an atu serbí Jeová. Iha ezemplu barak neʼebé hatudu Jeová fó bensaun ba sira depois  sira halo uluk buat ruma hodi hatudu katak sira sadere ba nia. Porezemplu, depois Abraão husik tiha ninia uma, “maski nia la hatene atu bá loos neʼebé”, mak Jeová foin fó bensaun ba nia. (Ebr 11:8) Depois luta tiha ho anju ida mak Jacob foin simu bensaun espesiál. (Gén 32:24-30) Depois amlulik sira hakat ba Mota Jordaun mak nasaun Izraél foin bele hakur mota no tama ba rai neʼebé Maromak promete.—Jos 3:14-16.

¹⁴ Ita mós bele aprende husi maluk Kristaun neʼebé sadere ba Jeová no serbí Jeová liután. Porezemplu, irmaun Payton no ninia feen Diana, gosta atu lee kona-ba irmaun-irmán sira neʼebé aumenta liután sira-nia serbisu ba Jeová, hanesan sira neʼebé temi iha série “Sira fó sira-nia an ho hakarak rasik”. * Irmaun Payton hatete: “Bainhira ami lee sira-nia esperiénsia, ami sente hanesan haree hela ema han hahán gostu. Nuʼudar ami lee liután sira-nia esperiénsia, ami mós hakarak atu ‘koko no haree katak Jeová mak diʼak’.” Ikusmai irmaun Payton no irmán Diana muda ba fatin neʼebé presiza liután haklaken-naʼin. Ita lee ona série neʼe ka lae? No Ita mós haree ona vídeo kona-ba Haklaken iha fatin dook iha rai-Austrália no Menginjil di Daerah Terpencil—Irlandia neʼebé fó sai iha jw.org ka lae? Informasaun sira-neʼe bele ajuda Ita atu buka dalan atu aumenta liután Ita-nia serbisu ba Jeová.

15. Oinsá mak ransu neʼebé diʼak bele ajuda ita?

¹⁵ Hili ransu neʼebé diʼak. Baibain fasil liu ba ita atu koko hahán foun se ita ransu ho ema neʼebé gosta hahán neʼe. Nuneʼe mós se ita ransu ho ema neʼebé tau uluk Jeová iha sira-nia moris, neʼe mós ajuda ita atu aumenta ita-nia serbisu ba Jeová. Neʼe mak buat neʼebé akontese ba feen-laʼen ida naran Kent no Veronica. Kent hatete: “Ami-nia belun no família sira anima ami atu koko dalan foun atu serbí Jeová. Ami rekoñese katak hodi ransu ho ema neʼebé tau uluk Maromak nia Ukun, neʼe ajuda ami atu koko buat foun.” Agora Kent no Veronica serbí nuʼudar pioneiru tempu-tomak iha rai-Sérvia.

16. Hanesan Jesus nia ai-knanoik iha Lucas 12:16-21, tanbasá ita presiza prontu atu halo sakrifísiu?

¹⁶ Halo sakrifísiu ba Jeová. Ita la presiza husik buat hotu neʼebé ita gosta atu bele halo Jeová kontente. (Ecle 5:19, 20) Maibé, se ita dada an atu serbí Jeová liután tanba deʼit lakohi halo sakrifísiu, karik ita sei halo desizaun neʼebé sala hanesan ho mane iha Jesus nia ai-knanoik. Mane neʼe moris diʼak maibé la hanoin kona-ba Maromak. (Lee Lucas 12:16-21.) Irmaun Christian neʼebé hela iha rai-Fransa, hatete: “Haʼu la uza didiʼak haʼu-nia tempu no forsa atu serbí Jeová no ajuda haʼu-nia família.” Ikusmai nia no ninia feen deside atu foti pioneiru. Maibé atu kumpre planu neʼe, sira presiza para husi sira-nia serbisu. Atu sustenta sira-nia moris, sira komesa halo serbisu atu hamoos no aprende atu moris ho osan uitoan deʼit. Sira kontente tanba halo sakrifísiu neʼe ka lae? Irmaun Christian hatete: “Agora ami gosta liután serbisu haklaken no kontente atu haree estudante Bíblia no vizita fali sira aprende kona-ba Jeová.”

17. Saida mak bele hanetik ita atu koko haklaken iha dalan foun?

¹⁷ Prontu atu koko dalan foun hodi serbí Jeová. (Após 17:16, 17; 20:20, 21)  Irmán pioneiru ida naran Shirley neʼebé hela iha Estadus Unidus, presiza halo mudansa ba ninia dalan atu haklaken durante pandemia COVID-19. Foufoun nia dada an atu haklaken liuhusi telefone. Maibé depois simu tiha treinu durante katuas área nia vizita, irmán Shirley komesa haklaken beibeik liuhusi telefone. Nia hatete: “Foufoun haʼu sente taʼuk, maibé agora haʼu gosta tebes. Ami koʼalia ho ema barak liu se kompara ho haklaken husi uma ba uma.”

18. Saida mak bele ajuda ita atu manán susar sira hodi serbí Jeová liután?

¹⁸ Halo planu no hakaʼas an atu kumpre. Bainhira ita hasoru problema, ita bele halo orasaun atu husu Jeová nia ajuda no hanoin didiʼak kona-ba saida mak ita presiza halo. (Prov 3:21) Irmán Sonia neʼebé serbí nuʼudar pioneiru regulár iha grupu língua Romani nian iha Europa, hatete: “Haʼu gosta atu hakerek haʼu-nia planu sira iha surat-tahan no taka ida-neʼe iha fatin neʼebé haʼu bele haree. Haʼu tau dezeñu kona-ba dalan neʼebé fahe ba rua iha haʼu-nia meza. Bainhira haʼu presiza halo desizaun, haʼu haree ba dezeñu neʼe hodi hanoin: ‘Haʼu-nia desizaun sei lori haʼu ba dalan ida-neʼebé?’” Irmán Sonia hakaʼas an atu iha hanoin neʼebé pozitivu kona-ba susar neʼebé nia hasoru. Nia hatete: “Situasaun ida-idak bele sai hanesan moru neʼebé hanetik haʼu-nia planu ka sai hanesan ponte neʼebé bele ajuda haʼu atu kumpre haʼu-nia planu. Neʼe depende ba haʼu-nia hanoin.”

19. Ita hakarak atu halo saida?

¹⁹ Jeová haraik bensaun ba ita iha dalan oioin. Ita bele hatudu katak ita hafolin bensaun sira-neʼe liuhusi fó hahiʼi ba nia. (Ebr 13:15) Karik ita bele halo buat oioin atu serbí Jeová no tuirmai Jeová sei haraik bensaun liután mai ita. Loroloron, mai ita buka dalan atu “koko no haree katak Jeová mak diʼak”. Tuirmai ita sei sente hanesan Jesus neʼebé dehan: “Haʼu-nia ai-han mak atu halo tuir Ida neʼebé haruka haʼu mai nia hakarak no atu halo hotu ninia serbisu.”—João 4:34.