1-2. Guya khu Ndzimo 34:8, ginani hi yedego gu gira gasi gu wona wuwadi wa Jehovha?

NGA dundrugeya muthu nyo khaguri na gu ninga guhodza nya gu gima u si hodzi! Si nga gira u tugula gu khuwe guhodza gogo gu khade kharini khu gu gu khedza, u gu femba, adzina u wudzisa esi si pategidego gasi gu gu dongiseya mwendro kamo gu wudzisa esi vambe va sitigo khu guhodza gogo. Ganiolu, gyomo u yedego gu gira gasi gu tiyisega gu khuwe u na gu gola mwendro ne. Ginani gyakona? Gu gu linga.

² Lisine gu khethu hi nga hevbula gilogyo khu wuwadi wa Jehovha omu nya Bhibhiliya ni omu nya mabhuku ma seketedwago omu nya Bhibhiliya mwendro kamo khu gu engiseya vambe na va gu hi bhuleya edzi va kategisidwego khidzo khu Jehovha. Ganiolu, gasi gu wona edzi Jehovha a gu wadi khidzo, gu vbwetega hi mu ‘linga’ khu habune. (Leri Ndzimo 34:8.) Hi nga si gira kharini isoso? Nga dundrugeya na wu gu vbweta gu beleya thumo nyo khaguri nya tepo yatshavbo, ganiolu gasi gu gira isoso, gu vbwetega u vbevbugisa womi wago. Adzina u ngu dziti gu khuwe wa gu thangisa Mufumo wa Nungungulu womini gwago, Jehovha a na gu ninga esi si gu keneleyago. (Mat. 6:33) Khu kotani nya gukhodwe u gu nago avba nya gitumbiso gyogyo gya Jesu, uwe wa gu dzi garadzeya gu mba gastari ngudzu dzitsapawu, u vbindrugedza mathumelo yago gasi u kodza gu gira nya singi thumoni wa Jehovha. Tepo u girago isoso, wo dzegeya gu si wona khu wabune gu khuwe Jehovha a ngu gu ninga esi si gu keneleyago. Khu gu ba u giride isoso, u ‘lingide’, u wona edzi Jehovha a gu wadi khidzo.

3. Guya khu Ndzimo 16:1, 2, khu vamani va hakhago silo nya sadi sitago khiyo ga Jehovha?

³ Jehovha a ngu gireya silo nya sadi vathu vatshavbo, gupata ni vale va si mu tigo. (Ndzi. 145:9; Mat. 5:45) Ganiolu, ahati vale va mu thumeyago khu monyo wawe watshavbo ke? Jehovha a ngu va kategisa  khu dzindziya nyo hathege ngudzu. (Leri Ndzimo 16:1, 2.) Hongoleni hi wona silo nya sadi esi Jehovha a hi gireyago.

4. Khu sevbini silo nya sadi esi Jehovha a ningago vale va hidzimeyago gwaye?

⁴ Tepo ni tepo hi thumisago esi Jehovha hi hevbudzago, hi ngu wona womi wathu na wu gu tshukwata. Khu giyeyedzo: Tepo hi hevbulago khu Jehovha hi bwe hi mu haladza, uye a ngu hi phasa gu potsa gu gira esi a si nyenyago. (Kol. 1:21) Nigu tepo hi dzi hendzeledzago gwaye hi bwe hi bhabhatiswa, Jehovha a gu engedzeya gu hi ninga silo nya sadi, nya nga livhalo li agidego ni dzipari nya dzadi. — 1 Ped. 3:21.

5. Jehovha a gu hi yeyedza kharini wuwadi thumoni nyo tshumayele?

⁵ Tepo hi gomogo thumoni nyo tshumayele, hi ngu si kodza gu engedzeya gu wona wuwadi wa Jehovha. Ina u muthu nyo degule? Gu na ni sithumi nya singi sa Jehovha si gu vathu nyo degule. Nu nga si khali Fakazi ya Jehovha, si nga gira nu pimiside esi: ‘Gima kha nyi na nga si kodza gu ganeya ni muthu nyi si mu tigo khu Bhibhiliya.’ Ganiolu muhuno, u ngu si kodza gu gira isoso nigu wo gira isoso tshigu ni tshigu. Vbavbandze nya isoso, Jehovha a ngu gu phasa gambe gu wu haladza thumo wowu nyo tshumayele. U ngu wona giphaso gya Jehovha womini gwago khu dzindziya nyo hambanehambane. Khu giyeyedzo: Jehovha a ngu gu phasa gu rula tepo u wugedwago. Tepo u manago muthu a tsakeyago, Jehovha a ngu phasa gu dundruga lowo nya wadi gasi gu wu thumisa. Nigu ambari vathu va omu nya teritoriyu yago va gu mba yeyedza gutsakeya, Jehovha a ngu gu ninga tshivba nyo simame gu tshumayela. — Jer. 20:7-9.

6. Sihevbudzo esi Jehovha a hi ningago gasi hi tshukwadzisa thumo waye, so yeyedza kharini wuwadi waye?

⁶ Jehovha a ngu hi yeyedza gambe wuwadi waye khu gu hi hevbudza edzi hi yedego gu tshumayela khidzo. (Joh. 6:45) Avba nya mitshangano ya vbakari nya semana, hi ngu mana mabelelo nya yadi ni mawonelo nya yadi hi nga ma thumisago thumoni nyo tshumayele. Dzimbe dzitepo, si nga gira hi thavanyana gu thumisa mawonelo nya maphya thumoni nyo tshumayele, ganiolu tepo hi ma thumisago, ho vbedza hi si tugula gu khethu mawonelo yoyo ma ngu thuma gwadi. Mitshanganoni yathu nya mikhongolo ni omu nya mitshangano yathu ya vbakari nya semana, hi ngu kutswa gambe gu tshumayela khu dzindziya nyo hambanehambane nya gu gima hi si gu tshumayeli khidzo. Isoso si nga thula gu khiso hi dzima silo nyo khaguri, ganiolu tepo hi girago isoso, ha gu ninga gilo nyo khaguri Jehovha gasi a gi kategisa. Hongoleni hi wona makategwa hi na ma manago khu engedzeya thumo wathu ga Jehovha ambari ha gu ba hi emisana ni giemo muni. Khu gulandreya, hi na wona gambe dzindziya nyo khaguri hi nga dzi thumisago gasi gu gira isoso.

7. Makategwa muni hi ma manago tepo hi engedzeyago thumo wathu ga Jehovha?

⁷ Wupari wathu ni Jehovha wu na tiya ngudzu. Nga wona giyeyedzo gya ndriyathu moyo nyo pwani khu Samuel, * oyu a thumeyago Colômbia ni mwangadzi waye. Uye ni mwangadzi waye va di gu tsakiswa ngudzu khu gu thuma kha nga vapiyonero libandlani gwawe, ganiolu va di gu vbweta gu engedzeya thumo wawe ga Jehovha khu gu phasedzeya libandla limwedo li nga ba li vbweta giphaso. Ganiolu, gasi gu gira isoso, va di yede gu dzima silo nyo khaguri. Samuel wari khuye: “Hi di thumisa esi si ganedwago khu Matewu 6:33; hi ema gu renga-renga silo hi nga ba hi si si vbweti ngudzu. Ganiolu, tepo si nga hunga gu hi khuga khu ndrangani gwathu si garadzide ngudzu. Iyo yi di vbahidwe khedzi hi nga ba hi yi vbweta khidzo nigu yi diri ni satshavbo hi nga ba hi si vbweta. Tepo va nga vboha thumoni gwawe nya wuphya, va diya tugula gu khavo va di yede gu vbanya khu metadi nya metadi nya dzitsapawu va nga ba va hakha gale.” Ambari ulolo, Samuel o engedzeya gambe, khuye: “Hi ngu wona edzi Jehovha a hlamulago  khidzo milombelo yathu ni edzi a hi phasago khidzo womini gwathu. Nigu hi ngu wona edzi Jehovha a tangalago khidzo khesi hi girago hi bwe hi wona lihaladzo laye khethu khu dzindziya nyo samadzise ngudzu.” Ahati uwe ke? Ina u nga si kodza gu engedzeya thumo wago ga Jehovha? Wa gu hunga gu gira isoso, tiyisega gu khuwe wupari wago ni Jehovha wu na tiya ngudzu nigu uye a na gu ninga esi si gu keneleyago. — Ndzi. 18:25.

8. Ginani u gi hevbulago ga giyeyedzo gya Ivan ni Viktoria?

⁸ Hi na mana gutsaka thumoni gwathu. Ivan ni Viktoria va gu thuma kha nga vapiyonero tigoni ga Quirguistão. Avo va di hunga gu vbevbugisa womi wawe gasi va si kodza gu phasedzeya yimbe mithumo gupata ni dziprojeto nya guvbahe. Ivan wari khuye: “Hi thumide khu tshivba yathu yatshavbo avba nya projeto ni projeto nya guvbahe. Ambari olu hi nga ba hi vbedza litshigu na hi garade, hi di gupwa gurula ni gu tangala monyoni kholu hi di gu dziti gu khethu hi thumiside tshivba yathu thumuni wa Jehovha. Vbavbandze nya isoso, hi giride dzipari nya dzadi hi bwe hi manega ni matshango nyo tsakise ngudzu. Satshavbo soso, si ngu hi ninga gutsaka nya gukhongolo.” — Marko 10:29, 30.

9. Ndriyathu nya nyamayi a tshanganago ni siemo nyo garadze, a gu si kodza kharini gu engedzeya thumo waye ga Jehovha, nigu khu yevbini mihandro a yi manago khu gu gira isoso?

⁹ Hi ngu mana gutsaka thumoni ga Jehovha ambari ha gu ba hi tshangana ni sigaradzo. Khu giyeyedzo: Mirreh, noni mweyo yi vbanyago África, yi di gu thuma kha nga dhogodheya. Kha nga olu a nga ba a dandride khu tanga, uye a di emiswa gu thuma (aposentadoria); khu kharato, a di pheya gu thuma kha nga piyonero. Mirreh na ni madwali nyo vbise ngudzu ma mu tandregisago gu gimbiya. Tepo a tshumayelago khu ndranga ni ndranga, uye kha si kodzi gu thuma tepo nya yingi, ganiolu tepo a thumago khu gikarinyana uye a ngu si kodza gu thumanyana. Mirreh na ni dzirevhisita ni sihevbulo nya singi, simbe sakone o hevbula naso khu gu thumisa telefone. Ginani gi kutsago Mirreh gu engedzeya thumo waye ga Jehovha? Uye wari khuye: “Lihaladzo nyi yeyedzwago khu Jehovha ni Jesu Kristo li ngu kuha ngudzu monyo wangu. Khu kharato, tepo yatshavbo nyi ngu gombeya ga Jehovha, nyi lomba gu kheni a nyi phasa gu gira satshavbo nyi si kodzago thumoni gwaye.” — Mat. 22:36, 37.

10. Guya khu 1 Pedro 5:10, ginani egi Jehovha a ningago vale va vbwetago gu engedzeya thumo wawe?

¹⁰ Jehovha a ngu hi hevbudza gu tshukwadzisa mathumelo yathu. Kenny a thumago kha nga piyonero tigoni ga Maurícia, a wonide lisine nya isoso. Tepo a nga hevbula lisine, uye a di diga universidhadhe a bhabhatiswa a bwe a beleya thumo nya tepo yatshavbo. Uye wari khuye: “Nyo zama gu gira kha nga Isaya, a nga khuye: ‘Nyi womo avba. Nyi rume.’” (Isa. 6:8) Kenny thumide umo nya dziprojeto nya dzingi nya guvbahe nigu phasedzede gambe guvbindrugedzeya mabhuku khu linimi laye nya mavelego. Uye wari khuye: “Nyi hevbudzidwe silo nya singi gasi nyi si kodza gu gira gwadi mithumo yeyi.” Ganiolu, Kenny kha hevbula basi edzi a yedego gu gira khidzo mithumo yeyi. Uye o engedzeya gambe, khuye: “Nyi wonide esi nyi nga ba nyi yede gu tshukwadzisa ni makhalelo nyi nga ba nyi yede gu ma haguleya gasi nyi thumeya Jehovha khu ndziya nya yadi.” (Leri 1 Pedro 5:10.) Wa gu dundrugeya khu giemo gyago, ina u nga si kodza gu vbindrugedza silo nyo khaguri womini gwago gasi u engedzeya thumo wago ga Jehovha?

11. Gudzigaradza muni gu girwago khu vandriyathu nyo khaguri va Coreia do Sul gasi va simama gu tshumayela nigu mihandro muni va yi manidego? (Wona foto avba nya kapa.)

¹¹ Vandriyathu va gu na ni tepo nyo laphe na vari lisineni, anavo va ngu phasega ngudzu khu gu tshumayela khu dzimbe dzindziya. Ndrani nya tungu nya COVID-19, madhota nyo khaguri ya libandla la Coreia do Sul, va lovide khavo: “Vandriyathu nyo khaguri va di gu pimisa gu khavo khu kotani nya mawugelo yawe kha va na nga si kodza gu tshumayela. Ganiolu, olu, avo va ngu si kodza gu tshumayela khu gu thumisa videoconferência. Khu giyeyedzo: Vandriyathu vararu nya vanyamayi  va gu na ni guvbindra 80 myaga, va hevbulede gu thumisa computadhori nigu khu gu ba va giride isoso olu va ngu si kodza gu tshumayela nya mba na gigaradzo.” (Ndzi. 92:14, 15) Ina anuwe u ngu dogoreya gu tshumayela khu dzimbe dzindziya gasi u linga Jehovha u wona edzi a gu wadi khidzo? Wona silo nyo khaguri si na gu phasago gu gira isoso.

12. Ginani egi Jehovha a tumbisago vale va mu tumbago?

¹² Tumba Jehovha. Jehovha a ngu hi tumbisa gu khuye, ha gu mu tumba hi bwe hi mu thumeya khu tshivba yathu yatshavbo a na hi ninga makategwa nya mangi. (Mal. 3:10) Ndriyathu moyo nya nyamayi wa Colômbia nyo pwani khu Fabiola wonide edzi Jehovha a tadzisidego khidzo gitumbiso gyogyo. Uye a di gu vbweta gu thuma kha nga piyonero nya tepo yatshavbo hwane nyo bhabhatiswe. Ganiolu, a di yede gu thuma gasi gu sayisa mwama waye ni sanana saye sa siraru. Khu kharato, tepo a nga enedza tanga gasi a ema gu thuma (aposentadoria); a di gombeya khu monyo waye watshavbo ga Jehovha a lomba gu khuye a mu phasa. Uye wari khuye: “Si ngu tala gu dzega tepo nyo laphe gasi u tshuswa gu ema gu thuma, ganiolu gwangu kha sa hweya; eni nyi di dzegeya gu tshuswa hwane nya ngima moyo basi. Khu lisine, isoso si diri gilewugiso.” Hwane nya migima mivili a di pheya gu thuma kha nga piyonero. Olu ndriyathu Fabiola na ni 70 myaga nigu thumide kha nga piyonero khu guvbindra 20 myaga. Ndrani nya tepo yoyo, uye phaside 8 vathu gu ninganedwa khu gu bhabhatiswa. Uye wari khuye: “Ambari olu dzimbe dzitepo nyi nga ba nyi vbeya tshivba, tshigu ni tshigu Jehovha nyi phaside gu simama gu tshumayela.”

13-14. Siyeyedzo muni si nga hi phasago gu tumba Jehovha hi bwe hi engedzeya thumo wathu ga Jehovha?

 ¹³ Hevbula khu siyeyedzo sa vale va tumbago Jehovha. Bhibhiliya yi tade khu siyeyedzo nya vathu nya vangi va thumidego khu sighingi thumoni wa Jehovha. Ganiolu, gutala nya avo, si vbwetegide gu va pheya khu gu gira gilogyo gi nga ba gi yeyedza gu khigyo va ngu mu tumba Jehovha gasi va kategiswa khuye. Khu giyeyedzo: Abrahama kha nga ba a ‘guti omu a nga ba a hongola.’ Ambari ulolo, Jehovha mu kategiside basi hwane nya gu ba a khugide khu ndrangani gwaye. (Hebh. 11:8) Jakobe nuye kategisidwe khu Jehovha hwane nya gu ba a dwanide ni ngilozi. (Gen. 32:24-30) Tepo va Israyeli va nga ba va vbweta gu beya Tigoni nya Gitumbiso, va si kodzide gu tshatuga tsongo wa Joridhani hwane nya gu ba Vaprista va gandride mati yoyo khu migondro yawe. — Jos. 3:14-16.

¹⁴ Muhuno nugo, hi nga hevbula khu siyeyedzo nya sadi sa vandriyathu va tumbidego Jehovha va bwe va dzi garadzeya gu engedzeya thumo wawe ga Jehovha. Khu giyeyedzo: Ndriyathu moyo nyo pwani khu Payton ni mwangadzi waye Diana, va di gu tsakiswa ngudzu khu gu leri matimo ya vandriyathu va engedzedego thumo wawe ga Jehovha, nya nga aya ma gomogo avba nya gipandre “Eles se Ofereceram.” * Payton wari khuye: “Tepo hi nga ba hi leri matshango yawe, si di gu gira gu khatshi ha gu va wona na va gu hodza guhodza nyo tshambe ngudzu. Tepo ni tepo hi nga ba hi leri matshango yawe, gudogoreya gwathu nyo ‘linge gasi gu wona edzi Jehovha a gu wadi khidzo’ gu di gu engedzeya. Khu gu gimbiya nya tepo, Payton ni Diana va diya phasedzeya omu gu nga ba gu vbweta ngudzu giphaso. Ahati uwe ke? U di nga leri matshango ya vandriyathu ma gomogo omu nya gipandre gyogyo? Nigu u di nga wona dzivhidhiyu dzedzi: “Pregação em Territórios Isolados — Austrália ni Pregação em Territórios Isolados — Irlanda,” dzi gomogo omu nya jw.org? Matimo ma gomogo umomo, ma nga gu phasa gu wona dzindziya u nga dzi thumisago gasi gu engedzeya thumo wago ga Jehovha.

15. Khu ginani si gu na ni lisima gu hatha gwadi dzipari?

¹⁵ Hatha dzipari nya dzadi. Ha gu ba hi tala gu vbungadza ni vathu va golago guhodza nyo khaguri, si ngu vbevbuga gu anethu hi vbweta gu linga guhodza gogo. Khu ndziya nyo fane, ha gu vbungadza ni vathu va thumisago womi wawe gasi gu thumeya Jehovha, si na hi kutsa gu gira nya singi thumoni wa Jehovha. Isoso khiso si giridwego khu Kent ni mwangadzi waye Veronica. Kent wari khuye: “Dzipari ni valongo vathu va hi kutside gu thumisa dzindziya nyo hambanehambane nyo engedzeye khidzo thumo wathu ga Jehovha. Gu gira dzipari ni vathu va thangisago Mufumo wa Nungungulu womini gwawe si hi kutside gu gira mithumo nya yiphya.” Olu, Kent ni Veronica va gu thuma kha nga vapiyonero nyo hathege tigoni ga Sérvia.

16. Guya khu gipimaniso gya Jesu gi gomogo umo ga Luka 12:16-21, khu ginani hi yedego gu dzi emiseya gu dzi hiya silo nyo khaguri gasi hi thumeya Jehovha?

¹⁶ Dzi hiye silo nyo khaguri gasi u thumeya Jehovha khu dzimbe dzindziya. Kha si vbweti kala hi dzi hiya satshavbo gasi gu tsakisa Jehovha. (Muh. 5:19, 20) Ambari ulolo, ha gu ba hi si si kodzi gu engedzeya thumo wathu ga Jehovha khu gu ba hi thava gu dzi hiya silo nyo khaguri, hi na ba hi fana ni mwama moyo a khumbugwago avba nya gipimaniso gya Jesu. Mwama yoyo, a di gu garadzega ngudzu khu gu vbweta gu mana womi nyo khadzisege nyo bwe a divala Nungungulu. (Leri Luka 12:16-21.) Ndriyathu moyo nyo pwane khu Christian a vbanyago França, wari khuye: “Nyi di si thumisi tepo ni tshivba yangu gasi gu thumeya Jehovha khu monyo wangu watshavbo ni gu khathaleya gwadi ndraga yangu.” Uye ni mwangadzi waye va di hunga gu thuma kha nga vapiyonero. Ganiolu, gasi va gira isoso, va di yede gu diga mithumo yawe. Khu kharato, va di pheya gu gira thumo nyo agise (limpeza) gasi va mana dzitsapawu nyo dzi  vbanyise khidzo va bwe va hevbuleya gu tsakiswa khesi kamo va nga ba vari naso. Ganiolu, ina gudzigaradza gwatshavbo gogo gu reside makategwa? Christian wari khuye: “Olu, hi ngu gola ngudzu gu tshumayela nigu hi ngu tsaka ngudzu tepo hi wonago sihevbuli ni dzirevhizita dzathu na dzi gu hevbula lisine.”

17. Ginani gi nga hi tandregisago gu yedza gu gira silo nya siphya thumoni gwathu nyo tshumayele?

¹⁷ Dzi garadzeye gu gira silo nya siphya. (Mith. 17:16, 17; 20:20, 21) Shirley a thumago kha nga piyonero Estados Unidos, a di yede gu tshukwadzisa silo nya khaguri thumoni waye nyo tshumayele ndrani nya tungu nya Covid-19. Gupheyani, a di gu thava gu tshumayela khu gu thumisa telefone. Ganiolu, tepo muwoneleyi nya gipandre a nga endreya libandla la Shirley, a va hevbudzide edzi va nga thumisago khidzo telefone gasi gu tshumayela khiyo. Nigu gukhugeya avbovbo, tshigu ni tshigu, Shirley a gu tshumayela khu gu thumisa telefone. Wari khuye: “Khu lisine, gupheyani si di gu thavisanyana, ganiolu olu nyi ngu si gola gundzu gu tshumayela khu telefone. Hi ngu si kodza gu tshumayela vathu nya vangi guvbindra tepo hi nga ba hi tshumayela khu ndranga ni ndranga.”

18. Ginani hi yedego gu gira ha gu tshangana ni gigaradzo tepo hi zamago gu engedzeya thumo wathu ga Jehovha?

¹⁸ Gira longoloko u bwe u wu landrisa. Wa gu tshangana ni sigaradzo, gombeya ga Jehovha gasi a gu phasa, khavbovbo u vbwetedzeya dzindziya nyo gire esi u nga hunga. (Mav. 3:21) Sonia a thumago kha piyonero avba nya tsawa nya vathu va ganeyago giromani, tigoni ga Europa, wari khuye: “Nyi ngu si gola ngudzu gu lova esi nyi nga hunga gu gira avba nya lidangaliya, khavbovbo nyi li vega wulangani wu wonegago gwadi. Ndrani nya apradhori yangu, nyi vegide dhezenyu nya ruwa mweyo yi kabanago yi khala dziruwa dzimbili. Khu kharato, tepo nyi vbwetago gu hunga gilo nyo gire, nyo khedza dhezenyu yile, khavbovbo nyi pimisa esi: ‘Esi nyi hungago si na nyi yisa hayi?’” Tepo a emisanago ni gigaradzo, Sonia o zama gu gi wona khu ndziya nya yadi. Uye o engedzeya gambe, khuye: “Gigaradzo ni gigaradzo nyi tshanganago nagyo gi nga khala kha nga muru wu tshikago ndziya yangu mwendro gi nga khala kha nga libhulahu li nyi phasago gu tshatuga simbe silo.”

19. Ginani hi yedego gu dzi emiseya gu gira?

¹⁹ Jehovha a ngu hi kategisa khu dzindziya nya dzingi nigu hi nga si kodza gu yeyedza gu bonga khu makategwa yoyo khu gu hi gira esi hi si kodzago gasi gu dhumisa lina laye. (Hebh. 13:15) Si nga gira u mana dzindziya nyo hambanehambane nyo engedzeye khidzo thumo wago ga Jehovha nigu wo gira isoso, Jehovha a na engedzeya gu gu kategisa. Khu kharato, tshigu ni tshigu ‘linga, u wona edzi Jehovha a gu wadi khidzo.’ Khu ndziya yoyo, u na ba u pimedzeya Jesu, a nga khuye: “Guhodza gwangu khu gu gira guhaladza ga wule a nga nyi rumelago ni gu gira mithumo yaye.” — Joh. 4:34.