1, 2. Chuna la wan Salmo 34:8, ¿tuku tlan natlawayaw xlakata nakatsiyaw pi Jehová tlan likatsi?

KALILAKPUWAW pi wi tiku kinkatawaputunan liwat nema nikxni kgalhwananitaw. Tlan nalilakpuwanaw la takgalhwanan akxni naʼakxilhaw, akxni nakgankgawananaw, komo nakgalhskininanaw la tlawakanit o komo nakgalhskinaw tiku kgalhwananita. Pero xlakata nakatsiyaw la takgalhwanan, talakaskin nawayaw.

² Xtachuna uma, nalilakpuwanaw pi Jehová tlan likatsi komo nalikgalhtawakgayaw Biblia chu kilikgalhtawakgakan, nachuna akxni kakgaxmatniyaw amakgapitsin la Jehová kasikulunatlawanit. Pero kajwatiya tlan xlikana nakatsiyaw pi Jehová tlan likatsi komo akinin “naʼakxilhaw” (kalikgalhtawakga Salmo 34:8). Kawiliw akgtum liʼakxilhtit. Kalilakpuwaw pi skujnaniputunaw Jehová xliputum kilhtamaku, pero xlakata namatlaniyaw, talakaskin ni lhuwa tuku nakgalhiyaw. Max makglhuwata likgalhtawakganitaw tuku malaknulh Jesús, pi komo pulana nawiliyaw xTamapakgsin Dios, Jehová nakinkamaxkiyan tuku maklakaskinaw, pero max nikxni akxilhnitaw la kgantaxtunit kkilatamatkan uma tachuwin (Mat. 6:33). Maski chuna, xlakata kanajlayaw tuku malaknulh Jesús, nalakkaxwiliyaw xlakata ni lhuwa tumin nalaktlawayaw chu ni lhuwa kilhtamaku naskujaw, chu kajwatiya nalichuwinanaw Dios. Akxni chuna tlawayaw, liwana akxilhaw la Jehová kinkakuentajtlawayan. Chu chuna “akxilhaw” pi Jehová tlan likatsi.

3. Chuna la wan Salmo 16:1, 2, ¿tiku litamakgtayakgo chuna la Jehová tlan likatsi?

³ Jehová «tlan kalikatsini» putum latamanin, asta maski tiku ni lakgapaskgo (Sal. 145:9; Mat. 5:45). Pero kasikulunatlawa  tiku xlikana paxkikgo chu skujnanikgo xliputum xlatamatkan (kalikgalhtawakga Salmo 16:1, 2). Kaʼakxilhwi makgapitsi tuku tlawanit Jehová kimpalakatakan.

4. ¿La kalimasiyani Jehová pi tlan likatsi tiku tsukukgo talakatsuwinikgo?

⁴ Akxni lilatamayaw tuku katsiniyaw xlakata Jehová, akxilhaw pi tlan kinkakitaxtuniyan kkilatamatkan. Akxni lakgapaswi chu tsukuw paxkiyaw, kinkamakgtayan nalakgpaliyaw kintalakapastaknikan chu chuna la xlikatsiyaw nema xtlawanit pi makgat xtawilaniw (Col. 1:21). Chu akxni tamakamastaniw chu tamunuw, tlakg kinkalimasiyanin pi tlan likatsi akxni kinkamaxkin talakaskin nakgalhiyaw tlan talakapastakni chu xlakata tlan xtalaliw (1 Ped. 3:21).

5. Akxni lichuwinanaw Dios, ¿la kinkalimasiyaniyan Jehová pi tlan likatsi?

⁵ Akxni lichuwinanaw Dios, makglhuwa akxilhaw pi Jehová tlan likatsi. ¿Wix chatum lataman tiku maxanan? Lhuwa xlakskujnin Jehová maxanankgo. Max akxni nina xlakgapasa Jehová nikxni xlakpuwanita nalakgatlakga xmalakcha chatum lataman tiku ni lakgapasa xlakata xlitachuwinanti tuku wan Biblia. Pero la uku, ankgalhin chuna tlawaya. Chu xlakata Jehová lu makgtayanitan, lipaxuwanita chuna la lichuwinana. Chu tanu tanu la makgtayanitan Jehová. Akgtum liʼakxilhtit, makgtayanitan ni lakapala nasitsiya akxni chatum lataman tiku xlitachuwinampat Dios nitlan likatsinin. Na makgtayanitan tlan nalakapastaka texto nema tlan xmakgtayalh tiku xtachuwinampat. Chu makgtayan xlakata ni xtaxlajwani akxni niku lichuwinana Dios latamanin ni kgaxmatputunkgolh (Jer. 20:7-9).

6. ¿La litasiya pi Jehová tlan likatsi xlakata kinkamasiyaninitan la nalichuwinanaw xTachuwin?

⁶ Jehová na kinkalimasiyaninitan pi tlan likatsi xlakata kinkamasiyaninitan la nalichuwinanaw xTachuwin (Juan 6:45). Ktamakxtumit xla itat semana, kinkamasiyanikanan la tlan liwana nakatachuwinanaw latamanin chu kinkamakgpuwantinikanan namaklakaskinaw akxni lichuwinanaw Dios. Akxni lilakpuwanaw namaklakaskinaw tuku xasasti, max xapulana pekuanaw. Pero akxni kalimaklakaskinaw, akxilhaw pi uma lu tlan kitaxtu anta niku lichuwinanaw Dios. Ktamakxtumit chu kʼasambleas na kinkamakgpuwantinikanan atanu la nalichuwinanaw Dios nema nikxni chuna tlawanitaw. Uma tlan nakinkamakgtayayan atanu tuku tlan natlawayaw chu ni watiya tuku lismaninitaw. Komo chuna tlawayaw, maxkiyaw talakaskin Jehová pi nakinkasikulunatlawayan. La uku kalichuwinaw makgapitsi tuku tlan kinkamaxkiyan Jehová akxni lakputsayaw la tlakg tlan naskujnaniyaw, maski tanu tanu la tatekgsaw. Alistalh naʼakxilhaw tuku tlan natlawayaw xlakata tlan namakgantaxtiyaw tuku lakkaxwilinitaw.

7. ¿Tuku tasikulunalin namakglhtinanaw komo naliskujaw xlakata tlakg namaliwakayaw chuna la skujnanimaw Dios?

⁷ Tlakg talakatsuwiniyaw Jehová. Kaʼakxilhwi xliʼakxilhtit chatum kgolotsin tiku wanikan Samuel. * Xla chu xpuskat akxtum skujnanimakgo Dios kColombia. Xlipaxuwakgo chuna la kskujnanimakgo Dios la precursores kxkachikinkan, pero tlakg kskujnaniputunkgo Jehová kʼakgtum congregación niku tlakg xtalakaskin tamakgtay. Xlakata tlan xmakgantaxtikgolh, wi tuku limakgxtakgkgolh. Samuel wan: «Ktlawaw tuku wan Mateo 6:33 chu nialh ktamawaw tuku ni kmaklakaskinaw. Pero tuku tuwa kmakgkatsiw wa nakmakgxtakgaw niku xakwilaw, nema xtlawakanita chuna la tlan xakmakgkatsiw chu nema xtaxokgonita». Anta niku ankgolh skujnanikgo Dios, katsikgolh pi tlan xʼamakgolh lilatamakgo kaj tsinu tumin nixawa la xtlajakgo  xapulana. Samuel wampara: «Kakxilhnitaw la Jehová kinkapulalinan chu kgalhti kioracioneskan. Kmakgkatsiw pi tlan xkinkaʼakxilhan chu pi lu xkinkapaxkiyan chuna la nikxni chuna xakmakgkatsinitaw». ¿Tlan xmaliwaka chuna la skujnanipat Dios? Komo chuna natlawaya, liwana kakatsi pi nalakgtalakatsuwiya Jehová chu pi xla nakuentajtlawayan (Sal. 18:25).

8. ¿Tuku katsiniya wix xlakata tuku titaxtukgolh Iván chu Viktoria?

⁸ Chuna la skujnaniyaw Jehová kinkamakgapaxuwayan. Kalilakpuwaw tuku kinkalitachuwinankgoyan Iván chu Viktoria, akgtum tamakgaxtokgat tiku skujmakgo la precursores anta kKirguistán. Laksakkgolh ni lhuwa tuku nakgalhikgo xlakata tlan namakgtayanankgo niku talakaskin, chuna la akxni tlawakan Pukgalhtawakga. Iván wan: «Xaktlawayaw putum tuku xakmatlaniyaw kʼakgatunu taskujut. Maski xaktlakgwanitaw akxni ksputa kilhtamaku, xakkgalhiyaw takaksni chu tlan xakmakgkatsiyaw, xakkatsiyaw pi liwana xakmaklakaskinitaw kilitliwakgakan xlakata pulana xakwilimaw xTamapakgsin Dios. Kiʼamigoskan chu tuku tlan ktitaxtunitaw na lu kinkamakgapaxuwayan» (Mar. 10:29, 30).

9. ¿Tuku tlawanit chatum tala puskat xlakata namaliwaka chuna la lichuwinan Dios maski titaxtuma tuku tuwa, chu tuku tlan kitaxtunit?

⁹ Tlan nakinkamakgapaxuwayan chuna la skujnanimaw Jehová maski titaxtumaw tuku tuwa. Akgtum liʼakxilhtit, Mirreh chatum tala xalak África Occidental tiku ninita xchixku chu lina kata xliskuja la doctora. Akxni masputulh xtaskujut, precursora litaxtulh. Kgalhi artritis, tajatat nema tlawa pi nakatsani putum xlukut chu akxni an lichuwinan Dios kʼakgatunu chiki kaj akgtum hora chuna tlawa. Pero tlakg lichuwinan Dios anta niku lhuwa titaxtukgo latamanin. Lhuwa tiku kamakgalhtawakge chu lhuwa revisitas kgalhi, chu akxni kamakgalhtawakge amakgapitsin limaklakaskin teléfono. ¿Tuku makgpuwantinilh tlakg naskujnaniputun Jehová? Xla wan: «Lu kpaxki Jehová chu Jesucristo. Ankgalhin kskini Jehová pi kakimakgtayalh naktlawa putum tuku kmatlani xpalakata» (Mat. 22:36, 37).

10. Chuna la wan 1 Pedro 5:10, ¿tuku kamaxki Jehová tiku liskujkgo xlakata tlakg naskujnanikgo?

¹⁰ Jehová atanu la kinkamasiyaniparayan. Kenny, chatum precursor tiku skujnanima Dios kkachikin Mauricio, akxilhli pi uma xlikana. Akxni katsilh tuku xaxlikana, makgxtakgli universidad, tamunulh chu tsukulh skujnani Jehová putum kilhtamaku. Xla wan: «Kliskuja xlakata naklitaxtu la palakachuwina Isaías, tiku wa: «¡Unu kwi! Akit kakimalakgacha» (Is. 6:8). Kenny makgtayananit lakalhuwa niku tlawakanit Pukgalhtawakga chu na makgtayananit namakgmatitaxti likgalhtawakga kxtachuwin. Xla wan: «Kimasiyanika la xaktlawalh kintaskujut». Pero ni kajwatiya katsinilh la natlawa xtaskujut. Xla wan: «Kʼakgatekgsli tuku nila xaktlawa chu kkatsilh tuku tayat xtalakaskin xakkgalhilh xlakata tlakg tlan xakskujnanilh Jehová» (kalikgalhtawakga 1 Pedro 5:10). ¿Tlan xlilakpuwanti la tatekgsa chu xʼakxilhti komo tlan xmasiyanika xlakata tlakg tlan naskujnaniya Jehová?

11. ¿Tuku liskujkgolh makgapitsi natalan lakpuskatin xalak Corea del Sur xlakata nalichuwinankgo Dios, chu tuku tlan kitaxtulh? (Kaʼakxilhti xmakni revista).

¹¹ Asta tiku akglhuwata kata la xtatayananin Jehová litaxtukgo litamakgtayakgo chuna la Jehová kamasiyani akxni litsakgsakgo atanu la naskujnanikgo. Akxni xʼanan pandemia xla COVID-19, lakgkgolotsin xla akgtum congregación xalak Corea del Sur tsokgkgolh: «Makgapitsi natalan tiku xapulana xlakpuwankgo pi nila xmakgtayanankgo akxni xlichuwinankan Dios xlakata xtatatlakgo, la uku lichuwinankgo Dios kvideoconferencia. Kgalhtutu natalan lakpuskatin tiku kgalhikgo liwaka 80 kata, katsinikgolh namaklakaskinkgo uma tuku xasasti chu  la uku lichuwinankgo Dios atsinu ni putum semana» (Sal. 92:14, 15). ¿Tlan xmaliwaka chuna la skujnaniya Jehová chu tlakg xʼakxilhti chuna la tlan likatsi? Anankgo makgapitsi tuku tlan natlawaya xlakata namakgantaxtiya.

12. ¿Tuku kamalaknuni Jehová tiku lipawankgo?

¹² Kakatsini nalipawana Jehová. Komo nalipawanaw Jehová chu namaxkiyaw tuku tlakg tlan kgalhiyaw, xla kinkamalaknuniyan pi nakinkamaxkiyan lhuwa tasikulunalin (Mal. 3:10). Chatum tala puskat xalak Colombia tiku wanikan Fabiola akxilhli la Jehová makgantaxti uma xtamalaknun. Xla precursora xlitaxtuputun akxni nina makgas xtamununit, pero xchixku chu kgalhtutu xlakkamanan xlitamakgtayakgo tuku xla xtlaja. Wa xlakata, akxni malakgatsamalh akgtum solicitud xlakata tlan xtajubilarlilh, tasaskinilh Jehová pi xmakgtayalh. Xla wan: «Uma lin lhuwa kilhtamaku, pero kaj akgtum papaʼ titaxtulh lakkaxlalh kisolicitud. Uma xtachuna akgtum milagro». Akgtiy papaʼ alistalh, tsukulh skuja la precursora. La uku kgalhi liwaka 70 kata chu lina liwaka 20 kata chuna la skujma la precursora. Lata uma kilhtamaku, kamakgtayanit kgalhtsayan latamanin xlakata tlan natamunukgo. Xla wan: «Min kilhtamaku lu ktlakgwan, pero Jehová ankgalhin kimakgtaya chuntiya nakskujnani la precursora».

13, 14. ¿Tuku liʼakxilhtit tlan nakinkamakgtayayan nalipawanaw Jehová chu nalakputsayaw la tlan atanu nalakskujnaniyaw?

¹³ Kalitamakgtaya xliʼakxilhtitkan tiku lipawankgolh Jehová. Biblia limin lhuwa liʼakxilhtit  xlakata latamanin tiku lu skujnanikgolh Dios. Makglhuwa, xlakan wi tuku pulana tlawakgolh akxni Jehová nina xkasikulunatlawa. Akgtum liʼakxilhtit, Dios sikulunatlawalh Abrahán akxni xla taxtulh kxkachikin «maski ni xkatsi niku xʼama» (Heb. 11:8). Chu Jacob, makglhtinalh akgtum lu xlakaskinka tasikulunalin akxni xtalachipanita chatum ángel (Gén. 32:24-30). Chu akxni kachikin Israel xʼama tanu kTiyat nema xKawanikanit pi Nakamaxkikan, kachikin kajwatiya tlan patakutli kgalhtuchokgo Jordán akxni sacerdotes tajukgolh kchuchut (Jos. 3:14-16).

¹⁴ Na tlan lhuwa tuku nakatsiniya xlakata xliʼakxilhtitkan xtatayananin Jehová xala uku tiku lipawankgonit chu lakputsakgonit la tlakg lhuwa nalakskujnanikgo Jehová. Akgtum liʼakxilhtit, chatum tala tiku wanikan Payton chu xpuskat, Diana, lu xlakgatikgo xlikgalhtawakgakgo tuku titaxtukgonit makgapitsi natalan tiku maliwakakgonit chuna la skujnanikgo Jehová, anta kserie «Se ofrecieron para ayudar». * Xla wan: «Akxni xakkalikgalhtawakgayaw xakmakgkatsiyaw chuna la komo xakkakxilhmaw tiku lu lipaxuwa akgtum liwat. Akxni tlakg makglhuwa xakkakxilhaw, tlakg xakkakxilhputunaw la Jehová tlan likatsi». Titaxtulh kilhtamaku, uma tamakgaxtokgat ankgolh makgtayanankgo niku xtalakaskin tamakgtay. ¿Kalikgalhtawakanita artículos xla uma serie? ¿Chu kaʼakxilhnita videos Predicación en lugares apartados: Australia chu Predicación en lugares apartados: Irlanda, nema tatekgsa kjw.org? Putum uma tlan namakgtayayan naʼakxilha la tlan namaliwakaya chuna la skujnaniya Dios.

15. ¿La tlan nakinkamakgtayayan nakatalalinaw tiku pulana wilikgo xTamapakgsin Dios?

¹⁵ Kakatalalipi tiku namakgpuwantinikgoyan natlawaya tuku tlan. Tlakg ni tuwa katikgalhwanaw akgtum xasasti liwat komo akxtum nakatalayaw latamanin tiku lakgatikgo uma liwat. Xtachuna uma, komo nalimaxtuyaw kilhtamaku akxtum nakatatawilayaw tiku putum kilhtamaku skujnanimakgo Jehová, uma nakinkamakgtayayan tlakg ni tuwa nalakputsayaw la tlakg nalakskujnaniyaw Dios. Wa uma tuku titaxtukgolh Kent chu Verónica. Xla wan: «Kiʼamigoskan chu kifamiliajkan xkinkamakgpuwantinikgoyan xlakata xaklakputsaw la atanu xaklakskujnaniw Dios. Kakxilhwi pi xlakata akxtum xakkatatawilayaw tiku pulana xwilikgo xTamapakgsin Dios, xkinkamakgpuwantiniyan xlakata xakkatsiniw tuku xasasti». La uku, xchatiykan skujmakgo la precursores especiales anta kSerbia.

16. Chuna la wan Lucas 12:16-21, ¿tuku xlakata xatapaxuwan wi tuku nalimakgxtakgaw?

¹⁶ Xatapaxuwan wi tuku kalimakgxtakgti xlakata Jehová. Xlakata namakgapaxuwayaw Jehová, ni talakaskin nalakgmakganaw putum tuku tlan kgalhiyaw (Ecl. 5:19, 20). Pero, komo ni xlakpuwaw tlakg lhuwa naskujnaniyaw Dios kaj xlakata nitu limakgxtakgputunaw, xlikatsiw chuna la chixku tiku lichuwinalh Jesús tiku lhuwa tuku xkgalhi kxlatamat pero nialh lakapastakli Dios (kalikgalhtawakga Lucas 12:16-21). Chatum tala tiku wanikan Christian, tiku lama kFrancia, wan: «Ni xakmakamaxkima Jehová chu kifamilia tlakg xatlan kinkilhtamaku chu kilitliwakga». Xla chu xpuskat laksakkgolh precursores nalitaxtukgo, pero xlakata tlan chuna xtlawakgolh makgxtakgkgolh xtaskujutkan. Xlakata tlan xkgalhikgolh tuku xmaklakaskinkgolh, wilikgolh akgtum aktsu negocio niku kstakgo tuku xlikaxakakan chu katsinikgolh nalilatamakgo maski ni lhuwa tuku xkgalhikgo. ¿Tuku kitaxtulh xlakata tuku tlawakgolh? Xla wan: «Tlakg klipaxuwayaw chuna la klichuwinanaw Dios chu akxni kakxilhaw  la tiku kkamakgalhtawakgemaw chu tiku kkalakgapaxiʼalhnanaw tlakg katsinimakgolh xlakata Jehová».

17. ¿Tuku xlakata makgapitsin ni lakputsakgo la tlan atanu nalakskujnanikgo Dios?

¹⁷ Kaliskujti xlakata atanu la nalakskujnaniya Dios (Hech. 17:16, 17; 20:20, 21). Chatum precursora tiku wanikan Shirley tiku lama kʼEstados Unidos, lakputsalh la tlan atanu nalichuwinan Dios xlakata analh pandemia xla COVID-19. Xapulana ni xlichuwinamputun Dios kteléfono. Pero, akxni superintendente de circuito kalakgapaxialhnalh, masiyanika la tlan natlawa. Lata ama kilhtamaku ankgalhin tsukulh lichuwinan Dios kteléfono. Xla wan: «Xapulana lu xakpekuan, pero la uku lu klakgati klichuwinan Dios kteléfono. Tlakg lhuwa kkatachuwinanaw latamanin nixawa akxni xaklichuwinanaw Dios kʼakgatunu chiki».

18. Akxni tuwa makgkatsiyaw namaliwakayaw chuna la skujnaniyaw Dios, ¿tuku tlan nakinkamakgtayayan?

¹⁸ Kalakkaxwili tuku makgantaxtiputuna chu kaliskujti nalakgchipina. Akxni titaxtuyaw taʼakglhuwit, tlawaniyaw oración Jehová chu lilakpuwanaw la tlan natayaniyaw uma tuku titaxtumaw (Prov. 3:21). Sonia, chatum precursora tiku makgtayanama kʼakgtum grupo ktachuwin romaní anta kʼEuropa, wan: «Lu klakgati klhkawili tuku klakgchamputun chu kwili niku tlan nakakxilha. Niku wi kiʼespejo, kmawakanit akgtum dibujo niku tasiya la takgpitsikgonit tiji. Akxni wi tuku klaksakputun, kakxilha dibujo chu klilakpuwan niku nakilin tuku klaksakputun». Chu, akxni Sonia kgalhi taʼakglhuwit, wa lilakpuwan tuku namakgtaya. Xla wan: «Pulakatunu tuku ktitaxtu xtachuna la akgtum patsaps nema kimalakgachokgo xlakata ni nakmakgantaxti tuku klakgchamputun o xtachuna la akgtum puente nema kimakgtaya xlakata tlan nakmakgantaxti. Tuku klakpuwan wa tuku kimakgtaya».

19. ¿La tlan nalimasiyayaw pi paxtikatsiniyaw putum tuku tlan kinkamaxkinitan Jehová?

¹⁹ Pulaklhuwa la kinkasikulunatlawayan Jehová. Tlan nalimasiyaniyaw pi paxtikatsiniyaw komo natlawayaw putum tuku matlaniyaw xlakata namalankiyaw (Heb. 13:15). Uma tlan chuna natlawayaw komo nalakputsayaw la tlan namaliwakayaw chuna la lichuwinanaw Dios. Komo chuna natlawayaw, Jehová tlakg lhuwa nakinkasikulunatlawayan. Wa xlakata, putum kilhtamaku kalakputsaw chu kaʼakxilhwi pi Jehová tlan likatsi. Komo chuna natlawayaw nalikatsiyaw chuna la Jesús, tiku wa: «Kiliwat wa nakmakgantaxti xtalakaskin tiku kimalakgachanit chu nakmasputu xtaskujut» (Juan 4:34).