1-2. Hi ku ya hi Pisalema 34:8, hi nga swi vona njhani leswaku Yehovha hi lonene?

A HI NGE u nyikiwe swakudya leswi u nga si tshamaka u swi dya. Leswaku u tiva swakudya sweswo u fanele u swi languta, u swi nun’hwetela ni ku vutisa van’wana hi swona. Kambe ku vona loko u swi tsakela u fanele u tiringela swona hi wexe.

² Hi nga dyondza leswaku Yehovha hi lonene hi ku hlaya Bibele, tibuku ta hina swin’we ni ku yingisela van’wana loko va vulavula hi mikateko leyi Yehovha a va endleleke yona. Kambe leswaku hi vona ku Yehovha hi lonene, hi fanele hi ‘nantswa’ hi hexe. (Hlaya Pisalema 34:8.) A hi kambisiseni ndlela leyi hi nga swi endlisaka xiswona. Loko u lava ku va eka ntirho wa nkarhi hinkwawo, swi nga ha lava u titsona swo karhi leswaku u swi fikelela. Swi nga endleka u xi tiva kahle xitshembiso xa Yesu lexi vulaka leswaku loko u rhangisa Mfumo ku sungula, leswin’wana Yehovha u ta ku engetelela swona kambe a wu si swi vona swi hetiseka eka wena. (Mat. 6:33) Hambiswiritano, leswi hi nga ni ripfumelo eka xitshembiso xa Yesu, hi hunguta leswi hi swi xavaka, hi hunguta nkarhi lowu hi wu hetaka entirhweni wo tihanyisa ivi hi tirha hi matimba entirhweni wo chumayela. Loko hi endla tano, hi tivonela hi ya hina leswaku hakunene Yehovha wa hi khathalela. Sweswo swi hi endla hi ‘nantswa’ hi hexe hi vona leswaku Yehovha hi lonene.

3. Hi ku ya hi Pisalema 16:1, 2, i vamani lava kumaka vunene bya Yehovha?

³ Yehovha u endlela “hinkwavo leswinene” ku katsa ni lava nga n’wi tirheliki. (Ps. 145:9; Mat. 5:45) Kambe lava rhandzaka Yehovha  ni ku n’wi tirhela hi mbilu hinkwayo, hi vona va kumaka mikateko yo tala. (Hlaya Pisalema 16:1, 2.) A hi vone tindlela tin’wana leti hi nga vuyeriwaka hatona hi vunene bya Yehovha.

4. Yehovha u va komba njhani vunene vanhu lava tshinelaka eka yena?

⁴ Mikarhi hinkwayo loko hi tirhisa leswi hi dyondzisiwaka swona hi Yehovha, swi vuyerisa hina. Nakambe loko hi dyondza hi yena hi tlhela hi n’wi rhandza, wa hi pfuna leswaku hi tshika mianakanyo ni mahanyelo lawa a ma hi endla hi nga vi na vuxaka na yena. (Kol. 1:21) Loko hi tinyiketela eka Yehovha ivi hi khuvuriwa, hi kona laha hi sungulaka ku vona vunene byakwe loko a hi nyika ripfalo leri baseke ni ku hi koka leswaku hi va vanghana vakwe.—1 Pet. 3:21.

5. Hi nga byi vona njhani vunene bya Yehovha?

⁵ Hi sungula ku vona vunene bya Yehovha loko hi ri entirhweni wo chumayela. Xana u ni tingana? Malandza ya Yehovha yo tala ma tano. Kumbexana loko u nga se va Mbhoni ya Yehovha, a wu nga swi ehleketi ku u nga tikuma u gongondze ekaya ra munhu loyi u nga n’wi tiviki leswaku u ta n’wi chumayela. Kambe sweswi se u swi endla nkarhi ni nkarhi. Lexi tsakisaka, Yehovha u ku pfunile leswaku u kota ku tiphina hi ntirho wo chumayela! Hikwalaho, u kote ku vona nseketelo wa Yehovha hi tindlela to tala. U ku pfunile leswaku u va ni ku rhula loko u kanetiwa. U tlhele a ku pfuna u tsundzuka tsalwa leri u nga ri tirhisaka loko u vulavula ni munhu loyi a tsakelaka. Nakambe u ku nyike matimba yo ya emahlweni u chumayela hambiloko vanhu va nga tsakeli.​—Yer. 20:7-9.

6. I tindlela tihi leti Yehovha a hi letelaka hatona leswaku a kombisa vunene byakwe?

⁶ Yehovha u tlhele a hi komba vunene byakwe hi ku hi dyondzisa tindlela to chumayela. (Yoh. 6:45) Etinhlengeletanweni ta vandlha ta le xikarhi ka vhiki, hi vona mimbulavurisano leyi hi khutaziwaka ku yi tirhisa entirhweni wo chumayela. Eku sunguleni swi nga ha hi tikela ku tirhisa tindlela letintshwa to chumayela kambe loko hi ti tirhisa, hi kuma leswaku vanhu vo tala va ti tsakela. Nakambe loko hi ri etinhlengeletanweni ta vandlha ni ta xifundzha, hi khutaziwa ku tirhisa tindlela to hambanahambana to chumayela. Swi nga endleka tindlela tin’wana hi nga ti tsakeli kambe loko hi ti tirhisa, Yehovha u ta hi katekisa. A hi kambisiseni mikateko yin’wana leyi hi nga yi kumaka loko hi tirhisa tindlela letintshwa to chumayela leswaku hi nyika Yehovha hinkwaswo leswi hi nga swi kotaka hambiloko swiyimo swi nga pfumeli. Endzhaku hi ta tlhela hi kambisisa tindlela tin’wana leti hi nga ndlandlamuxaka ntirho wa hina wa nsimu hatona.

7. Hi yihi mikateko leyi hi nga ta yi kuma loko hi ndlandlamuxa ntirho wa hina wo chumayela?

⁷Hi ya hi tshinela eka Yehovha. Xiya xikombiso xa makwerhu Samuel, * loyi a tirhelaka Yehovha a ri ni nsati wakwe eColombia. Vatekani lava a va tiphina hi ku phayona evandlheni ra ka vona kambe a va lava ku ndlandlamuxa ntirho wa vona hi ku pfuneta evandlheni leri ku nga ni xilaveko lexikulu. Leswaku va kota ku fikelela sweswo, a va fanele va titsona swo karhi. Samuel u ri: “Hi yingise xitsundzuxo lexi nga eka Matewu 6:33 ivi hi tshika ku xava swilo leswi nga bohiki. Kambe lexi a xi vava ngopfu a ku ri ku famba hi siya yindlu ya hina. Ndlela leyi a yi akiwe hayona a hi yi rhandza swinene naswona a hi nga ri na xikweleti xa yona.” Loko se va rhurhele evandlheni lerintshwa, vatekani lava a va nga boheki ku tirhisa mali yo tala ku fana niloko va ha ri ekaya ra vona. Samuel u engeta a ku: “Hi kote ku vona ndlela leyi Yehovha a a hi kongomisa hayona ni ku hlamula swikhongelo swa  hina. Nakambe hi swi vonile leswaku Yehovha wa tsaka hi hina naswona wa hi rhandza.” Xana swiyimo swa wena swa ku pfumelela leswaku u ndlandlamuxa ntirho wa wena wo chumayela? Loko swi ri tano, u nga tiyiseka leswaku u ta tshinela eka Yehovha naswona u ta ku khathalela.—Ps. 18:25.

8. U dyondza yini eka leswi vuriweke hi Ivan na Viktoria?

⁸Ha tiphina entirhweni wa hina. Xiya leswi vuriwaka hi Ivan na Viktoria, vatekani lava a va tirhela Yehovha va ri eKyrgyzstan. Va titsone swo tala leswaku va kota ku pfuneta eka mitirho yin’wana ni yin’wana ku katsa ni mitirho yo aka tiholo ta tinhlengeletano. Ivan u ri: “A hi tirha hi matimba entirhweni wun’wana ni wun’wana lowu a hi nyikiwa wona. Hambileswi a ri pela hi lo lakahlaa, hi ve ni ku rhula ni ku eneriseka hi ku tiva leswaku hi tirhise matimba ya hina entirhweni wa Yehovha. Hi kume ntsako lowukulu hileswi hi veke ni vanghana ni hikwalaho ka mitokoto yo tala yo tsakisa.”​—Mar. 10:29, 30.

9. I yini leswi makwerhu waxisati loyi a ri ni mitlhontlho a swi endleke leswaku a ndlandlamuxa ntirho wakwe wo chumayela naswona vuyelo byi ve byihi?

⁹ Hi kuma ntsako entirhweni wa Yehovha hambiloko hi langutana ni mitlhontlho. Hi xikombiso, makwerhu waxisati Mirreh loyi a nga noni naswona a tshamaka evupeladyambu bya Afrika, u hatle a huma penceni entirhweni wakwe wa vudokodela hileswi a a lava ku phayona. U ni vuvabyi bya arthritis naswona u kota ku tirha awara yin’we ntsena loko a chumayela hi yindlu ni yindlu. Kambe wa swi kota ku heta tiawara to tala a ri karhi a chumayela etindhawini ta mani na mani. U ni maendzo yo tala yo vuyela ni vanhu vo tala lava a dyondzaka na vona Bibele naswona van’wana va vona u dyondza na vona hi foni. I yini lexi khutazeke Mirreh leswaku a endla leswi engetelekeke entirhweni wa Yehovha? U ri: “Ndzi rhandza Yehovha na Yesu Kreste hi mbilu ya mina hinkwayo. Nakambe ndzi tshamela ku khongela eka Yehovha leswaku a ndzi pfuna ndzi tirha hi matimba entirhweni wakwe.”​—Mat. 22:36, 37.

10. Hilaha swi hlamuseriweke hakona eka 1 Petro 5:10, lava endlaka leswi engetelekeke entirhweni wa Yehovha va vuyeriwa hi yini?

¹⁰Hi kuma ndzetelo lowu humaka eka Yehovha. Kenny loyi a phayonaka eMauritius, u pfumelelana ni mhaka leyi. Loko a dyondza ntiyiso, u tshike tidyondzo ta le yunivhesiti kutani a khuvuriwa naswona u ve eka ntirho wa nkarhi hinkwawo. U ri: “Ndzi ma tekele enhlokweni marito ya muprofeta Esaya loko a ku: ‘Hi mina loyi! Ndzi rhume!’” (Esa. 6:8) Kenny u tirhe hi matimba eku akeni ka miako ya nhlangano naswona u tlhele a pfuneta ni le ku hundzuluxeleni ka tibuku leti vulavulaka hi Bibele hi ririmi rakwe. U ri: “Ndzi kume ndzetelo lowu ndzi pfuneke ndzi va ni vuswikoti byo yi tirha kahle mitirho ya mina.” Kambe u dyondze swo tala ku tlula ku yi tirha kahle mitirho yakwe. U engetela a ku: “Ndzi kote ku tiva nileswi a ndzi tsandzeka ku swi endla ni vumunhu lebyi a ndzi fanele ndzi va na byona tanihi nandza wa Yehovha.” (Hlaya 1 Petro 5:10.) Kumbexana na wena u nga ringeta ku cinca swiyimo swa wena loko swi ku pfumelela leswaku Yehovha a ta ku letela hi tindlela leti engetelekeke entirhweni wakwe.

11. I yini leswi vamakwerhu vaxisati va le South Korea va swi endleke leswaku va va kona ensin’wini naswona va vuyeriwe njhani? (Vona xifaniso lexi nga eka xifunengeto.)

¹¹ Hambi ku ri Timbhoni leti nga ni ntokoto ti nga vuyeriwa hi ndzetelo lowu ti nga ta wu kuma loko ti ringeta tindlela letintshwa to tirhela Yehovha. Hi nkarhi lowu wa ntungu wa COVID-19, vakulu va le vandlheni ra le South Korea va tsale va ku: “Vo tala lava a va ehleketa leswaku a va nge swi koti ku chumayela hikwalaho  ka swiphiqo swa rihanyo, sweswi va swi kota ku chumayela hi ku fonela vanhu hi ku tirhisa tivhidiyo. Vamakwerhu vanharhu vaxisati lava nga kwalomu ka malembe ya va-80, va dyondze matirhiselo lamantshwa ya thekinoloji leswaku va ta chumayela hi wona siku ni siku.” (Ps. 92:14, 15) Xana u nga swi tsakela ku ndlandlamuxa ntirho wa wena ivi u nantswa vunene bya Yehovha? Xiya leswi u nga swi endlaka leswaku u fikelela sweswo.

12. Yehovha u va tshembisa yini lava titshegaka hi yena?

¹²Titshege hi Yehovha. U hi tshembisa mikateko yo tala loko hi n’wi tshemba hi tlhela hi n’wi tirhela hi timbilu ta hina hinkwato. (Mal. 3:10) Makwerhu waxisati Fabiola wa le Colombia, u swi vonile loko Yehovha a endla leswi a swi tshembiseke. Loko a ha ku khuvuriwa a a lava ku va phayona ra nkarhi hinkwawo. Kambe nuna wakwe ni vana vakwe vanharhu a va tshembe muholo wakwe. Loko a lava ku tshika ntirho, u khongele eka Yehovha hi mbilu hinkwayo leswaku a n’wi pfuna. U ri: “Hi ntolovelo swi teka nkarhi wo tala ku va munhu a kuma mali ya penceni kambe mina ndzi sungule ku yi kuma endzhaku ka n’hweti. A ndzi twa onge ndzo lorha!” Endzhaku ka tin’hweti timbirhi u sungule ku phayona. Sweswi u ni malembe ya kwalomu ka va-70 naswona u ni malembe yo tlula 20 a ri karhi a phayona. Hi nkarhi wolowo u pfune vanhu va nhungu leswaku va khuvuriwa. U ri: “Hambileswi mikarhi yin’wana ndzi titwaka ndzi nga ri na matimba, Yehovha wa ndzi pfuna leswaku ndzi ya emahlweni ndzi phayona.”

13-14. Hi swihi swikombiso leswi nga hi pfunaka hi tshemba Yehovha ni ku ya emahlweni hi n’wi tirhela?

 ¹³Dyondza eka swikombiso swa vanhu lava a va titshega hi Yehovha. Bibele yi ni swikombiso swo tala swa malandza ya Yehovha lama n’wi tirheleke hi timbilu ta wona hinkwato. Mikarhi yo tala malandza wolawo a ma fanele ma endla swo karhi leswaku ma ta kuma mikateko ya Yehovha. Hi xikombiso, Yehovha u katekise Abrahama endzhaku ka loko a sukele kaya rakwe “hambileswi a a nga ku tivi lomu a a ya kona.” (Hev. 11:8) Yehovha u katekise Yakobo endzhaku ka loko a tshwimbirisane ni ntsumi. (Gen. 32:24-30) Loko Vaisrayele va ri ekusuhi ni ku nghena etikweni leri tshembisiweke, va kote ku tsemakanya nambu wa Yordani endzhaku ka loko Vaprista va pete milenge ya vona ematini.​—Yox. 3:14-16.

¹⁴ Na wena u nga dyondza swo tala eka vamakwerhu va manguva lawa lava titshegeke hi Yehovha leswaku va ya emahlweni va n’wi tirhela. Hi xikombiso, makwerhu loyi a vuriwaka Payton ni nsati wakwe Diana va tiphina hi ku hlaya mintokoto ya vamakwerhu lava ndlandlamuxeke ntirho wa vona eka Yehovha, yo tanihi leyi nga eka ntlhandlamano wa swihloko leswi nge “Va Tinyiketele Hi Ku Tirhandzela.” * Payton u ri: “Loko hi hlaya hi mitokoto ya vona, a swi fana niloko hi langutisa munhu loyi a nga eku tiphineni hi swakudya. Loko hi ya hi n’wi langutisa, a hi ya hi navela ku ‘nantswa hi vona leswaku Yehovha hi lonene.’” Hi ku famba ka nkarhi Payton na Diana va rhurhele laha ku nga ni xilaveko lexikulu. Xana u tshame u hlaya tinhlokomhaka leti to tlhandlamana? Nakambe xana u yi vonile vhidiyo leyi nge, Ku Chumayela eTindhawini Leti Nga Ekule Swinene Le Australia ni leyi nge Witnessing in Isolated Territory​—Ireland leti kumekaka eka jw.org? Swihloko ni tivhidiyo leti swi ta ku pfuna leswaku u kuma tindlela leti u nga ndlandlamuxaka ntirho wa wena hatona.

15. Vanghana lavanene va nga hi pfuna njhani?

¹⁵Hlawula vanghana lavanene. Loko ku ri ni swakudya swo karhi leswi hi nga si tshamaka hi swi dya, swa olova ku swi ringeta loko ku ri ni lava swi rhandzaka. Hilaha ku fanaka, loko hi tolovelana ni vanhu lava rhangisaka ntirho wa Yehovha na hina hi ta lava tindlela to ndlandlamuxa ntirho wa hina. Vatekani lava vuriwaka Kent na Veronica va pfumelelana ni mhaka leyi. Kent u ri: “Vanghana ni maxaka ya hina va hi khutaze ku tirhisa tindlela to hambanahambana to tirhela Yehovha. Hi xiye leswaku ku endla xinghana ni vanhu lava rhangisaka Mfumo ku sungula, swi hi nyika matimba yo ringeta tindlela letintshwa.” Sweswi hi vulavulaka, Kent na Veronica i maphayona yo hlawuleka eSerbia.

16. Hilaha xifaniso xa Yesu lexi nga eka Luka 12:16-21 xi vulaka hakona, hikwalahokayini hi fanele hi tiyimisela ku titsona swo karhi?

¹⁶Titsone swo karhi leswaku u tirhela Yehovha. A hi boheki ku tshika swilo hinkwaswo leswaku hi tsakisa Yehovha. (Ekl. 5:19, 20) Hambiswiritano, loko hi tshika ku endla leswi engetelekeke entirhweni wa Yehovha hikwalaho ko chava ku lahlekeriwa hi leswi hi swi rhandzaka, hi ta va hi endla xihoxo xo fana ni xa wanuna loyi Yesu a vulavuleke ha yena eka xifaniso xakwe loyi a rhangiseke rifuwo ku tlula Xikwembu. (Hlaya Luka 12:16-21.) Makwerhu loyi a vuriwaka Christian wa le Furwa, u ri: “A ndzi nga tikarhati naswona a ndzi nga tinyiki nkarhi wo va ni ndyangu wa mina ni wo tirhela Yehovha.” Yena ni nsati wakwe va endle xiboho xo phayona. Kambe leswaku va kota ku endla tano, a va fanele va tshika mitirho ya vona. Leswaku va kota ku tikhathalela, va sungule xibindzwana xa vona xo basisa naswona va dyondze ku hanya hi mali leyitsongo. Xana sweswo  swi hundzuke nyuku wa mbyana? Christian u ri: “Ha tiphina hi ntirho wo chumayela naswona ha tsaka loko hi vona lava hi dyondzaka na vona Bibele va tiva Yehovha.”

17. I yini lexi nga hi sivelaka ku ringeta tindlela letintshwa to chumayela?

¹⁷Tiyimisele ku ringeta tindlela tin’wana letintshwa to tirhela Yehovha. (Mit. 17:16, 17; 20:20, 21) Shirley phayona ra le United States, u boheke ku cinca ndlela leyi a a chumayela hayona hikwalaho ka ntungu wa COVID-19. Eku sunguleni a a kanakana ku chumayela hi foni. Endzhaku ko kuma ndzetelo lowu humaka eka mulanguteri wa muganga loko a va endzerile, u sungule ku chumayela hi foni mikarhi hinkwayo. U ri: “Eku sunguleni a swi vonaka swi chavisa kambe sweswi ndza tiphina swinene. Hi kuma vanhu vo tala ku tlula lava a hi va kuma loko hi chumayela hi yindlu ni yindlu!”

18. I yini lexi nga hi pfunaka ku hlula mithontlho loko hi ri karhi hi ndlandlamuxa ntirho wa hina wo chumayela?

¹⁸Kunguhata leswi u lavaka ku swi endla. Loko hi langutana ni mitlhontlho, ha khongela hi kombela ku pfuniwa naswona hi lava tindlela leti hi nga yi hlulaka hayona. (Swiv. 3:21) Sonia loyi a nga phayona eka ntlawa wa ririmi ra Xirhoma eYuropa, u ri: “Ndzi tsala leswi ndzi swi kunguhateke ephepheni ivi ndzi swi veka laha ndzi kotaka ku swi vona. Etafuleni ra mina ku ni xifaniso lexi kombaka tindlela timbirhi leti nga yiki endhawini yin’we. Loko ndzi fanele ndzi teka xiboho xo karhi, ndzi langutisa xifaniso xexo ivi ndzi ehleketa hileswaku xiboho xa mina xi ta ndzi yisa kwihi.” Sonia u tshama a tsakile hambiloko a langutana ni swiphiqo. Nakambe u ri: “Xiyimo xin’wana ni xin’wana lexintshwa lexi ndzi langutanaka na xona, xi nga va khumbi leri ndzi sivelaka ku ya emahlweni kumbe buloho leri ndzi pfunaka ku hundza eka xona kambe swi ta ya hileswaku ndzi langutana njhani na xona.”

19. Hi fanele hi tiyimisela ku endla yini?

¹⁹ Yehovha u hi katekisa hi tindlela to tala. Hi nga kombisa ndlela leyi hi yi tlangelaka hayona mikateko yoleyo hi ku endla hinkwaswo leswi hi nga swi kotaka leswaku hi n’wi dzunisa. (Hev. 13:15) Sweswo swi nga katsa ku ndlandlamuxa ntirho wa hina hi ku tirhisa tindlela letintshwa to chumayela, leswi nga ta endla leswaku hi kuma mikateko yo tala. Onge siku ni siku hi nga lava tindlela letintshwa to ‘nantswa hi vona leswaku Yehovha hi lonene.’ Hikwalaho, hi ta fana na Yesu loyi a nga te: “Swakudya swa mina i ku endla ku rhandza ka loyi a ndzi rhumeke ni ku heta ntirho wakwe.”—Yoh. 4:34.