1-2. Hi ku ya hi Tipisalema 34:8, hi fanele hi yentxa yini leswaku hi vona swaku Yehovha i munene?

U TITWISA ku yini loko munhu a ku nyika swakudla swaku a wu se tshama u swi dla? Swi nga yentxeka swi ku tsakisa hi ku swi langusa, hi ku swi nun’whetela, u swi khoma, hi ku tiva swaku swi swekisiwe ku yini kumbe u vutisa van’wana hi swakudla leswo. Kambe leswi nga ku yentxaka u swi rhandza hi ku helela hi loko u swi ringile.

² I ntiyiso swaku hi nga tiva swaku Yehovha i munene loko hi lerha Bibele, hi tlhela hi lerha mabuku lawa ma vulavulaka hi ndlela leyi Yehovha a nga va katekisa hi yona vamakwerhu. Kambe leswaku hi swi twisisa kahle swaku Yehovha i munene, swi lava hi ‘ringa’ a wunene la yena. (Lerha Tipisalema 34:8.) Kambe hi nga swi yentxisa ku yini leswo? Hi xikombiso, a hi nge u lava ku nghenela ntirho wa nkama hinkwawu, kambe leswaku u yentxa leswo u fanele u vevukisa a wutomi la wena. Swi nga yentxeka u tshame u lerha hi marito ya Yesu loko a vula swaku Yehovha a ta hi nyika hinkaswu leswi hi swi lavaka loko hi rhangisa Mfumu wa yena. Kambe swi nga yentxeka u nge se tshama u vona marito lawa ma hetiseka ka wena. (Mat. 6:33) Hambileswo, loko hi va ni lipfumelo ka marito ya Yesu, hi ta vevukisa wutomi la hina, hi pumba nkama lowu hi wu hetaka ka ntirho wa ku tihanyisa leswaku hi yengesela ntirho wa hina wa ku chumayela. Loko hi yentxa leswo, hi ta swi twisisa swaku Yehovha a tinyimisele ku hi hlayisa naswona hi ta va na hi ringa hi hoxe leswaku hi vona swaku Yehovha i munene.

3. Hi ku ya hi Tipisalema 16:1, 2, i vamani lava Yehovha a va katekisaka?

³ Yehovha i “munene ka hinkwavu,” hambi hi ka lava va kalaka va nga mu tivi. (Pis. 145:9; Mat. 5:45) Kambe Yehovha a va katekisa hintamu hinkwavu lava mu tirhelaka hi mbilu ya vona hinkwayu. (Lerha Tipisalema 16:1, 2.) A hi djondzeni hi swilo swa swinene leswi Yehovha a hi yentxelaka swona.

4. Yehovha a va nyika yini lava lavaka ku va vanghanu va yena?

⁴ Nkama lowu hi tirhisaka leswi Yehovha a hi djondzisaka swona, hi ta swi vona swaku hikakunene wa hi pfuna ka wutomi la hina.  Nkama lowu hi yaka hi djondza hi yena hi tlhela hi mu rhandza, a ta hi pfuna ku tshika mimpimiso ni swilo leswi nga yentxaka hi nga ha mu rhandzi. (Kol. 1:21) Naswona nkama hi nga tinyiketela ka Yehovha hi tlhela hi tsakamisiwa, a hi nyike minchumu ya yinene, ku nga lipfalu la linene ni wunghanu leli hi nga na lona na yena. — 1 Ped. 3:21.

5. U nga swi vonisa ku yini swaku Yehovha i munene loko u li ka ntirho wa ku chumayela?

⁵ Xin’wana lexi nga hi pfunaka ku vona swaku Yehovha i munene i ku tama hi yentxa ntirho wa ku chumayela. Van’wana va chava ku yentxa ntirho lowu, wena ke, wa chava? Swi nga yentxeka nkama na wu nge se va Mboni ya Yehovha a wu nge se tshama u tipimisa na wu famba u ba swipfalu swa makaya ya vanhu va ku kala u nga va tivi leswaku u bula na vona hi Bibele. Kambe namuntlha, se wa chumayela. Naswona hi ku pfuniwa hi Yehovha, u wu yentxa na wu tsakile ntirho lowu wa ku djondzisa vanhu, naswona wa swi vona swaku Yehovha wa ku pfuna hi tindlela ta tinyingi swaku u yentxa ntirho lowu. A ku pfuna swaku u tama u rhula hambiloko u kumana ni vanhu lava ku hlamulaka hi ndlela ya ku biha. — Yer. 20:7-9.

6. Ndlela leyi Yehovha a hi djondzisaka hi yona swaku hi chumayela yi swi kombisisa ku yini swaku i munene?

⁶ Yehovha a tlhela a hi djondzisa swaku i munene hi ku hi djondzisa ndlela leyi hi faneleke hi chumayela hi yona. (Yoh. 6:45) Ka mintlhanganu ya xikarhi ka vhiki, hi ni swikombiso swa mabulu leswi hi nga swi tirhisaka loko hi chumayela. Minkama yin’wana swi nga hi chavisa ku sungula mabulu hi ndlela yin’wana, kambe loko hi zama swi nga hi pfuna ku kuma vanhu va ku tsakela. Naswona, ka mintlhanganu ni ka makongresu, hi byeliwa swaku hi fanele hi zama ku chumayela hi tindlela tin’wana ta ku a hi nge se tshama hi chumayela hi tona. Minkama yin’wana ku yentxa leswo swi nga hi chavisa, kambe loko hi swi tirhisa, Yehovha a ta hi katekisa. Swoswi a hi djondzeni hi swilo swa swinene leswi Yehovha a nga ta hi nyika swona loko hi zama ku yengesela ntirho wa hina ka yena ku nga na mhaka swaku hi li ka swiyimu swini. Hi ta gama hi vona leswi hi nga swi yentxaka swaku hi fikelela leswi hi swi lavaka ka ntirho wa yena.

7. Hi yini minkateko leyi hi nga ta yi kuma loko hi zama ku yengesela ntirho wa hina wa ku chumayela?

⁷ Wunghanu la hina na Yehovha li ta kula. Vona xikombiso xa makwerhu Samuel, * lweyi a nga doda naswona a tirhaka ni nsati wa yena aColômbia. A swi va tsakisa ku va vapfuli va ndlela va nkama hinkwawu ka bandla la vona, kambe a va lava ku yengesela ntirho wa vona wa ku chumayela hi ku ya pfunisa ka bandla leli a li ni vachumayeli va vatsongo. Kambe leswaku va yentxa leswo, a va fanele va tshika swilo swin’wana leswi a va swi rhandza. Makwerhu Samuel a li: “Hi tirhise leswi nga ka Matewu 6:33 hi tlhela hi nyima ku xava swilo leswi a swi nga li swa lisima, kambe lexi nga hi karhatela hintamu i ku tshika yindlo ya hina leyi a hi yi rhandza.” Nkama lowu va nga fika ka bandla leli a va ya pfunisa ka lona, makwerhu Samuel ni nsati wa yena va vone swaku a va nga lavi male ya yinyingi leswaku va hanya. Makwerhu Samuel a tlhela a vula leswi: “Hi tlhele hi vona swaku Yehovha a hi rhandza hintamu, naswona a hi pfune hi ndlela leyi a hi nga yi nyimelanga.” Wena ke, u nga swi kota ku yengesela ntirho wa wena wa ku chumayela? Loko u swi kota, tiyiseka swaku u ta tiyisa wunghanu la wena na Yehovha naswona yena a ta ku nyika leswi u swi lavaka. — Pis. 18:25.

8. U djondze yini ka leswi nga vuliwa hi makwerhu Ivan na Viktoria?

⁸ Ntirho lowu hi wu yentxelaka Yehovha wu ta hi yentxa hi tsaka. Vona leswi makwerhu Ivan na makwerhu Viktoria lava nga nuna na nsati naswona va nga vapfuli va ndlela va nkama hinkwawu aQuirguistão va swi vulaka. Va vevukise  wutomi la vona swaku va ya pfunisa ka mintirho ya nhlengeletanu, ku patsa ni mintirho ya ku yaka. Makwerhu Ivan a vula leswi: “Hi yentxa hinkwaswu leswi hi nga swi kotaka leswaku hi wu yentxa kahle ntirho wun’wana ni wun’wana lowu hi nyikiwaka wona. Hambileswi siku ni siku hi hetaka ntirho wa hina na hi karhalile, hi ni ku rhula hi tlhela hi tsaka hileswi hi tivaka swaku hi tirhise ntamu wa hina hinkwawu leswaku hi tirhela Yehovha naswona swa hi tsakisa leswi hi nga kuma vanghanu va vanyingi va nyuwani.” — Marku 10:29, 30.

9. Hambileswi makwerhu Mirreh a vabyaka, a swi kotisa ku yini ku yengesela ntirho wa yena wa ku chumayela naswona hi yini minkateko leyi a yi kumaka?

⁹ Nkama hi tirhelaka Yehovha hi nga tsaka hambi hi kumana ni swikarhatu. Hi xikombiso, makwerhu Mirreh lweyi a nga guga a tlhela a feliwa hi nuna, loko a nyime ku yentxa ntirho wa yena a ve mupfuli wa ndlela wa nkama hinkwawu. Mirreh a ni mavabyi lawa ma mu yentxaka swi mu karhatela ku famba, hi mhaka leyo a heta wora lin’we loko a ya chumayela hi munti ni munti. Kambe a swi tsakela hintamu ku heta nkama wa wunyingi na a chumayela hi xikarinyana. Naswona a ni marevhizita ni swidjondzo swa swinyingi swa Bibele, naswona van’wana a va chumayela hi ku tirhisa telefoni. Kambe i yini lexi nga yentxa Mirreh a yengesela ntirho wa yena ka Yehovha? Yena a li: “Ni mu rhandza hintamu Yehovha na Yesu Kreste. Naswona minkama hinkwayu ni khongela ka Yehovha ni mu kombela swaku a ni pfuna ku yentxa hinkwaswu leswi ni nga swi kotaka ka ntirho wa yena.” — Mat. 22:36, 37.

10. Hi ku ya hi 1 Pedru 5:10, i yini leswi lava yengeselaka ntirho wa vona ka Yehovha va swi kumaka?

¹⁰ Yehovha a tama a hi djondzisa. Makwerhu Kenny lweyi i nga mupfuli wa ndlela aMaurícias a swi vonile swaku Yehovha wa hi djondzisa. Nkama a nga djondza ntiyiso a tshike universidade a tlhela a tsakamisiwa, a gama a nghenela ntirho wa nkama hinkwawu. Yena a li: “Ni zama ku hanya hi marito ya muprofeta Esaya loko a te: ‘Hi mina lweyi! Ni rhume!’” (Esa. 6:8) Makwerhu Kenny a tirhe ka maprojeto ya manyingi ya ku yaka, a tlhela a pfunisa ka ku hundzuluxela mabuku hi lirimi la yena. Makwerhu Kenny a vula leswi: “Yehovha a ni djondzisile leswaku ni kota ku hetisisa mintirho hinkwayu leyi a nga ni nyika yona”. Kambe makwerhu Kenny a djondze minchumu yin’wana ya lisima hintamu. A tlhela a ku: “Ni djondze swaku a hi swilo hinkwaswu leswi ni kotaka ku swi yentxa, ni tlhela ni djondza swaku ni fanele ni tama ni yampsisa wumunhu la mina leswaku ni tirhela Yehovha hi ndlela ya yinene.” (Lerha 1 Pedru 5:10.) Se swi ngo yini u kambela swiyimu swa wena, u vona swaku u nga swi kota ku tinyikela leswaku Yehovha a ku djondzisa a tlhela a ku tirhisa hi tindlela tin’wana?

11. I yini leswi 3 wa vamakwerhu vavasati va Coreia do Sul va nga swi yentxa leswaku va tama va tsakela ntirho wa ku chumayela, naswona leswo swi va pfunise ku yini? (Vona mufoto ka pajina la ku sungula.)

¹¹ Hambi vamakwerhu lava se i nga khale na va tirhela Yehovha swi lava va djondza swilo swin’wana ka ntirho lowu va wu yentxelaka Yehovha. Ka nkama lowu wa mavabyi ya corona madoda ya bandla lin’wana la Coreia do Sul ma vule leswi: “Vamakwerhu lava a va nga swi koti ku chumayela hileswi va vabyaka, va djondze ku tirhisa komputadori kumbe telefoni leswaku va chumayela. 3 wa vamakwerhu vavasati lava nga ni kolomu ka 80 wa malembe, na vona va djondze ku tirhisa komputadori leswaku va chumayela. Hi mhaka leyo swoswi swa koteka swaku va chumayela siku ni siku.” (Pis. 92:14, 15) Wa swi tsakela ku yengesela ntirho wa wena wa ku chumayela u tlhela u vona swaku Yehovha i munene? Swoswi a hi kambisiseni swilo swin’wana leswi nga ku pfunaka ku yentxa leswo.

12. I yini leswi Yehovha a swi tshembisaka vanhu lava mu tshembaka?

¹² Djondza ku tshemba Yehovha. Yehovha a hi tshembisa ku hi nyika minchumu ya yinyingi ya  yinene loko hi mu tshemba hi tlhela hi mu yentxela hinkwaswu leswi hi nga swi kotaka. (Mal. 3:10) Makwerhu Fabiola lweyi a tshamaka Colômbia a vone Yehovha a mu pfuna ka wutomi la yena. Nkama a nga tsakamisiwa a a lava ku tekela ku va mupfuli wa ndlela wa nkama hinkwawu. Kambe a a fanele a tirha swaku a hlayisa ndjangu wa yena, ku nga nuna wa yena ni vana va yena vanharhu. Kambe nkama lowu a nga reformara a khongele hintamu ka Yehovha leswaku a mu pfuna. Yena a li: “Hi ntolovelo loko munhu a reformara va hlwela ku mu nyika male ya reforma, kambe ka mina swi yo teka wheti yin’we ntsena va gama va ni nyika. Phela leswo a ni nga swi nyimelanga!” Loko se ku hundze 2 wa tiwheti a sungule ku va mupfuli wa ndlela wa nkama hinkwawu. Swoswi a ni kolumu ka 70 wa malembe naswona ku hundza 20 wa malembe na a li mupfuli wa ndlela. Phela se a pfune 8 wa vanhu swaku va tsakamisiwa. Makwerhu lweyi a tlhela a vula leswi: “Hambileswi minkama yin’wana ni pfaka ni hela ntamu, siku ni siku Yehovha wa ni pfuna swaku ni tama ni va mupfuli wa ndlela.”

13-14. Hi swini swikombiso leswi nga hi pfunaka ku tshemba Yehovha hi tlhela hi yengesela ntirho wa hina wa ku chumayela?

¹³ Tekelela vanhu lava nga tshemba Yehovha. Bibele li vulavula hi vanhu va vanyingi lava nga yentxa hinkwaswu leswi va nga swi kota swaku va tirhela Yehovha. Ku ni swikombiso swa swinyingi swa vanhu lava swi nga lava va rhanga hi ku kombisa swaku va mu tshemba Yehovha leswaku a va katekisa. Bibele li kombisa swaku na Yehovha a nge se va katekisa vanhu va yena, ku sungula a va fanele va kombisa swaku va mu tshemba. Hi xikombiso, leswaku Abrahamu a katekisiwa hi Yehovha swi lave a suka kaya ka yena ‘hambileswi a a nga swi tivi swaku a ya kwini.’ (Heb. 11:8) Yakobe  swi lave a rhanga hi ku lwa ni ntsumi leswaku a katekisiwa. (Gen. 32:24-30) Nkama lowu Vayisrayele a va li kusuhi ni ku nghena ka Tiko la Xitshembiso, swi lave ku sungula vaprista va nghena ka Nambu wa Yordani lowu a wu ni nghozi, se hi kona Vayisrayele hinkwavu a va ta tsemakanya Nambu lowu. — Yoxu. 3:14-16.

¹⁴ U nga tlhela u djondza swilo swa lisima ka vamakwerhu lava nga tshemba Yehovha. Hi xikombiso, makwerhu Payton ni nsati wa yena Diana, va pfuniwe hi swiperiyensiya swa ku fana ni leswi kumekaka ka jw.org, ka ndhawu leyi nge: “Eles se ofereceram.”  * (Hi Xiputukezi) Makwerhu Payton a vula leswi: “Nkama lowu hi lerhaka swiperiyensiya leswi, swi fana ni loko hi vona munhu na a dla swakudla swa ku nandzika na a tsakile. Naswona nkama lowu hi yaka hi pimisa hi swiperiyensiya leswi, swi hi yentxa hi lava ‘ku ringa hi vona swaku Yehovha i munene.’ Hi ku famba ka nkama, Payton na Diana va ye va ya pfunisa lani ku nga ni vachumayeli va vatsongo. U tshama u swi lerha swiperiyensiya leswi vulavulaka hi vamakwerhu lava nga yengesela ntirho wa vona ka Yehovha? Kumbe u tshama u sixtira mavhidiyo lawa ma kumekaka ka jw.org lawa ma nge: Ku Chumayela eTindhawini Leti Nga Ekule Swinene Le Australia (hi Xitsonga), ni leli nge: Pregação em Territórios Isolados: Irlanda (hi Xiputukezi)? Phela swiperiyensiya leswi, swi nga ku pfuna ku vona leswi u nga swi yentxaka swaku u yengesela ntirho wa wena wa ku chumayela.

15. Ku heta nkama ni vanhu lava rhangisaka ku rhandza ka Yehovha ka wutomi la vona swi nga hi pfunisa ku yini?

¹⁵ Langa vanghanu vavanene. Phela swi nga hi vevukela ku dla swakudla swa ku a hi se tshama hi swi dla loko hi ni vanhu lava swi rhandzaka. Hilani ku fanaka, loko na hina hi heta nkama ni vanhu lava rhangisaka ku rhandza ka Yehovha ka wutomi la vona, hi ta lava tindlela ta ku yengesela ntirho wa hina ka Yehovha. Makwerhu Kent na makwerhu Veronica lava nga nuna na nsati va swi vonile swaku ku heta nkama ni vanhu lava rhandzaka Yehovha swa pfuna. Makwerhu Kent a li: “Vanghanu ni maxaka ya hina va hi pfunile swaku hi tirhela Yehovha hi tindlela ta ku hambanahambana. Phela hi swi vonile swaku loko hi heta nkama ni vamakwerhu lava rhangisaka Mfumu wa Yehovha ka wutomi la vona, na hina hi ta lava ku yengesela ntirho wa hina ka Yehovha.” Swoswi, Kent na Veronica i vapfuli va ndlela va ku hlawuleka aSérvia.

16. Hi ku ya hi xifaniso xa Yesu lexi nga ka Luka 12:16-21, hi mhaka muni swi lava hi tshika leswi hi swi rhandzaka swaku hi rhangisa ntirho wa Yehovha?

¹⁶ Tama u yentxela Yehovha leswi u nga swi kotaka ka wutomi la wena. I ntiyiso swaku a swi zi swi lava hi tshika swilo hinkwaswu leswi hi swi rhandzaka swaku hi tsakisa Yehovha. (Ekl. 5:19, 20) Kambe a hi fanelanga hi swi rhandza hintamu swilo leswi hi nga na swona lakakuva swi hi sivela ku yengesela ntirho wa hina ka Yehovha. Loko ho yentxa leswo hi nga fana ni wanuna wa xifaniso xa Yesu, lweyi a nga yala ku tirhela Xikwembu hi mhaka ya swilo leswi a a li na swona. (Lerha Luka 12:16-21.) Makwerhu Christian, lweyi a tshamaka França a li: “A ni nga wu tirhisi kahle nkama ni ntamu wa mina swaku ni tirhela Yehovha ni ku pfuna ndjangu wa mina.” Makwerhu Christian ni nsati wa yena va yentxe xiboho xa ku va vapfuli va ndlela va nkama hinkwawu, kambe leswaku va yentxa leswo a va fanele va tshika mintirho ya vona. Leswaku va tihlayisa, va sungule ku yentxa ntirho wa wutsongo wa ku hamba malimpeza naswona va swi vonile swaku va nga tsaka hambiloko va ni male ya yitsongo. Phela va tsake hintamu hileswi va nga tshika swilo swin’wana swaku va ta kota ku va vapfuli va ndlela va nkama hinkwawu. Makwerhu Christian a li: “Leswi hi nga vapfuli va ndlela, hi tsaka hintamu loko hi vona lava hi djondzaka na vona Bibele ni marevhizita ya hina va rhandza ku djondza hi Yehovha.”

17. Hi mhaka muni swi nga ha hi karhatelaka ku tirhisa machumayelelo ya nyuwani?

 ¹⁷ Tinyimiseli ku chumayela hi tindlela ta ku hambana. (Mint. 17:16, 17; 20:20, 21) Makwerhu Shirley, lweyi a nga mupfuli wa ndlela aEstados Unidos, a txintxa machumayelelo ya yena ka nkama lowu wa corona. A ku sunguleni a a chava ku chumayela hi telefoni, kambe nkama va nga yendzeliwa hi mudjikelezi a djondze tindlela ta ku chumayela hi ku tirhisa telefoni. Ku sukela kolanu, se wa swi kota ku chumayela hi ku tirhisa telefoni minkama hinkwayu. Yena a li: “A ku sunguleni a swi ni chavisa kambe swoswi ni tsake hintamu hikusa ni kota ku chumayela vanhu va vanyingi lava a ni nga ta swi kota ku va kuma hi munti ni munti.”

18. I yini leswi nga hi pfunaka ku yengesela ntirho wa hina wa ku chumayela hambi hi kumana ni swikarhatu?

¹⁸ Yentxa maplanu ya leswi u lavaka ku swi fikelela. Loko hi kumana ni swikarhatu, hi khongela hintamu hi kombela Yehovha swaku a hi pfuna hi tlhela hi pimisa hi leswi hi nga swi yentxaka swaku hi kota ku swi hlula. (Swi. 3:21) Makwerhu Sonia, mupfuli wa ndlela wa nkama hinkwawu ka grupu leli vulavulaka Xiromani aEuropa a li: “Ni rhandza ku tsala maplanu ya mina ka papela ni gama ni teka papela lolelo ni li veka ka ndhawu leyi vonekaka. Ka meza wa mina, ni tolovela ku lema papela leli ka lona ni nga dezenyara tindlela timbirhi leti nga ni yisaka ka tindhawu ta ku hambana. Se loko ni lava ku yentxa xiboho ni langa ndlela leyi ni lavaka ku famba hi yona.” Makwerhu Sonia a zama ku vona swikarhatu leswi a kumanaka na swona hi ndlela ya yinene. Yena a tlhela a ku: “Loko wutomi la mina li txintxa, swi le ka mina swaku ni ta swi vona ku fana ni muru lowu ni sivelaka ku kuma leswi ni swi lavaka kumbe ni ta swi vona ku fana ni buluha leli nga ni pfunaka ku tsemakanya swaku ni kuma leswi ni swi lavaka.”

19. Hi nga swi kombisisa ku yini swaku ha mu khensa Yehovha hi minkateko leyi a hi nyikaka yona?

¹⁹ Yehovha a hi katekisa hi tindlela ta tinyingi, naswona hi nga mu khensa hi ku mu yentxela hinkwaswu leswi hi nga swi kotaka swaku hi mu tsakisa. (Heb. 13:15) Leswo swi patsa ku yengesela ntirho wa hina wa ku chumayela ni ku mu tirhela hi tindlela ta ku hambanahambana. Loko hi yentxa leswo, Yehovha a ta hi katekisa hintamu. Se, siku ni siku a hi zameni tindlela ta ku hi ‘ringa hi vona swaku Yehovha i munene.’ Loko hi yentxa leswo, hi ta fana na Yesu lweyi a nge te: “Swakudla swa mina i ku yentxa ku rhandza ka lweyi a nga ni rhuma ni ku heta ntirho wa yena.” — Yoh. 4:34.