1-2. Kusigikirra ha Zabuli 34:8, kiki ekitusemeriire kukora kwega ha burungi bwa Yahwe?

TERAMU akasisani bakuhaire kulya ebyokulya ebyotakalyahoga. Nosobora kumanya ebirukukwata ha byokulya ebi kurabira omu kubirora, kubiboyaho, kumanya ebirungo ebirumu, rundi kukaguza abandi obubaraaba nibabigonza. Baitu omulingo gwonka ogw’okumanya obworaaba n’obigonza nugwo ogw’okubirozaaho.

² Nitusobora kwega ha burungi bwa Yahwe kuraba omu kusoma Baibuli, ebitabu byaitu, hamu n’okuhurra abandi nibabazaaho ebirungi Yahwe abakoliire. Baitu twetegereza kurungi oburungi bwa Yahwe, naitwe ‘obuturoza’ ha burungi bwe habwaitu. (Soma Zabuli 34:8.) Leka tubazeeho ekyokurorraho kimu kwoleka nk’oku tusobora kukikora. Obundi nitugonza kufooka bapayoniya, baitu kusobora kuhika ha kigendererwa eki nitwetaaga kubanza kworobyamu obwomeezi bwaitu. Obundi tukira kusoma omurago gwa Yesu ogurukugamba ngu kakuba twebembeza Obukama, Yahwe naija kutuha ebyetaago byaitu ebikuru, baitu titukaroraga Yahwe n’ahikiriza omurago ogu habwaitu. (Mat. 6:33) Baitu habwokuba nitwikiririza omu murago gwa Yesu ogu, tukehya ha nturukya yaitu, obwire tumara ha mirimo, kandi twekamba nk’oku turukusobora omu kutebeza. Eki obutukikora, twerorra ngu mali Yahwe atuha ebyetaago byaitu. Naitwe tuba ‘turoleze’ ha burungi bwa Yahwe.

3. Nk’oku kyolekerwe omu Zabuli 31:19, nibaha abagasirwa omu burungi bwa Yahwe?

³ Yahwe “murungi hali bona,” otwaliiremu naabo abatamumanyire. (Zab. 145:9; Mat. 5:45) Baitu kukira muno aha emigisa nyingi abo abamugonza kandi abamuheereza n’obwomeezi  bwabo bwona. (Soma Zabuli 31:19.) Leka tubazeeho ebintu ebimu ebirungi Yahwe eby’atukoliire.

4. Yahwe ayoleka ata oburungi bwe hali abo abatandika kumwirra haihi?

⁴ Buli murundi tuteeka omu nkora ebitwega kuruga hali Yahwe, turora nk’oku bitugasira omu bwomeezi bwaitu. Obutwamwegereho kandi twatandika kumugonza, akatukonyera kuleka entekereza hamu n’ebikorwa eby’atarukugonza. (Bak. 1:21) Obutwayehaireyo hali Yahwe kandi twabatizibwa, akatwongera ebirungi ebindi, nk’omuntu w’omunda omurungi hamu n’okutwiriza haihi na uwe.​—1 Pet. 3:21.

5. Turora tuta oburungi bwa Yahwe obutuba tuli omu buheereza?

⁵ Tweyongera kurora oburungi bwa Yahwe obutwejumbira omu buheereza. Oli muntu anyakwine ensoni? Baingi h’abantu ba Yahwe baziine. Obundi obwokaba otakafookere omu h’abaheereza ba Yahwe, watekerezaaga ngu torukusobora kugenda omu ka y’omuntu ow’otamanyire kandi okamwegesa ebirukukwata ha Baibuli. Baitu hati okikora butoosa. Kandi Yahwe akukonyire kwegondeza omu mulimo ogw’okutebeza! Yahwe akukonyire n’omu miringo endi nyingi. Akakukonyera kwikara otekaine omuntu omu buheereza obuyakutwaize kubi. Kandi akakukonyera kwijuka ekyahandiikirwe ekisemeriire kutebeza omuntu ayayolekere okugonza. Kandi akuhaire n’amaani ag’okugumizaamu n’otebeza, abantu n’obubaraaba batarukugonza kukuhuliiriza.​—Yer. 20:7-9.

6. Okutendekwa Yahwe okwatuha nikwoleka kuta oburungi bwe?

⁶ Yahwe atwolekere oburungi bwe kurabira omu kututendeka nk’oku tusemeriire kutebeza. (Yoh. 6:45) Omu rusorrokano rwaitu orwa hagati omu wiiki, tuhuliiriza ebyokurorraho ebirungi ebitwegesa nk’oku tusobora kutebeza abantu, kandi nitusobora kukozesa amagezi ganu obuturukuba tuli omu buheereza. Ha kubanza, nitusobora kutiina kulengaho enyanjura empyaka, baitu obutukikora, nitusobora kukisanga ngu enyanjura empyaka nizikora kurungi omu kiikaro nambere tutebeza. Omu nsorrokano zaitu eza buli wiiki hamu n’enkooto twekambisibwa kwejumbira omu miringo ey’okutebeza eitutakalengahoga. Kinu nakyo nikisobora kutuletera kutiina, baitu obuturalengaho Yahwe naija kutuha emigisa. Hati leka tubazeeho emu ha migisa eituratunga obuturalengaho emiringo emihyaka nk’oku turaheerezamu Yahwe ekirukukirayo oburungi, n’obuturaaba tuli omu nyikara ya mulingo ki. Hanyuma nitwija kubazaaho emiringo tusobora kwongera ha buheereza bwaitu.

7. Migisa ki eitutunga obutwekamba kwongera ha buheereza bwaitu?

⁷ Tweyongera kwirra haihi na Yahwe. Tekerezaaho ekyokurorraho eky’omugurusi w’ekitebe arukwetwa Samuel, * uwe na mukazi we nibaheereza omu ihanga lya Colombia. Ow’oruganda na mukazi we banu, bayegondezaaga omu kuheereza nka bapayoniya omu kitebe kyabo. Baitu baali nibagonza kwongera ha buheereza bwabo kurabira omu kukonyera ekitebe ekiine obwetaago obw’amaani. Kusobora kuhika ha kigendererwa kyabo, bakefeereza ebintu ebimu ebibagonzaaga. Samuel nagamba ati: “Tukateeka omu nkora Matayo 6:33 kandi twaleka kugura ebintu ebitutarukwetaaga. Baitu ekintu ekyakizireyo kutugumira kikaba kusigaho enju yaitu. Ekaba eyombekerwe omu mulingo tukaba nitugonza, kandi ekaba etaroho ibanja lyona.” Obubaagenzere omu kitebe ekihyaka, bakyetegereza ngu bakaba nibetaaga sente ntaito kwerolerra kukira kara. Samuel nagamba  ati: “Turozere omulingo Yahwe atwebembera n’omulingo agarukamu esaara zaitu. Nitwehurra ngu Yahwe n’asiima ebiturukukora kandi niturora okugonza kwe omu miringo tukaba tutakakuroramuga kara.” Naiwe n’osobora kwongera ha buheereza bwawe omu mulingo nugwo gumu? Obukiraaba nukwo kiri, kigumize kimu ngu noija kweyongera kwirra haihi na Yahwe kandi naija kukurolerra.​—Zab. 18:25.

8. Kiki ekyorukwega omu bigambo bya Ivan na Viktoria?

⁸ Tutunga okusemererwa omu buheereza bwaitu. Tekerezaaho ebigambo bya Ivan na mukazi we Viktoria, abarukuheereza nka bapayoniya omu Kyrgyzstan. Bakaikara baine obwomeezi obworobere nukwo basobole kukonyera hoona nambere barasabwa kugenda kuheereza, otwaliiremu n’omu mulimo g’okwombeka. Ivan nagamba ati: “Twakoraga n’amaani hoona nambere batusindikaga. N’obukiraaba ngu ha kumalirra kw’ekiro twabaga tujwahire, twahurraga tusemeriirwe kandi twine okumarwa habw’okukozesa amaani gaitu goona kuheereza Yahwe. Ekindi, tukatunga okusemererwa kwingi habw’okutunga abanywani abahyaka hamu n’ebintu ebirungi ebitwikara nitwijuka.”​—Mar. 10:29, 30.

9. Kiki munyaanya itwe owali omu nyikara ey’egumire ekiyakozere kwongera ha buheereza bwe, kandi kiki eky’arugiremu?

⁹ Tutunga okusemererwa omu kuheereza Yahwe n’obuturaba omu nyikara ezigumangaine. Ekyokurorraho Mirreh, omufaakati ow’akuzire omu myaka kuruga omu Bugwa Izooba bwa Afrika, akahuumura omulimo gwe nka dakitaali kandi y’atandika kuheereza nka payoniya. Mirreh tikimwanguhira kurubata habwokuba aine oburwaire obw’amaani oburukumusaasa kandi eki kimuleetera kumara esaaha emu yonka obwarukuba n’atebeza nju ha nju. Baitu n’asobora kumara obwire bwingi omu kutebeza okw’omurwijwire. Aine abeegi ba Baibuli baingi, n’abantu abaagarukira, abamu omuli banu abegesa kuraba omu kubaterra amasimu. Kiki eky’aletiire Mirreh kugonza kwongera ha buheereza bwe? Nagamba ati: “Ningonza muno Yahwe hamu na Yesu Kristo kuruga ha mutima. Kandi nyikara ninsaba Yahwe kunkonyera kwekamba kumuheereza nk’oku ndukusobora.”​—Mat. 22:36, 37.

10. Nk’oku kyolekerwe omu Isaya 54:13, abo abehayo kuheereza, batunga ki kuruga hali Yahwe?

¹⁰ Tutunga okutendekebwa okurukukiraho kuruga hali Yahwe. Kenny, payoniya arukuheereza omu Mauritius, n’agumya ensonga enu. Obuyayegere amananu akaleka kusoma ha yunivasite, y’abatizibwa kandi y’afooka payoniya. Nagamba ati: “Ndengaho kuba nka nabbi Isaya, ayagambire ati: ‘Nyowe ndi hanu; tuma nyowe.’” (Is. 6:8) Kenny ayejumbiire omu mirimo y’okwombeka ebyombeko by’Obukama ey’erukwahukana hamu n’okuhindura ebitabu omu rulimi rwe. Kenny n’agamba ati: “Nkatunga okutendekwa okw’ankonyire kuhikiriza emirimo eyinabaga mpairwe.” Baitu atagarukire ha kutunga obukugu obw’okukora emirimo kyonka. Nayongera nagamba ati: “Nkamanya n’obuceke bwange hamu n’emiringo eyinsemeriire kukurakuraniza kufooka omuheereza wa Yahwe omurungi.” (Soma Isaya 54:13.) Habwaki otekebiija enyikara yaawe okarora naiwe obworaaba nosobora kutunga okutendekwa okurukukiraho kuruga hali Yahwe?

11. Bintu ki banyaanya itwe omu South Korea ebibaakozere kusobora kwongera ha buheereza bwabo, kandi kiki eky’arugiremu? (Rora ekisisani ekiri ha kyesweko.)

¹¹ N’abantu abamazire emyaka nyingi nibaheereza Yahwe betaaga kutendekwa obubalengaho obuheereza obuhyaka. Omu kasumi ak’oburwaire obwa COVID-19, abagurusi omu kitebe ekiri omu South Korea bakahandiika bati: “Abamu abaali nibatekereza ngu tibasobora kwejumbira omu buheereza habw’obuceke  obu baine, hati nibakikora kurabira omu kukozesa vidiyo kuteera amasimu. Banyaanya itwe basatu abali omu myaka eya 80 bakeega kukozesa omulingo gunu ogwa kalimagezi kandi batandika kwejumbira omu buheereza haihi buli kiro.” (Zab. 92:14, 15) Wakugondeze kwongera ha buheereza bwawe kandi n’okuroza ha burungi bwa Yahwe n’okukiraho? Leka tubazeeho ebintu ebimu ebisobora kukukonyera kuhika ha kigendererwa eki.

12. Yahwe n’araganiza ki abo abamwesiga?

¹² Yega kwesiga Yahwe. N’aturaganiza ngu naija kutuha emigisa nyingi obuturamwesiga kandi tukamuha ekirukukirayo oburungi. (Mara. 3:10) Munyaanya itwe Fabiola kuruga omu Colombia akarora omulingo Yahwe yahikirizeemu omurago gunu. Akaba n’agonza kuheereza nka payoniya ow’akasumi koona hanyuma y’okubatizibwa. Baitu akaba aine kukora kusobora kusagika eka ye. Nahabweki obuyahikize emyaka nambere akaba n’asobora kusaba kuhuumura ha mulimo, akasaba muno hali Yahwe amukonyere. Nagamba ati: “Kikira kutwara akasumi karaihire kutunga akasimo kaawe, baitu akange nkakatunga omu kwezi kumu kwonka hanyuma y’okukasaba. Kikaba kiri nk’ekyamahano!” Hanyuma y’emyezi ebiri akatandika kuheereza nka payoniya. Hati ali omu myaka 70 kandi aikaire n’aheereza nka payoniya kumara emyaka erukuhingura omu 20. Omu kasumi ako, asoboire kukonyera abantu munaana kuhika ha kubatizibwa. Nagamba ati: “Nobukiraaba ngu obwire obumu nyehurra ntaine maani, Yahwe ankonyera buli kiro kugumizaamu nimpereeza nka payoniya.”

13-14. Byokurorraho ki ebisobora kutukonyera kwesiga Yahwe, kandi n’okwongera ha buheereza bwaitu?

 ¹³ Yegera ha byokurorraho eby’abo abayesigire Yahwe. Baibuli erumu ebyokurorraho bingi eby’abantu abayekambire kuheereza Yahwe. Emirundi erukukira obwingi, Yahwe akabaha emigisa hanyuma y’okubanza okukora ekintu ekyali nikyoleka ngu bakaba nibamwesiga. Ekyokurorraho, Yahwe akaha Iburahimu emigisa hanyuma y’okuruga omu ka ye “atamanyire nambere arukugenda.” (Baheb. 11:8) Hanyuma ya Yakobo kufukaana na malaika nubwo y’atungire omugisa ogw’embaganiza. (Kub. 32:24-30) Ihanga lya Isaleri obulikaba liri haihi kutaaha omu Nsi ey’Ekaba Eraganiziibwe, abantu bakasobora kwambuka hanyuma ya banyakatagara kurubata omu Kyambu Yorudani amaizi gakemerra.​—Yos. 3:14-16.

¹⁴ Nosobora n’okugasirwa omu byokurorraho eby’abaheereza ba Yahwe ab’omu kasumi kanu abayesigire Yahwe kandi bayongera ha buheereza bwabo. Ekyokurorraho, ow’oruganda Payton na mukazi we Diana, bagonzaaga muno kusomaho ab’oruganda n’abanyaanya itwe abayongiire ha buheereza bwabo, nk’abo abarukubazibwaho omu bicweka “Bakehayo Begondiize.” * Payton nagamba ati: “Obutwasomere ebyokurorraho byabo, tukasana oti rundi tuliyo niturora omuntu awali mukulya ekihuuro ekinuzire. Obutwayeyongiire kurora, tukeyongera kugonza ‘kuroza, tukamanya [Yahwe] okwali murungi.’” Eky’arugiremu, Payton na Diana bakagenda kuheereza omu kiikaro nambere hali obwetaago. Ebicweka binu wakabisomere? Kandi wakarozere vidiyo eziine omutwe Witnessing in Isolated Territory​—Australia hamu na Witnessing in Isolated Territory​—Ireland eziri ha jw.org? Obutumwa bunu nibusobora kukukonyera kuserra emiringo ey’osobora kwongera ha buheereza bwawe.

15. Abanywani abarungi nibasobora kutukonyera bata?

¹⁵ Tunga abanywani abarakwekambisa kwongera ha buheereza bwawe. Kyanguhire kulya ebyokulya ebitutakalyahoga kakuba tuba tuli n’abantu abarukubigonza. Omu mulingo nugwo gumu, obutumara obwire n’abantu abarukwebembeza Yahwe omu bwomeezi bwabo, kituleetera kugonza kwongera ha buheereza bwaitu. Kinu nikyo kyahikire hali Kent na mukazi we Veronica. Kent nagamba ati: “Banywani baitu hamu n’abanyabuzaale bakatwekambisa kulengaho kukozesa emiringo ey’okutebeza ey’erukwahukana. “Tukakyetegereza ngu kunywana abantu abarukwebembeza obukama, kikatukonyera kutunga obumanzi obutwali nitwetaaga kulengaho ekintu ekihyaka.” Kent na Veronica hati nibaheereza nka bapayoniya ab’embaganiza omu Serbia.

16. Nk’oku kyolekerwe omu kyokurorraho kya Yesu ekiri omu Luka 12:16-21, habwaki tusemeriire kwikiriza kwefereza?

¹⁶ Wefereze ebintu ebimu. Titurukwetaaga kwefereza ebintu byona ebitugonza kusobora kusemeza Yahwe. (Mug. 5:19, 20) Baitu kakuba tulemwa kwongera ha buheereza bwaitu, habw’okutiina kwefereza ebintu ebimu, nitusobora kukora ensobi niyo emu, nk’ey’omusaija arukubazibwaho omu kyokurorraho kya Yesu ayakozere n’amaani kutunga ebintu bingi ebirungi baitu yayebwa Ruhanga. (Soma Luka 12:16-21.) Ow’oruganda Christian, ow’arukwikara omu France, nagamba ati: “Nkaba ntarukukozesa kurungi obwire n’amaani gange kuheereza Yahwe hamu n’okufaaho eka yange.” Uwe na mukazi we bakacwamu kufooka bapayoniya. Baitu kusobora kuhika ha kigendererwa eki bakaba baine kuleka emirimo yabo. Kusobora kwerolerra bakatandika akabizineesi ak’okuyonja, kandi bakeega kumarwa ebike ebibaine. Kwefereza kwabo kukarugamu  ebirungi? Christian nagamba ati: “Hati tukeyongera kwegondeza omu buheereza kandi kitusemeza kurora abeegi ba Baibuli hamu n’abantu abatugarukira nibeega hali Yahwe.”

17. Kiki eky’akonyire munyaanya itwe omu, kulengaho omulingo ogurukwahukana omu buheereza?

¹⁷ Ikara oyetekaniize kulengaho emiringo erukwahukana ey’okutebeza. (Eng. 17:16, 17; 20:20, 21) Shirley payoniya omu United States, akaba aine kuhinduramu omulingo atebeza omu kasumi ak’oburwaire obwa COVID-19. Ha kubanza akatiina kulengaho kutebeza n’akozesa esimu. Hanyuma y’okutendekwa omu wiiki y’omuroleerezi, akatandika butoosa kukozesa omulingo gunu ogw’okutebeza. Nagamba ati: “Ha kubanza kyali nikitiinisa baitu hati ninkyegondezaamu. Hati nitutebeza abantu baingi muno kukira abo abatwatebezaaga nju ha nju!”

18. Kiki ekitusobora kukora kakuba habaho ekintu ekirukutulemesa kwongera ha buheereza bwaitu?

¹⁸ Wetereho ekigendererwa kandi olengeho kukihikiriiza. Obututunga ebizibu, tusaba Yahwe atukonyere kandi tutekerezaaho n’obwegendereza ekitusemeriire kukora kusobora kubirabamura. (Nfu. 3:21) Sonia, arukuheereza nka payoniya w’akasumi koona omu Bulaaya, omu guruupu y’orulimi rwa Romany n’agamba ati: “Ngonza kuhandiika ebigendererwa byange ha rupapura kandi orupapura oru kuruteeka nambere ndukururora bwangu. Ha meeza yange haroho ekisisani eky’emihanda ebiri erukugenda omu mbaju ezirukwahukana. Obumba nyine encwamu ey’okukora, ndolerra emihanda egi kandi ntekerezaaho encwamu yange obweraaba n’egenda kunkonyera kuhika ha kigendererwa kyange.” Sonia alengaho kwikara n’entekereza enungi ha bizibu eby’arukurabamu. Nagamba ati: “Buli nyikara empyaka n’esobora kuba nk’ekisiika ekirukuntanga kuhika ha kigendererwa kyange, rundi orutindo orurankonyera kwambuka​—kisigikirra ha ntekereza yange.”

19. Kiki ekitusemeriire kucwamu kukora?

¹⁹ Yahwe atuha emigisa omu miringo nyingi. Nitusobora kwoleka okusiima kwaitu habw’emigisa ey’atuha kurabira omu kukora kyona ekirukusoboka kumukugiza. (Baheb. 13:15) Eki nikisobora kutwarramu kuserra emiringo empyaka ey’okwongera ha buheereza bwaitu, kandi Yahwe n’asobora n’okutuha emigisa ey’erukukiraho. Buli kiro leka tuserre emiringo ‘ey’okuroza, n’okumanya [Yahwe] okwali murungi.’ Hanyuma nitwija kuba nka Yesu ayagambire: “Ebyokulya byange nukwo kukora ayantumire ebyagonza, nokuhikiriza emirimoye.”​—Yoh. 4:34.