1-2. Maererano na Pisarema 34:8, tinodikana kuitei kuti tione unaki wa Djehovha?

CIMBORANGARIRAI munhu wamupa cokurhya camusati makamborhya. Imwimwi mungafunda ciro nge kuringira, kunuhwidzwa uye kutobvunzisa amweni kuti anoonawo kudini cokurhya icona. Asi mushobo umwe basi wekuzia kuti mucacipfarira here nge we kuedza kucirhya imwimwi wene.

² Zvirokwazvo kuti tingaona kunaka ka Djehovha nge kuerenga Bhaibheri uye mu mabhuku edu kana kuzwawo amweni ecipanganidza makomborero aakatambira kuna Djehovha. Asi isusu tingakwanisa kunyasa kuzwisisa kunaka ka Djehovha kana “tikazvionera” tega. (Erengai Pisarema 34:8.) Onai muezaniso unopangidza kuti zvingaitika kudini. Rangarirai kuti muri kuda kupinda mu basa re nguwa yakadzara. Asi kuti mugumire cinangwa icona, imwimwi munodikana kugara ne upenyu usina zvakawanda. Pamweni makambozwa cipikirhwa ca Djesu cekuti, kana tikakanda Umambo pa mbuto yekutanga mu upenyu, Djehovha acamupa zvese zvamunoda. Asi pamweni atisati takambozviona mu upenyu wedu kudzadzika ke masoko awona. (Mt. 6:33) Kunyazi zvakadaro, mecigonda cipikirhwa ici ca Djesu, imwimwi munoteredza magasto enyu, mothurudza nguwa yamunopedza ku basa, uye mobatikana mu basa rekuparidza. Pamunonga meciita izvi, munodzionera pacenyu mwega kuti zvezvirokwazvo Djehovha anotiriritiradi kamare. Imwimwi “munoraira” pacenyu kamare kuti Djehovha akanaka.

3. Maererano na Pisarema 16:1, 2, ndiyani unotambira zviro zvakanaka zva Djehovha?

³ Djehovha “akanaka ku anhu ese,” kutobatanidza ne aya asikamuzii. (Pis. 145:9; Mt. 5:45) Asi ku aya anoseenzera Djehovha  ne mwoyo wese, anotambira makomborero akawanda akanaka kubva kuna Djehovha. (Erengai Pisarema 16:1, 2.) Onai zviro zvinganani zvakanaka zvatinoizirhwa na Djehovha.

4. Djehovha anopasa zviro zvipi zvakanaka ku anhu aya anotanga kukwedera dhuze naye?

⁴ Patinoseenzesa zvatinofunda kubva kuna Djehovha, tinokwanisa kuona kuti izvona zvinoita kudini kuti upenyu wedu ugare urinane. Petakatanga kufunda Bhaibheri uye kumuda, ayena akatibetsera kukunda marangariro uye maitiro aizotiparadzanisa naye. (Ako. 1:21) Uye petakadzipira kuna Djehovha tobhabhatidzwa, ayena wakatipasa zviro zvakanaka, hana yakanaka uye ushamwari wepadhuze naye.​—1Pe. 3:21.

5. Kuparidzira kunotibetsera kudini kuziya kuti Djehovha akanaka?

⁵ Patinoita basa rekuparidzira, tinokwanisa kuona kunaka ka Djehovha. Imwimwi muri munhu wakanyararisa here? Ajinji edu i anhu akanyararisa. Pamweni musati magara umwe we Apupuri a Djehovha, mairangarira kuti: ‘Inini andizombokwanisi kugogodza musuwo we munhu wandisikazii kuti ndirekete nge zve Bhaibheri.’ Asi nyamasi uno, imwimwi maakukwanisa kuzviita uye nguwa dzese. Norubetso ra Djehovha, imwimwi makafundira kugara no cido cekuda kuparidzira! Kupinda izvona, pamunonga meciparidzira munozwa rubetso ra Djehovha nge mishobo yakawanda. Ngo muezaniso, pamunogumira muzondi, Djehovha anomubetsera kuti murumbwe makaterama. Kana mukagumira samuzi unopangidza kupfarira, Djehovha anomubetsera kuti muedzurire tsamba yakasisira kuti mumupangidze. Uye kunyazi anhu akawanda e mu ndima yenyu asikapangidzi kupfarira, Djehovha anomupasa simba rekuenderera mberi.​—Dje. 20:7-9.

6. Cipangidzo cipi catinaco cekuti Djehovha akanaka?

⁶ Mushobo umweni unopangidzwa ndi Djehovha kuti akanaka, nge we kutifundisa kuita basa rekuparidzira. (Ju. 6:45) Ngo muezaniso, pamisangano we pakati pe sumana tinofundiswa mazano angatibetsera mu basa rekuparidzira uye tinokohomedzeswa kuti tiaseenzese patinoparidzira amweni. Pa kutanga, pamweni tingatya padoko kuedza mushobo mupsva wekuparidzira. Asi patinoita izvi tingakwanisa kuona kuti mushobo mupsva uu wekuparidzira unopasa mugumisiro wakanaka mu ndima yedu. Kupinda izvona, misangano uye magungano edu anotikohomedzesa kuedza kubuda mu basa rekuparidzira nge mishobo yakasiyana-siyana. Uye izvona zvingatoda kuti tisiye mbuto yedu yetakadjaira. Asi patinoita izvi, tinonga tecipasa Djehovha mikana yekuti atikomborere. Ngationei zvino makomborero atingatambira kana tikaseenzesa mishobo mipsva yekupasa Djehovha zviro zvakanakisisa zvedu pasinei no migariro yedu ye zviro. Pedzepo, ticaona kuti ticaonei kuti tigumire zvinangwa zvedu.

7. Makomborero api atinotambira paya patinopeta masimba kuti tiite zvakawanda mu basa rekuparidzira?

⁷ Ushamwari wedu na Djehovha unobambirira kubamba. Onai muezaniso we mukuru umweni unozwi Samuel. * Iyena no mukadzi wake anoseenzera ku Colômbia. Awona aipfara nge kuseenza hinga mapionero mu ungano yawo, asi aida kuita zvakawanda mu basa rekuparidzira. Hino akasanangura kuenda ku ungano imweni yaida rubetso. Kuita cinjo ii kainga kusiripi nyore. Samuel unoti: “Isusu takateedzera zvinorekethwa pana Mateu 6:33 uye takamboima kutenga zviro zvetainga tisikadi. Asi  cakanyanya kutinetsa cainga cekusiya nyumba yedu. Iyona yainga yakawakwa nge mushobo wataida uye tainga tapedza kuipagari.” Mu basa ripsva, kazado ii yakaona kuti yaikwanisa kurarama ecitambira mare yakashomanika kupinda yaaitambira kare. Samuel unoenderera mberi yeciti: “Isusu takaona kuti Djehovha anotungamirira kudini zviro zvatinoita uye anodaira minamato yedu. Takaona kuti ayena arikupfara na isusu uye takakwanisa kuona rudo rake nge mushobo mupsva.” Pano mushobo umweni wekutunhudzira basa renyu rekuparidzira here? Kana uripo, gondai henyu kuti izvona zvicabambisa ushamwari wenyu na Djehovha uye kuti ayena acamubetsera pa zviro zviya zvamunoda.​—Pis. 18:25.

8. Mafundei pa muezaniso wa Ivan na Viktoria?

⁸ Isusu tinozwa mupfaro wakakura. Ivan na Viktoria anoseenza hinga mapionero ku Quirguistão. Awona akasanangura kusama kugara no upenyu usina zvakawanda kuti agare akagadzirira kuita basa ripi haro kutobatanidzawo basa rekuwaka. Ivan unoti: “Isusu takabatikana mu basa rekuwaka. Pakupera ke zuwa, taizwa takaremba, asi taizwao tinorunyararo uye takagutsikana ngekuti tainga taseenzesa simba redu rese mu basa re Umambo. Kupinda izvona, takashamwaridzana no anhu akawanda uye tino zviedzuriro zvakawanda zvinopfadza. Zvese izvi zvakatipasa mupfaro wakakura.”​—Mk. 10:29, 30.

9. Hanzvadzi ii yainga ino mugariro unoshupha, yakakwanisa kudini kutunhudzira basa rayo rekuparidzira, uye migumisiro yakhona ngaipi?

⁹ Isusu tingakwanisa kugumira mupfaro mu basa redu kuna Djehovha kunyazi tecisongana no migariro ye zviro inoshupha. Ngo muezaniso, Mirreh, mufirhwakadzi umweni unogara ku nyika ye ku África Ocidental, waiseenza hinga médica. Paakapaswa phenjeni, wakatanga kuseenza hinga pionera. Mirreh uno nhenda yakakura ye makodo. Paanoparidzira nyumba no nyumba, iyena unokwanisa kugara nguwa imwe basi, asi paanoparidzira ne cingoro, iyena unokwanisa kuseenza nguwa yakareba. Iyena uno fundo dzakawanda dze Bhaibheri uye dzimweni dzakhona unodziita eciseenzesa thurufunu. Cinyi cakaitisa kuti Mirreh ade kuita zvakawanda kuna Djehovha? Iyena unoti: “Mwoyo wangu unodzara nge rudo kuna Djehovha uye kuna Djesu Kristu. Uye inini ndinokumbira Djehovha nguwa dzese ndeciseenzesa munamato kuti ayena andibetsere kuita zvese zvandinokwanisa pa basa rake.”​—Mt. 22:36, 37.

10. Maererano na 1 Pedru 5:10, Djehovha anopasei ku aya anoda kuita zvakawanda mu basa rake?

¹⁰ Takafundiswa zvakawanda ndi Djehovha. Kenny, pionero unoseenza ku Maurício wakakwanisa kuzwa izvona. Paakafunda cokwadi, iyena wakasiya cikora cepamusoro-soro uye wakapinda mu basa re nguwa yakadzara. Iyena unoti: “Inini ndinoedza kugara no muitiro we muphorofita Isaya wekuti: ‘Ndiri pano! Nditumei!’” (Isa. 6:8) Kenny wakamboseenza mu mabasa akawanda ekuwaka, uye wakabetserawo pakuturikira mabhuku emureketero wake. Iyena unoti: “Inini ndakafundiswa zviro zvaidikanwa kuti ndikwanise kuita basa randakapaswa.” Asi Kenny wakafundira zviro zvakawanda pane kuziya basi basero. Iyena unotunhudzira eciti: “Inini ndakafundira kuona matii andakarembera uye ndakafundira kuona mawara andinodikana kusakurira kuti ndinyase kuseenzera Djehovha.” (Erengai 1 Pedru 5:10.) Imwimwi mungakwanisa kudzipirawo kuti mufundiswe na Djehovha here?

11. Hanzvadzi dzimweni dze ku Coreia do Sul dzakapeta masimba api kuti dziite basa rekuparidzira uye ngaipi migumisiro yakhona? (Onai foto ye pakapa.)

¹¹ Kunyazi aparidzi agara no basa anodikana kufundiswa mishobo mipsva ye basa. Mukati  me nhenda ye COVID-19, akuru e mu ungano imweni ye ku Coreia do Sul akatara kuti: “Nge ndaa ye uthongo, hama dzimweni dzairangarira kuti dzainga dzisikazokwanisi kuita basa rekuparidzira. Asi zvino, idzona dzaakukwanisa kuparidzira dzeciseenzesa vhidhiyokoferesiya. Hanzvadzi nhatu dzino makore anodarika 80 dzakafundira kuseenzesa komputadhori, uye nyamasi uno dzaakuparidzira mazuwa ese.” (Pis. 92:14, 15) Munoda kutunhudzira basa renyu rekuparidzira uye modzionera mwega kuti Djehovha akanaka here? Onai zviro zvinganani zvamungaita zvingamubetsera kuti mugumire cinangwa icona.

12. Djehovha anopikirei ku aya anomugonda?

¹² Fundirai kugonda na Djehovha. Kana tikamugonda uye tomupasa zvakanakisisa zvedu, Djehovha anopikira kudurura makomborero ake katiri. (Mar. 3:10) Fabiola, hanzvadzi inogara ku Colômbia yakawona Djehovha ecidzadzisa rugondeso iri kaari. Iyona yaida maningi kuseenza hinga pionera mu masure mekubhabhatidzwa. Asi mwamuna pamwepo no ana ake aithemba mare yaitambirhwa no hanzvadzi ii. Hino pakaguma nguwa ye phenjeni, iyona yakaita munamato yecideketera kuna Djehovha kuti amubetsere. Iyona inoti: “Kajinji kakhona, zvinotora nguwa kuti phenjeni ibude, asi kuna inini yakabuda mu masure me mwedzi umwe basi. Zvezvirokwazvo ici cishamiso!” Mu masure me mwedzi miiri, Fabiola wakatanga kuseenza hinga pionera. Nyamasi uno, iyena waano makore anodarika 70 uye urikuseenza hinga pionera ke makore 20. Pa  nguwa yese ii, iyona yakabetsera anhu anokwana kuita 8 kuti agume pakubhabhatidzwa. Iyona inoti: “Kunyazi ndecizwa kuremba nguwa dzimweni, Djehovha anondibetsera mazuwa ese kuti ndikwanise kuita zvese zvandakaronga.”

13-14. Miezaniso ipi ingakwanisa kumubetsera kuti mugonde na Djehovha uye kuti muite zvakawanda mu basa rekuparidzira?

¹³ Teedzerai aya akagonda kuna Djehovha. Bhaibheri rino miezaniso yakawanda ye anhu akapeta masimba mu basa ra Djehovha. Kajinji kakhona, ndiwona aidikana kutanga kuita ciro asati atambira makomborero akanaka a Djehovha. Ngo muezaniso, ‘Abrahamu wainga asikazii kaaidikana kuenda.’ Kunyazi zvakadaro, iyena wakazotambira makomborero a Djehovha mu masure mekubuda pa nyumba. (Ahe. 11:8) Djakobo wakatambira makomborero akanaka mumasure mekupondana no ngirozi. (Ge. 32:24-30) Dzinza re Aisraeri peraida kupinda mu Nyika yakapikirhwa, anhu ese akazodarika murambo mu masure mekuti apristi atsika mvura ye murambo wa Djorodhani yaierera ne simba.​—Djos. 3:14-16.

¹⁴ Iriyoo miezaniso ye Apupuri a Djehovha e mazuwa ano akagonda Djehovha uye akapeta masimba kuti aite zvakawanda mu basa rake. Ngo muezaniso, hama inozwi Payton no mukadzi wayo Diana, aipfarira kuerenga nge zve hama dzakatutsira basa rawo rekuparidzira hingana aya anobuda pa mindandanda ino musoro unoti “Vakazvipa Nemwoyo Unoda.” * Payton unoti: “Pataiyerenga maeshiperiensiya awo, zvaaita hingana tirikuringira anhu arikurhya cekurhya cinonaka. Patairumbwa teciringira, cido cedu cekuda ‘kuona kuti Djehovha akanaka caitunhudzirika.’” Nokuhamba ke nguwa, Payton na Diana akafuruka kuti aende koseenzera ku mbuto yaidiwa aparidzi. Makakwanisa kuona mukana wekuerenga mundandanda uu here? Makamboona mavhidhiyo Kuparidza Kunzvimbo Iri Kwayo Yoga—Australia uye Kuparidza Kunzvimbo Iri Kwayo Yoga—​Ireland ari mu jw.org? Mavhidhiyo aya angakwanisa kumubetsera kuti mugumire mishobo yekututsira basa renyu kuna Djehovha.

15. Ngei zvakanaka kunyasa kusanangura shamwari?

¹⁵ Sanangurai zvakanaka shamwari. Tinomukana wekuda kuedza cokurhya cakasiyana kana tino anhu anocipfarira. Zvimwezvimwezvoo, kana tikagara no anhu anoseenzesa upenyu wawo pakuseenzera Djehovha, ticagara no mukana wekuda kuita zvakawanda mu basa re Umambo. Ndizvona zvakaitika no kazado Kent na Veronica. Kent unoti: “Shamwari uye anyaukama edu akatikohomedzesa kuti tiedze mishobo mipsva ye basa. Kushamwaridzana no anhu anokanda Umambo wa Mwari pa mbuto yekutanga, kakatipasa rugondo rekuedza zviro zvipsva.” Nyamasi uno, Kent na Veronica anoseenza hinga mapionero kamare ku Sérvia.

16. Maererano no mufanikiso wa Djesu uri pana Ruka 12:16-21, ngei tecidikana kugara takagadzirira kudzipira?

¹⁶ Dzipirei kuna Djehovha. Isusu atidikani hedu kusiya zviro zvese zvakanaka kuti tipfadze Djehovha. (Mup. 5:19, 20) Asi kana kutya kuruza zviro kecitiita kuti tisaite zviro zvakawanda pakuseenzera Djehovha, tingaguma pakuita cishaishi cakaizwa no mwanarume unorekethwa pa mufanikiso wa Djesu. Mwanarume uu, wainyanya kuda upenyu wakanaka zvekuti wakasiya Mwari sure. (Erengai Ruka 12:16-21.) Christian hama inogara ku França inoti: “Inini ndainga ndisikaseenzesi zvakanaka nguwa no simba rangu kuna Djehovha kana ku mhuri yangu.” Iyena no mukadzi wake akasanangura kugara mapionero. Asi  kuti adzadzise cinangwa ici, awona akabuda pa basa rawo. Kuti adziriritire, awona akatanga kuseenza mabasa ekucenesa uye akafundira kugara no zviro zvisikazi kuwanda. Kudzipira kaakaita kakabetsera here? Christian unoti: “Isusu taakupfarira maningi kuparidzira uye tinopfara maningi patinoona afundi edu uye aya anopfarira ecifunda nge zva Djehovha.”

17. Cinyi cingatipingaidza kuedza kuita mishobo mipsva pa basa rekuparidzira?

¹⁷ Garai makagadzirira kuedza mishobo mipsva ye basa. (Zvi. 17:16, 17; 20:20, 21) Shirley, pionera weku Estados Unidos wakacinja maparidzire aaiita pa nguwa yo nhenda ye COVID-19. Pakutanga, iyona yaitya kuparidzira eciseenzesa thurufunu. Mukati mesumana yekuvhakacirhwa no muonereri we nharaunda, Shirley wakabetserhwa maningi. Kubvira apona, iyena unoparidzira nguwa dzese eciseenzesa mushobo iwona. Iyena unoti: “Pakutanga zvaityisa, asi zvino ndaakupfarira kuparidzira no thurufunu. Tirikukwanisa kuparidzira anhu akawanda kudarika pataiparidzira pa nyumba no nyumba!”

18. Zvinyi zvingatibetsera patinosongana no zvinetso pa zvirongwa zvedu zvekuita zvakawanda kuna Djehovha?

¹⁸ Itai urongwa uye useenzesei. Kana mukasongana no zvinetso, itai munamato kuna Djehovha. Pedzepo, seenzesai ndangariro dzenyu kuti muite urongwa wamunokwanisa kuteerera. (Zvie. 3:21) Sonia pionera unoseenza kucikwata comureketero weciromani ku Europa, unoti: “Ndinopfarira kutara urongwa wangu pa phepa. Pedzepo ndinosiya phepha iri pa mbuto iri pamhene. Ndakanamira phepha pa aparadhori yangu rino mufanikiso we strada ino mhararano no makwanza mairi. Pandinoda kuita cisananguro, ndinoringira mufanikiso iwona ndorangarira kuti: ‘Cisananguro ici, cicanditora mu gwanza ripi?’” Sonia unoedza kugara no maonero akanaka kana pakamuka cinetso. Iyena unoti: “Mugariro wese mupsva wakaita hinga ukutira unofunga gwanza rangu kana kuti rakaita hinga bhridji rinotiendesa ku dii rimweni​—zvese zvicatsamira pamiitiro yangu.”

19. Tinodikana kushinga kuitei?

¹⁹ Djehovha anotikomborera nge mishobo yakawanda. Uye isusu tingakwanisa kupangidza kaari kuti tinotenda nge makomborero ese aanotipasa. Tingazviita kudini? Ngokuita zvese zvatinokwanisa kuti tikudze zina ra Djehovha. (Ahe. 13:15) Pamweni Imwimwi mungakwanisa kugumira mishobo mipsva yekutunhudzira basa renyu kuna Djehovha. Kana mukadaro, mucatambira makomborero akawanda a Djehovha. Ndiyo ndaa garai makagadzirira mazuwa ese ‘kuedza uye kuona kuti Djehovha akanaka’. Ngo kudaro, mucaita hingana Djesu akabhuya kuti: “Zvekurhya zvangu ndikuita kuda ka uya akandituma uye kupedza basa rake.”​—Ju. 4:34.