1-2. Ia au i te Salamo 34:8, e nafea tatou e haapii ai no nia i to Iehova maitai?

 A FERURI na e horoahia ˈtu te tahi maa ta oe i ore i tamata aˈenei. E nehenehe oe e ite no nia i tera maa ma te hiˈo, hauˈa, ite eaha tei tuuhia i roto aore ra e ui i te manaˈo o vetahi ê no nia i tera maa. Te ravea papu roa ˈˈe râ e ite ai oe mea au anei na oe tera maa, ma te tamata roa ˈtu ïa i te reira.

² E nehenehe tatou e haapii no nia i to Iehova maitai ma te taio i te Bibilia e i ta tatou mau papai, oia atoa ma te faaroo ia vetahi ia faatia eaha te mau haamaitairaa ta ratou i fanaˈo no ǒ mai ia Iehova. E ite mau râ tatou i te maitai o Iehova ma te “tamata” roa ˈtu i te reira. (A taio i te Salamo 34:8.) Teie te tahi hiˈoraa. Te hinaaro ra tatou e rave i te taviniraa taime taatoa. E titauhia râ ia tatou ia rave i te mau haapaeraa i roto i to tatou oraraa. Peneiaˈe mea pinepine tatou i te taioraa i ta Iesu i parau: Ia tuu tatou i te Faatereraa arii na mua roa i roto i to tatou oraraa, e horoa mai Iehova i ta tatou e hinaaro mau ra. Tera râ, aita â tatou i ite atura i te reira. (Mat. 6:33) Teie râ, ia tuu tatou i to tatou tiaturiraa i nia i ta Iesu i fafau, e faaiti tatou i ta tatou mau haamâuˈaraa, e faatano tatou i ta tatou hora ohipa e e rave hau atu â tatou i roto i te taviniraa. Ma te na reira, e ite maitai tatou e te tâuˈa mau ra te Atua ia tatou. I reira ïa tatou e tamata ˈi i te maitai o Iehova.

3. Ia au i te Salamo 16:1, 2, o vai te fanaˈo i te maitai o Iehova?

³ Mea maitai Iehova i “nia i te mau mea ora atoa.” (Sal. 145:9; Mat. 5:45) I nia iho â râ i ta ˈna mau tavini haapao  maitai. Te fanaˈo nei hoi ratou e rave rahi haamaitairaa no ǒ mai ia ˈna. (A taio i te Salamo 16:1, 2.) E hiˈopoa anaˈe te tahi mau maitai ta Iehova e horoa mai ra na tatou.

4. E nafea Iehova e faaite ai i to ˈna maitai i te feia e faafatata ra ia ˈna?

⁴ I te mau taime atoa e haapii ai tatou no nia ia Iehova, e ite tatou i te maitai i roto i to tatou oraraa. A rahi ai to tatou here ia Iehova, e tauturu mai o ˈna ia haapae i te mau manaˈo e peu o te faataa ê ra ia tatou ia ˈna. (Kol. 1:21) E ia pûpû tatou i to tatou ora ia Iehova a bapetizo atu ai, e horoa mai o ˈna hau atu â maitai, mai te hoê manaˈo haava maitai e te auhoaraa piri roa e o ˈna.—Pet. 1, 3:21.

5. E nafea tatou e ite ai i te maitai o Iehova i roto i te pororaa?

⁵ E tamau tatou i te ite i te maitai o Iehova i roto i te pororaa. E taata mamahu paha oe? Peneiaˈe hou oe a riro ai ei Ite no Iehova, aita oe i manaˈo noa ˈˈe e haere oe e poro i tera e tera fare e e farerei oe i te taata ta oe i ore i matau no te faaite i ta te Bibilia e parau ra. I teie râ mahana, tera ta oe e rave nei. Hau atu â, maoti te tauturu a Iehova, te oaoa ra oe i roto i te pororaa. Te ite mau ra oe i te turu a Iehova i roto i te mau tupuraa atoa. Ua horoa o ˈna ia oe i te hau i mua i te hoê taata iria. Ua tauturu atoa oia ia oe ia haamanaˈo i te hoê irava ta oe i hinaaro e faaite i te hoê taata. E ua horoa oia i te puai ia tamau oe i te poro noa ˈtu aita te feia i roto i ta oe tuhaa fenua e tâuˈa ra i te poroi o te Bibilia.—Ier. 20:7-9.

6. E nafea te mau faaineineraa ta tatou e fanaˈo ra e faaite ai i to Iehova maitai?

⁶ E faaite atoa Iehova i to ˈna maitai ma te faaineine ia tatou no te poro. (Ioa. 6:45) I ta tatou mau putuputuraa, te fanaˈo nei tatou i te mau hiˈoraa no te aparauraa i te taata i roto i te pororaa e te faaitoitohia ra tatou ia na reira. I te omuaraa, ua taiâ rii paha tatou i te faaohipa i te reira. I to tatou râ tamataraa, ua ite tatou i te maitai. I te mau putuputuraa e tairururaa, te faaitoitohia ra tatou ia tamata i te mau tuhaa atoa o te taviniraa. E taiâ paha tatou i te rave i te tahi mea apî. Ia na reira râ tatou, e haamaitai mai Iehova i ta tatou mau tutavaraa. E hiˈopoa anaˈe te tahi mau haamaitairaa ta tatou e fanaˈo ia tutava tatou no te horoa i te mea maitai roa ˈˈe na Iehova i roto i to tatou tupuraa tataitahi. E hiˈo atoa mai tatou e nafea ta tatou mau fa e naea ˈi.

7. Eaha te haamaitairaa ta tatou e fanaˈo ia rave hau atu â tatou i roto i te taviniraa?

⁷ E piri atu â tatou ia Iehova. Teie te hiˈoraa o Samuel, * te hoê matahiapo no Colombie. E pionie raua ta ˈna vahine. Ua hinaaro râ raua e tauturu i te hoê amuiraa e hinaaro-rahi-hia te feia poro. Ia naea ta raua fa, ua titauhia ia haapae raua i te tahi mau mea. Te na ô ra Samuel: “Ua faaohipa mâua i te Mataio 6:33 e ua faaea atoa i te hoo mai i te mau mea ta mâua i ore i hinaaro mau. Ua vaiiho atoa mâua i to mâua fare.” I to raua haereraa i roto i ta raua amuiraa apî, ua iti roa mai ta raua mau haamâuˈaraa. Te na ô atoa ra Samuel: “Ua ite roa mâua i te aratairaa a Iehova e i te pahonoraa o ˈna i ta mâua mau pure. Ua ite mau mâua i to ˈna farii maitai e to ˈna here.” E nehenehe anei ta oe e rave hau atu â i roto i ta oe taviniraa? Ia na reira oe,  e piri roa ‘tu â oe ia Iehova e e ite maitai oe e te tâuˈa mau ra o ˈna ia oe.—Sal. 18:25.

8. Eaha te haapii mai i te hiˈoraa o Ivan raua Viktoria?

⁸ E oaoa tatou i roto i ta tatou taviniraa. E pionie Ivan raua ta ˈna vahine o Viktoria i Kyrgyzstan. Ua rave raua i te mau haapaeraa i roto i to raua oraraa no te tavini atu â ia Iehova. Ua ohipa atoa raua i roto i te mau ohipa paturaa a te faanahonahoraa. Te na ô ra Ivan: “Ua tutava mâua i te rave maitai i te mau ohipa atoa tei horoahia ia mâua. Noa ˈtu te rohirohi i te hopea o te mahana, ua oaoa mau mâua no te mea ua horoa mâua i to mâua puai atoa no te turu i te ohipa a te Faatereraa arii a te Atua. Ua oaoa roa atoa mâua i te ohipa e te mau taeae e tuahine tei riro roa mai ei hoa no mâua.”—Mar. 10:29, 30.

9. Noa ˈtu te mau tupuraa fifi ta Mirreh i farerei, eaha ta ˈna i rave no te rave hau atu â i roto i te taviniraa, e eaha te maitai i itehia?

⁹ Noa ˈtu te mau tupuraa fifi ta tatou e farerei, e nehenehe tatou e oaoa noa i roto i ta tatou taviniraa ia Iehova. Teie te hiˈoraa o Mirreh, te hoê tuahine paari no Afirika. E taote o ˈna na mua ˈˈe. I te faatuhaaraahia o ’na, ua riro mai o ˈna ei pionie. Aita o Mirreh e nehenehe e hahaere maoro, hoê noa ïa hora ta ˈna e nehenehe e poro i tera e tera fare. Tera râ, ua nehenehe o ˈna e horoa hau atu â ma te poro i te vahi taata. Mea rahi ta ˈna mau farerei-faahou-raa e ta ˈna mau haapiiraa Bibilia, e vetahi o ratou, mea na roto ïa i te niuniu paraparau. Eaha tei turai ia Mirreh ia rave hau atu â no Iehova? Te na ô ra o ˈna: “E rahi atu â to ˈu here i te Atua e i te Mesia. E pure tamau vau ia Iehova no te ani i te tauturu ia nehenehe au e rave hau atu â i roto i ta ˈu taviniraa.”—Mat. 22:36, 37.

10. Ia au i te Petero 1, 5:10, eaha ta Iehova e horoa i ta ˈna mau tavini o te rave hau atu â i roto i te taviniraa?

¹⁰ E tamau Iehova i te faaineine ia tatou. Teie te hiˈoraa o Kenny, te hoê pionie e tavini ra i nia i te hoê motu. I to ˈna haapiiraa i te parau mau, ua faarue o ˈna i te haapiiraa teitei, ua bapetizo ia ˈna e ua rave i te taviniraa taime taatoa. Te na ô ra oia: “Ua rave au i te mau parau ta te peropheta Isaia i faahiti, oia hoi ‘Teie au! A tono ia ˈu!’” (Isa. 6:8) Ua ohipa Kenny i roto e rave rahi paturaa a te faanahonahoraa e ua huri atoa o ˈna i te mau papai niuhia i nia i te Bibilia na roto i to ˈna iho reo. Te na ô faahou ra Kenny: “Ua faaineinehia vau ia aravihi atu â i roto i te mau ohipa atoa ta ˈu e rave.” E ere râ tera anaˈe, ua hau atu â ta ˈna i fanaˈo. Te na ô ra oia: “Ua ite au i ta ˈu mau taotiaraa e eaha te mau huru maitatai e titauhia ra ia ˈu ia faatupu no te haamaitai i to ˈu huru ei tavini na Iehova.” (A taio i te Petero 1, 5:10.) Peneiaˈe e nehenehe outou e faatano i to outou oraraa no te fanaˈo i te faaineineraa no ǒ mai ia Iehova.

11. Eaha ta te tahi mau tuahine i rave no te horoa hau atu â i roto i te taviniraa e eaha te mau maitai ta ratou i fanaˈo? (A hiˈo i te hohoˈa i te api matamua.)

¹¹ E nehenehe atoa te mau taeae e tuahine paari e fanaˈo i te tahi mau faaineineraa. I te roaraa o teie maˈi pee COVID-19, teie ta te mau matahiapo o te hoê amuiraa i Korea apatoa i tapao: “No to ratou maˈi, ua manaˈo vetahi mau taeae e tuahine e eita e haere ia ratou ia poro. I teie nei râ, te poro nei ratou na roto i te mau ravea roro uira. E toru tuahine 80 tiahapa matahiti tei haapii e nafea ia faaohipa i te mau ravea apî no te poro. I teie nei, te oaoa nei ratou i roto i te taviniraa.” (Sal. 92:14, 15)  Te hinaaro ra anei oe e rave hau atu â i roto i ta oe taviniraa no te tamata i te maitai o Iehova? Teie te tahi mau ravea e tauturu ia oe ia naea tera fa.

12. Eaha ta Iehova i fafau i te feia e tiaturi ra ia ˈna?

¹² A tiaturi ia Iehova. Ua fafau o ˈna e manii i nia ia tatou e rave rahi haamaitairaa ia tiaturi tatou ia ˈna e ia horoa tatou i te mea maitai roa ˈˈe na ˈna. (Mal. 3:10) Tera mau ta Fabiola, te hoê tuahine no Colombie i ite. I muri aˈe i to ˈna bapetizoraahia, ua hinaaro o ˈna e riro ei pionie tamau. Aita râ ta ˈna e nehenehe no te mea o ˈna te rave ra i te ohipa no te aupuru i ta ˈna tane e i ta raua na toru tamarii. I to ˈna râ faatuhaaraahia, ua imi o ˈna i ta Iehova tauturu na roto i te pure. Te na ô ra o ˈna: “Eita te moni ruau e aufau-oioi-hia. Ta ˈu râ, i roto noa hoê avaˈe te toparaa mai. E au ra e semeio teie!” E piti avaˈe i muri mai, ua riro Fabiola ei pionie. I teie mahana, e 70 matahiti to ˈna e a 20 matahiti to ˈna taviniraa ei pionie. I tera roaraa, ua tauturu o ˈna e vaˈu taata ia riro ei Ite no Iehova. Te na ô ra oia: “Noa ˈtu e paruparu vau i te tahi taime, e tauturu noa mai Iehova i roto i ta ˈu taviniraa i te mau mahana atoa.”

13-14. Eaha te mau hiˈoraa o te tauturu ia tatou ia tiaturi ia Iehova e ia rave hau atu â i roto i ta tatou taviniraa?

¹³ Te hiˈoraa o te mau tavini a Iehova tei tiaturi ia ˈna. I roto i te Bibilia, mea rahi te  hiˈoraa o te mau tavini a Iehova tei tamau i te tutava i roto i ta ratou taviniraa. E rave rahi atoa o ratou tei fanaˈo i te haamaitairaa taa ê i muri iti noa ˈˈe i to ratou faaiteraa i to ratou tiaturi papu i te Atua. Teie te tahi hiˈoraa. I muri noa ˈˈe i to Aberahama faarueraa i to ˈna fare no te haere i te hoê vahi “aita oia i ite,” ua haamaitai Iehova ia ˈna. (Heb. 11:8) I muri aˈe i to Iakoba taputôraa e te hoê melahi, ua fanaˈo o ˈna i te hoê haamaitairaa taa ê. (Gen. 32:24-30) A fatata ˈi te nunaa Iseraela i te tomo i te Fenua tǎpǔhia, i te taahiraa iho â te mau tahuˈa na roto i te pape Ioridana, ua mau te pape e ua nehenehe te nunaa e na roto atu no te haere i te tahi atu pae.—Ios. 3:14-16.

¹⁴ E faufaa-atoa-hia tatou i te hiˈoraa a to tatou mau taeae e tuahine o te tamau ra i te tiaturi ia Iehova e o te tutava nei i te horoa i te mea maitai roa ˈˈe i roto i te taviniraa. Ei hiˈoraa, mea au na taeae Payton raua ta ˈna vahine o Diana e taio i te anairaa tumu parau “Ua horoa ratou ia ratou iho” o te faatia ra eaha ta to tatou mau taeae e tuahine i rave no te horoa hau atu â i roto i ta ratou taviniraa. * Te na ô ra Payton: “Ia taio mâua i tera mau faatiaraa, mai te huru ra ïa tei mua mâua i te hoê taata e amu ra i ta ˈna maa aminamina maitai.” Na te reira i turai ia Payton raua Diana ia haere atoa e tavini i te vahi e hinaaro-rahi-hia te feia poro. Ua taio anei oe i tera mau tumu parau? E ua mataitai anei oe i te mau video Pororaa i te tuhaa fenua moemoe i Auteralia e Pororaa i te tuhaa fenua moemoe i Irelane piahia i nia i te jw.org? * E nehenehe te reira e tauturu ia oe ia rave hau atu â i roto i ta oe taviniraa.

15. Ia maiti maitai tatou i to tatou mau hoa, e nafea te reira e tauturu ai ia tatou?

¹⁵ A maiti maitai i to oe mau hoa. Mea ohie aˈe paha no tatou ia haamatau i te hoê maa apî mai te peu mea au na te feia ta tatou e apiti nei i tera maa. Hoê â atoa ia amuimui tatou e te feia e tuu ra i te taviniraa ia Iehova na mua roa i roto i to ratou oraraa. I reira ïa tatou e turaihia ˈi ia rave hau atu â i roto i ta tatou taviniraa. Tera ta Kent raua Veronica i ite. Te na ô ra Kent: “Ua turai te mau hoa e fetii ia mâua ia tamata i te tahi atu mau tuhaa o te taviniraa. Ma te amuimui i te feia o te tuu ra i te Faatereraa arii na mua roa i roto i to ratou oraraa, e rahi atu â to mâua tiaturi ia Iehova no te rave i te hoê huru taviniraa apî.” I teie mahana, te tavini nei Kent raua Veronica ei pionie taa ê i Serbie.

16. Mai ta te faahohoˈaraa a Iesu e faaite ra i roto i te Luka 12:16-21, no te aha mea titauhia ia rave i te mau haapaeraa no te tavini atu â ia Iehova?

¹⁶ A rave i te mau haapaeraa no te tavini atu â ia Iehova. Eita e titauhia ia haapae i te mau mea atoa no te tavini ia Iehova. (Koh. 5:19, 20) Tera râ, mai te peu eita tatou e hinaaro e rave hau atu â i roto i ta tatou taviniraa no te mea eita tatou e hinaaro e haapae i te tahi mau mea, e au ïa tatou i te taata i roto i ta Iesu faahohoˈaraa tei haapue i te taoˈa na ˈna ma te ore roa ˈtu e tâuˈa i te Atua. (A taio i te Luka 12:16-21.) Te na ô ra te taeae Christian no Farani: “Aita vau i horoa rahi i to ˈu taime e puai no Iehova e no to ˈu utuafare.” Faaoti atura raua ta ˈna vahine e tavini ei pionie. Ia naea râ tera fa, ua titauhia ia faarue raua i ta raua ohipa. Ei imiraa na raua, ua  rave raua i te ohipa tamâraa e ua haapii raua e nafea ia ora noa ˈtu aita i rahi ta raua moni. Ua tatarahapa anei raua i te faaotiraa ta raua i rave? Te na ô ra Christian: “Auê mâua i te oaoa i roto i te taviniraa! E rahi atu â to mâua oaoa ia ite i te mau piahi Bibilia e te feia ta mâua e hoˈi ra e farerei ia haapii no nia ia Iehova.”

17. Eaha te nehenehe e tapea ia tatou ia tamata i te mau ravea taviniraa apî?

¹⁷ A tamata i te mau ravea taviniraa apî. (Ohi. 17:16, 17; 20:20, 21) E pionie Shirley i Marite. I te roaraa o te maˈi pee COVID-19, ua titauhia ia taui o ˈna i ta ˈna huru pororaa. I te omuaraa, ua taiâ o ˈna i te poro na roto i te niuniu. I te tereraa mai te tiaau haaati, ua haapiihia o ˈna e nafea ia poro i te taata na roto i te niuniu e mai reira mai, te tamau nei oia i te poro na roto i tera ravea. Te na ô ra Shirley: “I te haamataraa, ua taiâ vau. I muri aˈe râ i to ˈu tamataraa, ua au roa vau! Mea rahi aˈe te taata ta matou e poro nei na roto i tera ravea i ta matou i farerei a poro ai i tera e tera fare.”

18. Eaha te tauturu ia tatou mai te peu e farerei tatou i te fifi a tamata ˈi tatou i te rave hau atu â i roto i te taviniraa?

¹⁸ A haamau i te fa e a ohipa ia naea te reira. Ia faaruru tatou i te fifi, e pure tatou ia Iehova ia tauturu ia tatou ia faaohipa maitai i to tatou aravihi ia feruri no te ite eaha te rave. (Mas. 3:21) Te tavini ra Sonia ei pionie i roto i te hoê pǔpǔ reo ê i Europa. Te na ô ra o ˈna: “E papai au i ta ˈu mau fa i nia i te hoê papie e e tuu atu vau i te hoê vahi e ite noa vau i te reira. I nia i ta ˈu airaa maa, te vai ra te hoê hohoˈa e faaite ra e piti purumu. Ia rave au i te hoê faaotiraa, e hiˈo vau i tera hohoˈa a feruri ai eaha te purumu ta ˈu e rave.” Aita Sonia i haamau noa i to ˈna feruriraa i nia i te mau fifi ta ˈna e faaruru ra. Te parau faahou ra o ˈna: “E nehenehe te mau tupuraa ta tatou e farerei e riro mai te hoê patu o te tapea ra ia tatou ia haere i mua. E nehenehe atoa râ te reira e riro mai te hoê eˈaturu o te tauturu ia tatou ia haere i mua.”

19. Eaha ta tatou e faaoti papu i te rave?

¹⁹ Te haamaitai nei Iehova ia tatou na roto e rave rau ravea. E nehenehe tatou e faaite i to tatou mauruuru ma te rave i te mau mea atoa e maraa ia tatou no te arue ia ˈna. (Heb. 13:15) E nehenehe tatou e feruri e nafea tatou ia rave hau atu â i roto i ta tatou taviniraa. E hau atu â ïa haamaitairaa ta tatou e fanaˈo no ǒ mai ia Iehova! I te mau mahana atoa, e imi anaˈe i te mau ravea atoa e tamata e e ite ai tatou i te maitai o Iehova. E parau ïa tatou mai ia Iesu i parau: “Ta ˈu maa, o te raveraa ïa i te hinaaro o tei tono mai ia ˈu e te faaotiraa i ta ˈna ohipa.”—Ioa. 4:34.