1, 2. Иегованың кайы хире ачы-буянныын билип алыр дизе, чүнү канчаар болза эки? (Ырлар 33:9).

КАЖАН-ДАА амзап көрбээниңер чемни силерге салып берген дижик. Ооң амданын билип алыр дээш, ону топтап көрүп, чыттап, кандыг рецепти-биле кылып каанын айтырып, ону чиген улустан амданы кандыг-дыр деп айтырып болур силер. Ынчалза-даа ол чемни бодуңар амзап көрбээн шааңарда, ооң чаагай азы чаагай эвезин канчап билип шыдаар силер?

² Ооң-биле дөмей, Иегованың кайы хире ачы-буянныын билип алыр дизе, Ыдыктыг Бижилгени, дептерлеривисти номчуп, Иегова оларны канчаар деткип турганын акы-угбалардан дыңнап болур. Ынчалза-даа Иегованың ачы-буянын долузу-биле миннир дизивиссе, ону бодувустуң чуртталгавыска көөр болзувусса эки. (Номчуптуңар: Ырлар 33:9.) Мындыг байдалды сагыштаалап көрээлиңер: силерниң долу бараалгаар күзелиңер бар дижик, а ону кылырда чуртталганы бөдүүнчүдүп алыры чугула деп билип турар силер. Бурганның Чагыргазын бирги черге салыр болза, Иегова арткан бүгү чүүлдү бээр деп, Иисус чугаалаан. Ол сөстерни силер хөй катап номчаан силер, ынчалза-даа чуртталгаңарда ооң күүсеттинип турарын амдыызында көрбээн чадавас силер (Мф. 6:33). Ынчалзажок силер Иисустуң аазаашкынынга бүзүреп, чарыгдалдарыңарны эвээжеткеш, ажылдаар графигиңерни өскерткеш, хөй суртаалдап эгелээн силер. Ам-на Иегованың силер дээш сагыш човап турарын ийи карааңар-биле көрүп турар силер. Өскээр чугаалаарга, Иегованың кайы хире ачылыын амзангырлап шенээн силер.

3. Ырлар 30:20-ден алырга, Иегова кымны тускай кылдыр йөрээп турар?

³ Иегова «бүгү улуска», безин ону билбес-даа улуска, буянныг (Ыд. ыр. 144:9; Мф. 5:45). Ынчалза-даа Аңаа ынак база  бүгү сеткил-сагыжындан бараалгап чоруур улусту Ол бир тускай кылдыр шаңнап турар. (Номчуптуңар: Ырлар 30:20.) Ооң ону канчаар кылып турарын сайгарып көрээлиңер.

4. Иегова Ооң-биле найыралы быжыгып эгелээн улуска ачы-буянын канчаар көргүзүп турар?

⁴ Иегованың сүмелерин ажыглаан санывыста-ла, чуртталгавыс эки талаже өскерлип турар. Иегова-биле найыралывыс быжыккан тудум, Аңаа ынакшылывыс күштелип, Ооң хөңнү чок үзел-бодалдардан болгаш чаңчылдардан адырлып алган бис (Кол. 1:21). А кажан чуртталгавысты Бурганга бараалгаткаш, сугга суктуруп алырывыска, Ол биске ачы-буянын оон-даа артык көргүскен. Ол биске арыг арын-нүүрнү болгаш Ооң чоок өңнүү болур арганы хайырлаан (1 Пет. 3:21).

5. Иегова ачы-буянын суртаал ажылынга киржип турар улуска канчаар көргүзүп турар?

⁵ Суртаал ажылынга база киржип тургаш, Иегованың ачы-буянын миннип турар бис. Силер пөрүк силер бе? Ындыг улус Иегованың Херечилериниң аразында хөй. Сугга суктурарының мурнунда силер танывазыңар улустуң бажыңнарын кезип, дыңнаксанчыг эвес медээни тарадыр мен деп черле бодаваан чадавас силер. А бөгүн ол ажыл чуртталгаңарның чугула кезии апарган. Безин чадаарда, суртаал ажылынга ынак апаар кылдыр Иегова силерге дузалаан! Ынчалза-даа Иегованың деткимчези мооң-биле төнмээн. Суртаал үезинде кижилер силерге каржы-хажагай харыылаарга, Иегова сагыш-сеткилиңерге оожургалды берип турган. А кажан дыңнакчыңар сонуургалды илередирге, аңаа тааржыр библейжи шүлүктү Иегова силерге сагындырган. Ооң күштүг деткимчезиниң ачызында силерниң чериңерде улус медээни шоолуг дыңнавас-даа болза, суртаалдаарын уламчылап турар силер (Иер. 20:7—9).

6. Иегова бисти өөредип тургаш, ачы-буянын канчаар көргүзүп турар?

⁶ Оон аңгыда, Иегова биске ачы-буянын көргүзүп, суртаалдаарынга өөредип турар (Ин. 6:45). Ажыл хүннеринде болуп турар ужуражылгаларда суртаалга чүнү чугаалаарын өөредип турар видеолардан чижектерни көрүп турар бис. Эгезинде чаңчыкпаан аргаларны ажыглаары коргунчуг бооп болур, ынчалза-даа ону кылыр болзувусса, улус бисти күзелдии-биле дыңнаар чадавас. Чыыштарга болгаш шуулганнарга бараалгалдың аңгы-аңгы хевирлерин шенеп көөрүн бисти бо-ла кыйгырар. Ынчалза-даа ону кылыр дизе, күжениишкиннерни үндүрер апаар бис. А ынчанмас болзувусса, Иегова чүнү йөрээр деп? Кандыг-даа байдалга Иеговага эң экини бээр дээш кызып турар улусту Ооң канчаар йөрээп турарын ам көрүптээлиңер. Ооң соонда бараалгалга салган сорулгаларывысты чедип алырынга чүү дузалап болурун сайгарар бис.

7. Бараалгалга оон-даа хөйнү кылырын кызар болзувусса, Иегова бисти канчаар шаңнаар?

⁷Иегова-биле оон-даа быжыг найырал. Колумбиядан Самуэль * дээр удуртукчу акывыстың чижээн көрүптээлиңер. Ол кадайы-биле кады чыыжынга долу бараалгап турган. Ынчалза-даа Иеговага оон-даа хөйнү бериксээш, олар суртаалчылар чедишпес черже көжерин шиитпирлээннер. Сорулгазын чедип алыр дээш, олар хөй-ле чүүлдерден ойталаан. Самуэль мынча дээн: «Матфей 6:33-те сүмени ажыглап, херек чок чүүлдерни сатпас апарган бис. Ынчалза-даа бажыңывысты каапкаш чорууру биске эң берге болган. Чүге дизе бажыңывысты чурттаарынга дыка эптиг кылып каан база аңаа кандыг-даа өревис чок турган». Чаа чедип келген черинге ооң мурнунда ап турган шалыңындан алды катап эвээш акшага чурттап болур деп Самуэль кадайы-биле билип каан. Ол улаштыр мынча дээн: «Иегова бисти углап-баштап, мөргүлдеривиске харыылап турар деп эскерген бис.  Иегованың ынакшылын болгаш деткимчезин кажангызындан-даа артык көрген бис». А силер суртаал ажылынга оон-даа хөйнү кылыр дээш, чуртталгаңарда бир-ле чүвени өскертип шыдаар силер бе? Ийе болза, Иеговага оон-даа чоок апаар силер, а Ол силер дээш албан сагыш човаар (Ыд. ыр. 17:26).

8. Иван биле Викторияның чижээнден чүнү өөренип алдыңар?

⁸Бараалгалдан оон-даа хөй өөрүшкү. Киргизияда эгелекчилер бооп бараалгап чоруур Иван биле Виктория дээр өг-бүлениң чугаалаан сөстериниң дугайында боданып көрээлиңер. Олар организацияның кандыг-даа даалгаларын күүседиринге белен боор дээш, чижээ, тудуг проектилеринге киржир дээш, бөдүүн амыдырап чорааннар. Иван мынча дээн: «Чаа даалга алган санывыста-ла, ол ажылче бажывыс-биле кире бээр турган бис. Кежээ шылай берген-даа болзувусса, бүгү күжүвүстү Иеговага берип турарывыс дээш аажок өөрүп турдувус. Оон ыңай дыка хөй эш-өөрлүг апарганывыска өөрүп, оларның-биле кайы хире солун ажылдажып турганывысты бо-ла сактып кээр бис» (Мк. 10:29, 30).

9. Кадыы багай угбавыска суртаалга идепкейлиг киржиринге чүү дузалап турар база ооң түңнели кандыг болган?

⁹ Берге байдалдарда безин, Иеговага бараалгал биске өөрүшкүнү эккеп турар. Барыын Африкада чурттап чоруур Мирей дээр улгады берген дулгуяк угбавыстың чижээ ону бадыткап турар. Ооң мурнунда ол эмчи чораан, а пенсияже үнген соонда, эгелекчилей берген. Мирейниң чүстери аарыг, ынчангаш аңаа кылаштаары берге. Бажыңнар кезип суртаалдап тургаш, ол бир шактан хөйнү суртаалдап шыдавас. А стенди-биле ол элээн үр суртаалдаптар. Мирейниң катап барып турар база Библия өөренип турар улузу хөй, оларның чамдыызы-биле ол телефон таварыштыр өөренип турар. Бараалгалга идепкейлиг киржиринче Мирейни чүү оттуруп турар? Ол мынча дээн: «Мен Иеговага болгаш Иисуска дыка ынак мен. Оон Иегова меңээ бараалгалга оон-даа хөйнү кылырынга дузалаар кылдыр, үргүлчү мөргүүр чордум» (Мф. 22:36, 37).

10. 1 Пётр 5:10-дан алырга, бараалгалга хөйнү кылыксап турар улусту чүү манап турар?

¹⁰Немелде өөредилге. Маврикияда эгелекчи бооп бараалгап чоруур Кенни акыйга ол ёзулуг белек болган. Ол алыс шынны билип алган соонда, университетте өөредилгезин каапкаш, сугга суктуруп алгаш, долу бараалгап эгелээн. Кенни мынча дээн: «Исайя медээчиниң „Мени айбылап чорудуп көрем!“ дээн сөстерин мээң чуртталгамда девизим боорун күзээр чордум» (Иса. 6:8). Кенни организацияның элээн каш тудуг проектилеринге, оон аңгыда, бодунуң төрээн дылынче библейжи дептерлерни очулдурар ажылга база дузалажып турган. Кенни мынча дээн: «Акылар мени даалгаларымны эки күүседир кылдыр өөредип каан». Ынчалза-даа ол чүгле ажыл-агыйны эки кылып өөренип алыр арга-мергежилдиг апарбаан. Ол мынча деп улаштырган: «Мээң харык-шинээмниң кайы хире кызыгаарлыын база Иегованың сеткилин оон-даа артык өөртүр дизимзе, бодумга кандыг шынарларны сайзырадырын тода билип каан мен». (Номчуптуңар: 1 Пётр 5:10.) Силер база байдалыңарны чүге эде көрүп болбас деп силер? Бир-ле чүүлдү өскертиптер болзуңарза, Иегованың берип турар немелде өөредилгени эртип шыдаар чадавас силер.

11. Мурнуу Көрейде үш угбавыска суртаал ажылынга идепкейлиг боорунга чүү дузалаан? (Журналдың даштында чурукту көрүңер.)

¹¹ Суртаалдың чаа хевирлеринге киржир дээш, дуржулгалыг суртаалчылар безин чаа чүүлге өөренип турар. Хамчык аарыг COVID-19 үезинде Мурнуу Көрейде удуртукчу акыларывыс чыыжында кандыг чедиишкиннерни чедип алганын үлешкеннер: «Кадыының аайы-биле бажыңнар кезип суртаалдап шыдавас улузувус амгы үеде видеохарылзаа таварыштыр  суртаалдап турар. 80 хар ажа берген үш угбавыс компьютерлерни ажыглап өөренип алгаш, хүннүң чыгыы суртаалдап турар» (Ыд. ыр. 91:15, 16). Силер база суртаал ажылынга оон-даа идепкейлиг киржип, Иегованың ачы-буянныын оон-даа артык көрүксеп тур силер бе? Бо сорулганы чедип алыр дээш, чүнү канчап болуруңарны көрүптээлиңер.

12. Иегова Аңаа ынанып турар улуска чүнү кылырын аазап турар?

¹²Иеговага ынанып өөрениңер. Бурганга ынанып, Аңаа эң-не экини бээр болзувусса, Ол ачы-буянын сыңырар чер чок кылдыр биске бадырып бээрин аазап турар (Мал. 3:10). Ол сөстерниң ылап шынныын Колумбиядан Фабиола бодунуң чуртталгазында көрген. Сугга суктуруп алган соонда, удатпаанда ооң доктаамал эгелекчи боор күзели тыптып келген. Ынчалза-даа ол чааскаан үш ажы-төлү биле ашаан азырап турган болгаш, эгелекчи кылдыр бараалгап шыдавайн турган. Ынчангаш Фабиоланың хар-назынының аайы-биле пенсияже үнер үези чоокшулап кээрге, ол Иеговадан дуза дилеп, изии-биле мөргүп эгелээн. «Кижи пенсияны дыка үр үе ишти кылдыртып кээр болгай. Кайгап каар силер, а мен ону 1 ай ишти кылдырып алган мен!» — деп, Фабиола сактып чугаалаан. Ийи ай эрткенде, ооң күзели боттаны берген. Ол ам 70 хар ашкан база 20 чыл ажыг эгелекчилеп келген. Ол үе дургузунда Фабиола сес херээжен кижиге Иеговага бараалгап эгелээринге дузалаан. Ол улаштыр мынча дээн: «Шыны херек, чамдыкта могап-шылай бээр мен, ынчалза-даа Иегова меңээ бараалгал графигинден туттунарынга дузалап турар».

13, 14. Иеговага ынанырынга база бараалгалга хамаарышкан чаа сорулгаларны салырынга кымнарның үлегерлери дузалаар?

 ¹³Иеговага ынанып чораан улусту өттүнүңер. Иеговага кызып бараалгап чораан улустуң чижектери Библияда дыка көвей. Олар улуг күжениишкиннерни үндүрүп турган боорга, Иегова оларны тускай кылдыр шаңнаан. Чижээ, Авраам «кайнаар бар чоруурун боду безин билбейн» бажыңын каапкаш барган соонда, Иегова ону йөрээген (Евр. 11:8). Иаков дээрниң төлээзи-биле даң-хаяазынга чедир хүрежип кээрге, чүгле ынчан Иегова ону элбээ-биле йөрээген (Э. д. 32:24—30). Ыдыктыг аптараны көдүрген өргээ бараалгакчылары чүгле Иорданны сүзүп кирипкен соонда, израильчилер хемни кежип, Аазаттынган черже кирип шыдаан (Иис. 3:14—16).

¹⁴ Амгы үениң бараалгакчылары база силерге эки үлегер-чижек бооп болур. Иеговага ынанып, бараалгалга хамаарышкан чаа сорулгаларже чүткүп турар акы-угбаларның дугайында «Они с готовностью предоставили себя для служения» * деп статьялар чыындызында бижээн. Пейтон болгаш ооң кадайы Дайана ол статьяларны номчуурунга ынак. Олар мынча деп үлешкен: «Биске ол төөгүлерни номчууру дээрге кандыг-бир чемни амданнанып чип турар улустуң чанынга турары-биле дөмей. Оларның дугайында номчаан тудум, Иегованың кайы хире ачы-буянныын амзангырлап шенеп көөр күзеливис дам баар». Үе эрткенде, Пейтон биле Дайана суртаалчылар чедишпес черже көже бергеннер. А силер ол статьяларны номчаан силер бе? Оон ыңай jw.org деп сайтта «Проповедь в отдалённых районах. Австралия» база «Проповедь в отдалённых районах. Ирландия» деп видеороликтерни көрүп болур силер. Иеговага оон-даа хөйнү кылыксаар болзуңарза, шак ындыг материалдар силерге дузалап болур.

15. Эш-өөрнү мерген угаанныг шилиири чүге чугула?

¹⁵Эш-өөрнү мерген угаанныг шилиңер. Ооң мурнунда чаңгыс-даа катап амзап көрбээн чемиңерни аңаа ынак улус-биле кады чиирге аянныг боор. Ооң-биле дөмей, Иеговага бараалгалды бирги черге салып турар улус-биле өңнүктежир болзувусса, Иеговага оон-даа хөйнү кылыксай бээр бис. Кент биле Вероника ону дыка эки билир. Олар мынча дээн: «Бистиң эш-өөрүвүс болгаш төрелдеривис бараалгалдың чаа-чаа хевирлеринге киржир кылдыр бисти деткип турган. Бурганның Чагыргазын бирги черге салыр улус-биле үени эрттирер болза, чаа аргаларны ажыглаары ынча дыка коргунчуг эвес болур». Амгы үеде Кент биле Вероника Сербияда тускай эгелекчилер бооп бараалгап чоруур.

16. Иисустуң угаадыглыг чугаазындан алырга, бир-ле чүүлден ойталаарынга чүге белен боор ужурлуг бис? (Лука 12:16—21).

¹⁶Иеговага хөйнү кылыр дээш, бир-ле чүүлден ойталаарынга белен болуңар. Ол дээрге чуртталгада шупту чүүлдү кызыгаарлап чурттаары дивээни ол (Эккл. 5:18, 19). Чамдык улус Бурганга хөйнү кылып болур-даа болза, боттарының сонуургалдарындан адырлып ап шыдавас. Иисустуң угаадыглыг чугаазында кижи база шак ындыг частырыгны кылган. Ол Бурганның үзел-бодалын херекке алырының орнунга, бодунуң тамчык-дыжын бирги черге салган. (Номчуптуңар: Лука 12:16—21.) Франциядан Кристьян дээр акывыс ооң мурнунда Иеговага болгаш өг-бүлезинге чогуур ужурлуг кичээнгейни көргүспейн турганын миннип чугаалаан. Ону билип кааш, ол кадайы-биле ийилээ долу бараалгаар деп шиитпирлеп алганнар. Сорулгазын чедип алыр дээш, олар ажылындан үне бергеш, бажың-балгат аштап-арыглаар улуг эвес фирма ажыдып алгаш, бар чүүлүнге мага ханып чурттап өөренип алганнар. Ол хире улуг өскерлиишкиннерни кылган ажыы бар турган бе? Кристьян мынча дээн: «Бараалгалдан ооң мурнундаазындан-даа артык улуг өөрүшкүнү  ап турар бис! Катап барып турар база Библияны өөренип турар улузувус Иегова-биле таныжып, Ону эки билип ап турар боорга, өөрүүр чордувус».

17. Суртаалдың чаа хевирин өөренип алырынга Шеронга чүү дузалаан?

¹⁷Суртаалдың чаа-чаа хевирлерин ажыглаңар (Аж.-ч. 17:16, 17; 20:20, 21). АКШ-тан Шерон дээр эгелекчи угбавыс хамчык аарыг COVID-19 үезинде суртаалдың чаа хевирлеринге чаңчыгып чадап турган. Эгезинде ол телефон таварыштыр суртаалдаарындан дидинмейн турган. Ынчалза-даа кожуун хайгааракчызы ону канчаар кылырын айтып бээрге, Шерон ол суртаалдың хевиринге доктаамал киржип эгелээн. Ол мынча дээн: «Эгезинде меңээ коргунчуг турган, ынчалза-даа ам өөрүшкүнү миннир-дир мен. Ооң мурнунда бажыңнар кезип суртаалдаарынга көөрде, телефон таварыштыр улус-биле хөй чугаалажып турар апарган бис».

18. Белен эвес байдалга безин, оон-даа хөй суртаалдаарынга биске кандыг сүме дузалаар?

¹⁸Пландан тургузуп алгаш, хөделиңер. Берге байдал тургустунуп кээрге, бис Иеговадан дуза дилеп, ол байдалда канчаар алдынарын хандыр боданып алыр болгай бис (У. ч. 3:21). Европа чурттарының бирээзинде цыган бөлүкте эгелекчи бооп бараалгап чоруур Соня бир сүме-биле үлешкен: «Мен чүнү кылыр деп турарымны саазын кырынга бижип алгаш, көскү черге салып алыр чордум. Оон мээң столум кырында ийи адыр оруктуң чуруу бар. Шиитпир үндүрер деп баргаш, ол чурукче көрүп, шиитпирим мени кайнаар чедирерил дээш боданыр чордум». Соня берге үелерде безин эки хөөннү чидирбес дээш кызып турар: «Өскерлип турар байдалдарже мен бир-ле болза мээң оруумда тургустунуп келген моондак ышкаш, бир-ле болза оруумну улаштырар көвүрүг ышкаш кылдыр көөр чордум. Шупту чүве мээң көрүжүмден хамааржыр».

19. Бо статья силерни чүнү кылырынче оттурду?

¹⁹ Иегованың биске берип турар белектери дыка хөй! Ону алдаржыдар дээш, бар-ла шаавыс-биле кызаалыңар. Шак ынчаар Аңаа өөрүп четтиргенивисти илередип турар боор бис (Евр. 13:15). Суртаалдың чаа-чаа хевирлерин ажыглап өөрениңер. Ынчан Иегова силерни оон-даа артык шаңнаар. Иегованың «кайы хире ачы-буянныын амзангырлап шенеп көрүңер» база хүннүң-не силерге эки чүүлдү көргүзер арганы Аңаа бериңер! Ынчан силер Иисус ышкаш: «Мээң аъш-чемим болза Мени айбылап чоруткан Адамны тооп дыңнаары болгаш Ооң Меңээ дааскан ажыл-херээн эчизинге чедир кылыры» деп чугаалап шыдаар силер (Ин. 4:34).