1, 2. Jich bitʼil ya yal te Salmo 34:8, ¿bin ya skʼan ya jpastik yuʼun ya kilbeytik yutsil yoʼtan te Jehová?

JNOP KAʼIYTIK te ay machʼa ya sjapbotik weʼelil te maʼyuk bin-ora jweʼojtik. Ya xjuʼ ya jnop ta koʼtantik te bin yaʼiyel sbujtsʼ, te kʼalal ya kiltik, ya kaʼiybeytik yikʼ, ya jojkʼoytik bitʼil ta pasel o ay machʼa ya jojkʼoybeytik teme ya smulane. Pero ya skʼan ya jweʼtik yuʼun ya jnaʼtik teme ya jmulantike.

² Jaʼnix jich ya xjuʼ ya jpastik yuʼun ya kilbeytik yutsil yoʼtan te Jehová, te kʼalal ya jkʼopontik te Biblia, te publicacionetik sok te ya jchʼam kaʼiytik te bin ya yalik te hermanoetik te akʼbil bendicionetik yuʼun te Jehová. Pero jaʼnax ya xkʼot ta koʼtantik te yutsil yoʼtan te Jehová, teme joʼotiknix ya kiltik te bitʼil ya spase (kʼopona Salmo 34:8). Jnop kaʼiytik ini, teme ya jkʼantik te ya x-abatinotikxan ta stojol te Jehová ta spisil-ora, ya skʼan kijkitaytik te bin ya smakotik. Ayniwan jkʼoponojtik bayal buelta te bin la yal te Jesús, teme jaʼ nail ya kakʼ ta jkuxlejaltik te Wentainel yuʼun te Jehová ya yakʼbotik te bin ya xtuun kuʼuntik, pero maniwan jichuk kʼoem ta pasel ta jkuxlejaltik (Mat. 6:33). Manchukme jich-abi, te bitʼil ay schʼuunel koʼtantik ta swenta te bin la yal te Jesús, ma bayal bin ya jmantikix sok ma bayalix tiempo ya x-aʼtejotik, jaʼ ya xbajtix ta koʼtantik te scholel te skʼop Diose. Te kʼalal jich ya jpastik, ya kiltik ta jamal te jaʼ ya skanantayotik te Jehová sok jich ya kiltik te yutsil yoʼtan.

3. Jich bitʼil ya yal te Salmo 16:1, 2, ¿machʼatik ya yichʼikxan bendición yuʼun te Jehová?

³ Te Jehová lek yoʼtan ta jpisiltik, manchukme ma snaʼbeyik sba (Sal. 145:9; Mat. 5:45). Pero jaʼ ya yakʼbeyxan bendición te machʼatik ya x-abatinik sok spisil yoʼtanik ta stojol  (kʼopona Salmo 16:1, 2). Kiltik chaʼoxchajp te bintik spasoj te Jehová ta jtojoltik.

4. ¿Bin-utʼil ya yakʼ ta ilel yutsil yoʼtan te Jehová kʼalal ay machʼa ya xnoptsaj ta stojol?

⁴ Kʼalal ya jpastik ta jkuxlejaltik te bin ya jnoptik ta stojol te Jehová, ya kiltik te ay bin lek ya xlokʼ kuʼuntik-a. Kʼalal mato jnaʼbeytik sba-a te Jehová namal ayotik ta stojol, pero te kʼalal jajchotik ta snopel te sKʼop kʼux la kaʼiy ta koʼtantik sok jaʼ la skoltayotik yuʼun ya jeltay te jtaleltik (Col. 1:21). Te kʼalal la kakʼ jbatik ta stojol sok la kichʼtik jaʼ, kʼaxtoxan la yakʼ ta ilel yutsil yoʼtan, melel jun koʼtantik ta stojol sok la kamigointik (1 Ped. 3:21).

5. ¿Bin-utʼil kilojbeytik yutsil yoʼtan te Jehová ta scholel skʼop Dios?

⁵ Kʼalal ya jcholtik skʼop Dios ya kiltik ta spisil-ora te yutsil yoʼtan te Jehová. ¿Yabal xkʼexawat ta kʼop? Bayal j-abatetik yuʼun Jehová te jich ya yaʼiy sbaike. Kʼalal mato x-ochat ta Testigo-a, maʼyuk bin-ora anopoj te ay machʼa ya akʼopon te ma xa anaʼbey sba yuʼun ya acholbey te bin ya yal te Biblia. Pero ta ora ini spisil-ora, jich ya apas. Ay stseʼelil awoʼtan, melel jaʼ ya skoltayat te Jehová sok amulanojxan te scholel te skʼop Dios. Jaʼnix jich awiloj te yanyantik bitʼil skoltayejat te Jehová, jich bitʼil la yakʼbat slamalil awoʼtan te kʼalal ay machʼa ay bin ma lek la yalbat te kʼalal ayat ta scholel skʼop Dios. Jaʼnix jich skoltayojat yuʼun ya xjul ta awoʼtan junuk texto te ya awakʼbey yil te machʼa ya smulan te skʼop Dios. Sok yakʼojbat yip awoʼtan yuʼun ya asitintay te machʼatik ma smulanik yaʼiyel te skʼop Dios ta aterritorio (Jer. 20:7-9).

6. ¿Bin-utʼil kilojbeytik yutsil yoʼtan te Jehová kʼalal ya spʼijubtesotik?

⁶ Te Jehová yakʼbeyojotik kiltik te yutsil yoʼtan te kʼalal ya spʼijubtesotik yuʼun ya jcholtik skʼop Dios (Juan 6:45). Ta tsoblej yuʼun olil semana, ya yakʼbotik jnoptik te bin-utʼil ya xkʼopojotik sok te ants winiketik sok ya stijbotik koʼtantik yuʼun ya jtuuntestik ta scholel skʼop Dios. Te kʼalal maʼyuk jich jpasojtik yaniwan xiwotik jtebuk ta sjajchibal. Pero te kʼalal ya jchʼuuntik spasel, ya jtatik ta ilel te kʼax lek te jichuk ya jpastik ta jterritoriotik. Jaʼnix jich ta tsoblejetik sok ta mukʼul tsoblejetik, ya stij koʼtantik yuʼun yanyantik te bin-utʼil ya jcholtik skʼop Dios, manchukme maʼyuk jich jpasojtik. Teme ya kijkitaytik spasel te bin kʼayemotik o te bin ya jmulantik, ya kiltik te bin-utʼil ya yakʼbotik bendición te Jehová. Ta ora ini ya kilbeytik skʼoplal te bintik lek ya yakʼbotik te Jehová te kʼalal ya jletik te bin-utʼil lekxan ya x-abatinotik ta stojol, jaʼ chikan te ban kʼalal ya xjuʼ kuʼuntik. Jaʼnix jich ya kiltik bin ya skoltayotik yuʼun ya jpastik te bin kakʼoj ta koʼtantik.

7. ¿Bin bendición ya jtatik teme ya x-abatinotikxan ta stojol te Jehová?

⁷ Ya xnoptsajotikxan ta stojol te Jehová. Kiltik te ejemplo yuʼun jtul anciano te Samuel sbiil, * te yak ta abatinel sok te yinam ta Colombia. Ya smulanik te ayik ta precursor ta slumalik, pero ya skʼan ya x-abatinikxan ta yan congregación te banti ya skʼanikxan koltayel. Swenta ya xjuʼ yuʼunik spasel, ay bintik la sjeltay ta skuxlejalik. Te Samuel jich ya yal: «La jpastik te bin ya yal Mateo 6:33 sok jaʼnax la jmantik te bin ya xtuun kuʼuntik. Pero tulan la kaʼiytik te la kijkitaytik jilel te jnatik, melel jich pasbil te bitʼil ya jmulantik sok spisil tojbil kuʼuntik». Te ban bajtik ta abatinel la staik ta ilel te ma bayalix ya slajin stakʼinik te bin-utʼil ta nailal-ae. Te Samuel jich ya yalxan: «Kilojtik te jaʼ ya stojobtesotik te Jehová ta jkuxlejaltik sok ya yakʼbey sujtib j-oraciontik, ya kaʼiytik  te tseʼel yoʼtan ta jtojoltik sok kʼuxotik ta yoʼtan te maʼyuk bin-ora jich kaʼiyojtik-ae». ¿Yabal xjuʼ ya acholxan skʼop Dios? Teme yake, naʼame te ya xnoptsajatxan ta stojol te Jehová sok jaʼ ya skanantayat (Sal. 18:25).

8. ¿Bin ya anop ta swenta te bin la yal te Iván sok te Viktoria?

⁸ Ya yakʼ stseʼelil koʼtantik te ya x-abatinotik ta stojol te Jehová. Jnop kaʼiytik te bin ya yalik te Iván sok te Viktoria, te ayik ta abatinel ta precursor ta Kirguistán. La yakʼ ta yoʼtanik te ma sle bayal sbilukik yuʼun ya sjap sbaik ta biluk aʼtelil, jich bitʼil ta construcción. Te Iván jich ya yal: «Tulan ya x-aʼtejotik ta jujun proyecto. Manchukme lujben ya kaʼiy jbatik ta jujun kʼajkʼal, pero lamalnax koʼtantik sok tseʼel koʼtantik, melel ya jnaʼtik te yakotik ta stuuntesel te kiptik ta stojol te Jehová. Te kamigotaktik la jtatik sok te bintik lek kʼax ta jtojoltik, ya yakʼbotik stseʼelil koʼtantik» (Mar. 10:29, 30).

9. ¿Bin spasoj jtul hermana yuʼun ya x-abatinxan ta stojol Jehová manchukme ay swokol sok bin lokʼem yuʼun-a?

⁹ Ya yakʼ stseʼelil koʼtantik te ya x-abatinotik ta stojol te Jehová, manchukme ya jsitintaytik wokoliletik. Jich bitʼil jtul meʼba ants te Mirreh sbiil te ya x-aʼtej ta doctora te ay ta África Occidental. Kʼalal la spas sba jubilar, och ta precursora. Tsakbil ta chamel te artritis sbiil, jaʼnax ya xjuʼ schol skʼop Dios jun ora ta nanatik sok jaʼ ya xjalajxan kʼalal ya schol skʼop Dios ta carrito. Soknix bayal srevisita, ya yakʼ nojptesel ta Biblia sok ay chaʼoxtul ya snojpteslan ta teléfono. ¿Bin tijbot yoʼtan yuʼun ya x-abatinxan ta stojol te Jehová? Jich ya yal: «Bayal skʼuxul koʼtan ta stojol te Jehová sok te Jesucristo. Spisil-ora ya jkʼanbey koltayel te Jehová te yakuk skoltayon ta spasel te ban kʼalal ya xjuʼ kuʼun» (Mat. 22:36, 37).

10. Jich bitʼil ya yal te 1 Pedro 5:10, ¿bin ya x-akʼbotik yuʼun te Jehová te machʼatik ya spasik tulan te ya x-abatinik ta stojol?

¹⁰ Ayxan pʼijubtesel ya yakʼbotik te Jehová. Te Kenny te ya x-abatin ta precursor ta pam lum te Mauricio sbiil, ya snaʼ te yuʼun-nix jich-ae. Kʼalal la snop skʼop Dios la yijkitay te universidad, la yichʼ jaʼ sok och ta precursor. Jich ya yal: «Ya jpas tulan yuʼun jichukon bitʼil te j-alwanej Isaías, te jich la yal: ‹Liʼ ayon, ticonawon bahel›» (Is. 6:8). Te Kenny aʼtejem ta bayal proyectoetik yuʼun construcción, jaʼnix jich ya xkoltaywan ta spasel traducir publicacionetik ta skʼopnix. Jich ya yal: «La kichʼ pʼijubtesel yuʼun ya jpas ta lek te kaʼtele». Pero ma jaʼuknax la snop yuʼun ya spas ta lek te yaʼtel, jaʼ yuʼun jich ya yalxan: «Kʼot ta koʼtan te aynax ban kʼalal te bin ya xjuʼ kuʼun spasel sok te ya jchʼites taleliletik te ya skoltayon ta abatinel ta stojol te Jehová» (kʼopona 1 Pedro 5:10). Teme ya awil te ya xjuʼ awuʼun sok te ya ajap aba, lek teme ya awakʼ aba ta pʼijubtesel yuʼun te Jehová.

11. ¿Bin la spasik chaʼoxtul hermanaetik ta Corea del Sur sok bin lokʼ yuʼunik-a? (Ilawil te dibujo ta yelaw te revista).

¹¹ Manchukme ay machʼatik te ayix bayal jaʼbil te ay ta Testigo, ya xkoltayotik te pʼijubtesel ya yakʼ te Jehová kʼalal yan bin-utʼil ya xjajchik ta abatinel ta stojol. Ta yorail te tulan chamel COVID-19, te ancianoetik ta congregación yuʼun Corea del Sur, jich la yalik: «Ay hermanoetik te ya skuyik te ma xjuʼ ya xlokʼik ta scholel skʼop Dios ta swenta te ayik ta chamel, pero ta ora ini ya xjuʼ ya spasikix ta videollamada. Ay oxtul hermanaetik te kʼaxem ta 80 yaʼbilalik te la snopik stuuntesel te celular, tablet o yantikxan, ta ora ini jujun kʼajkʼal ya scholik skʼop Dios» (Sal. 92:14, 15). ¿Yabal amulan scholelxan skʼop Dios sok te ya awilbey yutsil  yoʼtan te Jehová? Te bin ya kalbeytik skʼoplal, jaʼ ya skoltayat.

12. ¿Bin ya x-akʼbotik yuʼun Jehová te machʼatik ay smukʼul yoʼtanik ta stojol?

¹² Ayuk smukʼul awoʼtan ta stojol te Jehová. Teme ya smukʼulin koʼtantik sok ya jpastik te ban kʼalal ya xjuʼ kuʼuntik, ya yalbotik ta jamal te ya yakʼbotik bayal bendición (Mal. 3:10). Jtul hermana te Fabiola sbiil te ay ta Colombia, la yil te bin-utʼil akʼbot bendición yuʼun te Jehová. Te kʼalal la yichʼ jaʼ, ya skʼan ya x-och ta precursora, pero te smamalal sok te oxtul yalatak, jaʼ ay ta swenta yakʼbeyel te bin ya xtuun yuʼunik. Jich yuʼun te kʼalal la sta yorail te la spas sba jubilar, la skʼanbey sok spisil yoʼtan te Jehová te yakuk xkoltayot. Jich ya yal: «Te machʼa ya spas sba jubilar ya yichʼ tiempo yuʼun ya x-akʼbotik te spension o ya stojotik, yan te joʼone jun-nax u jalaj yuʼun ya yakʼbonik. Jich la kil bitʼil jun milagro». Cheb u ta patil, och ta precursora. Ta ora ini kʼaxemix ta 70 yaʼbilal sok kʼaxem ta 20 jaʼbil te ayix ta precursora. Jaʼto tal-abi, skoltayoj ocho ta jtul ants winiketik yuʼun ya yichʼik jaʼ. Jich ya yal: «Ay baeltik ya kaʼiy te maʼyuk kip, pero jaʼ ya skoltayon te Jehová ta skʼotesel ta pasel te jayeb ora ya jpas ta jujun kʼajkʼal».

13, 14. ¿Bin ejemploetik ya skoltayat yuʼun ya smukʼulin awoʼtan te Jehová sok te ya amukʼubtesxan te awaʼtel ta stojol?

¹³ Nopa te ejemplo yuʼun te machʼatik la smukʼulin yoʼtanik te Jehová. Ta Biblia ya jtatik ejemploetik yuʼun te machʼatik la  spasik tulan ta abatinel ta stojol te Jehová. Ay machʼatik ay bin nail la spasik swenta ya x-akʼbotik bendición yuʼun te Jehová. Jich bitʼil la spas te Abrahán, kʼalal la yijkitay te sna akʼbot bayal bendición yuʼun te Jehová, manchukme «ma ba snaʼoj te banti yac ta bahele» (Heb. 11:8). Te Jacob, la yichʼ bendición te kʼalal la stsak sba sok jtul chʼul-abat (Gén. 32:24-30). Yuʼun ya solik bael ta mukʼul jaʼ Jordán te lum Israel, jaʼ nail ya x-ochik ta jaʼ te sacerdoteetik swenta ya yichʼik te lum te albil skʼoplale (Jos. 3:14-16).

¹⁴ Jaʼnix jich ya xjuʼ ya jnoptik te ejemplo yuʼun te hermanoetik te smukʼulinej yoʼtanik te Jehová sok sleojik te bin-utʼil ya x-abatinikxan ta stojol. Jich bitʼil te hermano Payton sok te yinam Diana, ya smulanik skʼoponel te experienciaetik yuʼun te hermanoetik te smukʼubtesoj yaʼtelik ta stojol te Jehová, jich bitʼil te ay ta serie «Jun yoʼtan bajtʼik ta abatinel». * Jich ya yalik: «Kʼalal ya jkʼopontik te experienciaetik, jich ya kaʼiy jbatik te ay machʼa yakotik ta yilel te yak ta sweʼel bujtsʼan weʼelil. Te bitʼil ma la jkom jbatik ta skʼoponel ya jkʼan ya jpastik-euk, melel ya kiltik te slekil yoʼtan te Jehová». Ta patil te hermanoetik-abi bajtik ta yan lugar te banti ya skʼanikxan koltayel. ¿Aybal akʼoponoj te articuloetik ini? Sok ¿aybal awiloj te video Scholel skʼop Dios ta lugaretik te namal ayike: Australia sok Scholel skʼop Dios ta lugaretik te namal ayike: Irlanda te ay ta jw.org? Jaʼme ya skoltayat yuʼun ya amukʼubtesxan te awaʼtel ta stojol te Jehová.

15. ¿Bin-utʼil ya skoltayotik te hermanoetik te jaʼ baem ta yoʼtanik spasbeyel yaʼtel te Jehová?

¹⁵ Lea awamigotak te ya skoltayat. Oranaxwan ya jmulantik sweʼel te weʼelil teme jaʼ ya jokintik te machʼatik ya smulanik. Jaʼ pajal sok teme jaʼ ya jokintik te machʼatik jaʼ baem ta yoʼtanik spasbeyel yaʼtel te Jehová, maba wokol ya kaʼiytik te jich ya jpastik-euk. Jaʼ jich kʼot ta stojol te Kent sok Verónica, te jich ya yalik: «Te kamigotaktik sok te jfamiliatik ya stijbotik koʼtantik yuʼun ya jletik te bin-utʼil ya x-abatinotikxan ta stojol te Jehová. Kʼot ta koʼtantik teme jaʼ ya jokintik te machʼatik jaʼ nail yakʼoj ta skuxlejalik te Wentainel yuʼun Dios ya yakʼbotik smukʼul koʼtantik, jich yuʼun ya jletik te bin yachʼil ya jpastik ta stojol te Jehová». Ta kʼajkʼal ini schebalik ya x-abatinik ta precursor especial ta Serbia.

16. Jich bitʼil ya yal te Lucas 12:16-21, ¿bin yuʼun ya skʼan ya jlokʼes jbatik ta koʼtantik ta spasbeyel yaʼtel te Jehová?

¹⁶ Lokʼesa aba ta awoʼtan ta spasbeyel yaʼtel te Jehová. Yuʼun ya jtseʼentesbeytik yoʼtan te Jehová, ma puersauk te ya kijkitaytik spisil te bin ay kuʼuntik (Ecl. 5:19, 20). Jich yuʼun teme maba ya x-abatinotikxan ta stojol te Jehová ta swenta te ma jkʼantik te ya kijkitaytik te bintik ay kuʼuntik, ya xjuʼ jich ya xkʼot ta jtojoltik te bitʼil te winik te la yalbey skʼoplal ta lokʼombakʼop te Jesús te chʼay ta yoʼtan te Dios te bitʼil ma la yijkitay te bintik ay yuʼun (kʼopona Lucas 12:16-21). Jtul hermano te Christian sbiil te ay ta Francia, jich ya yal: «Maba yakon ya yakʼbeyel jtiempo te Jehová sok te jfamilia». Te hermano sok te yinam ochik ta precursor, ta swenta-abi la yijkitayik te yaʼtelik. Yuʼun ya staik te bintik ya xtuun yuʼunik, la sjachik jun negocio te banti ya schonik te bintik swenta limpieza sok tseʼel yoʼtanik. ¿Aybal bin lek la staik-a? Jich ya yal: «Ya jmulantikxan te scholel te skʼop Dios te kʼalal ya kiltik te estudianteetik sok te jrevisitatik te ya snopikxan ta stojol te Jehová».

17. ¿Bin yuʼun ay machʼatik ma sleik te bin yachʼil ya spasik ta stojol te Jehová?

 ¹⁷ Lea te bin yachʼil ya apas ta stojol te Jehová (Hech. 17:16, 17; 20:20, 21). Jtul precursora te ay ta Estados Unidos te Shirley sbiil, la sjeltay te bin-utʼil ya schol skʼop Dios ta skaj te tulan chamel COVID-19. Ta sjajchibal ya xiw ta scholel skʼop Dios ta teléfono. Pero te kʼalal ulaʼtayotik yuʼun te superintendente yuʼun circuito, nojptesot te bitʼil ta pasel. Teyto tal-abi, jajch schol skʼop Dios spisil-ora ta teléfono, jich ya yal: «Ta sjajchibal ya xiwon ta spasel, pero ta ora ini bayal ya jmulan. Jaʼ bayalxan ya xkʼopojotik sok te ants winiketik, ma jichuk te kʼalal ya xbootik ta nanatik».

18. ¿Bin ya skoltayotik yuʼun ya jpastik te bin jnopojtik ta stojol te Jehová?

¹⁸ Akʼa ta awoʼtan te bin anopoj ta stojol te Jehová sok kʼotesa ta pasel. Kʼalal ayotik ta wokol ya jkʼopontik te Jehová sok ya jnoptik ta lek te bin-utʼil ya jsitintaytik (Prov. 3:21). Te Sonia te yak ta abatinel ta precursora regular ta kʼopil romaní ta Europa, jich ya yal: «Ya jmulan stsʼibayel te bin jnopoj ya jpas sok ya kakʼ te banti ya kilulan. Ta nopol espejo ay jun dibujo te lokʼtaybil cheʼoxeb carretera te yanyantik te banti ya xbajte. Kʼalal ay bin ya jkʼan ya jpas ta jkuxlejal, ya kil te dibujo sok ya jnop bin ya xlokʼ kuʼun-a te kʼalal jich ya jpase». Kʼalal ya xkʼax swokol te Sonia, ya spas tulan yuʼun ma xchebaj yoʼtan. Jich ya yal: «Te bin ya xkʼax ta jkuxlejal ya xjuʼ te jich ya xkʼot bitʼil jun pajkʼ te ma xyakʼ te ya jkʼotes ta pasel te bin jnopoj o jich ya xkʼot bitʼil jun puente te ya skoltayon yuʼun ya juʼtes ta pasel. Jaʼ chikan te bin yaʼiyel ya kaʼiy jba».

19. ¿Bin-utʼil ya kalbeytik wokol te Jehová ta swenta te bin lek yakʼbeyojotik?

¹⁹ Bayal te bin-utʼil ya yakʼbotik bendición te Jehová. Ya kalbeytik bayal wokol te kʼalal ya jpastik te ban kʼalal ya xjuʼ kuʼuntik (Heb. 13:15). Jaʼnix jich kʼalal ya jletik te bin yachʼil ya jpastik yuʼun ya jcholtikxan skʼop Dios. Teme jich ya jpastik, te Jehová ya yakʼbotikxan bayal bendición. Jich yuʼun jletik te bin-utʼil ya x-abatinotikxan ta jujun kʼajkʼal ta stojol te Jehová sok jich ya kiltik te yutsil yoʼtan. Jich ya kaltik te bitʼil la yal te Jesús: «Ha jweʼel te ya jpas te bin ya scʼan yoʼtan te machʼa la sticonon tal soc te ya huʼtesbe te yaʼtel» (Juan 4:34).