1, 2. Jech kʼuchaʼal chal Salmo 34:8, ¿kʼusi skʼan jpastik sventa xkakʼtik venta jtuktik ti toj lek yoʼonton li Jeovae?

JNOPTIK noʼox ti oy buchʼu chakʼbutik jtosuk veʼlil ti muʼyuk jpasojtik-o prevae. Kʼalal te xa lechel chkiltike, kʼalal chkaʼibetik yikʼe, k’alal chkiltik kʼu yelan meltsanbil o kʼalal oy buchʼu ta jakʼbetik mi mu chaʼie, xuʼ van chtal jutuk ta joltik kʼu yelan smuil, pe jaʼ to chkakʼtik venta mi mu chkaʼitik kʼalal ta jpastik prevae.

² Jaʼ noʼox jech ek, kʼalal ta jchantik li Vivliae, li vunetik o kʼalal chkaʼitik kʼu yelan akʼbatemik bendision yuʼun Jeova li yantike, te chkiltik ti toj lek yoʼonton li Jeovae. Pe jaʼ to chkaʼibetik lek smelolal mi la jpastik preva jtuktik li slekil yoʼontone (kʼelo Salmo 34:8). Kalbetik junuk skʼelobil. Jnoptik noʼox ti ta jkʼan chijtun ta stojolal Jeova ta tsʼakal orae, pe skʼan van jutukajestik li kʼusitik oy kuʼuntike. Xuʼ van ep ta velta jchanojtik ti laj yal Jesus ti chakʼbutik Jeova li kʼusi chtun kuʼuntik mi baʼyel laj kakʼ ta jkuxlejaltik li Ajvalilal yuʼune, pe muʼyuk van kilojtik-o ta jkuxlejaltik taje (Mat. 6:33). Ta skoj ti jchʼunojtik ti chkʼot ta pasel li kʼusi laj yal Jesuse, ta jtsʼin jtakʼintik xchiʼuk mas xa jutuk chij-abtej sventa jaʼuk mas jal jcholtik mantal. K’alal jech ta jpastike, chkakʼtik venta ti chakʼ kʼusitik chtun kuʼuntik li Jeovae xchiʼuk jaʼ jech ta jpastik preva ti toj lek yoʼontone.

3. Jech kʼuchaʼal chal Salmo 16:1 xchiʼuk 2, ¿buchʼutik chilbeik li slekil yoʼonton Jeovae?

³ «Li Jeovae toj lek yoʼonton ta stojolal skotol» li krixchanoetik akʼo mi mu x-ojtikinat (Sal. 145:9; Mat. 5:45). Pe mas to chakʼbe bendision li buchʼutik sk’anojike xchiʼuk ti  ta sjunul yoʼonton chtunik ta stojolale (kʼelo Salmo 16:1, 2). Jkʼeltik junantik li kʼusitik lek spasoj ta jtojolaltik li Jeovae.

4. Li Jeovae, ¿kʼuxi chakʼbe yil slekil yoʼonton li buchʼutik jaʼ to chnopaj ta stojolale?

⁴ Kʼalal chkakʼ ta jkuxlejaltik li smantaltak Jeovae, chkakʼtik venta ti chlekub batel li jkuxlejaltike. Kʼalal laj kojtikintik xchiʼuk lik jkʼantike, la skoltautik sventa jeltik li kʼusitik toʼox chopol ta jnoptik o ta jpastike (Kol. 1:21). Kʼalal laj kakʼ jkuxlejaltik ta stojolal xchiʼuk laj kichʼtik voʼ xtoke, la skoltautik sventa lekuk jol koʼontontik xchiʼuk ti lekuk xkil jbatik xchiʼuke. Ja’ jech mas to laj yakʼbutik ta ilel slekil yoʼonton (1 Ped. 3:21).

5. ¿Kʼutik yelan yakʼojbutik ta ilel slekil yoʼonton Jeova kʼalal ta jcholtik mantale?

⁵ Kʼalal ta jcholtik mantale, te chkiltik kʼuxi chakʼbutik ta ilel slekil yoʼonton li Jeovae. ¿Mi xatsʼijet noʼox? Oy ep ermanoetik ti jaʼ jech stalelalike. Kʼalal muʼyuk toʼox ochemot ta mantale, muʼyuk toʼox van anopoj ti chbat acholbe mantal li buchʼu mi jsetʼuk xavojtikine. Pe li avie, jaʼ xa jech yakal chapasilan. Jech xtok, chakʼupin xa chachol mantal ta skoj ti skoltaojot li Jeovae. Oy yan butik skoltaojot. Jech kʼuchaʼal liʼe, skoltaojot sventa junuk avoʼonton kʼalal chopol kʼusi tspasboxuk li ta cholmantale. Skoltaojot xtok sventa xvul ta ajol junuk teksto kʼalal chachiʼin ta loʼil junuk krixchano ti oy ta yoʼonton mantale. Xchiʼuk yakʼojbot avipal sventa mu xalubtsaj kʼalal mu skʼan xchikintaik ti bu chachol mantale (Jer. 20:7-9).

6. ¿Kʼu yelan chkilbetik slekil yoʼonton Jeova kʼalal chchanubtasutike?

⁶ Oy yan kʼuxi chakʼbutik ta ilel slekil yoʼonton li Jeovae: jaʼo kʼalal chchanubtasutik kʼu yelan xuʼ jcholtik mantale (Juan 6:45). Li ta tsobajeletik ta xokol kʼakʼale, te chkiltik kʼuxi xuʼ jlikes jloʼiltik xchiʼuk chkichʼtik tijbel koʼontontik ti jechuk jpastike. Kʼalal oy kʼusi achʼ chlik jpastike, xuʼ van chijxiʼ jutuk. Pe chkakʼtik venta ti toj jtunel ta jterritoriotik kʼalal jech ta jpastike. Jech xtok, li ta tsobajeletik xchiʼuk li ta asambleaetike, chkichʼtik tijbel koʼontontik yoʼ jelajtik kʼu yelan jcholtik mantal ti muʼyuk van bu jech jpasojtik-oe. Xuʼ van chijxiʼo jutuk, pe mi jech la jpastike, chakʼbutik bendision li Jeovae. Jaʼ xa lik jkʼeltik junantik k’usitik lek chakʼbutik Jeova kʼalal oy kʼusi yan chlik jpastik sventa xijtun ta stojolal ti bu kʼalal xuʼ kuʼuntike, mu ventauk ti kʼu yelan jkuxlejaltike. Laje, ta jkʼeltik kʼuxi xuʼ jtatik li kʼusitik oy ta koʼontontik spasel ta mantale.

7. ¿Kʼusi ta jtatik kʼalal chkakʼtik persa sventa masuk ep jcholtik mantale?

⁷ Mas chijnopaj ta stojolal Jeova. Jkʼeltik kʼusi la spas jun mol ta tsobobbail ti Samuel * sbi ti te chtunik ta Colombia xchiʼuk li yajnile. Xmuyubajik toʼox ti chtunik ta prekursor ta jun tsobobbail te noʼox ta slumalike, pe tskʼan chbat tunikuk ta jun tsobobbail ti bu skʼanik mas koltaele. Jaʼ yuʼun, oy kʼusitik la sjel ta xkuxlejalik. Xi chal li Samuele: «Laj kakʼ ta jkuxlejalkutik li kʼusi chal ta Mateo 6:33, vaʼun laj kiktakutik smanel li kʼusi muʼyuk mas jtunel kuʼunkutike. Pe li kʼusi mas vokol laj kaʼikutike jaʼ ti xkikta komel li jnakutik ti jaʼ jech laj yichʼ vaʼanel kʼuchaʼal ta jkʼupinkutike xchiʼuk ti tojem xa ox kuʼunkutike». Ti bu lik tunikuke, laj yakʼik venta ti xkuxiik-o  akʼo mi mas xa juteb stakʼinik kʼuchaʼal toʼoxe. Xi to chal li Samuele: «Kilojkutik kʼu yelan tsbeiltasunkutik li Jeova xchiʼuk ti kʼu yelan tstakʼ j-orasionkutike. Jnaʼojkutik ti lek chilunkutike xchiʼuk jelajtik kʼu yelan yakʼojbunkutik ta ilel ti skʼanojunkutike. Taje muʼyuk toʼox bu jech jkuxlebinojkutik». ¿Mi xuʼ van xavepajes ti kʼu yepal chachol mantale? Mi jaʼ jeche, mas me chanopaj ta stojolal Jeova xchiʼuk ta me xchabiot (Sal. 18:25).

8. ¿Kʼusi chakʼ achan li kʼusi laj yalik Iván xchiʼuk Viktoriae?

⁸ Mi chijtun ta stojolal Jeovae, xijmuyubaj-o yuʼun. Jnopbetik skʼoplal li kʼusi laj yalik Iván xchiʼuk Viktoria ti te chtunik ta prekursor ta Kirguistane. Oy ta yoʼonton chkoltavanik ti bu tskʼanik koltael jech kʼuchaʼal li ta svaʼanel naetik ti bu chichʼ ichʼel ta mukʼ Diose, jaʼ yuʼun lek noʼox sba li xkuxlejalike. Xi chal li Ivane: «Ta sjunul koʼontonkutik ta jpaskutik li jujutos abtelale. Akʼo mi lubem chnel kuʼunkutik kʼakʼal, jun noʼox koʼontonkutik, yuʼun jnaʼojkutik ti jaʼ sventa Jeovae. Ximuyubajkutik-o yuʼun xtok ti la jta kamigokutik xchiʼuk ti oy kʼusitik la jkʼupinkutik spasele» (Mar. 10:29, 30).

9. ¿Kʼusi spasoj jun ermana sventa masuk to xchol mantal akʼo mi tsots svokol, xchiʼuk kʼusi sbalil staojbe?

⁹ Kʼalal chijtun ta stojolal Jeovae, chakʼ jmuyubajeltik akʼo mi oy kʼusitik vokol ta jnuptantik. Kalbetik skʼoplal li ermana Mirreh ti te nakal ta África Occidental ti oy xa sjabilal xchiʼuk ti chamem xa smalale. Kʼalal laj yikta yabtel ta doktoraile, lik tunuk ta prekursora. Tsakbil ta jtos chamel ti toj kʼuxe xchiʼuk ti mu xanav-o lek yuʼune. Jaʼ yuʼun, kʼajomal noʼox jun ora xkuch yuʼun ti chchol mantal ta naetike, pe jaʼ mas jal xkuch yuʼun kʼalal chchol mantal ta jun mexa ti bu oy vunetike. Oy ep srevisitatak, s-estudiotak, junantike ta telefono tskʼoponan. ¿Kʼusi tijbat yoʼonton sventa oyuk kʼusi mas spas ta stojolal Jeovae? Xi chale: «Jkʼanoj tajek li Jeova xchiʼuk Jesukristoe. Nopolik noʼox ta jkʼanbe Jeova ti akʼo skoltaun sventa xitun ta stojolal ti bu kʼalal xuʼ kuʼune» (Mat. 22:36, 37).

10. Jech kʼuchaʼal chal 1 Pedro 5:10, ¿kʼusi ch-akʼbatik yuʼun Jeova li buchʼutik chakʼik persa chtunik mas ta stojolale?

¹⁰ Oy to yan kʼusi chakʼ jchantik li Jeovae. Li Kenny ti chtun ta prekursor li ta Mauricioe laj yakʼ venta ti jaʼ jeche. Kʼalal lik xchan Vivliae, laj yikta li universidade, laj yichʼ voʼ xchiʼuk lik tunuk ta tsʼakal ora. Xi chale: «Chkakʼ persa ti jechuk jpas kʼuchaʼal li j-alkʼop Isaias ti xi laj yale: ‹¡Liʼ oyun voʼone! ¡Takun batel!›» (Is. 6:8). Li Kennie koltavanem ta svaʼanel naetik ti bu chichʼ ichʼel ta mukʼ Diose xchiʼuk ta sjelubtasel vunetik ta skʼop stuk. Xi chale: «Laj kichʼ chanubtasel sventa lekuk spas kuʼun li kʼusi jbainoje». Pe maʼuk noʼox la xchan taje. Xi to chale: «Laj kakʼ venta kʼusitik mu spas kuʼun xchiʼuk kʼusitik skʼan jel ta jtalelal sventa masuk to lek xitun ta stojolal Jeova» (kʼelo 1 Pedro 5:10). ¿Kʼu yuʼun mu xakʼel mi oy van yan kʼusi xuʼ xapas yoʼ xchanubtasot li Jeovae?

11. ¿Kʼusi la spasik junantik ermanaetik ta Corea del Sur sventa xuʼ xcholik mantal, xchiʼuk kʼusi sbalil la stabeik? (Kʼelo li lokʼol ta pajina 1).

¹¹ Li buchʼutik jal xa yochelik ta mantale chchanubtasatik yuʼun Jeova ek kʼalal yan xa kʼu yelan chlik xcholik mantale. Kʼalal jaʼo yakal li tsatsal chamel COVID-19, xi laj yalik li moletik ta jun tsobobbail ta Corea del Sur: «Junantik ermanoetik ti  laj toʼox snopik ti mu xuʼ xcholik mantal ta skoj ti ipike chcholik xa mantal ta videoconferencia. Oxvoʼ ermanaetik ti mas xa ta 80 sjabilalike la xchanik stunesel komputadora, vaʼun jutuk xa mu skotoluk kʼakʼal chcholik mantal» (Sal. 92:14, 15). ¿Mi oy ta avoʼonton ti masuk to xachol mantal xchiʼuk ti xakʼel kʼu yelan slekil yoʼonton li Jeovae? Li kʼusitik ta jkʼeltik batele tskoltaot yoʼ xata li kʼusi oy ta avoʼonton spasele.

12. ¿Kʼusi yaloj ta jamal Jeova ti chakʼbe li buchʼutik tspat yoʼonton ta stojolale?

¹² Masuk xapat avoʼonton ta stojolal Jeova. Mi jech ta jpastik xchiʼuk mi chijtun ta stojolal ti bu kʼalal xuʼ kuʼuntike, yalojbutik ta jamal ti chakʼbutik epal bendisione (Mal. 3:10). Jaʼ jech laj yakʼ venta jun ermana ta Colombia ti Fabiola sbie. Kʼalal jaʼtik toʼox laj yichʼ voʼe, tskʼan ox ch-och ta prekursora, pe skʼan x-abtej sventa skolta li smalal xchiʼuk li oxvoʼ yalabtake. Kʼalal tspas xa ox juvilare, xvokolet la skʼanbe koltael li Jeovae. Xi chale: «Kʼalal chichʼ kʼelbel skʼoplal ti xakʼbeikun li jmoton takʼine, stalel onoʼox ti chjalije, pe jun noʼox u la jmala. Mu noʼox chʼunbajuk laj kaʼi». Kʼalal echʼ xa ox chib ue, lik tunuk ta prekursora. Li avie, oy xa mas ta 70 sjabilal xchiʼuk mas xa ta 20 jabil jech tunem tal. Skoltaoj vaxakvoʼ krixchanoetik yoʼ xichʼik voʼ. Xi chale: «Bateltike, muʼyuk kipal chkaʼi, pe jaʼ tskoltaun Jeova skotol kʼakʼal yoʼ stsʼaki li korae».

13, 14. ¿Kʼusitik xuʼ skoltautik sventa jpat koʼontontik ta stojolal Jeova xchiʼuk ti masuk xijtun ta stojolale?

 ¹³ Chanbo stalelal li buchʼutik la spat yoʼontonik ta stojolal Jeovae. Li ta Vivliae, te chalbe skʼoplal krixchanoetik ti tunik ta stojolal Jeova ti bu kʼalal xuʼ yuʼunike. Ep buchʼutik ti oy kʼusi baʼyel la spasik sventa x-akʼbatik bendision yuʼun li Jeovae. Jech kʼuchaʼal liʼe, li Diose jaʼo laj yakʼbe bendision Abraan kʼalal laj xa ox yikta sna «akʼo mi mu snaʼ ti bu chbate» (Ebr. 11:8). Li Jakob eke jaʼ to akʼbat smoton kʼalal laj xa ox stsal sba xchiʼuk jun anjele (Jen. 32:24-30). Kʼalal ch-ochik xa ox ta Albil Balumil li j-israeletike, jaʼ to la xtuchʼik jelavel li ukʼum Jordan kʼalal laj xa ox stikʼ yokik ta ukʼum li paleetike (Jos. 3:14-16).

¹⁴ Xuʼ jchanbetik stalelal xtok li ermanoetik ti spatoj yoʼontonik ta stojolal Jeova xchiʼuk ti oy kʼusitik spasojik sventa masuk xtunik ta stojolale. Jkʼeltik kʼusi kʼot ta stojolalik li ermano Payton xchiʼuk li yajnil Dianae. Tskʼupinik toʼox tajek xchanbel sloʼil li ermanoetik ti oy kʼusitik spasojik sventa masuk xtunik ta stojolal Jeovae, jech kʼuchaʼal li ta mantaletik lokʼem ti xi sbie: «Bat tunikuk». * Xi chal li ermanoe: «Kʼalal ta jchankutike, xkoʼolaj ti oy xa buchʼu te jkʼelojkutik yaʼel ti mu tajek chaʼi jtosuk veʼlile. Jaʼ yuʼun, ta jkʼan xa ta jpaskutik preva kaʼikutik ek xchiʼuk ti xkilbekutik slekil yoʼonton li Jeovae». Ta mas tsʼakale, bat onoʼox tunikuk ti bu skʼanik mas koltaele. ¿Mi oy achanoj li mantaletik taje? ¿O mi oy akʼeloj li videoetik Muʼyuk yan kuxlejal jech kʼuchaʼal liʼe xchiʼuk Xcholel mantal «k’alal to ta namal balumil» ti te oy ta jw.org? Xuʼ me skoltaot sventa xavakʼ venta kʼusi yan xuʼ xapas sventa masuk to xatun ta stojolal Jeovae.

15. ¿Kʼuxi tskoltautik mi jaʼ ta jchiʼintik li buchʼutik baʼyel yakʼoj ta xkuxlejalik li Ajvalilal yuʼun Diose?

¹⁵ Jaʼuk xachiʼin li buchʼutik baʼyel yakʼoj ta xkuxlejalik li Ajvalilal yuʼun Diose. Mi jaʼ ta jchiʼintik li buchʼutik mu chaʼiik jtosuk veʼlil ti muʼyuk jpasojtik-o prevae, ta van jlajestik ek. Jaʼ noʼox jech ek, mi ja’ ta jchiʼintik li buchʼutik yakʼoj ta yoʼonton chtunik ta stojolal Jeovae, ta van stij koʼontontik yoʼ oyuk kʼusi mas jpastik ta stojolal Jeova. Jaʼ jech kʼot ta stojolalik li Kent xchiʼuk Veronicae. Xi chalike: «Li kamigotakutik xchiʼuk li kutsʼ kalalkutike tstij koʼontonkutik sventa oyuk kʼusi mas jpaskutik ta mantal. Laj kakʼkutik venta ti mas ch-ayan ta koʼontonkutik ti oyuk kʼusi yan jpaskutik kʼalal jaʼ ta jchiʼinkutik li buchʼutik baʼyel yakʼoj ta xkuxlejalik li Ajvalilal yuʼun Diose». Avie, chtunik xa ta prekursor espesial ta Serbia.

16. Jech kʼuchaʼal laj yal Jesus ta Lukas 12:16 kʼalal ta 21, ¿kʼu yuʼun skʼan oyuk kʼusitik jel ta jkuxlejaltik?

¹⁶ Oyuk kʼusitik xajel ta akuxlejal sventa xatun ta stojolal Jeova. Sventa lek xilutik li Jeovae, mu persauk xkiktatik spasel skotol li kʼusitik ta jkʼupintike (Ekl. 5:19, 20). Pe mi muʼyuk mas chijtun ta stojolal Jeova ta skoj ti mu jkʼan xkiktatik spasel li kʼusi lek chkaʼitike, xuʼ me jech xkʼot ta jtojolaltik kʼuchaʼal li jk’ulej vinik laj yalbe skʼoplal Jesus ti chʼay ta sjol li Diose (kʼelo Lukas 12:16-21). Xi chal jun ermano ti te nakal ta Francia ti Christian sbie: «Muʼyuk toʼox mas yakal ta jchʼak jkʼakʼal xchiʼuk muʼyuk mas chkakʼ persa sventa oyuk kʼusi jpas ta stojolal Jeova xchiʼuk ta stojolal li kutsʼ kalale». Jaʼ yuʼun, laj yikta komel  yabtelik xchiʼuk yajnil sventa x-ochik ta prekursor. Vaʼun, lik skusik ofisinaetik o naetik xchiʼuk xmuyubajik noʼox akʼo mi mas jutuk kʼusi x-ayan yuʼunik. ¿Mi la stabeik sbalil ti jech la spasike? Xi to chale: «Mas xa ta jkʼupinkutik li cholmantale xchiʼuk ximuyubajkutik-o kʼalal chojtikinik batel Jeova li kaj-estudiokutik xchiʼuk li jrevisitakutike».

17. ¿Kʼu yuʼun oy buchʼutik ti mu skʼan sjelik ti kʼu yelan chcholik mantale?

¹⁷ Jelo ti kʼu yelan chachol mantale (Ech. 17:16, 17; 20:20, 21). Jun prekursora ti te nakal ta Estados Unidos ti Shirley sbie la sjel ti kʼu yelan chchol mantal kʼalal jaʼo yakal li tsatsal chamel COVID-19. Chiʼ toʼox xcholel mantal ta telefono. Pe akʼbat yil kʼuxi ta pasel yuʼun li jkʼelvanej ta sirkuitoe. Vaʼun, jaʼ xa jech lik xchol mantal. Xi chale: «Chixiʼ toʼox, pe ta jkʼupin xa tajek. Mas ep buchʼutik ta jtatik ta kʼoponel ti jaʼ mu sta kʼalal ta jcholtik toʼox mantal ta naetike».

18. ¿Kʼusi xuʼ skoltautik sventa jtsaltik li kʼusitik tsmakutik sventa jcholtik mas mantale?

¹⁸ Oyuk kʼusi xavakʼ ta avoʼonton stael xchiʼuk akʼo persa ti jechuk xapase. Kʼalal ta jnuptan jvokoltike, ta jkʼopontik Jeova xchiʼuk ta jnoptik lek kʼuxi xuʼ xkuch kuʼuntik (Prov. 3:21). Xi chal Sonia ti te chtun ta prekursora ta jun grupo ta Europa ti chkʼopojik ta romanie: «Lek xkaʼi stsʼibael li kʼusi oy ta koʼonton stael ta mantale xchiʼuk te ta jnapʼan ti bu jta ta kʼelele. Li ta jmexae, te jkajanoj jun divujo ti chakʼ ta ilel ti sjeloj sba beetike. Kʼalal oy kʼusi ta jnop ta jpase, ta jkʼel li divujoe xchiʼuk ta jnop bu chikʼot ta lokʼel yuʼun li kʼusi ta jpase». Kʼalal oy svokol li Soniae, chakʼ persa ti xmuyubajuk noʼoxe. Xi chale: «Kʼalal oy kʼusi chjel ta jkuxlejale, voʼon ta jnop jtuk mi chkakʼ smakun yoʼ mu jta li kʼusi oy ta koʼonton ta mantal jech kʼuchaʼal jun muro o mi jaʼ tskoltaun yoʼ jta jech kʼuchaʼal junuk bakʼoe».

19. ¿Kʼuxi xuʼ jtojtik ta vokol li kʼusitik lek yakʼojbutik Jeovae?

¹⁹ Jeltos kʼu yelan chakʼbutik bendision li Jeovae. Mi chijtun ta stojolal ti bu kʼalal xuʼ kuʼuntike, jaʼ jech chkakʼbetik yil ti ta jtojbetik ta vokole (Ebr. 13:15). Xuʼ jkʼeltik kʼuxi xuʼ xkepajestik li kʼusitik ta jpastik ta mantale. Mi jech la jpastike, mas to chakʼbutik bendision li Jeovae. Jaʼ yuʼun, oyuk kʼusi jpastik skotol kʼakʼal sventa xkiltik ti toj lek yoʼonton li Jeovae. Jaʼ jech ta jchanbetik stalelal Jesus ti xi laj yale: «Jaʼ jveʼel ti ta jpasbe li kʼusi tskʼan yoʼonton li buchʼu la stakun tale xchiʼuk ti ta jtsutsesbe li yabtele» (Juan 4:34).