1, 2. Мар кароно, Иеговалэсь ӟечлыксэ ас вылад шӧдон понна, Псалтирез 33:9 лыдэ басьтыса?

 ПУКТЭ син азяды: тӥледлы ӵектӥзы сиён, кудзэ тӥ ноку но ӧд веръялэ. Та сиён сярысь тросгес тодыны быгатоды, сое умой-умой учкыса, солэсь зынзэ зынъяса, тодыса, кызьы та сиёнэз пӧрало, яке юаса, кельшиз-а со мукет адямиослы. Озьы ке но, та сиён ческыт-а, ӧвӧл-а шуыса валан понна, тӥледлы сое асьтэлы веръяны кулэ.

² Иеговалэн ӟечлыкез сярысь кӧня ке тодон понна, тӥ быгатӥськоды Библиез но публикациосмес лыдӟыны, озьы ик вын-агайёслэсь но сузэр-апайёслэсь учыръёссэс кылзыны, кызьы Иегова соосты юнматылӥз. Нош быдэсак тодон понна, макем Иегова ӟечлыко луэ, кулэ тае ас вылад шӧдыны. (Лыдӟе Псалтирез 33:9.) Син азямы пуктомы таӵе учырез: тӥ мылкыд кариськоды вань дырдэс сётыса ужаны-тыршыны, нош со понна, кызьы тӥ тодӥськоды, улондэс огшорыгес кароно. Иисус вераз, Иегова ваньзэ кулэзэ сётоз шуыса соослы, кинъёс Инмарлэсь Эксэйлыксэ улоназы нырысетӥ интые пукто. Тӥ ӵем лыдӟиды та кылъёсты, нош соослэсь быдэсмемзэс ас вылады ӧд шӧдэ на, дыр (Матф. 6:33). Озьы ке но, Иисуслэн кылъёсызлы оскыса, тӥ коньдондэс ӝикытгес кутыны кутскиды, воштӥды ужан дырдэс но вань сюлмысьтыды ужан-тыршонын тросгес лэсьтыны кутскиды. Но тани тӥ ас вылады шӧдӥськоды, кызьы Иегова тӥ сярысь сюлмаське. Мукет кылъёсын вераса, тӥ веръяды но адӟиды, макем ӟечлыко Иегова.

3. Кинэ Иегова нимысьтыз бакель каре, Псалтирез 30:20 лыдэ басьтыса?

³ Иегова «ваньмызлы ӟеч», озьы ик соослы но, кинъёс сое уг тодо (Пс. 144:9; Матф. 5:45). Со нимысьтыз бакель каре соосты, кинъёс сое ярато но солы вань сюлмысьтызы ужало-тыршо.  (Лыдӟе Псалтирез 30:20.) Ойдолэ эскеромы Иеговалэсь куд-ог ӟеч ужъёссэ, кудъёссэ со ми понна лэсьтэ.

4. Кызьы Иегова ӟеч луэмзэ возьматэ соослы, кинъёс со доры матэ карисько?

⁴ Иеговалэсь визь-кенешъёссэ уже кутӥськомы ке, ми адӟиськомы, кызьы милям улонмы умой пала воштӥське. Кылсярысь, куке ми Инмар сярысь тодӥмы но сое яратӥмы, со юрттӥз милемлы солы ярамон луисьтэм малпанъёсмес но сямъёсмес палэнтыны (Кол. 1:21). Нош куке ми Иеговалы улонмес сӥзимы но пылатӥськимы, соку эшшо но золгес шӧдӥмы солэсь ӟечлыксэ, малы ке шуоно со котькудмылы сётӥз чылкыт возьытлык но лэзиз аслаз эшез луыны (1 Пётр 3:21).

5. Кызьы Иегова ӟеч луэмзэ возьматэ соослы, кинъёс тодытон уже пырисько?

⁵ Озьы ик ми Иеговалэсь ӟеч луэмзэ шӧдӥськомы, куке тодытон уже пыриськиськомы. Возьдаськисесь-а тӥ? Иеговалэн Адӟись-Ивортӥсьёсыз пӧлын сыӵе адямиос трос. Пылатӥськон азяды тӥ ӧд но малпалэ, дыр, тодмотэм адямилэн ӧсаз йыгаськоды но солы Библия сярысь вералоды шуыса. Нош туннэ та уж улонады бадӟым инты басьтэ. Озьы ик Иегова юрттӥз тӥледлы тодытон ужез яратыны! Со сяна, куке ужан-тыршонын тӥледлы урод кылъёс веразы, Иегова юрттӥз тӥледлы каньыл сюлмын улыны. Нош куке адями ӟеч иворен тунсыкъяськиз, Иегова тӥледлы юрттӥз Библиысь кулэ луись кылбурез тодады вайыны. Адямиослэн ӟеч иворез кылзэмзы уг поты ке но, Иегова тӥледлы кужым сётӥз азьланяз но тодытон уже пыриськыны (Иер. 20:7—9).

6. Малы Иеговалэн дышетонэз возьматэ солэсь ӟечлыко луэмзэ?

⁶ Иеговалэсь ӟеч луэмзэ адӟыны быгатӥськомы отысь, кызьы со милемыз ужаны-тыршыны дышетэ (Иоанн 6:45). Арня вискын ортчись пумиськонъёсамы ми учкиськомы видеороликъёсты, кызьы адямиен вераськыны луэ. Берлогес отысь малпанъёссэ ужан-тыршонамы кутыны быгатӥськомы. Нырысь милемлы кӧня ке кышкыт потыны быгатэ тодмотэм амалъёсты уже кутыны. Нош ми озьы лэсьтӥськомы ке, адямиос милемыз шумпотысагес кылзозы, дыр. Кенешлэн пумиськонъёсаз но конгрессъёсын милесьтым мылкыдмес ӝуто пӧртэм пумо тодытон амалъёсты уже кутыны. Соослы дышон понна, ми сюлмаськыны кутскомы, дыр. Нош тыршимы ке, Иегова милемыз бакель кароз. Ойдолэ табере эскеромы, кыӵе кузьымъёс басьтозы соос, кинъёс Иеговалы самой умойзэ сётыны тыршо, югдуръёссы шоры учкытэк. Собере вераськомы, мар юрттоз милемлы ужан-тыршонын ужпумъёс кутыны но соосты быдэсъяны.

7. Кызьы Иегова милемыз бакель кароз, ми ужан-тыршонын тросгес лэсьтыны тыршимы ке?

⁷ Иеговаен эшшо но юнгес эшъяськон. Эскеромы Колумбиысь Самуэль b нимо тӧролэсь учырзэ. Солы но солэн кышноезлы асьсэлэн кенешазы пионер луыса ужаны-тыршыны туж кельше вал. Нош соослэн потэ вал Иеговалы ужан-тыршонын тросгес лэсьтэмзы но мыныны отчы, кытын тодытӥсьёс уг тырмо. Та ужпумзэс быдэстон понна, соослы малэсь ке но куштӥськоно вал. Самуэль вера: «Ми Матфейлэсь 6:33 визь-кенешез уже кутӥмы но кулэтэм арбериосты октэмысь дугдӥмы. Нош тужгес но секыт вал квартирамес кельтыны. Отын ваньмыз милемлы туж кельше вал, озьы ик со понна милям нокыӵе пунэм тыронъёсмы ӧй вал». Выль интыын Самуэль но солэн кышноез валазы, азьло улонэнызы ӵошатыса, соослы улон понна куать поллы ӧжытгес коньдон кулэ  шуыса. Со азьланьтэ: «Ми адӟимы, кызьы Иегова милемын кивалтӥз но вӧсяськонъёсмылы ответ сётылӥз. Азьло ми ноку но ӧм шӧдылэ, ми солы ярамон луиськомы но со милемыз яратэ шуыса». Нош быгатӥськоды-а тӥ улонады мае ке но воштыны, ужан-тыршонын тросгес лэсьтон понна? Быгатӥськоды ке, юн оске: тӥ Иеговалы матэгес луоды, нош со тӥ сярысь сюлмаськоз (Пс. 17:26).

8. Малы дышетскыны луэ Иванлэсь но Викториялэсь?

⁸ Ужан-тыршонын тросгес шумпотон. Малпаськомы Иван но Виктория кузпалъёслэн учырзы вылын, кудъёсыз Киргизиын пионер луыса ужало-тыршо. Соос тыршизы огшоры улыны, организациын пӧртэм ужъёсты быдэсъяны мед быгатозы шуыса, кылсярысь, пуктӥськон-тупатъян ужъёсы пыриськыны. Иван вера: «Котьку, куке милемлы выль уж сётӥзы, ми быдэсак со пӧлы выйиськомы вал. Зэм но, нунал пумын ми туж жадьылӥмы, озьы ке но сюлмамы зэмос шумпотон вал, малы ке шуоно ми вань кужыммес Иегова понна сётӥмы. Озьы ик ми туж шумпотӥськомы, милям трос эшъёсмы луизы но со дыр сярысь трос умой тодэ ваёнъёсмы вань шуыса» (Марк 10:29, 30).

9. Вералэ, кызьы одӥг сузэр ӟырдыт мылкыдын тодытон уже пыриськыны быгатэ, шуг-секытъёсыз шоры учкытэк, но кыӵе со пайда вае.

⁹ Секыт югдуръёсмы дыръя но Иеговалы ужан-тыршон милемлы шумпотон вае. Тае возьматэ Мирей сузэрлэн учырез. Со арлыдо палкышно, кудӥз улэ Шундыпуксён Африкаын. Азьло со эмъясь вал, нош пенсие потэм бераз пионер луыса ужаны-тыршыны кутскиз. Мирей артритэн курадӟе, соин ик солы ветлыны секыт. Со одӥг часлэсь кемагес коркась корка ветлыса тодытыны уг быгаты. Нош стендэн ужаны-тыршыны со кемагес быгатэ. Мирейлэн трос кыкетӥ вераськонъёсыз, озьы ик Библия дышетонъёсыз но, куд-огзэ соос пӧлысь со телефон пыр ортчытъя. Мар Мирейлэсь мылкыдзэ ӝутэ ӟырдыт мылкыдын ужан-тыршонэ пыриськыны? Со валэктэ: «Мон вань сюлмысьтым яратӥсько Иеговаез но Иисус Христосэз. Озьы ик мон Иеговаез курисько юрттыны мыным, ужан-тыршонын эшшо но тросгес лэсьтыны мед быгато шуыса» (Матф. 22:36, 37).

10. Мар возьма соосты, кинъёслэн Иеговалы тросгес ужамзы-тыршемзы потэ, 1 Пётрлэн 5:10 гожтэмъя?

¹⁰ Дышетскыны луонлык. Со зэмос кузьым луиз Кенни агайлы, кудӥз Маврикий шормуӵын пионер луыса ужа-тырше. Зэмлыкен тодматскемез бере со университетын дышетсконзэ кельтӥз, пылатӥськиз но вань дырзэ сётыса ужаны-тыршыны кутскиз. Со вера: «Мынам потэ Исаия пророклэн кылъёсызъя улэме: „Тани мон, монэ ысты“» (Ис. 6:8). Кенни кӧня ке пол пыриськиз пуктӥськон-тупатъян ужъёсы, озьы ик ас кылаз берыктыны юрттӥз Библия вылэ пыкиськем публикациосмес. Со вера: «Вын-агайёс монэ дышетӥзы, солы луыса мон аслэсьтым ужъёсме умой быдэсъяны быгатӥ». Нош та ужъёслы дышетскем сяна, со эшшо малы ке дышетскиз на. Кенни азьланьтэ: «Мон умойгес адӟи, мае карыны уг быгатӥськы, но валай, кыӵе сямъёсты мыным будэтыны кулэ, Иеговаез эшшо но золгес шумпоттон понна». (Лыдӟе 1 Пётрлэсь 5:10.) Оло нош, тӥ но быгатысалды югдурды шоры мукет сямен учкыны но улонады воштӥськонъёс лэсьтыны, Иеговалэсь эшшо малы ке дышетскон понна?

11. Кызьы Лымшор Кореяысь куинь сузэръёс быгатӥзы эшшо но ӟырдыт мылкыдын ужан-тыршонэ пыриськыны? (Озьы ик учке вылбамысь суредэз.)

¹¹ Дышетскыны кулэ со Адӟись-Ивортӥсьёслы но, кудъёсыз трос аръёс ӵоже ужало-тыршо ини, ужан-тыршонын выль амалъёсты кутон понна. Тани мар верало Лымшор Кореяысь тӧроос, COVID-19 пандемия дыръя кенешсылэн азинсконъёссы сярысь: «Соослы, кинъёслэн тазалыксы лябгес, капчи ӧвӧл коркась корка ветлыса тодытыны. Нош табере  соос интернет пыр тодыто. Куинь сузэръёс, кудъёсызлы 80 ареслэсь тросгес ини, дышизы компьютерен ужаны но табере котькуд нунал кадь тодыто» (Пс. 91:15, 16). Потэ-а тӥляд эшшо но ӟырдыт мылкыдын ужан-тыршонэ пыриськемды но умойгес валамды, макем ӟечлыко Иегова? Ойдолэ тодомы, мар карыны луоз, та ужпумез быдэстон понна.

12. Мар карыны Иегова кылзэ сётэ соослы, кинъёс со вылэ оскисько?

¹² Дышетске Иегова вылэ оскиськыны. Ми Иеговалы оскимы ке но ваньзэ умойзэ солы сётӥмы ке, со кылзэ сётэ милемыз бакель карыны (Мал. 3:10). Та кылъёслэсь зэм луэмзэс ас вылаз шӧдӥз Колумбиысь Фабиола сузэр. Пылатӥськемез бере солэн потэ вал пионер луыса ужамез-тыршемез. Нош Фабиолалэн картэз но куинь нылпиоссы солэн уждунэныз улӥзы. Со пионер луыса ужаны-тыршыны но со дыре ик ужаны уг быгаты вал. Соин ик пенсие потон азяз Фабиола вань сюлмысьтыз Иеговалы юрттэт курыса вӧсяськиз. Со тодаз вае: «Ӵем дыръя, пенсия басьтыны кутскон понна, кӧня ке толэзьёс ортче. Нош мон, одӥг толэзь ортчыса ини, пенсия басьтыны кутски. Со воксё паймоно кадь!» Кык толэзь ортчыса, солэн малпанэз быдэсмиз. Али Фабиолалы 70 ареслэсь тросгес, со 20 арлэсь но кемагес пионер луыса ужа-тырше ини. Та дыр куспын со тямыс кышномуртъёслы асьсэлэсь улонзэс Иеговалы сӥзьыны юрттӥз. Фабиола азьланьтэ: «Дырын-дырын мон шӧдӥсько, кужыме быре шуыса, озьы ке но Иегова юрттэ мыным нуналысь нуналэ ужан-тыршонэ пыриськыны».

13, 14. Кинлэсь ми адӟем карыны быгатӥськомы, Иегова вылэ оскиськон понна но пуктэм ужпумъёсмес быдэсъян понна?

 ¹³ Адӟем каре соослэсь, кинъёс Иегова вылэ оскиськизы. Библиын гожтэмын трос учыръёс со адямиос сярысь, кудъёсыз трос лэсьтыны тыршизы Иегова понна. Ӵем дыръя нырысь соослы мар ке но кароно вал, собере гинэ Иегова соосты нимысьтыз бакель кариз. Кылсярысь, Иегова Авраамез бакель кариз соку гинэ, куке со аслэсьтыз корказэ кельтӥз, «тодмотэм музъеме» мыныса (Евр. 11:8). Иегова Иаковез нимысьтыз бакель кариз соку гинэ, куке со быдэс уй кылчинэн нюръяськиз (Ул.-выл. 32:24—30). Нош израиль калык Иордан шур вамен потыны но Сӥзем музъеме пырыны быгатӥз соку гинэ, куке священникъёс шурлэн вуосаз лёгиськизы (Иис. Н. 3:14—16).

¹⁴ Озьы ик ми адӟем карыны быгатӥськомы Иеговалэн туала ужась-тыршисьёсызлэсь но, кудъёсыз со вылэ оскиськизы но ужан-тыршонын ас азязы выль ужпумъёс пуктыны тыршизы. Сыӵе вын-агайёс но сузэр-апайёс сярысь вераське, кылсярысь, «Они с готовностью предоставили себя для служения» нимаськись статьяосын c. Пейтон агай но солэн Дайана кышноез, кудъёсызлы котьку но кельше вал та статьяосты лыдӟыны, верало: «Куке ми та статьяосысь учыръёсты лыдӟимы, милемлы потэ вал, ми пукиськомы шуыса со адямиос вӧзын, кудъёсыз шумпотыса мае ке сиё. Макем кемагес соос шоры учкиськод, сокем золгес потэ веръяны но тодыны, макем ӟечлыко Иегова». Дыр ортчыса, Пейтон но Дайана улыны кошкизы отчы, кытын тросгес тодытӥсьёс кулэ вал. Нош тӥ лыдӟиды-а та статьяосты? Озьы ик учкыны луоз jw.org сайтысь «Проповедь в отдалённых районах. Австралия» но «Проповедь в отдалённых районах. Ирландия» видеороликъёсты. Та выллем статьяос но видеороликъёс возьматозы милемлы, мар карыны луоз, Иеговалы эшшо но тросгес ужан-тыршон понна.

15. Малы туж кулэ эшъёсты визьмо бырйыны?

¹⁵ Эшъёсты визьмо быръе. Милемлы капчигес луоз веръямтэ сиёнэз сиыны, куке ми сое сиёмы соосын, кинъёслы та сиён кельше. Озьы ик милям но мылкыдмы луоз Иеговалы тросгес ужаны-тыршыны, ми эшъяськимы ке соосын, кинъёслэн улоназы ужан-тыршон валтӥсь инты басьтэ. Кент агай но солэн Вероника кышноез тае ас вылазы шӧдӥзы. Соос верало: «Эшъёсмы но ӵыжы-выжыосмы милесьтым мылкыдмес ӝутӥзы выль амалъёсын ужан-тыршонэ пыриськыны. Ми валамы: тон тросгес дырдэ ортчытъяськод ке соосын, кинъёслы Инмарлэн Эксэйлыкез улоназы нырысетӥ интыын луэ, соку уд кышкаськы мае ке выльзэ эскерыны». Али Кент но Вероника Сербиын нимысьтыз пионеръёс луыса ужало-тыршо.

16. Малы милемлы малэсь ке куштӥськыны дась луоно, Иисуслэсь мадёнзэ лыдэ басьтыса? (Лукалэсь 12:16—21).

¹⁶ Иегова понна дась луэ малэсь ке но куштӥськыны. Иеговалы ярамон луон понна, кулэ ӧвӧл куштӥськыны ваньмызлэсь, мар милемлы кельше (Екк. 5:18, 19). Озьы ке но куддыръя адями быгатысал Иеговалы тросгес ужаны-тыршыны, нош малэсь ке куштӥськыны со дась ӧвӧл. Ӵапак сыӵе янгыш лэсьтӥз Иисуслэн мадёнысьтыз пиосмурт, кудӥз сюлмаськиз узырмон сярысь гинэ, нош Инмар сярысь ӧз. (Лыдӟе Лукалэсь 12:16—21.) Франциысь Кристьян нимо агай вера, азьло со Иеговалы но аслаз семьяезлы ӧжыт саклык висъяз шуыса. Тае валаса, со кышноеныз ӵош ужпум кутӥз пионер луыса ужаны-тыршыны. Со понна соослы кельтоно луиз азьло ужзэс. Собере соос кутскизы утялскон ужен  вырыны. Солы луыса соослэн ваньмыз кулэез вал. Шумпотӥзы-а соос, пионер луыса ужан-тыршон понна, малэсь ке но куштӥськизы шуыса? Кристьян вера: «Ми ноку но ужан-тыршонлэсь сомында шумпотон ӧм басьтэ! Ми шумпотӥськомы адӟыны, адямиос, кудъёсыз доры ми выльысь лыктӥськомы но кудъёсыныз Библиез дышетӥськомы, Иегова сярысь тодо шуыса».

17. Мар юрттӥз Шерон сузэрлы выль амалэн ужаны-тыршыны?

¹⁷ Тырше выль амалъёсын ужаны-тыршыны (Ап. уж. 17:16, 17; 20:20, 21). Шерон сузэрлы, кудӥз Огазеяськем штатъёсын пионер луыса ужа-тырше капчи ӧй вал дышыны солы, кызьы воштӥськизы ужан-тыршон амалъёс COVID-19 пандемия дыръя. Нырысь со ӧз дӥсьты телефон пыр тодытыны. Нош ёросэз чаклась возьматӥз, кызьы сое лэсьтоно, собере Шерон сузэр та амалэн ялан тодытыны кутскиз. Шерон вера: «Нырысь мыным кышкыт вал, нош собере со мыным шумпотон вайыны кутскиз. Коркась корка ветлыса тодытонэн ӵошатыса, телефон пыр тросгес адямиосын вераськыны луэ».

18. Кыӵе визь-кенеш юрттоз милемлы тросгес тодытыны, шуг-секытъёсмы шоры учкытэк?

¹⁸ Ужпумъёс кутэ но соосты быдэсъяны тырше. Шуг-секытэн пумиськыкумы, ми Иеговалы юрттэт курыса вӧсяськиськомы но малпаськиськомы, кызьы отысь потоно (Мад. 3:21). Тани мар вера Европаысь Соня сузэр, кудӥз чиган кылын вераськись группаын пионер луыса ужа-тырше: «Ӵем дыръя мон ужпумъёсме бумага вылэ гожтӥсько но сое адӟиськымон интыын возисько. Озьы ик мынам ӝӧк вылам вань суред, кудаз возьматэмын кыклы люкиськись сюрес. Кыӵе ке ужпум кутон азям мон со шоры учкисько но малпаськисько, кытчы со монэ вуттоз». Шуг-секытъёсын пумиськыкуз но, Соня тырше умойзэ гинэ адӟыны: «Выль югдуръёс люкетыны быгато азьлань мыныны, яке соос луыны быгато выж кадь, кудӥз юрттэ мукет ярдуре выжыны. Ваньмыз герӟаськемын соин, кызьы мон та югдур шоры учкисько».

19. Мар карыны тӥлесьтыд мылкыддэс ӝутӥз та статья?

¹⁹ Иегова милемыз пӧртэм сямен бакель каре! Ойдолэ лэсьтомы ваньзэ, мае быгатӥськомы, сое данъян понна. Озьы ми Иеговалы тау кареммес возьматомы (Евр. 13:15). Тырше пӧртэм амалъёсын ужаны-тыршыны. Солы луыса Иегова тӥледыз эшшо но тросгес бакель кароз. Котькуд нунал утчалэ амалъёс, кызьы веръяса утчаны но адӟыны луэ, макем ӟечлыко Иегова! Соку тӥ, Иисус сямен ик, вераны быгатоды: «Мынам сиёнэ — Монэ Ыстӥсьлэсь эриксэ карон но Солэсь ужзэ быдэстон» (Иоанн 4:34).