1-2. Kirobo rẹ Une Rẹ Ejiro 34:8 tare, mavọ yen avwanre se vwo yono kpahen uyoyovwin ri Jihova?

VWẸ ẹwẹn roro nẹ ohwo kẹ wẹ emu rẹ wọ je rhe davwen dẹvo-o. Wo se vughe oborẹ emu na hepha siẹrẹ wo de no, se ọnrhe rọyen, vughe ekuakua re vwo chere vẹ obo re chere wan yẹrẹ nọ ihwo efa kpahen emu na. Jẹ, Idjerhe vuọvo wọ sa vwọ riẹn sẹ emu na je we, yen wọ da davwọn ni.

² Avwanre se yono kpahen uyoyovwin ri Jihova, siẹrẹ e de se Baibol vẹ ẹbe sansan rẹ ukoko na teyenphia kugbe ọke re de nyo ikuegbe rẹ oborẹ iniọvo rẹ avwanre vwọ mrẹ emuesiri nẹ obọ ri Jihova rhe. Ẹkẹvuọvo, avwanre cha “davwe” uyoyovwin ri Jihova ni komobọ tavwen a ke sa nabọ riẹn oborẹ Jihova yovwin te. (Se Une Rẹ Ejiro 34:8.) E jẹ a ta ota kpahen idjerhe ọvo re se vwo ru ọnana. Kerẹ udje nẹ wọ guọnọ vwobọ vwẹ iruo rẹ ẹga ọkieje, wọ ke sa yanmuo, kẹ wo che ru akpeyeren wẹn lọhọ tavwen. Ọ sa dianẹ wo se kpahen ive ri Jesu na abọ buebun re, rọ tare nẹ, awanre de phi Uvie na phiyọ ẹdia rẹsosuọ, Jihova kọ kẹ avwanre emu eje ra ghene guọnọ, ẹkẹvuọvo, wẹ komobọ je rhe mrẹ orugba rẹ ive yena-a. (Mat. 6:33) Dedena, esegbuyota ru wo vwo kpahen ive yena de mu we vwo siobọ rẹ eghwaghwọrọ vẹ ọke wọ ghwọrọ phiyọ iruo kpotọ, ji vwobọ vwẹ iruo rẹ aghwoghwo na vọnvọn. Wo de ru enana, wọ cha mrẹvughe nẹ Jihova ghene vwẹrote we komobọ. Kọyen wọ “davwe” uyoyovwin ri Jihova ni re.

3. Kirobo Une Rẹ Ejiro 16:1, 2 tare, amono yen Jihova me dje uyoyovwin rọyen kẹ?

³ Jihova “yovwi kẹ ihwo ejobi” tobọ te ihwo ri vughire-e. (Une 145:9; Mat. 5:45) Ẹkẹvuọvo, ihwo ri vwo ẹguọnọ rọyen re je ga vẹ ẹgba rayen eje, yen o me dje uyoyovwin  rọyen kẹ. (Se Une Rẹ Ejiro 16:1, 2.) Vwo oniso idjerhe evo rẹ Jihova vwo dje uyoyovwin rọyen kẹ avwanre.

4. Idjerhe vọ yen Jihova vwo dje uyoyovwin rọyen kẹ ihwo ri siẹkẹrẹ?

⁴ Ọkieje yen avwanre vwọ mrẹ erere ro no cha siẹrẹ a da yan nene odjekẹ ri Jihova. Jihova cha chọn avwanre uko vwọ kẹnoma kẹ iroro vẹ iruemu echọchọ re nẹrhẹ e sherabọ kẹ siẹrẹ e de yono kpahọn ji vwo ẹguọnọ rọyen. (Kọl. 1:21) Avwanre da je vwomakpahotọ vwọ kẹ Jihova ji bromaphiyame, ọ cha kẹ avwanre erọnvwọn re pha yoyovwin vrẹ obo ri jovwo kerẹ ẹwẹn rẹ obrorhiẹn rọ fonro, ji vwo uvi rẹ oyerinkugbe vẹ ọyen.—1 Pita 3:21

5. Idjerhe vọ yen avwanre vwo rhiẹromrẹ uyoyovwin ri Jihova vwẹ iruo rẹ aghwoghwo na?

⁵ Avwanre cha vwẹ ọkieje vwo rhiẹromrẹ uyoyovwin ri Jihova siẹrẹ e de vwobọ vwẹ iruo rẹ aghwoghwo na. Wọwẹ ohwo rẹ oma vua? Oma vua ihwo ri Jihova buebun. Ọkiọvo, tavwen wọ ke rhe dia odibo ri Jihova, ọ sa dianẹ wọ vwẹ ẹwẹn roro nẹ wo che hworo ẹchẹ rẹ ohwo wo vugheri siẹvo ki ghwoghwota kẹ-ẹ. Ẹkẹvuọvo, enẹna ọkieje yen wo vwo ruẹ ọtiọyen. Marho, Jihova chọn wẹ uko vwẹ iruo rẹ aghwoghwo na re! Ọ je chọn wẹ uko vwẹ idjerhe efa. Ọ chọn wẹ uko vwo vwo ẹwẹn ri dọe ọke wo vwo hirharoku ẹvwọsuọ. Ọ je chọn wẹ uko vwọ karophiyọ ẹkpo ri Baibol ọvo kiriguo rẹ wọ guọnọ se kẹ ọrovwuwevwin ro dje omavwerhovwẹn phia. Vwọba, ọ je kẹ wẹ ẹgba ọkieje wo vwo ghwoghwo dede nẹ ihwo rhọvwan kerhọ-ọ.—Jer. 20:7-9.

6. Mavọ yen uyono rẹ Jihova vwọ kẹ avwanre vwo dje uyoyovwin rọyen phia?

⁶ Jihova ji dje uruemu rẹ uyoyovwin rọyen vwọ kẹ avwanre womarẹ o vwo muegbe avwanre vwọ kẹ iruo rẹ aghwoghwo na. (Jọn 6:45) Vwẹ uyono rẹ uvwre rẹ udughwrẹn na, avwanre kerhọ kẹ omamọ rẹ idje ri shekpahen obo ra sa ta vwẹ aghwoghwo na, e ji jiro kẹ avwanre nẹ a sa reyọ ena nana vwo ruiruo. Ẹsosuọ, oshọ ra vwọ davwen ena kpokpọ na se mu avwanre, jẹ a da davwen ayen ni, a cha mrẹvughe nẹ ena na nabọ wian vwẹ ekogho na. E ji jiro kẹ avwanre vwẹ emẹvwa vẹ eghwẹkoko nẹ e vwobọ vwẹ ena rẹ aghwoghwo re ji rhi vwobọ vwọ dẹvo-o. Ọnana je sa nẹrhẹ ọshọ mu avwanre, ẹkẹvuọvo, e de vwobọ vwẹ ayen, Jihova che bruba kẹ avwanre. E ja fuẹrẹn ebruphiyọ evo ri che te avwanre obọ siẹrẹ a da davwen idjerhe kpokpọ re vwo ru asan ẹgba rẹ avwanre teri vwọ kẹ Jihova, o toro ẹdia rẹ avwanre hepha-a. A je cha ta ota kpahen oborẹ avwanre sa vwọ hẹre iruo rẹ aghwoghwo rẹ avwanre phiyọ.

7. Ebruphiyọ vọ yen che te avwanre obọ siẹrẹ a da hẹre iruo rẹ aghwoghwo rẹ avwanre phiyọ?

⁷ Avwanre sikẹrẹ Jihova vrẹ obo ri jovwo. Roro kpahen udje ọkpako ọvo re se Samuel * rọ vẹ aye rọyen ga vwẹ Colombia. Ayen riavwerhen rẹ iruo rẹ ọkobaro vwẹ ukoko rẹ ayen hepha, ẹkẹvuọvo, ayen guọnọ hẹre iruo rẹ aghwoghwo rayen phiyọ womarẹ a vwọ ga vwẹ ukoko rọ guọnọ ukẹcha. Ayen se vwo ru ọtiọyen, ko fori nẹ ayen vwẹ erọnvwọn evo vwo ze. Samuel da ta: “Avwanre ru nene obo rehẹ Matiu 6:33, je kẹnoma kẹ a vwọ dẹ erọnvwọn ra ghwa guọnọ-ọ. Ẹkẹvuọvo, obo re ma bẹn kẹ avwanre yen avwanre vwọ kua vwo nẹ uwevwin rẹ avwanre. A bọnrọ kirobo rẹ avwanre ghwa guọnọ,  avwanre riosa vuọvo vwọ-ọ.” Vwẹ ukoko kpokpọ rẹ ayen kua ra na, aye gbe ọshare na rha ghwọrọ te igho rẹ ayen ghwọrọ jovwo-o. Samuel da je ta: “Avwanre mrẹ oborẹ Jihova sẹro ji kpahenphiyọ ẹrhovwo rẹ avwanre, avwanre mrẹvughe nẹ oma rẹ avwanre vwerhen Jihova, o ji dje ẹguọnọ kẹ avwanre vwẹ idjerhe rẹ oghẹresan.” Wọ sa hẹre iruo rẹ aghwoghwo wẹn phiyọ vwẹ idjerhe evo? Ọ da dia ọtiọyen, gbe jẹ o muwẹro nẹ Jihova cha vwẹrote we, wo ji che sikẹrẹ phiyọ.—Une 18:25.

8. Die yen eta ri Ivan vẹ Viktoria tare yono uwe?

⁸ Avwanre mrẹ aghọghọ vwẹ iruo rẹ ẹga na. Vwo oniso rẹ oborẹ Ivan vẹ Viktoria re dia aye gbe ọshare re ga kerẹ ọkobaro vwẹ Kyrgyzstan tare. Ayen ruẹ akpeyeren rayen lọhọ rere ayen sa vwọ vwomakpahotọ vwọ kẹ kiruo kiruo ra vwọ kẹ ayen, tobọ tẹ iruo rẹ ebanbọn. Ivan da ta: “Avwanre nabọ muomaphiyọ kiruo kiruo ra vwọ kẹ avwanre. Oma da tobọ bru avwanre ku vwẹ oba rẹ ẹdẹ na, oma je vwerhen avwanre kidie avwanre riẹnre nẹ Jihova yen avwanre wian vwọ kẹ. Avwanre je mrẹ aghọghọ vwo nẹ igbeyan kpokpọ rẹ avwanre vwori vẹ ọke avwanre vẹ ayen ghwọrọ kugbe.”—Mak 10:29, 30.

9. Die yen oniọvo aye ọvo ro hirharoku ebẹnbẹn ruru rere ọ sa vwọ hẹre iruo rẹ aghwoghwo rọyen phiyọ, Kidie yen nẹ obuko rọyen rhe?

⁹ Avwanre mrẹ aghọghọ vwẹ iruo rẹ ẹga na dede nẹ e hirharokuẹ ebẹnbẹn sansan. Kerẹ udje, ọke rẹ Mirreh, rọ dia ayeuku rọ kpakore vwẹ West Africa, vwo wontọ vwo nẹ iruo rẹ idọktọ nu, ọ da ton iruo rẹ ọkobaro phiyọ. Mirreh vwo ọga rẹ eyanyan rọ pha gangan, ọtiọyena, unọke ọvo goi kọyen ọ sa ghwọrọ vwẹ aghwoghwo ri nuwevwin kpuwevwin na. Ẹkẹvuọvo, o sa ghwọrọ ọke buebun vwẹ aghwoghwo ra vwẹ imikpekpa vwo ruẹ. O vwo orhivwinbrura vẹ ihwo rọ vwẹ Baibol vwo yono buebun, ọ vwẹ ifonu vwo se evo. Diesorọ Mirreh vwọ guọnọ ru bunphiyọ vwẹ iruo rẹ ẹga na? “Mi vwo ẹguọnọ ri Jihova vẹ Jesu mamọ. Ọkieje yen me vwọ nẹrhovwo nẹ Jihova chọn vwẹ uko vwo ru bunphiyọ vwẹ ẹga rọyen.”—Mat. 22:36, 37.

10. Vwo nene obo rehẹ 1 Pita 5:10, die yen Jihova cha vwọ kẹ ihwo re hẹre iruo rẹ ẹga rayen phiyọ?

¹⁰ Jihova yono avwanre kpobarophiyọ. Kenny rọ dia ọkobaro rọ ga vwẹ Mauritius rhọvwen phiyọ ota yena. Ọke rọ vwọ mrẹ uyota na vughe, o de vrẹ nẹ yunivasiti, bromaphiyame je ton iruo rẹ ẹga ọkieje phiyọ. Ọ da ta: “Me davwẹngba vwo ru kerẹ ọmraro Aizaya rọ tare nẹ, ‘Mẹvwẹ na! Ji vwe.’ ” (Aiz. 6:8) Kenny wian vwẹ iruo rẹ ebanbọn sansan re, o ji vwobọ vwẹ efanfan rẹ ẹbe rẹ ukoko na vwo kpo ejajẹ rọyen re. Kenny da ta: “E yono uvwe ena re me guọnọre mi se vwo ruiruo mẹ fiotọ.” Jẹ, ọ dia ena ro se vwo ruiruo rọyen ọvo yen o yonori-i. Ọ da je ta: “Mi ji yono kpahen erọnvwọn rhi mi che se ru-u, vẹ iwan ro fori nẹ mi vwo rere me sa vwọ dia omamọ rẹ odibo ri Jihova.” (Se 1 Pita 5:10.) Ọkiọvo, wo ji se ru ewene evo rere Jihova se vwo yono uwe kpobarophiyọ.

11. Die yen iniọvo eya evo vwẹ South Korea ruru rere ayen se vwo vwobọ vwẹ iruo rẹ aghwoghwo na? (Ni uhoho rọhẹ opharo ọbe na.)

¹¹ Ofori nẹ e yono Iseri ri Jihova re tobọ ga krẹ re ọke rẹ ayen da guọnọ davwen ena kpokpọ vwẹ iruo rẹ ẹga na. Vwẹ uvwre rẹ ọke rẹ ọga ri COVID-19 na, ekpako rehẹ ukoko ọvo vwẹ South Koreade si: “Ihwo evo ri rori nẹ ayen che se vwobọ vwẹ iruo rẹ aghwoghwo na kidie nẹ oma rayen ganre-e, nabọ ru ọtiọyen enẹna womarẹ vidio kọnfrẹnsi. Iniọvo eya erha re vrẹ ẹgbukpe 80 re yono obo ra vwẹ ikọmputa  vwo ghwoghwota, enẹna, ayen nabọ vwobọ vwẹ iruo rẹ aghwoghwo na.” (Une 92:14, 15) Wọ guọnọ hẹre iruo rẹ aghwoghwo wẹn phiyọ rere wọ mrẹ uyoyovwin ri Jihova vughe vrẹ obo ri jovwo? Roro kpahen owoẹjẹ evo wo se nene re cha chọn wẹ uko vwo ru ọtiọyen.

12. Die yen Jihova ve vwọ kẹ ihwo re vwẹrosuọ?

¹² Vwẹroso Jihova. O veri nẹ o che bruba kẹ avwanre a da vwẹrosuọ ji ru asan ẹgba rẹ avwanre teri. (Mal. 3:10) Oniọvo aye ọvo re se Fabiola vwẹ Colombia mrẹ orugba rẹ ive yena. Ọ guọnọ ga kerẹ ọkobaro rẹ ọkieje ọke ro ghwe vwo bromaphiyame nu. Ẹkẹvuọvo, ọyen ri mu oghwa rẹ orua rọyen. Ọtiọyena, o ri vwo te ọke ro che vwo wontọ nẹ iruo rọyen, ọ da nẹrhovwo rhe Jihova gangan vwọ kẹ ukẹcha. Ọ da ta: “Ọ reyọ ọke grongron tavwen a ke hwa igho ri pẹnshọni vwọ kẹ ohwo, ẹkẹvuọvo, emeranvwe ọvo yen ọ reyọre tavwen a ke hwa ọmẹ kẹ vwẹ. Ọnana emu rẹ igbevwunu!” Emeranvwe ivẹ vwọ wan nu, ọ da ton iruo rẹ ọkobaro phiyọ. Enẹna, ọ vrẹ ẹgbukpe 70 re, ọ je ga kerẹ ọkobaro vwẹ ikpe rẹ vrẹ 20 re. Ọ chọn ihwo ẹrenren uko vwo bromaphiyame uvwre rẹ ọke yena. Ọ da ta: “Dede nẹ oma ghwọrọ ovwẹ ọkiọvo, Jihova chọn vwẹ uko kẹdẹ kẹdẹ rere me sa vwọ yan mu ọrhuẹrẹphiyotọ mẹ.”

13-14. Idje vọ yen sa chọn wẹ uko vwọ vwẹroso Jihova ji ru bunphiyọ vwẹ iruo rẹ ẹga na?

¹³ Mrẹ erere vwo nẹ udje rẹ ihwo re vwẹroso Jihova. Baibol na vọnre vẹ idje  rẹ ihwo re nabọ wian gan vwẹ ẹga ri Jihova. Vwẹ ọke buebun, idibo ri Jihova nana jowọ tavwen ayen ke mrẹ ebruphiyọ rọyen. Kerẹ udje, Ebraham vrẹ nẹ uwevwin rọyen tavwen Jihova ki bruba kẹ jẹ ọ “riẹn obo ro vwo gbe-e.” (Hib. 11:8) Jekọp nene amakashe na muabọ tavwen ebruphiyọ rẹ oghẹresan ki te obọ. (Jẹn. 32:24-30) Ọke rẹ ẹgborho rẹ Izrẹl vwọ guọnọ ro Otọ rẹ Ive na, awọ rẹ irherẹn na te Urhie ri Jọdan nu tavwen ihwo na ke sa shariẹ urhie na vrẹ.—Jos. 3:14-16.

¹⁴ Wọ je sa mrẹ erere vwo nẹ udje rẹ Iseri ri Jihova vwẹ ọke rẹ avwanre na re vwẹroso Jihova ji ru bunphiyọ vwẹ iruo rẹ ẹga na. Kerẹ udje, oniọvo ọshare ọvo re se Payton vẹ aye rọyen Diana, riavwerhen re vwo se kpahen iniọvo re hẹre iruo rẹ ẹga rayen phiyọ, kerẹ i ri vwo uyovwinrota na “Ayen Vwẹ Oma Rayen Kpahotọ.” * Payton da ta: “Avwanre de se ikuegbe rayen kọ ghwa họhọ nẹ avwanre nughe rẹ ohwo rọ riemu ọvwevwerhen. Avwanre vwo nughe na, jẹ owenvwe rẹ avwanre vwọ ‘davwe . . . nẹ Ọrovwohwo yoma’ ganphiyọ.” Ememerha na, Payton vẹ Diana da kua ra ga vwẹ asan ra da ma guọnọ ukẹcha. Wo se iyovwinreta yena re? Wo ji ni ividio rẹ, Revwo Ghwoghwo Vwẹ Asan ri Sherabọ Vwẹ Australia kugbe Witnessing in Isolated Territory—Ireland ra vwọphia vwẹ jw.org re? Evuẹ nana cha chọn wẹ uko vwọ mrẹ idjerhe wọ sa vwọ hẹre iruo rẹ ẹga na phiyọ.

15. Idjerhe vọ yen omamọ rẹ igbeyan sa vwọ chọn avwanre uko?

¹⁵ Sane omamọ rẹ igbeyan. Ọ pha lọlọhọ ra vwọ riemu ra je rhe re dẹvo-o ọke avwanre vẹ ihwo rẹ emu na je da riọ kugbe. Vwẹ idjerhe vuọvo na, avwanre de mu ugbeyan vẹ ihwo re ga Jihova, ọ cha nẹrhẹ a guọnọ idjerhe re vwo ru bunphiyọ vwẹ ẹga rọyen. Ọnana yen obo re phia vwọ kẹ Kent vẹ Veronica re dia aye gbe ọshare. Kent da ta: “Igbeyan vẹ ihwo rẹ orua rẹ avwanre jiriro vwọ kẹ avwanre nẹ avwanre davwen iruo rẹ ẹga kpokpọ. Avwanre rhe mrẹvughe nẹ siẹrẹ a da vwẹ ihwo ri phi Uvie na phiyọ ẹdia rẹsosuọ vwo mu igbeyan, ọ cha nẹrhẹ e vwo uduefiogbere ra vwọ davwen emu kpokpọ ni.” Enẹna, Kent vẹ Veronica ga kerẹ ekobaro oghẹresan vwẹ Serbia.

16. Vwo nene itẹ ri Jesu kperi vwẹ Luk 12:16-21, diesorọ o vwo fo a vwọ vwẹ erọnvwọn evo vwo ze?

¹⁶ Vwẹ erọnvwọn evo vwo ze vwọ kẹ Jihova. Ọ dia oborẹ avwanre vwori eje yen e che siobọnu tavwen oma ke vwerhen Jihova-a. (Aghwo. 5:19, 20) Ẹkẹvuọvo, e de siomauko vwẹ ẹga ri Jihova kidie nẹ a guọnọ vwẹ erọnvwọn evo vwo ze-e, ka cha dia kerẹ ọshare rọhẹ itẹ rẹ Jesu kperi rọ wianre gangan vwo koko efe, ọ da kpairoro vrẹ Ọghẹnẹ. (Se Luk 12:16-21.) Oniọvo ọshare ọvo re se Christian rọ dia France da ta: “Me ghwọrọ ọke ji ruẹ asan ẹgba mẹ teri vwọ kẹ Jihova vẹ orua mẹ-ẹ.” Ọ vẹ aye rọyen de brorhiẹn ayen vwọ ga kerẹ ekobaro. Ẹkẹvuọvo, tavwen ayen ke sa yan mu oborẹ ayen tẹnrovi na, kẹ ayen siobọnu iruo rayen. Ayen da ton iruo rẹ orufon phiyọ rere ayen sa vwọ vwẹrote oma rayen ji yono obo re vwo ẹwẹn rẹ otekẹvwẹ kpahen omobo rẹ ohwo vwori. Oborẹ ayen ruru na vwerhen ayen oma? Christian da ta: “Avwanre nabọ riavwerhen rẹ iruo rẹ aghwoghwo na enẹna, oma je vwerhen avwanre ra vwọ mrẹ ihwo ra vwẹ Baibol yono vẹ irhivwinbrura ri yono vwọ kpahen Jihova.”

17. Die yen sa nẹrhẹ ọ dia bẹnbẹn ra vwọ davwen ona kpokpọ ni vwẹ aghwoghwo na?

 ¹⁷ Davwen ena kpokpọ vwẹ iruo rẹ ẹga na. (Iruo 17:16, 17; 20:20, 21) Shirley rọ dia ọkobaro vwẹ United States ru ewene phiyọ ona rẹ aghwoghwo rọyen vwẹ ọke rẹ ọga ri COVID-19 na. Ẹsosuọ, ọ guọnọ vwobọ vwẹ aghwoghwo ra vwẹ ifonu vwo ruẹ-ẹ. Ugege re vwo yono vwẹ uvwre rẹ ọke oniruo rẹ okinriarie vwo kin ukoko rayen nu, ọkieje kọyen o vwo vwobọ vwẹ aghwoghwo ra vwẹ ifonu ruẹ. Ọ da ta: “Oshọ ke mu vwe ẹsosuọ, jẹ, enẹna me nabọ reyọ vwo ruiruo. Ihwo rẹ avwanre ghwoghwo kẹ enẹna bun vrẹ e rẹ avwanre ghwoghwo kẹ jovwo vwẹ aghwoghwo ri nuwevwin kpuwevwin!”

18. Die yen sa chọn avwanre uko vwo hirharoku ebẹnbẹn ọke ra da hẹre iruo rẹ aghwoghwo rẹ avwanre phiyọ?

¹⁸ Vwo obo wọ tẹnrovi wọ je yanmuo. Avwanre de hirharoku ebẹnbẹn, kẹ avwanre nẹrhovwo vwọ kẹ ukẹcha ji roro kpahen oborẹ avwanre se ru kpahọn. (Isẹ 3:21) Sonia rọ ga kerẹ ọkobaro ọkieje vẹ ẹko rọ jẹ ejajẹ ri Romany vwẹ Europe da ta: “Mi si obo ri mi tẹnroviẹ phiyọ ọbe je reyọ vwọ tanmuẹ asan me da sa fobọ mrẹ. Vwẹ enu rẹ imẹjẹ mẹ, mi vwo uhoho ro vwo idjerhe ivẹ ri kpo asan re fẹnẹ ohwohwo. Mi de vwo orhiẹn ri mi che bru, idjerhe ivẹ na kọyen mi nẹ, ki mi roro kpahan ọ rẹ mi che mu orhiẹn mẹ na kpahen.” Sonia davwẹngba vwọ vwẹ ẹro abavo vwo nẹ ebẹnbẹn rọyen. Ọ da ta: “Mẹvwẹ ọvo yen che brorhiẹn sẹ ebẹnbẹn ri mi hirharokuẹ na cha dia kerẹ igbehẹ re mu vi rọ dobọ mẹ jẹ yẹrẹ agbada rọ sa chọn vwẹ uko.”

19. Mavọ yen e se vwo djephia nẹ erọnvwọn iyoyovwin rẹ Jihova vwọ kẹ avwanre da avwanre aro?

¹⁹ Idjerhe buebun yen Jihova vwo brẹba kẹ avwanre. E se dje ọdavwaro phia siẹrẹ e de ru obo re se ru eje vwo jiro. (Hib. 13:15) Ọnana se churobọsi a vwọ davwen ena kpokpọ nẹ vwẹ iruo rẹ aghwoghwo rẹ avwanre, ọtiọyena, Jihova mi rhe bruba kẹ avwanre gbidiki. Gba vwẹ ọkieje vwọ “davwe re wọ mrẹ nẹ Ọrovwohwo yoma.” Ọke yena, kẹ avwanre cha dia kerẹ Jesu rọ tare nẹ, “Emu mẹ vwenẹ hẹ eruo rẹ ọhọre rẹ ọ ro ji vwe rhe.”—Jọn 4:34.