1-2. U ya nga Phisalema 34:8, ri tea u ita mini uri ri ḓivhe uri Yehova ndi wavhuḓi?

KHA ri ri muṅwe muthu u ni fha zwiḽiwa zwine na sa athu vhuya na zwi thetshela na luthihi. Ni nga ḓivha zwiṅwe nga ha zwenezwo zwiḽiwa nga u zwi sedza, nga u zwi nukhedza, nga u ḓivha uri ho ṱanganyiswa mini na mini musi zwi tshi bikiwa, kana nga u vhudzisa vhaṅwe vhane vha zwi takalela. Fhedzi nḓila nthihi fhedzi ya u ḓivha arali ni tshi ḓo takalela u zwi ḽa ndi nga u tou zwi thetshela inwi muṋe.

² Ri guda uri Yehova ndi wavhuḓi nga u vhala Bivhili na khandiso dzashu dza Vhukriste na nga u pfa vhaṅwe vha tshi amba nga ha zwithu zwavhuḓi zwe Yehova a vha itela zwone. Fhedzi ri ḓo pfesesa uri Yehova ndi wavhuḓi musi ri tshi tou ‘thetshela’ nga riṋe vhaṋe uri ndi wavhuḓi. (Vhalani Phisalema 34:8.) Ri nga zwi fanyisa nga heyi nḓila: Kha ri ri ri ṱoḓa u dzhenela tshumelo ya tshifhinga tshoṱhe. Fhedzi uri ri swikelele tshenetsho tshipikwa, ri tea u ḓidzima zwiṅwe zwithu. Khamusi ndi lunzhi ri tshi vhala fhulufhedziso ḽa Yesu ḽa uri arali ra vhea Muvhuso u thoma, Yehova u ḓo ri ṋea zwine ra zwi lila, fhedzi ri sa athu u vhuya ra vhona Yehova a tshi ri itela zwone. (Mat. 6:33) Fhedzi ngauri ri a tenda zwe Yesu a ri fhulufhedzisa, ri a lingedza u sa renga zwithu zwinzhi, u fhungudza tshifhinga tshine ra tshi fhedza kha mushumo wa u ḓitshidza na u ita zwinzhi zwine ra nga kona kha mushumo wa u huwelela. Musi ri tshi ita nga u ralo, ri ḓo zwi vhona uri Yehova u ri ṋea zwine ra zwi lila. Ri vha ri tshi khou ‘thetshela’ nga tshavhukoma uri Yehova ndi wavhuḓi.

3. U tendelana na Phisalema 16:1, 2, ndi vhafhio vhane Yehova a vha itela zwithu zwavhuḓi?

³ Yehova ndi “wavhuḓi kha vhoṱhe,” na kha vhane vha si mu ḓivhe. (Ps. 145:9; Mat. 5:45) Fhedzi vhane a vha itela zwithu zwinzhi  zwavhuḓi ndi vhane vha mu funa na vhane vha ita zwine vha nga kona uri vha mu shumele. (Vhalani Phisalema 16:1, 2.) Zwino kha ri ambe nga ha zwiṅwe zwithu zwavhuḓi zwe Yehova a ri itela zwone.

4. Ndi zwifhio zwithu zwavhuḓi zwine Yehova a fha vhane vha khou thoma u sendela khae?

⁴ Musi ri tshi shumisa zwine ra zwi guda kha Yehova, ri vhona mvelelo dzavhuḓi vhutshiloni hashu. Sa tsumbo, musi ri tshi guda nga hae, ro thoma u mu funa nahone a ri thusa uri ri si tsha humbula na u ita zwithu zwine a si zwi takalele. (Vhakol. 1:21) Musi ri tshi ḓiṋekedza kha Yehova na u lovhedzwa, o ri fha zwiṅwe zwithu zwavhuḓi zwi ngaho luvalo lwavhuḓi na vhushaka havhuḓi nae.—1 Pet. 3:21.

5. Ndi zwithu zwifhio zwavhuḓi zwine Yehova a ri fha zwone vhuḓinḓani?

⁵ Ri dovha ra vhona zwithu zwavhuḓi zwine Yehova a ri itela zwone vhuḓinḓani. Naa ni na ṱhoni? Vhunzhi ha vhathu vha Yehova vha na ṱhoni. Khamusi musi ni sa athu u vha Ṱhanzi ya Yehova no vha ni sa vhuyi na zwi humbula uri ni ḓo vhuya na ya muḓini wa muthu ane ni si mu ḓivhe na amba nae nga ha Bivhili. Fhedzi ṋamusi ni dzulela u zwi ita nahone Yehova o ni thusa na takalela mushumo wa u huwelela. Hu na dziṅwe nḓila dzo vhalaho dze Yehova a ni thusa ngadzo. O ni thusa uri ni dzike musi ni tshi pikiswa tsimuni. O ni humbudza luṅwalo lwo teaho lune na nga lu shumisa musi ni tshi khou amba na ṋemuḓi a re na dzangalelo. O dovha a ni fha nungo dza uri ni bvele phanḓa ni tshi huwelela naho vhathu vha sa ni thetshelesi.—Yer. 20:7-9.

6. Nḓila ine Yehova a ri gudisa ngayo i ri ṋea hani vhuṱanzi ha uri u ri fha zwithu zwavhuḓi?

⁶ Yehova u dovha a ri fha zwithu zwavhuḓi nga u ri gudisa uri ri bvelele vhuḓinḓani. (Yoh. 6:45) Miṱanganoni yashu ya vhukati ha vhege, ri thetshelesa tsumbo dzavhuḓi dza zwine ra nga zwi amba musi ri tshi huwelela tsimuni nahone ri nga zwi shumisa. Ri nga tata u lingedza maambele maswa, fhedzi arali ra a lingedza, ri nga wana a tshi shuma tsimuni yashu. Ri dovha ra ṱuṱuwedzwa miṱanganoni na mabuthanoni uri ri lingedze nḓila dzo fhambanaho dza u huwelela dzine ra sa athu u dzi lingedza. Na zwenezwo zwi nga ita uri ri pfe ri tshi tata u zwi ita, fhedzi Yehova u ḓo ri fhaṱutshedza arali ra zwi lingedza. Zwino ri ḓo amba nga ha zwiṅwe zwithu zwavhuḓi zwine Yehova a ḓo ri fha zwone arali ra mu fhulufhela nahone ra lingedza u shumisa nḓila ntswa uri ri mu fhe zwine ra nga kona hu sa londwi zwiimo zwine ra vha khazwo. Nga murahu ri ḓo amba nga ha uri ri nga swikelela hani zwipikwa zwe ra ḓivhetshela zwone.

7. Ndi phaṱhutshedzo dzifhio dzine ra dzi wana musi ri tshi lingedza u engedza tshumelo yashu?

⁷ Ri sendela tsini-tsini na Yehova. Kha ri ambe nga ha Samuel * ane a vha muhulwane ngei Colombia. Ene na mufumakadzi wawe vho vha vha tshi khou ḓiphiṋa nga u vula nḓila tshivhidzoni tsha havho, fhedzi vha tshi ṱoḓa u engedza tshumelo yavho nga u thusa tshivhidzoni tshi re na ṱhoḓea. Vho ḓidzima zwiṅwe zwithu uri vha swikelele tshenetsho tshipikwa. Samuel u ri: “Ro shumisa Mateo 6:33 ra litsha u renga zwithu zwi si zwa ndeme. Fhedzi zwe zwa ri konḓela vhukuma ndi u pfuluwa nḓuni yashu. Yo vha yo fhaṱwa nga nḓila ye ya vha yo ri tea nahone ri si na tshikolodo khayo.” Musi vhe tshivhidzoni tshiswa, vho vha vha tshi tshila nga tshelede ṱhukhu kha ye vha vha vha tshi tshila ngayo musi vha sa athu u pfuluwa. Samuel u ri: “Ro vhona nḓila ye Yehova a ri livhisa ngayo na u fhindula thabelo dzashu. Ri vhona uri Yehova u a ri takalela nahone u a ri funa u fhira na u thomani.” Naa ni nga kona u engedza  tshumelo yaṋu nga iṅwe nḓila? Arali zwo ralo, ni nga vha na vhungoho ha uri ni ḓo sendela tsini-tsini na Yehova nahone u ḓo ni ṋea zwine na zwi lila.—Ps. 18:25.

8. Ni guda mini kha zwe Ivan na Viktoria vha zwi amba?

⁸ Ri wana dakalo tshumeloni. Kha ri ṱhogomele zwe Ivan na Viktoria, vhavhingani vhane vha vha vhavulanḓila ngei Kyrgyzstan vha zwi amba. Vho ḓidzima zwiṅwe zwithu uri vha kone u thusa kha mushumo muṅwe na muṅwe, u katela na u fhaṱa zwifhaṱo zwa ndangulo. Ivan u ri: “Ro vha ri tshi finya dza khwaṱha kha mushumo muṅwe na muṅwe. Naho ro neta musi ḽi tshi kovhela, ro vha ri tshi takala ngauri ro vha tshi zwi ḓivha uri ro shumela Yehova nga nungo dzashu dzoṱhe. Zwe zwa dovha zwa ri takadza ndi zwa uri ro vha ro wana khonani nnzhi na u tshenzhela zwithu zwinzhi zwi takadzaho.”—Marko 10:29, 30.

9. Muṅwe wahashu ane a vha kha zwiimo zwi konḓaho o ita mini uri a engedze tshumelo yawe nahone ha vha na mvelelo dzifhio?

⁹ Ri wana dakalo tshumeloni ya Yehova naho zwiimo zwashu zwi tshi konḓa. Sa tsumbo, kha ri ambe nga ha Mirreh, muṅwe mukegulu wa tshilikadzi ngei Afurika Vhukovhela we a vha e dokotela. Musi a tshi bva phentsheni, o mbo ḓi thoma u vula nḓila. Mirreh u na vhulwadze ha marambo vhune ha ita uri zwi mu konḓele vhukuma u tshimbila nahone u fhedza awara nthihi fhedzi kha mushumo wa u huwelela nnḓu nga nnḓu. Fhedzi u a kona u fhedza tshifhinga tsho engedzeaho a tshi khou ṱanziela khagala. U na nyendo nnzhi dza u vhuyelela na pfunzo dza Bivhili dzine dziṅwe dzadzo a dzi ita nga founu. Mirreh o ṱuṱuwedzwa nga mini uri a itele Yehova zwo engedzeaho? U ri: “U funa Yehova na Kristo Yesu zwi tou fhufhuma mbiluni yanga. Ndi dzula ndi tshi rabela uri Yehova a nthuse uri ndi ite zwine nda nga kona tshumeloni yawe.”—Mat. 22:36, 37.

10. Samusi zwo sumbedzwa kha 1 Petro 5:10, ndi mini zwine Yehova a fha vhane vha engedza tshumelo yavho khae?

¹⁰ Yehova u ri gudisa nga ho engedzeaho. Zwo itea kha muṅwe a re muvulanḓila ngei Mauritius ane a pfi Kenny. Musi a tshi guda ngoho, o litsha Yunivesithi, a lovhedzwa nahone a dzhenela tshumelo ya tshifhinga tshoṱhe. U ri: “Ndi lingedza u fana na muporofita Yesaya we a ri: ‘Ndi fhano, ruma nṋe!’” (Yes. 6:8) Kenny o no shuma kha mishumo minzhi ya u fhaṱa zwifhaṱo zwa ndangulo na u thusa kha u ṱalutshedzela khandiso dzashu nga luambo lwawe lwa ḓamuni. U ri: “Ndo gudiswa vhutsila he nda vha ndi tshi vhu ṱoḓa uri ndi kone u ita mishumo yanga nga nḓila i bvelelaho.” Fhedzi ho ngo guda nḓila ine a tea u ita mushumo wawe fhedzi. O dovha a ri: “Ndo guda uri hu na zwithu zwine zwa nkonḓela u zwi ita na zwine nda tea u ita uri ndi vhe mushumeli wa Yehova wa khwine.” (Vhalani 1 Petro 5:10.) Khamusi na inwi ni nga dzudzanya zwiimo zwaṋu uri Yehova a ni gudise nga dziṅwe nḓila.

11. Vhahashu vha ngei Korea Tshipembe vho ita mini uri vha kone u ya tsimuni nahone ho vha na mvelelo dzifhio? (Sedzani tshifanyiso tshi re kha gwati.)

¹¹ Na Ṱhanzi dza kale dzi nga vhuyelwa nga u gudiswa musi vha tshi lingedza nḓila ntswa ya u huwelela. Nga tshifhinga tsha dwadze ḽa COVID-19, vhaṅwe vhahulwane vha tshivhidzo tsha ngei Korea Tshipembe vho ṅwala vha ri: “Vhaṅwe vhe zwa vha zwi tshi vha konḓela u ya tsimuni nga nṱhani ha mutakalo wavho u si wavhuḓi, zwino vha vho zwi kona nga u shumisa vidio. Vhaṅwe vhahashu vha vhakegulu vhararu vha re miṅwahani ya vhu 80 vho guda u shumisa khomphyutha nahone vha shuma ngayo tsimu tshifhinga tshoṱhe.” (Ps. 92:14, 15) Naa ni nga takalela u ita zwo engedzeaho tsimuni na u thetshela na vhona uri Yehova ndi wavhuḓi? Kha ri ambe nga ha zwine na nga zwi ita uri ni swikelele tshenetsho tshipikwa.

12. Ndi zwifhio zwine Yehova a fhulufhedzisa vhane vha ḓitika ngae?

¹² Gudani u ḓitika nga Yehova. Yehova u fhulufhedzisa uri u ḓo ri ṋea phaṱhutshedzo nnzhi arali ra ḓitika ngae na u ita zwoṱhe zwine ra nga kona tshumeloni yawe. (Mal. 3:10) Muṅwe wahashu wa tshifumakadzini ane a pfi Fabiola wa ngei Colombia o vhona Yehova a tshi mu fhaṱutshedza nga yeneyo nḓila. O vha a tshi ṱoḓa u vha muvulanḓila wa tshifhinga tshoṱhe musi a tshi bva u lovhedzwa. Fhedzi o vha a tshi tea u shuma uri a kone u ṱhogomela muṱa wawe. Musi o no vha tsini na u bva phentsheni, o rabela Yehova uri a mu thuse. U ri: “Kanzhi tshelede ya phentsheni i a lenga u bva, fhedzi yanga ndo i wana nga murahu ha ṅwedzi fhedzi. Zwo vha zwi tshi tou nga ndi vhuṱolo!” Nga murahu ha miṅwedzi mivhili, o thoma u vula nḓila. Zwino u miṅwahani ya vhu 70 nahone o no fhedza miṅwaha i fhiraho 20 a tshi khou vula nḓila. O no thusa vhathu vha malo uri vha lovhedzwe nga tshifhinga tshe a tshi fhedza a tshi khou vula nḓila. U ri: “Naho nga zwiṅwe zwifhinga ndi tshi pfa ndi si na nungo, Yehova u a nthusa ḓuvha ḽiṅwe na ḽiṅwe uri ndi dzule ndi tshi khou vula nḓila.”

13-14. Ndi tsumbo dzifhio dzine dza nga ri thusa u fhulufhela Yehova na u engedza tshumelo yashu?

¹³ Gudani kha tsumbo dza vhe vha ḓitika nga Yehova. Bivhili i na tsumbo nnzhi dza vhathu vhe vha ḓidina vhukuma vha tshi shumela Yehova. Yehova o vha a tshi anzela u vha fhaṱutshedza musi vho no dzhia vhukando vhu sumbedzaho uri vha a mu fhulufhela. Sa tsumbo,  Yehova o fhaṱutshedza Abrahamu musi o no pfuluwa “naho a sa ḓivhi hune a khou ya hone.” (Vhahev. 11:8) Yakobo o fhaṱutshedzwa musi o no lwa tsimbe na muruṅwa. (Gen. 32:24-30) Musi lushaka lwa Isiraele lu tshi ṱoḓou dzhena kha Shango ḽo Fhulufhedziswaho, Yehova o vha thusa u wela Mulambo wa Yorodane musi vhotshifhe vho thoma vha kanda maḓi a wonoyo mulambo wo ḓalaho.—Yosh. 3:14-16.

¹⁴ Ni nga vhuyelwa na nga tsumbo dza Ṱhanzi dza musalauno vhe vha ḓitika nga Yehova vha engedza tshumelo yavho. Sa tsumbo, wahashu ane a pfi Payton na Diana mufumakadzi wawe, vho vha vha tshi vhala nga ha vhahashu vha tshinnani na vha tshifumakadzini vhe vha engedza tshumelo yavho kha Yehova, u fana na vhe vha ṱaluswa kha mutevhe “Vho Ḓikumedza Nga U Ḓifunela.” * Payton u ri: “Musi ri tshi vhala tshenzhelo dzavho, zwo vha zwi tshi tou nga ro ṱalela muthu a tshi khou ḓiphiṋa nga zwiḽiwa zwi ḓifhaho. Musi ri tshi ḓi vhala enea mafhungo, ro pfa ri tshi ṱoḓa u ‘thetshela ra vhona uri Yehova ndi wavhuḓi.’” Mafheleloni, Payton na Diana vha pfuluwa vha ya vha shuma he ha vha hu na ṱhoḓea. Naa no no vhuya na vhala uyu mutevhe wa Vho Ḓikumedza Nga U Ḓifunela? Zwiṅwe hafhu, naa no no vhuya na ṱalela dzividio Witnessing in Isolated Territory—Australia na Witnessing in Isolated Territory—Ireland dzi re kha jw.org? Enea mafhungo a nga ni thusa uri ni vhone dziṅwe nḓila dzine na nga engedza ngadzo tshumelo yaṋu.

15. Khonani dzavhuḓi dzi nga ri thusa hani?

¹⁵ Khethani khonani dzavhuḓi. Zwi a leluwa u thetshela zwiḽiwa zwine ra sa athu u vhuya ra zwi ḽa arali ri na vhathu vhane vha zwi funa. Nga nḓila i fanaho, arali ri tshi fhedza tshifhinga na vhathu vhane vha vhea Yehova u thoma vhutshiloni havho, na riṋe ri nga ṱoḓa u ita zwo engedzeaho tshumeloni yawe. Zwenezwo zwo itea kha vhavhingani vhane vha pfi Kent na Veronica. Kent u ri: “Khonani dzashu na miṱa yashu vha a ri ṱuṱuwedza uri ri lingedze dziṅwe tshumelo. Ro zwi vhona uri musi ri tshi ḓikonanya na vhathu vhane vha vhea Yehova u thoma, zwi a ri lelutshela uri ri lingedze zwiṅwe zwithu zwiswa.” Zwino Kent na Veronica ndi vhavulanḓila vho khetheaho ngei Serbia.

16. Samusi zwo sumbedzwa kha tshifanyiso tsha Yesu tshi re kha Luka 12:16-21, ndi ngani ri tshi tea u ḓiimisela u ḓidzima zwiṅwe zwithu?

¹⁶ Ḓidzimeni zwiṅwe zwithu ni tshi itela Yehova. A zwi ambi uri ri tea u ṱutshela zwithu zwoṱhe zwine ra zwi takalela ri tshi itela Yehova. (Muh. 5:19, 20) Fhedzi arali ra litsha u ita zwo engedzeaho tshumeloni ya Yehova nga nṱhani ha uri ri khou shavha u ḓidzima zwiṅwe zwithu, ri nga ita vhukhakhi vhu fanaho na ha munna we Yesu a mu amba kha tshifanyiso tshawe, we a shuma nga maanḓa uri a vhe na zwithu zwinzhi, fhedzi e si na ndavha na Mudzimu. (Vhalani Luka 12:16-21.) Muṅwe wahashu ane a pfi Christian ane a dzula Fura u ri: “Ndo vha ndi sa khou ita zwoṱhe zwine nda nga kona tshumeloni ya Yehova nahone ndi sa fhedzi tshifhinga tshinzhi na muṱa wanga.” Ene na mufumakadzi wawe vho mbo ḓi thoma u vula nḓila. Fhedzi vho tea u thoma vha litsha mushumo wavho uri vha kone u vula nḓila. Vho thoma bindu ḽiṱuku ḽa u kunakisa uri vha kone u ḓiṱhogomela nahone vho guda u fushea nga zwiṱukuṱuku zwine vha vha nazwo. Naa vho takala nge vha ṱutshela mushumo wavho uri vha kone u vula nḓila? Christian u ri: “Ri vho takalela tsimu nga ho engedzeaho nahone ri a takala musi vhagudiswa vhashu na nyendo dzashu dza u vhuyelela vha tshi guda nga ha Yehova.”

17. Ndi ngani zwi tshi nga ri konḓela u lingedza nḓila ntswa dza u huwelela?

¹⁷ Ḓiimiseleni u guda nḓila ntswa dza u huwelela.  (Mish. 17:16, 17; 20:20, 21) Shirley a re muvulanḓila ngei Amerika o tea u guda nḓila ntswa dza u huwelela kha dziedzi ḽa COVID-19. O thoma a tshi timatima u huwelela a tshi shumisa founu. Fhedzi musi o no gudiswa nḓila ine a nga zwi ita ngayo nga vhege ya musi hu na mulavhelesi, o thoma u huwelela a tshi shumisa founu. U ri: “U thomani zwo vha zwi tshi ofhisa, fhedzi zwino ndi a zwi takalela nga maanḓa. Zwazwino ri kona u huwelela kha vhathu vhanzhi u fhira musi ri tshi huwelela nnḓu nga nnḓu!”

18. Ndi mini zwine zwa nga ri thusa uri ri kone u sedzana na thaidzo dzine ra nga vha nadzo musi ri khou lingedza u ita zwo engedzeaho tshumeloni yashu?

¹⁸ Ḓivhetsheleni tshipikwa nahone ni lingedze u tshi swikelela. Musi ri tshi ṱangana na thaidzo, ri a rabela kha Yehova uri a ri thuse na u humbula uri ri nga ita mini u tandulula yeneyo thaidzo. (Mir. 3:21) Sonia ane a vha muvulanḓila wa tshifhinga tshoṱhe kha tshigwada tsha luambo lwa Tshiroma ngei Yuropa, u ri: “Ndi ṅwala zwipikwa zwanga kha bammbiri, ḽeneḽo bammbiri nda ḽi vhea fhethu hune nda kona u ḽi vhona. Kha ṱafula yanga ndi na tshinepe tsha bada mbili dzine dza khou ya fhethu hu sa fani. Musi ndi tshi tea u ita phetho, ndi sedza tshenetsho tshinepe nahone nda vhona arali phetho ine nda ḓo i dzhia i tshi ḓo nthusa uri ndi swikelele tshipikwa tshanga kana ndi si tshi swikelele.” Sonia u lingedza u vha na mavhonele o teaho musi a tshi ṱangana na thaidzo. U ri: “Musi ndi tshi ṱangana na thaidzo, zwi bva kha nṋe uri yeneyo thaidzo ndi ḓo i dzhia sa luvhondo lune lwa nthivhela u swikelela zwipikwa zwanga kana sa buroho ine ya nthusa uri ndi kone u zwi swikelela.”

19. Ri tea u ḓiimisela u ita mini?

¹⁹ Yehova u ri fhaṱutshedza nga nḓila nnzhi. Ri nga sumbedza uri ri dzhiela nṱha nḓila ine a ri fhaṱutshedza ngayo nga u ita zwoṱhe zwine ra nga kona uri ri mu rendise. (Vhahev. 13:15) Zwenezwi zwi nga katela u ita zwo engedzeaho tshumeloni yawe nahone Yehova u ḓo ri fhaṱutshedza nga ho engedzeaho. Kha ri dzule ri tshi ṱoḓa nḓila dza u ‘thetshela na u vhona uri Yehova ndi wavhuḓi’ ḓuvha ḽiṅwe na ḽiṅwe. Musi ri tshi ita zwenezwo, ri ḓo fana na Yesu we a ri: “Zwiḽiwa zwanga ndi u ita zwi funwaho nga o nthumaho na u khunyeledza mushumo wawe.”—Yoh. 4:34.