1-2. De acordo col Salmo 34:8, cossa ghemo de far par capir che Geovà l’è bon?

METEMO dir che qualchedun el vol che te magni una roba che no te ghè mai magnà. Te pol imparar qualcossa se te la vardi, se te la snasi, se te impari come farla e se te domandi ai altri cossa che i pensa sora questa roba. Ma par esser sicuro che te piaserà de questo magnar, te toca proarlo.

² L’è vera che podemo imparar che Geovà l’è bon quando ledemo la Bìblia, le publicassion o anca quando scoltemo altri parlar dele benedission che Geovà el ghe ga dato. Ma come che podemo capir pròpio che Geovà l’è bon? Quando laoremo par Geovà e sentimo le so benedission. (Ledi Salmo 34:8. *) Varda un esémpio de come che te pol farlo. Imagina che te vol doperar de pi del to tempo par laorar nela organisassion de Geovà. Par far questo, te ghè de viver con manco robe e manco soldi. Fursi te ghè belche ledesto la promessa de Gesù che, se te meti el Regno in primo posto, Geovà el ndarà darte quel che te ghè de bisogno. Ma fursi mai te ghè sentio questo. (Mat. 6:33) Ma come te te fidi nela promessa de Gesù, te scominsi a laorar manco e a guastar manco, e a laorar de pi nela predicassion. Alora, te pol veder che Geovà el dà pròpio quel che te ghè de bisogno. Cossita, te sì drio ‘proar’ e veder che Geovà l’è bon.

3. De acordo col Salmo 16:1, 2, a chi che Geovà el dà robe bone?

³ Geovà l’è bon con tuti, anca con quei che no i lo cognosse. (Sal. 145:9; Mat. 5:45) Ma Geovà el dà ancora de pi benedission a quei che i fà el meio che i pol a lu. (Ledi Salmo 16:1, 2. *)  Varda arquante robe bone che Geovà el fà par noantri.

4. Che robe bone Geovà el dà a quei che i scomìnsia a esser so amighi?

⁴ Quando metemo in pràtica quel che Geovà el ne insegna, vedemo che la nostra vita la resta meio. Par esémpio, quando ghemo scominsià a studiar la Bìblia e a amar a Geovà, lu el ne ga giutà a cambiar quel che penseino e feino de sbalià. (Col. 1:21) Quando ghemo fato la nostra dedicassion a Geovà e se ghemo batesà, lu el ne ga dato una bona cossiensa e una forte amicìssia con lu. — 1 Pie. 3:21.

5. Come la predicassion la ne giuta a veder che Geovà l’è bon?

⁵ Quando predichemo, sentimo ancora de pi che Geovà l’è bon. Par esémpio, te sì una persona che te ghè vergogna e te ghè pensà che mai te sarissi bona de predicar? Fursi te ghè pensà: “Mai sarò bon de bater nele porte dele persone che no cognosso e manco ancora par parlarghe sora la Bìblia.” Alora, Geovà el te ga giutà a scominsiar a far questo laoro e a seitar a farlo. Geovà el te ga anca giutà a voler far questo laoro. Anca quando te cati una persona che la resta cativa, Geovà el te giuta a seitar tranquilo. Se te cati una persona che la vol imparar de pi, lu el te giuta a ricordarte de un testo dela Bìblia par giutarla. Anca se tante persone no le vol scoltar, Geovà el te dà la forsa par seitar a predicar. — Ger. 20:7-9.

6. De che nantra maniera podemo veder che Geovà l’è bon?

⁶ Geovà anca el mostra che l’è bon con noantri, parché el ne insegna a far ancora meio el laoro de predicassion. (Gioani 6:45) Par esémpio, nele riunion in meso la stimana, ghemo le idee par parlar sora la Bìblia e semo incoraiadi a doperarle. Pol esser che restemo con paura de doperar una idea difarente, ma se la doperemo, vederemo che la ze tanto bona par el nostro teritòrio. Nele riunion e nei congressi semo anca incoraiadi a predicar de diverse maniere. Fursi ghemo de far cambiamenti, ma quando li femo, Geovà el pol benedirne. Adesso, ndaremo veder le benedission che podemo ricever quando se sforsemo par predicar de diverse maniere. Dopo, ndaremo veder come che podemo far de pi nel laoro a Geovà.

7. Che benedission ricevemo quando femo de pi nel laoro a Geovà?

⁷ La nostra amicìssia con Geovà la resta pi forte. Varda el esémpio del ansiano che el ga nome Samuel. * Lu e la so dona i era belche pionieri nela so congregassion e i volea far de pi par Geovà. Alora, i ze ndati giutar nte una congregassion che la gavea bisogno de aiuto, nela Colómbia. Lu el ga dito: “Noantri ghemo fato quel che dise in Mateo 6:33 e se ghemo fermà de comprar robe che no gaveino de bisogno. La roba pi difìcile l’è stà assar el nostro apartamento, parché l’è stà fato dela maniera che voleino, e lo gaveino belche pagà.” Sicuro che no l’è stà fàcile par lori far questi cambiamenti. Ma dopo che i ga cambià par la Colómbia, lori i ga visto che i podea viver con manco soldi. Lu el ga dito: “Semo drio veder come Geovà el giuta e el risponde ale nostre orassion. Anca capimo  che lu l’è tanto contento con noantri e sentimo el so amor come mai gaveino sentio vanti.” Sarà che anca ti te pol far de pi nel laoro a Geovà? Se te pol, sìpia sicuro che questo el ndarà far pi forte la to amicìssia con Geovà e lu el ndarà darte quel che te ghè de bisogno. — Sal. 18:25.

8. Cossa che te ghè imparà col esémpio de Ivan e Viktoria?

⁸ Noantri restemo pi contenti. Ivan e Viktoria, che i ze pionieri nel Quirguistão, i ga scoliesto viver con manco soldi e manco robe. Cossita lori i podaria laorar in quel che la organisassion la gavesse de bisogno, par esémpio, nele costrussion. Ivan el conta: “In tute costrussion che semo ndati, ghemo fato el meio che podeino. Resteino strachi, ma gaveino pace e èrino contenti de doperar le nostre forse nel laoro del Regno. Anca ghemo fato boni amighi e ghemo bei ricordi de quel tempo. Érino tanto contenti.” — Mar. 10:29, 30.

9. (a) Come che la sorela Mirreh la ze stata bona de far de pi nela predicassion? (b) Che benedission la sorela Mirreh la ga ricevesto?

⁹ Noantri podemo restar contenti de predicar anca quando infrontemo brute dificoltà. Varda el esémpio de Mirreh. Ela la ze una védova e la ze de star nte un paese nel oeste dela Àfrica. Ela laorea come dotora e quando la se ga aposentà, la ga scominsià a laorar come pioniera. Par causa de una malatia, la se sente tanto mal e la ze bona de restar sol una ora nel laoro de predicassion de casa in casa. Ma nel laoro col careto de publicassion, la ze bona de laorar pi tempo. Ela la ga tanti studi bìblichi e vìsite, che la fà anca par telèfono. Parché che Mirreh la ga volesto esser pioniera? Ela la dise: “Mi amo tanto a Geovà e a Gesù Cristo. Mi sempre domando a Geovà che el me giute a far el meio nel laoro a lu.” — Mat. 22:36, 37.

10. De acordo con 1 Piero 5:10, cossa che Geovà el fà a quei che i vol servir de pi a lu?

¹⁰ Geovà el insegna a quei che i vol servir de pi a lu. Kenny, che l’è un pioniero che el serve nel paese de Maurício, el ga visto questo. Quando el ga imparà la verità, el ga assà de far la università e el ga scominsià a laorar come pioniero regolar. Lu el ga dito: “Mi proo far compagno al profeta Isaia che el ga dito: ‘Eco, son qua! Màndame!’” (Isa. 6:8) Kenny el ga belche laorà in tante costrussion e el ga anca giutà a tradusir publicassion par la so léngua. Lu el ga dito: “Geovà el me ga insegnà quel che mi gavea de bisogno par far tuti i laori.” Ma Kenny el ga anca imparà a far altre robe. Lu el ga dito: “Mi go capio quel che gavea de far meio e le qualità che mi gavea de bisogno par far ben el me laoro a Geovà.” (Ledi 1 Piero 5:10. *) Vuto che Geovà el te insegne a far altri laori nela organisassion?

11. Che sforso arquante sorele dela Corea del Sud le ga fato par predicar ancora de pi, e cossa che ga sucedesto? (Varda la ilustrassion dela prima pàgina.)

¹¹ Anca i predicadori sperienti i ga de imparar a predicar de altre maniere. Nela pandemia dela COVID-19, i ansiani de una congregassion dela Corea del Sud i ga scrito: “Arquanti fradei no i podea laorar tanto nela predicassion par causa dela so salute. Ma, adesso che se pol predicar par meso dela internet, lori i pol far predicar  tuti i giorni. Tre sorele con de pi de 80 ani le ga imparà a doperar el computador, e ancoi le laora nela predicassion quasi tuti i giorni.” (Sal. 92:14, 15) Te piaseria far de pi nela predicassion e sentir de pi ancora che Geovà l’è bon? Alora, vedi cossa che pol giutarte a farlo.

12. Cossa che Geovà el dà a quei che i se fida in lu?

¹² Impara a fidarte in Geovà. Se noantri se fidemo in Geovà e femo el meio che podemo par servirlo, lu el ndarà benedirne. (Mal. 3:10) La sorela Fabiola, che la ze dela Colómbia la se ga sentio pròpio cossita. Fabiola la volea tanto esser pioniera pena dopo de batesarse. Ela la era maridada e la gavea tre fioi, e ela che gavea de laorar par dar quel che la so fameia la gavea de bisogno. Par quela che quando l’è rivà la ora de aposentarse, la ga domandà tanto el aiuto de Geovà. Ela la ga dito: “Tante volte ghe mete tanto par aposentarse, ma me go aposentà dopo de un mese. No era gnanca bona de creder!” Due mesi dopo, Fabiola la ze deventada una pioniera. Ancoi, la ga de pi de 70 ani e la ze pioniera fà de pi de 20 ani. Fabiola la ga giutà de pi de oto persone a batesarse. Ela la ga dito: “Dele volte, me par che no go pi forsa. Ma, tuti i giorni, Geovà el me giuta a far el me meio a lu.”

13-14. Che esempi pol giutarte a fidarte de pi in Geovà e a far de pi nela predicassion?

¹³ Fà compagno a quei che i se ga fidà in Geovà. Nela Bìblia, ghen’è tanti esempi  de persone che le se ga sforsà par far el so meio a Geovà. Tanti i ga bio de far qualcossa vanti de Geovà benedirli. Par esémpio, Abraon l’è ndato via de casa sensa saver ndove l’era drio ndar, e sol dopo Geovà lo ga benedio. (Ebr. 11:8) Giacò el ga bio una granda benedission, ma sol dopo de lotar con un àngelo. (Gén. 32:24-30) Quando el pòpolo de Israel l’era drio ndar ala Tera Prometesta, lori i gavea de ndar de quel’altra banda del rio Giordon. Lori i ze stati boni de ndar sol dopo che i sasserdoti i ga metesto i pié nela àqua. — Giosuè 3:14-16.

¹⁴ Ancoi tanti fradei i se fida in Geovà e i se sforsa par far el so meio nel laoro de predicassion. Par esémpio, Payton e so dona, Diana, i ghe piasea leder sora i fradei che i fea de pi nela predicassion, come quei dela sèrie “Eles se Ofereceram”. * Payton el ga dito: “Quando ledeino le speriense de lori, l’era come se vardessino qualchedun drio magnar una roba tanto bona. Anca noantri voleino ‘proar e veder che Geovà l’è bon’.” Dopo de un tempo, Payton e Diana i ze ndati giutar nte un posto che gavea de pi bisogno. Cossa pol giutarte a far de pi par Geovà? Fursi te pol leder le speriense de questa sèrie, o te pol anca veder i vìdei Pregação em Territórios Isolados — Austrália e Pregação em Territórios Isolados — Irlanda, che ghen’è nel jw.org.

15. Parché che ghemo de scòlier boni amighi?

¹⁵ Scòlie ben i to amighi. Sarà pi fàcile proar un magnar novo se semo insieme de quei che i ghe piase de questo magnar. Sarà anca pi fàcile noantri far de pi par Geovà quando semo insieme con persone che belche le fà questo. Cossita ga sucedesto con Kent e Veronica. Kent el ga dito: “I nostri amighi e la nostra fameia i ne ga incoraià a far altri laori par Geovà. Esser amighi de quei che i mete el Regno in primo posto ne ga giutà a far una roba difarente nel laoro a Geovà.” Ancoi lori i serve come pionieri spessiai nela Sèrvia.

16. De acordo cola ilustrassion de Gesù in Luca 12:16-21, parché che ghemo de assar de banda quel che ghe vol par far de pi par Geovà?

¹⁶ Assa de banda quel che ghe vol par far de pi par Geovà. Questo no vol dir che ghemo de assar de banda tuto quel che ne piase par contentar a Geovà. (Ecl. 5:19, 20) Ma se ghemo paura de far questo, podemo far el medèsimo sbàlio che el omo dela ilustrassion de Gesù. Quel omo el ga assà Dio de banda parché el se preocupea sol in gaver una vita bona. (Ledi Luca 12:16-21. *) Christian, che l’è un fradel dela Frància, el ga dito: “Mi no dea el meio del me tempo e dela me forsa gnanca par Geovà e gnanca par la me fameia.” Lu e la so dona i ga dessidio cambiar el laoro par esser pionieri. Lori i ga scominsià a netar le case e altri posti e i ga imparà a restar contenti anca che i gavesse manco. Sarà che l’è stà una bona scólia?  Christian el ga dito: “Adesso, ne piase tanto de pi laorar nela predicassion e restemo tanto contenti de veder i studianti e altri drio imparar sora Geovà.”

17. Cossa che pol intrigarne de predicar de altre maniere?

¹⁷ Proa predicar de altre maniere. (Ati 17:16, 17; 20:20, 21) Shirley, che la ze una pioniera dei Stati Unidi, la ga bio de cambiar la maniera che la predichea. Nel scomìnsio dela pandemia dela COVID-19, la gavea paura de predicar par telèfono. Ma, nte una vìsita del superintendente de sircuito, la ze stata giutada a imparar a predicar de questa maniera. Adesso la ze bona de farlo. Shirley la ga dito: “Nel scomìnsio, mi gavea tanta paura. Ma adesso me piase tanto predicar par telèfono. Semo drio parlar con de pi persone de quando predicheino de casa in casa!”

18. Cossa che ghemo de far se qualcossa l’è drio intrigarne de far quel che ghemo dessidio?

¹⁸ Pensa in quel che te ghè de far, e mete in pràtica. Se ghen’è qualcossa che l’è drio intrigarte, domanda el aiuto de Geovà e pensa come che te pol darghene fora cole dificoltà. (Pro. 3:21) La sorela Sonia, che la ze pioniera nte una congregassion de léngua romani nela Europa, la ga dito: “Me piase tanto scriver quel che mi vui far, dopo lo meto nte un posto che posso sempre lederlo. Mi go fato anca un disegno de una strada che la me mena a due posti. Quando mi go de far una dessision, vardo el disegno e penso cossa che ndarà suceder se mi fao questa dessision.” Sonia la se sforsa par pensar che la sarà bona de far quel che la vol, anca se la infronta dificoltà. Ela la ga dito: “Quando sucede qualcossa, quel che mi fao pol deventar come un muro che no me assa ndar avanti, o come un ponte che el me giuta a ndar de quel’altra banda.”

19. Cossa che ghemo de far?

¹⁹ Geovà el ne benedisse tanto, e volemo esser grati a tuto quel che el fà par noantri. Mostremo che semo grati quando femo el meio che podemo par lodar el so nome. (Ebr. 13:15) Par esémpio, podemo sforsarse par far ancora de pi nel so laoro. Alora saremo ancora pi benedidi. Par quela, tuti i giorni, proa e vede come Geovà l’è bon. Cossita, te vè far compagno a Gesù che el ga dito: “El me alimento l’è far la volontà de quel che el me ga mandà e finir la so òpera.” — Gioani 4:34.