1-2. Moovarihani ni Nsalmu 34:9, [34:8 NM] nipakeke eheeni weera noonelele weera Yehova tooreera murima?

MUUPUWELE weera mutthu onnoovahani yootxa muhintalaanyu otxa. Nyuwo pooti oxuttera etthu nwehaka naari moonaka winkhela, okhuxa naari waakoha atthu akina. Mene moota muneeraanyu musuwele nnene wakhala weera yootxa eyo enoosivelani ori olawiha.

² Ekhaikhai weera hiyo pooti woona oreera murima nimusomaka Biblya, ni ibuukhu sahu naari owiiwa atthu akina etthalihaka mareeliho yaakhenlaaya wa Yehova. Mene hiyo, nnoorowa woonelela weera “Yehova tooreera murima,” wakhala weera oonireerela murima. (Mmusome Nsal. 34:9 [34:8 NM.]) Mwa ntakihero, moone moota eyo eneeraaya ekhumelele, muupuwele weera nyuwo muntthuna ovolo muteko wa ehuhu yootheene weera mmwere opaka eyo, ontthuneya weera mukakhela miteko mikina ottuli naari okhweihera ekumi anyu. Pooti weera nyuwo muhinta wiiwa yoolaihera ya Yesu eneera: Wakhala weera nyuwo moohela nipuro noopatxera Omwene awe, Yehova ononivaha itthu sootheene ninhawelaahu. Araaya nyuwo munnante woona sookwanela iyo seereyaka mweekumini mwanyu. (Math. 6:33) Naamwi vareene hiiho, muroromelaka yoolaihera ya Yesu nyuwo munnavukula ikastu sanyu, munnavukula ihoora vunvaraanyu muteko ni munnahela muteko woolaleera nipuro noopatxera. Vaavo muneeraanyu mpakeke eyo, nyuwo munimoona mwaneene anyu weera Yehova onnoovahani itthu munhaawelaanyu ni ‘munimoona’ muneene anyu weera Yehova tooreera murima.

3. Moovarihani ni Nsalmu 16: 1, 2, taani annvahiwa itthu soorera ni Yehova?

³ Yehova “onnaareerela murima atthu oottheene” naari yaale ehimosuwenle. (Nsal. 145:9; Math. 5:45) Mene yaale aninvarela muteko Yehova ni murima annaakhela mareeliho oothanleya. (Mmusome Nsalmu 16:1, 2.) Moone itthu sooreera Yehova onipakenlaawe.

4. Itthu heeni soorera Yehova onivanhaawe niivahererakaru wa yoowo?

 ⁴ Neettela itthu Yehova onnixuttihaawe, ninnoonelela weera ekumi ahu ti yoohakalaliha. Mwa ntakihero nipatxeraka omuxuttera Biblya ni omusivela Yehova, oonikhavihera wiitta ni osepa mikhalelo seera sinimwalamwalihe ni yoowo. (Akol. 1:21) Niivahereraka wa Yehova ni oBatiziwa, owo oonivaha ittthu sintxipale sooreera. yoowuupuxera ya murima yooreera ni onthamwene woolipa ni yoowo.—1 Ped. 3:21.

5. Olaleera onnikhavihera hayi woona weera Yehova tooreera murima?

⁵ Naapatxerihaka olaleera hiyo ninnoona moota Yehova oraawe oorera murima. Neereke nyuwo mutthu oowiisuka, naari nyuwo mutthu oolosowa? Atthu antxipale ahiyo, noonela hiiho nihinaakuve okhala Anamoona a Yehova. Apaale nyuwo munnuupuwela miyo nkinkela owera omana nsele na mutthu kihimusuwenlaaka, vantxipalexa wuuluma sa mBiblyani, nto vaanaano va nyuwo munnawera opaka eyo veeli-veeli. Mukhaviherika ni Yehova nyuwo mooxuttera woosivelani olaleera. Opwaha mwa yeeyo, emaara munlaleeraanyu nyuwo munnoona okhaviheriwa ni Yehova mwa mikhalelo soovirika. Mwa ntakihero, mwanpwanya mutthu oowali Yehova onnookhaviherani okhala oomaleleya. Wakhala weera munnanpwanya mutthu ontthuna oxuttera ekhaikhai, Yehova onnookhaviherani wuupuwelela yoolepa yoopwanenela omoonihera. Naari tho atthu akina amuttetthe anyu ehitthunaka wiiwa ele munthaliha anyu, Yehova onnoovahani ikuru weera mvirelele olaleera.—Yer. 20:7-9.

6. Soowoonihera heeni ikina sinoonihera weera Yehova tooreera murima?

⁶ Moota mukina Yehova onooniheraawe weera tooreera murima, ori onixuttiha weera niwere olaleera. (Yoh. 6:45) Mwa ntakihero mithukumano sa eriyari ya esemana, sinnanixuttiha moota woolaleera nave ninnoopereriwa ovarela muteko miruku iyo, weera naalaleere atthu akina. Woopatxerani pooti weera ninnoova opatxeriha miruku seiyo minyowani ninvahiwaahu nto naavarelaka nnene muteko miruku iyo, ninnoonelela weera sinnakhumela nnene mmutekoni mwahu woolaleera. Opwaha mwa yeeyo, mithukumano sahu ni akongresu annanooperera olaleera moota woohiyana-hiyana araaya eyo, pooti otaphulela othaam ela mapuro makineene. Napaka eyo, ninnanvaha Yehova ekhato weera anreelihe. Vano ninkela woona mareeliho nneeraahu nakhele wakhala weera nnimwaasaasera opaka ele ninweraahu weera ninvarele Yehova nihipwatthaka mapuro ninkhalaahu, naavinyaka ninrowa woona etthu nneeraahu nipake weera nikhanihere sowithanlela sahu.

7. Mareeliho heeni nnaakhelaahu vaavo nnilipiheraahu waatxeerera muteko ahu woolaleera?

⁷ Onthamwene awo ni Yehova onnalipa. Moone ntakihero na mutokweene oniithaniwa samuweli. * Owo ni a mwaariye enanvarela muteko Yehova oColombia. Ootheene yaari mapiyoneiru amuloko mmoha, yaatthuna waatxeerera muteko aya woolaleera awo yaathamela nipuro noothowa anamalaleera. Opaka matxentxo ala, wannatthuneya ohiya itthu sintxipale. Samuweli onnathaliha: “Hiyo naatthara miruku iri va Matheyo 6:33 ni naahemexera othuma itthu nahahawelaahu mene etthu yatempe onixupa waari ohiya empa ahu, mwaha wooweera eyo, yaapakiwe moota hiyo natthunaahu. Yoothanleliwa enyowani anamathelana ale yahoonelela weera yannaakhela ikhaha ithanu namosa vakhaaneene opwaha ele yakhelaaya”. Samuweli onnavirelela othaliha:  “Hiyo nohoona moota Yehova oneetthinhaawe ni waakhula mavekelo ahu. Noopwanya ohakalala ni noohaakhela nsivelo ni nohoona weera Yehova okhalano nsivelo.” Neereke nyuwo munoowera waatxeerera muteko anyu woolaleera? Wakhala weera munoowera, muroromeleke weera munoolipiha onthamwene anyu ni Yehova ni owo onimoovahani itthu munhawelaanyu.—Nsal. 18:26 [18:25 NM]

8. Muxuttenre eheeni ni ntakihero na Ivan ni Viktoria?

⁸ Hiyo naaphanya ohakalala. Ivan ni Viktoria anvara muteko wa opiyoneiru oQuirguistão, awo yahithanlela okhweihera ekumi aya weera ewere otthara yoothanleliwa eri poothe ohela mpuwa muteko wooteka ipa. Ivan onnatthaliha: “Hiyo nannakhavihera mahuku ootheene muteko wooteka ipa mene okhwipi wa nihuku hiyo nannaripiwa murima ni-tho ehuhu emoharu, nannaphwanya murettele ni ohakalala mwaha wooweera naavarela muteko ikuru sahu weera nikhavihere muteko wa Omwene. Opwaha mwa yeeyo, naahaapaka asinthamwene ni nannuupuwela itthu soohakalaliha. Itthu sootheene iyo saaniphwanyiha ohakalala.”—Mar. 10:29, 30.

9. Anamalaleera akina naamwi yaaphwanya maxupo yaweenre hayi waatxeerera muteko aya woolaleera ni yaakhumelenle eheeni?

⁹ Hiyo pooti ophwanya ohakalala mmutekoni mwa Yehova naamwi eniphwanyaka maxupo. Mwantakihero, Mirreh naamukhweli yoowo onkhala elapo emoha ya oeste ya w’Africa aavara muteko ntoko Medika. Mene emaara areformanraawe owo aapatxera ovara muteko ntoko piyoneira. Mirreh ookhalano maxupo a emwenemwene, owo onwera so oviriha ewoora emoha mmutekoni woolaleera empa ni empa. Mene mapuro oowaattiwa atthu, owo onnaviriha ehuhu yintxipale alaleeraka owo ookhalano irevisita sintxipale ni soosomiha sa Biblya sintxipale. Irevisita ikina ompaka muteleefoonini. Eheeni emmukhavihera Mirreh otthuna waatxeerera muteko oninvarelaawe Yehova? Owo onnatthaliha: “Murimaaka onnamusivela Yehova ni Yesu Kristu, miyo emaara yootheene kinnavekela Yehova weera akikhavihere opaka ele kinweraaka mutekoni mwawe.”—Math. 22:36, 37.

10. Moovarihana ni 1 Pedru 5:10, Yehova onaavaha eheeni ale antthuna waatxeerera onvarela muteko?

¹⁰ Ninnaxuttihiwa ni Yehova. Kenny, piyoneiru mmoha onvara oMaurício aahoonelela eyo, owo aaxutterakaru ekhaikhai, aahiya ompaka universidade ni aavolowa muteko wa ehuhu yootheene. Owo oneera: “Miyo kookhalano moonelo mmoha wa mprofeeti Yesaya oneera: ‘Miyo kiri vá kirumekeni!’” (Yes. 6:8) Kenny oovara miteko soovirikana sooteka ipa ni ookhavihera otaphulela ibuukhu sa nuulumo nawe. Owo onnathaliha-tho: “Miyo kaaxuttihiwa weera kikwanihere soothanleliwa saka.” Mene Kenny ooxuttera itthu sintxipale sa moota woovara itthu. Owo onnaatxeerera ariki: “Miyo kooxuttera mikhalelo saka sootteettheya ni iye kintthunaaka weera kaatxeerere weera kinvarele muteko Yehova.” (Mmusome 1 Pedru 5:10.) Neereke nyuwo mwaamwiiveleela weera mwaxuttihiwe ni Yehova?

11. Asirokora a oCoreia do sul yiilipihenre hayi weera elaleye ni eyo yaakhumenle hayi? (Nwehe elataratho ya vakaapani.)

¹¹ Naamwi anamalaleera arinono sookumanano sintxipale yaawo apatxenre ovara khalayi annatthuneya oxuttihiwa mwa soothanleliwa inyowani. Mpuwa mwa ehuhu ela ya corona virus, asitokweene a muloko a oCoreia do sul aalepa: “Asinna akina yoona weera mwaha wa ekumi aya khayaaya owera ovara muteko woolaleera, mene viinano va annawera olaleera evarelaka muteko eviidiyu konferencia, asirokora araru oowuuluvala a iyaakha 80 aaxuttera onvarela muteko compudatore ni olelo va, annawera olaleera nihuku noothenene.” (Nsal. 92:15, 16 [92:14, 15 NM]) Neereke mwannatthuna  waatxeerera muteko anyu woolaleera ni woona weera Yehova tooreera murima? Mene-nto, moone miruku sinttharelana seiyo sinkela wookhaviherani okwanihera yootthuna yonvarela muteko Yehova.

12. Yehova olaihenre eheeni wa ale ammuroromela?

¹² Muxuttere omuroromela Yehova. Wakhala weera nnoomuroromela Yehova ni opaka ele ninweraahu weera ninvarele muteko, Yehova oolaihera onireeliha. (Mal. 3:10) Fabiola murokora yoowo onkhala oColombia ohoona yoolaihera eyo ya Yehova ekwanelaka wa yoowo. Owo aatthuna onvarela Yehova ntoko piyoneira. Abatiziwakaru, mene okhala weera aiyawe ni anamwane khayaavara muteko aavara muteko Fabiola paahi, waari wooxupa owo ohiya muteko. Mene nto epiyakaru ehuhu yoophwanelela, owo anvekela Yehova weera amukhavihere. Fabíola onnathaliha: “Mweekhaikhai ennavira ehuhu weera mutthu aakhuleliwe ohiya muteko mene nto ovirakaru mweeri mmoha, miyo kaahaakhuleliwa”. Mene owo waari mwiiriira. Ivirakaru minyeeri miili, Fabíola aakhala piyoneira. Olelo va Fabíola ookhalano iyaakha 70 ni piyoneira moovira iyaakha 20. Moovira ehuhu ela, owo ohaakhavihera atthu 8 mpakana oBatiziwa. Fabíola onnathaliha: “Naamwi miyo kikhulumuwaka emara ekina, Yehova ookikhavihera omutthara prograamaaka mahuku ootheene.”

13-14. Matakihero heeni eneera yookhaviherani omuroromela Yehova ni waatxeerera muteko anyu woolaleera?

¹³ Mwaatakihe atthu yaale yamuroromenle Yehova. Biblya ookhalano matakihero mantxipale aatthu yiilipihenre onvarela muteko Yehova. Mwaha wooweera atthu awo,  wannatthuneya opatxeriha weera yaakhele mareeliho oothanleya a Yehova. Mwa ntakihero Abrahamu khaasuwela—“Ti woowi akelaawewo”—naamwi vareene hiiwo, yaari ehuhu yeele athammaawe Yehova anamureeliha. (Aheb. 11:8) Yakobe ahaakhela mareeliho oothanleya awanakaru ni nlaika. (Eph. 32:24-30) Nloko na ana a israeli nihalelaka ovolowa elapo yoolaiheriwa, yaareelihinwe ehuhu yeele anamakeya yapatxenraaya olapuwa mooloko Yordani ni ana israeli yaalapuwa.—Yeh. 3:14-16.

¹⁴ Aakhala tho matakihero Anamoona a Yehova amahuku ahu ala yaawo yiilipihenre omwiiwelela Yehova ni opaka ele enweraaya mmutekoni mwa Yehova. Mwa ntakihero munna mmoha oniithaniwa Payton ni amwaariye, Diana wannaasivela osoma sooweereya siyo sinkhavihera muteko woolaleera. Nto seiye sinthaliha sookhumela sineera “awo yaahivaherera” *. Payton onnathali: “Mwaha weera nannasoma sooweerea iye,waakhala ntoko weera kaamoona mutthu atxaaka yootxa yoosiva emaara yeeyo kaavirelelaaka owehexexa, miyo ‘kaatthuna woona oreera murima wa Yehova.’” Moovira ehuhu, Payton ni Diana yaathaamela nipuro noothowa anamalaleera. Neereke nyuwo mwaatoko osoma sooweereya iyo? Naari mootoko woona iviidiyu ineera: Pregação em Territórios Isolados—Austrália ni Pregação em Territórios Isolados—Irlanda, siri va jw.org? sooweereya iwo pooti wookhaviherani waatxeerera muteko muninvarelaanyu Yehova.

15. Heeni oraaya vooreerela waathanla asinthamwene aninvarela muteko Yehova?

¹⁵ Mwaathanleke nnene asinthamwene anyu. Nookhalano eparakha yoolawiha yootxa yoovirikana wakhala weera ninkhala vamoha ni ale enaasivela. Etthu emoharu enimweereya wakhala weera nintthekula ni atthu anhela nipuro noopatxera Omwene wa Muluku, nnookhalano eparakha yookhavihera Omwene awe. Yaari yeeyo yaakhumelenle ni ntheli nimoha nniitthaniwa Kent ni Veronica awo annathaliha: “asinthamwene ni amusi ahu, yaanooperera onvarela muteko Yehova opaka onthamwene ni atthu enhela Omwene nipuro noopatxera waanikhavihera ororomela itthu naaxutteraahu inyowani.” Olelo Kent ni Veronica mapiyoneiru oothanleya oSérvia.

16. Moovarihana ni ntakihero na Yesu nri va Luka 12:16-21, mwaha wa heeni nintthuneyaahu okhala olikaneene weera niivaherere?

¹⁶ Mwiivaherereke wa Yehova. Hiyo nintthuneya opaka ele ninweraahu weera nimuhakalalihe Yehova. (Koh. 5:19, 20) Waakhala weera woova onanikhoottihera onvarela muteko Yehova nneereke olikana ni mulopwana yoole ohimmwale va ntakihero na Yesu. Mulopwana ole isaasera itthu sa mweekumini ni khaamuhela Muluku nipuro noopatxera. (Mmusome Luka 12:16-21.) Christian, munna yoowo onkhala oFrança oneera: “Miyo nkaaviriha ehuhu aka ni ikuru saka kinvarelaka Yehova nakhala kikilaathiki ni amusi aka.” Owo ni amwaariye yaalakela okhala mapiyoneiru, mene weera ewere opaka eyo, awo waannatthuneya ohiya muteko aya. Nto awo yaahiya muteko aya ni yaapatxera ovara muteko wookwesa ni yaahakalala ni itthu vakhaaneene yaaraayano. Neereke etthu yapankaaya yaareera? Christian onnathaliha: “Vano onnansivela olaleera ni ninnakhala oohakalala naawoonaka anamasomaahu ni irevisita sahu sikelaka vahoolo.”

17. Eheeni yaamweerenle Shirley woopatxerani mmutekoni woolaleera?

¹⁷ Mukhale oolikaneene weera mweerere mikhalelo minyowani soolaleera. (Mit. 17:16, 17; 20:20, 21) Shirley ahaasaasera moota eraawe alaleereke ehuhu ela ya corona virus, woopatxerani owo annoova olaleera ni teleefoone, mene  ehuhu mutokweene axekuraawe muluko, Shirley aaxuttihiwa olaleera moota-moota. Okhuma nihiku nne, owo onnalaleera moohihiyerera anvarelaka muteko teleefoone. Shirley othaliha oneera: “Woopatxerani wannakoopiha olaleera ni teleefoone mene vaanano va, onnakisivela olaleera ni teleefoone kinnawera waaphwanya atthu antxipale oopwaha vavale kaalaleeraka empa ni empa!”

18. Wakhala weera nompaka palano oowaatxeerera muteko nnanvarelaahu Yehova ni enaniphwanya maxupo eheeni enkela onikhavihera?

¹⁸ Munpakeke palano ni munvareleke muteko. Waakhala weera anoophwanyani maxupo munvekeleke Yehova. Voottharelana muupuweleke ompaka palano ni omweettela ni muupuweleke moovarihana ni palano owo. (Mir. 3:21) Sonia, yoowo ori piyoneira ovara muteko egrupu ya nnuulumo na romani w’Eurupa oneera: “Miyo okisivela olepa ipalano saka va papheloni, avinyaka miyo kinnahiya epaphelelo eyo mapuro oowooneya. Vaarumaaruyuni vaka, miyo koohela edesenyu naari mapuro kinviraaka veeli-veeli. Emaara miyo kintthunaaka opaka yoothanla, miyo kinnaweha edesenyu eyo ni kinuupuwela “ephiro heeni ekikelihaayawo yoothanlaaka ela?” Sonia onnatthuna okhalano mukhalelo wooreera vaavo onkumanaaweno ni maxupo. Owo onnathaliha: “Vavo kinoonaka weera maxupo aka anlikana ni exiri ekiwalenle mphironi naari eponti yeeyo ekilapuwiha mooloko—soothesene sinlipa ni mukhalelo aka.”

19. Nthanleke opaka eheeni?

¹⁹ Yehova onnanreeliha mwa mukhalelo woovirikana. Hiyo Nnoowera weera asantte wa Yehova mwaha wa mareeliho onnivahaawe. Moota heeni? Nipakaka ele ninweraahu weera nivuwihe nsina nawe. (Aheb. 13:15) Pooti weera nyuwo munnaasaasera mikhalelo minyowani sa moota woowaatxeerera muteko muninvarelaanyu Yehova. Mwapaka etthu eyo, nyuwo munoovirelela waakhela mareeliho a Yehova. Mwa yeeyo, mahuku ootheene muthanleke ‘woona weera Yehova tooreera murima’. Nyuwo munoowera ohima ntoko Yesu ni masu aneera: “Yotx’aka, ti ela, wera kipake otthuna wa yowo okirumme ni kimalihere muteko awe.”—Yoh. 4:34.