1-2. Moovarihana ni Esalimo 34:9, nihaana opaka exeeni wira niwehe oreera murima wa Yehova mookumini mwahu?

NKAHAYA muupuwele nvahiwe ene yoolya muhaatonko anyu olya. Nyuwo pooti wiixutta etthu voohimya sa yoolya eyo nwehaka, woona wunkhela waya, moota elokiheriwe aya ni mwaakohaka atthu akina atonko olya akhala wira ennaasivela wala nnaari. Masi enamuna emosa enrowa wookhaliheryani osuwela akhala wira ennoosivelani wala nnaari ori olawiha yoolya eyo.

² Nnoowerya wiixutta etthu voohimya sa oreera murima wa Yehova nimusomaka Biibiliya, osoma iliivuru sahu sinimutthokiherya Biibiliya ni ovaanela ni atthu ale yaareelihiwe ni Yehova. Masi wira nisuwele oratteene oreera murima wa Yehova nihaana “wererya” mmensihu oreera wawe murima. (Musome Esalimo 34:9) Nrowe niwehe ntakiheryo nimosa ninnikhaliherya opaka eyo. Nkahaya muupuwele wira muniphavela wuncererya muteko muninvarela anyu Yehova, masi wira mphwanye yoolukama anyu eyo muhaana okhweiherya okumi anyu. Woonasa wene, mootoko osoma yooleiherya ya Yesu yoowi akhala wira munoohela opuro woopacerya Omwene, Yehova onimoovahani itthu muniphavela anyu. Masi pooti wira yooleiherya eyo khetonko wiiraneya mookumini mwanyu. (Math. 6:33) Nto mukupaliki yooleiherya eyo ya Yesu munnivukula itthu munithuma anyu wala musurukhu munirumeela anyu ni munnipaka marukunuxo a muteko anyu wa mulaponi wira nviriheke okathi munceene mulaleeryaka. Okathi munipaka anyu eyo, nyuwo munniweha mookumini mwanyu wira Yehova onninivaha itthu sinnithowa. Moohaanyiherya, okathi owo ‘ninnererya’ mookumini mwahu oreera murima wa Yehova.

3. Moovarihana ni Esalimo 16:1, 2, tani Yehova onaareerela awe murima?

³ Yehova ‘onnarerela murima’ atthu otheene, waahela muhina ale ahinimukokhorela. (Esal. 145:9; Math. 5:45) Masi Yehova onnitepa waareerela murima ni waavaha itthu sooloka ale animphenta ni aniimananiha omurumeela. (Musome Esalimo 16: 1, 2.) Vano nrowe niwehe itthu vakhaani Yehova onnivaha awe sinooniherya wira onninireerela murima.

4. Yehova oniwooniherya sai oreera wawe murima ale animwaattamela?

⁴ Vaavo nneettela ahu ele Yehova onniixuttiha awe, ninniphwanya mireerelo sinceene mookumini mwahu. Mwa ntakiheryo, vaavo naatepa ahu omusuwela ni omphenta, owo aahinikhaliherya ohiya muupuwelo ni soolema soohiloka seiyo saanirakameliha ni Yehova. (aKol. 1:21) Nave vaavo naivaherenrye ahu wa Yehova ni opatisiwa, naanitepa woona oreera wawe murima vaavo aanivaha awe murima wooloka ni onikhaliherya okhalana waataana wooloka ni yena.—1 Ped. 3:21.

5. Ninrowa owerya sai oweha oreera murima wa Yehova vaavo ninlaleerya ahu?

⁵ Vaavo ninlaleerya ahu, ninnitepa oweha oreera murima wa Yehova. Niireke nyuwo mwa mutthu oowuuliwa muru? Akhala wira ti siiso, muhixanke. Arumeyi anceene a Yehova toowuuliwa muru. Woonasa wene, muhinatthi okhala Namoona a Yehova muupuwela wira khimwaarowa owerya orowa etthoko ya mutthu muhinimusuwela anyu wira mmulaleerye. Masi olelo-va, nyuwo munniwerya opaka eyo. Ohiya-vo, mukhaliheriwaka ni Yehova nyuwo munnisiveliwa vanceene olaleerya. Nave munniweha wira Yehova onnookhaliheryani mwa inamuna sinceene. Pooti wira Yehova aahookhaliheryani okhala oomaaleleya vaavo mwaavaanyihiwa anyu ni ale annilupattha. Ohiya-vo, pooti wira Yehova ootoko wookhaliheryani wuupuwela yoolepa ya mBiibiliyani wira mmooniherye mwaneene etthoko. Yehova onnovahani ikuru wira muhihiye olaleerya hata atthu akina a muttetthe anyu ahiphavelaka woowiriyanani.—Yer. 20:7-9.

6. Enamuna Yehova onniixuttiha awe enooniherya sai oreera wawe murima?

⁶ Yehova onninooniherya oreera wawe murima vaavo onniixuttiha awe moota woolaleerya. (Yoh. 6:45) Mithukumano sahu sa eriyari ya esumana, ninniweha ni owiriyana sowooniherya sa ele nikhanle ahu oohimya okathi ninlaleerya ahu. Nto nihaana orumeela itthu iyo nniixutta ahu vaavo ninlaleerya ahu. Wanipacerya hiyo pooti oxanka vaavo nnuupuwela ahu orumeela enamuna esya ya opaceriha ovaanela. Masi vaavo nimpaka ahu eyo, ninnoona wira orumeela enamuna esya wala enamuna ekina ya opaceriha ovaanela ninnaakhaliherya vanceene atthu a muttetthe ahu. Nave okathi wa mithukumano ni akonkresu, ninniixutta orumeela inamuna sikina sa opaceriha olaleerya nihaatonko ahu orumeela. Ekeekhai wira wanipacerya hiyo pooti oxanka vanceene, masi musuweleke wira vaavo nneererya ahu opaka itthu iyo Yehova onninireeliha vanceene. Vano nrowe niwehe moota Yehova onnireeliha awe vaavo nimmuroromela ahu ni nniimananiha ahu ovara muteko awe moohicikha makhalelo ahu. Nuumala-vo, ninrowa oweha inamuna nikhanle ahu oowuncererya muteko ahu woolaleerya.

7. Mareeliho xeeni nimphwanya ahu vaavo nnincererya ahu muteko ahu woolaleerya?

⁷ Ninnitepa omwaattamela Yehova. Nwenhe ntakiheryo na mutokweene oniihaniwa Samuel, * yoowo onirumeela oColômbia. Owo ni mwaarawe yaanihakalala vanceene orumeela ntoko mapioneero muloko aya. Masi awo yaaniphavela wuncererya muteko aya woolaleerya akhaliheryaka muloko woothowa anamalaleerya. Masi wira aphwanye yoolukama aya yaahaana oleva itthu sikina saasivela vanceene. Samuel onihimya so: “Naahitthara malakiheryo ari Matheyo 6:33, nto naahihiya othuma itthu sahaareerela. Etthu yaanixankihe waari ohiya empa ahu. Empa ele naatenke ntoko naaphavela ahu ni khinaakomphe musurukhu wira niteke”. Nuumala othaamela muloko mukina yaahoona wira  yaarumeela musurukhu vakhaani ovikana ole yaarumeela aya okathi yaakhala aya empa aya. Samuel oni: “Naahoona wira Yehova onneettiha mavalo ahu ni onnaakhula mavekelo ahu. Nave naahoona wira Yehova onnihakalala ni yoothanla ahu ni onniniphenta vanceene ovikana khalai”. Niireke munoowerya wuncererya muteko anyu woolaleerya? Akhala wira munoopaka eyo, mukupaliki ni murima wotheene wira enimookhaliheryani omwaattamela Yehova ni onimookhapelelakani.—Esal. 18:26.

8. Ntakiheryo na Ivan ni Viktoria, niwiixuttinheni exeeni?

⁸ Ninnihakalala ni muteko ninvara ahu. Nwehe ele ahimmye aya anamathelana Ivan ni Viktoria, yaawo anirumeela ntoko mapioneero oQuirguistão. Awo yaahikhweiherya okumi aya wira avareke khula yoothanleliwa yaarowa aya ovahiwa ohela muhina oteka ipa sinirumeeliwa ni mutthenkeso ahu. Ivan onihimya so: “Naaniimananiha ovara oratteene muteko ahu khula empa naateka ahu. Hata wanikisa wa nihiku naakhulumuwa vanceene, naanihakalala vanceene mwaha woowi naanisuwela wira naanirumeela ikuru sahu wira nivare muteko wa Yehova. Nave naanihakalala vanceene mwaha wowaapaka apatthani asya ni okhalana sookumanana soohakalaliha”.—Mar. 10:29, 30.

9. Hata aarina mixankiho, etthu xeeni murokora mmosa aapanke awe wira incererye muteko awe woolaleerya ni mireerelo xeeni aaphwannye awe?

⁹ Hiyo ninnihakalala vanceene vaavo ninvara ahu muteko wa Yehova hata nirina ene mixankiho. Mwa ntakiheryo, murokora oowuuluvala ni naamukhweli oniihaniwa Mirreh, yoowo onikhala wÁfrica Ocidental, nuumala oreforomari muteko awe wa omeetika, aahipacerya orumeela ntoko pioneera. Owo aahikhalana oretta woowereya oniihaniwa artrite, nto aaviriha ewoora emosa paahi olaleeryaka empa ni empa. Masi owo aaniwerya oviriha okathi munceene olaleeryaka mapuro oowaatta atthu. Nto aahikhalana irevisita ni soosoma sa Biibiliya sinceene. Atthu anceene aaphwannye okathi aalaleerya awe omurumeelaka telefoni. Etthu xeeni yaamwiirinhe Mirreh wuncererya muteko anvarela awe Yehova? Owo onihimya so: “Miyo kinnimphenta vanceene Yehova ni Yesu Kristu. Nave okathi wotheene kinninvekala Yehova wira okikhaliherye ovara muteko awe mpakha vaniwerya aka”.—Math. 22:36, 37.

10. Ntoko onooniherya awe 1 Pedru 5:10, mareeliho xeeni Yehova onaavaha awe ale aniimananiha ovara muteko awe?

¹⁰ Ninniixuttihiwa ni Yehova mwa inamuna sikina. Pioneero oniihaniwa Kenny, yoowo onirumeela Ilhas Maurícia, ohoona wira eyo ekeekhai. Nuumala wiixutta ekeekhai aahihiya osoma wuniversidade, aahipatisiwa ni aahikela muteko wa Muluku wa okathi wotheene. Owo onihimya so: “Kinniimananiha omutakiha profeta Yesaya yoowo aahimmye so: ‘Miyo kiri va: kirumekeni’”. (Yes. 6:8) Kenny aahikhaliherya oteka ipa sinceene sinirumeeliwa ni mutthenkeso ahu ni aahikhaliherya otaphulela iliivuru sahu sinimutthokiherya Biibiliya para nttaava nawe. Kenny onihimya so: “Kaahiixuttihiwa moota kaakhanle aka oovara oratteene khula muteko kaavahiwa aka”. Owo aahiixuttihiwa itthu sikina ohiya paahi moota woovara muteko awe. Kenny onincererya oriki: “Kaahiixutta itthu kaakhanle aka oopaka ni ohipaka ni mikhalelo kaareerela aka okhalana wira kikhale murumeyi ooloka a Yehova”. (Mmusome 1 Pedru 5:10.) Niireke munoowerya opaka marukunuxo mookumini mwanyu wira Yehova owiixuttiheni mwa inamuna soovirikana?

11. Etthu xeeni arokora a oCoréia do Sul yaapanke aya wira akhaliheryeke muteko woolaleerya ni exeeni yaakhumelenle? (Nwehe efootu ya ekaapa.)

¹¹ Hata Anamoona arina sookumanana sinceene annittottela mureerelo wiixuttihiwa vaavo aneererya aya enamuna esya ya ovara muteko wa Yehova. Okathi wa oretta wa olumwenku wotheene wa COVID-19, axitokweene a muloko wa oCoréia do Sul yaalempe so: “Ale yuupuwela wira khiyaarowa owerya olaleerya mwaha  woowereyasiwa, annilaleerya arumeelaka videoconferência. Arokora araru yaawo arina iyaakha sinivikana 80 aahiixutta omurumeela komputatore wira akhaliheryeke muteko woolaleerya khula nihiku”. (Esal. 92:15, 16) Niireke munniphavela wuncererya muteko anyu woolaleerya wira nwehe oreera murima wa Yehova? Nrowe niwehe itthu vakhaani munireerela anyu opaka sinrowa wookhaliheryani ophwanya yoolukama anyu.

12. Yehova oleihenrye owiiriha exeeni ale animuroromela?

¹² Mmuroromeleke Yehova. Yehova oonileiherya onireeliha vanceene akhala wira nnoomuroromela ni wiimananiha ovara muteko awe. (Mal. 3:10) Murokora oniihaniwa Fabiola yoowo onikhala oColômbia ohoona wira Yehova oomaliherya yooleiherya awe mookumini mwawe. Nuumala opatisiwa, moohipisa aaphavela orumeela ntoko pioneera ookilaatheya. Masi iyawe ni anaawe araru yaalipa ni muteko aavara awe wira aphwanyeke yoolya. Nto ohalaka okathi vakhaani wira oreformari, owo aahinvekela Yehova wira omukhaliherye. Fabiola onihimya so: “Okhala wene, mutthu onnipisa weemereriwa vaavo onivekela awe oreformari. Nuumala olepa wira kaaphavela oreformari, kaaheemereriwa nuumala ovira mweeri mmosa paahi. Nto kinoona wira owo waari mwiiriirya!” Nuuvira miyeeri miili, aahilepa eformulaariyu wira okhale pioneera. Vano, murokora Fabiola orina iyaakha sinivikana 70 ni ooviriha iyaakha 20 orumeelaka ntoko pioneera. Nto okathi owo wotheene, ohaakhaliherya atthu 8 wiivahererya wa Yehova mpakha opatisiwa. Vano onihimya so: “Nnaamwi ikwaha sikina kikhulumuwaka, Yehova onnikikhaliherya khula nihiku ohihiya okhala pioneera”.

13-14. Matakiheryo xeeni akhanle oonikhaliherya omuroromela Yehova ni ophwanya yoolukama ahu?

 ¹³ Mwiixutteke ni matakiheryo a atthu yaamuroromenle Yehova. MBiibiliyani aakhala matakiheryo manceene a atthu yiimananinhe vanceene ovara muteko wa Yehova. Nave aakhala matakiheryo manceene anooniherya wira Yehova aahaareeliha nuumala awo opaka etthu yooniheryaka wira annimuroromela Yehova. Mwa ntakiheryo, Abrahamu aareelihiwe ni Yehova nuumala okhuma elapo awe “hata ahaasuwela opuro aarowa awe”. (aHeeb. 11:8) Nave Yakobe aareelihiwe mwa enamuna ya vameekhaaya nuumala owana ni nlaikha. (Maph. 32:24-30) Nave vaavo nloko na aIsarayeli naahala aya vakhaani okela elapo yooleiheriwa, awo yaahiwerya olapuwa muro Yordani nuumala akhulupale a anamukuttho onyakela mmaasini.—Yox. 3:14-16.

¹⁴ Nave nyuwo pooti wiixutta etthu ni Anamoona a Yehova a mahiku ala yaawo yaamuroromenle Yehova ni yaaphwannye yoolukama aya. Mwa ntakiheryo, munna oniihaniwa Payton ni amwaarawe aniihaniwa Diana annihakalala vanceene osoma matakiheryo manceene a anna ni arokora yaawo avirinhe okathi munceene avaraka muteko wa Yehova ntoko matakiheryo anilavula mpantta oni: “Awosa Yaahiivahererya ni Murima Aya Wotheene”. * Payton onihimya so: “Vaavo ninsoma ahu sowiiraneya iyo, vanikhala ntoko nninweha mutthu olyaaka yoolya yoosiva. Vaavo ninvikaniha ahu onweha, ninniphavela omweehererya Yehova wira ‘none orera [wawe] murima’”. Nuuvira okathi, Payton ni Diana yaahithaamela mapuro oothowa anamalaleerya. Niireke mootoko osoma myaha sa mpantta owo? Nave nyuwo pooti oweha eviidiyu eni: “Pregação em territórios isolados—Austrália ni eviidiyu eni: “Pregação em territórios isolados—Irlanda, seiyo siri esaiti ahu jw.org. Iviidiyu iyo, sinimookhaliheryani oweha inamuna sa moota mukhanle anyu oowuncererya muteko anyu woolaleerya.

15. Apatthani ooloka anrowa onikhaliherya sai?

¹⁵ Mwaathanleke apatthani ooloka. Vannikhweya olya yoolya nahaatonko ahu olya, akhala wira ninlya ni atthu yaatonko olya. Mwa enamuna emosaru, akhala wira ninviriha okathi munceene niri ene ni atthu ale anihela nipuro noopacerya miteko sa Yehova, woonasa wene nnooweha inamuna nikhanle ahu oowuncererya muteko nninvarela ahu Muluku. Anamathelana Kent ni Veronica ahoona wira eyo ekeekhai. Kent onihimya so: “Apatthani ahu ni amusi ahu yaaninitumererya oweha inamuna isya naakhanle ahu oowuncererya muteko nninvarela ahu Yehova. Hiyo naahoona wira okhala apatthani a atthu ale anihela nipuro noopacerya Omwene wa Muluku waamunikhaliherya oweha inamuna naakhanle ahu oowuncererya muteko ahu”. Olelo-va, Kent ni Veronica anirumeela ntoko mapioneero a vameekhaaya oSérvia.

16. Ntoko nnooniherya aya nlikanyiho na Yesu niri Luka 12:16-21, xeeni vari aya vooloka oleva itthu sikina?

¹⁶ Muleveke itthu sikina wira nvare muteko wa Yehova. Khivanitthuneya oleva itthu sotheene sinnisivela wira nimuhakalaliheke Yehova. (Mus. 5:19, 20) Masi akhala wira khaninwerya wuncererya muteko nninvarela ahu Muluku mwaha woowi khanimphavela oleva itthu sikina sinnisivela, hiyo pooti opaka etthu yoohiloka aapanke awe mulopwana a nlikanyiho na Yesu yoowo iimananinhe vanceene othukumanya mireerelo sawe masi ahamphavela Muluku. (Mmusome Luka 12:16-21.) Munna oniihaniwa Christian, yoowo onikhala oFrança onihimya so: “Miyo nkaarumeela okathi aka ni ikuru saka wira kivare muteko wa Yehova ni okhaliherya emusi aka”. Nto owo ni mwaarawe yaahilakela okhala mapioneero. Masi wira aphwanye yoolakela aya yaahaana ohiya muteko yaavara aya. Nto wira aphwanyeke yoolya yaahipacerya orattela ipa. Awo yaahiixutta ohakalala arina ene itthu vakhaani paahi. Niireke yaahiphwanya mireerelo  mwaha wooleva itthu sikina? Aayo. Christian onihimya so: “Vano onninsivela vanceene olaleerya ni ninnihakalala waaweha atthu ale nnaapakela ahu irevisita ni atthu nnaasomiha ahu Biibiliya yiixuttaka voohimya sa Yehova”.

17. Xeeni okathi mukina vanivila aya weemererya enamuna esya ya olaleerya?

¹⁷ Mwiimananiheke weererya inamuna isya sa ovara muteko wa Muluku. (Mit. 17:16, 17; 20:20, 21) Pioneera a wEstados Unidos oniihaniwa Shirley, aahipaka marukunuxo a muteko awe woolaleerya okathi wa oretta wa olumwenku wotheene wa COVID-19 wala koronaviru. Wanipacerya aanoova olaleerya omurumeelaka telefoni. Nuumala wiixuttihiwa ni mutokweene a esirkwiitu okathi aaxukurya awe muloko awe, owo aahipacerya olaleerya khula nihiku omurumeelaka telefoni. Shirley onihimya so: “Wanipacerya miyo kaanoova, masi vano onnikisivela vanceene. Hiyo ninnaaphwanya atthu anceene ovikana okathi naalaleerya ahu empa ni empa!”

18. Etthu xeeni enrowa onikhaliherya akhala wira ennikhala etthu ennikhoottiherya wuncererya muteko ahu woolaleerya?

¹⁸ Mukhalaneke yoolukama ni mmananiheke ophwanya. Akhala wira ninnikumana mixankiho, nihaana onvekela nikhaliheryo Yehova ni wuupuwela etthu nikhanle ahu oopaka wira nixintte muxankiho ahu. (Mir. 3:21) Sonia pioneera ookilaatheya onirumeela ekrupu ninlavuliwa nttaava Romani wEuropa onihimya so: “Okisivela olepa soolukama saka vapapheloni ni opweha epaphelo eyo nipuro kinaakuvaka woona. Nave meesa aka kotesenyari iphiro piili seiyo sinrowa mapuro oovirikana. Vaavo kinipaka aka soothanla, kinniweha iphiro iyo kinuupuwela ephiro enrowa okikhaliherya ophwanya yoolukama aka”. Sonia onnikhalana moonelo wooloka voohimya sa mixankiho onikumanana awe. Owo onihimya so: “Miyo kinniimananiha oweha muxankiho ntoko epareti enkikhootthiherya ophwanya yoolukama aka wala ntoko epontti enkikhaliherya ophwanya yoolukama aka”.

19. Otheene ahu nihaana opaka exeeni?

¹⁹ Yehova onninireeliha mwa inamuna soovirikana. Nto nihaana wooniherya wira ninnixukhurela mareeliho awo nipakaka sotheene ninwerya ahu wira ninvuwihe. (aHeeb. 13:15) Eyo enihela muhina oweha inamuna soovirikana sa omurumeela Yehova. Nuumala-vo, Yehova onoonireeliha vanceene. Nto khula nihiku niweheke inamuna nikhanle ahu oomweererya Yehova wira “none orera [wawe] murima”. Niira siiso, ninrowa okhalaka ntoko Yesu yoowo aahimmye wira: “Yoolya aka opaka ele eniphavela awe ole okirumme, ni omaliherya muteko awe”.—Yoh. 4:34.