1-2. As e dey for Psalm 34:8, how we fit learn say Jehovah dey good?

THINK-AM say person give you food wey you never chop before. You fit know more about the food when you look-am, smell-am, try know the things wey they use cook-am, or ask people about the food. But the only way wey you fit really know whether you like the food na to taste-am by yourself.

² We fit learn say Jehovah dey good when we de read Bible and our book them, and we hear people de talk about the good things wey Jehovah don do for them. But we go really understand how Jehovah dey good reach when we “taste” by ourself and see say e dey good. (Read Psalm 34:8.) See example of one way wey we fit do that one. Maybe we get-am for mind to serve Jehovah full-time, but for us to succeed for our plan, we go need to make our life simple. We fit don de always read the promise wey Jesus make say, if we put the Kingdom first for our life, Jehovah go provide the things wey we really need. But e fit be say we never see the promise happen for our life before. (Matt. 6:33) But because we get faith for the promise wey Jesus make, we try reduce the way we de spend money, reduce the amount of time wey we de use find money, and put our mind for the preaching work. As we de do this one, we go see from our own example say, Jehovah de really give us wetin we need. We “taste” by ourself and see say Jehovah dey good.

3. With wetin Psalm 16:1, 2 talk, who Jehovah de do good for?

³ Jehovah dey “good to everybody,” even to people wey no know-am. (Ps. 145:9; Matt. 5:45) But for people wey love and de serve Jehovah with all their heart, Jehovah de  do plenty special things for them. (Read Psalm 16:1, 2.) Make we talk about the plenty things wey Jehovah don do for us.

4. When people start to near Jehovah, how Jehovah de show say e dey good to them?

⁴ Any time wey we do wetin we learn from Jehovah, we de see better result for our life. As we learn about Jehovah and start to love-am, e help us stop to think and do things for way wey e no like. (Col. 1:21) And when we give our life to Jehovah and baptize, e even give us more good things. For example, e give us good conscience and e make us e tight friend.—1 Pet. 3:21.

5. How we de see for our preaching work say Jehovah dey good?

⁵ We go continue to see say Jehovah good as we de preach. You de shame? Plenty servants of Jehovah de shame. Maybe before you start to serve Jehovah, you fit never think-am say you go go stranger house and tell the person about Bible. But today, you de do that one everytime. And Jehovah don even help you make you de enjoy the preaching work! Jehovah don still help you for other ways. E don help you dey calm when person give you trouble for preaching. E don still help you to remember the correct Bible verse to use when person want listen to your message. And e don give you the power to continue the preaching work even when people no want listen to you.—Jer. 20:7-9.

6. How the training wey God de give us show say God dey good?

⁶ Jehovah don still show us say e dey good as e de train us for the preaching work. (John 6:45) For our Life and Preaching meeting, we de listen to better examples of how to preach. And we fit use wetin we learn from this examples for our preaching work. We fit de fear to try new thing for the first time. But when we try-am, we fit see say the new idea work well for our territory. They still de encourage us for our meeting and convention to try different ways to preach wey we fit never try before. This one fit still make us fear small. But when we do-am, we de allow Jehovah bless us. Make we talk about some of the good things wey Jehovah de give us when we show trust and try new ways to give Jehovah our best, no matter our condition. Then, we go talk about how we fit do more for the preaching work.

7. Which blessing we go get when we try to do more for the preaching work?

⁷ We go de near Jehovah more. Make we see the example of one elder wey e name na Samuel. * E dey Colombia with e wife. This husband and wife de pioneer for their congregation, and they enjoy-am. But they want go support one congregation wey need help, so that they go fit do more for the preaching work. They need to leave some things wey they like so that their plan go fit succeed. Samuel talk say: “We follow wetin Matthew 6:33 talk, and we stop to buy things wey we no need. But the one wey hard us pass na to pack comot from our house. They build the house just the way we want-am, and we no de owe any money wey we need to pay for the house.” This husband and wife see say for their new assignment, the money wey them de spend to survive no reach money wey them de  spend before, at all. Samuel talk say: “We don see how Jehovah de direct us and de answer our prayer. We feel say Jehovah dey happy with us and we feel e love for different-different way wey we never see before.” E get how you fit do more for your preaching work? If you fit, you go see say you go near Jehovah more and e go care for you.—Ps. 18:25.

8. Wetin you learn from the thing wey Ivan and Viktoria talk?

⁸ We go get joy for our work. Make we see wetin one husband and wife talk. Their name na Ivan and Viktoria, and them de pioneer for Kyrgyzstan. They live simple life so that they go fit dey ready to do any assignment, plus construction work. Ivan talk say: “We really do our best for each assignment. Even though say we de tire after work everyday, we de glad because we know say we de use our power work hard for Jehovah. And we really get joy because we make plenty new friends and we enjoy plenty better things.”—Mark 10:29, 30.

9. Wetin one sister wey e condition no easy don do to do more for the preaching work, and wetin be the result?

⁹ We de get joy as we de work for Jehovah even when our condition hard. For example, one old sister for West Africa wey e husband don die, retire from e work as doctor and start to pioneer. The sister name na Mirreh. Sister Mirreh get serious arthritis and na only one hour e fit de spend for house-to-house preaching. But e de fit spend more time when e de preach with magazine-stand. E get plenty return visits and Bible students, and e de use telephone discuss with some of them. Wetin make Sister Mirreh do more for Jehovah? E talk say: “I get deep love for Jehovah and Jesus, and I de always pray to Jehovah so that e go help me do my best for e work.”—Matt. 22:36, 37.

10. With wetin 1 Peter 5:10 talk, wetin people wey de try to do more go receive from Jehovah?

¹⁰ We go receive more training from Jehovah. One pioneer for Mauritius wey e name na Kenny, see say this one na true. When e learn the truth, e comot for university, e baptize, and start to pioneer. E talk say, “I de try to be like prophet Isaiah wey talk say: ‘I dey here! Send me!’ ” (Isa. 6:8) Kenny don join do some construction work, and e don still help to translate our publications for e language. Kenny talk say, “They give me the training wey I need so that I go fit do my work well.” But no be only how to do the work e learn. E still talk say, “I still learn say e get things wey I no fit do, and some fine-fine character wey I need to get to make the way I de serve Jehovah de better.” (Read 1 Peter 5:10.) Make you check your condition whether you go fit make any change so that Jehovah go fit train you more.

11. How some sisters for South Korea work hard for the preaching work, and wetin be the result? (Check picture for front cover.)

¹¹ Even if person don de serve Jehovah for many years, e go need training when e want try new way to do Jehovah work. For COVID-19 time, the elders for one congregation for South Korea write say: “Some people first think say they no go fit do plenty for the preaching work because their body no too strong. But now, them de use video call de preach. Three sisters wey don pass 80 years learn how to use computer preach. And now, them de preach almost everyday.” (Ps. 92:14, 15) You go like to do more for your preaching work and see more-more say  Jehovah dey good? See some things wey you fit do to help you succeed.

12. When person trust Jehovah, wetin Jehovah promise to do for the person?

¹² Learn to trust Jehovah. When we trust God and give God our best, e promise say e go over bless us. (Mal. 3:10) One sister for Colombia wey e name na Fabiola, see how Jehovah do this thing wey e promise. This sister want be regular pioneer small time after e don baptize. But e need to work to support e husband and e three children. So when time reach for this sister to retire, e really pray to Jehovah for help. E talk say: “Na normal thing for people to wait for long time before they begin receive their pension. But I start to receive my own just after one month. E just be like miracle!” After two months, this sister start to pioneer. Now, e don pass 70 years and e don de pioneer for more than 20 years. For all that time, e don help eight people qualify to baptize. E talk say: “Even though say my body de weak sometimes, Jehovah de help me everyday so that I fit continue to pioneer.”

13-14. Which examples fit help us trust Jehovah and do more?

¹³ Learn from the examples of people wey trust Jehovah. Bible get plenty examples of people wey work hard for Jehovah. Many of this people first do something to show say they trust Jehovah, before Jehovah bless them for special way. For example, Jehovah bless Abraham  only after Abraham don leave e house, “even though e no know the place wey e de go.” (Heb. 11:8) Na only after Jacob don struggle with the angel, e receive special blessing. (Gen. 32:24-30) When Israel people want enter the Promise Land, na only after the priest them put leg inside the Jordan River the people fit cross go the other side.—Josh. 3:14-16.

¹⁴ You fit still gain from the examples of servants of Jehovah today wey trust Jehovah and try do more. For example, one brother wey e name na Payton and e wife wey e name na Diana, don enjoy to read about brothers and sisters wey do more for their service to Jehovah. Different-different examples of this brothers and sisters dey under the topic “Their Heart Move Them Go Preach.” * Payton talk say: “When we read their story, e just be like say we de look person wey de enjoy one better food. The more we de watch-am, the more we want ‘taste and see say Jehovah dey good.’ ” As time de go, Payton and Diana pack go place wey they need more publishers to preach. You don read the different-different topic under “Their Heart Move Them Go Preach”? And you don watch the video Preaching For Far Place Wey No Too Easy To Reach—Australia and Witnessing in Isolated Territory—Ireland wey dey jw.org? This information fit help you see how you fit do more for the preaching work.

15. If we de spend time with people wey de encourage us to do more for Jehovah, how this one go help us?

¹⁵ Choose friends wey go encourage you to do more. E go hungry us to chop food wey we never chop before when we dey with people wey like the food. For the same way, if we de spend time with people wey de put Jehovah first for their life, this one go make-am more easy for us to see ways wey we fit do more for Jehovah. One husband and wife wey their name na Kent and Veronica, see say this one na true. Kent talk say, “Our friends and family members encourage us make we try new ways for the work. We see say when we de spend time with people wey de put the Kingdom first, this one de give us the heart to try new thing.” Now, Kent and Veronica na special pioneers for Serbia.

16. As e dey for the story wey Jesus talk for Luke 12:16-21, why we suppose dey ready to leave some things because of Jehovah?

¹⁶ Leave some things because of Jehovah. We no need to stop everything wey we de enjoy to make Jehovah happy. (Eccl. 5:19, 20) But if we decide say we no go do more for Jehovah because we no want leave some things wey we like, we fit make the same mistake wey the man for Jesus story make. The man work hard to get plenty better things for e self, but e forget God. (Read Luke 12:16-21.) One brother for France wey e name na Christian talk say, “That time, the time and power wey I de give Jehovah and my family no be my best.” This brother and e wife decide say they go pioneer. But for them to succeed, they go need to leave their work. To support theirself, they start one small cleaning business and they learn to dey ok with small money. They happy say they leave some things so that they go fit pioneer? Christian talk say, “Now we de enjoy the preaching  work more, and we dey happy as we de see Bible students and return visits de learn about Jehovah.”

17. Wetin fit make us no want try new thing for our preaching work?

¹⁷ Dey ready to try new things for the preaching work. (Acts 17:16, 17; 20:20, 21) One pioneer sister for America wey e name na Shirley, change the way e de preach when COVID-19 dey. The sister no want first try to use telephone preach. But as this sister receive training when circuit overseer visit, e start to preach with telephone everytime. E talk say: “I fear when I first start, but I de really enjoy-am now. We de preach to more people now, pass when we de do house-to-house work!”

18. Wetin fit help us face problems as we de try to do more for our preaching work?

¹⁸ Make plan and try to do wetin you plan. When we de face problems, we de pray for help and sofri think about wetin we fit do about the problems. (Prov. 3:21) One sister wey e name na Sonia, wey be regular pioneer for one Romany-language group for Europe, talk say: “I de like to write the things wey I plan to do for paper and keep that paper for place wey I fit see-am quick. Ontop my table, I get drawing of two roads wey go different direction. When I get decision to make, I go look the two roads and think whether my decision go help me succeed for my plan or e no go help me.” Sonia de try to see e problems for good way. E talk say: “Anytime wey my condition change, na me go decide whether I go see-am like wall wey fit stop me make I no succeed for my plan, or whether I go see-am like bridge wey fit help me to succeed for my plan.”

19. Wetin we suppose make up our mind to do?

¹⁹ Jehovah de bless us for many ways. When we do everything to praise Jehovah, we fit show say we really dey happy for the way Jehovah de bless us. (Heb. 13:15) We fit do plenty different things to serve Jehovah, and then Jehovah fit bless us pass as we expect. Everyday, make we find ways to “taste and see say Jehovah good.” Then we go be like Jesus wey talk say: “My food na to do wetin my Father send me make I do. My food na to finish e work.”—John 4:34.