1-2. Koa zahan̈a Salamo 34:8, ino ma raha tsy maintsy ataontsika baka ho hitantsika fa tsara ankitin̈y Jehovah?

ASA anao efa navy niainvitenolo kanefa hanin̈y io tao tsiary nihoaninao? Anao koa fa mizaha saorasaoranizio, maharen̈y han̈itrinany, mety efa haihainao fo sironizio. Mety han̈ontany fomba nandokisan̈a izio koa anao, na mety han̈ontany hevitrinolo hafa efa nihinan̈a izio. Kanefa izikoa anao tsy man̈andran̈a, tsy mety ho hainao izikoa izio ho tianao na tsy ho tianao.

² Anao koa fa mamaky Baiboly na boky ndreky gazety, avio maharen̈y fomba nitahiany Jehovah iro piaramanompo aminao aby io, ho hainao fa Jehovah io tsara ankitin̈y. Kanefa, tsy ho tsapanao foeky fa man̈ampy anao Jehovah, izikoa anao tsy ‘man̈andran̈a’ karakory marin̈y izy. (Vakio ny Salamo 34:8.) Alô baka atsika hizaha fomba han̈anaovan̈a zen̈y. Akory iziô, ohatra, izikoa anao tihan̈ano fanompoan̈a manontolo andra? Mila man̈atsotra fiain̈ana anao izikoa tihahavita zen̈y. Mety efa nivakianao matetiky koa raha nampan̈antin̈ainy Jesosy amy Matio 6:33. Mivolan̈a baka izio ao fa hamezany Jehovah atsika zay raha ten̈a ilaintsika, izikoa Fanjakan̈anany ny raha ataontsika voalohantoeran̈a amy fiain̈ana. Mety mbala tsiary niain̈anao raha zen̈y. Kanefa, anao matoky fampan̈antinan̈a io, ke miezaka anao mitsitsy vola. Nahen̈inao koa lera iasanao amy zen̈y anao ho afaka hifantoko amy fanompoan̈a. Anao koa man̈ano zen̈y, ho hitanao fa Jehovah ten̈a mikarakara raha ilainao. Ho tsapanao raha zen̈y fotony anao foeky ‘man̈andran̈a’ fa Jehovah io tsara ankitin̈y.

3. Izikoa zahan̈a Salamo 16:1, 2, azovy amezany Jehovah raha tsara?

³ Jehovah ‘tsara fan̈ahy aminolo jiaby’, firaka aminolo tsy mahay izy. (Sal. 145:9; Mat. 5:45) Fa olo tia izy ndreky manompo izy amy fô jiaby fo ten̈a amezany hatsaran̈a maro. (Vakia  Salamo 16:1, 2.) Atsika iziô hizaha sasany amy raha tsara efa nataony Jehovah tamintsika.

4. Ino raha tsara ataony Jehovah aminolo vo manomboko mifandray marikitry aminany?

⁴ Isaka atsika man̈araka raha volan̈iny Jehovah, tsy maintsy ho hitantsika fo fa mahatsara atsika raha zen̈y. Ohatra iziô, atsika koa fa nianatra momba izy ndreky nanjary tia izy, nampiany atsika baka tsy hieritreritry na han̈ano raha halany. (Kol. 1:21) Atsika amy zay koa fa nanokanten̈a tamy Jehovah ndreky natao batisa, nahaimaro fo raha tsara namezany atsika, an̈isanizen̈y feony fieritreretan̈a madio. Nanjary kamaradiny marikitry koa atsika.​—1 Pet. 3:21.

5. Akory ahitantsika fa tsara ankitin̈y Jehovah, lera atsika man̈ano fanompoan̈a?

⁵ Ho hitantsika koa fa tsara i Jehovah, lera atsika manompo. Bihen̈amaso ma anao? Maro panompony Jehovah karaha zen̈y. Miniminia hely baka taminy anao mbala tsy nanompo Jehovah. Tsy tan̈atiny jerinao foeky handeha hikonkon̈o varavan̈anolo tsy hainao zen̈y. Hafatra hindesinao lastio tsy tianolo. Kanefa vitanao fo man̈ano zen̈y tsy tapaka. Nan̈ampy anao Jehovah ke nanjary ankafizinao mare asa io. Maro be fomba nan̈ampiany Jehovah anao. Ohatra iziô, nan̈ampy anao ho kalma fo izy, izikoa fa nisy olo nanohitry. Nampiany koa anao baka hahazo onon̈o andininteny mety tsara hikoran̈inao aminolo liana. Tsy zen̈y fo fa, namezany Jehovah angovo anao ke vitanao fo mitory ndray olo itorianao tsy von̈ono hitandren̈y anao.​—Jer. 20:7-9.

6. Akory koa ahitan̈a fa Jehovah io tsara? Nan̈ino?

⁶ Mampiofan̈a atsika amy fanompoan̈a i Jehovah. Zen̈y koa ahitan̈a fa tsara izy. (Jaona 6:45) Amy fivorian̈a andavanandra, atsika maharen̈y raha mety koran̈iny lera manompo. Efa voaoman̈a tsara iro io, ke ampirisihin̈y atsika hampihatra iro io lera manompo. Mety navozo hely donko atsika tamy voanalohany, izikoa fa han̈aohatra fomba fitorian̈a vaovao. Kanefa atsika koa fa nan̈aohatra izio, hitantsika fa izio ten̈a mety aminolo amy faritanintsika. Lera atsika mivory na man̈aton̈o fivoriambe, matetiky atsika ampirisihin̈y han̈andran̈a fanompoan̈a mbala tsiary nataontsika. Mety hisalasala hely atsika han̈ano zen̈y, fotony tsy mahazatra atsika. Kanefa, hitahy atsika Jehovah izikoa atsika man̈ano zen̈y. Izikoa atsika matoky Jehovah ndreky mitady fomba vaovao fo han̈amezan̈a izy ny farany tsara baka amintsika, ho maro hatsaran̈a hamezany atsika. Hizahavantsika iziô ndraiky raha mety hataontsika hampitombosan̈a fanompoan̈antsika.

7. Ino aby hatsaran̈a ho azontsika izikoa atsika mifen̈y mampitombo fanompoan̈antsika?

⁷ Hahaiharikitry Jehovah fo anao. Iritrireta hely baka raha nandalo tamy Samuel ndreky vadiny. Antipan̈ahy a Colombie i Samuel. * Efa navy pisava lalan̈a iro roeny vadiny tamy fiangonan̈a nisy iro taloha. Iro nan̈iry hampitombo fanompoan̈andro ndreky han̈ampy amy fiangonan̈a mbala vitsy pitory. Kanefa tsy vitandro raha zen̈y izikoa iro tsy nahafoe raha. Karaha ty ho Samuel: “Narehanay raha koran̈iny Matio 6:33, ke vôly zahay nivanga raha tsy nilainay. Fa ny raha ten̈a sarotro taminay, niala tamy tran̈onay. Tianay mare fomba nan̈amboaranay izio. Zahay lastio tsy nanan̈anolo vola tamy niasa izio.” Iro roeny vadiny koa fa nifindra fiangonan̈a, ampahatsiotany karamany Samuel taloha fo efa mahavelon̈o iro. Ho Samuel: “Hitanay fa ten̈a nitaridalan̈a zahay Jehovah sady namaly vavakanay. Tsapanay koa fa Jehovah ten̈a tia zahay sady mankasitraka raha ataonay. Sambanay  nahatsapa raha zen̈y!” Asa anao mba afaka mampitombo fanompoan̈a? Izikoa anao man̈ano zen̈y, matokisa fa hahaiharikitry Jehovah fo anao, baka io izy hikarakara anao.​—Sal. 18:25.

8. Ino ma raha ianaranao baka amy raha nivolan̈iny Ivan ndreky Viktoria?

⁸ Ho ravoravo anao amy fanompoan̈anao. Zen̈y raha tsapany Ivan ndreky Viktoria. Pisava lalan̈a a Kirghizistan iro fivadiany io. Niezaka fo iro hanan̈a fiain̈ana tsotra, baka iro afaka man̈ano zay fanompoan̈a mety ataondro, karaha ataony fan̈oren̈ana. Volan̈iny Ivan: “Na ino na ino fanompoan̈a ataonay, miezaka fo zahay man̈ano ny farany tsara vitanay. Marin̈y ndraiky fa kajo zahay koa fa tsôfotro andra. Kanefa, milamin̈y jerinay avio zahay afapô, fotony nampiasanay hanompoan̈a Jehovah angovonay. Ravoravo mare koa zahay nahazo naman̈a maro ndreky sovenira maro tsara.”​—Mar. 10:29, 30.

9. Akory nataony ranabavy araiky nampitombo fanompoan̈anany, ndray izy tsy salama? Ino vokatranizen̈y taminany?

⁹ Maro raha manahiran̈a atsika avahizo. Ndray zen̈y, mbala ravoravo fo atsika manompo Jehovah. Karaha zen̈y iziô Mirreh, ranabavy araiky an Afriky Andrefa an̈y. Efa matoe izy salakady efa maty vady. Dokotera izy taloha. Fa izy koa fa retirety, nan̈ano pisava lalan̈a. Marary van̈intaolan̈a i Merreh ke mijaly mare izy koa fa mandeha. Lera araiky isanandra fo vitany koa mitory isaka tran̈o. Fa izy ndraiky koa man̈ano fampirantian̈a, izy mahavita mitory ela ela. Manan̈a fitsidihan̈a ndreky fampianaran̈a Baiboly maromaro izy. Amy telefaony fo izy mikoran̈a amy sasany amindro io. Ino nahavy i Mirreh nifen̈y nampitombo fanompoan̈anany? Volan̈iny: “Tiako amy fô jiaby i Jehovah ndreky Jesosy. Matetiky zaho mivavaka beky Jehovah han̈ampy zaho hahavita be, erakany azoko atao amy fanompoan̈a.”​—Mat. 22:36, 37.

10. Amezany Jehovah ino lan̈iany olo mifen̈y mampitombo fanompoan̈a, izikoa 1 Petera 5:10 zahavan̈a?

¹⁰ Hahazo fampiofanan̈a fan̈ampiny baka amy Jehovah anao. Zen̈y tsarabe raha tsapany Kenny, pisava lalan̈a a Maurice an̈y. Tsy nianatra taminy iniversite eky rahalahy io izikoa fa nahay fahamarin̈ana. Natao batisa izy, baka io nikomansy nanompo manontolo andra. Ty raha nambarany: “Zaho mba tihanan̈a toetsain̈y karaha niny paminan̈y Isaia in̈y. Izy nivolan̈a: ‘Indriô zaho, iraha!’ ” (Isaia 6:8) Niasa tamy tetikasa fan̈oren̈ana maromaro i Kenny, baka io izy nan̈ampy tamy fandikan̈a boky ndreky gazetintsika tamy fivolan̈ananolo amindro an̈y. Karaha ty ho izy: “Nahazo fampiofanan̈a zaho, ke nanjary haiko tsara zay asa nan̈irahan̈a zaho.” Kanefa, tsy fomba fan̈anaovana asa io fo raha nanjary hainy, fa raha hafa koa. Ho izy: “Nanjary haiko ino toetry mila anan̈ako baka zaho ho azony Jehovah ndreky fandaminan̈a ampiasain̈a tsarabe.” (Vakia 1 Petera 5:10.) Ke diniha fiain̈ananao, baka io zahava tsao mbala misy raha mila ivoanao, beky anao hahazo fampiofan̈ana fan̈ampiny baka amy Jehovah!

11. Karakory nataony ranabavy telo a Corée Atsimo an̈y baka iro hahavita hitory fo ndray efa matoe? Ino vokatranizen̈y? (Zahava sary amy fon̈ony gazety ty.)

¹¹ Ndray Vavolombelon̈o Jehovah efa ela mbala mahazo hatsaran̈a fo izikoa fa mahazo fampiofanan̈a, intsaka eky iro koa fa man̈andran̈a fanompoan̈a vaovao. Karaha ty iziô nisoratiny antipan̈ahy araiky a Corée Atsimo an̈y, tan̈atiny valan̈aretin̈y COVID-19: “Nisy pitory tsy afaka nitory matetiky taloha, fotony iro tsy salama. Fa iro zioty ndraiky manjary afaka mitory matetiky, fotony iro mampiasa vidéoconférence. Ohatra iziô, misy ranabavy telo efa 80 taon̈o mandilatra zay aminay atỳ nianatra nampiasa vidéoconférence io. Iro iziô manompo fo, efa hely tsy isanandra!” (Sal.  92:14, 15) Tianao ho hita ma fa Jehovah io tsara ankitin̈y? Izikoa zen̈y, ampitombosa fanompoan̈anao. Han̈ampy anao hahavita zen̈y raha sasany aby ty.

12. Ino raha ampan̈antin̈ainy Jehovah olo matoky izy?

¹² Mianara matoky Jehovah. Izy efa nampan̈anten̈a fa hamezany hatsaran̈a maro atsika izikoa matoky izy ndreky mifen̈y man̈amia izy ny farany tsara baka amintsika. (Mal. 3:10) Zen̈y ankitin̈y raha tsapany Fabiola, ranabavy a Colombie an̈y. Tihan̈ano pisava lalan̈a maharitry izy, tafara heliny batisanany. Fa izy tsy maintsy niasa han̈ampian̈a vadiny amy velonten̈andro. Zanakandro lastio telo mianadahy. Ke izikoa fa marikitry taon̈o handianany retirety, nivavaka mare izy baka Jehovah han̈ampy izy. Ho izy: “Matetiky olo koa fa mandeha retirety, miambin̈y ela be vo mivaly volany retiretinany. Fa ninaka ndraiky, fanjava araiky fo efa nivaly edy.” Komansy nan̈ano pisava lalan̈a izy fanjava aroe tafaranizen̈y. Efa mandilatra 70 taon̈o ranabavy io iziô, avio efa mandilatra 20 taon̈o nan̈anaovany pisava lalan̈a maharitry. Tan̈atiny fotoan̈a zen̈y izy nahavita nan̈ampy olo valo ho vita batisa. Karaha ty ho izy: “Misy lerany zaho kajo mare, kanefa ampiany Jehovah fo zaho isanandra, ke vitako fo man̈ano pisava lalan̈a.”

13-14. Tantaranjovy aby ma mety han̈ampy atsika hatoky Jehovah ndreky hampitombo fanompoan̈a?

¹³ Mianara baka aminolo natoky Jehovah. Maro olo koran̈iny Baiboly fa niezaka mare nanompo Jehovah. Iro antsendriky nan̈ano raha voanalohany, zay Jehovah vo nan̈amia  iro hatsaran̈a. Araiky amindro zen̈y i Abrahama. Efa izy niala ta Ora tanàna faviany, zay izy vo nahazo fitahian̈a baka tamy Jehovah. Kanefa, ‘tsy hainy aby han̈aia izy.’ (Heb. 11:8) Karaha zen̈y koa i Jakoba. Efa izy baka nitolon̈o taminy anjely, izy vo nahazo fitahian̈a miavaka. (Gen. 32:24-30) Iro Israelita aby io koa fa hiditry tamy Tany Nampan̈antinain̈y, tsy maintsy nivarin̈y tamy Ten̈aranony Jordana tondraka be in̈y antsendriky iro pisoron̈o aby io, zay iro vahoaka aby io vo afaka nitsaka.​—Jos. 3:14-16.

¹⁴ Misy panompony Jehovah koa amy zioty mampitombo fanompoan̈a sady ten̈a matoky izy. Ten̈a tsara alain̈a tahaka koa iro io. Karaha zen̈y iziô Payton ndreky Diana. Iro tia namaky tantarany piaramanompo nahavita nampitombo fanompoan̈a, karaha ataony aminy andiandahatsoratra “Nahafoy Tena Izy Ireo.” * Karaha ty nambarany Payton: “Zahay koa fa namaky tantara aby io, miran̈a nizaha olo nihinan̈a hanin̈y maro masiro in̈y. Arakarakany nizahavanay iro, nahaitihinan̈a fo zahay. Nanjary tianay mare ‘han̈andran̈a, ndreky hahita fa Jehovah io tsara.’ ” Izikoa fa nandeha fotoan̈a, iro nandeha nan̈itatra. Ke asa anao mba efa namaky andiandahatsoratra aby io? Anao ma efa nizaha video Fitoriana any Amin’ny Faritany Mitokana: Aostralia ndreky araiky Fitoriana any Amin’ny Faritany Mitokana: Irlandy in̈y? Amy jw.org ao misy iro io. Mety han̈ampy anao hampitombo fanompoan̈anao video aby io.

15. Nan̈ino ma atsika mila mahay mifidy naman̈a?

¹⁵ Mahaiza mifidy naman̈a. Moramora amintsika han̈andran̈a hanin̈y mbala tsiary nihoanintsika, izikoa atsika miaraka aminolo tia izio. Karaha zen̈y koa fanompoan̈a Jehovah. Izikoa namanao man̈ano voalohantoeran̈a fanompoan̈a, anao manjary tihampitombo fanompoan̈a koa. Zen̈y tsarabe raha niain̈any Kent ndreky Veronica. Ho Kent: “Kamaradinay ndreky fianakavian̈anay nampirisiky zahay han̈ano fanompoan̈a mbala tsiary nataonay. Ny raha hitanay, zahay koa fa miaraka aminolo man̈ano voalohantoeran̈a Fanjakan̈a io, nanjary nasaky nan̈andran̈a raha vaovao zahay.” Pisava lalan̈a manokan̈a a Serbie an̈y iry Kent iziô.

16. Izikoa dinihin̈y fan̈oharan̈any Jesosy amy Lioka 12:16-21, nan̈ino ma atsika tokony ho von̈ono hahafoe raha?

¹⁶ Mahafoeza raha hanompoan̈a Jehovah. Marin̈y fa tihan̈ano raha mamparavoravo Jehovah atsika. Fa ndray zen̈y, atsika tsy voatery hahafoe raha jiaby tiantsika. (Mpito. 5:19, 20) Ny raha mety ho hisy koa, mifidy tsy hampitombo fanompoan̈a atsika, fotony misy raha sasany tsy foentsika. Izikoa zen̈y fandehany, mety han̈ampody hadisovan̈any lelahy tamy fan̈oharan̈a araiky nataony Jesosy zay atsika. Lelahy io niasa namory fanan̈ana fo, fa izy tsy nijery Zan̈ahary foeky. (Vakia Lioka 12:16-21.) Karaha ty nambarany Christian, rahalahy araiky a France an̈y: “Hitako fa lambilambiny fotoan̈anaka ndreky angovonaka fo namezako Jehovah ndreky fianakavian̈anaka, fa tsy lay farany tsara.” Ke nanapakevitry han̈ano pisava lalan̈a iro roeny vadiny. Fa problemo fo, tsy maintsy niala taminy asandro iro, izikoa tsy zen̈y tsy ho vitandro han̈ano pisava lalan̈a. Akory fo basy velonten̈andro? Namôron̈o asa iro, ke iro mikarama man̈adio tran̈o. Nihen̈y ndraiky vola nazondro, fa iro nianatra ho afapô tamy vola hely nazondro. Nanen̈iny ma iro nahafoe raha aby zen̈y? Aha. Karaha ty ho Christian: “Nanjary tianay mare fanompoan̈anay. Ravoravo zahay mahita olo tsidihinay ndreky ampianarinay Baiboly mianatra raha momba Jehovah.”

17. Ino ma raha ten̈a sarotro tamy Shirley, baka io ino raha nan̈ampy izy?

 ¹⁷ Man̈oara man̈ano fanompoan̈a mbala tsiary nataonao. (Asan’ny Apostoly 17:16, 17; 20:20, 21) Zen̈y raha nataony Shirley, tamy vanimpotoan̈any valan̈aretin̈y COVID-19. Pisava lalan̈a an Etazonỳ izy. Tamy voanalohany, navozo izy hitory tamy telefaony. Kanefa, izikoa fa nitsidiky fiangonan̈a nisy izy piandraikitry faritry, nampiofanin̈y han̈ano izio izy. Iziô izy mitory tsy tapaka amy telefaony. Ho Shirley: “Navozo marin̈y zaho tamy voanalohany! Fa izio iziô nanjary ten̈a tiako. Mahavita mikoran̈a aminolo marobe zahay, tsy karaha tamy zahay nitory isaka tran̈o in̈y.”

18. Ino raha mety ataonao, izikoa anao fa miezaka mampitombo fanompoan̈a kanefa misy raha manahiran̈a anao?

¹⁸ Iritrireta raha tianao hatao tanjon̈o, baka io ataova raha hatakaranao izio. Atsika koa fa tôjy problemo, atsika mivavaka baka Jehovah han̈ampy atsika, avio dinihintsika tsarabe raha tokony hatao. (Ohab. 3:21) Pisava lalan̈a aminy antokopitory mampiasa volan̈a rômanỳ, an Eropy an̈y, i Sonia. Karaha ty ho izy: “Soratiko amy taratasy aby zay raha tiako hatao, baka io izio ataoko amy tany mora hita. Misy sariny sampandalan̈a zay nataoko an̈abony latabatra. Zaho koa fa hanapakevitry, zahako sampandalan̈a io, baka io diniko aia amy fanapahankevitry aroe io ten̈a han̈ampy zaho hanakatra tanjon̈onaka.” Sonia koa fa misy raha manahiran̈a, miezaka fo izy hanan̈a toetsain̈y tsara. Ho izy: “Problemo aby io mety hampiran̈iny amy riba manakan̈a zaho tsy handroso, na amy titezan̈a man̈ampy zaho hanakatra tanjon̈o. Miankiny amy toetsain̈inaka fo raha zen̈y.”

19. Akory han̈aboahantsika fa mankasitraka Jehovah atsika amy raha jiaby amezany atsika?

¹⁹ Maro hatsaran̈a amezany Jehovah atsika. Ke atsika koa mankasitraka izy amy raha jiaby zen̈y, hifen̈y fo atsika han̈ano zay vitantsika hideran̈a izy. (Heb. 13:15) Hahaimaro fo fitahian̈a ho azontsika, izikoa atsika mitady fomba vaovao hampitombosan̈a fanompoan̈antsika. “Andramàna baka io zahava fa Jehovah io tsara.” Avio mitadiava fomba han̈anaovan̈a zen̈y, isanandra. Hangala tahaka Jesosy atsika izikoa man̈ano zen̈y. Karaha ty ho izy: “Man̈ano sitrapony araiky nan̈iraka zaho ndreky mankefa asanany, zen̈y hanin̈inaka.”​—Jaona 4:34.