1, 2. Casi ná Salmo 34:8, ¿xi naquiiñeʼ gúninu para guidúʼyanu pabiáʼ nachaʼhuiʼ Jehová?

GUXUÍʼLUNU cudiicabe laanu ti guendaró ni qué huayuu dxi guidoʼno. Para gánnanu pa nanixe ni la? zanda guidúʼyanu ni, chúʼxiinu ni, guinábanu receta stini o guinabadiidxanu tuuxa pa riuulaʼdxiʼ ni. Peru ni jma galán nga guni pruébanu ni.

² Zaqueca nga laanu, para guidúʼyanu pabiáʼ nachaʼhuiʼ Jehová la? Zanda guidúʼndanu Biblia ne ca publicación stinu, ne gucaʼdiáganu xcaadxi hermanu guiniʼcaʼ ximodo huaguu Jehová ndaayaʼ laacaʼ. Peru laapenu nga naquiiñeʼ guyúbinu gánnanu pabiáʼ nachaʼhuiʼ Jehová (biindaʼ Salmo 34:8). Quíxhenu ti ejemplu. Zándaca racaláʼdxinu gúninu jma lu xhiiñaʼ Jehová, peru para ganda gúninu ni la? naquiiñeʼ guibaninenu huaxiéʼ cosa. Zándaca stale biaje maʼ bidúʼndanu promesa ni guníʼ Jesús ra ná pa guyúbinu Reinu stiʼ Dios primé lu xquendanabáninu la? zudii Jehová laanu guiráʼ ni caquiiñenu, peru zándaca qué huadúʼyanu gaca cumplir promesa riʼ lu xquendanabáninu (Mat. 6:33). Peru cumu nápanu fe lu promesa ni guníʼ Jesús que, maʼ qué rúninu stale gastu ne qué runi xhaatanu stale dxiiñaʼ, ne rúninu stipa guni predicarnu. Ne ora rúninu ni bizéʼtenu riʼ, riduʼya dxíchinu ximodo rapa Jehová laanu. Ne laapenu rudiʼnu cuenta pabiáʼ nachaʼhuiʼ Jehová.

3. Casi ná Salmo 16:1, 2, ¿tuu nga ca ni ruuyaʼ guendanachaʼhuiʼ stiʼ Jehová?

³ Nachaʼhuiʼ Jehová né «guiráʼ binni», dede né ca ni qué runibiáʼ laabe (Sal. 145:9; Mat. 5:45). Peru riguu ndaayaʼ  Jehová ca binni ni nadxii laa ne ca ni runi ni nabe de guidubi ladxidóʼ (biindaʼ Salmo 16:1, 2). Guidúʼyanu caadxi de ca cosa galán ni huayuni Jehová pur laanu.

4. ¿Ximodo rusihuinni Jehová nachaʼhuiʼ né ca ni deruʼ cadxiña ra nuu?

⁴ Ora rúninu ni cazíʼdinu de Jehová ridúʼyanu ximodo racané ni laanu lu xquendanabáninu. Ora bizíʼdinu jma de laabe ne gunnaxhiinu laabe, gucanebe laanu guchaʼnu modo riníʼ íquenu ne cadi gúninu cosa ni qué riuuláʼdxibe (Col. 1:21). Ra guca dedicarnu Jehová ne guyuunísanu, bisihuínnibe nacháʼhuibe né laanu ra bidiibe laanu ti conciencia nayá ne beeda gácanu xhamígube (1 Ped. 3:21).

5. ¿Ximodo ridúʼyanu pabiáʼ nachaʼhuiʼ Jehová ora runi predicarnu?

⁵ Qué rusaana de guidúʼyanu guendanachaʼhuiʼ stiʼ Jehová ora runi predicarnu. ¿Ñee nácaluʼ ti binni ni natuí la? Stale xpinni Jehová naca zacá. Zándaca ante guiziidiluʼ de lu Biblia qué lica niníʼ íqueluʼ nuxhidxinaluʼ ra lidxi binni ni qué lica runibiaʼluʼ para guiníʼneluʼ laa de lu Biblia. Ne tiempu riʼ maʼ biaaluʼ gúniluʼ ni. Ne cumu racané Jehová lii la? jma riuuláʼdxiluʼ guni predicarluʼ. Laaca huayuuyaluʼ ximodo racané Jehová lii de xcaadxi modo. Guzéʼtenu ti ejemplu, huayacanebe lii cadi guidxiichiluʼ ora chu tuuxa tindené lii lu predicación. Laaca huayacanebe lii guietenaláʼdxiluʼ textu ni caquiiñeluʼ ora maʼ cayuni predicarluʼ ti binni ni riuulaʼdxiʼ guiziidiʼ. Ne laaca huadiibe lii stipa ni caquiiñeluʼ para cadi gusaana de guni predicarluʼ neca qué riná binni gucaadiaga lii lu territorio stiluʼ (Jer. 20:7-9).

6. ¿Ximodo rihuinni nachaʼhuiʼ Jehová ora rusiidiʼ laanu?

⁶ Laaca rusihuinni Jehová nachaʼhuiʼ né laanu ora rusiidiʼ laanu modo guni predicarnu (Juan 6:45). Lu reunión ni rápanu ndaaniʼ semana, rusiidicabe laanu ximodo guinínenu binni ne zanda iquiiñenu cani ora runi predicarnu. Zándaca zadxibihuiininu ora guzulú iquiiñenu xiixa sugerencia nacubi ni bizíʼdinu lu reunión. Peru ora rúninu ni, rudiʼnu cuenta riuulaʼdxiʼ binni ni nuu lu territorio stinu ni cusíʼdinu laa. Laaca riguucabe gana laanu lu ca reunión ne lu asamblea para guni predicarnu de xcaadxi modo ni qué huayuu dxi gúninu. Zándaca guchaʼnu modo maʼ biaʼnu guni predicarnu. Peru pa gúninu ni, zaguu Jehová ndaayaʼ stipa ni gúninu. Yanna guidúʼyanu caadxi cosa galán ni rudii Jehová laanu ora quixhe íquenu gúninu xiixa nacubi lu xhiiñabe, modo tiica nabáninu. Laaca zadúʼyanu xi zanda gúninu para ugaandanu ca meta ni gudixhe íquenu.

7. ¿Xi ndaayaʼ ricaanu ora rúninu stipa pur gúninu jma lu xhiiñaʼ Jehová?

⁷ Ridxíñanu jma gaxha de Jehová. Guidúʼyanu ni bizaaca ti ancianu láʼ Samuel, * laa ne xheelaʼ cayuni servircaʼ ndaaniʼ guidxi Colombia. Nayecheʼ cayúnicabe dxiiñaʼ de precursor ndaaniʼ congregación stícabe, peru racaláʼdxicabe gúnicabe jma lu xhiiñaʼ Jehová ra gacanécabe ti congregación ra jma caquiiñeʼ publicador. Para ganda gacanécabe la? bisaana de gúnicabe caadxi cosa ni riuuláʼdxicabe. Sicaríʼ guníʼ Samuel: «Yenándadu ni ná Mateo 6:33 ne bisaana de sidu caadxi cosa ni cadi caquiiñeʼ. Peru ni jma nagana guca para laadu nga gusaanadu yoo ra nabézadu ni guyáʼ modo riuuláʼdxidu ne maʼ  biáxani». Yanna ra maʼ nuucabe ndaaniʼ ti congregación nacubi, bidiicabe cuenta zanda guibánicabe né huaxiéʼ si bueltu. Ne guniʼruʼ Samuel: «Maʼ bidúʼyadu ximodo rapa Jehová laadu ne ricabi ca oración stidu. Runi sentirdu cayecheʼ Jehová pur ni cayúnidu ne jma ridúʼyadu pabiáʼ nadxiibe laadu». ¿Ñee zanda gúninu jma lu xhiiñaʼ Jehová la? Pa gúniluʼ ni la? Gunna dxichi ziuuluʼ jma gaxha de Jehová ne zápabe lii (Sal. 18:25).

8. ¿Xi riziidiluʼ de ni bizaaca Iván ne Viktoria?

⁸ Riuʼnu nayecheʼ ora rúninu xhiiñaʼ Jehová. Guzéʼtenu ni bizaaca Iván ne Viktoria, ti guendaxheelaʼ ni naca precursor ne runi servircaʼ ndaaniʼ guidxi Kirguistán. Gudixhe íquecabe guibaninécabe huaxiéʼ si cosa para ganda chigacanécabe lu construcción. Sicaríʼ guníʼ Iván: «Bínidu dxiiñaʼ de guidubi ladxidoʼdo lu cada proyectu. Neca guizáʼ maʼ bidxágadu ora guiluxe dxi, peru ratadxí ladxidoʼdo ne riéchedu purtiʼ nánnadu biquiiñedu stipa stidu para gúnidu xhiiñaʼ Reinu. Guizáʼ guyuʼdu nayecheʼ purtiʼ binibiaʼdu stale hermanu ne gúpadu stale experiencia galán» (Mar. 10:29, 30).

9. ¿Xi huayuni ti hermana neca napa guendanagana para guni jma lu xhiiñaʼ Jehová ne xi huabeendú?

⁹ Zanda chuʼnu nayecheʼ ora gúninu xhiiñaʼ Jehová neca nápanu guendanagana. Guzéʼtenu ni bizaaca Mirreh, ti hermana viuda ni maʼ huaniisi de África Occidental ni biʼniʼ dxiiñaʼ de doctora. Dxi guca jubilarbe gúcabe precursora. Nápabe ti guendahuará lá artritis ne cada biaje guireebe chiguni predicarbe, ti hora si randa rireebe de yoo pur yoo. Peru jma xadxí runi predicarbe né exhibidor. Nápabe stale revisita ne estudiu, ne nuu de laacani la? rúnibe cani pur teléfono. ¿Xi rucaa laabe gúnibe jma lu xhiiñaʼ Jehová yaʼ? Laabe guniʼbe: «Guizáʼ nadxieeʼ Jehová ne Jesucristu. Nga runi gatigá rinabaʼ Jehová gacané naa ganda guneʼ jma lu xhiiñaʼ» (Mat. 22:36, 37).

10. Casi ná 1 Pedro 5:10, ¿xi rudii Jehová ca ni runi stipa guni jma lu xhiiñabe?

¹⁰ Rusiidiruʼ Jehová laanu xcaadxi cosa. Kenny nga ti precursor ni cayuni servir ndaaniʼ guidxi Mauricio, laa biiyaʼ dxandíʼ ca diidxaʼ riʼ. Dxi biziidibe de lu Biblia, bisaanabe universidad, guyuunísabe ne gúcabe precursor regular. Laabe guniʼbe: «Runeʼ stipa gacaʼ casi profeta Isaías, laa guníʼ: “¡Raríʼ nuaaʼ! Biseendaʼ naa”» (Is. 6:8). Huayuni Kenny dxiiñaʼ lu stale proyectu de construcción ne laaca huayacanebe gaca traducir publicación lu diidxaʼ ni gulenebe. Laaca guniʼbe: «Gucuaaʼ capacitación para ganda guneʼ cumplir ca asignación ni gucuaaʼ». Peru qué niziidisibe gúnibe xhiiñabe jneza ne laaca guníʼrube: «Biziideʼ gunáʼ nga ca cosa ni qué zanda guneʼ ne xi cualidad caquiiñeʼ gapaʼ para ganda guneʼ xhiiñaʼ Jehová jma jneza» (biindaʼ 1 Pedro 5:10). ¿Ñee ñanda ñuuyaluʼ pa zándaruʼ gusiidiʼ Jehová lii jma para gúniluʼ jma lu xhiiñaʼ la?

11. ¿Xi stipa biʼniʼ caadxi hermana de Corea del Sur para gunda biʼniʼ predicarcaʼ jma, ne xi guleenducaʼ? (Biiyaʼ imagen ni zeeda lu portada).

¹¹ Dede ca hermanu ni maʼ ziné stale iza de naca Testigu zanda gusiidiʼ Jehová laacaʼ para guni predicarcaʼ xcaadxi modo. Lu pandemia stiʼ COVID-19, bicaa caadxi ancianu de congregación ni nuu Corea del Sur: «Nuu hermanu dxiqué guníʼ ique qué zanda guni predicarcaʼ pur huaracaʼ peru yanna randa rúnicani pur videollamada. Chonna hermana ni napa jma de 80 iza biziidicaʼ gúnicaʼ videollamada ne  yanna maʼ casi guiráʼ dxi runi predicarcaʼ» (Sal. 92:14, 15). ¿Ñuuláʼdxiluʼ ñúniluʼ jma lu xhiiñaʼ Jehová ne ñuuyaluʼ pabiáʼ nachaʼhuiʼ Jehová la? Guzéʼtenu caadxi cosa ni zacané lii gúniluʼ ni.

12. ¿Xi maʼ guníʼ Jehová zudii ca ni gapa confianza laa?

¹² Biziidiʼ gápaluʼ confianza Jehová. Maʼ guníʼ Jehová zundaateʼ ndaayaʼ stiʼ luguianu pa gápanu confianza laa ne gúninu ni ná de guidubi ladxidoʼno (Mal. 3:10). Ti hermana de Colombia láʼ Fabiola laa peʼ biiyaʼ ximodo biʼniʼ cumplir Jehová promesa riʼ. Despué de guyuunísabe gudixhe íquebe gácabe precursora regular, peru naquiiñeʼ gúnibe dxiiñaʼ para gudiibe ni caquiiñeʼ familia stibe. Ngue runi, dxi guluube guiʼchiʼ stibe para gaca jubilarbe gunábabe Jehová de guidubi ladxidoʼbe gacané laabe. Hermana riʼ guníʼ: «Rindaa stale tiempu para guzulú guicaa tuuxa pensión stiʼ, peru naa ti beeu si gulezaʼ para bidiicabe ni naa. Beeda gaca ni casi ti milagru». Gudiʼdiʼ si chupa beeu gúcabe precursora. Yanna nápabe jma de 70 iza ne maʼ zinebe jma de 20 iza de precursora. Biaʼ tiempu ca maʼ gucanebe xhono binni chúʼnisa. Laabe guniʼbe: «Nuu biaje runeʼ sentir huaxiéʼ stipa napaʼ, peru guiráʼ dxi racané Jehová naa gusaaʼ hora stinneʼ».

13, 14. ¿Xi ejemplu zanda gacané laanu gápanu confianza Jehová ne guyúbinu modo gúninu jma lu xhiiñaʼ?

¹³ Biziidiʼ de ca binni ni gupa confianza  Jehová. Lu Biblia zeeda ejemplu stiʼ binni ni biʼniʼ stale stipa guni xhiiñaʼ Dios. Stale de laacabe gupa xidé primeru bisihuínnicabe nápacabe confianza Jehová, ne despué gucuaacabe ca ndaayaʼ stibe. Guzéʼtenu ti ejemplu, gucuaa Abrahán ndaayaʼ stiʼ Dios despué de bisaana lidxi ne zeʼ ti lugar «neca qué ganna paraa zeʼ» (Heb. 11:8). Ne Jacob la? gucuaa ndaayaʼ stiʼ Dios despué de bidxelasaanebe ti ángel (Gén. 32:24-30). Ne dxi mayaca chuʼ guidxi Israel ndaaniʼ Tierra Prometida, primeru guyuu ca sacerdote que ndaaniʼ guiiguʼ Jordán ne oraqueruʼ gudiʼdiʼ guidxi que (Jos. 3:14-16).

¹⁴ Laaca zanda guiziidiluʼ de ejemplu stiʼ caadxi Testigu de tiempu riʼ ni napa confianza Jehová ne huayúbicaʼ modo gúnicaʼ jma lu xhiiñabe. Guzéʼtenu ti ejemplu, ti hermanu láʼ Payton ne xheelabe Diana, riuuláʼdxicabe gúʼndacabe experiencia stiʼ ca hermanu ni cayuni jma lu xhiiñaʼ Jehová, casi ca ni zeeda lu serie ni láʼ «Gunábacabe chigúnicabe dxiiñaʼ né stale gana». * Laabe guniʼbe: «Ora maʼ cadúʼndadu ca experiencia ca runi sentirdu casi ora cadúʼyadu cayó tuuxa ti guendaró nanixe. Ne laga jma cadúʼndadu ca experiencia ca jma riuuláʼdxidu guidúʼyapedu pabiáʼ nachaʼhuiʼ Jehová». Ne ra gudiʼdiʼ tiempu yendeza guendaxheelaʼ riʼ ti lugar ra jma caquiiñeʼ tu gacané. ¿Ñee maʼ biindaluʼ serie de artículo riʼ la? ¿Ñee maʼ biiyaluʼ ca videu ni láʼ Predicación ca lugar jma zitu: Australia ne Predicación ca lugar jma zitu: Irlanda, ni nuu lu sitiu jw.org la? Guiráʼ ndiʼ zacané lii guyúbiluʼ xcaadxi modo gúniluʼ jma lu xhiiñaʼ Jehová.

15. ¿Ximodo zanda gacané ca binni ni guidxaaganu laanu?

¹⁵ Biyubi binni gacané lii. Cadi nagana zaca para laanu guni pruébanu ti guendaró ni qué huayuu dxi guidoʼno pa ridxaaganu binni ni nabé riuulaʼdxiʼ guendaró ca. Zaqueca nga rizaaca ora ridxaaganu binni ni jma ricá ique guni xhiiñaʼ Jehová, qué zaca nagana para laanu laaca guyúbinu xcaadxi modo gúninu jma lu xhiiñaʼ Dios. Nga peʼ nga ni bizaaca Kent ne Verónica. Kent guníʼ: «Nabé guluu ca xhamígudu ne familia stidu gana laadu para gúnidu jma lu xhiiñaʼ Jehová. Bidiʼdu cuenta pa guidxaagadu binni ni ruyubi Reinu stiʼ Dios primé, racané ni laadu para gúnidu xcaadxi cosa nacubi lu xhiiñaʼ Jehová». Tiempu riʼ maʼ precursor especial guirópacabe ne cayuni servírcabe ndaaniʼ guidxi Serbia.

16. Casi riete lu ejemplu ni zeeda lu Lucas 12:16-21, ¿xiñee naquiiñeʼ gúninu sacrificiu para Jehová?

¹⁶ Biʼniʼ sacrificiu para Jehová. Para gusiéchenu Jehová cadi caquiiñeʼ peʼ gusaananu guiráʼ ca cosa ni riuuláʼdxinu (Ecl. 5:19, 20). Peru pa qué gúninu jma lu xhiiñaʼ Dios purtiʼ si qué racaláʼdxinu gúninu xiixa sacrificiu la? zándaca gueeda guizaacanu casi hombre ni guníʼ Jesús purtiʼ laa bibani galán peru qué ñetenalaʼdxiʼ pa nuu Dios (biindaʼ Lucas 12:16-21). Ti hermanu láʼ Christian, ni nabeza Francia, laa guníʼ: «Bidieeʼ cuenta cadi cudieeʼ tiempu ne stipa ni napaʼ Jehová ne familia stinneʼ». Laabe ne xheelabe gúcacabe precursor, ne para gunda bíʼnicabe ni gupa xidé bisaanacabe dxiiñaʼ stícabe. Para gápacabe ni guibaninécabe la? Bizulú bisiácabe ra lidxi binni ne biziidicabe chúʼcabe nayecheʼ né huaxiéʼ cosa. ¿Ñee guleendúcabe xiixa pur sacrificiu  ni bíʼnicabe la? Laabe guniʼbe: «Guizáʼ riuuláʼdxidu guni predicardu ne riéchedu guidúʼyadu ca estudiante stidu ne ca binni ni rigánnadu guiziidicaʼ jma de Jehová».

17. ¿Xiñee nuu stale qué riná guni predicar gadxé modo?

¹⁷ Biʼniʼ stipa guni predicarluʼ sti modo (Hech. 17:16, 17; 20:20, 21). Ti precursora de Estados Unidos láʼ Shirley gupa xidé bichaa modo runi predicar pur pandemia stiʼ COVID-19. Nacubigá que ridxíbibe guni predicarbe pur teléfono. Peru dxi yeganna superintendente de circuito laacabe biziidibe ximodo gúnibe ni. Ne dede dxiqué maʼ runi predicarbe pur teléfono. Laabe guniʼbe: «Primé biaje bineʼ ni guizáʼ bidxibeʼ, peru yanna guizáʼ riuuladxeʼ guneʼ predicar pur teléfono. Jma stale binni rinínedu yanna que dxi runi predicardu de yoo pur yoo».

18. ¿Xi racané laanu para gudxiilunu ca guendanagana ni rucueeza laanu cadi guni predicarnu jma?

¹⁸ Gudixhe ti meta ne biʼniʼ stipa ugaandaluʼ ni. Ora nápanu guendanagana, runi orarnu Jehová ne riníʼ íquenu ximodo guni chaahuinu ni (Prov. 3:21). Sonia, ti precursora ni racané lu idioma romaní ni nuu Europa, guníʼ: «Riuuladxeʼ gucaaʼ ca meta stinneʼ lu ti guiʼchiʼ ne gucaaʼ cani ti lugar ra zanda guuyaʼ. Lu ti mexahuiiniʼ stinneʼ, napaʼ ti dibuju ra cá chupa neza ni ziné gadxé gadxé ladu. Ora chiguicaaʼ ti decisión ruuyaʼ dibuju ca ne riníʼ iqueʼ pa ladu ziné decisión ni guicaaʼ ca naa». Ne ora napa Sonia guendanagana la? rúnibe stipa cadi guireebe gana. Laabe bisiénebe: «Maʼ naa nga riguixheʼ iqueʼ pa guuyaʼ ti guendanagana stinneʼ casi ti barda ni zanda gucueeza naa o casi ti puente ni zanda gacané naa ugaandaʼ ca meta stinneʼ».

19. ¿Ximodo zanda gudiʼnu xquixe peʼ Jehová pur guiráʼ cosa galán ni rudii laanu?

¹⁹ Stale modo riguu ndaayaʼ Jehová laanu. Zanda gudiʼnu xquixe peʼ laabe ra gúninu guiráʼ ni nuu lu nanu para gusisácanu laabe (Heb. 13:15). Ti modo zanda gúninu ni nga ra guyúbinu xcaadxi modo gúninu jma lu xhiiñaʼ Jehová. Pa gúninu ni la? jma zaguu Jehová ndaayaʼ laanu. Nga runi, guiráʼ dxi guyúbinu gánnanu ne guidúʼyanu pabiáʼ nachaʼhuiʼ Jehová. Ne zacá zaninu casi guníʼ Jesús: «Guendaró stinneʼ nga guneʼ ni ná ni biseendaʼ naa ne guiluxe xhiiñaʼ» (Juan 4:34).