1-2. (1) Mikitini Taneng 16:31 mananamay ita to sasamaan ko pinengneng to matoˈasay a salikaka hani? (2) Oniya lalakaw wa pacaˈof to manan a salicay hani?

ITINI Padaka kongyen no Akense a niyaroˈ, ngaˈayay mahela no mihalamaay ko odoˈ i fafekang no sera. Kawra, oniya odoˈ cowa ka keriten ato renacen, mansa ˈalomanay tamdaw cowa ka fanaˈ to kalimlaan a fakeloh konini, pinengneng aca miliyasayto.

² O matoˈasay a salikaka malecaday o odoˈ masakalimlaan, palinian no Fangcalay Cudad ko ˈofad nangra to tadamaanay a tamohong. (ˈOsien ko Taneng 16:31; 20:29) Kawra, masakahmaway no tamdaw ko epoc nangra. Ano maharateng no kaemangay ko kalimlaan nangra, pasayra cangranan a minanam, wa milifok to mikikakaay to hafay a kalimlaan dafong. Oniya lalakaw wa pacaˈof to tolo salicay: Hano tada kalimlaan ko matoˈasay salikaka saan ko piharateng ni Yihofa hani? Pakayni i likakawa ni Yihofa hano tada kalimlaan cangra hani? Samaan ko demak ita ngaˈay mikitira cangranan adihay ko mananamay?

3. Mikitini ˈOlic 92:12-15, itini pinengneng ni Yihofa o matoˈasay salikaka hano tada kalimlaan?

³ Itini pinengneng ni Yihofa, o matoˈasay salikaka tada kalimlaan! Mafanaˈay ci Yihofa to ikemoday falocoˈ nangra, tada masemeray to makapahay capeling nangra. Adihayay mihecaan madimadiay cangra matayal saki Yihofaan, pasifanaˈay a paladaˈ to mataringay a taneng ato nalifetan no niyah i kaemangay tamdaw, pakahemekay ci Yihofaan konini. (Yopu 12:12; Taneng 1:1-4) Masemerayho ci Yihofa to piemem nangra. (Malaki 3:16) O kaˈorip nangra cowa ka sahto saan o sinowayay, kawra kamayan a tanektek ko pakasoˈlin no falocoˈ nangra. Palinien to satapang a mafanaˈ to soˈlinay kimad, matongalay  ko pakasoˈlin nangra to mamalaˈosi ko mitokelan nangra! ‘Soˈlin matoˈasto’ cangra padadotocay milasil to ngangan ni Yihofa, mansa tada maolah ci Yihofa cangranan.—ˈOsien ko ˈOlic 92:12-15.

4. O maanan ko ngangaˈay pakalalok to matoˈasay a salikaka?

⁴ Ano matoˈasayto kiso, aka calemcem, maharatengay ni Yihofa ko kihcod nano demak iso. (Hipray 6:10) Padadotocay fanekfek kiso mirienang to mitosilay a tayal, pakahemekay to kakarayan Wama ita konini. Na misiˈayaway kiso to maamaan a sapalifet, iraay ko misemsemay a nalifetan, kawra padadotocay kiso mihadidi. Midofdofay kiso ato paˈading to moecelay palinian no Fangcalay Cudad, madimadiay milaheci to kalimlaan a tayal i likakawa no Kawas, pahatatanamayho to tao. ˈAdihayay ko kafalic no likakawa ni Yihofa, misaˈicelay kiso minanam. O roma salikaka micangacangay to mieminay to toki misakafah, kamayan kiso midama ato pakalalok cangranan. Mihaen kiso a madimadi, tada maolahay ci Yihofa tisowanan! Mikiˈokay Cingra ‘cowa ko mamiliyas to madimadiay a finawlan Ningra,’ mikiˈokayho saan ko sowal: “Tangasa i nika toˈas ato nika ˈofad namo, o dadipoten Ako kamo.” (ˈOlic 37:28; Isaya 46:4) Aka a o matoˈasayto kako, pakayni i likakawa ni Yihofa awaay ko epoc saan a miharateng. Tada kalimlaan kiso!

5. O matoˈasay salikaka hano aka miharateng to awaay ko sapadama no niyah saan hani?

⁵ O matoˈasay salikaka adihayay ko sapadama to likakawa ni Yihofa! Soˈlin cowato kalecad cangra to kapah adihay ko ˈicel, kawra halafinay mihecaan adihayay ko mataringay nangra a nalifetan, o kalimlaan a hafay konini. Soˈlinayto, itini adihayay pakayraan wa ngaˈay ci Yihofa padotoc a misaka dademak cangranan, dotoc nengnengen ita ko nolitengan ato aniniay a tinakoan.

6-7. Samanay ci Yihofa palifon to madimadiay midoko Cingranan a matoˈasay tamdaw? Tinakoen.

⁶ Ngaˈay kita mikitini Fangcalay Cudad maˈaraw ko adihayay ngaˈayay a taˈarawan nolitengan a sikawdan, itini katoˈasan a tatokian nangra kamayan fanekfek tawlik matayal saki Yihofaan. Tinakoen, itini 80 ko mihecaan ni Mosi, manilnilay ni Yihofa cingra malo  pairasolay ato ˈaˈideman no Israil tamdaw. O pairasolay a Taniil tahira i 90 ko mihecaan padadotocay mitaypiyaw ci Yihofaan a somowal. O tarokos ci Yohani micadaay to sakayat no Kawas a mitilid to Paˈarawan, mataˈlifayto ko 90 no mihecaan alatek.

⁷ Itini Fangcalay Cudad adihayayho ko cowa ka tada cingangan a madimadiay sikawdan, madoloay malawa no tamdaw, kawra kamayan misinanot ci Yihofa cangranan, hanaca pakayni ka madimadi nangra palifon cangranan. Tinakoen ‘moecelay soˈlinay ko falocoˈ’ a Simiyongan, kantangay ko pisowal no Fangcalay Cudad to demak ningra, kawra cipinangay ci Yihofa to nafalocoˈan ningra, ngaˈay maˈaraw ningra koya hofoc hananayho a Yisan, hanaca somowal to milingatay i wawa ato wina ningra a sapairasol. (Luka 2:22, 25-35) Iraho koya fafahiyan a pairasolay ci Anna, o maponengay cingra 84 ko mihecaan, ‘caay pisawad tayra fangcalay sefi,’ malecad o picerid ita mirienang to saˈopo anini. Mansa palifonen ni Yihofa cingra, paˈaraw cingranan to hofoc hananayho a Yisan. Pakayni ci Yihofaan, ci Simiyong aci Anna tada kalimlaanto!—Luka 2:36-38.

8-9. ˈAlomanay fafahiyan salikaka ikor no mapatay ko faˈinay samanay padadotoc a padama to likakawa ni Yihofa?

⁸ Anini a lintad, ˈalomanay matoˈasay salikaka madimadiay a midoko ci Yihofaan, patirengay to ngaˈayay taˈarawan no kaemangay salikaka. Nengnengen ko nalifetan no salikaka Rois Titoe. Itiniay i Kanata cingra, 21 ko mihecaan misatapangay malo mikiriwiˈay a misakafahay, ikor malacafayay to faˈinay ci Yohani malo milisoˈay ko tayal, ikor tayraay cangra i Pitil no Kanata matayal to 20 miheca. 58 ko mihecaan ni Rois i, mitahidangay ko salikaka cingranan ato faˈinay tayra i Okeran matayal. Sasamaan ko demak nangra hani? Matoˈasayto ko niyah wa saan cangra miharateng, eca ka malinah tayra roma kitakit han? Cowa. Micadaay cangra toniya satahidang, manilnilay ci Yohani malo Iing no Fenpo no Okeran. Ikor no 7 miheca mapatayay ci Yohani, kawra misaˈosiay ci Rois materek i katayalan. Nohatini 81 ko mihecaan ningra, padadotocay madimadi matayal i Fenpo no Okeran, tada maolahay ko itiraay a salikaka cingranan.

⁹ ˈAlomanay fafahiyan salikaka malecaday ci Roisan mapatay ko faˈinay ikor, o macadaay nangra a kaciharateng cowato kalecad o saˈayaway a adihay alatek, kawra o epoc nangra cowa kalowan. Adihayay a mihecaan midamaay cangra to faˈinay, nohatini padotocay a fanekfek midoko ci Yihofaan. Adihayay ko sapakalalok to kaemangay salikaka. Tada misaaretengay ci Yihofa minengneng toniya fafahiyan salikaka!—1 Timoti 5:3.

10. Patirengay ci Toni to maanan ngaˈayay taˈarawan?

¹⁰ ˈAlomanay madimadiay salikaka samanen taˈangayayto ko mihecaan, hato itira sanayto i piniwingan, kawra kamayan o kalimlaan cangra. Nengnengen tinakoan ni Toni. 1942  miheca 8 folad, itiniay Pisifaniya no Padaka micada to paputisem cingra, itiya 20 ko mihecaan ningra. Caka halafin, samanen manaˈayay cingra malasofitay mapalitay to tosa ira ko kalitosa a miheca. Ikor mararamoday cingra aci Sieta fafahiyan salikaka, mahofocay to cecay faˈinayan ato cecay fafahiyan a wawa, misongilaˈay cangra pasifanaˈ to wawa minanam to soˈlinay kimad. Ci Toni itini tolo kasakopang na malo tatiyakan a kantok (o misatenokay no malohemay malitengay), malo kantokayho no kasakilac taykay, itiniayho i kapalitan misikay to pacekiway ato saˈopo. Nohatini 98 ko mihecaan ningra, itiniayto i piniwingan, kawra cowa ka sasinoway sato a pahanhan, kamayan misarocod matayal saki Yihofaan, malacafay to salikaka no kasakopang a matayal.

11. Sasamaan kita ciharateng to itiniay i piniwingan a salikaka?

¹¹ Wa ngaˈay kita samaan paihkal to kaciharateng to itiniay piniwingan a salikaka hani? O mamisaˈicel ko malohemay malitengay padama cangranan mirienang to saˈopo ato kalacafay to kasakopang mitosil. Wa ngaˈay kita tayra milisoˈ cangranan, anca tano maˈaraway ko pising a soci masasowal cangranan. O kitiraan no roma salikaka a piniwingan mira:ayay to kopang, madoloay malawa no tamdaw, o kakiriwiˈen ita a ciharateng cangra. O roma salikaka pasangaray mihadak to demak no niyah, anca caay ka tatodong mihaen saan ko harateng. Ano licayen ita to tayal nangra saki Yihofaan a kahemekan nalifetan i saˈayaw, hanaca mihadidi a mitengil, wa adihay ko malifokay a epoc.

12. Itini kasakopang ita alatek iraay ko masamanay a salikaka hani?

¹² Itini kasakopang ita iraay ko halafinayto madimadi midoko ci Yihofaan a ngaˈayay taˈarawan alatek, mitongal kita to kafanaˈ cangranan, wa ira ko haepoc alatek. Cecay fafahiyan salikaka ci Haliyate, itiniay Niwcesi no Padaka i cecay kasakopang madimadiay midoko ci Yihofaan to pina poloˈ a mihecaan, ikor malinahay tayra i fafahiyan wawa a mikilomaˈ. O salikaka i faelohay kasakopang talaˈayaway a mafanaˈ cingranan, mitengil to pipasowal ningra to adihayay a nalifetan mitosil isaˈayaw, mahapinangay to kadofahay ko nalifetan ningra. Itini 1925 miheca mafanaˈ cingra to soˈlinay kimad, itiya miˈorongay cingra to sapiˈoraˈor a mitosil, misaday ano fahal saan itini kapalitan a milafin. Soˈlinay i, itini 1933 miheca kinatosaay mapalit to cecay lipay. Oya cowa pihakelong a faˈinay ningra makahiay midama cingranan, ano mapalit cingra pacafayay midimokos to tatolo a wawa. Malecaday ci Haliyatean a madimadiay matoˈasay citatodongay to kakangodoen ita!

13. Pakayni ci Yihofaan ato likakawa Ningra, hano kalimlaan ko matoˈasay a salikaka?

¹³ Pakaynien ci Yihofaan ato likakawa Ningra, kalimlaan ko matoˈasay a salikaka. Pakaˈaraway cangra samanay ci Yihofa palemed toniya likakawa Ningra ato cangranan, mikitiniayho isaˈayaw a raraw minanam to adihayay kalimlaan a sapasifanaˈ. O mahaenay a salikaka malecaday ‘o nemnem no taneng,’ o mamisongilaˈ kita minanam cangranan. (Taneng 18:4) Ano talaˈayaw kiso a mafanaˈ cangranan, wa patongal a paˈicel to pakasoˈlin no niyah, ngaˈayho mikitira cangranan adihay ko mananamay!

14. Itini Limoˈot 32:7 pakalalokay to kaemangay samaan ko demak?

¹⁴ O tatalaˈayaw kita masasowal to matoˈasay a salikaka. (ˈOsien ko Limoˈot 32:7.) Maapohayto ko mata nangra alatek, matayoayto  ko kawing, marihawayto ko takolaw, kawra iraay ko kaemangay falocoˈ nangra, hanaca mikitini ci Yihofaan malifokay ko ‘makapahay ngangan.’ (Patnakay 7:1) Haratengen ko lalangian ni Yihofa a misalimla cangranan, padotoc a mikangodo cangranan. Wa ngaˈay kita pasayra ci Ilisaan a minanam, tahira saikoray romiˈad kamayan materek i tihi ni Iliya, kinatolo a pasowal ci Iliyaan: ‘Caay ko mamiliyas kako tisowanan.’—2 Hongti 2:2, 4, 6.

15. Ngaˈay kita milicay to matoˈasay a salikaka to manan salicay?

¹⁵ Wa mikifalocoˈ kita a ciharateng to matoˈasay a salikaka, tano mikangodoay a waywayan a milicay cangranan. (Taneng 1:5; 20:5) Tinakoen, ngaˈay kita milicay: ‘Itini kaemang kiso hano pakasoˈlin to mahelaay no niyah ko soˈlinay kimad hani? O manan a nalifetan patongalay to ngaˈayay kalalaˈed iso aci Yihofaan hani? Padadotoc kiso mahemek a matayal saki Yihofaan, o manan ko pakayraan hani?’ (1 Timoti 6:6-8) Dotoc misongilaˈ mitengil to pihadak nangra to nalifetan no niyah.

16. Masasowal ko kaemangay to matoˈasay tamdaw, o mamilifok a tatosa to maanan a epoc hani?

¹⁶ Masasowal kiso ato matoˈasay salikaka, wa milifok to sapakalalok a tatosa. (Loma 1:12) Wa matongal ko pakasoˈlin iso ci Yihofaan mamidimokos to finawlan no Niyah, o mamatinako no matoˈasay tamdaw ko olah iso ato pikangodo. Ano pasowal cingra tisowanan to samanay ci Yihofa palemed cingranan i saˈayaw i, o lalipahak ko falocoˈ ningra.

17. Madimadiay ci Yihofaan a tamdaw hano wa matongal ko kafangcal hani?

¹⁷ O papotalay a makapah wa palidlid saan a malahdaw, kawra itini pinengneng ni Yihofa, oya madimadiay Cingranan a tamdaw matongalay ko kafangcal. (1 Tisalonika 1:2, 3) Misamanay? Samanen padadotocay cangra midofdof to sakayat no fangcalay saocor, palahad to adihayay makapahay a capeling. Ano matongal ko kacipinang ita cangranan, mikangodo cangranan, pasayra cangranan minanam, wa matongal ko pihapinang to soˈlinay matekesay a ˈodo cangra!

18. Dotoc lalakaw wa milengo to maanan?

¹⁸ O kaemangay tamdaw wa misalimla to matoˈasay a tamdaw, o matoˈasay a tamdaw wa misaareteng to kaemangay tamdaw, mihaen o pakasoˈlinay falocoˈ no kasakopang wa matongal a tanektek. Dotoc lalakaw wa milengo, o matoˈasay salikaka sasamaan ko demak paihkal to misaaretengay cangra minengneng to kaemangay tamdaw i kasakopang.