1, 2. 1) ¿Chem raquiduamanieafiyiñ tati pu fütaqueche? (Proverbios 16:31). 2) ¿Chem ramtun inaduamaiñ tüfachi troquiñ mu?

FENTREN diamante mülequei tranalelu mapu mu. Huelu feitachi diamante petu liftungelai, feimu fente huilüflai ca afmatufalngelai. Fentren che peafui rume ñi tranalen feitachi diamante, huelu rupaquei müten, ngüneduamquelaingün ñi fente falingen.

² Feichi diamante reque, taiñ pu peñi ca pu lamngen füchalelu rume falin-ngeingün. Biblia trürümquefi tañi lingarcülechi lonco quiñe corona reque (papeltunge Proverbios 16:31; 20:29). Huelu iñchiñ ngüneduamlayafuiñ rume ñi fente falin-ngen engün. Pu huechequeche pengelelfile tati pu füchaqueche ñi falintufiel engün, rume quelluafeyu. Feitachi troquiñ mu ngüneduamaiñ cüla ramtun. 1) Jehová, ¿chemu falintuquefi tati pu peñi ca pu lamngen füchalelu? 2) Tüfachi pu peñi ca pu lamngen, ¿chumngelu fente falin-ngei Jehová ñi troquiñche mu? 3) ¿Chumafuiñ taiñ doi cüme quimafiel engün fei taiñ quelluaeteu?

3. ¿Chemu Jehová falintuquefi tati pu fücha? (Salmo 92:12-15).

³ Jehová mu rume falin-ngei taiñ pu peñi ca pu lamngen füchalelu. Quisu peñmaquefi tañi piuque engün, feimu falintuquefi tañi chumngen. Pu füchaqueche fentren tripantu  yeniepelai tañi cüdahuelfiel Jehová, feimu nieingün fentren quimün. Eluule engün tañi rulpalelafiel tañi quimün tati pu huechequeche, Jehová rume ayühuai (Job 12:12; Prov. 1:1-4). Jehová ca falintuñmaquefi tañi aguantan engün (Mal. 3:16). Quisu engün huesaque dungu mu rupaquefuingün, huelu fentecünulaingün tañi maneluhual Jehová mu. Doi rupayechi tripantu mu, doi maneluucülequeingün Jehová ñi feipicünuel mu. “Füchalele rume engün” fentecünuquelai tañi amuldungual, feimu Jehová rume piuqueyeyu engün (papeltunge Salmo 92:12-15).

4. ¿Pu füchalelu chem mülefui ñi loncontucual?

⁴ Eimi füchalmi rume, Jehová petu falintuñmaeimu com tami femqueel tami mongen mu (Heb. 6:10). ¿Chem dungu? Tami ayühunquechi amuldunguquen mu. Huesaque dungu rupaqueimi chi, huelu cüme chaftufimi. Cafei feyentuqueimi ca incañpequefimi chem pin ta Biblia. Cüme entuqueimi fillque cüdau tami elfalcünungeel ca adümelfimi ta caquelu. Cafei calerumetun mu quiñe dungu Jehová ñi troquiñche mu, inafemquefimi. Eimi ca quelluquefimi ca yafültucufimi tati pu hunelequelu amuldungun mu. Eimi com tami mongen mu püntütripaquelaimi ta Jehová mu, feimu Jehová rume piuqueyeimu ca turpu elcünulayaimu (Sal. 37:28). Eimi feipieimu Chau Dios: ‘Füchalmi rume, iñche fentecünulayan tañi yafültucuquefiel’ (Is. 46:4). Huelu eimi füchalmi, falinolu troquihuafuimi trahunche mu. Huelu feingelai. Rume falin-ngei tami femqueel ti trahunche mu.

5. ¿Chem mülei ñi loncontucual pu füchalelu?

⁵ Tati pu fütaqueche müte nehuen-ngehuelai chi, huelu nieingün fentren quimün. Feimu Jehová adnieafeyu engün tañi femal falinque cüdau tañi troquiñche mu. ¿Chumngechi quimiyiñ tüfa? Peaiñ ñi rupan quiñeque che fütra cuifi mu mülelu ca famülque mu.

6, 7. Jehová, ¿chumngechi pengelelfi tañi falintufiel ta quiñeque füchache?

 ⁶ Biblia pengeli quiñeque che füchalu engün rume, fentecünulaingün tañi poyeafiel ta Jehová. Moisés epe nielu 80 tripantu, Jehová ñi profetangerpui ca loncolerpui Israel troquiñche mu. Daniel doi 90 tripantu nielu rume, petu profetangefui. Ca tati apostol Juan doi 90 tripantu nielu rume, adnieyu Jehová ñi huirintucual ti lifru Apocalipsis.

⁷ Cuifi mu quiñeque che poyequefilu Jehová müte quimngequelafui, huelu Jehová mai ta quimniefeyu feimu cümelcaeyu. Por ejemplo, Biblia mu müte nütramcangequelafui ta Simeón mu, huelu Jehová cüme quimniefeyu. Doi mai elueyu ñi quimafiel ta Jesús pichicalu ca elueyu ñi feipicünual falinque dungu ñi rupayal (Luc. 2:22, 25-35). ¿Chem piafuiñ ti profetisa Ana mu? Quisu rumel amuquefui tati templo meu, fei Jehová cümelcaeyu. 84 tripantu nielu, Chau Dios elueyu ñi quimafiel ta Jesús pichicalu. Simeón engu Ana, rume falin-ngefui ta Jehová mu (Luc. 2:36-38).

8, 9. ¿Chumqueingün taiñ pu lamngen lantulu?

⁸ Famülque mu, pu füchaqueche tañi cüme femquen mu inayentuafeyu pu huechequeche. Inaduamaiñ ñi rupan taiñ lamngen Lois Didur. 21 tripantu nielu taiñ lamngen hunelerpui amuldungun mu Canadá mapu mu. Fei tañi füta engu John pingelu, fentren tripantu mu huitrancontuquefuingu pu trahunche. Rupachi tripantu mu mangelngeingu ñi cüdahual Betel Canadá mapu mu. Doi 20 tripantu cüdahuingu fei mu. Fei Lois nielu 58 tripantu, tañi füta engu mangelngeingu ñi amual Ucrania mapu meu. ¿Chem pingu chi? ¿“Müna füchayu tayu amual caque mapu” pipeingu mai? Femlai. Ayühunquechi amuingu. Fei John feipingei ñi coneltual tati Troquiñche Adcünuquelu Betel Ucrania mapu mu. Regle tripantu rupalu, John perdei. Fei Lois eluhui ñi mülenagal ta Betel mu. Fachantü taiñ lamngen Lois 81 tripantu niei ca petu cüdaucülei Betel mu. Com pu betelita rume piuqueyeyu engün.

⁹ Taiñ pu lamngen lantulu engün rume petu falin-ngeingün. ¿Chumngelu? Cuifi mülequefulu tañi füta engün, quelluntucuquefingün. Huelu lantulu, fentecünulaingün tañi serfiafiel ta Jehová (1 Tim. 5:3). Huelu fei ca müten no. Ca quelluquefingün tati pu huechequeche, feimu Jehová rume falintueyu engün.

10. Taiñ peñi Tony, ¿chemu inayentufali?

¹⁰ Taiñ pu peñi ca pu lamngen füchalelu ca pepi tripaquenolu tañi ruca mu, rume falin-ngeingün. Inaduamaiñ ñi rupan taiñ peñi Tony, fei mülei quiñe hogar de ancianos mu. Nielu 20 tripantu, Tony fautizahui. Rupalu ta antü, taiñ peñi feipingei  ñi conal servicio militar mu. Huelu taiñ peñi pilai ñi conal, feimu epu tripantu ca rangiñ presuconcülefui. Fei Tony cureyerpufi ta Hilda ca nierpuingu quiñe fotüm ca quiñe ñahue, fei enseñalfingu ñi poyeafiel ta Jehová. Taiñ peñi cüla trahunche mu adcünuquefui ti troquiñ loncolelu. Cafei loncolequefui ñi adcünual fütraque trahun. Taiñ peñi amuquefui ta carcel mu, fei mu enseñalmequefui tati pu che ca adcünuquefui quiñeque trahun. Feula taiñ peñi Tony 98 tripantu niei, fei fentecünulai tañi poyeafiel Jehová tañi pu peñi ca pu lamngen engün.

11. Pu fücha tripahuenolu ruca mu, ¿chumngechi pengelafuiñ taiñ falintufiel engün?

¹¹ Iñchiñ, ¿chumngechi pengelafuiñ taiñ falintufiel pu füchalelu tripahuenolu ruca mu? Por ejemplo tati pu loncolelu quelluafeyu tañi yeaeteu ta trahun mu cam ñi allcütual tañi ruca mu. Ca quelluafeyu ñi amuldungual engün. Cafei iñchiñ pemeafuiñ engün cam mütrümafuiñ. Turpu ngoimalayafiyiñ taiñ pu fücha tripahuenolu ruca mu. Quiñeque füchaqueche ayüquelai ñi nütramcayal quisu mu. Huelu ramtucafiliyiñ ñi rupan engün ca cüme allcütufiliyiñ, müna quelluafeiñmu.

12. Taiñ trahunche mu, ¿inei am peafuiñ?

¹² Taiñ trahunche mu peafuiñ quiñeque peñi, lamngen füchalelu inayentufalngelu. Peaiñ ñi rupan taiñ lamngen Harriette pingelu. Fei fentren tripantu mu cüdahuelfi Jehová, Nueva Jersey huaria mu. Rupachi tripantu mu taiñ lamngen müleputui tañi domo püñeñ ñi ruca mu. Fei tañi hue trahunche mu pu peñi ca pu lamngen eluhuingün ñi quimafiel, fei inaduamfingün ñi fente cüme maneluuquen Jehová mu. Taiñ lamngen nütramcafi tati hue trahunche chem ñi rupan hue amuldungulu 1925 tripantu püle. Feichi mu tripan mu ñi amuldungual taiñ lamngen presuntucungerumeafui, feimu rumel miyahulquefui tañi cepillo de dientes. 1933 tripantu mu, epu rupa carceltucungefui. Feichi mu tañi füta testigongenolu rume, quelluqueyu ñi dapiafiel tañi pu pichiqueche. Harriette reque, fachantü fentren peñi ca fentren lamngen füchalelu fentecünuquelaingün ñi poyeafiel Jehová, feimu felei taiñ falintuafiel engün.

13. Pu füchalelu, ¿chumngelu falin-ngeingün Jehová ñi troquiñche mu?

¹³ Taiñ pu peñi ca pu lamngen füchalelu rume falin-ngeingün Jehová ñi troquiñche mu. Quisu engün peingün chumngechi ñi quellueteu ta Jehová ca chumngechi ñi quellufiel tañi troquiñche. Tañi huelulcahun mu quimingün tañi femhuenoal engün, fei doi quimchengerpuingün. Eluhuaiñ taiñ nütramcayafiel engün femngechi taiñ llohual quimün (Prov. 18:4). Eluuliyiñ taiñ cüme quimafiel, doi maneluhuaiñ ta Chau Jehová mu ca quimürpuaiñ fentren cümeque dungu quisu engün mu.

14. Ñi feipin Deuteronomio 32:7, ¿chumafui pu huechequeche?

¹⁴ Eimi hueche, eluunge tami nütramcayafiel pu füchaqueche (papeltunge Deuteronomio 32:7). Pu füchaqueche nehue pelohuelai, matu trecahuelai ca nehuentu dunguhuelai. Femfulu rume engün, eluucüleingün tañi quelluntucual ca Jehová rume falintuñmaeyu com ñi femqueel mu engün (Ecl. 7:1). Raquiduamnge chumngelu falin-ngeingün ta Jehová mu, fei eimi ca falintunieafimi engün. Inayentuafimi ñi femün ta Eliseo. Petu ñi yengenon  cañpüle ta Elías, Eliseo püntütripalai ta quisu mu. Fei cüla rupa feipifi: “Eimi ta quisucünulayayu” (2 Rey. 2:2, 4, 6).

15. ¿Chem ramtuafuiñ tati pu fütaqueche?

¹⁵ Piuqueyenquechi ramtuafiyiñ quiñeque dungu tati pu fütaqueche (Prov. 1:5; 20:5; 1 Tim. 5:1, 2). ¿Chem dungu? Ramtuafuiñ: “Huechengelu eimi, ¿chumngechi quimimi ñi rüf dungungen Jehová ñi dungu? Tami chaftufiel fill huesaque dungu, ¿chumngechi quellueimu tami doi fülconal ta Jehová mu? ¿Chem quellueimu tami ayühunquechi serfinieafiel Jehová?” (1 Tim. 6:6-8). Ramtufiliyiñ engün, cüme allcütuafiyiñ chem taiñ feipiaeteu.  

16. Nütramcale quiñe fütache quiñe hueche engu, ¿chumngechi quelluhuafuingu?

¹⁶ Quiñe fütache ca quiñe hueche nütramcale, huelucontu yafültucuhuafuingu (Rom. 1:12). Femngechi dungu rupale, ti hueche quimtucuai ta Chau Jehová cuñiutucuquefi tañi pu che. Tati fütache inaduamai tañi piuqueyeniengeel, femngechi ayühunquechi nütramcayafi chumngechi tañi cuidaqueteu ta Jehová.

17. Rupan mu rume ta tripantu, ¿chumngelu doi falin-ngeingün pu fütaqueche?

¹⁷ Pu püntütripaquenolu Jehová mu doi falin-ngetuingün rupan mu rume ta tripantu (1 Tes. 1:2, 3). ¿Chemu feipiafuiñ? Com ñi mongen mu eluuqueingün ñi adnieaeteu ta Jehová ca ñi quelluaeteu ñi doi cümechengeal engün. Doi quimfiliyiñ tati pu fütaqueche, doi falintuafiyiñ engün.

18. ¿Chem inaduamaiñ cüpalechi troquiñ mu?

¹⁸ Tüfachi troquiñ mu peiñ pu huechequeche mülei ñi falintuafiel pu fütaqueche, femngechi cümelcaleai ti trahunche. Huelu cüpalechi troquiñ mu, peaiñ chumngechi pu fütaqueche falintuafui tati pu huechequeche.