1-2. (a) Raris Amsal 16:31 ya, moḇsa komam naek srar ḇeḇesinan kwar sya rai? (b) Fakfuken rikyor rosai na kawos ro farkarkor ineni?

WAMBRAN farma ḇe taman kota ḇero Arkansas, Amerika Serikat ido, imbude na wasrow berlian ro saprop na. Ḇape, imbude na mam na ḇa kukro berlian ani ḇyarek ro karui na. Ḇeramuma syano sakmnis ra Au soḇerada ḇerlian nasyaḇa. Inja, simbran pdef na.

² Rupa rairi, naek srar ḇeḇesinan kako simnis ra berlian ani. Sipyum fafayaḇa. Refo ḇyukimnis pik ḇepyoper imnis wower. (Wasya Amsal 16:31; 20:29) Ḇape faḇye, nanoido koḇefnder si. Ma fyor kofarkor ro si ido, na kosmai roi oso ḇepyum syadi ro berlian. Inja ro farkarkor ine, nari kawos fakfuken rikyor: Rosai ḇefnai fa Yahwe ḇyesyowi kaku sinan ḇesouser sya? Rosai fararur sena ro Yahwe organisasi Ḇyedi? Rosai na kofrur kaku ya insama kosmai fainda ro nyan ḇepyum sena ine?

3. Raris Mazmur 92:12-15 ya, rosai ḇefnai fa naek srar ḇeḇesinan sya sesyowi kaku ro ḇarpon Yahwe I?

³ Naek srar koḇesya ḇeḇesinan kwar sima Allah Yahwe ḇyesyowi kaku si. Myambir pyum kaku si. Ifawi mnis rari-rari ḇepyum sena, ma ine nemaeja kaku faro I. Sima sna fawawi snar suffarmyan Yahwe I fyoro kwar kuker souser ma imarisen fyor sḇuk fawawi sena faro ḇebabo sya. (Ayb. 12:12; Ams. 1:1-4) Yahwe ḇyesyowi si  kako snar sifarmku. (Mal. 3:16) Sima sismai samswen nabor kwar, ḇape kakyar sena faro Yahwe nasambraḇ pdef. Kirine, saneraro sena nasnai kaku ḇardibur ro ḇepon naiwara fafisu sfarkor randak kakaku ya. Yahwe iswar si snar sesinan kwar ḇape sbaryas kaker snonsnon Ḇyedi.​—Wasya Mazmur 92:12-15.

4. Naek srar ḇesinan kwar sine rosai nari ḇefrur sneprei si?

⁴ Ḇesinan kwar ido, wakyar snar rosai wafrur kwar na Yahwe iswarepen na. (Ibr. 6:10) Kma koḇedi ro nanggi imarisen snar kuker raryaḇ wabaryas. Wafarmku ro farawrowes nabor kwar ḇefrur nanoido ḇesanekar. Waso kaku farkankin Refo ma wabriwarek na, wakamar fararur ḇemarḇak ma farkor snonggaku ḇesesya. Besewar kaku kwar fa waso fararwe nabor ro Yahwe organisasi Ḇyedi. Waksowarpu ma wafrur raryaḇ snonggaku ḇemarisen ḇefarmyan ro oras nakam. Allah Yahwe iswar kaku Au snar soasuser Bena! Ḇyeasas ḇo doḇe, ”Nari ipok ibur manfamyan ḇesouser Ḇyesi ḇa.” (Mz. 37:28) I kako byuk kakyar ḇe Au: ”Isof ro pik Bena napyoper, nari yarous au.” (Yes. 46:4) Inja, kwara awer ḇo woḇe, ’Ayama yaḇe mansar insar kwar inja, yakḇefandun ḇa.’ Waswarepen, nwa fararur ḇefandun kaku ro Yahwe organisasi Ḇyedi!

5. Roi risai ḇeḇesinan sya siswarepen kaku na?

⁵ Ḇeḇesinan sine sefandun kaku ro Yahwe organisasi Ḇyedi. Imbude sisambraḇ raris ro ḇepondi na ḇa rariryano, sna fawar nabore, ma Yahwe ḇyepake pdef si fa sifrur fararur ḇebor na. Mgorama komam contoh ya, ro fafisu ḇepon naiwara isof ro babo kirine.

6-7. Buk contoh ro Refo ḇekur ḇeḇesinan ḇesmai barakas sya snar soasuser sena.

⁶ Ro Refo, contoh nasya ro Yahwe manfamyan Ḇyesi ḇeyuffarmyan Yahwe ro fafisu sesinan kwar. Imnis ra, Moses ḇyeumur indokada taun ri 80 fafisu ḇye Yahwe nabi Ḇyedi ma ḇyeḇekinfir ḇe manfarkin er Israel. Yahwe ḇyepake kako  Daniel fa ikofenḇadir anun ro I fyor Daniel imbude ḇyeumur 90-an. Manwawan Yohanes ikako imbude ḇyeumur 90-an fyor rur ḇesren fyarkin i fa fyasepen syap Wahyu.

⁷ Refo fyawar kako Allah manfamyan ḇesouser Ḇyesya. Imbude sakmambir kuf si ḇa, ma imbude na kofawi manggun si ḇa. Ḇape, Yahwe myam kaku soasuser sena ma ḇyebarakas si. Imnis ra Simeon, sap kako i ḇe ”snonkaku ḇekyar faro Allah ma ḇenapes”. (Luk. 2:22, 25-35) Fawar ḇyena sakfas naro Refoya ḇa, ḇape Yahwe myambir pyum kaku i. Simeon ismai syowi fa dakmam kapira Yesus ma ḇyeḇardi faro kapira ani ma snari. Ono kako Nabiah Hana, ḇyekabom kwar. Ḇyeumur taun ri 84 ḇape ryama ker ḇe bait ya, ras nakam ryama ker fa ḇyeari. Bon ḇyena iso, ras oso fafisu ryama ro bait ya, dakmam kapira Yesus kako. Inema barakas ḇeba kaku. Simeon ma Hana suḇesyowi kaku ro Yahwe ḇarpon Ḇyedi.​—Luk. 2:36-38.

8-9. Rosai Imbesrar Didur ifrur kaker na ro fararmyan ḇyena ḇe Yahwe fafisu swari imarbur i kwar?

⁸ Ro baboine kako naek srar ḇeḇesinan kwar sya ono sisya sḇuk nyan ḇepyum faro naek srar ḇebabo sya. Mampan kada fawar ro Imbesrar Lois Didur. Fafisu insape ḇyeumur taun ri 21 ya, dakḇe perintis istimewa kwar ro Kanada. Ḇarpur ya, swari John i, susmai fararur fa sura ḇe moḇ-moḇ na ro swaf taun ḇe taun. Ramnai, sufararur ro Betel Kanada indokada swaf taun syadi ri 20. Ma fafisu Lois ḇyeumur 58, sor John su fa suyuffarmyan ro Ukraina. Moḇsa sukara roi ine rai? Sukara ḇo suyoḇe suḇe mansar insar kwar inja suyuffarmyan awer ro sup ḇesena ke? Aroḇa. Sumarisen susmai fararur ani, ma John skanow i ḇe anggota Panitia Cabang ro diwa. Taun difik ḇyenande mura, John ryoe, ḇape Lois dun snemuk fa duffarmyan pdef ro diwa. Kirine, Lois dakḇe umur taun ri 81 kwar. Duffarmyan Yahwe kaker fnoḇek kina Betel ro Ukraina, ma siswar kaku i.

⁹ Imbesrar ḇekabom sya ḇemnis ra Lois i imbude smam si ḇa raris snonswa sesi sisya kaker. Ḇape, ine nfasnaiḇair ḇa snar semaeja wer ḇa. Yahwe ḇyesyowi kaku imbesrar ansine snar sisaramper siswasi ro taun ḇe taun, ma isof ro kirine suffarmyan kuker soasuser. (1 Tim. 5:3) Sikako sisambraḇser naek srar ḇebabo sya.

10. Rosai na kofarkor ro Tony nyan ḇepyum ḇyena?

¹⁰ Naek srar ḇeḇesinan sya sia sḇarek ro sor ḇe panti jompo, sikako semaeja kaku. Imnis ra, Tony. Ḇyebaptis ro Pennsylvania, Amerika Serikat, ro paik Agustus 1942, fafisu ḇyeumur taun ri 20 ya. Fyoro wer ḇa, ismai ro bui taun disuru syadi  snar imewer dakḇe tentara ri. Swari Hilda i, sufaduru romawa suḇesuya ro kakaku ya. Tony duffarmyan ro sidang rikyor kwar, dakḇe pengawas umum (kirine kor naḇe koordinator badan penatua). Fyor ker nayafa dakḇe pengawas sarawrow wilayah kako. Ro swaf ḇeḇeso, dakrama ḇe bui fa fyarkin fananjur ma farkarkor Refo ro bui. Kirine, Tony dakḇe umur taun ri 98 kwar, ḇape iryaḇ ḇesya kwar. Ḇyesewar kaku fa duffarmyan Yahwe kuker samambraḇ ḇyena fnoḇek naek srar ro sidang ḇyedi!

11. Rariso kofasnai snar koḇesyowi kaku naek srar ḇesinan kwar sya?

¹¹ Snar koḇesyowi naek srar ḇeḇesinan kwar sya ḇeḇarek ro panti jompo ḇeyemir ro diwa ḇaido ḇeḇarek kuker kina ḇeḇesaksi ḇa sya. Moḇsa kofrur na rai? Bisa ido, penatua sya sifnoḇek si fa sakso fananjur ma sakbaryas. Bisa komamfar si ḇaido koḇe video call kuker si insama sifawi kofandun si. Ḇefandun ya kako imbe komam eḇesinan ansine ḇeḇarek binggwan ro moḇ sidang sroro ya. Kopok koḇefnder awer si. Ḇape, imbude sia sḇaḇir napyum ḇa ḇaido manggunsi simewer sfawar roi ḇekur si na. Inja, koiso na ḇesewar fa ḇefuken si. Ramnai, warower pyum si fyor sfawar raryaḇ sena ro fararmyan faro Yahwe.

12. Rosai na kosmai ya fyor kobuk swaf koḇena fa kokimambir naek srar ḇeḇesinan kwar ro sidang ya?

¹² Ro sidang koḇedi, imbude naek srar ḇesinan sya sḇuk nyan ḇepyum kaku. Ḇape, insape kofawi na fyor kobuk swaf koḇena fa kokimambir si. Imbesrar oso ḇenir Harriette duffarmyan Yahwe I ro swaf kawan kaku kwar ro sidang ḇyedi ḇero New Jersey, Amerika Serikat. Ḇarpur ya, iburda ḇyarekus inai ḇyani. Imbo, naek srar ro sidang ḇebabo ḇyedi sḇesewar fa smambir pyum i. Insape sifawi kako snar Harriette i nyan ḇepyum ḇyena nemaeja kaku. Harriette syambraḇser si kuker fyawar fararmyan ḇyena ro ḇepon naiwara, fyor fyarkor kakaku ro taun 1920-an. Ro fafisu ani, fyor imbe byaryas ido na dun sikat gigi ker fa byukimamwareki fyor sfor i. Ma kaku, snar ro taun 1933 ya, sfor i rarwan risuru ma syun ro bui minggu swaf oser. Swari ima dakḇe Saksi ḇa, ḇape ifnoḇek Harriette kuker myam romawa rikyor suḇeskoya ḇekasun kaker rofyor Harriette ismai ro bui. Imboḇae, sinan ḇesouser sya raris Harriette i na koḇesyowi kaku si!

13. Rosai ḇefnai fa naek srar koḇesya ḇesinan sya sima sifandun kaku?

¹³ Naek srar ḇesinan kwar sine sifandun kaku faro Yahwe ma organisasi Ḇyedi. Smam ro manggunsi kwar rariso Yahwe ḇyebarakas organisasi Ḇyedi ḇesya kwar, ma sḇaḇir ro manggunsi kako Yahwe ḇyebarakas si ro kenem sena. Naek srar ḇeḇesinan kwar ansine sismai farkarkor ḇekakur ro sasar sena kwar. Sima ”knam ro fawawinanem” sirya, inja ḇesewar kaku fa farkor ro fawar sena. (Ams. 18:4) Buk swaf Beja fa mambir pyum si ido, nari kakyar Bena syambraḇ syadi ma bisa wafarkor roi nabor ro si!

14. Imnis Ulangan 32:7 ya, rosai bisa naek srar ḇebabo sya sifrur na?

¹⁴ Wor ḇesinan sya fa mgokain mgofarfyare. (Wasya Ulangan 32:7.) Imbo, na simgasna imbude nasnai wer ḇa kwar,  sispak wer ḇa, ma sawos ido mgarem sena naba kuf ḇa. Ḇape sima rya sbabo kaker, ma sna ”snonsnon ḇepyum” kwar ro ḇarpon Yahwe I. (Pkh. 7:1) Waswarepen rosai ḇefnai fa Yahwe myam si ido ḇyesyowi kaku si. Fasnai pdef snar ḇesyowi kaku si. Wasofarari Elisa i. Imarisen ḇyekayamyam kuker Elia i ro ras ḇepupes fyor suḇesisye ḇaime. Isof ro rarwan rikyor Elisa ikofen radine, ”Nari yabur Amber au ḇa.”​—2 Raj. 2:2, 4, 6.

15. Rosai na kofuken ro naek srar ḇesinan kwar sya?

¹⁵ Fasnaiḇair faro naek srar ḇesinan sya snar imbe mambir pyum si. (Ams. 1:5; 20:5; 1 Tim. 5:1, 2) Inja, bisa kofuken si. Imnis ra, kofuken rosai ḇefrur ro fafisu iwara sfawi inema kakaku rirya? Pengalaman rosai ḇefrur si fa sfanam syadi faro Yahwe I? Roḇaido kofuken rosai ḇefrur fa seaski pdef ro fararmyan sena faro Yahwe I? (1 Tim. 6:6-8) Ramnai, warower roi sfawar na.

16. Kokain kofarfyar kuker naek srar ḇeḇesinan sya ido fainda rosai na kosmai na?

¹⁶ Naek srar ḇebabo mgoya, mgokain mgofarfyar kuker naek srar ḇesinan kwar sya ido, nari mgo kuker si mgosmai fainda kame. (Rm. 1:12) Nari nafrur mgokyar kaku snar Yahwe myamfaduru manfamyan ḇesouser Ḇyesi, ma faro naek srar ḇeḇesinan kwar sine nari sḇaḇir koswar si. Na simarisen sfawar moḇsa Yahwe ḇyebarakas si kwar ro fafisu ine.

17. Rosai ḇefnai fa naek srar ḇeḇesinan kwar sine sidoser ro Yahwe mamam Byedi?

¹⁷ Koḇesinan kwar ido na kodoser wer ḇa, ḇape snonggaku ḇesouser faro Yahwe sima sesinan kwar raryano sidoser kaker ro Yahwe mamam Byedi. (1 Tes. 1:2, 3) Rosai ḇefrur ya? Snar ro swaf taun ḇe taun, sfarkor fa sifrur fararwe ma seḇefrur sren kuker Allah rur ḇesren Ḇyedi. Komambir pyum naek srar ḇeḇesinan kwar sine, ma kofarkor nabor ro si ido, na kofawi kaku snar semaeja kaku!

18. Rosai nari kawos ro farkarkor ḇerama ya?

¹⁸ Sidang nari nasambraḇ fyor naek srar ḇebabo ma ḇeḇesinan sya sesyowi yae si. Inja, ine faro ḇebabo sya sesyowi ḇeḇesinan sya monda ḇa. Ro farkarkor ḇerama ya, nari kawos rariso naek srar ḇeḇesinan sya bisa sesyowi ḇebabo sya.