1-2. (1) Folem Ol Proveb 16:31, ?yumi mas gat wanem tingting long ol olfala brata mo sista? (2) ?Long stadi ya bambae yumi ansarem wanem kwestin?

LONG Yunaeted Stet, i gat wan pak o ples blong spel we i gat ol daeman long hem. Be from we ol daeman ya oli luk olsem ol ston nomo, plante man oli no luksave mo oli wokbaot bitim sas ston ya.

² Ol olfala brata mo sista oli olsem ol daeman ya, oli sas. Baebol i komperem waet hea se i olsem hat blong king. (Ridim Proveb 16:31; 20:29) I isi nomo blong yumi no luksave se oli sas. Ol yangfala we oli luksave se ol olfala ya oli sas, oli save kasem samting we i gud moa i bitim ol rij samting. Long stadi ya, bambae yumi ansarem tri kwestin: ?From wanem Jehova i luk ol olfala brata mo sista se oli sas? ?From wanem oli impoten insaed long oganaesesen blong Jehova? ?Yumi save mekem wanem blong lanem samting from eksampol blong olgeta?

3. Folem Ol Sam 92:12-15, ?from wanem ol olfala oli sas long ae blong Jehova?

³ Ol olfala brata mo sista oli sas long ae blong Jehova. Hem i savegud se oli wanem kaen man, mo hem i tinghae long ol gudfala fasin blong olgeta. Hem i glad taem ol olfala oli pasem waes we oli kasem long olgeta yia we oli mekem wok blong hem, i go long ol yangfala. (Job 12:12; Prov. 1:1-4) Mo tu, Jehova  i glad long fasin blong olgeta blong stanap strong. (Mal. 3:16) Oli bin kasem sam trabol long laef blong olgeta, be yet oli holemtaet strong bilif we oli gat long Jehova. Hop blong olgeta long saed blong fiuja i kam moa strong i bitim faswan taem we oli lanem trutok. Mo Jehova i lavem olgeta from we oli gohed blong talemaot nem blong hem, “nating se oli kam olfala.”—Ridim Ol Sam 92:12-15.

4. ?Jehova i mekem wanem promes we i save enkarejem ol olfala brata mo sista?

⁴ Sipos yu stap kam olfala, tingbaot se Jehova i rimemba ol wok we yu bin mekem bifo. (Hib. 6:10) Yu yu wok strong blong sapotem wok blong prij, mo hemia i mekem Papa blong yumi long heven i glad. Yu stanap strong long plante trabol, nating se sam long olgeta i mekem yu harem nogud, yu difendem trutok blong Baebol, yu mekem ol impoten wok insaed long oganaesesen, mo yu trenem ol narafala. Yu mekem bes blong yu blong folem ol jenis we oganaesesen blong Jehova i mekem. Yu sapotem mo enkarejem olgeta we oli mekem wok blong Kingdom fultaem. Jehova God i lavem yu tumas from we yu holem strong long hem. !Hem i promes se “bambae hem i no lego ol man blong hem we oli holemstrong”! (Sam 37:28) Hem i mekem promes ya tu se: “Bambae mi mi stap lukaot gud long yufala gogo kasem we hea blong yufala i kam waet.” (Aes. 46:4) Taswe i nogud yu gat tingting ya se from we yu stap kam olfala, yu no moa impoten insaed long oganaesesen blong Jehova. !Yu yu impoten tumas!

5. ?Ol olfala brata mo sista oli mas tingbaot wanem?

⁵ Ol olfala oli save givhan long plante defren rod. Nating se maet oli no moa gat paoa olsem bifo, be oli gat plante ekspiriens we oli kasem long olgeta yia we i pas. Jehova i save yusum olgeta long plante defren rod, olsem we bambae yumi luk long eksampol blong samfala long taem bifo mo tede.

6-7. Talem eksampol blong sam olfala long Baebol we Jehova i blesem olgeta.

⁶ Long Baebol yumi save fanem ol gudfala eksampol blong ol man we oli mekem wok blong Jehova, nating se oli olfala. Eksampol,  Moses i gat 80 yia taem hem i stat blong mekem wok blong Jehova olsem wan profet, mo blong lidim nesen blong Isrel. Nating se Daniel i gat samwe long 90 yia, be Jehova i gohed blong yusum hem blong talemaot tok blong hem. Aposol Jon tu i gat samwe long 90 yia taem Jehova i yusum hem blong raetem buk blong Revelesen.

⁷ Plante man mo woman blong bilif, Baebol i no tokbaot olgeta tumas, mo i isi blong yumi no tingbaot olgeta. Be yet Jehova i luk we oli holemstrong long hem mo i blesem olgeta. Eksampol, Baebol i no talem tumas samting long saed blong Simeon we i “wan stret man we i stap ona long God,” be Jehova i savegud hem mo i givim janis long hem blong i luk Jisas mo i talemaot profet tok long saed blong pikinini ya mo mama blong hem. (Luk 2:22, 25-35) Mo tu, traem tingbaot wido ya Ana we i wan profet. Hem i gat 84 yia be “hem i neva mestem blong kam long tempol.” Mo from samting ya, Jehova i blesem hem mo i letem hem blong i luk Jisas. Long ae blong Jehova, Simeon mo Ana, tufala i sas.—Luk 2:36-38.

8-9. ?Lois i gohed blong mekem wanem nating se hem i wido?

⁸ Tede, plante olfala man mo woman blong bilif oli stap olsem gudfala eksampol blong ol yangfala. Traem tingbaot sista ya Lois Didur. Taem hem i gat 21 yia, hem i stat blong mekem wok blong spesel paenia long Kanada. Biaen, hem mo hasban blong hem Jon i spenem plante yia blong mekem wok blong eria elda. Afta long hemia, tufala i wok long Betel blong Kanada blong bitim 20 yia. Taem Lois i gat 58 yia, oli invaetem hem mo Jon blong go wok long Yukren. ?Olsem wanem? ?Bambae tufala i ting se tufala i olfala tumas blong go wok long wan nara kantri? Nogat. Tufala i akseptem invetesen ya, mo Jon i wok long Branj Komiti blong Yukren. Mo 7 yia biaen, Jon i ded, be Lois i gohed blong wok long Betel blong Yukren kam kasem naoia we hem i gat 81 yia, mo olgeta long Betel oli lavem hem tumas.

⁹ Maet i isi blong yumi no tinghae long ol wido olsem Lois afta we hasban blong olgeta i ded. Nating se i olsem, ol wido ya oli sas. Jehova i tinghae long ol sista olsem we oli sapotem hasban blong olgeta blong plante yia, mo we naoia oli gohed yet blong mekem wok blong hem. (1 Tim. 5:3) Mo antap long hemia, oli enkarejem ol yangfala.

10. ?Tony i soem wanem gudfala eksampol?

¹⁰ Plante olfala brata mo sista tu we oli laef long hospital blong ol olfala, oli sas. Traem tingbaot brata ya Tony, we naoia i laef long wan ples olsem. Hem i baptaes long Pennsylvania, U.S.A., long Ogis 1942 taem hem i gat 20 yia. Smoltaem afta we hem i baptaes, oli fosem hem blong joen long ami. Be from we hem i no wantem, oli putum hem long kalabus blong 2 yia haf. Hem mo waef blong hem Hilda, i halpem tufala pikinini blong tufala blong gruap long trutok. Long ol yia we i pas,  Tony i bin stap long tri defren kongregesen mo hem i mekem wok blong presiden elda (naoia yumi singaot se kodineta blong ol elda) mo hem i mekem wok olsem ovasia blong asembli. Hem i stap go long wan prisen blong mekem ol miting mo ol Baebol stadi. Taem Tony i gat 98 yia, hem i gohed blong mekem bes blong hem long wok blong Jehova mo blong givhan long ol brata mo sista long kongregesen.

11. ?Olsem wanem yumi save soem ona long ol olfala brata sista we oli laef wetem ol famle we oli no Witnes?

¹¹ ?Olsem wanem yumi save soem ona long ol olfala brata sista we oli laef wetem ol famle we oli no Witnes? Sipos i posibol, ol elda oli save givhan long olgeta blong joen long ol miting mo wok blong prij wetem kongregesen. Yumi save go visitim olgeta o invaetem olgeta blong joen long video chat. Yumi wantem tingbaot moa ol olfala we oli laef longwe long kongregesen blong olgeta. Sipos yumi no lukaot gud, yumi save fogetem ol olfala olsem. Sam long olgeta oli faenem i had o oli ting se i no stret blong oli tokbaot olgeta wan. Be bambae yumi kasem gudfala samting sipos yumi tekem taem blong askem kwestin mo lesin gud long olgeta taem oli tokbaot glad we oli kasem long oganaesesen blong Jehova.

12. ?Yumi save faenem wanem long kongregesen blong yumi?

¹² Maet bambae yumi sapraes blong faenem se i gat sam olfala long kongregesen blong yumi, we oli ol gudfala eksampol. Wan sista nem blong hem Harriette, i wok strong long wok blong Jehova blong plante yia long kongregesen blong hem long New Jersey, U.S.A. Biaen hem i muv i go laef wetem gel blong hem. Ol brata long niufala kongregesen blong hem oli tekem taem blong save gud hem, mo oli faenem wan gudfala samting. Hem i enkarejem olgeta wetem ol stori blong wok blong prij we hem i mekem taem hem i jes lanem trutok long ol yia 1920. Hem i talem se taem hem i go prij, oltaem hem i tekem wan tutbras, from maet oli save arestem hem enitaem. Mo hemia nao samting we i hapen long 1933, tu taem oli bin arestem hem mo hem i spenem wan wik long prisen. Long ol taem ya, hasban blong hem we i no wan Witnes, i givhan blong lukaot long ol trifala pikinini blong tufala. !Yes, i gud we yumi tinghae long ol olfala we oli olsem!

13. ?Yumi save lanem wanem long ol olfala brata mo sista?

¹³ Ol olfala brata mo sista blong yumi oli gat wan impoten wok insaed long oganaesesen blong Jehova. Oli bin luk olsem wanem Jehova i yusum plante rod blong blesem oganaesesen blong hem mo olgeta wan. Oli lanem plante impoten lesen from ol mastik we oli bin mekem. Yumi mas luk olgeta olsem “wel blong waestok” mo lanem samting from ekspiriens blong olgeta. (Prov. 18:4) Sipos yu tekem taem blong savegud olgeta, bilif blong yu bambae i kam strong mo bambae yu lanem plante samting.

14. ?Dutronome 32:7 i enkarejem ol yangfala blong mekem wanem?

¹⁴ Tekem janis blong toktok wetem olgeta we oli olfala. (Ridim Dutronome 32:7.) I tru, maet ae blong olgeta i stap kam nogud, maet oli wokbaot slo, o maet oli toktok slo, be oli gat strong tingting blong mekem wok blong Jehova mo oli gat “gud nem” long fored blong hem. (Pri. 7:1) Tingbaot from wanem Jehova i tinghae long olgeta mo yu gohed blong ona long olgeta. Yu save mekem olsem Elisa we i wantem tumas blong stap klosap long Elaejah  long laswan dei we tufala i spenem tugeta. Elisa i talem tri taem se: “Bambae mi no livim yu.”—2 King 2:2, 4, 6.

15. ?Wanem ol kwestin we yumi save askem long ol olfala?

¹⁵ Soem intres long ol olfala taem yu askem ol kwestin long olgeta. (Prov. 1:5; 20:5; 1 Tim. 5:1, 2) Yu save askem ol kwestin olsem: “?Taem yu yangfala, wanem nao i pruvum long yu se yu faenem trutok?” “?Olsem wanem ol ekspiriens we yu kasem oli mekem yu kam klosap moa long Jehova?” “?Wanem nao i halpem yu blong stap glad long wok blong Jehova?” (1 Tim. 6:6-8) Mo yu lesin taem oli talem stori blong olgeta.

16. ?Taem wan yangfala mo wan olfala i storian olsem wanem hemia i givhan long tufala tugeta?

¹⁶ Taem wan yangfala mo wan olfala i storian, tufala tugeta i save kasem gudfala samting from. (Rom 1:12) Yufala ol yangfala bambae i trastem moa se Jehova i stap lukaot gud long ol man blong hem, mo wan we i olfala bambae i harem save se i gat man i lavem hem. Mo bambae hem i glad blong talemaot olsem wanem Jehova i bin blesem hem.

17. ?Wanem i mekem se ol olfala brata mo sista oli stap kam moa naes?

¹⁷ Naesfala bodi mo fes i save lus sloslo taem man i kam olfala, be olgeta we oli holemstrong long Jehova oli stap kam naes moa nating se oli olfala. (1 Tes. 1:2, 3) ?From wanem? From we long olgeta yia we i pas, oli letem spirit blong God i trenem olgeta, mo i halpem olgeta blong wokem ol gudfala fasin. Taem yumi savegud ol olfala brata mo sista, yumi ona long olgeta, mo lanem samting from olgeta, bambae yumi luk olgeta se oli sas.

18. ?Bambae yumi tokbaot wanem long nekis stadi?

¹⁸ Kongregesen i kam strong taem ol yangfala oli tinghae long ol olfala, be tu taem ol olfala oli tinghae long ol yangfala. Long nekis stadi, bambae yumi tokbaot olsem wanem ol olfala oli save soem se oli tinghae long ol yangfala insaed long kongregesen.