1-2. (a) Akaadn tu Proverbs 16:31, how wi shuda feel bowt wi oalda bradaz ahn sistaz? (b) Weh kweschanz wi wahn ansa eena dis aatikl?

DEHN ga wahn paak da di United States wehpaat yu ku fain daimonz pahn di grong. Bot sohn peepl jos waak paas dehnya chrezhaz. Dehn noh riyalaiz dat dehn da preshos daimonz bikaaz dehn noh luk priti ahn shaini.

² Jos laik dehndeh daimon, wi faytful oalda bradaz ahn sistaz da sohn preshos chrezhaz. Di Baibl kompyaa fi dehn gray hyaa tu wahn krong. (Reed Proverbs 16:31; 20:29) * Bot ih eezi fi mek wi noh noatis wi preshos oalda wanz. Di yonga bradaz ahn sistaz eena di kangrigayshan wahn benifit wahn lat if dehn andastan dat wi oalda wanz preshos. Eena dis aatikl, wi wahn fain di ansa tu dehnya chree kweschan: Wai wi faytful oalda bradaz ahn sistaz preshos tu Jehoava? Wai dehn da wahn impoatant paat a Jehoava aaganaizayshan? Weh wi ku du fi laan fahn fi dehn egzampl?

3. Akaadn tu Psalm 92:12-15, wai wi faytful oalda bradaz ahn sistaz preshos tu Jehoava?

³ Wi faytful oalda bradaz ahn sistaz preshos tu Jehoava. Hihn si hoo dehn pahn di eensaid an ih chrezha dehn wandaful kwalitiz. Som a dehn di serv Jehoava fi wahn lata yaaz ahn dehn ga lata wizdom, soh Jehoava hapi wen dehn shayr dehn wizdom wid di yonga bradaz ahn sistaz. (Job 12:12; Prov. 1:1-4) Jehoava aalso chrezha dehn indyoarans. (Mal. 3:16) Dehn deel wid wahn lata prablemz eena dehn laif, bot dehn stil kip dehn fayt eena Jehoava schrang. Dehn hoap fi di fyoocha moa schranga now dan wen dehn mi  fers laan di chroot. Ahn Jehoava lov dehn bikaaz dehn kantinyu fi preech bowt fi hihn grayt naym “eevn eena dehn oal ayj.”—Reed Psalm 92:12-15. *

4. Weh ku inkorij wi oalda bradaz ahn sistaz?

⁴ If yoo di geh oalda, memba dat Jehoava noh ferget weh aal yu don du far ahn. (Heeb. 6:10) Wi hevnli Faada hapi dat yu mi werk haad fi sopoat di preechin werk. Yu mi bayr op anda lata chraiyalz, eevn dehn wan weh mi mek yu feel sad. Yu mi obay ahn difen Jehoava raichos standadz, yu mi faytful eena yu asainments, ahn yu mi chrayn adaz. Yu mi du yu bes fi kip op wid di chaynjiz eena Jehoava aaganaizayshan. Yu mi sopoat an inkorij adaz weh mi-di du moa eena dehn servis tu Jehoava. Jehoava lov yu wahn lat bikaaz yu laayal tu hihn. Hihn pramis dat “hihn wahn neva abandan dehn wan weh laayal tu hihn”! (Ps. 37:28) Hihn pramis yu: “Til [yu] hyaa gray Ai wahn stil di kehr [yu].” (Isa. 46:4) Soh noh feel er tink dat bikaaz yu di geh oal, yu noh impoatant eena Jehoava aaganaizayshan nohmoh. Yoo veri preshos!

5. Weh wi oalda bradaz ahn sistaz need fi memba?

⁵ Wi ku laan wahn lat fahn wi oalda bradaz ahn sistaz. Eevn doa dehn mait noh az schrang az bifoa, dehn ga wahn lata ekspeeryens weh wee ku benifit fram. Di egzampl dehn weh wi wahn diskos shoa how Jehoava ku kantinyu yooz wi oalda bradaz ahn sistaz eena difrent wayz.

6-7. Yooz di egzamplz eena di paragraaf dehn fi shoa how Jehoava mi bles oalda wanz weh mi serv hihn eena Baibl taimz.

⁶ Wi ku fain gud egzamplz a faytful wanz weh mi kantinyu serv Jehoava eevn doa dehn mi oal. Fi egzampl, Moaziz mi bowt 80 yaaz oal wen Jehoava mi chooz ahn fi serv az wahn prafit ahn fi leed di nayshan  a Izrel. Jehoava stil mi-di yooz Danyel az wahn prafit eevn doa hihn mi eena ih 90ʼs. Di apasl Jan mi aalso eena ih 90ʼs wen Jehoava yooz ahn fi rait di buk a Revilayshan.

⁷ Ih kuda mi bee eezi fi mek peepl noh noatis sohn ada faytful wanz. Bot Jehoava mi noatis dehn an ih mi bles dehn bikaaz dehn mi laayal tu hihn. Fi egzampl, di Baibl noh tel wi moch bowt Simiyan, ‘wahn raichos man hoo mi fyaa Gaad,ʼ bot Jehoava mi noa hoo hihn an ih mi giv ahn di privilij fi si Jeezas wen ih da-mi wahn baybi ahn fi prafesai bowt Jeezas an ih ma. (Look 2:22, 25-35) Tink bowt Ana, hoo da-mi wahn wido ahn wahn prafit. Shee mi 84 yaaz oal ahn shee mi “aalwayz deh da di templ.” Bikaaz shee neva mis ih “meetin dehn,” Jehoava bles ahn an shee tu mi geh fi si Jeezas az wahn baybi. Simiyan an Ana mi preshos tu Jehoava.—Look 2:36-38.

8-9. Weh wahn sista du eena Jehoava aaganaizayshan az wahn wido?

⁸ Eena fi wee taim, wahn lata faytful oalda wanz da gud egzampl fi di yonga wanz. Kansida di ekspeeryens a Sista Lois Didur. Shee mi jos 21 yaaz oal wen shee mi staat tu serv az wahn speshal painyaa da Canada. Afta dat, shee an ih hozban, John, mi spen wahn lata yaaz eena di chravlin werk. Laytaraan dehn mi staat tu serv da di Canada Betel. Dehn mi dehdeh fi oava 20 yaaz. Wen Lois mi 58 yaaz oal, shee ahn John mi geh wahn invitayshan fi goh serv da Ukraine. Yu tink dehn mi feel dat dehn mi tu oal fi moov tu wahn neks konchri? No! Dehn mi aksep di asainment, ahn John mi geh apointid fi serv az wahn memba a di Branch Komiti. Sevn yaaz afta dat, John mi ded ahn Lois mi disaid fi stay eena ih asainment. Now, shee 81 yaaz oal, an ih da stil paat a di Betel famili da Ukraine. Evribadi lov shee wahn lat.

⁹ Ih ku bee eezi fi mek wi noh noatis sistaz laik Lois wen dehn hozban ded, bot tu Jehoava dehn stil veri preshos. Jehoava chrezha sistaz weh sopoat dehn hozban fi yaaz ahn weh kantinyu fi serv Hihn eevn doa dehn hozban ded. (1 Tim. 5:3) Dehnya laayal sistaz reeli inkorij di yonga wanz tu.

10. Weh wi ku laan fahn Tony egzampl?

¹⁰ Faytful oalda bradaz ahn sistaz weh deh da wahn nersin hoam er weh sik ahn kyaahn lef dehn hows stil veri preshos. Fi egzampl, wahn brada weh naym Tony liv eena wahn nersin hoam. Hihn mi geh baptaiz da Pennsylvania, U.S.A., eena Aagas 1942 wen hihn mi 20 yaaz oal. Soon afta ih geh baptaiz, dehn mi aks ahn fi jain di aami. Bot hihn mi rifyooz, ahn sayka dat dehn mi put ahn eena prizn fi too an a haaf yaaz. Hihn an ih waif, Hilda, mi rayz dehn too chiljren eena di chroot. Oava di  yaaz, Tony mi geh fi serv az di prisaidin oavaseeya (weh wi kaal tudeh wahn koardinayta a di badi a eldaz) eena chree kangrigayshan an az wahn serkit asembli oavaseeya. Hihn mi kandok meetinz ahn Baibl stodiz da wahn prizn weh ih yoostu vizit. Now Tony 98 yaaz oal, ahn hihn stil bizi di serv Jehoava lang wid di bradaz ahn sistaz eena ih kangrigayshan!

11. How wi ku shoa dat wi chrezha wi oalda bradaz ahn sistaz weh liv eena wahn nersin hoam er weh sik ahn kyaahn lef dehn hows?

¹¹ How wi ku shoa dat wi chrezha wi oalda bradaz ahn sistaz weh liv eena wahn nersin hoam er weh sik ahn kyaahn lef dehn hows? Di eldaz ku help dehn aten di meetin er lisn tu it oava di foan ahn dehn ku aalso help dehn preech. Wee ku shoa dat wi kay bowt dehn wen wi tek di taim fi vizit dehn er wen wi invait dehn tu wahn veedyo kaal. Wi aalwayz waahn memba wi oalda bradaz ahn sistaz weh mait liv da wahn nersin hoam weh deh far fahn dehn kangrigayshan. Wi need fi bee kyaaful fi noh ferget dehnya oalda wanz. Som a wi oalda bradaz ahn sistaz mait noh fain it eezi fi taak bowt dehnself er mait noh laik it. Bot wee wahn benifit wahn lat wen wi tek di taim fi get fi noa dehn ahn lisn wen dehn tel wi bowt aal di tingz dehn mi injai eena dehn servis tu Jehoava.

12. Weh wi ku fain eena wi oan kangrigayshan?

¹² Wi mait bee sopraiz fi noa dat dehn ga gud egzamplz a faytful oalda bradaz ahn sistaz eena wi oan kangrigayshan. Wahn sista weh naym Harriette mi serv Jehoava fi lata yaaz eena ih kangrigayshan da New Jersey, U.S.A. Den shee mi gaahn liv wid ih daata. Di bradaz eena ih nyoo kangrigayshan mi mek di taim fi get fi noa ahn, an dehn riyalaiz dat shee da wahn gud egzampl a fayt; wahn preshos chrezha. Shee mi tel dehn bowt di difrent ekspeeryens weh ih mi gat wen ih mi fers laan di chroot eena di 1920ʼs. Bak den wen shee wuda goh eena servis, shee wuda aalwayz kehr wahn tootbrosh wid ahn in kays dehn wuda ares ahn an chroa ahn eena jayl. In fak, eena 1933 dehn mi ares ahn too taimz an ih mi spen wahn week eena jayl evri taim dehn ares ahn. Fi shee hozban da neva wahn Witnis, bot hihn mi sopoat ahn. Soh wen shee mi deh eena jayl, hihn mi tek kayr a dehn chree chiljren. Fi shoar, faytful oalda wanz laik Harriette shuda geh di aana weh dehn dizerv!

13. Weh wi laan bowt di impoatant plays wi oalda bradaz ahn sistaz gat eena Jehoava aaganaizayshan?

¹³ Wi oalda bradaz ahn sistaz veri impoatant tu Jehoava ahn fi hihn aaganaizayshan. Eena difrent wayz dehn si how Jehoava bles fi hihn aaganaizayshan ahn dehn si how hihn bles dehn persnali. Dehn laan sohn impoatant lesn fahn fi dehn oan mistayks. Si dehn laik wahn “fongtin a wizdom,” ahn laan fahn fi dehn ekspeeryens. (Prov. 18:4) If yu tek di taim fi geh fi noa dehn, yu fayt ku geh schranga ahn yu wahn laan wahn lat fahn dehn!

14. Weh Deuteronomy 32:7 inkorij yonga bradaz ahn sistaz fi du?

¹⁴ Mek di taim fi geh fi noa wi oalda bradaz ahn sistaz. (Reed Deuteronomy 32:7.) * Da chroo, dehn mait kyaahn si tu gud ahn dehn mait waak sloa, bot dehn stil waahn kip bizi, ahn dehn ga wahn “gud  naym” wid Jehoava. (Eccl. 7:1) Memba wai Jehoava chrezha dehn. Kantinyu fi shoa dehn aana. Kapi Ilaisha egzampl. Hihn mi insis fi stay kloas tu Ilaija pan di laas day weh dehn mi deh tugeda. Chree taimz Ilaisha mi seh: “Ai noh wahn lef yu.”—2 Ki. 2:2, 4, 6.

15. Weh kweschanz wi ku aks wi oalda bradaz ahn sistaz?

¹⁵ Yu ku shoa dat yu reeli waahn geh fi noa wi oalda bradaz ahn sistaz wen yu aks dehn kweschanz eena wahn kain way. (Prov. 1:5; 20:5; 1 Tim. 5:1, 2) Yu ku aks kweschanz laik dehnya: “Weh mi kanvins yu dat yu mi fain di chroot?” “How di tingz weh mi hapm eena yu laif mi help yu fi jraa kloasa tu Jehoava?” “Weh help yu fi stay hapi eena yu servis tu Jehoava?” (1 Tim. 6:6-8) Den lisn gud az dehn tel yu dehn stoari.

16. How wahn oalda persn ahn wahn yonga persn benifit wen dehn taak wid eech ada?

¹⁶ Wen wahn oalda persn ahn wahn yonga persn spen taim tugeda ahn taak, dehn geh fi inkorij wan anada. (Roam. 1:12) If yoo da wahn yong persn, yu wahn si dat Jehoava reeli kay bowt ih peepl, ahn di oalda brada er sista wahn noa dat yu lov ahn. Ih wahn hapi fi tel yu bowt aala di blesinz weh ih geh fahn Jehoava.

17. Wai wi ku seh dat wi faytful oalda bradaz ahn sistaz geh moa ahn moa byootiful?

¹⁷ Az taim paas, di way how wi luk pahn di owtsaid ku staat tu fayd weh, bot dehn wahn weh laayal tu Jehoava geh moa ahn moa byootiful. (1 Tes. 1:2, 3) Wai wi seh dat? Bikaaz oava di yaaz, dehn alow Jehoava hoali spirit fi chrayn dehn ahn fi help dehn ga byootiful kwalitiz. Di moa wi geh fi noa wi preshos oalda bradaz ahn sistaz ahn laan fahn dehn, di moa wi wahn aana dehn ahn si dehn az byootiful chrezhaz!

18. Weh wi wahn kansida eena di neks aatikl?

¹⁸ Wen di yonga wanz chrezha di oalda wanz, ahn wen di oalda wanz chrezha di yonga wanz, di kangrigayshan geh schranga. Eena di neks aatikl, wi wahn diskos how di oalda bradaz ahn sistaz ku shoa dat dehn chrezha di yonga bradaz ahn sistaz eena di kangrigayshan.