1, 2. a) Según Ariñawagúni 16:31, ida liña warihiniña íbirigu derebuguhaña? b) Kaba álügüdahani wóunaba lidan aturiahani le?

ANIHEIN aban párüke Arkansas (Meriga), ñein lubéi gayara lan ladariruniwa déimani múarugu. Lau sun gayara lan larihiniwa déimani le lau lumenrengun, kei maranserungili lan, gayaraati hásühan saragu gürigia lau sin hasubudiruni lueirin lebegi.

² Ítarahaña wíbirigu derebuguhaña ani úaraguatiña ha kei déimani: gebegitiña saragu. Goubaguaguda tumuti Lererun Bungiu hagaruban luma aban ridi (aliiha huméi Ariñawagúni 16:31; 20:29). Lau sun lira ménrengunti wabulieiduni lueirin hebegi. Nibureintiña ha subudibalin lueirin hebegi íbirigu houn daritiña katei le wéiritimati lebegi. Lidan aturiahani le, lóunabuba ǘrüwa álügüdahani le: ka uagu lasaminara Heowá gebegitimatiña lan íbirigu derebuguhaña?, ka lúgaaru líchugubei houn tidan lóundarun? ani kaba wadüga lun wasagarun buiti lídangiñe hani hénpulu?

3. Según warihini lidan Sálumu 92:12-15, ka uagu weiri lubéi hebegi íbirigu derebuguhaña lun Heowá?

³ Wéiriti hebegi íbirigu derebuguhaña lun Heowá. Subudi lumuti ka lan hawuyeri gürigia hagía ani hínsiñeti lubuidun hamene lun. Gúndaati dan le larihini hásügüragüdüni íbirigu derebuguhaña sun hasubudin houn nibureintiña le ibiha hamaalibei lidan sun dan le haubei eseriwida lun Heowá lau úaraguni (Hob. 12:12; Ari. 1:1-4). Wéiriti giñe lebegi sun awanduni le awanda hamaalibei lun (Mal. 3:16). Lau sun gaturobulin  hamá lidan habagari, arufudatiña aba afiñeni wéiriti luagu Heowá. Winwantima hali hemenigi guentó luéi dan le hasubudirunbalin inarüni. Ani hínsiñetiña lun Heowá ladüga sigimémetiña ayanuha luagu liri “íbini lidan haweiyadun” (aliiha huméi Sálumu 92: 12-15).

4. Kaba íchiga gurasu houn wíbirigu derebuguhaña?

⁴ Anhein haweiyaduña lubéi, chouru huméi mabulieidun lumuti lan Heowá sun wadagimanu le adüga humaalibei lau lásügürün dan (Ebü. 6:10). Ídehadün lau saragu ugundani lidan apurichihani, ani adügati lira lun gunda lan Wáguchi le Siélubei. Sügühadün lídangiñe saragu óuchawaguni anihein lídangiñe hanarimetimati, óunaba humaña ha ayanuhabaña wuriba tuagu Bíbülia, gúnfulihadün lau burí dasi súdiniti ani arufudahadün hou amu íbirigu. Ru humaali sun húmati lun úara huma tuma lóundarun Heowá, to awanseboun lau lóufudagun. Lau sun lira, ídehadün ani ru huguya gurasu houn ha eseriwidubaña lidan dan dayarüti. Wéiriti hínsiñe lun Heowá luagu úaraguni le harufudubei lun, ani “mágürün lumutiña ha gúnfulibaña lun” (Sal. 37:28). Ani chóurugüda lumuti hun: “Nagudahamemebadün danme le garubaadün” (Isa. 46:4). Ligíati, masaminara huma ladüga lan hirumudiri meseriwihadün lan tidan lóundarun Heowá. Seriwimémegidün!

5. Ka lunbei haritaguni íbirigu derebuguhaña?

⁵ Gíbeti le gayaraabei híchuguni íbirigu derebuguhaña. Lau sun mítaran hali lan here kei meha, anihein saragu subudi hama le ibiha hamaalibei lau lásügürün dan. Gayaraagili layusuruniña Heowá lidan ámuñegueinarügü igaburi, ítara kei le lunbei warihini hawagu íbirigu lánina binadu dan hau sun íbirigu ha lánina wadaani.

6, 7. Írida humá fiu hénpulu tídangiñeti Bíbülia hawagun fiu lubúeingu Bungiu ha derebuguhañabaña ha eresibirubaña saragu abiniruni luagu úaragu hamá lun.

⁶ Daritiwa hénpulu tidan Bíbülia hawagun gürigia ha eseriwidubaña lun Heowá lau úaraguni íbini derebuguhaña lan. Moisesi aban hádangiñe, lau sun gádürü-wein hali lan meha irumu lau dan le latatirunbei eseriwida kei profeta ani alidiha lumutiña ísüraelina.  Danieli ábaya kesi, háfuga barühali lan lóugiñe 90 irumu ani anihagua meha eseriwida kei lani Heowá profeta. Ani genegeti barühali lan meha apostolu Huan lóugiñe 90 irumu dan le labürüdün barǘ líburu to gíriboun Arufudúni.

⁷ Añahein saragu hádangiñe lubúeingu Heowá lóuguati hasubudiruniwa, ani gayaraati ladügün lira lun habulieiduniwa lau lumenrengun. Ánheinti Heowá mabulieidun lumutiña ani líchuguba hafayeiruaha luagu úaraguni le harufudubei. Kei hénpulu, lóuguati tayanuha Bíbülia lau “aban wügüri úaraguati le gíribei Simeón”, lau sun lira subudi lumuti Heowá buidu ani ruti chansi lun Simeón lun larihini Hesusu dan le ñǘraügili ani ariñaga ligía aban profesía luagu luma tuagu lúguchu (Luk. 2:22, 25-35). Samina wama giñe tuagu Ana, aban würi to hilaaruboun ani weiriei to eseriwiduboun keisi profeta. Barüharu meha 84 irumu lau sun lira “súnwandan tidan tan ténpulu”. Ru lumuti Heowá tafayeiruaha tun ladüga úaraguni le tarufudubei lau lígirunu lun tarihini Hesusu. Menefánti, wéiriti lan lebegi Simeón tuma Ana lun Heowá (Luk. 2:36-38).

8, 9. Ka tadügübei aban íbiri tidan lóundarun Heowá lárigiñe lounwen tani weiriei?

⁸ Uguñe weyu, añahein saragu íbirigu derebuguhaña rútiña aban lubuidun hénpulu houn nibureintiña. Ariha waméi le tawinwandubei íbiri Lois Didur. Dan meha le 21 lubéi irumu tau, aba tagumeserun eseriwida kei prekursora espechalitu Kanadá. Lárigiñe, tuguya luma tani weiriei sigitiña saragu irumu, eseriwida kei óunigiruti sirkuitu. Dan lárigiñe, seriwitiña tidan Beteli to Kanadáboun lóugiñe 20 irumu. Dan le 58 lubéi irumu tau, aba hamisurahóun eseriwida Ukrania. Kaba meha san hadüga? Hasaminaruba san derebuguhaña lan lun háguyun lidoun amu ageiraü? Ánhatiña lun agunbirahani le adügübei houn, ani iridúati John kei aban hádangiñe íbirigu ha arihibaña tau Sukursáli. Hilati íbiri John sedü irumu lárigiñe, ani aba tanúadirun íbiri Lois lun tasigirun lidan tidasin. Guentó, barüharu íbiri 81 irumu, ani anuhagua eseriwida lau úaraguni lun Heowá tidan Beteli to Ukranianiaboun, ani wéiriti tínsiñe houn súngubei.

⁹ Gayaraati marihin lan wadagimanu le hadügübei íbirigu würiña, kéiburi Lois, dan le hilaali hani weiriei, lau sun lira wéiriti lebegi lira lun Heowá. Wéiriti giñe lebegi ídemuei le híchugubei houn hani weiriei sun irumu le haubei eseriwida lau úaraguni úara hama (1 Tim. 5:3). Ruti giñe lira saragu gurasu houn nibureintiña.

10. Ka wafurendeirubei lídangiñe lubuidun lani íbiri Tony hénpulu?

¹⁰ Añahein saragu íbirigu derebuguhaña ha awinwandubaña tidan haban wéiyaaña, ani wéiriti hebegi lun Heowá. Ligía asuseredubei lun íbiri Tony. Badiseiti íbiri le Pensilbania (Meriga) lidan widü-hati irumu, 1942 dan le 20 lubéi irumu lau. Murusun dan lárigiñe, máhati lun lasúdaarahan ani sügüti bián irumu  adaürǘwa. Ligía tuma lani weiriou, Hilda, anuriaha hamutiña bián hasaanigu lidan inarüni. Lau lásügürün dan, seriwiti íbiri Tony kei íbiri le arihibei lau lóunigiruniwa ǘrüwa damuriguaü (le subudiwabei uguñe weyu kei wéiyaali le arihibei hau wéiyaaña lidan afiñeni) ani arihati meha giñe lau adamurini lánina sirkuitu. Lanwoun lira, alidiha lumuti giñe damuriguaü ru ligía aturiahani tídangiñeti Bíbülia furisunrugu. Lau sun barühali lan 98 irumu, masaminarunti lanügüni katei lau lihamarun. Sigimémegili áfaagua lun leseriwidun lun Heowá ídeha ligía lidan damuriguaü le ñein lubéi.

11. Ida liña warufuduni luagu inebe hamá íbirigu ha awinwandubaña tidan haban wéiyaaña woun o ha siñá hali háfuridun hábiñegiñe?

¹¹ Ida luba warufudun inebe hamá íbirigu ha derebuguhaña woun ha awinwandubaña tidan muna to ñein habéi wéiyaaña o ha siñá hali háfuridun hábiñegiñe. Dan le gayara lan, adüga hamuti wéiyaaña lidan afiñeni ha lídanbaña damuriguaü hayaraati lun híderaguniña apurichiha, lun habasiiha lidoun adamuridaguni o lun haganbahani. Gayaraati warufuduni berese wamá hau lau wabisidahaniña o lau wayanuha hama luéigiñe gágamuru o luéigiñe bidéu. Súdiniti lun mabulieidun wamaniña íbirigu ha awinwandubaña dise luéi damuriguaü. Chouru waméi lun mabulieidun wamaniña. Másiñati añahein lan hádangiñe hénrengu lan houn hayanuha hawougua o sandigua hamá houngua moun lumuti lan hadügüni. Wasagaruba saragu buiti lau wadireirun dan lun wálügüdüniña lau ugundani le winwan hamaalibei tidan lóundarun Heowá luma lun waganbuni le hariñagubei woun.

12. Ka gayarabei wadariruni lidan damuriguaü le ñein wabéi?

¹² Gayaraati taweiridun wanigi lau wasubudirun añahein lan íbirigu derebuguhaña lidan damuriguaü le ñein wabéi ha íchugubaña aba lubuidun hénpulu lánina úaraguni. Seriwitün aban íbiri Merigana gíritu Harriette úaraguñu lun Heowá luagu saragu irumu lidan damuriguaü Newayérsi. Dan lárigiñe aba tidin awinwanda tuma tisaani. Aba hadireirun íbirigu ha lídanbaña iseri damuriguaü le ñein tubéi dan lun hasubudirunu ani aba híchugun fe aban lan íbiri buitu. Abahüdahatu sügǘ le íchuguti dǘgüdaguaü luagu apurichihani lidan burí irumu wein, dan le tasubudirunbalin inarüni. Lidan meha dan ligía, súnwandan meha tanügün aban lachibaha ari túmagua dan meha le táfuridun apurichiha, luéidügü hárügüdün lun tadaürün. Ani lidan irumu 1933, bián wéiyaasu sügütu aban dimaasu furisunrugu. Sun dan le furisunrugu tubéi, lau sun mama lan aban Gefenti tani weiriei, íderagua lumutu lau lóunigiraña ǘrüwa hasaanigu. Ligíati, íbirigu derebuguhaña ha úaragubaña kéiburi Harriette yuuti lun gebegi hamá woun.

13. Ka furendei wamaalibei luagu habara íbirigu ha derebuguhaña ha tídanbaña lóundarun Heowá?

¹³ Anihein aban lúgaaru súdiniti tidan lóundarun Heowá houn wíbirigu derebuguhaña. Ariha humaali ida liña lan labinirunu Heowá lóundarun saragu biní laña giñe lubúeingu ha úaragubaña lun. Furendeihaña giñe saragu lídangiñe hachara guánarügü. Ariha wamaña kei gürigia ha chútiña au ani gayara ligíame wasagarun buiti lídangiñe le sügǘ hamaalibei (Ari. 18:4). Ánhawa adireira dan lun wasubudiruniña buidu derebugubei wafiñen ani wafurendeiruba saragu lídangiñe le furendei wamaalibei.

14. Ka adundehani líchugubei 2 Lúrudu 32:7 houn nibureintiña?

¹⁴ Barǘ waméi ubaraü ani ayanuha huma hamá íbirigu derebuguhaña (aliiha huméi  2 Lúrudu 32:7). Inarüni, másiñati lan lóuguaali lan harihin, hamaaru hali lan héibugun ani bulubudu hali lan hamalali. Gama lumoun, nibureingiña tidan hanigi ani adügaña “aban iri buiti” ligibugiñe Heowá (Apur. 7:1). Aritagua waméi ka lan uagu gebegi habéi lun Heowá ani sigí wamá arufuda inebesei houn. Ítara wamá kei Eliséu, lidan meha lagumuhóun weyu sügüti meha dan luma Elíasi ani amuriahati luma lun lerederun lurugabu. Ariñagati lun ǘrüwa wéiyaasu: “Mígirun nubadibu” (2 Uru. 2:2, 4, 6).

15. Ka álügüdahani gayarabei wadügüni houn íbiri derebuguhaña?

¹⁵ Arufuda waméi houn íbiri derebuguhaña luagu berese wamá hau lau wadügün álügüdahani le saminawati buidu (Ari. 1:5; 20:5). Kei hénpulu, gayaraati wadügüni álügüdahani le houn: “Dan meha le nibureingidün, ka achoururagüdübalin hun darí huma lan inarüni?”, “Ka sügǘ adügübei lúntima hayarafadun lun Heowá?”, “Ka íderagubalün lun hasigirun úaraguñu lau ugundani eseriwida lun Heowá?” (1 Tim. 6:6-8). Lárigiñe, aganbaha waméi le lunbei habahüdahani burí woun.

16. Dan le layanuha aban nibureinti luma aban íbiri derebuguhali, ka uagu sagá habéi biángubei buiti lídangiñe?

¹⁶ Dan le layanuha aban nibureinti luma aban íbiri derebuguhali, biángubei hagía rútiña gurasu hóuniwagua (Rom. 1:12). Ábame chóuruti máhaali lan lun nibureinti, luagu góunigi lániña lan Heowá ha úaragubaña, ani íbiri le derebuguhalibei lasandiraguba lungua luagu hínsiñegu lan ani gúndaabei lau labahüdahani ida liña lan líderaguni Heowá lidan libagari.

17. Ka uagu gayara lubéi wariñagun buídumeraü hamá wábirigu derebuguhaña lau lásügürün irumu?

¹⁷ Lau léibaagun irumu aba agidareina lan magadiñe. Ánheinti Heowá sagü irumu le ásügürüti ariha lumutiña lubúeingu ha úaragubaña buídumeraü hamá (1 Tesa. 1:2, 3). Ka uagu? Ladüga lau lasügürǘn irumu ígiraguagüdatiña houngua lun laransehaniña lani Bungiu sífiri. Eibu wasubudiruniña wíbirigu derebuguhaña buidu, inebetimabaña woun ani eibu wafurendeirun hámagiñe, ábatimaame gebegitima hamá woun.

18. Kaba wariha lidan leweñegua aturiahani?

¹⁸ Guentoti, mama derebügürügüti damuriguaü dan le gebegi hamá íbiri derebuguhaña houn nibureintiña, derebuguti giñe dan le gebegi hama nibureintiña houn íbirigu derebuguhaña. Lidan leweñegua aturiahani, warihiba ida luba lan harufuduni íbirigu derebuguhaña gebegi hama nibureintiña ha lídanbaña damuriguaü houn.