1-2. (a) Dapre Proverb 16:31, ki mannyer nou devret vwar nou bann frer ek ser aze? (b) Ki kestyon nou pou reponn dan sa lartik?

I ANNAN en park Leta-z-ini kot ou kapab trouv bann dyanman ater. Me sa bann dyanman pa ankor ganny poli. Sa i fer ki en kantite dimoun pa realize ki sa i bann dyanman e ler zot pas o bor, zot pa antren.

² Bann frer ek ser aze i vreman presye parey sa bann dyanman. Parol Bondye i dir ki zot seve blan i parey en kouronn. (Lir Proverb 16:31, NWT; 20:29) Me nou kapab fasilman pa remark sa bann trezor. Ler bann zenn i rekonnet ki bann aze i presye, zot ganny en keksoz ki annan plis valer ki larises. Dan sa lartik, nou pou reponn trwa kestyon: Akoz Zeova i konsider bann frer ek ser aze konman en trezor? Akoz bann frer ek ser aze i enportan pour lorganizasyon Zeova? Ki nou kapab fer pour aprann avek zot legzanp?

3. Dapre Psonm 92:12-15, akoz bann frer ek ser aze i presye pour Zeova?

³ Bann frer ek ser aze i presye pour Zeova. I konnen ki kalite dimoun zot ete e i apresye zot bann zoli kalite. I kontan ler bann ki aze i koz avek bann ki pli zenn lo lasazes ki zot in gannyen pandan sa bann lannen ki zot in servi Zeova fidelman. (Zob 12:12; Prov. 1:1-4) Zeova i osi apresye zot landirans. (Mal. 3:16) Menm si zot in annan problenm, zot in kontinyen gard zot lafwa for dan Zeova. Zot lespwar pour lavenir i pli for ki ler zot ti fek aprann laverite. Zeova i kontan zot parski zot kontinyen  koz lo son non menm dan zot vye zour.​—Lir Psonm 92:12-15, NWT.

4. Kwa ki kapab ankouraz nou bann frer ek ser aze?

⁴ Si laz pe antre, ou kapab asire ki Zeova i rapel tou bann travay ki ou’n fer dan lepase. (Ebr. 6:10) Ou’n devoue dan sa travay predikasyon e sa in fer nou Papa ki dan lesyel kontan. Ou’n andir bann problenm menm bann ki’n fer ou vreman sagren. Ou’n obei e defann bann standar drwat ki dan Labib. Ou’n desarz bann responsabilite enportan dan lorganizasyon Zeova e ou’n form lezot. Ou’n fer ou mye pour adapte avek bann sanzman ki lorganizasyon Zeova in fer. Ou’n siport e ankouraz lezot ki dan servis a plen tan. Zeova i kontan ou en kantite akoz ou fidel. I promet ki “i pa pou abandonn son serviter fidel.” (Ps. 37:28, NWT) I osi promet: “Mon pou soutenir ou, menm ziska ler ou ganny seve blan.” (Iza. 46:4) Pa zanmen krwar ou nepli annan valer pour lorganizasyon Zeova akoz ou’n vin pli vye. O kontrer ou vreman presye!

5. Ki keksoz bann frer ek ser aze i devret gard antet?

⁵ Bann frer ek ser aze i kapab ed lorganizasyon Zeova dan en kantite fason. I kapab ki zot nepli annan lafors parey avan me zot annan en kantite leksperyans ki zot in gannyen pandan plizyer lannen. Parey nou pou vwar avek legzanp bann serviter Zeova dan lepase e dan nou letan, Zeova i kapab kontinyen servi zot dan diferan fason.

6-7. Ki mannyer Zeova ti rekonpans son bann serviter aze dan lepase? Donn legzanp.

⁶ Dan Labib, i annan legzanp bann serviter fidel ki ti kontinyen servi Zeova dan zot vye zour. Par egzanp ler Moiz ti dan son bann 80 an, Zeova ti swazir li konman son profet e pour diriz nasyon Izrael. Ler Danyel ti dan son bann 90 an, Zeova ti ankor pe servi li konman en profet. I tre probab ki zapot Zan ti dan son bann 90 an ler i ti ganny enspire pour ekri liv Revelasyon.

 ⁷ I annan en kantite lezot serviter fidel ki pa ti renonmen e petet dimoun pa ti remark zot. Kantmenm sa, Zeova ti remark zot e i ti rekonpans zot pour zot fidelite. Par egzanp, Labib pa koz bokou lo Simeon ki “ti en zonm drwat e [ki] ti annan respe pour Bondye.” Me Zeova ti konn li e i ti donn sa loner pour vwar Zezi ler i ti ankor en pti baba e pour profetize konsernan Zezi ek son manman. (Lik 2:22, 25-35) Mazin osi profet Ann, ki ti en vev. Ann ti annan 84 an me “i pa ti zanmen manke pour vin dan tanp.” Zeova ti beni li parski i ti al dan tanp regilyerman e I ti permet li vwar Zezi ler i ti ankor en pti baba. Simeon ek Ann ti presye pour Zeova.​—Lik 2:36-38.

8-9. Ki mannyer bann vev i ede dan lorganizasyon Zeova? Donn en legzanp.

⁸ Dan nou letan, en kantite frer ek ser aze i bann bon legzanp pour bann ki pli zenn. Annou vwar leksperyans en ser ki apel Lois Didur. I ti annan 21 an ler i ti konmans servi konman en pionye spesyal Kanada. Apre sa, li ansanm avek son msye John ti servi pour plizyer lannen konman sirveyan rezyonal. Pli tar zot ti servi dan Betel Kanada pour plis ki 20 an. Ler Lois ti annan 58 an, li avek John ti ganny envite pour al servi Likrenn. Ki zot ti fer? Eski zot ti mazinen ki zot tro vye pour al dan en lot pei? Zot ti aksepte sa responsabilite e John ti ganny apwente konman en manm Komite Biro Brans Likrenn. John ti mor set an pli tar e Lois ti deside pour reste Likrenn dan son servis. Aprezan Lois i annan 81 an. I ankor pe servi Zeova fidelman dan Betel Likrenn e bann frer ek ser i kontan li en kantite.

⁹ I kapab ki bann vev parey Lois pa ganny sa menm latansyon ki zot ti gannyen ler zot msye ti ankor vivan. Me zot ankor vreman presye pour nou. Zeova i vreman apresye bann ser ki’n siport zot msye pour plizyer lannen e ki pe kontinyen servi li fidelman. (1 Tim. 5:3) Zot osi ankouraz bann ki pli zenn.

10. Ki legzanp Tony in kite?

¹⁰ Bann frer ek ser aze ki reste dan bann lakour pour dimoun aze i osi vreman presye. Par egzanp, annou vwar leksperyans en frer ki apel Tony ki reste dan enn sa bann lakour. I ti batize Pennsylvania, Leta-z-ini an Out 1942 ler i ti annan 20 an. Pa bokou letan apre son batenm, i ti ganny lord pour zwenn larme me i ti refize. Alor, i ti ganny anvoye de-z-an edmi prizon. Li ek son madanm Hilda in fer grandi de zanfan dan laverite. Pandan plizyer lannen, Tony in servi dan trwa kongregasyon konman sirveyan prezidan (ki konmela i apel kordinater konsey ansyen) e konman sirveyan  lasanble rezyonal. I ti vizit en prizon e kondwir bann renyon ek bann letid Labib laba. Tony i annan 98 an e i pe kontinyen travay pour Zeova. I pe kontinyen fer son mye pour servi Zeova ansanm avek bann frer ek ser dan son kongregasyon.

11. Ki mannyer nou kapab montre ki nou apresye nou bann frer ek ser aze ki reste dan lakour pour bann dimoun aze?

¹¹ Ki mannyer nou kapab onor nou bann frer ek ser aze ki reste dan lakour pour bann dimoun aze? Ler i posib, bann ansyen i kapab ed zot pour asiste oubyen ekout renyon e pour partisip dan predikasyon. Nou kapab demontre en lentere personnel dan zot par vizit zot oubyen par koz avek zot atraver video. Nou anvi donn en latansyon spesyal bann frer ek ser aze ki pe reste dan lakour pour dimoun aze, ki lwen avek zot kongregasyon. Nou bezwen fer atansyon pour pa oubliy sa bann frer ek ser aze. Serten parmi zot i kapab vwar li difisil oubyen pa apropriye pour koz lo zot lavi. Me si nou pran letan pour demann zot kestyon e ekout zot ler zot pe koz lo lazwa ki zot in gannyen dan lorganizasyon Zeova, sa i kapab ankouraz nou.

12. Ki nou kapab trouve dan nou kongregasyon?

¹² Ou kapab sirprann pour konnen ki dan ou kongregasyon i annan bann frer ek ser aze ki bann bon legzanp. Annou vwar legzanp en ser ki apel Harriette ki ti servi Zeova fidelman pour plizyer lannen dan en kongregasyon New Jersey, Leta-z-ini. Pli tar i ti al reste avek son fiy dan en lot landrwa. Bann frer dan sa nouvo kongregasyon ti pran letan pour aprann konn li e zot ti realize ki i ti vreman presye. I ti koz lo bann leksperyans ki i ti’n gannyen dan predikasyon ler i ti fek aprann laverite dan bann lannen 1920. Sa letan i ti toultan anmenn en brosadan avek li dan predikasyon, an ka lapolis ti aret li. Anfet an 1933, i ti ganny arete de fwa e sak fwa i ti pas en semenn dan kaso. Son msye pa ti en Temwen Zeova me i ti siport li. Ler Harriette ti dan kaso, son msye ti pran swen avek zot trwa zanfan. Bann frer ek ser aze parey Harriette i merit ganny apresye!

13. Akoz bann frer ek ser aze i vreman enportan pour lorganizasyon Zeova?

¹³ Nou bann frer ek ser aze i vreman enportan pour Zeova ek son lorganizasyon. Zot in vwar ki mannyer Zeova in beni son lorganizasyon e in beni zot dan diferan fason. Zot in aprann bann leson enportan avek bann fot ki zot in fer. Vwar zot konman bann “sours lasazes” e aprann avek zot leksperyans. (Prov. 18:4, NWT) Si nou pran letan pour aprann konn zot, nou lafwa i kapab vin pli for e nou pou aprann en kantite keksoz avek zot!

14. Ki Deterononm 32:7 i ankouraz bann zenn pour fer?

¹⁴ Al ver bann frer ek ser aze e koz avek zot. (Lir Deterononm 32:7, NWT.) I kapab ki zot nepli vwar parey avan, zot nepli mars parey avan e i kapab ki zot fason koze in sanze. Me zot ankor anvi fer en kantite keksoz e zot annan “en bon repitasyon” devan Zeova. (Ekle. 7:1) Gard antet akoz Zeova i apresye zot. Kontinyen onor zot. Fer parey Elisa. I ti ensiste pour li reste avek Eliya zot dernyen  zour ansanm. Trwa fwa Elisa ti dir: “Mon pa pou kit ou.”​—2 Rwa. 2:2, 4, 6.

15. Ki serten kestyon nou kapab demann bann frer ek ser aze?

¹⁵ Demontre lentere senser dan bann frer ek ser pli aze par demann zot bann kestyon avek respe. (Prov. 1:5; 20:5; 1 Tim. 5:1, 2) Demann zot bann kestyon parey: “Ler ou ti ankor zenn, kwa ki ti konvenk ou ki ou’n trouv laverite?” “Ki mannyer ou bann leksperyans in fer ou vin pli pros avek Zeova?” “Kwa ki’n ed ou reste zwaye dan servis Zeova?” (1 Tim. 6:6-8) Apre sa, ekoute ler zot pe reponn ou.

16. Ki pou arive ler en frer ouswa en ser aze i koz avek en zenn?

¹⁶ Ler en frer ouswa en ser aze i koz avek en zenn, zot tou le de zot pou benefisye. (Rom. 1:12) Sa zenn pou pli asire ki Zeova i pran swen avek son bann serviter fidel e sa frer ouswa sa ser aze pou santi ki sa zenn i kontan li. Sa frer ouswa sa ser aze pou kontan pour rakonte ki mannyer Zeova in beni li.

17. Akoz bann frer ek ser aze i vin deplizanpli pli zoli?

¹⁷ Avek letan nou laparans i sanze e nou vin pli vye. Me pli lannen i pase, bann ki fidel avek Zeova i vin pli zoli pour li. (1 Tesa. 1:2, 3) Akoz nou kapab dir sa? Parski zot in les lespri sen form zot e ed zot devlop bann zoli kalite. Pli nou aprann konn nou bann frer ek ser aze, nou onor zot e nou aprann avek zot, pli nou pou vwar zot konman bann trezor ki annan en gran valer!

18. Ki nou pou vwar dan sa lot lartik?

¹⁸ Ler bann zenn i apresye bann ki pli aze e bann ki pli aze i apresye bann ki pli zenn, sa i fer bann frer ek ser vin pli pros avek kanmarad. Dan sa lartik ki swiv, nou pou vwar ki mannyer bann frer ek ser aze i kapab montre ki zot apresye bann zenn dan kongregasyon.