1, 2. (1) Proverbios 16:31ba jarabʉdera, ¿sãwũã akʉdaibara dayirã mebẽrã zõnabapepanʉra? (2) ¿Kʼãrẽ bedʼearata panʉnai naʉ̃ artikulodera?

BɄ DIAMANTERATA maʉ̃rãra mejãcha balebʉ, biʼiakiru akʉza uyiderreabʉ. Maʉ̃ diamantera mõgara, maʉ̃ kʼarea iyi jãrẽ ẽ wedara akʉza ara oda ẽ wedara, ẽbẽrarãba kʼawua ẽ maʉ̃ra mõgara biabʉta, mejãcha balebʉta akʉza uyiderreabʉta.

² Maʉ̃ kĩrãkʼa dayirã mebẽrã zõnabapepanʉrãra nebiatabʉ. Daizeze Bedʼeabara jarabʉ ãyi botorroara nebia kĩrãkʼabʉta burude (akʉra Proverbios 16:31; 20:29). Mamina dayirãbara krĩchaseabʉ ãyira aukʼara yibia ẽãta. Warraraba bia akʉbʉbʉrʉ zõnapanʉrata, nebiata ũduyi. Naʉ̃ artikulodera bedʼea ũbea panʉnañi: ¿kʼãrẽa Jeowaitara zõnabapepanʉra nebiatabʉ?, ¿Jeowaba kʼãrẽta omarẽã diabʉ iyi organizasionera? akʉza ¿kʼãrẽta oseapanʉ ãyi yizadeba audre nebia kʼawuaita?

3. Salmo 92:12-15 bayeda jarabʉdera, ¿kʼãrẽa Jeowabara bia akʉbʉ mebẽrã zõnabapepanʉrãra?

³ Jeowabara bia akʉbʉ ãyira, kʼawuabʉ ãyira sãwũãbʉta akʉza bia akʉbʉ nebia ãya erbʉsida. Jeowara sobiabʉ zõnapanʉraba ãyi krĩcha biata jaradiabʉ baera warrara, ãyi Jeowa ode traja zebʉrʉde (Job 12:12; Prov. 1:1-4). Akʉza bia akʉbʉ ãyira kʼẽrẽpabʉ baera  (Mal. 3:16). Naʉ̃ra mebẽrãra bedʼea zroma ũdu zebʉrʉmina, ĩjãbʉta ũdubisida Jeowa ʉ̃rʉ. Maʉ̃ba audre soidu ĩjãbʉ ãya jʉ̃ãbʉta. Jeowabara kãga ãyira, mejãcha ãyi zõnabasidu jaradiapanʉ baera iyi trʉ̃ ʉ̃rʉ (akʉra Salmo 92:12-15).

4. ¿Kʼãrẽ ʉ̃rʉ kʼawuabʉba sobiabiseabʉ mebẽrã zõnapanʉrãra?

⁴ Bʉta zõnabasibʉrʉ kʼawuara Jeowabara biʼia kĩrãbebʉta bʉa nebia ozebʉrʉra (Heb. 6:10). Bʉara soiduba jaradia zebʉrʉ Daizeze Bedʼeara, maʉ̃ kʼarea Jeowara sobiabʉ. Bedʼea zromata ũdu zebʉrʉ, Daizeze Bedʼeaba jarabʉta aripe ozebʉrʉ, ozebʉrʉ bʉʼa zokʼadapeadara akʉza jaradiabʉrʉ wuabemara mebẽrãbida. Jeowa organizasion ñabasea wãnera bʉsida maʉ̃ daucha wã. Adewara zarea obʉrʉ kʼarebaita mebẽrã ewari jõmaʉ̃nẽ trajapanʉrata Daizezeita. Jeowaba kãgabʉra kʼẽrẽpabʉ baera akʉza jarabʉ iya akʉita iyiʉ̃me kʼẽrẽpabʉrãra (Sal. 37:28). Akʉza Jeowaba jarabʉ: «Bʉra botorroabʉrʉdera, mʉ̃a kʼarebabayi bʉra» (Is. 46:4). Bʉa krĩcharãra bʉra zõnabasi baera idira zeri ẽãta Jeowa organizasionera. Bʉra wabida yibia.

5. Mebẽrã zõnabapepanʉrãra zarea mejãcha neẽmina, ¿kʼãrẽta kĩrãbedaibara?

⁵ Mebẽrã zõnabapepanʉrãra mejãcha zarea neẽmina nããra bada kĩrãkʼa, ãyara mejãcha erbʉ krĩcha bia kʼawua zebʉrʉta naʉ̃ ewaribasidu. Jeowabara nekĩrãtana zokʼaseabʉ ãyira. Atia akʉdai kĩrãkʼa, yiza bia Daizeze Bedʼeade jarabʉta akʉza idi dayirã ewaride.

6, 7. Daizeze Bedʼeadera jarabʉ zõnapanʉra ʉ̃rʉ ãyira kʼẽrẽpapanasita akʉza nebiata ũdubisidata. Jarada maʉ̃ranebemarata.

⁶ Daizeze Bedʼeadera ũduseapanʉ yiza bia ẽbẽrarã kʼẽrẽpa pananata ãyi zõnabasidu. Maʉ̃ranebematabʉ Moisésta, iyi 80 poagabasidera Jeowabara propeta babisi akʉza Israel yi buru babisi. Yi ababemara Daniel, iyira 90  poagabasidu Jeowabara zokʼabasi propetade bamarẽã. Adewara Juanʼra, 90 poaga ʉ̃ta chuasi Jeowaba iyi jaure zareaba bʉbiside Apocalipsis librota.

⁷ Mejãchabʉ Jeowa ode kʼẽrẽpa pananara, ãyira mejãchaʉba ũdukadebasi, mamina Jeowabara ãyira ũdukʼawuabasi. Kʼẽrẽpapanasi baera Jeowabara nebiata ũdubisi. Bari jaraita Daizeze Bedʼeadera bedʼeabʉ Simeón ʉ̃rʉ, iyira «Daizeze kĩrãbita kĩrãẽpa bʼasia», Jeowaba iyira bia ũdukʼawuabasi baera, iyaʼa ũdukʼawuabisi Jesu wikayiraside, adewara kʼãrẽ berabarita jarabisi iyi ʉ̃rʉ akʉza yi papa ʉ̃rʉbida (Luc. 2:22, 25-35). Akʉza bedʼeabʉ propeta Ana ʉ̃rʉ. Iyira 84 poagabasi pẽdrata, «izhira Daizeze dedʼa ewara maẽ wã tau ẽãta» basi, kʼẽrẽpabʉ kʼarea Jeowabara nebiata ũdubisi. Iyara ũdukʼawuasi Jesu wikayiraside. Wãrĩnu bʼaira Simeónʼra akʉza Anara yibiarata panasi Jeowaitara (Luc. 2:36-38).

8, 9. ¿Kʼãrẽ nebiata opanʉ mebẽrã wẽrãra pẽdrarabara?

⁸ Idira zõnapanʉra mejãchaʉta yiza biatapanʉ warraraitara. Bari jaradaita bedʼeadayi mebẽã Lois Didur ʉ̃rʉ. Iyi 21 poagabasidera yi nãã edebari 130 ora oita ojʉ̃drʉsi Canadáde. Iyi juwa jidasidera kopayasi yi kima Johnta, kongregasion akʉbari zõrãrã bʼaita. Maʉ̃ tẽãra Betel Canadádebemane ãba trajasida 20 poaga ʉ̃ta. 58 poaga chuasidera jarasida Ucraniaena kʼareba wãmarẽã. ¿Kʼãrẽta odaibasi? ¿Krĩchasidaka ãyira aukʼara zõnabapepanʉta mainʉ wãita? Ãyira wãsida, Johnʼra Mebẽrã Betel akʉbari bʼaita trʉ̃sida. 7 poaga tẽã Johnʼra beisi, mamina Loisʼra wã ẽ basi. Idibasidu trajabʉ Betel Ucranianebemane, idira poaga 81bʉ, mõbe jõmaʉ̃ba kãgade iyira.

⁹ Mebẽã Lois kĩrãkʼa, bʉ mebẽrã pẽdrabadata, mamina ʉ̃kʉrʉba mejãcha akʉda ẽ, mawũãsidu Jeowaitara ãyira yibiatapanʉ wabida idi, ãyara ãyi kimara kʼarebasida baera akʉza kʼẽrẽpa takiru baera (1 Tim. 5:3). Adewara yiza biatapanʉ warraraitara.

10. ¿Kʼãrẽ yiza biata ũdupanʉ mebẽã Tonyneba?

¹⁰ Ʉ̃kʉrʉ mebẽrã zõnabapepanʉra, panʉ zõrãrã akʉbari demae, ãyira mainʉ panʉmina yibiatapanʉ dayirãitara. Bari jaraita mebẽã Tonyta. Iyira buru kʼoesi Pensilvaniane (Estados Unidos) agosto 1942de 20 poagabaside. Maʉ̃ tẽã poaga ũmebayeda karseldeda bʉesida gorogorora kʼaidu wã ẽ basi baera. Iya iyi kima Hildaʉ̃meba dapʉesida ãyi warrara ũmepanʉta Jeowa ode. Poaga berabari wãne Tonyʼra zõrãrã ãba  yi jʉredabaribasi kongregasion ũbeade akʉza asamblea obada akʉbaribasi. Adewara obasi ãba yi jʉredaita akʉza Daizeze Bedʼea jaradiabasi karseldeda. Idira 98 poagabʉmina aduʼabʉ ẽ, awuarabʉrʉ idibasidu trajabʉ Jeowaita akʉza kongregasionebida.

11. ¿Sãwũã ũdubiseapanʉ dayirãba krĩchapanʉta mebẽrã zõnabapepanʉrãra, zõrãrã akʉbarimae panʉra?

¹¹ ¿Sãwũã ũdubiseapanʉ dayirãba krĩchapanʉta mebẽrã zõnabapepanʉrãra, zõrãrã akʉbarimae panʉra? Zõrãrã kongregasionebemarabara kʼarebaseabʉ ãyara, Daizeze Bedʼea jaradiamarẽã, ãba yi jʉrebari deda bamarẽã mawũã ẽ bʉrʉ ũrĩnamarẽã. Dayirãbida ũdubiseabʉ krĩchapanʉta, akʉeda wãbʉrʉde mawũã ẽ bʉrʉ selularde bedʼeabʉde. Bari jaraita ʉ̃kʉrʉ naʉ̃ra mebẽrã zõnabapepanʉra jĩgarapanʉ kongregasionebara, ãyira kĩrãdua ẽ baibara. Ʉ̃kʉrʉitara zare ãyi ʉ̃rʉ nebʉraira, mamina bigabayi dayirãba wididara ãyi sãwũã bia berabaribʉrʉta Jeowa organizasione.

12. ¿Kʼãrẽta ũduseapanʉ dayirã kongregasionera?

¹² Dayirã kongregasione ũduseapanʉ mebẽrã zõnapanʉra kʼẽrẽpa zebʉrʉta, maʉ̃ kʼarea ãyira yiza biatapanʉ dayirãita. Mebẽã Harrietteʼra Daizeze ode kikibari kʼẽrẽpa, iyira Nueva Jerseyde (Estados Unidos) bada tẽãra wãsi yi kauma. Maʉ̃ kongregasion yiwididera mebẽrãbara ũdukʼawuasida iyira, mebẽrãbara kʼawuasida iyira jipa nebiatabʉta. Iya nebʉrasi warrarabasidera jaradia wãbʉrʉza badua edebasita iyi kʼaidu, kida sʉgʉbarita iyita nokʼoraba jidadara. Poaga 1933dera, ũmebayeda karseldeda bʉesida semana aba, maʉ̃ena iyi kima Jeowa odebʉ ẽ bara akʉbasi ãyi warrara ũbeapanʉta deda. Bʉmabi mebẽã Harriette kĩrãkʼa kʼẽrẽpabʉra dayirãbara bia akʉdaibara.

13. ¿Kʼãrẽ nebiata ũduseapanʉ mebẽrã zõnapanʉrabara Jeowa organizasione nebia obʉdeba?

¹³ Jeowa organizasionera dayirã mebẽrã zõnapanʉrabara nebiata opanʉ. Ãya ũdu zebʉrʉ sãwũã Jeowabara nebiata ũdubi zebʉrʉta iyi organizasionʼa akʉza ãyaʼabida. Ãya nekʼãrẽ aña osidadera nebiata kʼawuasida. Mawũẽ dayirãbida ãyideba krĩcha biata kʼawuaseabʉ (Prov. 18:4). Dayirãba ewari jʉrʉra ãyi ũdukʼawuaita, mawũãra nemejãcha kʼawuayi ãyideba akʉza audre zarea ĩjãñi Jeowa ʉ̃rʉ.

14. ¿Kʼãrẽ ũrãgʼata jarabʉ Deuteronomio 32:7bara warraraitara?

¹⁴ Ewari jʉrʉdadrʉ dayirã mebẽrã zõnabapepanʉrabawara bedʼeadaita (akʉra Deuteronomio 32:7). Idira nããra bada kĩrãkʼa zareapanʉ ẽ, mamina kʼẽrẽpa zebʉrʉ Jeowa ode (Ecl. 7:1, nota). Kĩrãbedaibara kʼãrẽa Jeowabara kãgata ãyira maʉ̃ kʼarea dayirãbida kãgadaibara. Eliseo kĩrãkʼa panadrʉ, Elías ewari jõbodobasi baera, Eliseobara jarasi ũbeabayeda, iyara idubʉ ẽ baita (2 Rey. 2:2, 4, 6).

15. ¿Kʼãrẽ bedʼeata widiseabʉ mebẽrã zõnabapepanʉrãra?

¹⁵ Dayirã mebẽrã zõnapanʉra ʉ̃rʉ krĩchabʉta ũdubidadrʉ bedʼea widibʉde biʼia krĩcha kʼãrãpe (Prov. 1:5; 20:5). Bari jaradaita, dayirãba widiseabʉ: «¿Bʉara sãwũã kʼawuasi wãrĩnuta  ũdubʉrʉta?», «¿Kʼãrẽ berabaridaba kʼarebasi audre Jeowa kʼawa bʼaita?», «¿Kʼãrẽba kʼarebabʉrʉ sobia traja bʼaita Jeowaita?» (1 Tim. 6:6-8). Mõbe ũrĩda ãya nebʉrabʉra.

16. Warrarata zõnabapepanʉrabawara bedʼeabʉdera, ¿maʉ̃ra kʼãrẽa yibia ãyitara?

¹⁶ Warrarata zõnabapepanʉrabawara bedʼeabʉrʉdera ãyi ũmeita yibia maʉ̃ra (Rom. 1:12). Warrarabara kʼawuayi Jeowabara akʉbʉta iyi ode kʼẽrẽpabʉrãra akʉza mebẽã zõnabapebʉra sobiayi iyita akʉpanʉ baera akʉza sobia nebʉrabayi sãwũã Jeowaba kʼarebabʉrʉta.

17. ¿Kʼãrẽa jaraseapanʉ mebẽrã zõnabapepanʉra audre kĩrãwãreã wãta poaga berabari wãne?

¹⁷ Dayi kĩrãwãreãra neẽã wã poaga berabari wãne. Mamina poaga berabari wãnera Jeowa dabʉmara audre kĩrãwãreãbʉ iyi ode panʉrãra (1 Tes. 1:2, 3). ¿Kʼãrẽa? Ãyara iduaribi zebʉrʉ baera Daizeze jaure zareadeba audre ũrĩta Jeowa bedʼeata akʉza audre ẽbẽra bia bʼaita. Dayirãba mebẽrã zõnapanʉra audre kãgabʉdade akʉza audre ũdukʼawuabʉdade audre akʉ wãnañi ãyira nebiatapanʉta dayirãita.

18. ¿Kʼãrẽta akʉdayi wuarebema artikulodera?

¹⁸ Kongregasionʼra audre zarea wã warraraba bia akʉpanʉne zõnapanʉrata akʉza zõnapanʉraba warrarata bia akʉbʉde. Wuarebema artikulodera akʉdayi sãwũã zõnapanʉraba bia akʉbʉta ũdubiseabʉta warrara kongregasionebemarãra.