1, 2. a) Cheʼ bajcheʼ miʼ yʌl Proverbios 16:31, (TNM) ¿bajcheʼ yilal yom mi laj qʼuel jiñi hermanojob ñoxobix bʌ? b) ¿Chuqui tac ti cʼajtiya mi caj i jajqʼuel ti ili estudio?

JUMPʼEJL diamante maxto bʌ tojʼesʌnti mach tsʼʌylawic i mach utsʼatic ti qʼuelol. Jin chaʼan, mi juntiquil lac piʼʌl miʼ taj i qʼuel jumpʼejl, tajol maʼañic mi caj i ñaʼtan chaʼan jumpʼejl diamante i maʼañic mi caj i chʼʌm ti ñuc.

² Jiñi xucʼul bʌ hermanojob ñoxobix bʌ, lajalob bajcheʼ jiñi diamante tac: Wen ñucob i cʼʌjñibal. Jiñi i Tʼan Dios miʼ laj bajcheʼ corona jiñi i sʌquelob i jol (pejcan Proverbios 16:31, TNM; * 20:29). Pero tajol maʼañic mi laj qʼuel chaʼan wen ñucob i cʼʌjñibal. Jiñi xcolelob muʼ bʌ i qʼuelob ti ñuc jiñi ñoxobix bʌ hermanojob an chuqui ñumen ñuc bʌ miʼ tajob. Ti ili estudio mi caj i jajqʼuel ili uxpʼejl cʼajtiya: ¿Chucoch Jehová miʼ ñaʼtan chaʼan wen ñucob i cʼʌjñibal jiñi ñoxobix bʌ hermanojob?, ¿chucoch ñucob i cʼʌjñibal tiʼ yorganización Jehová jiñi hermanojob ñoxobix bʌ? i ¿chuqui miʼ mejlel lac mel chaʼan mi lac taj lac wenlel ti jiñi i ejemplojob?

3. Cheʼ bajcheʼ miʼ yʌl Salmo 92:12-15, ¿chucoch Jehová miʼ qʼuel ti ñuc jiñi hermanojob ñoxobix bʌ?

³ Jehová miʼ wen qʼuel ti ñuc jiñi hermanojob ñoxobix bʌ. Yujil bajcheʼ yilalob yicʼot miʼ qʼuel ti ñuc jiñi wem bʌ melbalʌl (chaʼlibal) am bʌ i chaʼañob. Tijicña miʼ yubin cheʼ bʌ miʼ qʼuel  chaʼan miʼ tʼoxbeñob xcolelob jiñi i ñaʼtʌbal am bʌ i tajayob ti jiñi jabil tac am bʌ melbeyob i yeʼtel (troñel) Jehová (Job 12:12; Pr. 1:1-4). Miʼ qʼuel ti ñuc jaʼel jiñi i xucʼtʌlelob (Mal. 3:16). Anquese an i ñusayob wocol an i pʌsʌyob tiʼ pejtelel ora chaʼan pʼʌtʌlobʌch i ñopoñel ti Jehová. Ñumen pʼʌtʌlobix i pijtaya, mach cheʼic bajcheʼ ti ñaxan, cheʼ bʌ tsaʼ jaxto i cʌñʌyob i sujmlel. I Jehová miʼ cʼuxbiñob come woli (choncol) i bej acʼob ti cʌñol i cʼabaʼ «cʼʌlʌl cheʼ ñoxobix» (pejcan Salmo 92:12-15).

4. ¿Chuqui miʼ mejlel i ñuqʼuesʌben i pusicʼal jiñi hermanojob ñoxobix bʌ?

⁴ Mi ñoxetix cajel, miʼ mejlel a ñop chaʼan Jehová cʼajal i chaʼan pejtelel tsaʼ bʌ a mele ti wajali (Heb. 6:10). An a colta jiñi subtʼan yicʼot a tijicñʌyel, i jiñi miʼ tijicñesan Jehová. An a ñusa wocol tac, an a colta jiñi toj bʌ mandar tac am bʌ ti Biblia, an a mele eʼtel tac ñuc bʌ i cʼʌjñibal yicʼot an a cʌntesa yambʌlob. An a chaʼle wersa chaʼan cheʼʌch maʼ mel bajcheʼ miʼ yʌl jiñi i yorganización Jehová, wen woli (yʌquel) bʌ ti eʼtel. Cheʼ jaʼel, an a colta yicʼot an a ñuqʼuesʌbe i pusicʼal jiñi woli bʌ i melbeñob i yeʼtel Jehová ti tsʼʌcʌl. Jehová miʼ wen cʼuxbiñet chaʼan jiñi a xucʼtʌlel, i miʼ yʌcʼ i tʼan chaʼan «maʼanic miʼ cʌy i chaʼañoʼ bʌ» (Sal. 37:28). Cheʼ jaʼel miʼ subeñet: «Cʼʌlʌl cheʼ anix i sʌquel laʼ jol mi caj c chʌn cʌntañetla» (Is. 46:4). Jin chaʼan, mach a ñaʼtan chaʼan maʼañix a cʼʌjñibal tiʼ yorganización Jehová tiʼ caj jiñi a jabilel. ¡Añʌch a cʼʌjñibal!

5. ¿Chuqui yom cʼajal i chaʼañob jiñi hermanojob ñoxobix bʌ?

⁵ Cabʌl chuqui miʼ mejlel i melob jiñi hermanojob ñoxobix bʌ. Anquese tajol mach wen pʼʌtʌlobix bajcheʼ ti ñaxan, cabʌl chuqui cʌmbil i chaʼañob ti jiñi jabil tac ñumen bʌ tilel. Pero Jehová cabʌl bajcheʼ miʼ mejlel i bej cʼʌñob, cheʼ bajcheʼ mi caj laj qʼuel ti jiñi ejemplo tac chaʼan bʌ ti wajali yicʼot chaʼan ili ora.

6, 7. Alʌ ejemplo tac am bʌ ti Biblia tiʼ tojlel i wiñicob Jehová ñoxobix bʌ tsaʼ bʌ aqʼuentiyob i chobejtʌbal chaʼan i xucʼtʌlelob.

⁶ Ti Biblia mi lac taj ejemplo tac tiʼ tojlel  xucʼul bʌ i wiñicob Jehová tsaʼ bʌ i bej melbeyob i yeʼtel anquese ñoxobix. Juntiquil jiñʌch Moisés, añix bʌ cheʼ bʌ 80 i jabilel cheʼ bʌ tsaʼ sujti ti xʼaltʼan yicʼot tsaʼ aqʼuenti tiʼ wenta jiñi tejclum Israel. Yambʌ jiñʌch jiñi xʼaltʼan Daniel, tsiʼ bej melbe i yeʼtel Jehová bajcheʼ xʼaltʼan anquese tajol ñumeñix ti 90 i jabilel. I miʼ ñaʼtʌntel chaʼan jiñi apóstol Juan ñumeñix ti 90 i jabilel cheʼ bʌ tiʼ tsʼijbu jiñi libro chaʼan Apocalipsis.

⁷ An yambʌ i wiñicob Jehová mach bʌ wen cʌmbilobic i tajol jiñi lac piʼʌlob maʼañic tsiʼ chʼʌmʌyob ti ñuc. Pero Jehová tsaʼʌch i wen qʼueleyob i tsiʼ yʌqʼueyob i majtan chaʼan jiñi i xucʼtʌlelob. Jumpʼejl ejemplo, jiñi Biblia maʼañic miʼ wen taj ti tʼan juntiquil wiñic i cʼabaʼ Simeón, «toj yicʼot miʼ bʌcʼñan Dios» pero Jehová wen i cʌñʌyʌch i tsiʼ yʌqʼue i qʼuel Jesús cheʼ bʌ alʌto yicʼot i yʌl jumpʼejl profecía tiʼ tojlel Jesús yicʼot i mamá (Luc. 2:22, 25-35). Laʼcu lac ñaʼtan jaʼel tiʼ tojlel jiñi xʼaltʼan Ana. Juntiquil mebaʼ xʼixic añix bʌ 84 i jabilel i «ti bele ora yaʼan ti templo». Jehová tsiʼ yʌqʼue i chobejtʌbal chaʼan i xucʼtilel cheʼ tsiʼ yʌqʼue i qʼuel Jesús cheʼ bʌ alʌto. Tiʼ sujm, Simeón yicʼot Ana wen ñucob i cʼʌjñibal tiʼ wut Jehová (Luc. 2:36-38).

8, 9. ¿Bajcheʼ miʼ chaʼleñob ñuc bʌ coltaya jiñi hermanajob tsaʼix bʌ chʌmiyob i ñoxiʼal?

⁸ Ti ili ora, cabʌl hermanojob ñoxobix bʌ muʼ bʌ i yʌcʼob wem bʌ ejemplo chaʼan jiñi xcolelob. Laʼ laj qʼuel tsaʼ bʌ ujti tiʼ tojlel jiñi hermana Lois Didur. Cheʼ bʌ an jaxto 21 i jabilel tsaʼ ochi bajcheʼ precursora especial ti Canadá. Cheʼ jiñi, jiñi hermana yicʼot i ñoxiʼal i cʼabaʼ John, cabʌl jab tsaʼ ajñiyob bajcheʼ superintendente i chaʼan circuito. Ti wiʼil, ñumen ti 20 jab tsaʼ ajñiyob ti jiñi Betel am bʌ ti Canadá. Cheʼ bʌ añix 58 i jabilel, tsaʼ chojquiyob majlel ti Ucrania. ¿Chuqui tsiʼ meleyob? ¿Tsaʼ bʌ i ñaʼtayob chaʼan ñoxobix i maʼañix miʼ mejlelob ti majlel ti yambʌ país? Tsaʼʌch majliyob, i John tsaʼ waʼchoconti bajcheʼ Comité i chaʼan sucursal. Cheʼ bʌ ñumeñix 7 jab, John tsaʼ chʌmi i Lois tsaʼ cʌyle yaʼ tiʼ yasignación. Wʌle, añix 81 i jabilel i woliʼ bej melben i yeʼtel Jehová yaʼ ti Betel am bʌ ti Ucrania, i miʼ wen cʼuxbintel.

⁹ Cheʼ bajcheʼ Lois, tajol an hermanajob maʼañix bʌ miʼ wen chʼʌjmelob ti ñuc cheʼ bʌ miʼ chʌmelob (sajtelob) i ñoxiʼal, pero bej ñucobʌch tiʼ wut Jehová. Jehová miʼ wen qʼuel ti ñuc cheʼ tsiʼ coltayob i ñoxiʼal yicʼot cheʼ xucʼul woliʼ bej melbeñob i yeʼtel (1 Tim. 5:3). Cheʼ jaʼel miʼ wen coltañob jiñi xcolelobto bʌ.

10. ¿Chuqui mi laj cʌn tiʼ tojlel Tony?

¹⁰ An cabʌl hermanojob ñoxobix bʌ chumuloʼ bʌ ti hospital o yaʼ baqui miʼ cʌntʌntel ñoxobix bʌ, i wen ñucob i cʼʌjñibal jaʼel tiʼ tojlel Jehová. Cheʼʌch mi laj qʼuel tiʼ tojlel juntiquil hermano i cʼabaʼ Tony. Tsiʼ chʼʌmʌ jaʼ ti Pensilvania (Estados Unidos) ti agosto ti 1942 cheʼ bʌ 20 i jabilel. Ti wiʼil maʼañic tsiʼ  jacʼʌ i mel jiñi servicio militar i tsaʼ otsʌnti ti cárcel chaʼpʼejl jab yicʼot ojlil. Tony yicʼot i yijñam, i cʼabaʼ Hilda, tsiʼ cosayob chaʼtiquil i yalobil ti jiñi i sujmlel. Cabʌl jab tsaʼ ajñi bajcheʼ superintendente presidente ti uxpʼejl congregación (ili ora cʌmbil bajcheʼ coordinador chaʼan ancianojob) yicʼot tsaʼ ajñi bajcheʼ superintendente chaʼan jiñi jumpʼejl bʌ qʼuin colem tempa bʌ. Cheʼ jaʼel, tsiʼ ñusa tempa bʌ tac i tsiʼ yʌcʼʌ estudio ti jumpʼejl cárcel. Anquese añix 98 i jabilel, mach yomic i cʌy i melben i yeʼtel Jehová. Woliʼ bej chaʼlen wersa i mel yicʼot i coltan jiñi i congregación.

11. ¿Bajcheʼ miʼ mejlel lac pʌs chaʼan mucʼʌch lac chʼʌmob ti ñuc jiñi hermanojob chumuloʼ bʌ yaʼ baqui miʼ cʌntʌntel ñoxobix bʌ o maʼañix bʌ miʼ mejlelob ti loqʼuel tiʼ yotot?

¹¹ ¿Bajcheʼ miʼ mejlel lac pʌs chaʼan mucʼʌch lac chʼʌmob ti ñuc jiñi chumuloʼ bʌ yaʼ baqui miʼ cʌntʌntel ñoxobix bʌ o maʼañix bʌ miʼ mejlelob ti loqʼuel tiʼ yotot? Cheʼ bajcheʼ cʼamel miʼ mejlelob, jiñi ancianojob yom miʼ coltañob ti subtʼan yicʼot chaʼan miʼ majlelob ti tempa bʌ o miʼ ñʌchʼtañob. Miʼ mejlel lac julaʼtañob o mi lac pejcañob ti videollamada. Yom wen cʼajal lac chaʼan jiñi ñajt bʌ chumulob yaʼ ti congregación, mach yomic miʼ ñajʌyel lac chaʼañob. Tajol wocol miʼ yubiñob chaʼan miʼ yʌlob bajcheʼ yilal añob o maʼañic miʼ mulañob i mel. Pero mi caj lac taj lac wenlel cheʼ mi la cʌqʼuen i yorajlel chaʼan mi laj cʼajtibeñob chuqui tac an i yʌqʼueyob i tijicñʌyel tiʼ yorganización Jehová yicʼot mi lac ñʌchʼtan chuqui miʼ subeñoñobla.

12. ¿Chuqui miʼ mejlel laj cʌn yaʼ ti laj congregación?

¹² Tajol toj sajtel lac pusicʼal cheʼ mi laj qʼuel chaʼan yaʼ ti laj congregación an hermanojob ñoxobix bʌ am bʌ i pʌsʌyob i xucʼtilel. Juntiquil hermana am bʌ ti Estados Unidos i cʼabaʼ Harriette cabʌl jab tsiʼ melbe i yeʼtel Jehová yaʼ ti congregación am bʌ ti Nueva Jersey. Cheʼ jiñi tsaʼ majli ti chumtʌl yicʼot i yixicʼal. Yaʼ tiʼ tsijib congregación jiñi hermanojob tsiʼ locʼsʌbeyob i yorajlel chaʼan miʼ cʌñob i an chuqui wen ñuc bʌ tsiʼ cʌñʌyob. Harriette tiʼ subeyob utsʼatax bʌ experiencia tac chaʼan bʌ subtʼan ti jiñi jabil 1920, cheʼ bʌ tsiʼ cʌñʌ i sujmlel. Ti jimbʌ ora miʼ joy cuch majlel jumpʼejl cepillo cheʼ bʌ miʼ majlel ti subtʼan, toj chajpʌbilix chaʼan mi tsaʼ pʌjyi majlel ti cárcel. Ti 1933 chaʼyajl tsaʼ otsʌnti ti cárcel jumpʼejl semana. Cheʼ bʌ yaʼan ti cárcel, jiñi i ñoxiʼal tsiʼ colta anquese mach Testigojic, tsiʼ cʌnta jiñi uxtiquil i yalobilob. Tiʼ sujm, yomʌch mi laj qʼuelob ti ñuc jiñi xucʼul bʌ hermanojob cheʼ bajcheʼ Harriette.

13. ¿Chuqui tsaʼ laj cʌñʌ chaʼan bajcheʼ yilal yom miʼ qʼuejlel tiʼ yorganización Jehová jiñi hermanojob ñoxobix bʌ?

¹³ Jiñi hermanojob ñoxobix bʌ wen ñucob i cʼʌjñibal tiʼ yorganización Jehová. An i qʼueleyob bajcheʼ Jehová miʼ yʌcʼ i bendición tiʼ yorganización yicʼot tiʼ tojlelob. Cabʌl chuqui ñuc tac bʌ cʌmbilob i chaʼan tiʼ sajtemalob. Jin chaʼan, laʼ laj qʼuelob bajcheʼ wen añoʼ bʌ i ñaʼtʌbal i laʼ laj cʌn ti chuqui tac yujilob (Pr. 18:4). Mi mucʼʌch laj cʌqʼuen i yorajlel chaʼan mi lac wen cʌñob, mi caj i pʼʌtʼan lac ñopoñel i ñumen cabʌlto chuqui mi caj laj cʌn.

14. ¿Chuqui miʼ subentelob jiñi xcolelob yaʼ ti Deuteronomio 32:7?

¹⁴ Yom mi lac tech lac pejcan jiñi hermanojob ñoxobix bʌ (pejcan Deuteronomio 32:7). I sujmʌch, tajol maʼañix miʼ wen cʼotelob i wut, maʼañix miʼ wen mejlelob ti xʌmbal i ñumen cʼunteʼix miʼ chaʼleñob tʼan. Pero bej chʼejlobto i pusicʼal, i miʼ ‹sujbelob ti utsʼat tiʼ wut› Jehová (Ec. 7:1). Laʼ laj cʼajtesan chucoch Jehová miʼ qʼuelob ti ñuc i laʼ lac bej qʼuelob ti ñuc. Yom lajalonla bajcheʼ Eliseo, ti  jiñi cojix bʌ qʼuin tsaʼ bʌ ajñi yicʼot Elías tsiʼ wersa sube chaʼan mi caj i cʌytʌl yicʼot. Uxsujtel tiʼ sube: «Maʼanic mi caj j cʌyet» (2 R. 2:2, 4, 6).

15. ¿Chuqui tac miʼ mejlel laj cʼajtibeñob jiñi hermanojob ñoxobix bʌ?

¹⁵ Laʼ lac pʌsbeñob jiñi ñoxobix bʌ chaʼan tiʼ sujmʌch mi laj qʼuelob ti ñuc cheʼ mi lac melbeñob wen jach bʌ cʼajtiya tac (Pr. 1:5; 20:5). Miʼ mejlel laj cʼajtibeñob: «¿Chuqui tsiʼ yʌqʼueyet a ñop cheʼ bʌ xcoleletto chaʼan tsaʼ taja i sujmlel?», «¿chuqui tac tsiʼ ñumen lʌcʼtesayet ti Jehová?», «¿chuqui an i coltayet chaʼan tijicñayet maʼ bej melben i yeʼtel Jehová?» (1 Tim. 6:6-8). Cheʼ jiñi, laʼ lac ñʌchʼtan chuqui miʼ subeñoñobla.

16. Cheʼ bʌ juntiquil xcolel miʼ chaʼlen tʼan yicʼot juntiquil ñoxix bʌ, ¿chucoch miʼ comol coltañob i bʌ?

¹⁶ Cheʼ bʌ juntiquil xcolel miʼ chaʼlen tʼan yicʼot juntiquil ñoxix bʌ, miʼ comol coltañob i bʌ (Rom. 1:12). Jiñi xcolel mi caj i ñumen ñop chaʼan Jehová miʼ cʌntan jiñi xucʼul bʌ i wiñicob, i jiñi ñoxix bʌ cʼuxbibil mi caj i yubin i bʌ i mi caj i mulan i yʌl bajcheʼ an i qʼuelbe i coltaya Jehová tiʼ cuxtʌlel.

17. ¿Chucoch miʼ mejlel la cʌl chaʼan jiñi hermanojob ñoxobix bʌ ñumen utsʼat miʼ sujtelob tiʼ jujumpʼejl jab?

¹⁷ Jiñi la cutsʼatlel cʼajpan tsiquil bʌ miʼ jilel cheʼ bʌ mi lac ñoxʼan majlel. Pero ti jujumpʼejl jab muʼ bʌ i ñumel, Jehová ñumen utsʼat miʼ qʼuel jiñi i wiñicob (1 Tes. 1:2, 3). ¿Chucoch? Come an i yʌcʼʌyob chaʼan jiñi i yespíritu Jehová miʼ coltañob yicʼot miʼ tojʼesañob majlel. Cheʼ mi lac ñumen cʌñob jiñi hermanojob ñoxobix bʌ yicʼot mi lac ñumen cʌn tiʼ tojlelob, ñumen ñucob i cʼʌjñibal mi caj laj qʼuelob.

18. ¿Chuqui mi caj laj qʼuel ti jiñi yambʌ estudio?

¹⁸ Pero jiñi congregación mach jiñic jach miʼ pʼʌtʼan cheʼ bʌ jiñi xcolelob miʼ qʼuelob ti ñuc jiñi ñoxobix bʌ yicʼotʌch jaʼel cheʼ bʌ jiñi ñoxobix bʌ miʼ qʼuelob ti ñuc jiñi xcolelob. Ti jiñi yambʌ estudio, mi caj laj qʼuel bajcheʼ miʼ mejlel i pʌsob jiñi ñoxobix bʌ chaʼan miʼ qʼuelob ti ñuc jiñi xcolelob yaʼ ti congregación.