1-2. (a) Thenge la Ite Edomë 16:31, nemene la aqane tro sa goeëne la itre trejin ka qatre hë? (b) Nemene la itre hnying hne së hna troa ce wang?

AME ngöne la ketre parc e Arkansas (Etazini), hetrenyi la ketre götrane gaa tiqa hnei wene etë. Ngo tha hna huliwane kö itre ej, matre tha öhne kö la itre atr ka tro laka, itre wene etë lai ka melemel nge ka tru thupene catr.

² Ceitune hi la itre wene etë cili memine la itre trejin qatr me qatre föe. Ka tru alamekene catre angatr koi së. Öni Tusi Hmitrötr, “korona ka lolo la iqia.” (E jë la Ite Edomë 16:31; 20:29) Ngazo pe, tha canga öhnyi angatre kö hne së. Maine tro sa wangatrunyi angatr, tro hë sa öhne laka, sisitria catre kö la hnei angatr hna troa hamë së, hune la nöjei mo ne fen. Tro sa ce wang la köni hnying celë: Pine nemene matre Iehova a wangatrune la itre hlue i Nyidrë qatr me qatre föe? Nemene la hnëqa i angatr ngöne la organizasio? Nemene la nyine tro sa kuca matre troa kepe eloine qa ngöne la tulu i angatr?

3. Thenge la Salamo 92:12-15, pine nemene matre Iehova a wangatrune la itre trejin ka qatre hë?

³ Iehova a wangatrune la itre trejin qatr me qatre föe ka mele nyipici. Atrepengöi angatre hnyawa hi hnei Iehova, tune la itre thiina ka lolo i angatr. Iehova a madrin ngöne la itre trejin ka qatre hë a ce thawa memine la itre xötr ka co, la itre hnei angatr hna melën. (Iobu 12:12; 32:9; Ite edomë 1:1-4) Ketre, tha sihngödri kö koi Iehova la aqane xomihni angatr. (Mal. 3:16) Eje hi, nyimutre la itre jol hnei angatr hna cile kow, ngo ka catre palahi la lapaune  i angatr. Qaane lo ijine angatr a xötrei atre la nyipici, angatr a mejiune koi Iehova. Tru la ihnimi Iehova koi angatr ke, angatr palahi a cainöj me atrune la ëje i Nyidrë, ngacama “qatre hë” angatr.—E jë la Salamo 92:12-15.

4. Nemene la ka troa ithuecatr kowe la itre trejin ka qatre hë?

⁴ Itre qatr me qatre föe, tha thëthëhmine kö Iehova la itre hnei epuni hna kuca ekö ngöne la huliwa i Nyidrë. (Heb. 6:10) Mekun palahi Iehova la epuni a catre cainöjëne la maca ka loi. Ketre, hnei epuni hna xomihnine la itre jol ka tru, me itre akötr. Hnei epuni fe hna cilëgöline la nyipici, me xome la itre hnëqa ka tru, me inine la itre xan. Hnei epuni hna idrengethenge ngöne la kola saze la aqane trongëne la huliwa ne la organizasio i Iehova. Ketre, hnei epuni hna ithuecatr kowe la itre ka huliwa i Iehova ngöne la drai ka pexej. Eje hi, Iehova a hnimi epun ke, hnei epuni palahi hna mele nyipici koi Nyidrë. Tha tro kö Nyidrëti a “hna tije la ite ka hmitöte i nyidë”! (Sal. 37:28) Öni Iehova: “Tro ni a xepe trongëne uti hë qia ha.” (Is. 46:4) Haawe, the mekune kö laka, epuni a uti ipië trootro matre tha nyipiewekë hë epun. Hetre hnëqa i epun palahi e hnine la organizasio i Iehova!

5. Pine nemene matre ka nyipiewekë la itre trejin qatr me qatre föe e hnine la organizasio i Iehova?

⁵ Ka sisitria catre la itre trejin qatr me qatre föe ngöne la organizasio i Iehova. Ngacama pëhë trengecatre i angatr tune ekö, ngo nyimutre la itre ini hnei angatr hna kapa ngöne la mele i angatr. Celë hi matre, Iehova palahi a hamë hnëqa i angatr, tune lo itre xaa hlue i Nyidrëti ekö. Hanawang la itre xaa tulu.

6-7. Qaja jë la tulu ne la itre hlue i Iehova ka mele nyipici uti hë la angatr a qatre trootro.

⁶ Tusi Hmitrötr a qaja la itre hlue i Iehova ka catre mele nyipici uti hë la angatr a qatr. Hanawang la tulu i Mose. Ame lo kola 80 lao macatre i nyidrë, hnei Iehova hna ië nyidrë troa perofeta me eatrongëne la nöje Isaraela. Ame Daniela perofeta, nyidrëti la qeneqaja i Iehova ngacama 90 hë lao macatre i nyidrë.  Ketre tui Ioane aposetolo, 90 lao macatre i nyidrë ngöne lo nyidrëti a cinyihane la tusi Hna Amamane jëne la uati hmitrötr.

⁷ Ame la itre xaa hlue i Iehova, tha ka hlemu kö angatr, matre canga tro hi sa thëthëhmine la tulu i angatr. Eloine pe, hnei Iehova hna öhne me amanathithine la aqane mele nyipici angatr. Hanawang la tulu i Simeona. Tha hna qaja lapa angeice kö hnei Tusi Hmitrötr, ngo ketre atr “ka meköti angeic nge ka catre nyihlue i Akötresie.” Atrepengö i Simeona hnyawa hi hnei Iehova. Hnei Nyidrëti hna aijijë angeic troa öhnyi Iesu medreng, me perofetan göi Iesu me thine i nyidrë. (Luka 2:22, 25-35) Ketre, hnei Iehova hna öhne la aqane mele nyipici Ana perofeta föe. Ngacama ketre sine föe Ana ka 84 lao macatre, ngo “tha patre pi kö eahlo ngöne la uma ne hmi.” Celë hi matre, hnei Iehova hna amanathithi eahlo me aijijë eahlo troa öhnyi Iesu medreng. Eje hi, tru la ihnimi Iehova koi Simeona me Ana.—Luka 2:36-38.

8-9. Nemene la tulu hna hamën hnene la itre sine föe ka qatre hë?

⁸ Ame fe enehila, nyimutre la itre qatr me qatre föe ka amamai tulu kowe la itre xötr ka co. Hane hi la hna melën hnei Lois Didur. Ame lo kola 21 lao macatre i eahlo, hnei Lois hna xome la huliwa ne pionie huti e Canada. Thupene lai, hnei Lois me John, föi eahlo hna xome la huliwa ne thupëne la sirkoskripsio koi nyimu macatre. Ketre, hnei nyidro hna huliwa koi 20 lao macatre ngöne la Bethela e Canada. Ame la kola 58 lao macatre i Lois, hna upi eahlo troa ixatua e Ukraine. Hapeu, hnei nyidroti kö hna mekun laka, qatre hë nyidro matre tha ijiji nyidroti hmaca kö troa fek kowe la ketre nöj? Waea. Hnei nyidroti pe hna kapa, nge hna acili John troa ketre atrene la filial e Ukraine. Thupene la 7 lao macatre hna meci hnei John. Ngo hnei Lois hna mekun troa lapa e cili. Ame hë enehila, traqa koi 81 lao macatre i eahlo, ngo eahlo palahi a huliwa. Nge tru la hna hnimi eahlo hnene la itre trejin ne la Bethela e Ukraine.

⁹ Tui Lois, nyimutre la itre trejine qatre föe ka catre mele nyipici. Ngo pine laka, meci hë la föi angatr, matre kösë tha öhnyi angatre hë hne së. Ame pe, ka nyipiewekë catre angatr. Tru la ihnimi Iehova kowe la itre sine föe cili ka sajuëne la itre föi angatr ngöne la itre macatre, nge ka catre nyihlue i Iehova enehila. (1 Tim. 5:3) Itre tulu lai ka ithuecatr kowe la itre xötr ka co!

10. Nemene la hna ini së hnene la tulu i Tony?

¹⁰ Ka nyipiewekë mina fe la itre trejin qatr me qatre föe ka lapa hnine la itre uma thatraqane la itre qatr. Hanawang la hna melën hnei Tony. Ame lo Ogas 1942, hna bapataiso nyidrë e Etazini, nge 20 lao macatre  i nyidrë. Thupene lai, hna akalabusi nyidrë koi lue macatre nge sin ke, tha ajane kö nyidrë troa sooc. Hnei Tony me Hilda, föe i nyidrë, hna hetrune la lue nekö i nyidro ngöne la nyipici. Ketre, hnei Tony hna xome la hnëqa ne kordinatör ne la lapa ne la itre qatre thup ne la köni ekalesia, me atre thupëne la asabele ne sirkoskripsio. Hnei nyidrëti fe hna xomiujine la itre icasikeu me ini tusi e hnine la kalabus. Ame enehila, 98 hë lao macatre i Tony, ngo nyidrëti palahi a catre huliwa koi Iehova me ixatua e hnine la ekalesia!

11. Tune kaa la aqane tro sa nyipiine la itre trejin ka qatre hë ka lapa ngöne la uma thatraqane la itre qatr?

¹¹ Tune kaa la aqane tro sa nyipiine la itre trejin qatr me qatre föe ka lapa ngöne la uma thatraqane la itre qatr? Maine ijij, itre qatre thup a xatua angatr troa sine maine dreng la itre icasikeu. Ijije fe tro sa ce cainöj me angatr maine hë angatr jëne video. Tha tro pi kö sa thëthëhmine la itre trejin ka lapa iananyi memine la itre ekalesia i angatr. Maine jë, itre xan a hmahma me xou troa qaja la itre hnei angatr hna melën. Ngo nyipiewekë tro sa hnying koi angatr, me drenge la angatr a qaja la itre manathith hna kapa ngöne la huliwa i Iehova. Tro hë sa kepe eloine qa ngöne la tulu i angatr.

12. Hnauëne laka, nyipiewekë tro sa atrepengöne hnyawa la itre trejin ka qatre hë?

¹² Loi e tro sa atrepengöne hnyawa la itre trejin ka qatre hë. Tro hë sa sesëkötr la etrune lapaune i angatr koi Iehova. Hanawang la hna melën hnei Hariette. Nyimu macatre ne eahlo a huliwa koi Iehova ngöne la ekalesia e New Jersey (Etazini). Ngo ame la ketre ijin, hnei eahlo hna tro troa lapa thene la nekö i eahlo jajiny. E cili, hnene la itre trejin ne la ekalesia hna thele troa atrepengöi eahlo hnyawa. Angatr a hain la itre hnei eahlo hna melën. Hnei Hariette hna ithuecatr koi angatr. Hnei eahlo hna qaja la huliwa ne cainöj ngöne la itre macatre 1920, ngöne lo eahlo a xötrei atre la nyipici. Öni Hariette ka hape, eahlo a xome trongën la nyine wasi nyö ngöne la hna cainöj, matre hnëkë hë eahlo e traqa ju othi eahlo. Nge ame lo 1933, hna akalabusi eahlo koi caa wiik. Ngacama tha ka hmi kö la föi eahlo, ngo hnei nyidrëti hna thupëne la köni nekö i nyidro. Nyipici, tui Hariette, itre tulu ne lapaune la itre trejin ka qatre hë. Nyipiewekë tro sa wangatrunyi angatr!

13. Pine nemene matre ka sisitria catre la itre trejin ka qatre hë kowe la organizasio i Iehova?

¹³ Sisitria catre la itre trejin qatr me qatre föe kowe la organizasio. Hnei angatr hna öhne la aqane amanathithi angatr hnei Iehova, memine la nöje i Nyidrë. Ketre, hnei angatr hna xomi ini qa ngöne la itre tria i angatr. Loi e tro sa goeë angatr ceitu me “qeqe ne inamacan.” (Ite edomë 18:4) Haawe, loi e tro sa atrepengöi angatre hnyawa, matre acatrene la lapaune së me xomi ini qaathei angatr!

14. Nemene la hna ithuecatre koi së ngöne Deuteronomi 32:7?

¹⁴ Loi e tro sa ithanata memine la itre trejin ka qatre hë. (E jë la Deuteronomi 32:7.) Maine jë, ngazo hë la lue alameke i angatr, maine jole pena koi angatr troa nango tro. Maine pena, thatreine hë angatre ithanata catr. Ame pe, aja i angatr palahi troa catre huliwa, nge ka “hlemu loi” angatr koi Iehova. (Ate cai. 7:1) Haawe, loi e tro palahi sa lapa mekun  la kepin matre Iehova a wangatrunyi angatr. Loi e tro fe sa nyitipu Elisaia. Hnei angeic hna ce lapa me Elia uti hë la drai tixenuë ne ce nyidro. Akönia qaja Elisaia koi Elia ka hape: “Tha tro kö ni a nue” nyipë.—2 Ite jo. 2:2, 4, 6.

15. Nemene la hne së hna troa hnyingëne kowe la itre trejin ka qatre hë?

¹⁵ Ame la easa porotrik memine la itre trejin ka qatre hë, easë hi lai a amamane la ihnimi së koi angatr. (Ite edomë 1:5; 20:5; 1 Tim. 5:1, 2) Hnyingë angatre jë ka hape: “Ame lo epuni a thöth, nemene la ka amamane laka, epuni ngöne la nyipici?” “Nemene la ka acatrene la aqane imelekeu i epun me Iehova?” “Ame koi epun, nemene la nyine troa kuca matre tro palahi a madrin ngöne la huliwa i Iehova?” (1 Tim. 6:6-8) Thupene lai, drenge hnyawa jë la angatr a qaja la mele i angatr.

16. Nemene la thangan e tro la itre trejin ka qatre hë a porotrik memine la itre xötr ka co?

¹⁶ Hetre thangane catr e tro sa xomi ijine troa porotrik memine la itre trejin ka qatre hë. (Rom. 1:12) Tro la itre xötr ka co a öhne laka, Iehova a hnim me thupëne la itre hlue i Nyidrë ka mele nyipici. Nge tro la itre trejin ka qatre hë a öhne laka, easa wangatrunyi angatr. Ketre, madrin catre angatr troa qaja la itre manathith hnei angatre hna kapa qaathei Iehova.

17. Pine nemene matre mingöminge catre la itre trejin ka qatre hë ngöne la itre macatre?

¹⁷ Nyipici laka, kola paatre la emingömingö së ngöne la easa qatre trootro. Ngo ame koi Iehova, mingöminge catre la itre ka mele nyipici koi Nyidrë, ngamaca tro ju hë la itre macatre. (1 Thes. 1:2, 3) Pine nemen? Pine laka, hnei angatr hna nue la uati hmitrötre i Iehova troa xatua angatr troa eënyine la itre thiina ka lolo. Haawe, maine tro sa atrepengöne hnyawa la itre trejin ka qatre hë, me wangatrunyi angatr, me xomi ini qaathei angatr, tro hë sa öhne laka, ka sisitria catre angatr!

18. Nemene la hne së hna troa ce wang ngöne la ketre tane mekun?

¹⁸ Nyipiewekë tro la itre xötr ka co a nyipiine la itre trejin qatr me qatre föe. E cili, tro ha ihnimi me caasi la ekalesia. Ngo loi e tro fe la itre trejin ka qatre hë a hnim me wangatrune la itre xötr ka co. Celë hi lai hne së hna troa ce wang ngöne la ketre tane mekun.