1-2. (a) Enke fa Odo 16:31 e soi, da fa u mu e si den gaandiwan aini a kemeente? (b) Sowtu akisi wi o luku aini a artikel ya?

WAN foto de na Ameekankondee den e kai Arkansas pe i sa fende dyamanti a doti. Ma fu di den dyamanti ya á seeka ete, meke den nai beenki enke den wan di den e seli a wenkii. Efi yu á luku bun, i ná o si taki a dyamanti de ape. Fu di gaanse sama nai poti pakisei a den, meke den e waka pasa den dyamanti ya.

² Leti enke den dyamanti ya, a so den gaandiwan aini a kemeente de enke gudu di pelensipali. A Wowtu fu Gadu e maiki weti uwii anga wan kownu-ati. (Leisi Odo 16:31; 20:29) Ma leti enke fa yu abi fu luku bun fu man si den dyamanti di sama á seeka ete, a letiso u mu meke moiti fu si den wini di den gaandiwan e tyai gi a kemeente. Te yonkuuwan e fusutan taki den sa leli omen sani fu den gaandiwan aini a kemeente, den o fende wan sani di pelensipali moo gudu. Wi o luku dii sani aini a artikel ya: Saide Yehofa e si gaandiwan enke wan gudu? Saide den gaandi baala anga sisa pelensipali aini a olikanisâsi? San u mu du efu u wani fende wini fu den ondoofeni fu den gaandi baala anga sisa?

3. Enke fa Psalm 92:12-15 e soi, da saide Yehofa lobi den gaandi baala anga sisa aini a olikanisâsi?

³ Yehofa lobi den gaandi baala anga sisa di e dini en anga den hii ati, bika a sabi fa den de tuutuu aini den ati. Ai si den moin manii fu den. Ai teke en fu bigi taki den moo gaandiwan e teke ten fu leli taawan fa den sa du den wooko moo bun (Yopu 12:12; Odo 1:1-4). Yehofa e poolo anga den, bika ai si fa den e holidoo (Male. 3:16). A omen sani miti den den ten di pasa, ma toku noiti den gwe fika Yehofa. Nownow den biibi kon moo taanga, bika den anga  Yehofa toon moo bun mati. Den e tan du ala san den poi aini a peleikiwooko, winsi fa den yali fu den kon gwe kaba. A den sani ya meke Yehofa lobi den gaandi baala anga sisa fu u.​—Leisi Psalm 92:12-15.

4. San sa gi den gaandi baala anga sisa taanga-sikin?

⁴ Efu den yali fi i kon gwe kaba, holi a pakisei taki noiti Yehofa e feegete a taanga wooko di i du gi en den ten di pasa (Heb. 6:10). I be e peleiki fayafaya, i holidoo di tesi be e miti i. Te tyali sani be e miti i, yu á be e gwe fika Yehofa. Ala yuu i be e soi sama kiin san yu e biibi, winsi son famii anga taa sama á be e wani aliki. Te i be fende wan wooko aini a olikanisâsi, i be e du en anga i hii ati. Ala yuu i meke moiti fu du san i leli aini Beibel. Te sani kengi aini a olikanisâsi, ala yuu yu e wooko anga san den baala taki. Yehofa lobi i fu di i tan dini en. A paamisi wi aini en Wowtu taki: ‘Noiti a o gwe fika den sama di nai gwe fika en’ (Ps. 37:28). A paamisi u tu taki: ‘Winsi yu ede-uwii kon weti, mi o tan holibaka gi i’ (Yes. 46:4). Winsi fa i kon gaandi, toku i pelensipali aini a olikanisâsi fu Yehofa ete.

5. Sowtu sani den gaandi baala anga sisa mu holi a pakisei?

⁵ A omen sani den gaandiwan sa du aini a olikanisâsi. Winsi fa den á taanga moo enke fosi, toku den lai ondoofeni. Aini den paragraaf di e kon, wi o luku wantu fasi fa Yehofa be koboloiki den moo gaandiwan a fositen, anga fa ai koboloiki den aini a ten ya.

6-7. Sowtu toli aini Beibel e soi taki Yehofa e poti pakisei a den sama di e dini en anga den hii ati?

⁶ A omen toli wi e fende aini Beibel fu sama di be e wooko taanga gi Yehofa winsi fa den be gaandi. Mosesi a be wan fu den sama ya. Di a be abi 80 yali, Yehofa teke en fu wooko enke polofeiti gi en. Neen be mu tyai a foluku Islayeli puu a Egepte tu. Wan taa sama di be e wooko taanga gi Yehofa winsi fa a be gaandi, a polofeiti Daniyeli. A pisiten di Daniyeli be pasa 90 yali, Yehofa be e koboloiki en enke polofeiti ete. Apostel Yohanisi seefi a wan sama di be e wooko taanga gi Yehofa winsi fa a be gaandi. A pisiten di a sikiifi a  Beibel buku Openbaring, a be pasa 90 yali kaba.

⁷ Son wan fu den sama di be e dini Yehofa a fositen a ná be balinen man, toku Yehofa be e poti pakisei a den. A be e belesi den tu. Wan fu den sama ya a be Simeyon. Beibel nai taki omen sani fu a man ya, ma toku u sabi taki a wan sama di be e dini Yehofa anga en hii ati, neen meke Yehofa be gi en a gaandi fu si Yesesi di a be de beibi. Yehofa be meke a taki wan polofeititoli tu fu Yesesi anga en mma (Luk. 2:22, 25-35). A uman polofeiti Ana, a wan uman di be e dini Yehofa anga en hii ati. Na ala yuu a mma ya be e de na a tempel, winsi fa a be abi 84 yali. Noiti a be e misi komakandaa, neen meke Yehofa gi en a gaandi fu si Yesesi di a be de beibi. Yehofa soi kiin taki den tu sama ya be pelensipali gi en, winsi fa den be gaandi kaba.​—Luk. 2:36-38.

8-9. Fa den gaandi sisa di man dede kaba, e yeepi aini a olikanisâsi?

⁸ Aini a ten ya, a omen gaandi baala anga sisa e dini Yehofa anga den hii ati. Den yonkuuwan sa waka a den baala anga sisa ya baka. Luku a toli fu sisa Lois Didur. Di a sisa ya be abi 21 yali, a bigin du a spesuutu pioniliwooko aini Kanada. Baka di a toow, en anga en man John du a kelen wooko omen yali. Baka dati den wooko 20 yali langa na a beikantoo fu Kanada. Di Lois be abi 58 yali, den baala akisi en anga John fu foloisi go a Ukrainikondee. San den be o du? Den be o taki den gaandi tumisi fu foloisi go a wan taa kondee? We, den teke a wooko di den baala gi den. John be fende a gaandi fu wooko na a Beikantoo Komte aini a kondee pe den foloisi go. Ma 7 yali baka di den foloisi neen John kon lasi libi. Toku Lois tan du a wooko di den baala be gi en. Nownow a 81 yali a abi, toku ai du ala san a poi gi Yehofa ete. Den baala anga sisa na a beikantoo fu Ukrainikondee e teke a taanga wooko di a sisa ya e du fu bigi.

⁹ Leti enke Lois, a omen fu den gaandi sisa fu u man dede kaba. Neen meke den á poi du son sani moo. Ma dati á wani taki den á pelensipali gi Yehofa moo. Yehofa lobi a fasi fa den sisa ya holibaka gi den man omen yali langa. Ai teke en fu bigi taki den tan dini en anga den hii ati go doo, winsi fa den man dede kaba (1 Tim. 5:3). Ná pikin taanga-sikin den sisa ya e gi den moo yonkuuwan aini a kemeente.

10. Fa baala anga sisa aini a ten ya sa waka a Baala Tony baka?

¹⁰ A omen gaandi baala anga sisa fu wi e tan a gaansama peesi. Ma winsi pe den e tan, toku den pelensipali gi a olikanisâsi. Meke u luku a toli fu Baala Tony, di e tan a wan fu den peesi ya. A baala ya dopu aini augustus 1942 na Ameekankondee di a be abi 20 yali. Ma a á langa baka di a dopu neen lanti sende biifi gi en taki a mu go a  suudati. Di a á wani, neen den sooto en tu yali anga afu. En anga en uman Hilda kiya den tu pikin fu den a waaleiti. Aini den ten di pasa Baala Tony a be fesiman fu den owluman aini dii fu den kemeente di a be foloisi go. Neen be e luku a wooko fu den kelen owluman tu. Wan pisiten a be e go a wan sitaafu-osu fu sutudeli anga sama. A be e holi komakandaa na a sitaafu-osu tu. Nownow a 98 yali Baala Tony abi. Toku ai du ala san a poi gi Yehofa ete aini a kemeente pe a de nownow.

11. Fa u sa soi taki u lobi den baala anga sisa fu u di e tan a gaansama peesi?

¹¹ Fa u sa soi den baala anga sisa fu u di e tan a gaansama peesi taki wi e booko wi ede anga den? Den owluman mu yeepi den baala anga sisa ya fu e kon a den komakandaa anga a peleikiwooko. Taa peleikiman sa e go luku den tu. Efi yu á poi go luku den, i sa telefon den. U mu e du ala san u poi fu meke ten gi den gaandi baala anga sisa fu u di e tan a den sowtu peesi ya. Son leisi ai taanga gi den fu taigi taawan fa den e fii efuso sowtu booko-ede den abi. Ma efi yu abi pasensi, da i meke ten fu e du sani makandaa anga den, yu o fende wini fu a ondoofeni fu den. Kande den o gi i toli fu den sani di den du aini a olikanisâsi den ten di pasa.

12. Sowtu wini wi o fende te wi e poti pakisei a den gaandi baala anga sisa aini a kemeente?

¹² Efi yu e meke ten fu taki anga den gaandi baala anga sisa aini a kemeente fi i, yu o si taki a omen sani den du di e soi taki den biibi taanga. Wan sisa den e kai Harriette dini Yehofa omen yali langa aini a kemeente pe a be de a New Jersey, aini Ameekankondee. Ma bakaten a be abi fu foloisi go tan anga a umanpikin fi en. Den baala anga sisa aini a kemeente pe a go, meke moiti fu kon sabi a sisa ya bun. Di den du a sani ya, den si taki a omen sani den sa leli fu a biibi fu a sisa ya. A be e gi den toli fu a ten di a be bigin peleiki na a pisiten fu a yali 1925. A ten de, ala yuu te a be e go a peleikiwooko, a be e tyai wan tifibosoo aini en tasi, bika sikowtu be sa kisi en. Aini a yali 1933, a tu leisi sikowtu sooto a sisa ya wan wiki langa fu di a be e peleiki. Den ten di a be de a sitaafu-osu, neen man be e luku den dii pikin fu den. A man fi en a ná be Kotoigi, ma a be e holibaka gi en uman. Ala sama aini a kemeente sa fende wini fu den ondoofenitoli fu den gaandi baala anga sisa fu u.

13. Fa Yehofa e si den gaandi baala anga sisa aini a olikanisâsi?

¹³ Den gaandi baala anga sisa fu u pelensipali gi Yehofa anga a olikanisâsi fi en. Den biibi taanga, bika a omen fasi den si fa Yehofa e belesi a olikanisâsi fi en. Den si fa a belesi den tu fu di den e dini en. Den gaandiwan ya sa yeepi den moo yonkuuwan fu den á meke denseefi fowtu di den be meke di den be yonkuu. A omen wini wi e fende fu den ondoofeni fu den gaandi baala anga sisa fu u (Odo 18:4). Efi yu e meke moiti fu kon sabi den baala anga sisa ya moo bun, a biibi fi yu o kon moo taanga. A omen sani yu o leli tu.

14. Sowtu taanga-sikin Deitolonomi 32:7 e gi den yonkuuwan aini a kemeente?

¹⁴ Meke ten fu e taki anga den moo gaandiwan aini a kemeente. (Leisi Deitolonomi 32:7.) A tuu taki kande den nai si so bun moo, kande den á poi waka gaw so moo, efuso kande den ná abi a kaakiti di den be abi fosi moo, ma toku den yonkuu aini den ati ete. Den meke ‘wan bun nen’  a Yehofa aini den yali di pasa (Peleik. 7:1). Te yu e holi a pakisei saide den gaandiwan aini a kemeente pelensipali gi Yehofa, iseefi o bigin si den enke fa Yehofa e si den. Meke moiti fu de enke Elisa. Noiti Elisa gwe fika Eliya. A dei di den be o naki paati seefi, a omen leisi Elisa taigi en taki: ‘Mi ná o gwe fika i.’​—2 Kow. 2:2, 4, 6.

15. Sowtu akisi u sa poti gi den gaandi baala anga sisa fu u?

¹⁵ Efi i wani sabi den gaandi baala anga sisa moo bun, i sa poti akisi gi den (Odo 1:5; 20:5; 1 Tim. 5:1, 2). I sa akisi den taki: ‘Di i be moo yonkuu, san yeepi i fu biibi taki a disi na a tuu biibi?’ ‘Fa den sani di miti i yeepi i fu toon wan moo bun mati fu Yehofa?’ ‘San i si enke wan sama mu du efu a wani tan dini Yehofa anga piisii?’ (1 Tim. 6:6-8) Te den e taigi i san yeepi den, i mu aliki bun, bika den toli ya sa yeepi i fi iseefi á gwe fika Yehofa.

16. Sowtu wini gaandiwan anga yonkuuwan o fende te den e paa anga denseefi?

¹⁶ Te yonkuuwan anga gaandiwan e paa, na ala den tu man e fende wini (Rom. 1:12). Efi i gwenti gi toli anga den gaandiwan aini a kemeente, a sani ya o yeepi i fu biibi taki na ala yuu Yehofa e solugu den sama di e dini en. A gaandi baala efuso sisa o fii taki den yonkuuwan aini a kemeente lobi en. Den gaandi baala anga sisa fu wi o piisii fu taigi u fa Yehofa yeepi den aini den ten di pasa.

17. Saide u sa taki den gaandi baala anga sisa fu wi e moo moin gi Yehofa o moo den yali fu den e gwe?

¹⁷ Te wan sama moin a doose, te a kon gaandi, i nai si moo seefi taki a so a sama ya be moin. Ma te wan sama e dini Yehofa anga en hii ati, moo ai gaandi, moo ai moin gi Yehofa (1 Tes. 1:2, 3). Saide? O moo wan sama e dini Yehofa langa, o moo a santa yeye fu Yehofa e yeepi en fu kon abi manii di e meke Yehofa moo lobi en. Neen meke efu wi e meke moiti fu kon sabi den gaandi baala anga sisa fu u bun, da useefi o si den enke wan gudu leti enke fa Yehofa e si den.

18. San wi o luku aini a taa artikel?

¹⁸ Te gaandiwan anga yonkuuwan e libi bun anga denseefi, da sani o waka bun aini a kemeente. Aini a taa artikel, wi o luku fa den gaandiwan sa soi taki den lobi den yonkuuwan.