1-2. (a) Me vaka e tukuni ena Vosa Vakaibalebale 16:31, meda raici ira vakacava na tacida itabaqase yalodina? (b) Na taro cava eda na veivosakitaka ena ulutaga qo?

ENA dua na vanua ni gade mai Merika, e levu na vulagi e rawa nira raica na daimani ena delaniqele. Ia na daimani qori se bera ni vakasavasavataki. E levu gona era raica na daimani qori, era sega ni kila na ka era raica tiko ra qai lakosivita.

² O ira na tacida itabaqase yalodina era vaka na daimani qori, era iyau talei. Na Vosa ni Kalou e vakatauvatana na ulu sikoa me vaka na isala. (Wilika Vosa Vakaibalebale 16:31; 20:29) Ia ena rawarawa sara meda vakawalena. Nira kila na gone nira ka talei na itabaqase, era na rawata e dua na ka e uasivia na iyau vakayago. Eda na sauma ena ulutaga qo e tolu na taro: Na cava e raici ira kina na tacida itabaqase o Jiova mera iyau talei? Na cava na ituvatuva i Jiova me baleti ira? Na cava meda cakava me yaga kina vei keda na nodra ivakaraitaki?

3. Me vaka e tukuni ena Same 92:12-15, na cava e mareqeti ira kina na tacida itabaqase yalodina o Jiova?

³ Na Kalou o Jiova e mareqeti ira na tacida itabaqase yalodina. E kila vinaka na lomadra, nodra itovo vinaka, e mareqeta tale ga. E marautaka nira wasea vei ira na gone na ka era vulica ena nodra veiqaravi ena yalodina ena dua na gauna balavu. (Jope 12:12; Vkai. 1:1-4) E mareqeta tale ga o Jiova na nodra vosota. (Mala. 3:16) Era sotava  na leqa, ia e dei tiko ga nodra vakabauti Jiova. E serau tiko ga na nodra inuinui ni vakatauvatani kei na gauna era vulica kina na ka dina. E lomani ira o Jiova nira tukuna tiko ga yani na yacana “nira sa qase” mada ga.—Wilika Same 92:12-15.

4. Na cava ena vakayaloqaqataki ira na tacida itabaqase?

⁴ Ke sa toso tiko nomu yabaki ni bula, mo nanuma tiko ni o Jiova e sega ni guilecava na ka o cakava ena veigauna sa oti. (Iper. 6:10) O gumatua ni tokona na cakacaka vakavunau, e marautaka qori na Tamada vakalomalagi. O vosota na ituvaki dredre, eso mada ga e mosimosi. O tutaka na ivakatagedegede dodonu ena iVolatabu, o qarava e levu na itavi bibi, o vakavulici ira tale ga eso. O saga ena nomu vinaka mo toso tiko ga kei na isoqosoqo i Jiova. O tokona qai vakayaloqaqataki ira tale eso mera vakaliuca na veiqaravi vakatabakidua. E lomani iko vakalevu na Kalou o Jiova ni o yalodina. E yalataka ni na “sega ni biuti ira na nona tamata yalodina”! (Same 37:28) E vakadeitaka qo: “Au na keveti kemuni tiko ga me sikoa mada na ulumuni.” (Aisea 46:4) Ni sa toso tiko na yabaki ni nomu bula, kua ni nanuma ni sega na kemu yaga ena isoqosoqo i Jiova. O yaga dina!

5. Na cava mera vakasamataka tiko na itabaqase?

⁵ E levu na ka e rawa nira cakava na itabaqase. Sa na sega beka nodra kaukaua me vaka e liu, ia e levu sara na ka era vulica ena veiyabaki sa sivi. E rawa ni vakayagataki ira tiko ga o Jiova ena levu na sala, me vaka e laurai ena vica na ivakaraitaki ena gauna sa oti kei na gauna qo.

6-7. Tukuna eso na ivakaraitaki ni itabaqase ena iVolatabu era vakalougatataki ena nodra yalodina.

⁶ Eda raica ena iVolatabu na ivakaraitaki vinaka me baleti ira na yalodina ni qaravi Jiova tiko ga nira sa itabaqase. Me kena ivakaraitaki, sa rairai yabaki 80 o Mosese ni tekivu veiqaravi vakaparofita i Jiova, e matataka  tale ga na matanitu o Isireli. Sa rairai yabaki 90 vakacaca na parofita o Taniela, e vakayagataki koya tiko ga o Jiova me nona italai. Na yapositolo tale ga o Joni sa rairai yabaki 90 vakacaca ni uqeti vakalou me vola na ivola na Vakatakila.

⁷ E levu na itabaqase yalodina era sega ni kilai levu, e rawarawa sara nira sega ni kauaitaki. Ia e kilai ira o Jiova qai vakalougatataka na nodra yalodina. Me kena ivakaraitaki, e cavuti sara vakalekaleka ena iVolatabu na turaga “yalododonu qai yalodina” o Simione. Ia e kilai koya o Jiova qai vakavuna me raica na gonedramidrami o Jisu, e parofisaitaka tale ga na veika me baleta na gone kei tinana. (Luke 2:22, 25-35) Vakasamataka tale ga na parofita yalewa o Ana, e yada. E yabaki 84 ia “e sega vakadua ni yali mai na valenisoro.” E vakalougatataki vakalevu nona lako wasoma ina valenisoro mani raica na gonedramidrami o Jisu. Eda vulica gona ni o Jiova e mareqeti Simione kei Ana.—Luke 2:36-38.

8-9. Na cava e cakava e dua na tacida yalewa ena isoqosoqo i Jiova ni sa yada?

⁸ Ena gauna qo, e levu na itabaqase yalodina era ivakaraitaki vinaka vei ira na gone. Vakasamataka mada na ivakaraitaki nei Sister Lois Didur. E yabaki 21 ni tekivu painia lavotaki e Kenada. Ni oti qori, e tomani watina o John me vica vata na yabaki me rau veiqaravi vakaivakatawa ni tabacakacaka. Oti erau lai veiqaravi ena Peceli e Kenada me 20 vakacaca na yabaki. Ni sa yabaki 58 o Lois, rau sureti kei John me rau lai veiqaravi e Ukraine. Cava rau na cakava? Rau na tukuna ni rau sa rui qase me rau veiqaravi ena dua tale na vanua? Rau ciqoma na ilesilesi, mani lesi o John me lewe ni Komiti ni Tabana e kea. Oti e vitu na yabaki e takali o John. E mani vakatulewataka o Lois me veiqaravi tiko ga. Sa yabaki 81 qo o Lois, e veiqaravi tiko ga ena Peceli e Ukraine ra qai lomani koya vakalevu na lewenivuvale e kea.

⁹ Era na rairai sega ni kauaitaki vakalevu na yada me vakataki Lois ni vakatauvatani kei na gauna se bula kina o watidra. Ia era se talei tiko ga. O Jiova e mareqeti ira vakalevu na tacida yalewa era tokoni watidra me vica vata na yabaki ra qai yalodina tiko ga ena gauna qo. (1 Tim. 5:3) Era dau vakayaloqaqataki ira tale ga na itabagone.

10. Na cava eda vulica vei Tony?

¹⁰ E levu na itabaqase yalodina era tiko ena valenimalumalumu era iyau talei vakayalo. Me kena ivakaraitaki, e dua na tacida na yacana o Tony, e tiko ena valenimalumalumu. E papitaiso e  Pennsylvania, Merika ena Okosita 1942 ni yabaki 20. Sega ni dede sa vakatovolei ena tawaveitovaki, mani bala e valeniveivesu me rua veimama na yabaki. E rua na luvedrau kei watina o Hilda, rau vakavulici rau ena dina. Toso na gauna e veiqaravi o Tony ena tolu na ivavakoso me ivakatawa daulewa (sa kilai nikua me kodineita ni ilawalawa qase), e veiqaravi tale ga me ivakatawa ni soqo ni tabacakacaka. E liutaka na soqoni kei na vuli iVolatabu e valeniveivesu. Ni sa yabaki 98 o Tony, e sega ni cegu na veiqaravi. E solia tiko ga nona vinaka me qaravi Jiova qai cakacaka vakavoleka kei ira na mataveitacini ena nona ivavakoso!

11. Eda na vakaraitaka vakacava nida mareqeti ira na tiko ena valenimalumalumu?

¹¹ Eda na rokovi ira vakacava na tacida itabaqase era tiko ena valenimalumalumu? Ke rawa, o ira na qase ni ivavakoso mera okati ira na itabaqase ena ituvatuva ni ivavakoso. Meda kauaitaki ira nida sikovi ira se sureti ira meda veivosaki ena vidio. Eda na kauaitaki ira vakalevu na tacida itabaqase era vakaitikotiko ena valenimalumalumu e rairai yawa mai na nodra ivavakoso. Ke da sega ni kauai tiko, eda rawa ni guilecavi ira na tacida itabaqase qo. Eso e sega ni rawarawa mera tukuna na ka me baleti ira, se ra nanuma ni sega ni veiganiti. Ia ena yaga vakalevu nida tarogi ira qai rogoca vinaka na ka era tukuna nira marautaka ena isoqosoqo i Jiova.

12. Na cava e rawa nida raica ena noda ivavakoso?

¹² Eda na rairai kurabui nira tiko sara ga ena noda ivavakoso eso na tacida itabaqase era ivakaraitaki vinaka. Dua na tacida yalewa o Harriette, e qaravi Jiova ena yalodina me vica vata na yabaki ena ivavakoso e lewena e New Jersey, Merika. Oti mani toki vei luvena yalewa. Era saga na mataveitacini ena nona ivavakoso vou mera kilai koya, ra qai raica ni iyau mareqeti. E vakayaloqaqataki ira ena italanoa ni cakacaka vakavunau ni tekivu vulica na ka dina ena veiyabaki ni 1920. Ena gauna ya, e dau kauta tiko ga na nona ibarasi ni bati ni lai vunau de lakolako e vesu. Ena 1933 e vesu vakarua mani tiko e valeniveivesu me dua na macawa. E sega ni tiko ena dina o watina, e dau tokoni koya me raici ratou tiko na tolu na luvedrau gone ena gauna e vesu kina. Io, e dodonu ga mera rokovi na mataveitacini itabaqase yalodina me vakataki Harriette!

13. Na cava eda vulica vei ira na itabaqase ena isoqosoqo i Jiova?

¹³ Era bibi vei Jiova kei na nona isoqosoqo na tacida itabaqase. Era raica na sala e vakalougatataka kina vakalevu o Jiova na nona isoqosoqo kei na nona vakalougatataki ira. Era vuli vakalevu mai na nodra cala. Meda raici ira na itabaqase mera “ivurevure ni vuku” qai vuli ena nodra ivakaraitaki. (Vkai. 18:4) Ke o saga mo kilai ira, ena dei na nomu vakabauta, o na vulica tale ga e levu na ka!

14. Na cava era uqeti mera cakava na gone ena Vakarua 32:7?

¹⁴ Mo vakaliuliu mo vosa vei ira na itabaqase. (Wilika Vakarua 32:7.) Io, sa rairai buawa na matadra, berabera nodra taubale, rairai berabera tale ga na nodra vosa. Ia era se gumatua tiko ga, e ‘rogo vinaka na yacadra’ vei Jiova.  (Dauv. 7:1) Nanuma tiko ni se mareqeti ira tiko ga o Jiova. Meda rokovi ira tiko ga. Meda vakataki Ilaisa. E vinakata me volekati Ilaija tiko ga ena iotioti ni siga rau veiqaravi vata kina. E vakatolu nona tukuna o Ilaisa: “Au na sega ni biuti iko.”—2 Tui 2:2, 4, 6.

15. Na taro cava eda rawa ni taroga vei ira na itabaqase?

¹⁵ Mo kauaitaki ira na itabaqase ni o tarogi ira ena eso na taro. (Vkai. 1:5; 20:5; 1 Tim. 5:1, 2) Mo taroga na taro me vaka: “Ni o se gone, o vakadeitaka vakacava ni o sa kunea na dina?” “E yaga vakacava na ka o sotava mo toro voleka kina vei Jiova?” “Na cava e vukei iko mo marautaka tiko ga nomu qaravi Jiova?” (1 Tim. 6:6-8) Oti mo rogoca vinaka nira talanoa.

16. Ena yaga vakacava nodrau veivosaki e dua na itabaqase kei na dua e gone?

¹⁶ Ena yaga nodrau veivosaki e dua na itabaqase kei na dua e gone. (Roma 1:12) Ena vakadeitaka kina o koya e gone ni o Jiova e dau kauaitaki ira na nona dausokalou yalodina, ena dokai tale ga kina na itabaqase. Era na marautaka na itabaqase mera tukuna vei kemuni na gone na sala e vakalougatataki ira kina o Jiova.

17. Na cava eda kaya kina nira rairai vinaka tiko ga na itabaqase yalodina ni toso na yabaki?

¹⁷ Ena seavu yani na keda totoka ni toso na yabaki. Ia o ira na yalodina vei Jiova era rairai vinaka tiko ga vua ni toso na yabaki. (1 Ces. 1:2, 3) Na vuna? Era yalorawarawa tiko ga me vakavulici ira na yalo tabu ra qai bucina na itovo vinaka. Na levu ga ni noda kilai ira vinaka na itabaqase mareqeti qo, rokovi ira qai vuli vei ira, na levu tale ga ni noda okati ira mera iyau talei!

18. Na cava eda na veivosakitaka ena ulutaga tarava?

¹⁸ Ena dei tiko ga na ivavakoso nira mareqeti ira na itabaqase na gone ra qai mareqeti ira na gone na itabaqase. Ena ulutaga tarava, eda na veivosakitaka na sala era mareqeti ira kina na gone ena ivavakoso na itabaqase.