1-2. a) Bichi rhwakayiga kugerera Mezali 16:31 oku bilolere okuntu rhunabona bene-berhu na bali-berhu bashajire? b) Bibazo bihe rhwashubizako mu gunola mwazi?

ABAHISI banazigana kulambagirira eparke ye Arkansas omu Etats-Unis, banazigana kubugana ediama ahashi oku budaka. Aliko ezola diama ziba eyi zichili zoshi-zoshi eyi zinashushire mabale nya mabale, eyi ntanaye osaga zihumako. Echola chanarhuma banene barhabona oku amola mabale mali m’akamaro n’oku marhasimisize.

² Mango maguma, abola bene-berhu na bali-berhu bashajire, bakaba kuguma n’ezola diama. Bali b’akamaro bwenene. Echinwa cha Mungu chihuzenye envi z’abola bene-berhu na bali-berhu bashajire n’echishema. (Osome Mezali 16:31; 20:29) Byakarhukomerera okubabona oku bali b’akamaro. Amango abachili misole bamamenya oku abakala bashajire bali b’akamaro, eyi bamagwarha echintu ch’akamaro bwenene kulusha nk’oku bakagwarha obuchire. Mu gunola mwazi, rhwashubiza ku bibazo bisharhu: Bulagurhe Yehova anabona bene-berhu na bali-berhu bashajire bali bimana oku bali b’akamaro? Bulagurhe abola bene-berhu na bali-berhu bashajire bali b’akamaro omu lubaga lwa Yehova? Bichi rhwakayiga kugerera emifano yabo?

3. Nk’oku olwandiko lwa Zaburi 92:12-15 luyerekene, bulagurhe bene-berhu na bali-berhu bashajire bali bimana bali b’akamaro embere za Yehova?

³ Bene-berhu na bali-berhu bashajire bali bimana bali b’akamaro embere za Yehova Mungu. Anababona bali bantu ba nyabachi, anasimisizwe n’engeso zabo zinja. Anayunva asimire  amango amabona bene-berhu na bali-berhu bashajire bah’emisole oku bwengehe babwene mw’eyi myaka yoshi y’obwimana omu kasi. (Yob. 12:12; Mez. 1:1-4) Kandi Yehova anabona ok’okulembera kwabo kuli kw’akamaro bwenene. (Mal. 3:16) Bagwerhe ebibazo bikomere omu kalamo kabo, aliko banagendereza kukomeza obwemere bwabo mu Yehova. Obulangalire bwabo bw’esiku zayinjire, bukomere kulusha amango barhonderaga kuyiga okuli. Na Yehova abazigiire bulala bagenderere kuhamiriza ezino lyage “chiro n’omu myaka yabo y’obushaja.”—Osome Zaburi 92:12-15.

4. Binwa bihe byakaheba omurhima bene-berhu na bali-berhu bashajire?

⁴ Akaba oli wayegera emyaka y’obushaja, ochizere oku Yehova anayibuka ebi wakolere omu myaka yagerere. (Ebr. 6:10) Wayerekene obushiru omu kasi k’okuhubiri, n’ebyola byasimisa Darha w’embingu. Walembere ebibazo kuhebamo na balala bakugayisize bwenene. Wakengere n’okuderhera amakanuni me Biblia, wagenderere kushishikala engabane zikomere bwenene omu lubaga lwa Yehova, wanakoomeza n’abandi. Wachihanganire omu kuchikoomeza bintu binene olubaga lwa Yehova luli lwahindamula. Warhabere n’okuheba omurhima balala bali omu kasi k’amango moshi. Yehova Mungu akuzigiire bwenene bulala oli mwimana. Alaganyize oku “arhakalekerera abimana bage”! (Zb. 37:28) Akuhere chinola chilagane: “Kugera amango erhwe lyawe lyamera envi, nji nakurhabala.” (Isa. 46:4) Bobola omenye wawaza oku bulala okala oshajire orhachigwerhe kamaro omu lubaga lwa Yehova. Oli w’akamaro bwenene!

5. Bichi balala bashajire bakwanene kubika omu bwenge?

⁵ Bene-berhu na bali-berhu bashajire bakakoleswa omu lubaga lwa Yehova mu njira zinene. Chiro bakaba oku barhachigwerhe misi nk’eyi baligwerhe mira, bagwerhe binene bagereremo mu myaka minene. Yehova akagenderera kubakolesa mu njira zinene nk’oku emifano ya mira n’eya buno eyerekene.

6-7. Lerha emifano y’omu Biblia y’abashajire babwene emigisho eju y’akasi kabo k’obwimana.

⁶ Ebiblia egwerhe emifano minja y’abimana  bakolere Yehova n’obushiru omu myaka yabo y’obushaja. Omufano, Musa aligwerhe myaka 80 ntya amango Yehova amushimikaga nka mulebi na mwimangizi w’eshanja lye Izraeli. Yehova aligenderere kukolesa Danieli nka mulebi amango aligwerhe nka myaka 90 ntya. N’entumwa Yowane naye nkabaga aligwerhe myaka 90 ntya amango eroho lya Yehova limuyerekeza ayandike echitabu cha Ufunuo.

⁷ Banene omu bimana ba mira, barhaliri bantu bamenyikene bwenene bakanasuzagwirwe juba-juba. Aliko Yehova yewe aliri ababona n’okubahemba eju y’obwimana bwabo. Omufano, mulume muguma “w’okunali onayubahire Mungu” oyirikirwe Simiyoni orhaderhwaga kanene omu Biblia, aliko Yehova alimumenyere bwinja anamuha olukengo l’okubona akabonjo Yesu, anahana obulebi oku bilolere oyola mwana haguma na nyina. (Lu. 2:22, 25-35) Rhushube rhuwaze oku mulebi-kazi Ana w’omukana. Aligwerhe myaka 84 aliko nta “lusiku abulirwe omu hekalu.” Yehova amugisha bulala arhaliri abulwa omu hekalu kandi anarhuma abona akabonjo Yesu. Simiyoni na Ana bombi baliri b’akamaro embere za Yehova.—Lu. 2:36-38.

8-9. Bichi mwali-werhu muguma ajirire omu lubaga lwa Yehova amango abaga mukana?

⁸ Mu manola mango, bene-berhu na bali-berhu bashajire bali bimana bali mifano minja bwenene oku misole. Rhulole omufano gwa mwali-werhu Lois Didur. Aligwerhe myaka 21 amango ahwanzaga kola nka painiya ominuzize omu Kanada. Enyuma y’ahola, yewe haguma n’eba John, bageza myaka minene omu kasi k’okulambagirira ebibaga. Enyuma w’aho, bakolera oku Beteli y’omu Kanada mu myaka erhalukire 20. Amango Lois agwarha myaka 58, yewe na John bahabwa eyindi ngabane y’okuja kolera omu Ukraine. Gurhe balijirire? Baliderhere oku bashajire n’oku barhakagala kuhamira omu chindi chihugo si? Bayemera eyola ngabane, na John ahwanza kukola omu Komite y’Omurhabi gw’eyola munda. Enyuma wa myaka 7 John afire, Lois agenderera n’engabane yage. Zene, Lois akala agwerhe myaka 81, aly’agenderera kukolera Yehova oku bwimana omu mulala gwe Beteli ye Ukraine, na boshi bamuzigiire bwenene.

⁹ Abakana bali nka Lois bakayinja babona nka barhali b’akamaro nk’okubaliri amago b’eba balichiliho; aliko obukana burhapungwize akamaro bagwerhe. Yehova agenderere kubona bali-berhu balirhabere b’eba mu myaka minene banagenderere kumukolera oku bwimana oku bali b’akamaro bwenene. (1 Ti. 5:3) Oku bwindi, bali bahira omurhima bwenene abachili misole.

10. Mufano guhe gwinja Tony arhulekere?

¹⁰ Bene-berhu na bali-berhu banene bashajire banali bimana balamire omu maju m’okubashishikala, nabo bali b’akamaro. Omufano, mwene-werhu oyirikirwe Tony, alamire  mw’amola maju zene. Abatizwaga ey’agwerhe myaka 20 omu Pennsylvania, Etats-Unis, omu Mwezi gwa 8, 1942. Amalire kubatizwa, bamubwira oku aje omu chisoda, bulala alilahire kujira ntyo, bamukabula omu pirizo, bamushweka myaka ebiri n’enusu. Yewe na mukage Hilda balirhabere abana babo babiri bamenye okuli. Enyuma w’emyaka, Tony akola nka mushamuka mwimangizi mu bibaga bisharhu (eyi bakala baderha zene mwimangizi w’ebaraza ly’abashamuka) na mwimangizi w’embuganano y’omuzunguluko. Aliri alambagirira epirizo n’okuongoza embuganano n’amafunzo me Biblia omola. Mu myaka 98, Tony arhaliri aleka kukola akasi ka Yehova. Aly’agenderera kukola bwinja omu kasi ka Yehova n’okukola haguma na bene-berhu na bali-berhu omu chibaga!

11. Nka gurhe rhwakayereka abola bene-berhu na bali-berhu bashajire balamire omu maju m’okubashishikala oku bali b’akamaro?

¹¹ Nka gurhe rhwakayereka olukengo bene-berhu na bali-berhu bashajire balamire omu maju m’okubashishikala? Amango byamagalikana, abashamuka bakabarhabala bayunvirize embuganano n’okuhubiri. Rhwakabayereka oku rhubalagireko omu kubarhangula changwa kubahamagala kugerera evideo. Rhulonzeze kuyereka bene-berhu na bali-berhu bashajire balamire omu maju m’okubashishikala mali hale n’ebibaga byabo oku rhubalagireko bwenene. Akaba rhurhabere masu, rhwakayibagira abola bene-berhu na bali-berhu bashajire. Amango rhwamaganira na bene-berhu na bali-berhu bashajire, baguma banabona nka birhayorohere changwa kuchiyunva oku birhahemere kuganira oku kalamo kabo. Aliko byakarhuheba omurhima bwenene amango rhwamarhola akasanzi k’okubabaza ebibazo n’okubayunviriza amango bali baderha oku mwishingo babwene omu kukolera olubaga lwa Yehova.

12. Bene-berhu na bali-berhu bali gurhe rhwakabugana omu chibaga cherhu?

¹² Rhwakasomerwa okubona oku hali emifano y’akamaro bwenene ya bene-berhu na bali-berhu bashajire bali bimana omu chibaga cherhu. Mwali-werhu muguma oyirikirwe Harriette akolere Yehova oku bwimana mu myaka minene omu chibaga chage omu New Jersey, Etats-Unis. Enyuma w’ahola, ahamire aja kulama na mwali-wage. Bene-berhu b’omu chibaga chihyahya ahamiragamo barhola akasanzi k’okumumenya bwinja, banayinja kubona oku ali wakamaro bwenene. Abaheba omurhima kugerera engani z’akasi k’amahubiri akolaga burhanzi amango amenya okuli omu 1920. Mu amola mango, ey’akajire kuhubiri, anaheka omuswagi gwage bulala hali oku bakamushweka n’okumuhira omu pirizo. Kweri, omu mwaka gwa 1933, bamushweka anamala eboso omu pirizo. Amola mango, eba orhaliri Muhamirizi, aliri arhabala mukage. Amango aliri omu pirizo, oyola eba aliri ashishikala abana babo basharhu. Okuderha okuli, abashajire bali nka Harriette, bakwanene kukengwa!

13. Bichi rhwayigire oku bilolere akamaro bene-berhu na bali-berhu bashajire bagwerhe omu lubaga lwa Yehova?

¹³ Bene-berhu na bali-berhu bashajire bali b’akamaro bwenene embere za Yehova n’omu lubaga lwage. Babwene mu njira zinene gurhe Yehova abagisha haguma n’olubaga lwage. Bayigire masomo manene m’akamaro kugerera amagosa baliri bakola. Obabone nka “shoko y’obwengehe,” onayige binene kugerera ebi bagereremo. (Mez. 18:4) Okarhola akasanzi k’okubamenya bwinja, obwemere bwawe bwakakomera kandi wayiga binene!

14. Bichi olwandiko lwa Kumbukumbu la Torati 32:7 luhebere emisole omurhima bajire?

¹⁴ Ochirholere akasanzi k’okuganira haguma na bene-berhu na bali-berhu bashajire. (Osome Kumbukumbu la Torati 32:7.) Nkabaga barhachili babona bwinja, barhachili balambagira juba-juba, nkabaga barhanachiderha bwinja aliko bachilonzeze kukola n’obushiru omu kasi ka Yehova, banachijirire “ezino linja” embere za Yehova. (Muh. 7:1) Oyibuke bulagurhe Yehova anababona oku bali b’akamaro. Ogenderere kubayereka ok’obakengere. Obe kuguma na Elisha. Alihanzikire oku ayorha na Eliya omu siku zage z’obuzinda. Elisha aliderhere ntya kasharhu: “Ntakuleka.”​—2 Fa. 2:2, 4, 6.

15. Bibazo bihe rhwakabaza abakala bashajire?

¹⁵ Oyereke bene-berhu na bali-berhu bashajire oku kweri obalagireko omu kubabaza ebibazo byarhuma baderha okuntu bali bachiyunva. (Mez. 1:5; 20:5; 1 Ti. 5:1, 2) Wakababaza ebibazo bili nk’ebila: “Amango walichili musole, bichi byakuyemezaga oku wabwene okuli?” “Nka gurhe ebi wagereremo omu kalamo byakurhabere ogwarhe obwira bukomere haguma na Yehova?” “Bichi byakurhabere y’ogenderera kugwarha omwishingo omu kasi ka Yehova?” (1 Ti. 6:6-8) Wanaja wayunviriza amango bali bakubalira engani zabo.

16. Nka gurhe enganiro y’omushaja n’ochili musole yakahebabo bombi omurhima?

¹⁶ Amango okala ashajire n’ochili musole bali baganira haguma, bombi eyi bali bahirana omurhima. (Ro. 1:12) Wakachiyunva osimisizwe okubona okuntu Yehova anashishikala abakozi bage bimana, kandi abashajire banachiyunva bazigiirwe. Ayunva asimire okukubalira oku migisho Yehova amuhere.

17. Bulagurhe rhwakaderha oku bene-berhu na bali-berhu bimana bashajire bali bagenderera kuba benja mwaka oku gwindi?

¹⁷ Obwinja bw’embuga bunahwa oku emyaka eli yagera, oli mwimana yewe, anagenderera kuba mwinja embere za Yehova oku emyaka enali yagera. (1 Te. 1:2, 3) Bulagurhe bili by’okuli? Bulala oku emyaka eli yagera, eroho lichesibwa lya Mungu lyaliri lyabakoomeza n’okubarhabala bakuze engeso zinja. Oku rhwagenderera kumenya bene-berhu na bali-berhu bazigirwa bashajire, ku rhwanabakenga n’okuyiga emifano yabo minja, intyo ku rhwababona oku bali b’akamaro bwenene!

18. Bichi nji rhwashamabalako omu Mwazi gukulikire?

¹⁸ Echibaga chinakomera bwenene amango emisole eli yabona oku abashaja bali b’akamaro n’amango abashajire nabo bali babona oku emisole nayo eli y’akamaro. Omu mwazi gwerhu gukulikire, nji rhwaganira nka gurhe abashajire bakabona oku emisole eli y’akamaro omu chibaga.