1-2. (a) Aonega Herevadia 16:31 hegeregerena, buruka taudia be edena bamona ita lalodia be namo? (b) Inai atikol ai dahaka henanadai do ita haerelaidia?

DAIMON nadi be idia hagoevaia lasi bona utua lasi neganai, do ia diaridiari lasi. Unai dainai bema ta be daimon nadi ia itaia, do ia laloparara lasi unai be dava bada gauna, bena do ia raka hanaia sibona.

² Dala haida ai, iseda buruka taudia be unai daimon nadi bamona, idia be dava bada gaudia. Baibel ia gwau hui kurokuro be mai ena hairai. (Aonega Herevadia 16:31 duahia; 20:29) To, nega haida ita laloparara lasi idia be dava bada gaudia bamona. Bema matamata taudia idia laloparara buruka taudia be mai anina bada, idia be daimon ia hereaia gauna idia davaria unai. Inai atikol lalonai inai henanadai toi do ita haerelaia: Dahaka dainai Iehova ese buruka taudia ia laloa bada? Dahaka dainai Iehova ena orea lalonai idia be mai anina bada? Dahaka do ita karaia idia amo diba ita abia totona?

3. Salamo 92:12-15 hegeregerena, dahaka dainai Iehova ese buruka taudia ia lalodia bada?

³  Iehova Dirava dekenai buruka taudia be mai anina bada. Ia ese edia kudouna ai idia noho gaudia ia itaia bona edia kara namodia ia laloa bada. Buruka taudia be lagani momo lalonai Iehova idia hesiai henia dainai, edia aonega be matamata taudia dekenai idia hadibaia neganai, Iehova ia moale. (Iobu 12:12; Aon. 1:1-4) Iehova ese edia haheauka karana ia laloa bada danu. (Mal. 3:16) Ena be edia mauri lalonai hekwakwanai momo idia davaria, to Iehova idia abidadama henia noho. Hereva momokani idia abia negana  amo ema bona hari edia abidadama ia goada noho. Bona Iehova ese ia lalokau henidia, badina “ena be idia buruka momokani,” to ena ladana idia harorolaia noho.​—Salamo 92:12-15 duahia.

4. Dahaka ese buruka taudia ia hagoadaia diba?

⁴ Bema oi be oi buruka oi lao noho, namona be oi diba Iehova ese guna oi karaia hesiai gaukaradia ia laloatao. (Heb. 6:10) Oibe, mai goada ida haroro gaukara oi karaia bona unai ese iseda guba Tamana ia hamoalea. Oi ese hahetoho badadia bona lalohisihisi gaudia danu oi haheaukalaia. Baibel ena kara maoromaoro taravatudia oi badinaia, orea lalonai maduna oi huaia namonamo, bona ma haida dekenai treinini oi henia. Danu oi gaukara goada Iehova ena orea ese ia karaia senisi momo oi badinaia totona. Oi ese ful-taim hesiai gaukara idia karaia taudia ma haida oi hagoadaia. Iehova Dirava oi badinaia noho dainai, oi ia lalokau henia bada. Ia gwauhamata, “ia idia badinaia taudia do ia rakatania lasi”! (Sal. 37:28) Bona ia gwau: “Lau ese umui do lau durua ela bona emui huina idia kurokuro.” (Isa. 46:4) Unai dainai, namona be umui diba kongrigeisen lalonai umui be mai anina bada!

5. Buruka taudia ese dahaka idia laloatao be namo?

⁵ Buruka taudia be dala momo ai heduru idia henia diba. Ena be hari edia goada be guna bamona lasi, to edia diba bona aonega be bada herea. Iehova ese dala idauidau ai buruka taudia ia gaukaralaia noho, bona guna Baibel sivaraidia bona inai nega ai tadikaka taihu edia sivarai ese unai ia hamomokania.

6-7. Baibel lalonai buruka taudia haida edia abidadama dainai, Iehova ese ia hanamodia sivaraina mani oi herevalaia.

⁶ Baibel lalonai Iehova idia hesiai henia buruka taudia edia haheitalai namodia idia noho. Hegeregere, Mose ena mauri lagani be 80 neganai, Iehova ena peroveta gaukara ia karaia matamaia bona Israela besena ia gunalaia. Daniela ena  mauri lagani be reana 90 ia hanaia vadaeni, to Iehova ese ia gaukaralaia noho ia peroveta totona. Bona aposetolo Ioane ena mauri lagani be 90 bamona neganai, Iehova ena lauma helaga ese ia hasiahua Apokalupo bukana ia torea totona.

⁷ Baibel lalonai abidadama buruka taudia momo edia sivarai idia noho, to taunimanima ese idia diba namonamo lasi. To, Iehova be idia ia diba bona edia badinaia karana dainai ia hanamodia. Hegeregere, “kara maoromaoro bona Dirava ia gari henia tauna” Simeona be Baibel ese ia sivarailaia momo lasi, to Iehova be ia ia diba bona hahenamo ia henia beibi Iesu ia itaia bona unai natuna bona ena sinana ia perovetalaia. (Luka 2:22, 25-35) Mani peroveta hahinena Ana ita laloa, ia be vabu ta. Iena mauri lagani be 84 to “hanaihanai dubu helaga dekenai ia lao” dainai, Iehova ese ia hanamoa bona beibi Iesu ia itaia. Oibe, Iehova ese Simeona bona Ana ia lalodia bada.​—Luka 2:36-38.

8-9. Kongrigeisen lalonai vabu be dahaka heduru idia henia?

⁸ Hari inai negai, matamata taudia dekenai buruka taudia momo be haheitalai namona. Mani taihu Lois Didur ena sivarai ita laloa. Ena mauri lagani be 21 neganai, Canada dekenai spesel painia ia hamatamaia. Unai murinai ia bona ena adavana, John, be lagani momo lalonai sekit gaukara idia karaia. Gabeai, Canada Betele dekenai lagani 20 mai kahana idia gaukara. Lois be 58 neganai, ia bona John be asainmen matamata idia abia bona Ukraine dekenai idia lao. Dahaka do idia karaia? Idia laloa idia buruka dainai tano ma ta dekenai hesiai gaukara do idia karaia lasi, a? Lasi, unai asainmen idia abia dae bona Ukraine ai, John be Brens Komiti gaukara ia karaia. Lagani 7 murinai John ia mase, bona Lois be ena lalona ia hadaia Ukraine ai ia noho totona. Hari, Lois ena mauri lagani be 81, bona Ukraine Betele dekenai Iehova ia do hesiai henia noho. Ibounai ese ia idia lalokau henia bada.

⁹ Lois bamona, vabu momo idia noho bona idia be mai anina bada. Iehova ese taihu ia lalodia bada, badina lagani momo lalonai edia adavana ida hesiai gaukara idia karaia bona hari Iehova idia do hesiai henia noho. (1 Tim. 5:3) Unai sibona lasi, to idia ese matamata taudia idia hagoadaia bada.

10. Tony be dahaka haheitalai namona ia hahedinaraia?

¹⁰ Iehova dekenai abidadama buruka taudia ibounai be mai anina bada. Hegeregere, buruka tadikaka ta ladana Tony be buruka taudia idia naria rumana ai ia noho. Ia be August 1942 ai Pennsylvania, U.S.A dekenai ia bapatiso, unai negai ena  mauri lagani be 20. Daudau lasi murinai ia idia doria tuari lalonai ia vareai totona to ia ura lasi dainai, lagani rua mai kahana dibura ruma ai ia noho. Ia bona ena adavana Hilda, ese edia natudia rua idia durua Iehova idia tura henia totona. Lagani gunadia ai, Tony be kongrigeisen toi edia hakaua naria tauna (hari unai be elda orea ena kodineita) bona danu sekit hebouhebou ia naria. Ia ese dibura ruma ta dekenai hebou ia hakaua bona Baibel stadi ia karaia. Tony ena mauri lagani be 98, to Iehova ia hesiai henia noho. Ia gaukara goada noho ena kongrigeisen ai tadikaka taihu ida Iehova idia hesiai henia totona!

11. Edena dala ai ita hahedinaraia sibona idia noho, eiava witnes lasi ruma bese ida idia noho buruka taudia ita laloa bada?

¹¹ Edena dala ai ita hahedinaraia sibona idia noho eiava witnes lasi ruma bese ida idia noho burukadia ita laloa bada? Bema hegeregere, elda taudia ese unai bamona buruka taudia idia durua, hebou idia lao bona haroro gaukara idia karaia totona. Bona idia ita vadivadi henia eiava fon amo ita rini henia diba. Namona be ita hahedinaraia idia ita laloa bada. Namo lasi idia ita laloaboio. Buruka tadikaka taihu ita hereva henia neganai, nega haida ia auka edia lalohadai idia gwauraia totona. To, bema nega ita atoa bona idia ita nanadaia Iehova ena orea lalonai idia davaria ekspiriens idia gwauraia neganai, unai ese ita do ia hagoadaia bada.

12. Iseda kongrigeisen lalonai edena bamona taudia idia noho? Haheitalai gwauraia.

¹² Iseda kongrigeisen dekenai haheitalai namona idia hahedinaraia buruka taudia idia noho. New Jersey, U.S.A. ai taihu ta ladana Hariette be lagani momo lalonai ena kongrigeisen dekenai Iehova ia hesiai henia. To gabeai ia lao ena natuna kekeni ida ia noho. Ena kongrigeisen matamata dekenai tadikaka taihu be ia idia bamoa neganai, ia amo gau momo idia dibaia. Lagani 1920 ai hereva momokani ia dibaia neganai, ia karaia haroro gaukara ena sivarai momo ia gwauraia. Unai negadia ai, ia haroro neganai isena huria barasi ta ia abia loaloa, badina ia laloa pulisi ese ia do idia dogoatao bona dibura ruma ai dina haida do ia noho. Oibe, lagani 1933 ai nega rua ia be dibura ruma ai wiki ta ia noho. Unai negai ena Witnes lasi adavana ese edia natudia maragidia toi ia naria. Momokani, Hariette hegeregerena buruka taudia ita lalodia bada be namo!

13. Iehova ena orea lalonai idia noho buruka taudia amo dahaka ita dibaia?

¹³ Iehova bona ena orea dekenai buruka taudia taihu be mai anina bada. Iehova ese dala idauidau ai, ena orea bona ena taunimanima ta ta ia hanamoa dalana idia itaia. Bona idia karaia kerere haida amo mai anina bada gaudia idia dibaia. Namona be idia amo diba oi abia, badina edia “aonega be sinavai maragina bamona.” (Aon. 18:4) Bema idia oi bamoa totona nega oi atoa, unai ese emu abidadama do ia hagoadaia bona gau momo do oi dibaia!

14. Deuteronomi 32:7 ese matamata taudia ia hagoadaia dahaka idia karaia totona?

¹⁴ Nega oi atoa buruka taudia oi hereva henia totona. (Deuteronomi 32:7 duahia.) Momokani, ena be edia matana ia dibura, idia raka bona hereva metairametaira, to edia lalona be ia goada bona Iehova vairanai “ladana namona” idia abia. (Had. 7:1) Iehova ese  idia ia laloa bada ena badina oi laloatao. Idia oi matauraia noho. Elisaia oi tohotohoa. Ia ura dikadika Elia ena badinai ia noho. Elisaia be nega toi ia gwau: “Lau ese oi do lau rakatania lasi.”​—2 Kin. 2:2, 4, 6.

15. Buruka taudia dekenai dahaka henanadai ita henia diba?

¹⁵ Buruka taudia ita laloa bada dalana ta be mai hemataurai ida do ita henanadai henidia. (Aon. 1:5; 20:5; 1 Tim. 5:1, 2) Hegeregere idia ita nanadaia: “Oi matamata neganai, dahaka ese emu lalona ia veria hereva momokani oi dibaia totona?” “Edena dala ai oi dekenai idia vara gaudia ese oi ia durua Iehova kahirakahira oi lao totona?” “Dahaka ese oi ia durua mai moale ida Iehova oi hesiai henia totona?” (1 Tim. 6:6-8) Bena edia sivarai idia gwauraia neganai oi kamonai namonamo.

16. Edena dala ai buruka bona matamata tauna ese ta ta idia hagoadaia diba?

¹⁶ Buruka tauna bona matamata tauna idia herevahereva neganai, ta ta idia hagoadaia. (Roma 1:12) Matamata tauna do ia abia dae momokani Iehova ese ena hesiai taudia ia laloa bada. Bona buruka tauna do ia mamia ia idia lalokau henia. Unai dainai, ia be mai moale ida matamata tauna dekenai Iehova ese ia hanamoa daladia do ia herevalaia.

17. Dahaka dainai ita gwau diba buruka taudia be mai edia hairai?

¹⁷ Ta ena mauri lagani ia bada neganai iena tauanina ena hairai ia boio, to Iehova dekenai ia idia badinaia noho taudia be mai edia hairai. (1 Tes. 1:2, 3) Dahaka dainai unai be momokani? Badina lagani momo lalonai Dirava ena lauma ena heduru idia abia dae bona unai ese idia ia durua kara namodia idia hahedinaraia totona. Nega ita atoa iseda buruka taudia ita bamoa, idia ita matauraia bona idia amo diba ita abia neganai, idia be dava bada gaudia bamona do ita laloa!

18. Stadi atikol 36 ai dahaka do ita stadilaia?

¹⁸ Matamata taudia ese buruka taudia idia matauraia bona buruka taudia ese matamata taudia idia laloa bada neganai, kongrigeisen be do ia goada. Stadi atikol 36 ai, buruka taudia ese kongrigeisen lalonai matamata taudia idia laloa bada karana do ita stadilaia.