1-2. (a) Tëm noo Xpriiche 16:31, wii sole mer unser elter priiter un xwestere siin? (b) Was fer frooche tuun mer in tiise artikel antworte?

ES KEPT een park in te Fereenichte Xtaate fon Amërika woos tuu khanst tyamante ufm pootem fine. Awer, tii sin noch net kexnit un kexlayft fer wii xmuke penutst wëre. Tes weeche, fiile woo tëne siin tuun net acht fer tëne kepe; tii tuun ploos torich tiise weyertliche xatse laafe.

² Soo wii tiise tyamante, unser elter priiter un xwestere sin weyertliche xatse. Ti Piipel ferklaycht tëne sayn kraue hoer mit een kroon. (Lees Xpriiche 16:31; * 20:29.) Awer, es khan laycht sin net acht kepe fer tiise xatse. Ti yunge woo erkhëne wii fiil weyert ti elter layt hon, khene etwas fine woo mee weyert wii raychtum hot. In tiise artikel, tuun mer 3 frooche antworte: Warom siit Yeehoowa sayn elter troye tiiner wii xatse? Warom sin ti elter priiter un xwestere wichtich in Yeehoowa sayn Orkanisatsyoon? Un was khene mer mache fer nutse kriin fon tëne sayn payxpiil?

3. Tëm noo Psalm 92:12-15, warom hon ti elter priiter un xwestere fiil weyert foer Yeehoowa?

³ Unser elter troye priiter un xwestere hon fiil weyert foer Yeehoowa. Tee wees was fer sort layt se sin un tee kept weyert fer sayn xeene kwaliteete. Yeehoowa wërt froo wën eyer siit ti elter mit te yunge teele ti kluucheet woo se kriit hon in Yeehoowa sayn aarwayt torich ti yoore. (Yoop 12:12; Xpr. 1:1-4)  Yeehoowa kept aach weyert fer sayn persewerans. (Mal. 3:16) Tii hon xwiirichkheete in sayn leepe kehat, awer tii hon sayn klaape aan Yeehoowa xtark kehal. Tëne sayn hofnung fer ti futuer is xtërker wii in te tsayt woo se ti woerheet kelërnt hon. Un Yeehoowa liipt tëne wayl se tuun wayter iwer tëm sayn naame xpreche “soo kaar wën se elter” sin. (Lees Psalm 92:12-15.) *

4. Was khan unser elter priiter un xwestere uf muute?

⁴ Wëns tuu am elter wëre pist, say tich sicher: Yeehoowa ferkest sich net fon te aarwayt woos tuu in te ferkangne yoore kemacht host. (Hep. 6:10) Tuu host flaysich kepreeticht, un tas kefalt unser Fater im himel. Tuu host propleeme aus kehal — tepay tii woo tich aarich traurich kelos hon. Tuu host Yeehoowa sayn kesetse aan keheert un pay kextan. Tuu host fiile xweyere flichte in Yeehoowa sayn Orkanisatsyoon uf kephast un anere keiipt. Tuu host tayn pestes kemacht fer ti fiile ënerunge woo in te Orkanisatsyoon pasiirt sin, pay xteen. Tuu host uner xtitst un uf kemuut tii woo in te fol tsayt tiinst xafe. Yeehoowa Kot liipt tich aarich fiil wayls tuu leaal pist, un tee ferxprecht tas “tee lost net im xtich tii woo leaal tsu tëm sin”. (Psal. 37:28) Tee kept tich tiise sicherheet: “Aach wën tayn hoer krau wëre, tuun ich tich wayter uner xtitse.” (Isa. 46:4) Tan, tuu net tenke: ‘Yets woo ich elter kep sin, hon ich khee mee weyert in te kemaynt...’ Tas is sicher net woer! Tuu host noch eene wichtiche plats in Yeehoowa sayn Orkanisatsyoon!

5. Was sole ti elter sich net ferkese?

⁵ Ti elter layt khene, in fiile aate, nutslich fer Yeehoowa sayn Orkanisatsyoon sin. Opwool tii net mee ti kraft hon woo se friier hate, hon se fiil speryens woo se torich ti yoore kriit hon. Yeehoowa khan tëne wayter in fiile aate penutse, wii ti neekste payxpiile fon friier un fon hayt tsayche.

6-7. Kep etliche payxpiile fon te Piipel woo tsayche wii Yeehoowa sayn troye elter tiiner peloont hot.

 ⁶ In te Piipel, khene mer xeene payxpiile fine fon troye tiiner woo hon wayter tsu Yeehoowa kexaft, soo kaar wii se alt waare. Tsum payxpiil: Mooses waar unkefeer 80 yoore alt wii eyer aan kefang hot wii Yeehoowa sayn profeet un representant fer ti natsyoon fon Israël tiine. Wii Tanyël tsiimlich sicher mee wii 90 yoore alt waar, waar Yeehoowa tëm imer noch am penutse wii profeet. Un te aphostel Yoohan waar tsiimlich sicher aach mee wii 90 yoore alt wii Yeehoowa tëm inspiriirt hot tas puuch fon Apokalipsis xraype.

⁷ Anere troye tiiner waare net pekhant, un fiilaycht fiile hon kaar net acht fer tëne kep. Awer Yeehoowa hot tëne kemërkt un hot tëne sayn leaaliteet peloont. Tsum payxpiil: Simeoon “waar kerecht un hat een xtarke klaape”. Ti Piipel saat net fiil iwer tëm, awer Yeehoowa wust weer eyer waar un hot tëm een priwilëj kep: Yeesus siin wii eyer noch een nëneche waar un een profetsii iwer tëm un sayn muter mache. (Luk. 2:22, 25-35) Tenk aach iwer ti profeetin Ana. Tiise witfraa waar 84 yoore alt, awer “waar imer im thempel kewees”. Tes weeche, hot Yeehoowa se keseechent un hot se erlaupt Yeesus siin wii eyer noch een khint waar. Es is klaar: Simeoon un Ana hate fiil weyert foer Yeehoowa. (Luk. 2:36-38)

8-9. Was hot een xwester in Yeehoowa sayn Orkanisatsyoon kemacht noo se een witfraa kep is?

⁸ Hayt tsu taach, fiile elter troye priiter sin een xeen payxpiil fer ti yunge. Kuk mool ti speryens fon te xwester Lois Didur. Tii waar ploos 21 yoore alt wii se aan kefang hot wii spetsyaal pyoneerin in Kanata tiine. Noo tas tii sich mit John kehayrat hot, hon se fiile yoore in te reesenter aarwayt kexaft. Noo heyer, hon se mee wii 20 yoore im Petël fon Kanata ketiint. Wii Lois 58 yoore alt waar, sin se in kelaat kep fer im Petël fon Ukraanya tiine. Was teete se mache? Teete se tenke tas se tsu alt waare fer in een aner lant tiine? Tii hon ti inlaatung aan kenom un John is in kesetst kep fer in te Filyaal Komisyoon fon Ukraanya tiine. Siwe yoore xpeeter, is John kextorep; awer Lois hot ëntxlist wayter in sayn insetsung plaype. Hayt, is se 81 yoore alt, awer tii tuut wayter troy tiine im Petël fon Ukraanya; un ti priiter un xwestere tat liipe se aarich fiil.

⁹ Im xtant, witfraae soo wii Lois kriin net mee soo fiil acht wii se friier kriit hon, wën sayn mëner noch am leepe waare; awer tii sin noch aarich important. Yeehoowa kept fiil weyert fer ti xwestere woo torich ti yoore sayn mëner troy uner xtitst hon un woo wayter tëm troy tiine. (1 Tim. 5:3) Tëne sayn payxpiil tuut aach ti yunge fiil uf muute.

10. Was fer xeene payxpiil lost uns Tony?

¹⁰ Ti troye priiter un xwestere woo in een altehaym woone, hon aach fiil weyert foer Yeehoowa. Tsum payxpiil: een pruuter woo Tony heest, leept in soo een sort haus. Tee hot sich taafe kelos in akust fon 1942, wii  eyer 20 yoore alt waar, in Pennsylvania, FXA. Klaych tëm noo, is eyer kexikt kep im militeer tiine keen. Wayl eyer tas net aan kenom hot, is eyer 2 un halpe yoore in te katee keplip. Tee un sayn fraa Hilda hon 2 khiner in te woerheet ketsoo. Torich ti yoore, hot Tony in 3 kemaynte ketiint wii kortenatoer fon te elteste khërperxaft (in tiise tsayt, te superintendente presidente). Als mool, hot eyer aach wii superintentent fon konkrëse ketiint. Tee hot aach fersamlunge un Piipel xtuutye in een katee kefiirt. Tony is 98 yoore alt, awer tee hot noch muut fer tsu Yeehoowa xafe. Tee macht wayter sayn pestes fer Yeehoowa tiine mit te priiter un xwestere fon sayn kemaynt.

11. Wii khene mer tsayche tas mer weyert kepe fer tii woo in een altehaym leepe?

¹¹ Wii khene mer ti priiter un xwestere eere woo in een altehaym woone? Wëns meechlich is, khene ti elteste tëne helfe tsu te preetich aarwayt keen un ti fersamlunge heere orer tsu tëne khome. Meyer khene tëne pesuuche orer een wiiteo konferens mit tëne mache; soo tsayche mer tas mer uns mit tëne khimere. Un hauptseechlich tii, woo in een altehaym wayt fon sayn kemaynt woone, mise tiise liip xpiire. Wën mer net uf phase, khene mer uns fon tëne ferkese. Etliche elter layt fine es net laycht orer richtich iwer sich selepst xpreche. Awer mer kriin fiil nutse wën mer tsayt hoole fer tëne frooche mache un se heere iwer ti fiile seechen woo se kriit hon in Yeehoowa sayn Orkanisatsyoon.

12. Was fer sort priiter un xwestere khene mer in unser aychne kemaynt fine?

¹² Manich mool, khene mer in unser aychne kemaynt iwerxeene payxpiile fon troye elter priiter fine. Een xwester woo Harriette heest, hot Yeehoowa torich fiile yoore troy ketiint in sayn kemaynt in Nay Jersey, FXA. Xpeeter, hot se sich kewanert fer mit sayn tochter leepe. Ti priiter fon sayn nay kemaynt hon tsayt kehool fer Harriette khëne lërne un tii hon een xats kefun. Tii hot tëne uf kemuut mit kexichte iwer ti preetich aarwayt fon te tsayt woo se ti woerheet kelërnt hot, unkefeer im yoer 1925. In tiise tsayt, wii se preetiche kang is, hot se imer sayn tsaanpëxt mit kenom. Weeche was? Wayl tii khent in kexpërt wëre. Un tas is wërklich pasiirt: 2 mool in 1933, must se een woch in te katee plaype. Sayn man waar kheen Yeehoowa sayn Tsayer kewees, awer tee hot se pay kextan. Ti tsayt woo se in kexpërt kep is, hot eyer ti tray khiner uf kephast. Kewis, troye elter priiter un xwestere soo wii Harriette fertiine respekt kriin!

13. Was host tuu kelërnt iwer te weyert woo unser elter priiter un xwestere hon in Yeehoowa sayn Orkanisatsyoon?

¹³ Unser elter priiter un xwestere sin aarich wichtich fer Yeehoowa un sayn Orkanisatsyoon. Tii hon mit sayn aue kesiin wii Yeehoowa tii selepst un sayn Orkanisatsyoon in fiile aate keseechent hot. Tii hon wichtiche lisyoone kelërnt mit te feeler woo se kemacht hon. Tuu tëne siin wii een “kwel fon kluucheet” un lërn fon tëne sayn speryens. (Xpr. 18:4) Wëns tuu tsayt hoolst fer tëne peser khëne, wërt tayn klaape ferxtërkt un tuu tuust fiil lërne.

14. Was tuut Teuteronoomyum 32:7 ti yunge uf muute se mache?

¹⁴ Kep te eyerste xrit fer mit te elter layt xpreche. (Lees Teuteronoomyum 32:7.) * Im xtant, tuun se kans lamsam laafe, kans layse xpreche un net mee soo kuut siin, awer tii sin noch yung im hërts. Un tii hon “eene  kuute naame” foer Yeehoowa kemacht. (Ekl. 7:1) Eriner tich warom Yeehoowa tëne weyert kept un tuu wayter tëne eere. Say soo wii Eliseu. Tee hot aan kehal fer mit Eliias plaype in sayn letste taach paysamer. Tray mools hot Eliseu kesaat: “Ich lose tich net im xtich.” (2 Khe. 2:2, 4, 6)

15. Was fer frooche khene mer fer ti elter layt mache?

¹⁵ Tsaych tas tuu tich wërklich mit te elter layt khimerst — mit kuutheet, mach tëne frooche. (Xpr. 1:5; 20:5; 1 Tim. 5:1, 2) Tsum payxpiil, tuu khanst frooe: “Wiis tuu yinger waarst, was hot tich sicher kelos tas tuu ti woerheet kefun hast? Wii hon ti tinge woo mit tich pasiirt sin, tich keholef tichter pay Yeehoowa khome? Was helft tich ti frooheet in Yeehoowa sayn aarwayt hale?” (1 Tim. 6:6-8) Tan, tuu tëne heere wii se sayn kexicht fertseele.

16. Was fer nutse kriin elter un yunge wën se fertseele tuun?

¹⁶ Wën een elter mit een yunge fertseelt, kriin ti tswaay nutse. (Rom. 1:12) Tas lost te yunge sicher tas Yeehoowa phast sayn troye tiiner uf un te elter tuut sich keliipt xpiire. Tee tuut sich fraye wën eyer fertseelt iwer wii Yeehoowa tëm keseechent hot.

17. Warom khene mer saan tas unser elter troye priiter un xwestere kepe xeener mit te tsayt?

¹⁷ In te meyerst tsayt, tuut ti xeenheet mit te yoore ferkeen; awer tii woo leaal tsu Yeehoowa sin, kepe yeetes yoer xeener tsu Tëm. (1 The. 1:2, 3) Warom pasiirt tas? Wayl torich ti yoore, hon se Yeehoowa sayn hayliche kayst kelos tëne iipe un helfe xeene kwaliteete ëntwikele. Woo mee tas mer unser weyertliche elter priiter un xwestere khëne lërne, eere un mit tëne lërne, woo wichticher wëre se fer uns sin.

18. Was tuun mer in tëm neekste artikel lërne?

¹⁸ Ti kemaynt wërt xtërker net ploos wën ti yunge weyert fer ti elter layt kepe, awer aach wën ti elter weyert fer ti yunge kepe. In tëm neekste artikel, tuun mer siin wii khene ti elter tas mache.