1-2. (a) Segun ta Proverbio 16:31, kunnasi tam nakuan imammatan i matalo nga mannakam? (b) Anni ira nga pakkiavu i tabbagattam taw nga artikulo?

NU MAPPASIAR i totolay ta tadday nga park ta Arkansas, U.S.A., awayya na nga makaleg ira tu diamante. Ngem ari paga nga neproseso yatun ira nga diamante tapenu mabbalin tu alahas. Yari tu baka ariadda nga ammu nga diamante ngana balo i masingi-singadda anna tala-talebagadda laman yatun.

² Megitta tatun nga nabala-balor nga diamante i mannakam. Nikumpara paga lagu na Biblia i inubang nga ulu ta tadday nga korona. (Bibbigan i Proverbio 16:31; 20:29) Ngem baka ari tam gapa nga mapansin danatun nga minas. Nu masingan na kabataan i balor na mannakam, makaleg ira tu minas nga mas mangina anne ta literal nga diamante. Tabbagattam taw nga artikulo i tallu nga pakkiavu: Ngatta ibilang ni Jehova nga minas i matalo nga mannakam? Ngatta importante ira ta organisasion ni Jehova? Kunnasi ittam nga makagigiammu ta ehemplo da?

3. Segun ta Salmo 92:12-15, ngatta nabalor kani Jehova i matalo nga mannakam?

³ Nabalor kani Jehova i matalo nga mannakam. Ammu na i kata-katoleda anna appresian na i makasta ira nga kualidad da. Magayayya yayya nu iyistoria da ta kabataan ira i ekspiriensa da ta matalo nga passerbi da. (Job 12:12; Prov. 1:1-4) Tagibaloran na gapa i pagattattam da. (Mal. 3:16) Maski nu aru i nappasa-pasadda nga problema, ari vuluvuga nga nakkafi i pangurug  da nisa. Mas masikan ngana sangawe i pangurug da ta promesa na ira ta mappange anne turi ta ollu da nga nakannammuan i kinakurug. Iddeddu gapa ira ni Jehova ta ilayyagayya da lagapa i ngagan na maski nu “laka-lakay ngana” ira.​—Bibbigan i Salmo 92:12-15.

4. Anni nakuan nga makapabannay ira nga gannug i nonopan na mannakam nga wawwaragi tam?

⁴ Nu mabbako onu mallakay kamu ngana, nonopan nu nakuan nga ari vuluvuga kattaman ni Jehova i kingngua nu ira ta nappasa. (Heb. 6:10) Magayayya i nelangitan nga Yama tam ta matalikarag kamu ta pallayyagayya. Aru ngana nga makaparaddam nga problema i inattamman nu. Sinuttul nu anna nidefensa nu i matunung ira nga estandarte na Biblia. Matalo kamu gapa ta annungan nu ta organisasion anna sinanay nu i tanakuan. Kingngua nu i ngamin nga mawayya nu tapenu makiggiddang ta paspas nga panguli na organisasion ni Jehova. Pinagaram nu gapa danuri egga ta ngamin-tiempo nga passerbi. Iddeddu nakamu ni Jehova gafu ta matalo kamu. Nipromesa na nga “arian na nga pagurayan i mekatalo nga totolay na”! (Sal. 37:28) Kunnaw paga i ipasiguradu na nikamu: “Kattuattakamu adde sonu magubang i vu nu.” (Isa. 46:4) Yatutta arian nu nakuan nonopan nga awan ngana tu sesserbi nu ta organisasion gafu laman ta manakam kamu ngana. Talaga nabala-balor kamu kani Jehova!

5. Anni nakuan i daddamman na mannakam?

⁵ Napakaru i meyuffun na mannakam ta organisasion. Maski nu makafi ngana ira, napakaru ngana i naekspiriensa da ta pappasa na daga-ragun. Yatutta aru lagapa i pangusan nira ni Jehova. Mapakurug tam yatun ta ehemplo na mannakam ta nappasa anna ta maddaggun.

6-7. Mangiyawa tu angngarigan na matalo nga mannakam nga binendisionan ni Jehova.

⁶ Aru i mabibbig tam ta Biblia nga matalo lagapa nga nasserbi kani Jehova maski nu manakam ngana ira. Angngarigan na, ma-80 ngana si Moises turi ta pinili yayya ni Jehova nga mabbalin tu profeta anna mangirollu ta nasion na Israel. Profeta lagapa ni Jehova si  Daniel maski turi ta maturu ngana tu 90 i dagun na. Posible gapa nga kunnatun i dagun ni apostol Juan turi ta nipetura nisa ni Jehova i libru na Nepakannammu.

⁷ Egga paga ira i tanakuan nga matalo nga manakam nga baddi laman i makakkilala nira yari tu baka ari ira kuruga mapansin. Ngem ammammu ira ni Jehova anna binala-balakkan na i kinamatalo da. Angngarigan na, baddi laman i mabibbig tam ta Biblia meyannung ta “matunung anna minammarulo ta uray na Dios” nga si Simeon. Ngem ammammu yayya ni Jehova. Niddan na paga lagu yayya tu pribilehio nga masingan i abbing nga si Jesus anna iprofesiya i meyannung tatun nga abbing anna ta yena na. (Luc. 2:22, 25-35) Nonopan gapa i balu nga profetisa nga si Ana. Maski nu 84 ngana i dagun na, “maruddu yaya nga umay ta Templo.” Kunnasi nga binendisionan ni Jehova i kinamatalo na? Neddan gapa yayya tu pribilehio nga masingan i abbing nga si Jesus. Pakurugan natun nga nabalor kani Jehova si Simeon anna si Ana.​—Luc. 2:36-38.

8-9. Anni i neyuffun na tadday nga sister ta organisasion ni Jehova maski nu nabalu ngana yayya?

⁸ Aru gapa nga matalo nga mannakam ta tiempo tam i makasta nga ehemplo para ta kabataan ira. Tadday tatun si Sister Lois Didur. Bente uno anios laman yayya tagga ta nagespesial payunir yayya ta Canada, tapus turi kua, piga dagun ira nga nasserbi na atawa na nga si John ta traveling work. Nasserbi gapa ira ta Bethel ta Canada ta maturu tu 20 nga dagun. Ngem turi ta 58 anios si Lois, nembitan ira ni John nga masserbi ta Bethel ta Ukraine. Ninono da kari nga ariadda ngana nga makua yatun megafu ta bako anna lakay ngana ira? Ari. Inalawa da yatun nga asayment anna nasserbi si John bilang miembro na Branch Committee ta Ukraine. Kabalin na pitu nga ragun, natay si John, ngem dinesision ni Lois nga ari lagapa nga panawan i asayment na. Sangawe ta 81 ngana si Lois, matalo lagapa yayya nga massesserbi bilang miembro na familia na Bethel ta Ukraine anna talaga iddeddu da yayya.

⁹ Aru i kagitta ni Sister Lois nga balu ngana. Baka ari ngana gapa ira kuruga mapansin kumpara tagga ta matolay paga i atawa da. Ngem nabala-balor lagapa ira. Tagibaloran ni Jehova i sister ira nga aru dagun nga sinuportadda i atawa da anna matalo nga massesserbi adde ta maddaggun. (1 Tim. 5:3) Fuera paga tatun, paga-pagarammadda gapa i kabataan ira.

10. Anni ira i magigiammu tam kani Brother Tony?

¹⁰ Nabala-balor gapa i matalo nga mannakam nga egga ta hospital onu ta nursing home. Kunnatun i situasion ni Brother Tony. Nabawtisowan yayya turi ta Agosto 1942 ta Pennsylvania, U.S.A. ta edad nga 20. Ari nabbayag, nefuku yayya tu dua-ragun-gaddua megafu ta pammanaki na nga massuddalu. Tapus  inatawa na si Hilda anna pinadakal da ta kinakurug i dua nga ana da. Aru nga dagun nga nasserbi yayya bilang presiding overseer (onu coordinator na baggi na elder ira) ta tallu nga kongregasion anna nabbalin gapa yayya tu circuit assembly overseer. Namippiga gapa nga binisita na i affukutan tapenu mangikondukta tu study anna Bible study ira. Maski turi ta 98 anios ngana yayya, kukukuan na lagapa i ngamin nga mawayya na tapenu passerbian si Jehova kavulu i wawwaragi!

11. Kunnasi tam mepasingan nga tagibalorattam i mannakam nga egga ta hospital onu ta nursing home?

¹¹ Kunnasi tam mepasingan nga tagibalorattam i mannakam nga egga ta hospital onu ta nursing home? Puede ira nga uffunan na elder ira tapenu maka-atende onu maginna da i study anna makapallayyagayya ira nu posible. Puede tam gapa ira nga bisitan onu i-video call. Mas ngana nga kunnatun nakuan i kuattam nu ararayyu i hospital onu i nursing home ta kongregasiottam. Agga-nono tam nakuan i pakawagadda tapenu ari tam ira mapagurayan. Nu kibbidammu i karuan nga mannakam, baka manaki da nga iyistoria i meyannung ta baggi da megafu ta mappasiran ira onu ari ira nga komfortable tatun. Pasa-pasensiattam nakuan gafu nga iyavu i meyannung ta ekspiriensa da ira ta passerbi kani Jehova tapus ginnattam tu mapia i istoriadda. Magga mabbenefisio ittam nu kunnatun i kuattam.

12. Anni ira nga ehemplo i awayya na nga malegattam ta mismu nga kongregasiottam?

¹² Ariattam nga mammuan nga egga balo i makasta nga ehemplo na matalo nga mannakam ta mismu nga kongregasiottam nu ari ittam nga makistoria nira. Piga dagun nga matalo nga nasserbi si Sister Harriette ta kongregasion na ta New Jersey, U.S.A. ngem nagali yayya tapenu makikabbalay ta ana na. Nikaguman na wawwaragi ta bagu nga kongregasion na nga mas paga nga makilala yayya. Tapus na-realize da nga makasta i ehemplo na anna nabala-balor yatun. Napasikan na ira megafu ta inistoria na i ekspiriensa na ira ta ministerio tagga ta nakannammuan na i kinakurug ta dekada 1920. Kanayun na bi kanu nga ivulu i toothbrush na nu mallayyagayya yayya ta baka maaresto yayya anna mefuku. Turi ta 1933, mamiddua yayya nga nefuku tu taggi-tanga-ligguan. Ari nga Saksi i atawa na ngem ari na yayya nga fugaddan ta pamministerio na. Yayya paga lagu i nanangngaw ta tallu nga abbarabbing nga ána da turi ta nefuku si Sister Harriette. Tagibalorattam nakuan gafu i matalo nga mannakam nga kagitta na!

13. Ngatta importante kani Jehova anna ta organisasion na i mannakam?

¹³ Kuruga importante kani Jehova anna ta organisasion na i mannakam nga wawwaragi tam. Nemammatadda nu kunnasi i pinamendision ni Jehova ta organisasion na anna ta nira mismu. Nakagigiammu ira ta nappasa ira nga nakkamaliadda. Imammatammu nakuan ira nga “latua na sirib” anna makagigiammu ka nakuan ta ekspiriensa da ira. (Prov. 18:4) Nu ikagumammu nga mas makilala paga ira, massikan i pangurug mu anna aru i magigiammum ta nira!

14. Anni i ipagaram na Deuteronomio 32:7 nga kuan na kabataan ira?

¹⁴ Sittam nakuan i magollu nga makistoria ta mannakam. (Bibbigan i Deuteronomio 32:7.) Makafi ngana i paningadda, mabayag ngana i pallakag anna pabbida da, ngem kayà da lagapa nga aru i makua da anna nakangngua ngana ira tu “mapia nga ngagan” kani Jehova. (Ecl. 7:1) Daddammammu nakuan nu ngatta tagibaloran ira ni Jehova anna  kanayummu ira nga irespeto. Parigattam si Eliseo nga manaki na nga panawan si Elias ta ultimu nga aggaw da nga makkavulu. Mamillu nga kinagi na kani Elias: “Ariattaka panawan.”​—2 Pat. 2:2, 4, 6.

15. Anni ira i puede tam nga iyavu ta mannakam?

¹⁵ Ipasingattam nakuan nga kayà tam paga nga mas makilala i mannakam. Masippo tam nakuan nga makkiavu nira. (Prov. 1:5; 20:5; 1 Tim. 5:1, 2) Puede tam nga iyavu i kunnaw: “Ngatta kumbinsidu kamu nga nalegan nu ngana i kinakurug?” “Kunnasi kamu nga naddukko kani Jehova megafu ta nesimmu ira nikamu?” “Ngatta magayayya kamu lagapa adde sangawe ta passerbi nu kani Jehova?” (1 Tim. 6:6-8) Tapus sonu magistoria ngana ira, magginna ittam nakuan tu mapia.

16. Kunnasi nga mabbenefisio i manakam anna i kabataan nu makka-istoria ira?

¹⁶ Parefu nga mapagaram i manakam anna i kabataan nu makka-istoria ira. (Roma 1:12) Mas makumbinsi i kabataan ira nga tattangngallan ni Jehova i matalo ira nga aripan na. Matageno gapa na mannakam nga meddeddu ira. Kakayà da gapa nga istorian nu kunnasi ira nga binendisionan ni Jehova.

17. Ngatta makasta lagapa ta paningan ni Jehova i matalo nga mannakam maski paga nu piga dagun i mappasa?

¹⁷ Ari nga mabbayag i makasta nga itchura, ngem makasta lagapa ta anningan ni Jehova danuri matalo ta nisa maski piga ragun paga i mappasa. (1 Tes. 1:2, 3) Kurug kari yatun? Wan! Megafu ta aru dagun ngana nga nappa-influwensia ira ta masanto nga espiritu ni Jehova anna pinakasta natun i kualidad da. Nu mas nga makilala tam i mannakam, mas makagigiammu ittam ta nira. Mas gapa nga ikakua tam ira anna masingattam tu talaga nabala-balor ira nga minas!

18. Anni i gigiammuattam ta tumunug nga artikulo?

¹⁸ Mas mattuyag i kongregasion nu tagibaloran na kabataan i mannakam. Ngem mawag gapa nga tagibaloran na mannakam i kabataan ira. Kunnasi da nga makua yatun? Magigiammu yatun ta tumunug nga artikulo.