1-2. (a) Sigun iti Proverbio 16:31, kasano ti masapul a panangmatmattayo kadagiti matalek a nataengan? (b) Ania dagiti saludsod a sungbatantayo iti daytoy nga artikulo?

ITI state park iti Arkansas, U.S.A., dagiti agpaspasiar ket mabalin a makakita kadagiti diamante iti rabaw ti daga. Ngem saan pay a natabas ken napasileng dagita a diamante. Gapu iti dayta, mabalin a saan nga ammo ti adu a makakita kadagita a diamante a ti kitkitaen ken malablabsanda ket gameng gayam.

² Iti dadduma a pamay-an, dagiti matalek a nataengan kadatayo ket kas kadagidiay a diamante; napapategda a gameng. Ti Sao ti Dios inyarigna iti korona ti ubanan a buok dagita a nataengan. (Basaen ti Proverbio 16:31; 20:29) Ngem mabalin a saan a nalaka a madlaw dagita a gameng. No maawatan dagiti agtutubo a napateg dagiti nataengan, maaddaanda iti napatpateg pay ngem iti literal a kinabaknang. Iti daytoy nga artikulo, sungbatantayo ti tallo a saludsod: Apay nga ibilang ni Jehova dagiti matalek a nataengan kas gameng? Ania a paset ti inted kadakuada ni Jehova iti organisasionna? Ania ti mabalintayo nga aramiden tapno makasursurotayo iti ulidanda?

3. Maitunos iti Salmo 92:12-15, apay a napateg ken Jehova dagiti matalek a nataengan?

³ Napateg ken Jehova a Dios dagiti matalek a nataengan. Kitkitaenna ti kinataoda, ket ammo ken ipatpategna dagiti nagsayaat a kualidadda. Maragsakan no dagiti nataengan iranudda kadagiti agtutubo ti sirib a nagun-odda iti nabayagen a matalek a panagserbida. (Job 12:12; Prov. 1:1-4) Napateg  met ken Jehova ti panagibturda. (Mal. 3:16) Sigurado nga adda dagiti problema a napasaranda, ngem saan a nagkupas ti pammatida ken Jehova. Nalawlawag ti namnamada iti masanguanan ngem idi damo a naammuanda ti kinapudno. Ay-ayaten ida ni Jehova gapu ta itultuloyda nga ipakaammo ti naganna ‘uray nataengandan.’​—Basaen ti Salmo 92:12-15.

4. Ania ti mabalin a makaliwliwa kadagiti nataengan a kakabsattayo?

⁴ No tumataengankan, masiguradom a di pulos malipatan ni Jehova dagiti inaramidmo iti napalabas. (Heb. 6:10) Sireregta a sinuportaram ti trabaho a panangasaba, ket naragsakan iti dayta ti nailangitan nga Amatayo. Inibturam ti adu a pannubok​—uray dagiti nasaem a pasamak​—intandudom dagiti nalinteg a pagalagadan ti Biblia, imbaklaymo dagiti nadagsen a responsabilidad, ken sinanaymo ti sabsabali. Inaramidmo ti amin a kabaelam tapno madanggayam ti napartak ti iyaabantena nga organisasion ni Jehova. Sinuportaram ken pinaregtam dagidiay adda iti amin-tiempo a ministerio. Ay-ayatennaka unay ni Jehova a Dios gapu ta matalek ken napudnoka. Inkarina a “dinanto baybay-an dagiti napudno kenkuana”! (Sal. 37:28) Ipanamnamana kenka: ‘Itultuloyka nga anusan agingga nga aguban ti buokmo.’ (Isa. 46:4) Isu a dimo koma ipapan a gapu ta nataengankan, awanen ti napateg a papelmo iti organisasion ni Jehova. Nakapatpategka latta!

5. Ania ti masapul a laglagipen dagiti nataengan?

⁵ Adu pay ti maaramidan dagiti nataengan. Nupay mabalin a saandan a napigsa, aduanda met iti kapadasan a naurnongda iti panaglabas dagiti tawen. Mabalin nga usaren latta ida ni Jehova iti nadumaduma a pamay-an, kas ipakita dagiti sumaganad a pagarigan iti napalabas ken iti agdama.

6-7. Mangted kadagiti pagarigan iti Biblia maipapan kadagiti nataengan a nakaawat kadagiti bendision gapu iti kinamatalekda.

⁶ Makasaraktayo iti Biblia kadagiti nasayaat nga ulidan dagiti matalek a siaaktibo a nagserbi ken Jehova uray nataengandan. Kas pagarigan, agarup 80 ti tawen ni Moises idi nangrugi nga agserbi kas propeta ken pannakabagi  ni Jehova iti nasion ti Israel. Uray nalabit nasurok idin a 90 ti tawen ni Daniel, inusar latta isuna ni Jehova kas pannakangiwatna. Posible a nasurok met idin a 90 ti tawen ni apostol Juan idi naiwanwan a mangisurat iti libro nga Apocalipsis.

⁷ Saan a nalatak wenno pagaammo ti adu a dadduma pay a matalek nga adipen ti Dios ken mabalin a saan ida a madlaw dagiti tattao. Ngem nakita ken ginunggonaan ida ni Jehova gapu iti kinamatalekda. Kas pagarigan, apagbiit laeng a nadakamat iti Biblia ti lalaki a ni Simeon a “nalinteg, [ken] agbuteng iti Dios.” Ngem ammo ni Jehova ti kinataona isu nga inikkanna iti pribilehio a makakita iti maladaga a ni Jesus ken agipadto maipapan iti dayta nga ubing ken iti inana. (Luc. 2:22, 25-35) Panunotem met ti balo a propeta a ni Anna. Agtawen idin iti 84 ngem “saan a pulos a limmanglangan idiay templo.” Nabendisionan ti kanayon a kaaddana idiay templo ta nakitana met iti maysa a gundaway ti maladaga a ni Jesus. Agpada a napateg ken Jehova da Simeon ken Anna.​—Luc. 2:36-38.

8-9. Ania ti agtultuloy a maitultulong dagiti balo a babbai?

⁸ Iti tiempotayo, adu a matalek a nataengan ti nasayaat nga ulidan kadagiti agtutubo. Usigentayo ti kapadasan ni Sister Lois Didur. Agtawen laeng iti 21 idi nangrugi nga agserbi kas special pioneer idiay Canada. Kalpasanna, adu a tawen a nagserbida ken lakayna a John iti trabaho iti sirkito. Nagserbida idi agangay iti Bethel idiay Canada iti nasurok a 20 a tawen. Idi agtawen ni Lois iti 58, naawisda ken John nga agserbi iti Bethel idiay Ukraine. Ania ti aramidenda? Ipapanda kadi a nataenganda unayen nga agserbi iti sabali a pagilian? Inawatda ti asaynment ket naapointaran ni John kas miembro ti Branch Committee sadiay. Pito a tawen kalpasan ti ipapatay ni John, inkeddeng ni Lois ti agtalinaed idiay Ukraine. Ita, 81 ti tawenen ni Lois ngem simamatalek latta nga agserserbi ken maipatpateg unay a miembro ti pamilia ti Bethel idiay Ukraine.

⁹ Dagiti balo a babbai a kas ken Lois ket mabalin a saan unayen a madmadlaw no idilig idi sibibiag pay ti asawada. Ngem saan nga agkupas ti pategda nupay balodan. Ipatpateg unay ni Jehova dagiti kakabsat a babbai a nangsuporta iti asawada iti adu a tawen ken itultuloyda latta ti kasta a kinaregta. (1 Tim. 5:3) Makaparegtada met kadagiti agtutubo.

10. Ania ti nagsayaat nga inyulidan ni Tony?

¹⁰ Ti adu a matalek a nataengan nga agnanaed kadagiti nursing home ket maibilang met kas naespirituan a gameng. Kas pagarigan, maysa kadakuada ti kabsat nga agnagan Tony. Nabautisaran idiay Pennsylvania, U.S.A., idi Agosto 1942 idi agtawen iti 20. Di nagbayag, naipasango iti isyu ti neutralidad isu a naibalud iti dua ket kagudua a tawen. Naaddaanda ken Hilda nga asawana iti dua nga  annak a pinadakkelda iti kinapudno. Iti panaglabas dagiti tawen, nagserbi ni Tony iti tallo a kongregasion kas mamangulo a manangaywan (pagaammo itan kas koordineytor ti bagi dagiti panglakayen) ken kas manangaywan iti asamblea sirkito. Indauluanna dagiti gimong ken panagadal iti Biblia iti maysa a pagbaludan. Naregta latta nga agserserbi ni Tony uray 98 ti tawennan. Ar-aramidenna ti amin a kabaelanna nga agserbi ken Jehova ken makitinnulong iti kongregasionna!

11. Kasanotayo a maipakita nga ipatpategtayo dagidiay agnanaed kadagiti nursing home wenno ti dadduma pay a nataengan iti kongregasiontayo?

¹¹ Kasanotayo a mapadayawan dagidiay agnanaed kadagiti nursing home wenno ti dadduma pay a nataengan iti kongregasiontayo? Mabalin nga iraman ida dagiti panglakayen kadagiti aktibidad ti kongregasion agingga a posible. Maipakitatayo a personal a maseknantayo kadakuada no bisitaentayo ida wenno maki-video chat-tayo kadakuada. Kayattayo nga ipakita ti espesial nga atension kadagiti nataengan nga agnanaed iti nursing home nga adayo iti kongregasionda. No saantayo a nasiput, mabalin a maliwayantayo dagita a nataengan. Baka marigatan ti dadduma wenno mabainda nga agestoria. Ngem makasursurotayo no iwayaantayo ti makisarita, agsaludsod, ken dumngeg kadakuada bayat nga iyes-estoriada dagiti naragsak a kapadasanda iti organisasion ni Jehova.

12. Ania dagiti mabalin a masarakantayo iti kongregasiontayo?

¹² Mabalin a masdaawtayo nga adda gayam dagiti nataengan iti kongregasiontayo a mapagwadan unay ti kinamatalekda. Adu a dekada a simamatalek a nagserbi ti kabsat a babai nga agnagan Harriette iti kongregasionna idiay New Jersey, U.S.A. Idi agangay, immakar iti adayo a lugar tapno makipagnaed iti balasangna. Inwayaan dagiti kakabsat iti baro a kongregasionna ti makiam-ammo kenkuana, ket naammuanda nga isu ket maysa a gameng. Pinaregtana ida iti adu a kapadasanna iti ministerio idi damo a naammuanna ti kinapudno idi 1920’s. Kanayon idi a mangitugot iti toothbrush no mapan mangasaba​—tapno adda pagsipiliona no bilang maaresto. Kinapudnona, namindua a naibalud iti makalawas idi 1933. No kasta a maibalud, ti manangsuporta a lakayna a saan a Saksi ti mangaywan iti tallo nga ubbing pay nga annakda. Talaga a maikari a maipateg dagiti matalek a nataengan a kas ken Harriette!

13. Ania ti masursurotayo maipapan iti paset dagiti nataengan iti urnos ni Jehova?

¹³ Adda napateg a papel dagiti nataengan a kakabsattayo iti urnos ni Jehova. Nakitada no kasano a bembendisionan ni Jehova ti organisasionna ken uray isuda a mismo iti adu a pamay-an. Adda dagiti napateg a leksion a nasursuroda kadagiti kamalida. Ibilangmo ida kas “ubbog ti sirib,” ket agsursuroka iti kapadasanda. (Prov. 18:4) No iwayaam nga am-ammuen ida, bumileg ti pammatim ken adu ti masursurom!

14. Ania ti iparparegta ti Deuteronomio 32:7 nga aramiden dagiti agtutubo?

¹⁴ Sika ti umuna a makisarita kadagiti nataengan. (Basaen ti Deuteronomio 32:7.) Wen, baka nakapuyen ti panagkitada, nabuntogdan nga agkuti, ken nakapuyen ti bosesda, ngem kayatda latta ti agbalin nga aktibo, ken addan ‘naimbag a naganda’ ken Jehova. (Ecl. 7:1) Laglagipem no apay nga ipatpateg ida ni Jehova. Itultuloymo a padayawan ida. Tuladem ni Eliseo. Impilitna nga agtalinaed iti abay ni Elias iti maudi nga aldaw a  panagkaduada. Namitlo nga imbaga ni Eliseo: “Saankanto a panawan.”​—2 Ar. 2:2, 4, 6.

15. Ania dagiti mabalintayo nga isaludsod kadagiti nataengan?

¹⁵ Ipakitam a talaga nga interesadoka kadagiti nataengan babaen ti panagsaludsodmo kadakuada. (Prov. 1:5; 20:5; 1 Tim. 5:1, 2) Mabalin nga isaludsodmo: “Idi ubingkayo pay, ania ti nakakombinsiranyo a nabirokanyon ti kinapudno?” “Kasano a nakatulong dagiti kapadasanyo tapno agbalinkayo a nasingsinged ken Jehova?” “Ania ti nakitayo a sekreto ti panagtalinaed a naragsak iti panagserbi ken Jehova?” (1 Tim. 6:6-8) Kalpasanna, dumngegka iti iyestoriada.

16. Kasano nga agpada a magunggonaan ti nataengan ken ti agtutubo iti panaginnestoriada?

¹⁶ Agpada a magunggonaan ti maysa a nataengan ken ti maysa nga agtutubo no aginnestoriada. (Roma 1:12) Dakayo nga agtutubo, umunegto ti apresasionyo iti panangaywan ni Jehova kadagiti matalek nga adipenna, ken mariknanto met ti nataengan a maipatpateg isuna. Maragsakanto a mangyestoria kenka kadagiti bendision a naawatna ken Jehova.

17. Apay a maibagatayo a pumimpintas dagiti matalek a nataengan iti panaglabas dagiti tawen?

¹⁷ Gagangay nga agkupas ti pisikal a pintas bayat a tumataengan ti maysa, ngem dagidiay matalek ken Jehova ket pumimpintas kenkuana iti tunggal tawen a lumabas. (1 Tes. 1:2, 3) Apay? Gapu ta iti panaglabas dagiti tawen, impalubosda a ti espiritu ti Dios ti mangsukog ken mangpasayaat iti personalidadda. No ad-adda a maam-ammotayo dagiti napateg a nataengan a kakabsattayo, padayawantayo ida, ken agsursurotayo kadakuada, ad-adda met nga ibilangtayo ida kas di magatadan a gameng!

18. Ania ti usigentayo iti sumaruno nga artikulo?

¹⁸ Bumileg ti kongregasion saan laeng a no ipateg dagiti agtutubo dagiti nataengan no di ket no dagiti nataengan ipategda met dagiti agtutubo. Iti sumaruno nga artikulo, pagsasaritaantayo no kasano a maipakita dagiti nataengan nga ipatpategda dagiti agtutubo iti kongregasion.