1-2. (a) Sima sta na Provérbios 16:31, modi ki nu debe odja kes irmon ku irmans ki dja sta di idadi? (b) Ki perguntas nu sta ben responde na kel studu li?

TEN un parki na Mérka, na stadu di Arkansas, undi nu pode atxa diamantis na txon. Má dja ki kes diamanti ka sta trabadjadu, pesoas ta pasa na es i nen es ka ta da kónta ma es ten txeu valor.

² Nu pode fla ma nos irmons ku irmans ki sta di idadi i ki é fiel pa Jeová, é sima kes diamanti li. Es é un tizoru ki ten txeu valor. Bíblia ta fla ma ses kabélu branku é sima un koroa. (Lé Provérbios 16:31; 20:29) Txeu algen pode ka da kónta ma kes irmon li ten txeu valor. Kes jóven ki ta da nos irmons di idadi valor, pode ganha mutu más txeu di ki rikézas. Na kel studu li, nu sta ben odja respósta di três pergunta: Pamodi ki Jeová ta da kes irmon di idadi txeu valor? Pamodi ki es é inportanti pa organizason di Jeová? I modi ki nu pode prende txeu ku ses izénplu?

3. Sima sta na Salmo 92:12-15, pamodi ki nos irmons di idadi ten txeu valor pa Jeová?

³ Kes irmon di idadi ten txeu valor pa Jeová. El ta konsigi odja kuzê ki es ten na korason, el konxe-s i el ta da txeu valor pa kes kualidadi bunitu ki es ten. Jeová ta fika kontenti óras ki kes irmon di idadi, ta inxina kes más jóven sobri kel sabedoria ki es ganha duránti tudu kes anu ki es sirbi-l ku lialdadi. (Jó 12:12; Pro. 1:1-4) Jeová tanbê ta da valor pa ses kapasidadi di aguenta firmi. (Mal. 3:16) Es ka tevi sô momentus sábi na ses vida, má simé nunka  es ka perde ses fé na Jeová. Gósi ses speransa pa futuru é mutu más fórti di ki kantu es prende verdadi. I Jeová ta ama-s txeu pamodi ‘mésmu na bedjisa’ es kontinua ta pâpia sobri se nómi. — Lé Salmo 92:12-15.

4. Kuzê ki pode konsola nos irmons di idadi?

⁴ Si bu sta ta fika algen grandi, bu pode ten sertéza ma Jeová ta lenbra dretu di tudu kel ki dja bu faze pa el. (Heb. 6:10) Sénpri bu apoia trabadju di pregason di korason i kel-li ta poi Jeová txeu kontenti. Dja bu pasa pa prublémas i ti mésmu kes ki dexa-u txeu tristi. Dja bu difende kes lei ki sta na Bíblia, dja bu kuida di txeu responsabilidadi na organizason di Jeová i dja bu trena txeu algen. Sénpri bu faze bu midjór pa kunpanha kes mudansa na organizason di Jeová. Tanbê dja bu apoia i dja bu insentiva kes ki krê sirbi pa ténpu interu. Bu lialdadi poi Jeová ta ama-u más txeu inda. El promete ma ‘el ka ta bandona kes ki é lial pa el’! (Sal. 37:28) Tanbê el ta da kes algen di idadi kel sertéza li: ‘Ti ki nhos kabélu bira branku, N ta kontinua ta sustenta nhos’. (Isa. 46:4) Nton, ka bu atxa ma bo é ka inportanti más pa organizason di Jeová sô pamodi bu sta di idadi. Na verdadi, abo é txeu inportanti!

5. Di kuzê ki kes irmon di idadi debe lenbra sénpri? 

⁵ Kes irmon di idadi pode faze txeu kuza na organizason di Jeová. É verdadi ki es pode ka tene kel forsa ki es tinha antis, má sima anus ba ta pasa, es ganha txeu spiriénsa. Es pode kontinua ta sirbi Jeová di txeu manera. I é kel-li ki nu sta ben odja na kes izénplu di nos ténpu i di ténpu antigu.

6-7. Ki izénplus nu ta atxa na Bíblia di kes algen di idadi ki Jeová abênsua pamodi ses sirvisu fiel?

⁶ Na Bíblia, nu pode atxa bons izénplu di sérvus fiel di Jeová ki kontinua okupadu ta sirbi-l sikrê es tinha txeu idadi. Pur izénplu, Muizés tinha uns 80 anu kantu el bira proféta di Jeová i reprizentanti di nason di Israel. Talvês Daniel kontinua  ta ser proféta di Jeová, sikrê dja el tinha más di 90 anu. Ta parse ma apóstlu Juan tinha más di 90 anu kantu spritu santu di Jeová orienta-l pa el skrebe livru di Apocalipse.

⁷ É ka tudu sérvus di Jeová ki éra txeu konxedu i talvês alguns algen nen ka ta reparaba na es. Má Jeová presta atenson na es i el rekonpensa ses lialdadi. Pur izénplu, Bíblia ta pâpia poku kuza di un ómi ki txoma Simion, ki éra ‘justu i ki ta ruspetaba Lei di Deus’. Má, Jeová konxeba el dretu i el da-l priviléjiu di odja Jizus kantu el éra mininu i di faze alguns profesia sobri Jizus i se mai. (Luc. 2:22, 25-35) Pensa tanbê na izénplu di profetiza Ana, ki éra un mudjer ki dja staba di idadi. Sikrê ku 84 anu, “nunka el ka fadja un runion.” Bíblia ta fla ma ‘sénpri el ta staba na ténplu’. Pur isu, Jeová da-l un grandi priviléjiu di odja Jizus kantu el éra mininu. Kel-li ta mostra klaru ma Jeová ta daba Simion ku Ana txeu valor. — Luc. 2:36-38.

8-9. Da un izénplu ki ta mostra modi ki kes irman viúva é inportanti pa organizason di Jeová.

⁸ Na nos ténpu, ten txeu irmon di idadi ki é fiel i ki é bon izénplu pa jóvens. Odja stória di vida di irman Lois Didur. El kumesa ta sirbi di pionera spesial na Kanadá kantu el tinha 21 anu. Dipôs di kel-li, el ku Juan, se maridu, tevi txeu anu ta faze trabadju di vizita kongregasons. Más tardi, es sirbi pa más di 20 anu na Betel di Kanadá. Kantu Lois tinha 58 anu el ku Juan, konvidadu pa ba sirbi na Ukránia. Modi ki es reaji ku kel konviti li? Es ka fika ta pensa ma dja es staba algen grandi dimás pa muda pa otu país. Envês di kel-li, es seta kel konviti i Juan diziginadu pa sirbi na Kumison di Filial di Ukránia. Séti anu dipôs, Juan móre, má Lois kontinua ta sirbi la. Gósi Lois tene 81 anu di idadi i el sta kontinua fiel ta sirbi na Betel di Ukránia i tudu algen di la gosta txeu di el.

⁹ Talvês kes viúva sima irman Lois, ka ta resebe txeu atenson sima kantu ses maridu staba bibu, má sikrê es é viúva, es ta kontinua ta ten txeu valor. Duránti txeu ténpu, kes irman li da ses maridu tudu apoia i es kontinua fiel ta sirbi Jeová. Ta da pa odja pamodi ki es ten txeu valor pa Jeová. (1 Tim. 5:3) I tanbê ses izénplu ta nkoraja kes más jóven.

10. Pamodi ki irmon Toni é un bon izénplu pa nos?

¹⁰ Txeu di kes irmon di idadi ki é fiel i ki ta vive na kes kaza ki ta podu algen grandi, ten txeu valor. Pur izénplu, un irmon ki txoma Toni ta mora na un di kes lugar la. El batiza ku 20 anu na agostu di 1942, na stadu di Pensilvánia, na Mérka. Poku ténpu dipôs ki el batiza, el txomadu pa trópa. Dja ki el nega bai trópa, el podu  dôs anu i meiu na kadia. El ku se mudjer Ilda, kria ses dôs fidju na organizason di Jeová. Pa txeu anu, Toni sirbi na três kongregason ki el éra superintendente presidente (ki oji ta txomadu di kordenador di grupu di ansions). Tanbê el éra enkaregadu di asenbleias i el ta ba fazeba runions i studus di Bíblia na kadia. Oji Toni tene 98 anu, má el ka ta pensa na dizisti. El sta kontinua ta faze se midjór pa sirbi Jeová djuntu ku irmons i irmans di se kongregason!

11. Modi ki nu pode mostra kes irmon ki ta vive na kes kaza ki ta podu algen grandi, ma es ten valor pa nos?

¹¹ Modi ki nu pode onra nos irmons ki ta vive na kes kaza ki ta podu algen grandi? Sénpri ki ta da, ansions pode djuda-s sisti ô obi runions i partisipa na pregason. Nu pode da-s atenson óras ki nu ta vizita-s ô konvida-s pa un xamada ku vídiu. Tanbê nu krê da un atenson spesial pa kes irmon ki ta mora na kes kaza ki ta podu algen grandi i ki talvês ta fika lonji di ses kongregason. Si nu ka toma kuidadu, nu pode skese di kes irmon di idadi ki nu krê txeu. Alguns di es pode atxa ma es ka meste pâpia sobri es ô es pode atxa difísil di faze kel-li. Má si nu faze-s pergunta i nu obi-s ta konta sobri kes alegria ki es tevi na organizason di Jeová, nu pode xinti txeu nkorajadu.

12. Ki tipu di irmons nu pode atxa na nos kongregason?

¹² Talvês nu pode fika dimiradu di odja ma na nos própi kongregason ten kes irmon fiel di idadi ki é un bon izénplu pa nos. Un irman ki txoma Ariete, tevi txeu anu ta sirbi Jeová na se kongregason na Nova Jersey, na Mérka. Dipôs el tevi ki muda pa bai mora ku se fidju-fémia. Kes irmon di se novu kongregason tra ténpu pa konxe-l midjór i es atxa un tizoru. Irman Ariete konta-s txeu stória sobri pregason na kel ténpu ki el prende verdadi, pa vólta di 1920. I kel-li da kes irmon txeu koraji. Na kel ténpu, óras ki el ta baba pregason, sénpri el ta lebaba un skova di denti na bólsa pamodi es podia prendeba el i poba el prézu duránti algun ténpu. Na verdadi, el podu prézu dôs bês na anu 1933. Se maridu é ka éra Tistimunha di Jeová, má el djuda-l. Kantu el podu prézu, se maridu kuida di ses três fidju pikinoti. Di sertéza, irmons di idadi fiel sima Ariete merese pa nu da-s ónra!

13. Kuzê ki nu ta prende sobri valor ki nos irmons di idadi ten na organizason di Jeová?

¹³ Nos irmons ku nos irmans di idadi é inportanti pa Jeová i pa se organizason. Es konsigi odja ku ses própi odju modi ki Jeová abênsua se organizason di txeu manera. Tanbê es tevi oportunidadi di prende lisons inportanti ku ses própi éru. Pur isu, odja kes irmon li sima un ‘fonti di sabedoria’ i prende tudu kel ki bu ta pode ku ses spiriénsa. (Pro. 18:4) Si bu tra ténpu pa konxe-s midjór, bu fé ta bira más fórti i sénpri bu ta prende algun kuza ku es!

14. Kuzê ki Deuteronómio 32:7 ta insentiva jóvens pa faze?

¹⁴ Pâpia ku kes irmon di idadi. (Lé Deuteronómio 32:7.) Talvês es ka ta odja dretu ô nen es ka ten forsa pa pâpia ô pa anda sima antis. Má ses korason inda é jóven i es faze ‘un bon nómi’ dianti di Jeová. (Ecl. 7:1) Lenbra sénpri pamodi  ki nos irmons di idadi ten txeu valor pa Jeová. Kontinua ta trata kes irmon li, ki nu krê txeu, ku tudu ruspetu. Faze sima Elizeu. El insisti pa el fika na ladu di Elias na kel últimu dia ki es staba djuntu. Pa três bês Elizeu fla Elias: ‘N ka ta dexa-u’. —  2 Reis 2:2, 4, 6.

15. Ki perguntas nu pode faze kes irmon di idadi?

¹⁵ Faze kes irmon di idadi perguntas ku bondadi pa mostra ma bu ta preokupa ku es. (Pro. 1:5; 20:5; 1 Tim. 5:1, 2) Bu pode faze perguntas sima kes-li: “Kantu bo éra más jóven, kuzê ki djuda-u ten sertéza ma bu atxa verdadi?” “Modi ki kes situason ki bu pasa pa el pô-u ta xinti más amigu di Jeová?” “Kuzê ki djuda-u kontinua ta sirbi Jeová ku alegria?” (1 Tim. 6:6-8) Dipôs obi ku atenson timenti es ta konta-u ses stória.

16. Modi ki kes irmon di idadi i kes más jóven ta xinti óras ki es ta pâpia ku kunpanheru?

¹⁶ Óras ki kes irmon di idadi ku kes más jóven ta pâpia ku kunpanheru, es tudu ta xinti nkorajadu. (Rom. 1:12) Anhos ki é más jóven nhos ta ten más kunfiansa ma Jeová ta kuida di se sérvus fiel i kes irmon di idadi ta xinti ma ses irmon ta ama-s. Nos irmons di idadi ta fika kontenti di konta-u modi ki Jeová abensua-s duránti ses vida.

17. Pamodi ki nu pode fla ma nos irmons di idadi ta bira más bunitu sima anus ta ba ta pasa?

¹⁷ Normalmenti, óras ki un algen ta ten más idadi, se bunitéza ta ba ta kaba. Má pa Jeová, kes ki é lial pa el ta bira kada bês más bunitu. (1 Tes. 1:2, 3) Pamodi? Pamodi duránti ses vida, sénpri es dexa spritu di Jeová djuda-s dizenvolve kes kualidadi bunitu. Nos irmons ku irmans di idadi ten txeu valor. Sima nu ta ba ta konxe-s, onra-s i nu prende ku es, nu ta odja ma es é un tizoru ki ka ten présu!

18. Kuzê ki nu sta ben odja na kel otu studu?

¹⁸ Kongregason ta fika más fórti ka sô óras ki jóvens ta da kes irmon di idadi valor, má tanbê óras ki kes irmon di idadi ta da jóvens valor. Na kel otu studu, nu ta ben odja modi ki kes irmon di idadi pode mostra ma es ta da valor pa kes jóven na kongregason.