1-2. a) Bilondeshel Tusumw 16:31, i mushind kaay utudy mwa kutal baat bakuluuh bady ni lulamat? b) I majooj kaay matwiiyiiy kwaalabul mu ciin bwaal eecy?

BAAT bakuukumbul cyaab cidyobw balaminobw nyam mu rejon wa Arkansas mu États-unis, cyaab cidyobw mwa kuhetel diamand. Nook hadyobw biidyandiloh, kakwiin mushind a kulong naady bikan. Bu cihet, bavul kabiin bitaboh bend neey: diibw eedy didy ni buseeb buvul ni kabiin bakemoh bend hadyobw biidital.

² Mu mishind yikwaabw, baat bakuluuh batudy naab, bady teng bu diamand eedy; bady ni buseeb buvul. Diiy dya Mawej difwaafwanyikij yimvw ya baat aab ni ciful cya lutumb cilengel. (Bal Tusumw 16:31; 20:29) Nook, kabiin bikaam kulengulul buseeb budy naabw baat bakuluuh aab. Hady baasand bamanyik mushing udy nend baat bakuluuh, bady mwa kuhet musangal muhitok wa bihak. Mu ciin bwaal eecy, twiiyiiy kwaalabul ku majooj masat: Bwabiny Yehow wangangat baat bakuluuh bady ni lulamat ni buseeb buvul? I cyaab kaay cidy naacy baat bakuluuh mu bulongolody bwa Yehow? I biny bitudy mwa kulongel ku cilejel cyaabab?

3. Bilondeshel Misambw 92:12-15, bwabiny baat bakuluuh bady ni lulamat bady ni buseeb ku mees kwa Yehow?

³ Baat bakuluuh bady ni lulamat bady ni buseeb ku mees kwa Yehow Mawej. I mumanyik cidyobw menmen, ni biikadil byaabab bilengel bidy ni buseeb ku mees kwindiy. Wanyanyish hady bakuluuh bahitij diib ni batofw hakwiibambil myand ya meej idyobw bahet mivw yivul mu mudimw aabab a lulamat. (Yoobw 12:12; Tus. 1:1-4) Yehow wangagat cikwaabw kutaatameen  kwaababw ni buseeb. (Mal. 3:16) I bahet makab makasakan mu shikacil aabab; ni baakady ni diitabij dikasakan kudy Yehow. Kutakamin kwaabab i kwiiy kwa biin-biin kushilangan ni hamanyikilobw myand ya biin-biin. Ni Yehow i mwiibakat bwaal batuutungunuk ni kutumbish diijin dindiy “ning ku bunun.”​—Bal Misambw 92:12-15, NWT.

4. I myand kaay yikaakashish biin kweet bakaady bakuluuh?

⁴ Uw mutal neey wendend ni kukuluuh, iikal mutwiishibw neey Yehow kiishoh bend muvulamin mudimw woos uwudy mumukadil. (Ebr. 6:10) Nudy bambulwiish mu mudimw a kudiil baat musah ni cisumy, ni bwaal oobw busaasangeej Taat iitut a mu diiwul. Nudy bataatameen makab mavul​—ni makwaabw i masuusul micim yinun​—ni bahet dyambulwiish ku may mawaakan ma mu Bibl, ni nukadil midimw ya buseeb mu bulongolody bwa Yehow ni nwaakady balongweesh bakwaabw. Nudy biikashishomw bwa kwend aakabumw ni bulongolody bwa Yehow. Nudy bambulwiish ni bakashish bakwaabw bwa kukumbajobw midimw yaabab ya bu kajaady. Yehow Mawej i mwiinukat bikasakan bwaal nudy ni lulamat kudyey. Ulaalay neey: “kiish ulekelel baat bady bakooyel kudyey”! (Mis. 37:28) Wiinujaajaadikil neey: “Niiyiiy niinukwanjok teng ni munwiiy kutook mit.” (Ye. 46:4) Nook, kanutaloh bend neey: munukaady baat bakuluuh kanuciinoh bend ni buseeb mu bulongolody bwa Yehow. Nudy ni buseeb buvul!

5. I bwaal kaay budy bakuluuh mwa kulam mu meej?

⁵ Baat bakuluuh bady ni buseeb mu midimw yishil-shilangan mu bulongolody bwa Yehow. Bu mudyobw mwa kwiikal kabaciy ni diikand bu kuuhal, bady ni buseeb bwa diimany dikaadyobw naady bwa mivw yivul. Yehow utuutungunuk ni kukal naab mudimw mu mishind yishil-shilangan, bu mutwiiyiiy kwiibital mu bileejel bya baat ba kal ni ba leeloow.

6-7. Twaal bileejel bya mu Bibl bya baat bakuluuh baakady bahet mabenesh hakukadil Yehow mudimw ni lulamat.

⁶ Mu Bibl mudy bileejel bilengel bya baat bady bakadil Yehow mudimw bikasakan teng ni kubukuluuh bwaababw. Cileejel, Moyiz, waakady ni mivw 80 hatwaadijiley kukadil Yehow mudimw bu muprofet ni kwiikal mulombol a cis cya Izaleel. Yehow ukadil cikwaabw mudimw ni Danyel bu mwiinyampal indiy hakadyey ni  mivw 90 ni bya hamut. Mupostol Jah waakady ni mivw yihit ha 90 hafundiley mukand a Myand yisokolweel Jah ku dyambulwiish dya spirit mujilang.

⁷ Baat bakwaabw bavul ba lulamat kabakadyoh bend biibamanyik, ni byaakady biheehel bwa bakwaabw kuvulamin myand yilongelobw. Cikwaabw, Yehow i mwiibamanyik bwa myand yaakadyobw balong ni wiibafucil bwa lulamat lwaabab. Cileejel, Simewon waakady “muut a biin-biin mukat kulomb Mawej,” iibaleeb mu may makeeh myand yindiy mu Bibl, Yehow waakady mumanyik cyaakadyey mumwaakishil dya katook bwa kutaloh Yeez ucyaakady mwaan mutof, ni kutal kukumban kwa mulay uleebelobw bwa mwaan ni maamend. (Luuk 2:22, 25-35) Lang cikwaabw bwa mukaj a mulufwiil Aan waakady muprofet. Waakady ki munun wa mivw 84, “mafuk moos waakady teng mu nzubw a Mawej.” Bu mwaakadyey uy ku “nzubw a Mawej” diifuk dyoos bwa kasambil ni lulamat, Yehow waakady mumubenesh hatadileey Yeez ucyaakady mwaan mutofw. Boos babidy Simewon ni Aan baakady ni buseeb buvul ku mees kwa Yehoh.​—Luuk 2:36-38.

8-9. I mushind kaay udy bakaj ba mu lufwiil batungunuk ni kwambulwiish mu bulongolody bwa Yehow?

⁸ Mu mafuk miitut aam, bakuluuh bavul bakaakadil Yehow mudimw ni lulamat i cileejel cilengel bwa baasand. Tal cileejel cya mwiin kweet mwaan mukaj Lois Didur. Waakady ni mivw 21 hatwaadijiley mudimw a buuseb aa njil bwa habwaah mu cibunj cya Kanadah. Haanyim ha bwaal aabw, yiy ni mbaayend John, bahitijil mivw yivul mu mudimw a bakumbul biin lwend. Biiyil kukal mudimw mu Betel wa mu Kanadah mu mivw 20. Haakady Lois mukumbaj mivw 58, yiy ni John biibabiikeen bwa kakadilobw mudimw mu Ukraine. I biny byaakadyobw mwa kulong? Baakady mwa kulebok neey: bakaady bakuluuh ni kabiin mwa kakadil mudimw mu cibunj cikwaabw eeny? Baakady biitab mudimw aaw, ni John baakady bamunoonoh bwa kukal mudimw mu komiteh wa Betel aaw. Hahicil mivw 7 haanyim a lufw lwa John, Lois wangacil dihangadik dya kushaal mu mudimw indiy. Lois udy kaabaak ni mivw 81, ucituutungunuk ni kukadil Yehow mudimw ni lulamat ni biin mu cisak cya Betel wa mu Ukraine baakady bamukat bikasakan.

⁹ Bakaj ba mu lufwiil bavul teng bu Lois kabiin mwa kwiikal baleeb myand yivul yilongelobw ni ba mbaayabw; ning naak kwiikal mukaj a mu lufwiil kakwiinoh bend ku keehesh buseeb bwaabab. Yehow wangangat baan-bakaj aab ni buseeb buvul bu mudyobw bambulwiish ba mbaayabw mukacy mwa mivw ni kaabaak bacituutungunuk ni kumukadil mudimw ni lulamat. (1 Tim. 5:3) Cikwaabw, bakaakashish baasand bikasakan.

10. I cileejel kaay cilengel cidy Tony mwiitushiil?

¹⁰ Baat bakuluuh bavul bady ni lulamat bady bashikacil mu mazubw madyobw balamin bakuluuh, bady ni buseeb buvul mu myand ya mu spirit. Cileejel, mwiin-kweet Tony udy mushikacil mu mazubw madyobw balamin baat bakuluuh. Uhetel baatiisumw mu Pennsylvania mu  États-Unis, mu suuny a 8/1942 haakadyey ni mivw 20. Haanyim a yiy muman kuhet baatiisumw baakady bamusak bwa kutweeley mu busalay ni yiy kulekey, ki kumumbobw mu lukan ni kulongomweey mivw yibidy ni cituh. Yiy ni mukaj indiy Hilda, bakashishil baan babidy mu bulongolody bwa Yehow. Haanyim a mivw yivul, Tony waakady ukal mudimw mu bisumbw bisat bu mutangidy muludik (udyobw babiikan leeloow neey: mulombol a kasumbw ka bakul) ni muludik wa myand yitaatal cihwiil. Waakady ulombol bisangil ni malong ma Bibl mu lukan. Hakumbajiley mivw 98, Tony kaakady habwiih ni kwiimanyik mudimw a Mawej. Utuutungunuk ni kwiikashishomw ni kukadil Yehow mudimw ni bwa kwiikaley habwiih ni cisumbw cindiy!

11. I mushind kaay utudy mwa kuleej neey: twangangat bakuluh bady balamin mu mazubw ma bakuluuh ni buseeb?

¹¹ I mushind kaay utudy mwa kuleej neey: tuneeneemek baat bakuluuh bady mu mazubw malaalaminobw bakuluuh? Bakul bady mwa kwiibambulwiish bwa biikal batweel mu bisangil ni kudiil baat musah. Tudy mwa kwiikal twiibakumbul eecy twiisamb naab ku video ya baat batalangan. Tudy bakat kutacil baat bakuluuh bady mu mazubw malaalaminobw bakuluuh bady bashikacil kuleeh ni cisumbw cyaabab. Tut katuy badimuk, tudy mwa kulengulul bakuluuh aab. Bidy mwa kukasakeen bakwaabw bwa kwiibatal eecy kwiisamb naab. Ki tudy mwa kuhet musangal hatwiikal ni cibidil cya kwiibatal ni kwiisamb naab, nook bady mwa kwiitwambil musangal udyobw bahet mu bulongolody bwa Yehow.

12. Mu cisumbw ciitut mudy baat ba mushind kaay?

¹² Bidy mwa kwiitukemesh hatutaatal neey: tudy ni bileejel bilengel bya bakuluuh balulamat mu cisumbw ciitut. Cileejel, mwiin-kweet Harriette waakady mukadil Yehow mudimw ni lulamat mu mivw 10 mu cisumbw cyaabab cya mu New Jersey, mu États-Unis. Haanyim umwangeel ni kuyey kashikacil kwa mwaan indiy mwaan-mukaj. Biin-kweet baan-balum ba mucisumbw cyeeny ciyiiley, baakady ni cibidil cya kuy kamutal bwa kumumanyikobw ni batadil neey: waakady ni buseeb buvul. Waakady wiibakashish hakwiibalondeley myand yilengel yiheteley mu mudimw diib ditwaadijiley kulong myand ya biin-biin habwiih ni muvw a 1920. Ciisang aacy, waakady uhay teng muhel a meen haakadyey uy kadiil baat musah ning bab mwa kumukwaat bwa kuyobw nend mu lukan. Biin-biin mu muvw a 1933 utweedyel mu lukan njil yibidy mu luming lwa kaabumw. Ciisang cyaakadyey mu lukan, mbaayend waakady kay Temw, waakady mushaal ni kulam baan baabab basat. Cya biin-biin, bakuluuh bady ni lulamat teng bu Harriette i bawaakanyin buseeb!

13. I biny bitubalong habitaatal cyaab cidy naacy bakuluuh mu bulongolody bwa Yehow?

¹³ Biin-kweet baan-balum ni baan-bakaj bakady bakuluuh, bady ni buseeb mu bulongolody bwa Yehow. I batal mudy Yehow mufiil bulongolody bwindiy kis mu mishind yishil-shilangan ni bab byaabw. I bahetel malongweesh ma buseeb ku bilem byaabab bilongelobw. Nwiibatalaay bu “humbw ya meej” ni tudy mwa kumanyikil myand yivul kudyobw. (Tus. 18:4) Uw ni cibidil cya kushikat naab bwa kwiibamanyik, diitabij diibuh diiyiiy kukasakan ni wiiyiiy kumanyik myand yivul!

14. Mukand a May Mumbulul 32:7 ukaakashish baasand bwa kulong biny?

¹⁴ Iikal ni cibidil cya kwiisamb ni baat bakuluuh (Bal May Mumbulul 32:7.) Biin-biin, lumon lwaabab ludy mwa kwiiy kukooyel, diikand dyaabab diiyiiy kukeeh, mushind aabab a kwiisamb wiiyiiy kushituluk, ki bacidy teng ni micim yikasakan bu baasand, ni i balong mwa kwiikal ni “lutumb lulengel” ku mees kwa  Mawej (Mul. 7:1) Ki bwabingany Yehow i mwiibangat ni buseeb. Tungunuk ni kwiibaneemek. Iikal bu Elizeh. Waakady mwiisanjil Elih bwa kwiikaley nend habwiih mu diifuk dyaabab dya bulekel dya kwiikal haakaabumw. Elizeh umwambiil njil yisat neey: “ciish nakushiy.”​—2 Bak 2:2, 4, 6.

15. I majooj kaay matudy mwa kujooj baat bakuluuh?

¹⁵ Leej muwudy mukat biin-biin baat bakuluuh aab hakwiibihanguj myand mu mushind mulengel. (Tus. 1:5; 20:5; 1 Tim. 5:1, 2) Majooj mawudy mwa kwiibajooj maam: “Hawucyaakady sand i biny byaakady bikujaadikil neey, uhetel myand ya biin-biin?” “I mushind kaay waakady myand yaakady yikufikil yikwambulwiish bwa kushaal habwiih ni Yehow?” “I biny bidy bikwambulwiish bwa kushaal ni musangal mu mudimw a Yehow?” (1 Tim. 6:6-8) Ni kun mat hadyobw bakulondel myand yidyobw balong.

16. I mushind kaay udy muut mukuluuh ni sand mwa kukashishangan hadyobw biisamb?

¹⁶ Hady muut mukuluuh ni sand biisamb, bakaakashishangan. (Rom 1:12) Nun baasand nwiiyiiy kuhet musangal hanutaatal mushind udy Yehow utacil biin mudimw bindiy ba lulamat, ni muut mukuluuh wiiyiiy kwiiyumvw neey: udy ni buseeb. Wiiyiiy kwiikal ni musangal bwa kukulondeley mushind udy Yehow mu mufiil kis.

17. Bwabiny tudy mwa kuleeb neey: baat bakuluuh bashaashal teng balengel ning mudy mivw yend yihit?

¹⁷ Bulengel bwa ku mees bunyanyanguk teng hady muut ukuluuh, ki baat bady balamat Yehow bashaashal teng balengel ku mees kwindiy ning mudy mivw yend yihit. (1 Tes. 1:2, 3) Bwabingany bwaal oobw i bwa biin-biin? Bwaal balekeel spirit a Mawej wiibalongweesh mivw yivul ni wiibambulwiish bwa kwiikalobw ni bikadil bilengel. Cikwaabw, hatumamanyik baat bakuluuh bady ni buseeb aab twiibaneeneemek ni tuhehetel malongweesh kudyobw, ni cikwaab, twiiyiiy kwiibatal mudyobw ni buseeb buvul ku mees kwiitut!

18. I biny bitwiiyiiy kulong mu ciin bwaal ciloolond?

¹⁸ Cisumbw ciiyiiy kukasakan menmen kiin teng hady baasand bangat baat bakuluuh ni buseeb, ki cikwaabw hady bakuluuh bangat baasand ni buseeb. Mu ciin bwaal ciloolond, twiiyiiy kwiisambil hamushind udy baat bakuluuh mwa kwangat baasand ba mu cisumbw ni buseeb.