1-2. (a) Ngoku kiri omwa Emisyo 16:31, thutholere ithwalhangira thuthi abathaleghulha abakulire omo myaka? (b) Ni bibulyo byahi ebyo thukendi subirya omo mwatsi ono?

ESYODAYAMONDE esikine omwa mibere yasyu y’obuhangiranwa, isisiri syakolhwako, sisirikangabasanaya kutse eritsemesya. Neryo omundu amasilhangira isine omwa mibere eyo, iniangana kwama kya lhaba okwa by’obughuli ebyo.

² Omwa nzira ndebe, abathaleghulha abakulire bali ng’esyodayamonde esyo; ni b’obughuli. Ekinywe kya Nyamuhanga kikalinganisaya esyombwe sy’abandu ng’abo ng’embitha. (Soma Emisyo 16:31; 20:29) Aliwe, kyolhobire erithendi tsomana ab’obughuli aba. Abalere abakalhangira omughaso w’abakulire aba bangana bana ekindu ky’obughuli kwilhaba obughuda bw’ebindu. Omo mwatsi ono, thukendi subirya ebibulyo bisathu bino: Busana naki Yehova akalhangira abathaleghulha abakulire mw’ab’obughuli? Ni mwanya wahi ogho Yehova awithire abathaleghulha abo? Thwanga kolhaki erithoka erighasirwa ndeke omwa ky’erileberyako kyabu?

3. Ngoku kiri omwa Esyonyimbo 92:12-15, busana naki abathaleghulha abakulire ni b’obughuli embere sya Yehova?

³ Abathaleghulha abakulire omo myaka ni b’obughuli embere sya Yehova Nyamuhanga. Akalhangira ekyo bali omwa mithima yabu, kandi anasi emibere yabu mibuyanga kandi akalhangirayo mwa y’obughuli. Akasima abakulire bakabwira abalere okwa menge wabu agho babiribana omwa ngebe yabu bakakolera Yehova buthaleghulha. (Yobu 12:12; Emi. 1:1-4) Yehova kandi akalhangira eriyiyinia lyabu mwa ly’obughuli. (Mal. 3: 16) Sibathabya omwa ngebe eyiri mw’etseme nyisa-nyisa; aliwe, babiribya ibanawithe erikirirya erighumire omu Yehova. Amaha wabu w’obuthuku obukasa abiryongera erighuma kwilhaba omughulhu batsuka erigha ekwenene. Kandi Yehova abanzire kundi bakalholha embere erithulhughania erina liwe n’omo myaka yabu ‘y’obukulhu.’​—Soma Esyonyimbo 92:12-15.

4. Ni byahi ebyanga humulikania balikyethu abakulire?

⁴ Wamabya iwunemukulha omo myaka, yikethere ngoku Yehova an’ibukire emibiiri eyo wakolha kera. (Ebr. 6:10) N’omuhwa munene wabirisighika omubiiri w’erithulira, kandi ekyo kikatsemesaya Thatha wethu w’elhubulha. Wabirighumira ebitsibu​—nibya n’ebikabbuna omuthima​—wabirisighika ebihano bye Biblia ebithunganene, erikolha esyongwamirwa esirithohire, n’erithendeka abandi. Wabirikolha ngoku wangathoka erighenda-ghendania n’esyombinduka esikabya isinemukolhwa omwa kithunga kya Yehova. Wabirisighika n’erihira omwa bali omwa mubiiri w’omughulhu wosi mw’omuhwa. Yehova Nyamuhanga akwanzire kutsibu busana n’eribya muthaleghulha. Akalhaghanisaya athi “syali sighanaya abandu biwe abathaleghulha”! (Esy. 37:28) Akakukakasaya athi: “Erihika oko mbwi syenyu nasyabaheka!” (Isa. 46:4) Neryo isiwaghunzerera wuthi kundi wamabirikulha omo myaka, siwukiwithe mughaso omwa kithunga kya Yehova. Ahathe erithika-thika wukine w’omughaso!

5. Abakulire batholere ibabya iban’ibukireki?

⁵ Abakulire bawithe bingyi by’erihithya. Nomwakine indi banganabya sibakiwithe akaghalha ako babya bawithe kera, banawithe obugaga bw’ebya balholireko ebyo babana habw’emyaka mingyi. Yehova angana lholha embere eribakolesya omwa nzira nyingyi, ngoku eby’erileberyako ebya kera n’ebya munabwire bikakanganaya.

6-7. Iha eby’erileberyako by’omwa Biblia eby’abakulire ababana emighisa busana n’erikolera Yehova buthaleghulha.

⁶ Thwangana bana eby’erileberyako ebyuwene omwa Biblia abya bathaleghulha abalholha embere erikolera Yehova n’omuhwa omo myaka yabu y’obukulhu. Ng’eky’erileberyako, Musa aby’awithe myaka nga 80 akatsuka  erikolha ng’omuminyereri wa Yehova kandi ng’omusondoli oyusombwerwe ow’Abaisraeli. Omuminyereri Danieli obundi iniane omo myaka yiwe ye 90, Yehova mwabya iniakinamukolesaya ng’embuyi yiwe. Omukwenda Yoane nayu angabya iniabya omo myaka ye 90 akasondolibwa erihandika ekitabu ky’Eribisulirwa.

⁷ Abandi abathaleghulha bangyi sibabya basibwe, neryo kyangabere kyolho ibo eribiriranwa. Aliwe, Yehova iyo mwabya inianabahirire kw’eriso liwe kandi mwabahemba busana n’obuthaleghulha bwabu. Ng’eky’erileberyako, Simeoni omulhume ‘oyuthunganene oyukakenga Nyamuhanga’ akanibweko kuke omwa Biblia, aliwe Yehova abya inianamwasi ndeke kandi mwamuha olhusunzo lhw’erilholha oku Yesu iniane lhumekeke n’olhw’eriha obuminyereri obuhambire okwa mwana oyo na mama wiwe. (Lk. 2:22, 25-35) Thalengekania n’okwa muminyereri omukwakali ya Ana. Abya w’emyaka 84 aliwe “isyali lhua omo hekalu.” Kiro kighuma “erihindana” liwe buthaleghulha mulyahembwa kutsibu omughulhu nayu alholha oku Yesu iniane lhumekeke. Simeoni na Ana babya b’obughuli embere sya Yehova.​—Lk. 2:36-38.

8-9. Ni byahi ebya bakwakali banemulholha embere erikolha?

⁸ Munabwire, abathaleghulha bangyi abakulire bakahiriraho abalere eby’erileberyako ebyuwene. Lebaya ekyalholirweko kya Mwali Wethu Lois Didur. Aby’awithe myaka 21 akatsuka erikolha ng’omutemburi w’embaghane e Canada. Enyuma waho, iyo na mwira wiwe, John, mubaghunza emyaka mingyi omwa mubiiri w’obulebererya. N’enyuma waho bamakolera okwa Beteli kwe Canada habw’emyaka eyilhabire oku 20. Lois abere ahikya emyaka 58, iyo na John mubathumwa eriyakolera Ukraine. Bangakolireki? Mbwino banga bughire bathi bamabirikulha omo myaka sibanga thasyathoka eriyakolera omwa kindi kihugho? Mubaligha olhusunzo olho, kandi John mwasombolhwa erikolha ng’omughuma w’okwa Komiti y’Ekyaghanda ky’Omuthahulha eky’eyo. Enyuma w’emyaka musanju John aliholire, Lois mwathwamu erilholha embere n’olhusunzo lhwiwe. Lino, Lois awithe emyaka 81 kandi anemulholha embere erikolha kutsibu kandi anzibirwe kutsibu okwa Beteli ye Ukraine.

⁹ Kyolhobire erithendi lhangira abakwakali nga Lois ngoku kyabya bira babu ibakineho; nomwabine, eribya bakwakali sikiri leka bakabya isibakiri b’obughuli. Yehova akalhangira bali bethu ababirisighika bira babu habw’emyaka mingyi kandi abakinalholha embere erimukolera mw’ab’obughuli. (1 Tim. 5:3) Eryongera okw’ekyo, bakahira omwa balere mw’omuhwa ndeke.

10. Ni ky’erileberyako kyahi ekyuwene ekya Tony abirihiraho?

¹⁰ Abathaleghulha bangyi abakulire abathakithoka erilhua eka nabu ni b’obughuli. Ng’eky’erileberyako, mughalha wethu oyukahulhawamo Tony lino ikere omo myanya  eyikalembererawamo abakulire. Abatizibirawa e Pennsylvania, U.S.A., omo Kwomunani 1942 inianawithe myaka 20. Buthuku buke alibatizibirwe mwahirwa omo ngomo habw’emyaka ibiri n’embindi busana n’erithendibya na lhuhandi omwa by’ekipolitiki. Iyo na mukali wiwe, Hilda, mubawathikya abaana babu babiri eriminya ekwenene. Ahabw’emyaka, Tony mwakolha ng’omulebererya oyukathegha-theghanaya akathunga k’abasyakulhu omwa bithunga bisathu (lino oyuwasibwe ng’omusangania w’akathunga k’abasyakulhu) kandi mwakolha ng’omulebererya w’olhuhindano lhw’omuthimbo. Iniakayasondolha emihindano y’abali omwa ngomo n’erigha n’abandi banya ngomo e Biblia. Lino Tony awithe myaka 98, kandi syali athaleka erikolera Yehova. Akalholha embere erikolera Yehova ngoku angathoka n’erikolha haghuma n’abalikyabu omwa kithunga!

11. Thwanga kangania thuthi ku thukalhangira abakulire abathakithoka erilhua eka mw’ab’obughuli?

¹¹ Thwanga kangania thuthi ku thukaha abakulire abathakithoka erilhua eka b’ekitsumbi? Abasyakulhu bangana lhangira bathi abakulire abo nabu bakasangira omwa mibiiri y’ekithunga omughulhu kithokekene. Thwangana bakangania ku thubatsomene omw’ibabungira kutse erikanirania nabu ng’okwa simu. Thwanzire ithwatsomana ndeke abakulire ng’abo abangabya ibali haali okwa bithunga byabu. Thwamathendi yitheya, ithwangana yisanga ithwabiribirirwa abakulire aba. Abandi kyangana bakalira eribugha ebibahambireko kutse ibayowa nga sikitholere. Aliwe ithukendi ghasirwa kutsibu thwamahiraho obuthuku bw’eribabulya n’erihulikirira bakathubwira okwa tseme eyo babiribana omwa kithunga kya Yehova.

12. Ni bahi abo thwangana bana omwa kithunga kyethu?

¹² Thwangana sweka thukaminya ngoku omo kithunga kyethu mune abakulire abathaleghulha abali ky’erileberyako ekyuwene. Mwali wethu oyukahulhawamo Harriette mwakolera Yehova buthaleghulha habw’emyaka mingyi omwa kithunga eky’ewabu e New Jersey, U.S.A. Neryo mwahuma amayikalha na mwali wiwe. Balikyethu omwa kithunga ekyo ahumiramo mubalhangira bathi bakamuminya ndeke, neryo mubeya ini w’obughuli bunene. Mwabahimba akababwira okwa myatsi eyihambire okwa mubiiri w’erithulira omwa myaka eya 1920 omughulhu atsuka erigha ekwenene. Okwa buthuku obo, iniakabera erighenda omw’ithulira iniane n’omusigo ogho angakolesya amahirwa omwa ngomo. Kandi kwenene, omwa 1933 mwahirwa omwa ngomo ngendo ibiri kandi obuli ngendo iniaghunzamo ewiki. Okwa buthuku obo, mwira wiwe oyuthe Mwema aliwe ini mulhume mubuya mwatsomana abaana babu basathu. Ahathe erithika-thika, abathaleghulha abakulire nga Harriette batholere ibalhangirwa mwa b’obughuli!

13. Thwam’ighaki oko mwanya ogho abakulire bawithe omo kithunga kya Yehova?

¹³ Balikyethu abakulire ni b’omughaso omo meso wa Yehova n’omwa kithunga kiwe. Babiriyilhangirira Yehova akabatsumulha n’eritsumulha ekithunga kiwe omwa nzira nyingyi muthina-muthina. Babir’ighira okwa bisobyo byabu kw’amasomo w’omughaso. Balhangire ‘ng’engununuko y’amenge,’ kandi ighira okwa ky’erileberyako kyabu. (Emi. 18:4) Wamahiraho obuthuku bw’eribaminya, erikirirya lyawu iryangana ghuma kandi iwabighirako bingyi!

14. Ebiri omwa Eryibuka Ebihano 32:7 bikahira omwa balere mw’omuhwa w’erikolhaki?

¹⁴ Lhangira wuthi wukakanaya n’abakulire. (Soma Eryibuka Ebihano 32:7.) Ni kwenene banganabya isibakilhangira ndeke, ibali  kughenda lyolho-lyolho, n’omulenge wabu iniali okw’isuba omwa kikuba, aliwe omwa muthima bakayowa ibakine balere kandi babiriyikolera “erina libuya” embere sya Yehova. (Omu. 7:1) Wibuke ekikaleka Yehova iniabalhangira mwa b’obughuli. Lholha embere eribaha ekitsumbi. Ibya nga Elisa. Mwahathikana eribya na Eliya okwa kiro kyabu k’erighunzerera eribya haghuma. Ngendo isathu Elisa mwabugha athi: “Sinendi kusighalhako.”​—2 Bam. 2:2, 4, 6.

15. Ni bibulyo byahi ebya thwangana bulya abakulire?

¹⁵ Kanganaya ku wutsomene abakulire omw’ibabulya ebibulyo omwa lhwanzo. (Emi. 1:5; 20:5; 1 Tim. 5:1, 2) Bulhaya ebibulyo nga bino: “Ni byahi ebyaleka iwaligha ku wabiribana ekwenene?” “Ebya walhabiremo byabirikuwathikya bithi eriyithunda hakuhi na Yehova?” “Ni byahi ebyabirikuwathikya erisighalha iwunatsemire omwa mubiiri wa Yehova?” (1 Tim. 6:6-8) Neryo bahulikirire bakakukanirya.

16. Abakulhu n’abalere erikanirania, abosi kyanga baghasira kithi?

¹⁶ Omughulhu abakulhu n’abalere bakakaniranaya, abosi bakaghasirawa. (Abar. 1:12) Inywe balere imukendyongera erisima lyenyu busana n’emibere Yehova akatsomaniramo abaghombe biwe abathaleghulha, kandi n’abakulire omo myaka ibakendi yowa ibanzibirwe. Ibakendi tsema bakakubwira Yehova ng’abirighenda akabatsumulha athi.

17. Busana naki ithwabugha thuthi abakulire abathaleghulha bakongera eribya babuya embere sya Yehova emyaka yinemulhaba?

¹⁷ Obubuya bw’omubiri bukaghenda bukahwa omundu anemukulha, aliwe abathaleghulha oku Yehova bakongera eribya babuya embere siwe obuli mwaka. (1 Tes. 1:2, 3) Busana naki ekyo ni kwenene? Kundi ahabw’emyaka, babirilighira omulimu wa Nyamuhanga eribabumba-bumba n’eribawathikya eribya n’emibere eyuwene. Thukabya thukongera eriminya balikyethu abakulire ab’obughuli abo, eribaha ekitsumbi, n’eribighirako, kwa thukanongera thuthya eribalhangira mw’ab’obughuli bunene kutsibu!

18. Thukendisya kania okuki omo mwatsi owakakwamako?

¹⁸ Ekithunga kikongera erighuma abalere n’abakulire abosi bakalhangirana mw’ab’obughuli. Omo mwatsi owakakwamako, thukendisya kania okwa mibere eyo abakulire banga kanganiryamu ku bakalhangira abalere abali omwa kithunga mw’ab’obughuli.