1-2. (a) Akɔdin to Prɔvabs 16:​31, aw wi fɔ si fetful wan dɛn we dɔn ol? (b) Us kwɛstyɔn dɛn wi go ansa insay dis atikul?

 WAN pak de na Amɛrika usay sɔntɛm yu go si dayamɔn na grɔn. Bɔt dɛn nɔ pɔlish dɛn dayamɔn dɛn de fɔ mek dɛn go yuz dɛn fɔ mek riŋ, chen, wɔch, yerin, ɔ ɔda tin dɛn we rili gɛt valyu. So bɔku pipul dɛn we de si dɛn dayamɔn dɛn de nɔ kin no se na ston dɛn we rili gɛt valyu, ɛn sɔntɛm dɛn nɔ kin luk fayn na dɛn yay.

² Jɔs lɛk dɛn dayamɔn dɛn de, wi brɔda ɛn sista dɛn we dɔn ol dɛnsɛf gɛt valyu. Gɔd in Wɔd kɔmpia dɛn wet ia to krawn. (Rid Prɔvabs 16:​31, NWT; 20:​29) Bɔt i kin izi fɔ lɛ wi nɔ notis dɛn wi brɔda ɛn sista dɛn ya we gɛt valyu. We yɔŋ wan dɛn ɔndastand se di ol wan dɛn gɛt valyu, dat de mek dɛn gɛt sɔntin we gɛt valyu pas jɛntri. Insay dis atikul, wi go ansa tri kwɛstyɔn dɛn: Wetin mek Jiova rili valyu fetful wan dɛn we dɔn ol? Wetin mek brɔda ɛn sista dɛn we dɔn ol impɔtant to Jiova in ɔganayzeshɔn? Wetin wi go du fɔ lan frɔm dɛn ɛgzampul?

3. Akɔdin to wetin de na Di Sam Dɛm 92:​12-15, wetin mek fetful brɔda ɛn sista dɛn we dɔn ol valyu to Jiova?

³ Fetful brɔda ɛn sista dɛn we dɔn ol, valyu to Jiova Gɔd. I no di kayn pipul dɛn we dɛn bi, ɛn i valyu dɛn wɔndaful kwaliti dɛn. I kin gladi we i de si di wan dɛn we dɔn ol de ɛp yɔŋ wan dɛn fɔ bɛnifit frɔm di sɛns ɛn ɛkspiriɛns we dɛn dɔn gɛt fɔ lɔng tɛm na Jiova in savis. (Job 12:​12; Prɔv. 1:​1-4) Jiova valyu bak di bia we dɛn de bia. (Mal. 3:​16) Dɛn dɔn de gɛt prɔblɛm dɛn na dɛn layf,  bɔt dɛn kɔntinyu fɔ gɛt strɔng fet pan Jiova. Dɛn op fɔ tumara bambay dɔn strɔng mɔ pas trade we dɛn bin jɔs lan di trut. Ɛn Jiova lɛk dɛn bikɔs dɛn de kɔntinyu fɔ tɔk bɔt in nem “pan ɔl we dɛn dɔn ol.”—Rid Di Sam Dɛm 92:​12-15.

4. Wetin go ɛnkɔrej wi brɔda ɛn sista dɛn we dɔn ol?

⁴ If yu dɔn de ol, no se Jiova de mɛmba di wok we yu bin dɔn du trade. (Ibru. 6:​10) Yu dɔn du yu bɛst fɔ sɔpɔt di prichin wok, ɛn dat de mek wi Papa we de na ɛvin, gladi. Yu dɔn bia prɔblɛm dɛn, ivin prɔblɛm dɛn we mek yu at rili pwɛl. Yu dɔn obe ɛn difɛnd di tru tin dɛn we di Baybul de tich. Yu dɔn kia fɔ impɔtant wok dɛn na Jiova in ɔganayzeshɔn fetful wan, ɛn yu dɔn tren ɔda pipul dɛn. Yu dɔn du yu bɛst fɔ ajɔst to di bɔku chenj dɛn we Jiova in ɔganayzeshɔn de mek. Yu dɔn sɔpɔt ɛn ɛnkɔrej ɔda wan dɛn we de na ful-taym savis. Jiova rili lɛk yu fɔ we yu nɔ de kɔmɔt biɛn am. I prɔmis se i “nɔ go lɛf” udat nɔ de kɔmɔt biɛn am. (Sam 37:​28) I prɔmis yu se: “Te [yu] gɛt wet ia [yu] go stil bi mi pikin.” (Ayz. 46:​4, NWT) So nɔ tink se bikɔs yu dɔn ol, yu nɔ impɔtant igen na Jiova in ɔganayzeshɔn. Yu rili valyu.

5. Wetin wi brɔda ɛn sista dɛn we dɔn ol fɔ mɛmba?

⁵ Brɔda ɛn sista dɛn we dɔn ol gɛt bɔku tin fɔ gi. Pan ɔl we sɔntɛm dɛn nɔ gɛt di trɛnk we dɛn bin gɛt trade, dɛn stil gɛt bɔku ɛkspiriɛns. Jiova go kɔntinyu fɔ yuz dɛn difrɛn we dɛn, as di ɛgzampul dɛn frɔm trade ɛn insay wi yon tɛm sho.

6-7. Gi ɛgzampul dɛn frɔm di Baybul bɔt ol pipul dɛn we Jiova bin blɛs bikɔs dɛn bin kɔntinyu fɔ sav am.

⁶ Wi go lan bɔt gud ɛgzampul dɛn na di Baybul bɔt fetful pipul dɛn we bin kɔntinyu fɔ sav Jiova ivin we dɛn dɔn ol. Fɔ ɛgzampul, Mozis bin ol lɛk 80 ia we Jiova bin pik am fɔ bi prɔfɛt ɛn lida fɔ di Izrɛlayt dɛn. Jiova bin stil kɔntinyu fɔ yuz Daniɛl as In prɔfɛt pan ɔl we sɔntɛm  i bin dɔn pas 90 ia. Ɛn i go mɔs bi se apɔsul Jɔn bak bin dɔn pas 90 ia we Jiova bin dayrɛkt am fɔ rayt di Baybul buk we nem Rɛvɛleshɔn.

⁷ Bɔku ɔda fetful wan dɛn bin de we bɔku pipul dɛn nɔ no, ɛn sɔntɛm pipul dɛn nɔ bin notis dɛn. Bɔt stil, Jiova bin notis dɛn, ɛn i bin blɛs dɛn fɔ we dɛn nɔ bin kɔmɔt biɛn am. Fɔ ɛgzampul, di Baybul jɔs tɔk smɔl bɔt Simiɔn we na man “we bin ol Gɔd biznɛs wit tu an ɛn we de du wetin rayt.” Bɔt Jiova bin no udat i bin bi, ɛn I bin ɔnɔ am we I mek i si Jizɔs di tɛm we Jizɔs na bin yɔŋbebi ɛn tɔk bɔt wetin gɛt fɔ apin to di pikin ɛn in mama. (Lyuk 2:​22, 25-35) Tink bak bɔt di uman prɔfɛt we in man bin dɔn day, we na Ana. I bin ol 84 ia, bɔt “i bin de [go] na di tɛmpul ɔltɛm.” Jiova bin blɛs am bikɔs i bin de go na di tɛmpul ɔltɛm, ɛn I bin alaw am fɔ si Jizɔs. Simiɔn ɛn Ana bin valyu to Jiova.—Lyuk 2:​36-38.

8-9. Wetin wan sista bin du na Jiova in ɔganayzeshɔn we in man bin day?

⁸ Insay wi yon tɛm, bɔku fetful brɔda ɛn sista dɛn we dɔn ol na fayn ɛgzampul dɛn fɔ di yɔŋ dɛn. Lɛ wi tɔk bɔt Sista Lɔis Dida in ɛgzampul. I bin jɔs ol 21 ia we i bin bigin fɔ sav as spɛshal payɔnia na Kanada. Afta dat, in ɛn in man, Jɔn, bin spɛn lɔng tɛm fɔ du di sakit wok. Leta, dɛn bin wok pas 20 ia na Bɛtɛl insay Kanada. We Lɔis bin ol 58 ia, dɛn bin invayt in ɛn Jɔn fɔ go wok na Yukren. Wetin dɛn go du? Fɔ se dɛn go tink se dɛn dɔn ol fɔ go de na ɔda kɔntri? Dɛn bin gri fɔ go, ɛn dɛn apɔynt Jɔn as Branch Kɔmiti mɛmba na Yukren. Afta sɛvin ia leta we Jɔn day, Lɔis bin disayd fɔ kɔntinyu wit in asaynmɛnt. Naw, Lɔis dɔn ol 81 ia. I stil de sav Jiova fetful wan wit di Bɛtɛl famili na Yukren, ɛn dɛn rili lɛk am.

⁹ Uman dɛn we dɛn man dɔn day, lɛk Lɔis, i nɔ kin izi fɔ mek dɛn notis dɛn lɛk di tɛm we dɛn man bin de alayv. Bɔt dat nɔ min se dɛn nɔ gɛt valyu. Jiova de rili valyu sista dɛn we bin sɔpɔt dɛn man fɔ lɔng tɛm ɛn stil de kɔntinyu fɔ sav Am fetful wan. (1 Tim. 5:​3) Dɔn bak, dɛn de ɛnkɔrej yɔŋ wan dɛn.

10. Us fayn ɛgzampul Toni sɛt?

¹⁰ Di bɔku fetful brɔda ɛn sista dɛn we dɔn ol we de usay dɛn de kia fɔ pipul dɛn we dɔn ol, stil gɛt valyu. Fɔ ɛgzampul, wan brɔda we nem Toni, de usay dɛn de kia fɔ pipul dɛn we dɔn ol. I bin baptayz insay Pɛnsilvenia na Amɛrika, insay Ɔgɔst 1942 we i bin ol 20 ia. Jɔs afta i baptayz, dɛn bin tɛl am fɔ jɔyn di ami. Bikɔs i nɔ bin gri fɔ jɔyn, dɛn bin put am na prizin fɔ tu ɛn af ia. In ɛn in wɛf we  nem Ilda, mɛn tu pikin dɛn na di trut. As tɛm de go, Toni bin sav as di prisaydin ovasia * na tri kɔngrigeshɔn dɛn ɛn as sakit asɛmbli ovasia. I bin de go na wan prizin fɔ kɔndɔkt mitin ɛn Baybul stɔdi dɛn. Toni stil nɔ rɛdi yet fɔ lɛf fɔ wok fɔ Jiova pan ɔl we i dɔn ol 98 ia. I de kɔntinyu fɔ du in bɛst fɔ sav Jiova wit di brɔda ɛn sista dɛn na in kɔngrigeshɔn.

11. Aw wi go sho se wi valyu di wan dɛn we de usay dɛn kin kia fɔ pipul dɛn we dɔn ol ɔ we de na wi kɔngrigeshɔn?

¹¹ Aw wi go sho ɔnɔ to brɔda ɛn sista dɛn we dɔn ol, we de usay dɛn kin kia fɔ ol pipul dɛn ɔ we de na wi kɔngrigeshɔn? Ɛnitɛm i pɔsibul, ɛlda dɛn kin ɛp dɛn, lɛk fɔ atɛnd ɔ fɔ lisin to di mitin dɛn ɛn fɔ prich. Wisɛf kin gi dɛn wi atɛnshɔn bay we wi de go fɛn dɛn ɔ du vidio kɔl wit dɛn. Wi want fɔ gi atɛnshɔn mɔ to ol wan dɛn we di say we dɛn de, de fa frɔm dɛn kɔngrigeshɔn. Wi nid fɔ tek tɛm mek wi nɔ fɔgɛt bɔt dɛn brɔda ɛn sista dɛn ya we dɔn ol. We wi de tɔk wit brɔda ɛn sista dɛn we dɔn ol, sɔntɛm i nɔ kin izi fɔ sɔm pan dɛn fɔ tɔk bɔt wetin bin dɔn apin to dɛn, ɔ dɛn go tink se i nɔ go fayn fɔ mek dɛn du dat. Bɔt wi go rili bɛnifit if wi tek di tɛm fɔ aks dɛn kwɛstyɔn dɛn ɛn lisin we dɛn de tɛl wi bɔt di gladi-at we dɛn dɔn gɛt na Jiova in ɔganayzeshɔn.

12. Uskayn brɔda ɛn sista dɛn wi go fɛn na wi kɔngrigeshɔn?

¹² Sɔntɛm wi go sɔprayz fɔ no se wi gɛt ol brɔda ɛn sista dɛn na wi yon kɔngrigeshɔn we dɔn sɛt fayn ɛgzampul fɔ wi bay di we aw dɛn sav Jiova fetful wan. Wan sista we nem Ariɛt bin sav Jiova fetful wan fɔ lɔng tɛm na in kɔngrigeshɔn insay Nyu Jazi na Amɛrika. Bɔt i bin gɛt fɔ muf go to in galpikin. Di brɔda ɛn sista dɛn na in nyu kɔngrigeshɔn bin mek tɛm fɔ sabi am, ɛn dɛn kam fɔ no se in na gud ɛgzampul bɔt pɔsin we gɛt fet. I bin ɛnkɔrej dɛn wit stori dɛn bɔt aw i bin de go fil savis di tɛm we i jɔs lan di trut arawnd di ia 1925. Da tɛm de, i bin de waka wit titbrɔsh ɔltɛm we i bin de go prich bikɔs i bin no se i pɔsibul fɔ lɛ dɛn arɛst am ɛn put am na prizin fɔ sɔm tɛm. Infakt, insay di ia 1933 dɛn bin arɛst am tu tɛm, ɛn ɔl tu dɛn tɛm dɛn de, i bin spɛn wan wik na jel. In man nɔto bin Jiova Witnɛs, bɔt i bin de sɔpɔt am. We Ariɛt bin de na jel, in man bin de kia fɔ dɛn tri smɔl pikindɛn. Fɔ tru, ol wan dɛn we fetful lɛk Ariɛt fit fɔ gɛt ɔnɔ.

13. Wetin wi dɔn lan bɔt di valyu we ol wan dɛn gɛt na Jiova in ɔganayzeshɔn?

¹³ Wi brɔda ɛn sista dɛn we dɔn ol, gɛt impɔtant tin fɔ du na Jiova in ɔganayzeshɔn. Dɛn dɔn si di bɔku difrɛn we dɛn we Jiova dɔn sho se i de wit in ɔganayzeshɔn, ɛn i ivin de wit dɛn. Dɛn dɔn lan impɔtant lɛsin frɔm dɛn mistek dɛn. Si di sɛns we dɛn gɛt lɛk “spriŋ wata,” ɛn lan frɔm dɛn. (Prɔv. 18:​4) If yu mek tɛm fɔ sabi dɛn, yu go ebul fɔ gɛt mɔ fet, ɛn yu go lan bɔku tin.

14. Wetin Ditarɔnɔmi 32:​7 de ɛnkɔrej yɔŋ wan dɛn fɔ du?

¹⁴ I go fayn fɔ mek yu go tɔk wit di ol wan dɛn fɔs. (Rid Ditarɔnɔmi 32:​7.) Na tru se dɛn nɔ go de si bɛtɛ igen, dɛn go  de waka wan wan, ɛn dɛn nɔ go de tɔk lawd igen, bɔt dɛn stil want fɔ du mɔ, ɛn dɛn gɛt “gudnem” to Jiova. (Ɛkli. 7:​1) Na fɔ mɛmba wetin mek Jiova valyu dɛn. Kɔntinyu fɔ ɔnɔ dɛn. Falamakata Ilaysha. Di las de we in ɛn Ilayja bin de togɛda, i nɔ bin gri fɔ lɛf am. I bin tɛl Ilayja tri tɛm se “i nɔ go lɛf am.”—2 Kiŋ 2:​2, 4, 6.

15. Us kwɛstyɔn dɛn go fayn fɔ aks ol wan dɛn?

¹⁵ Sho se yu rili bisin bɔt di ol wan dɛn bay we yu de tek tɛm aks dɛn kwɛstyɔn. (Prɔv. 1:​5; 20:​5; 1 Tim. 5:​1, 2) Yu kin aks dɛn kwɛstyɔn dɛn lɛk: “We yu bin yɔŋ, wetin bin mek yu biliv tranga wan se yu dɔn fɛn di trut?” Aw di tin dɛn we bin apin to yu dɔn ɛp yu fɔ kam nia Jiova mɔ ɛn mɔ?” “Wetin dɔn ɛp yu fɔ kɔntinyu fɔ gɛt gladi-at we yu de sav Jiova?” (1 Tim. 6:​6-8) Dɔn, lisin to dɛn we dɛn de tɛl yu dɛn stori.

16. Aw di ol wan dɛn ɛn di yɔŋ wan dɛn kin bɛnifit we dɛn de tɔk to dɛnsɛf?

¹⁶ We di ol wan dɛn ɛn di yɔŋ wan dɛn de tɔk, dɛn kin rili ɛnkɔrej dɛnsɛf. (Rom. 1:​12) Yɔŋ wan dɛn, we una tɔk wit dɛn, una go gladi mɔ ɛn mɔ we una kam fɔ no bɔt di we aw Jiova de kia fɔ in fetful savant dɛn, ɛn di ol brɔda ɔ sista insɛf go no se una lɛk am. I go gladi fɔ tɛl una bɔt aw Jiova dɔn blɛs am.

17. Wetin mek wi go se wi fetful brɔda ɛn sista dɛn we dɔn ol de fayn mɔ ɛn mɔ as tɛm de go?

¹⁷ Bɔku tɛm, we pɔsin ol, i nɔ kin fayn igen lɛk aw i bin fayn we i yɔŋ. Bɔt di wan dɛn we nɔ de kɔmɔt biɛn Jiova de kɔntinyu fɔ fayn mɔ ɛn mɔ na Jiova in yay as tɛm de go. (1 Tɛs. 1:​2, 3) Wetin mek? Na bikɔs insay ɔl dɛn ia dɛn ya we dɔn pas, dɛn dɔn alaw Gɔd in spirit fɔ tren dɛn ɛn ɛp dɛn fɔ gɛt fayn kwaliti dɛn. Di mɔ we wi de sabi dɛn wi ol brɔda ɛn sista dɛn ya ɛn lan frɔm dɛn, na di mɔ wi go ɔnɔ dɛn ɛn si dɛn as pipul dɛn we rili gɛt valyu.

18. Wetin wi go tɔk bɔt insay di nɛks atikul?

¹⁸ Di kɔngrigeshɔn nɔ jɔs de go bifo we yɔŋ wan dɛn de valyu ol wan dɛn, bɔt i de go bifo bak we ol wan dɛn de valyu yɔŋ wan dɛn. Insay wi nɛks atikul, wi go tɔk bɔt aw ol wan dɛn go sho se dɛn valyu yɔŋ wan dɛn na di kɔngrigeshɔn.